Ezekiel 13 — Coptic (Sahidic)

1 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

2 ϫⲉⲡϣⲏⲣⲉ ⲙⲡⲣⲱⲙⲉ ⲡⲣⲟⲫⲏⲧⲉⲩⲉ ⲉϫⲛⲛⲉⲡⲣⲟⲫⲏⲧⲏⲥ ⲙⲡⲓⲥⲣⲁⲏⲗ ⲛⲅⲡⲣⲟⲫⲏⲧⲉⲩⲉ ⲛⲅϫⲟⲟⲥ ⲛⲁⲩ ϫⲉⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ

3 ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲟⲩⲟⲉⲓ ⲛⲛⲉⲧⲡⲣⲟⲫⲏⲧⲉⲩⲉ ⲉⲃⲟⲗ ϩⲙⲡⲉⲩϩⲏⲧ ⲙⲙⲓⲛⲙⲙⲟⲟⲩ ⲛⲥⲉⲛⲁⲩ ⲉⲃⲟⲗ ⲁⲛ ⲉⲡⲧⲏⲣϥ

4 ⲛⲉⲕⲡⲣⲟⲫⲏⲧⲏⲥ ⲡⲓⲥⲣⲁⲏⲗ ⲉⲩⲟ ⲛⲧϩⲉ ⲛϩⲉⲛⲃⲁϣⲟⲣ ϩⲓⲡϫⲁⲓⲉ

5 ⲙⲡⲟⲩⲁϩⲉⲣⲁⲧⲟⲩ ϩⲛⲟⲩⲧⲁϫⲣⲟ ⲁⲩⲱ ⲛⲧⲟⲟⲩ ⲁⲩⲥⲱⲟⲩϩ ⲉϩⲟⲩⲛ ⲛϩⲉⲛⲟϩⲉ ⲉϫⲙⲡⲏⲓ ⲙⲡⲓⲥⲣⲁⲏⲗ ⲙⲡⲟⲩⲧⲱⲟⲩⲛ ⲛϭⲓⲛⲉⲧϫⲱ ⲙⲙⲟⲥ ϩⲙⲡⲉϩⲟⲟⲩ ⲙⲡϫⲟⲉⲓⲥ

6 ⲉⲩⲛⲁⲩ ⲉϩⲉⲛϭⲟⲗ ⲉⲩϣⲓⲛⲉ ⲛⲥⲁϩⲉⲛⲡⲉⲧϣⲟⲩⲉⲓⲧ ⲛⲉⲧϫⲱ ⲙⲙⲟⲥ ϫⲉⲡⲉϫⲉⲡϫⲟⲉⲓⲥ ⲁⲩⲱ ⲙⲡⲉⲡϫⲟⲉⲓⲥ ϫⲟⲟⲩⲥⲟⲩ ⲁⲩⲁⲣⲭⲉⲓ ⲛⲧⲁϩⲟ ⲉⲣⲁⲧϥ ⲛⲟⲩϣⲁϫⲉ

7 ⲙⲏ ⲟⲩϩⲟⲣⲁⲥⲓⲥ ⲁⲛ ⲛⲛⲟⲩϫ ⲧⲉⲛⲧⲁⲧⲉⲧⲛⲛⲁⲩ ⲉⲣⲟⲥ ⲁⲩⲱ ϩⲉⲛϣⲓⲛⲉ ⲁⲛ ⲉⲩϣⲟⲩⲉⲓⲧ ⲛⲉⲛⲧⲁⲧⲉⲧⲛⲛⲁⲩ ⲉⲣⲟⲟⲩ

8 ⲉⲧⲃⲉⲡⲁⲓ ⲁϫⲓⲥ ⲛⲁⲩ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲃⲟⲗ ϫⲉⲛⲉⲧⲛϣⲁϫⲉ ϩⲉⲛϭⲟⲗ ⲛⲉ ⲁⲩⲱ ⲡⲉⲧⲛϣⲓⲛⲉ ⲥⲉϣⲟⲩⲉⲓⲧ ⲉⲧⲃⲉⲡⲁⲓ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲉϫⲛⲧⲏⲩⲧⲛ ⲡⲉϫⲉⲡϫⲟⲉⲓⲥ

9 ϯⲛⲁⲥⲟⲟⲩⲧⲛ ⲛⲧⲁϭⲓϫ ⲉⲃⲟⲗ ⲉϫⲛⲛⲉⲧⲛⲡⲣⲟⲫⲏⲧⲏⲥ ⲛⲁⲓ ⲉⲧⲛⲁⲩ ⲉϩⲉⲛϭⲟⲗ ⲁⲩⲱ ⲉⲧϫⲱ ⲛⲙⲡⲉⲧϣⲟⲩⲉⲓⲧ ⲛⲥⲉⲛⲁϣⲱⲡⲉ ⲁⲛ ϩⲛⲧⲉⲥⲃⲱ ⲙⲡⲁⲗⲁⲟⲥ ⲟⲩⲇⲉ ⲛⲥⲉⲛⲁⲥϩⲁⲓⲥⲟⲩ ⲁⲛ ⲉⲅⲣⲁⲫⲏ ⲙⲡⲏⲓ ⲙⲡⲓⲥⲣⲁⲏⲗ ⲁⲩⲱ ⲛⲛⲉⲩⲃⲱⲕ ⲉϩⲟⲩⲛ ⲉⲡⲕⲁϩ ⲙⲡⲓⲥⲣⲁⲏⲗ ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

10 ⲉⲧⲃⲉϫⲉⲁⲩⲡⲗⲁⲛⲁ ⲙⲡⲁⲗⲁⲟⲥ ⲉⲩϫⲱ ⲙⲙⲟⲥ ϫⲉⲧⲉⲓⲣⲏⲛⲏ ⲁⲩⲱ ⲛⲛⲛ ⲉⲉⲓⲣⲏⲛⲏ ⲡⲁⲓ ϥⲕⲱⲧ ⲛⲟⲩϫⲟ ⲛⲧⲟⲟⲩ ⲇⲉ ⲥⲉϫⲱϩ ⲙⲙⲟⲥ ⲥⲛⲁϩⲉ ⲉϩⲣⲁⲓ

11 ⲁϫⲓⲥ ⲛⲛⲁϩⲣⲙⲡⲉⲧϫⲱϩ ⲙⲙⲟⲥ ϫⲉⲥⲛⲁϩⲉ ⲉϩⲣⲁⲓ ⲁⲩⲱ ϥⲛⲁϣⲱⲡⲉ ⲛϭⲓⲟⲩⲙⲟⲩⲛϩⲱⲟⲩ ⲛϥⲱⲙⲥ ⲁⲩⲱ ϩⲉⲛⲱⲛⲉ ⲙⲡⲉⲧⲣⲁ ϯⲛⲁⲧⲁⲁⲩ ⲉϩⲣⲁⲓ ⲉⲛⲉⲩⲟⲩⲱϣ ⲛⲥⲉϩⲉ ⲉϩⲣⲁⲓ ⲁⲩⲱ ⲟⲩⲡⲛⲉⲩⲙⲁ ⲛϩⲁⲧⲏⲩ ϯⲛⲁⲧⲁⲁϥ ⲛⲥⲉⲃⲱⲣϭ

12 ⲁⲩⲱ ⲉⲓⲥ ϩⲏⲏⲧⲉ ⲁⲧϫⲟ ϩⲉ ⲉϩⲣⲁⲓ ⲛⲥⲉⲛⲁϫⲟⲟⲥ ⲁⲛ ⲛⲏⲧⲛ ϫⲉⲉϥⲧⲱⲛ ⲡⲧⲉⲧⲛϫⲱϩ ⲛⲧⲁⲧⲉⲧⲛϫⲁϩϥ

13 ⲉⲧⲃⲉⲡⲁⲓ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉϯⲛⲁⲣⲱϩⲧ ⲛⲟⲩⲧⲏⲩ ⲉϥⲛⲁϣⲧ ϩⲙⲡⲁϭⲱⲛⲧ ⲁⲩⲱ ⲟⲩⲙⲟⲩⲛϩⲱⲟⲩ ⲉϥⲟϣ ϩⲛⲧⲁⲟⲣⲅⲏ ⲉϥⲉϣⲱⲡⲉ ⲁⲩⲱ ⲛⲱⲛⲉ ⲙⲡⲉⲧⲣⲁ ϯⲛⲁⲛⲧⲟⲩ ϩⲙⲡⲁϭⲱⲛⲧ ⲉⲟϫⲛⲟⲩ

14 ⲁⲩⲱ ϯⲛⲁϣⲟⲣϣⲣ ⲛⲧϫⲟ ⲛⲧⲁⲧⲉⲧⲛϫⲁϩⲥ ⲛⲧⲁⲣⲁϩⲧⲥ ⲉϫⲙⲡⲕⲁϩ ⲛⲥⲉϭⲱⲗⲡ ⲉⲃⲟⲗ ⲛϭⲓⲛⲉⲥⲥⲛⲧⲉ ⲛⲥⲉϩⲉ ⲉϩⲣⲁⲓ ⲁⲩⲱ ⲛⲧⲉⲧⲛⲱϫⲛ ϩⲛⲟⲩϫⲡⲓⲟ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

15 ⲁⲩⲱ ϯⲛⲁϫⲱⲕ ⲉⲃⲟⲗ ⲙⲡⲁϭⲱⲛⲧ ⲉϫⲛⲧⲉⲓϫⲟ ⲛⲥϩⲉ ⲉϩⲣⲁⲓ ⲉϫⲛⲛⲉⲧϫⲱϩ ⲙⲙⲟⲥ ⲁⲩⲱ ⲁⲓϫⲟⲟⲥ ⲛⲏⲧⲛ ϫⲉⲙⲏ ⲛⲧⲉⲓϫⲟ ⲁⲛ ⲙⲛⲛⲉⲧϫⲱϩ ⲙⲙⲟⲥ ⲛⲉ

16 ⲛⲉⲡⲣⲟⲫⲏⲧⲏⲥ ⲙⲡⲓⲥⲣⲁⲏⲗ ⲛⲉⲧⲡⲣⲟⲫⲏⲧⲉⲩⲉ ⲛⲧϩⲓⲉⲣⲟⲩⲥⲁⲗⲏⲙ ⲉⲩⲛⲁⲩ ⲛⲁⲥ ⲉⲩϩⲟⲣⲁⲥⲓⲥ ⲛⲉⲓⲣⲏⲛⲏ ⲁⲩⲱ ⲙⲙⲛⲉⲓⲣⲏⲛⲏ ⲡⲉϫⲉⲡϫⲟⲉⲓⲥ

17 ⲛⲧⲟⲕ ϩⲱⲱⲕ ⲡϣⲏⲣⲉ ⲙⲡⲣⲱⲙⲉ ⲙⲁⲧⲁϫⲣⲉⲡⲉⲕϩⲟ ⲉϫⲛⲛϣⲉⲉⲣⲉ ⲙⲡⲉⲕⲗⲁⲟⲥ ⲛⲉⲧⲡⲣⲟⲫⲏⲧⲉⲩⲉ ⲉⲃⲟⲗ ϩⲙⲡⲉⲩϩⲏⲧ

18 ⲟⲩⲟⲓ ⲛⲛⲉⲧⲧⲱⲣⲡ ⲛϩⲛϣⲟⲧ ϩⲁⲕⲉⲗⲉⲅⲕⲉϩ ⲛⲓⲙ ⲛϭⲓϫ

19 ⲁⲩⲃⲟⲧⲧ ⲛⲁϩⲣⲙ ⲡⲁⲗⲁⲟⲥ ⲉⲧⲃⲉⲛϭⲓϫ ⲛⲉⲓⲱⲧ ⲁⲩⲱ ⲉⲧⲃⲉϩⲉⲛⲗⲟⲕⲙ ⲛⲁⲉⲓⲕ

22 ⲧⲉⲧⲛⲡⲱϣⲥ ⲉⲃⲟⲗ ⲙⲡϩⲏⲧ ⲙⲡⲇⲓⲕⲁⲓⲟⲥ ⲉⲛⲁⲛⲟⲕ ⲁⲛ ⲡⲉⲛⲧⲁⲓⲡⲟϣⲥϥ ⲉⲃⲟⲗ ⲁⲩⲱ ⲁⲧⲉⲧⲛϯϭⲟⲙ ⲛⲛϭⲓϫ ⲙⲡⲁⲛⲟⲙⲟⲥ ⲉⲧⲙⲧⲣⲉϥⲕⲧⲟϥ ⲉⲃⲟⲗ ⲉⲡⲧⲏⲣϥ ϩⲛⲧⲉϥϩⲓⲏ ⲉⲧϩⲟⲟⲩ ⲛϥⲱⲛϩ

23 ⲉⲧⲃⲉⲡⲁⲓ ⲛⲧⲉⲧⲛⲁⲛⲁⲩ ⲁⲛ ⲟⲩⲧⲉ ⲛⲧⲉⲧⲛⲛⲁⲕⲉⲧⲧⲏⲩⲧⲛ ⲁⲛ ⲉϫⲱ ⲛϩⲉⲛϣⲓⲛⲉ ϫⲓⲛⲧⲉⲛⲟⲩ ⲁⲩⲱ ϯⲛⲁⲛⲟⲩ ϩⲙⲙⲡⲁⲗⲁⲟⲥ ⲉⲃⲟⲗ ϩⲛⲛⲉⲧⲛϭⲓϫ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ