Ezekiel 12 — Coptic (Sahidic)

1 ⲡϣⲁϫⲉ ⲙϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

2 ϫⲉⲡϣⲏⲣⲉ ⲙⲡⲣⲱⲙⲉ ⲛⲧⲟⲕ ⲉⲕϣⲟⲟⲡ ϩⲛⲧⲙⲏⲧⲉ ⲛⲛⲉⲩⲁⲇⲓⲕⲓⲁ ⲛⲁⲓ ⲉⲩⲛⲃⲁⲗ ⲙⲙⲟⲟⲩ ⲉⲧⲣⲉⲩⲛⲁⲩ ⲛⲥⲉⲛⲁⲩ ⲉⲃⲟⲗ ⲁⲛ ⲟⲩⲛⲙⲁⲁϫⲉ ⲙⲙⲟⲟⲩ ⲉⲧⲣⲉⲩⲥⲱⲧⲙ ⲛⲥⲉⲥⲱⲧⲙ ⲁⲛ ⲉⲧⲃⲉϫⲉⲟⲩⲏⲓ ⲛⲣⲉϥϯϭⲱⲛⲧ ⲡⲉ

3 ⲛⲧⲟⲕ ⲇⲉ ⲡϣⲏⲣⲉ ⲙⲡⲣⲱⲙⲉ ⲙⲁⲧⲁⲙⲓⲟ ⲛⲁⲕ ⲛϩⲉⲛⲥⲕⲉⲩⲏ ⲛⲁⲓⲭⲙⲁⲗⲱⲥⲓⲁ ⲙⲡⲉϩⲟⲟⲩ ⲙⲡⲉⲩⲙⲧⲟ ⲉⲃⲟⲗ ⲁⲩⲱ ⲛⲥⲉⲁⲓⲭⲙⲁⲗⲱⲧⲓⲍⲉ ⲙⲙⲟⲕ ⲉⲃⲟⲗ ϩⲙⲡⲉⲕⲙⲁ ⲉϩⲣⲁⲓ ⲉⲕⲉⲙⲁ ⲙⲡⲉⲩⲙⲧⲟ ⲉⲃⲟⲗ ϫⲉⲕⲁⲥ ⲉⲩⲉⲛⲁⲩ ⲉⲧⲃⲉϫⲉⲟⲩⲏⲓ ⲛⲣⲉϥϯϭⲱⲛⲧ ⲡⲉ

4 ⲁⲩⲱ ⲉⲕⲉⲉⲓⲛⲉ ⲉⲃⲟⲗ ⲛⲛⲉⲕⲥⲕⲉⲩⲏ ϩⲉⲛⲥⲕⲉⲩⲏ ⲛⲁⲓⲭⲙⲁⲗⲱⲥⲓⲁ ⲙⲡⲉϩⲟⲟⲩ ⲙⲡⲉⲩⲙⲧⲟ ⲉⲃⲟⲗ ⲁⲩⲱ ⲛⲧⲟⲕ ⲉⲕⲉⲉⲓ ⲉⲃⲟⲗ ⲙⲡⲛⲁⲩ ⲛⲣⲟⲩϩⲉ ⲙⲡⲉⲙⲧⲟ ⲉⲃⲟⲗ ⲛⲛⲉⲩⲃⲁⲗ ⲛⲧϩⲉ ⲉϣⲁϥⲉⲓ ⲉⲃⲟⲗ ⲛϭⲓⲟⲩⲁⲓⲭⲙⲁⲗⲱⲧⲟⲥ

5 ϣⲟϫⲧ ⲛⲁⲕ ⲉⲩϫⲟ ⲛⲅⲉⲓ ⲉⲃⲟⲗ ⲛϩⲏⲧⲥ ⲙⲡⲉⲩⲙⲧⲟ ⲉⲃⲟⲗ

6 ⲉⲩϥⲓ ⲙⲙⲟⲕ ϩⲓϫⲛⲛⲉⲩⲛⲁϩⲃ ⲉⲕⲉⲉⲓ ⲉⲃⲟⲗ ⲉⲕϩⲏⲡ ⲉⲕⲉϩⲱⲃⲥ ⲙⲡⲉⲕϩⲟ ⲁⲩⲱ ⲛⲉⲕⲛⲁⲩ ⲉⲃⲟⲗ ⲁⲛ ⲉⲡⲕⲁϩ ⲉⲃⲟⲗ ϫⲉⲁⲓⲧⲁⲁⲕ ⲛⲟⲩⲙⲁⲉⲓⲛ ⲙⲡⲏⲓ ⲙⲡⲓⲥⲣⲁⲏⲗ

7 ⲁⲩⲱ ⲁⲓⲉⲓⲣⲉ ⲛⲧⲉⲓϩⲉ ⲕⲁⲧⲁϩⲱⲃ ⲛⲓⲙ ⲛⲧⲁϥϩⲱⲛ ⲙⲙⲟⲟⲩ ⲉⲧⲟⲟⲧⲁⲓⲉⲓⲛⲉ ⲉⲃⲟⲗ ⲛⲛⲉⲥⲕⲏⲩⲏ ⲛⲧⲁⲓⲭⲙⲁⲗⲱⲥⲓⲁ ⲙⲡⲉϩⲟⲟⲩ ⲁⲩⲱ ⲣⲟⲩϩⲉ ⲁⲓϣⲟϫⲧ ⲛⲁⲓ ϩⲛⲧϫⲟ ⲁⲩⲱ ⲁⲓⲉⲓ ⲉⲃⲟⲗ ⲉⲓϩⲏⲡ ⲉⲩϥⲓ ⲙⲙⲟⲓ ϩⲓϫⲛⲛⲉⲩⲛⲁϩⲃ ⲙⲡⲉⲩⲙⲧⲟ ⲉⲃⲟⲗ

8 ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲙⲡⲛⲁⲩ ⲛϩⲧⲟⲟⲩⲉ ⲉϥϫⲱ ⲙⲙⲟⲥ

9 ϫⲉⲡϣⲏⲣⲉ ⲙⲡⲣⲱⲙⲉ ⲙⲡⲟⲩϫⲟⲟⲥ ⲛⲁⲕ ⲛϭⲓⲛⲁⲡⲏⲓ ⲙⲡⲓⲥⲣⲁⲏⲗ ⲛⲉⲧϯϭⲱⲛⲧ ϫⲉⲉⲕⲣⲟⲩ ⲛⲧⲟⲕ ϩⲓⲛⲁⲓ

10 ⲁϫⲓⲥ ϭⲉ ⲛⲁⲩ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲡⲁⲣⲭⲱⲛ ⲙⲛⲡϩⲏⲅⲟⲩⲙⲉⲛⲟⲥ ⲉⲧϩⲛ ⲙⲛⲡⲏⲓ ⲧⲏ ⲛⲧⲉⲡⲓⲥⲣⲁⲏⲗ ⲛⲉⲧϣⲟⲟⲡ ϩⲛⲧⲉⲩⲙⲏⲧⲉ

11 ⲁϫⲓⲥ ⲛⲁⲩ ϫⲉϩⲉⲛⲙⲁⲉⲓⲛ ⲛⲉⲧⲓⲉⲓⲣⲉ ⲙⲙⲟⲟⲩ ⲁⲛⲟⲕ ⲛⲧϩⲉ ⲛⲧⲁⲓⲁⲁⲥ ⲧⲁⲓ ⲧⲉ ⲧϩⲉ ⲉⲧⲛⲁϣⲱⲡⲉ ⲛⲁϥ ⲥⲉⲛⲁϣⲱⲡⲉ ⲉⲩⲡⲱⲱⲛⲉ ⲉⲃⲟⲗ ϩⲛⲟⲩⲁⲓⲭⲙⲁⲗⲱⲥⲓⲁ

12 ⲁⲩⲱ ⲡⲁⲣⲭⲱⲛ ⲥⲉⲛⲁϥⲓⲧϥ ϩⲓϫⲛⲛⲉⲩⲛⲁϩⲃ ϩⲛⲧⲉⲩⲙⲏⲧⲉ ⲁⲩⲱ ϥⲛⲏⲩ ⲉⲃⲟⲗ ϩⲛⲟⲩϫⲟ ⲉϥϩⲏⲡ ⲛⲉϥϣⲟϫⲧ ⲉⲧϫⲟ ⲉⲧⲣⲉϥⲉⲓ ⲉⲃⲟⲗ ⲛϩⲏⲧⲥ ⲁⲩⲱ ⲛϥϩⲱⲃⲥ ⲙⲡⲉϥϩⲟ ϫⲉⲛⲛⲉⲣⲱⲙⲉ ⲛⲁⲩ ⲉⲣⲟϥ ⲛⲧⲟϥ ϩⲱⲱϥ ⲛϥⲛⲁⲛⲁⲩ ⲁⲛ ⲉⲡⲕⲁϩ

13 ⲁⲩⲱ ϯⲛⲁⲡⲱⲣϣ ⲉⲃⲟⲗ ⲙⲡⲁϣⲛⲉ ⲉϩⲣⲁⲓ ⲉϫⲱϥ ⲛⲥⲉϭⲱⲡⲉ ⲙⲙⲟϥ ϩⲙⲡⲙⲁ ⲛⲧⲁⲓⲟⲧⲡϥ ⲉϩⲟⲩⲛ ⲉⲣⲟϥ ⲁⲩⲱ ϯⲛⲁϫⲓⲧϥ ⲉϩⲣⲁⲓ ⲉⲧⲃⲁⲃⲩⲗⲱⲛ ⲉⲡⲕⲁϩ ⲛⲛⲉⲭⲁⲗⲇⲁⲓⲟⲥ ⲛϥⲧⲙⲛⲁⲩ ⲉⲡⲕⲁϩ ⲛϥⲙⲟⲩ ϩⲙⲡⲙⲁ ⲉⲧⲙⲙⲁⲩ

14 ⲁⲩⲱ ⲛⲉⲧⲙⲡⲉϥⲕⲱⲧⲉ ⲧⲏⲣⲟⲩ ⲉⲧⲃⲟⲏⲑⲉⲓ ⲉⲣⲟϥ ⲙⲛⲟⲩⲟⲛ ⲛⲓⲙ ⲉⲧϯ ⲛⲧⲟⲟⲧϥ ϯⲛⲁϫⲟⲟⲣⲟⲩ ⲉⲃⲟⲗ ⲉⲧⲏⲩ ⲛⲓⲙ ⲁⲩⲱ ϯⲛⲁⲡⲱϩⲧ ⲛⲟⲩⲥⲏϥⲉ ϩⲓⲡⲁϩⲟⲩ ⲙⲙⲟⲟⲩ

15 ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ϩⲙⲡⲧⲣⲁϫⲟⲟⲣⲟⲩ ⲉⲃⲟⲗ ϩⲛⲛϩⲉⲑⲛⲟⲥ ⲛⲧⲁϫⲟⲟⲣⲟⲩ ⲉⲃⲟⲗ ϩⲛⲛⲉⲭⲱⲣⲁ

16 ⲁⲩⲱ ⲛⲧⲁϣⲱⲭⲡ ⲉⲃⲟⲗ ⲛϩⲏⲧⲟⲩ ⲛϩⲉⲛⲣⲱⲙⲉ ϩⲛⲟⲩⲏⲡⲉ ⲉⲧⲥⲏϥⲉ ⲙⲛⲡϩⲉⲃⲱⲱⲛ ⲙⲛⲡⲙⲟⲩ ϫⲉⲕⲁⲥ ⲉⲩⲉϫⲱ ⲛⲛⲉⲩⲁⲛⲟⲙⲓⲁ ⲧⲏⲣⲟⲩ ϩⲛⲛϩⲉⲑⲛⲟⲥ ⲡⲙⲁ ⲛⲧⲁⲩⲃⲱⲕ ⲉϩⲟⲩⲛ ⲉⲣⲟϥ ⲁⲩⲱ ⲥⲉⲛⲁⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

17 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

18 ϫⲉⲡϣⲏⲣⲉ ⲙⲡⲣⲱⲙⲉ ⲡⲉⲕⲟⲉⲓⲕ ⲟⲩⲟⲙϥ ϩⲛⲟⲩⲙⲕⲁϩ ⲛϩⲏⲧ ⲁⲩⲱ ⲛⲅⲥⲱ ⲙⲡⲉⲕⲙⲟⲟⲩ ϩⲛⲟⲩⲃⲁⲥⲁⲛⲟⲥ ⲙⲛⲟⲩⲑⲗⲓⲯⲓⲥ

19 ⲁⲩⲱ ⲉⲕⲉϫⲟⲟⲥ ⲛⲛⲁϩⲣⲙⲡⲗⲁⲟⲥ ⲙⲡⲕⲁϩ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ⲛⲛⲉⲧⲟⲩⲏϩ ϩⲛⲧϩⲓⲉⲣⲟⲩⲥⲁⲗⲏⲙ ϩⲓϫⲙⲡⲕⲁϩ ⲙⲡⲓⲥⲣⲁⲏⲗ ϫⲉⲡⲉⲩⲟⲉⲓⲕ ⲥⲉⲛⲁⲟⲩⲟⲙϥ ϩⲛⲟⲩϭⲣⲱϩ ⲁⲩⲱ ⲡⲉⲩⲙⲟⲟⲩ ⲥⲉⲛⲁⲥⲟⲟϥ ϩⲛⲟⲩⲧⲁⲕⲟ ϫⲉⲕⲁⲥ ⲉⲣⲉⲡⲕⲁϩ ⲧⲁⲕⲟ ⲙⲛⲡⲉϥϫⲱⲕ ⲉⲃⲟⲗ ⲥⲉϣⲟⲟⲡ ⲅⲁⲣ ϩⲛⲟⲩⲙⲛⲧⲁⲥⲉⲃⲏⲥ ⲛϭⲓⲛⲉⲧⲟⲩⲏϩ ϩⲣⲁⲓ ⲛϩⲏⲧϥ

20 ⲁⲩⲱ ⲛⲉⲩⲡⲟⲗⲓⲥ ⲉⲧϭⲟⲣϭ ⲥⲉⲛⲁⲣϫⲁⲓⲉ ⲁⲩⲱ ⲡⲕⲁϩ ⲛⲁⲧⲁⲕⲟ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

21 ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

22 ϫⲉⲡϣⲏⲣⲉ ⲙⲡⲣⲱⲙⲉ ⲟⲩⲧⲉ ⲧⲉⲓⲡⲁⲣⲁⲃⲟⲗⲏ ⲉⲧϣⲟⲟⲡ ⲛⲏⲧⲛ ϩⲓϫⲙⲡⲕⲁϩ ⲙⲡⲓⲥⲣⲁⲏⲗ ⲉⲧⲉⲧⲛϫⲱ ⲙⲙⲟⲥ ϫⲉⲛⲉϩⲟⲟⲩ ⲟⲩⲏⲩ ⲁⲧϩⲟⲣⲁⲥⲓⲥ ⲧⲁⲕⲟ

23 ⲉⲧⲃⲉⲡⲁⲓ ⲁϫⲓⲥ ⲛⲁⲩ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉϯⲛⲁⲕⲧⲟ ⲛⲧⲉⲓⲡⲁⲣⲁⲃⲟⲗⲏ ⲁⲩⲱ ϫⲓⲛⲧⲉⲛⲟⲩ ⲛⲛⲉⲩⲕⲟⲧⲟⲩ ⲉϫⲉⲧⲓⲡⲁⲣⲁⲃⲟⲗⲏ ⲛϭⲓⲡⲏⲓ ⲙⲡⲓⲥⲣⲁⲏⲗ ⲁⲗⲗⲁ ⲉⲕⲉϫⲟⲟⲥ ⲛⲁⲩ ϫⲉⲁⲩϩⲱⲛ ⲉϩⲟⲩⲛ ⲛϭⲓⲛⲉϩⲟⲟⲩ ⲁⲩⲱ ⲡϣⲁϫⲉ ⲛϩⲟⲣⲁⲥⲓⲥ ⲛⲓⲙ

24 ϫⲉⲙⲛϩⲁⲣⲁⲥⲓⲥ ⲛϭⲟⲗ ⲛⲁϣⲱⲡⲉ ϫⲓⲛⲧⲉⲛⲟⲩ ⲁⲩⲱ ⲡⲉⲧϣⲓⲛⲉ ϩⲛⲧⲙⲏⲧⲉ ⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲛⲉⲧϫⲓ ⲉϩⲟⲩⲛ ⲉⲛⲉⲩⲟⲩⲱϣ

25 ϫⲉⲁⲛⲟⲕ ⲡⲉ ⲡϫⲟⲉⲓⲥ ϯⲛⲁϣⲁϫⲉ ϯⲛⲁϫⲱ ⲛⲛⲁϣⲁϫⲉ ⲁⲩⲱ ⲛⲧⲁⲁⲁⲩ ⲛⲧⲁⲧⲙⲱⲥⲕ ϫⲓⲛⲧⲉⲛⲟⲩ ϫⲉϩⲣⲁⲓ ϩⲛⲛⲉⲧⲛϩⲟⲟⲩ ⲡⲏⲓ ⲉⲧϯϭⲱⲛⲧ ϯⲛⲁϫⲱ ⲛⲟⲩϣⲁϫⲉ ⲛⲧⲁⲁⲁϥ ⲡⲉϫⲁϥ ⲛϭⲓⲡϫⲟⲉⲓⲥ

26 ⲁⲩⲱ ⲡϣⲁϫⲉ ⲙϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

27 ϫⲉⲡϣⲏⲣⲉ ⲙⲡⲣⲱⲙⲉ ⲉⲓⲥ ⲡⲏⲓ ⲙⲡⲓⲥⲣⲁⲏⲗ ⲉⲧϯϭⲱⲛⲧ ϩⲛⲟⲩϫⲱ ⲥⲉϫⲱ ⲙⲙⲟⲥ ϫⲉⲧⲉⲓϩⲟⲣⲁⲥⲓⲥ ⲉⲧⲉⲣⲉⲡⲁⲓ ⲛⲁⲩ ⲉⲣⲟⲥ ⲉⲥϣⲟⲟⲡ ⲉϩⲉⲛϩⲟⲟⲩ ⲉⲩⲟⲩⲏⲩ ⲉⲣⲉⲡⲁⲓ ⲡⲣⲟⲫⲏⲧⲉⲩⲉ ⲉϩⲉⲛⲟⲩⲟⲉⲓϣ ⲉⲩⲟⲩⲏⲩ

28 ⲉⲧⲃⲉⲡⲁⲓ ⲉⲕⲉϫⲟⲟⲥ ⲛⲁⲩ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲛⲁϣⲁϫⲉ ⲧⲏⲣⲟⲩ ⲛⲁⲱⲥⲕ ⲁⲛ ϫⲓⲛⲧⲉⲛⲟⲩ ⲛⲉⲧⲓⲛⲁϫⲟⲟⲩ ϯⲛⲁⲁⲁⲩ ⲡⲉϫⲉⲡϫⲟⲉⲓⲥ