Esther 9 — Coptic (Sahidic)

1 ϩⲙⲡⲙⲉϩⲙⲛⲧⲥⲛⲟⲟⲩⲥ ⲅⲁⲣ ⲛⲛⲉⲃⲟⲧ ⲛⲥⲟⲩⲙⲛⲧϣⲟⲙⲧⲉ ⲙⲡⲉⲃⲟⲧ ⲉⲧⲉⲁⲇⲁⲣ ⲡⲉ ⲁⲩⲱ ⲛⲉⲥϩⲁⲓ ⲉⲛⲧⲁⲡⲣⲣⲟ ⲥϩⲁⲓⲥⲟⲩ

2 ϩⲙⲡⲉⲓϩⲟⲟⲩ ⲛⲟⲩⲱⲧ ⲛϫⲁϫⲉ ⲛⲓⲟⲩⲇⲁⲓⲟⲥ ⲁⲩⲧⲁⲕⲟⲟⲩ ⲙⲡⲉϣⲗⲁⲁⲩ ⲁϩⲉⲣⲁⲧϥ ⲉⲣⲟⲟⲩ ⲉϥⲣϩⲟⲧⲉ ϩⲏⲧⲟⲩ

3 ⲛⲛⲁⲣⲭⲱⲛ ⲛⲛⲥⲁⲧⲣⲁⲡⲏⲥ ⲙⲛⲛⲧⲩⲣⲁⲛⲛⲟⲥ ⲁⲩⲱ ⲛⲃⲁⲥⲓⲗⲓⲕⲟⲥ ⲛⲅⲣⲁⲙⲙⲁⲧⲉⲩⲥ ⲛⲛⲉⲩⲧⲙⲁⲓⲟ ⲅⲁⲣ ⲛⲓⲟⲩⲇⲁⲓⲟⲥ ⲧϩⲟⲧⲉ ⲅⲁⲣ ⲙⲙⲁⲣⲇⲟⲩⲭⲁⲓⲟⲥ ⲛⲛⲉⲥϩⲓϫⲱⲟⲩ

4 ⲡⲟⲩⲉϩⲥⲁϩⲛⲉ ⲙⲡⲣⲣⲟ ⲁϥⲧⲁϩⲟⲟⲩ ⲉⲧⲣⲉⲩⲧⲁⲩⲟϥ ϩⲛⲧⲙⲛⲧⲣⲣⲟ ⲧⲏⲣⲥ

5 ⲛⲁⲣⲇⲁⲝⲉⲣⲝⲏⲥ ⲙⲁⲣⲇⲟⲩⲭⲁⲓⲟⲥ ⲛⲉϥⲟ ⲅⲁⲣ ⲡⲉ ⲛⲛⲟϭ ϩⲙⲡⲡⲁⲗⲗⲁϯⲟⲛ ⲉⲣⲉⲡⲉϥⲣⲁⲛ ⲙⲟⲩϣⲧⲛⲧⲟϣ ⲧⲏⲣⲟⲩ ϫⲉⲛⲉϥⲙⲏⲛ ⲡⲉ ⲉϥⲁⲓⲁⲓ

6 ⲛⲓⲟⲩⲇⲁⲓ ⲇⲉ ⲁⲩⲡⲁⲧⲁⲥⲥⲉⲓ ⲛⲛⲉⲩϫⲁϫⲉ ϩⲛⲟⲩⲧⲁⲡⲣⲟ ⲛⲥⲏϥⲉ ⲁⲩⲱ ϩⲛⲟⲩϩⲱⲧⲃ ⲙⲛⲟⲩⲧⲁⲕⲟ ⲁⲩⲉⲓⲣⲉ ⲇⲉ ⲛⲛⲉⲧⲙⲟⲥⲧⲉ ⲙⲙⲟⲟⲩ ⲕⲁⲧⲁⲡⲉⲩⲟⲩⲱϣ ⲛⲉⲧϩⲛ ⲥⲟⲩⲥⲟⲥ ⲁⲩⲙⲉⲩⲧ ϯⲟⲩ ⲛϣⲉ ⲛⲣⲱⲙⲉ ϩⲣⲁⲓ ⲛϩⲏⲧⲥ

7 ⲫⲁⲣⲥⲁⲛⲉⲥⲧⲁ ⲇⲉ ⲙⲛⲇⲉⲗⲙⲱⲛ ⲙⲛⲫⲁⲅⲁⲛ

8 ⲙⲛⲥⲁⲣⲁⲑⲁ ⲙⲛⲃⲁⲣⲥⲁ ⲙⲛⲃⲁⲣⲉⲇⲁⲁ

9 ⲙⲛⲁⲣⲥⲓⲙⲁⲁ ⲙⲛⲁⲣⲟⲩⲫⲁⲓⲟⲥ ⲙⲛⲁⲣⲥⲁⲓⲟⲥ ⲙⲛⲍⲁⲃⲟⲩⲑⲁ

10 ⲡⲙⲏⲧ ⲛϣⲏⲣⲉ ⲛⲁⲙⲁⲛ ⲡϣⲏⲣⲉ ⲛⲁⲙⲁⲇⲁⲛⲑⲟⲥ ⲡⲃⲟⲩⲅⲁⲓⲟⲥ ⲡϫⲁϫⲉ ⲛⲓⲟⲩⲇⲁⲓⲟⲥ ⲁⲩⲙⲟⲩⲟⲩⲧⲟⲩ ⲁⲩⲱ ⲁⲩⲧⲱⲣⲡ ⲛⲛⲉⲩϩⲩⲡⲁⲣⲭⲟⲛⲧⲁ

11 ϩⲙⲡⲉϩⲟⲟⲩ ⲉⲧⲙⲙⲁⲩ ⲁⲩϯⲧⲏⲡⲉ ⲙⲡⲣⲣⲟ ⲛⲛⲉⲛⲧⲁⲩⲙⲟⲟⲩⲧⲟⲩ ϩⲛⲥⲟⲩⲥⲟⲥ ⲧⲡⲟⲗⲓⲥ

12 ⲡⲉϫⲉⲡⲣⲣⲟ ⲛⲉⲥⲑⲏⲣ ϫⲉⲛⲓⲟⲩⲇⲁⲓ ⲁⲩⲧⲁⲕⲉ ϯⲟⲩ ⲛϣⲉ ⲛⲣⲱⲙⲉ ϩⲛⲥⲟⲩⲥⲟⲥ ⲧⲡⲟⲗⲓⲥ ⲉⲓⲉⲟⲩⲏⲣ ⲁⲩⲧⲁⲕⲟ ϩⲛⲧⲭⲱⲣⲁ ⲧⲏⲣⲥ ⲟⲩⲟⲛ ⲡⲉⲧⲉⲣⲉⲁⲝⲓⲟⲩ ⲉⲧⲃⲏⲏⲧϥ ⲛϥϣⲱⲡⲉ ⲛⲉ

13 ⲡⲉϫⲉⲉⲥⲑⲏⲣ ⲙⲡⲣⲣⲟ ϫⲉⲙⲁⲣⲟⲩϯⲡⲕⲉⲣⲁⲥⲧⲉ ⲛⲓⲟⲩⲇⲁⲓⲟⲥ ⲉⲧⲣⲉⲩⲉⲓⲣⲉ ϩⲓⲛⲁⲓ ϩⲱⲥⲧⲉ ⲉⲧⲣⲉⲩⲁϣⲧⲡⲙⲏⲧ ⲛϣⲏⲣⲉ ⲛⲁⲙⲁⲛ

14 ⲁϥⲟⲩⲉϩⲥⲁϩⲛⲉ ⲉⲧⲣⲉⲥϣⲱⲡⲉ ϩⲓⲛⲁⲓ ⲁⲩⲱ ⲛⲥⲱⲙⲁ ⲛⲛϣⲏⲣⲉ ⲛⲁⲙⲁⲛ ⲁⲩⲕⲁⲁⲩ ⲛⲓⲟⲩⲇⲁⲓⲟⲥ ⲛⲃⲟⲗ ⲛⲧⲡⲟⲗⲓⲥ ⲉⲧⲣⲉⲩⲁϣⲧⲟⲩ

15 ⲛⲓⲟⲩⲇⲁⲓⲟⲥ ⲇⲉ ⲁⲩⲥⲟⲩⲱϩ ⲉϩⲟⲩⲛ ϩⲛⲥⲟⲩⲥⲟⲥ ϩⲛⲥⲟⲩⲙⲛⲧⲁϥⲧⲉ ⲛⲁⲇⲁⲣ ⲁⲩⲙⲟⲩⲟⲩⲧ ⲛϣⲙⲛⲧϣⲉ ⲛⲣⲱⲙⲉ ⲁⲩⲱ ⲙⲡⲟⲩⲧⲣⲡⲗⲁⲁⲩ

16 ⲡⲕⲉⲥⲉⲉⲡⲉ ⲇⲉ ⲛⲓⲟⲩⲇⲁⲓⲟⲥ ⲉⲧϩⲛⲧⲙⲛⲧⲣⲣⲟ ⲁⲩⲥⲟⲩⲱϩ ⲉϩⲟⲩⲛ ⲁⲩⲙⲓϣⲉ ⲉⲣⲟⲟⲩ ⲁⲩⲙⲧⲟⲛ ⲙⲙⲟⲟⲩ ⲉⲃⲟⲗ ϩⲛⲛⲉⲩϫⲁϫⲉ ⲁⲩⲧⲁⲕⲟ ⲉⲃⲟⲗ ⲛϩⲏⲧⲟⲩ ⲛⲟⲩⲧⲃⲁ ⲟⲩϭⲟⲥ ⲛⲥⲟⲩⲙⲛⲧϣⲟⲙⲧⲉ ⲛⲁⲇⲁⲣ ⲁⲩⲱ ⲙⲡⲟⲩⲧⲣⲡ ⲗⲁⲁⲩ

17 ⲁⲩⲙⲧⲟⲛ ⲙⲙⲟⲟⲩ ⲛⲥⲟⲩⲙⲛⲧⲁϥⲧⲉ ⲙⲡⲓⲉⲃⲟⲧ ⲛⲟⲩⲱⲧ ⲁⲩⲉⲓⲣⲉ ⲙⲙⲟϥ ⲛⲟⲩϩⲟⲟⲩ ⲛⲙⲧⲟⲛ ϩⲓⲣⲁϣⲉ ⲙⲛⲟⲩⲉⲩⲫⲣⲟⲥⲩⲛⲏ

18 ⲛⲓⲟⲩⲇⲁⲓⲟⲥ ⲇⲉ ⲉⲧϩⲛⲥⲟⲩⲥⲟⲥ ⲧⲡⲟⲗⲓⲥ ⲁⲩⲥⲟⲩⲱϩ ⲉϩⲟⲩⲛ ⲁⲩⲙⲧⲟⲛ ⲙⲡϩⲟⲟⲩ ⲙⲡⲕⲉⲥⲟⲩⲙⲛⲧⲁϥⲧⲉ ⲁⲩⲉⲓⲣⲉ ⲇⲉ ⲙⲡⲕⲉⲥⲟⲩⲙⲛⲧⲏ ϩⲛⲟⲩⲣⲁϣⲉ ⲙⲛⲟⲩⲉⲩⲫⲣⲟⲥⲩⲛⲏ

19 ⲉⲧⲃⲉⲡⲁⲓ ⲅⲁⲣ ⲛⲓⲟⲩⲇⲁⲓⲟⲥ ⲉⲧϫⲱⲣⲉ ⲉⲃⲟⲗ ϩⲛⲧⲉⲭⲱⲣⲁ ⲥⲉⲉⲓⲣⲉ ⲛⲥⲟⲩⲙⲛⲧⲁϥⲧⲉ ⲛⲁⲇⲁⲣ ⲛⲁⲅⲁⲑⲟⲛ ϩⲓⲉⲩⲫⲣⲟⲥⲩⲛⲏ ⲉⲩϫⲟⲟⲩ ⲛϩⲉⲛⲙⲉⲣⲓⲥ ⲛⲛⲉⲧϩⲓⲧⲟⲩⲱⲟⲩ ⲛⲉⲧⲟⲩⲏϩ ⲇⲉ ϩⲙⲙⲉⲧⲣⲟⲡⲟⲗⲓⲥ ⲡⲕⲉⲥⲟⲩⲙⲛⲧⲏ ⲛⲁⲇⲁⲣ ⲁⲩⲁⲁϥ ⲛϩⲟⲟⲩ ⲛⲁⲅⲁⲑⲟⲛ ϩⲓⲉⲩⲫⲣⲟⲥⲩⲛⲏ ⲉⲩϫⲟⲩ ⲛϩⲉⲛⲙⲉⲣⲓⲥ ⲛⲛⲉⲧϩⲓⲧⲟⲩⲱⲟⲩ

20 ⲙⲁⲣⲇⲟⲩⲭⲁⲓⲟⲥ ⲇⲉ ⲁϥⲥϩⲁⲓ ⲉⲩϫⲱⲱⲙⲉ ⲛⲛⲉⲓϣⲁϫⲉ ⲁϥϫⲟⲟⲩⲥⲟⲩ ⲛⲛⲓⲟⲩⲇⲁⲓ ⲉⲧϩⲛⲧⲙⲛⲧⲣⲣⲟ ⲛⲁⲣⲇⲁⲝⲉⲣⲝⲏⲥ ⲛⲉⲧϩⲏⲛ ⲉϩⲟⲩⲛ ⲙⲛⲛⲉⲧⲟⲩⲏⲩ ⲉⲃⲟⲗ

21 ⲉⲧⲣⲉⲩⲧⲁϩⲟⲟⲩ ⲉⲣⲁⲧⲟⲩ ⲛⲛⲉⲓϩⲟⲟⲩ ⲛϩⲉⲛϩⲟⲟⲩ ⲛⲁⲅⲁⲑⲟⲛ ⲉⲧⲣⲉⲩⲉⲓⲣⲉ ⲛⲥⲟⲩⲙⲛⲧⲁϥⲧⲉ ⲙⲛⲥⲟⲩⲙⲛⲧⲏ ⲛⲁⲇⲁⲣ

22 ϩⲣⲁⲓ ⲅⲁⲣ ϩⲛⲛⲉⲓϩⲟⲟⲩ ⲁⲛⲓⲟⲩⲇⲁⲓⲟⲥ ⲙⲧⲟⲛ ⲙⲙⲟⲟⲩ ⲉⲃⲟⲗ ϩⲛⲛⲉⲩϫⲁϫⲉ ⲁⲩⲱ ⲕⲁⲧⲁⲡⲉⲃⲟⲧ ⲉⲛⲧⲁⲩⲥϩⲁⲓ ⲛⲁⲩ ⲉⲃⲟⲗ ϩⲛⲟⲩⲙⲕⲁϩ ⲛϩⲏⲧ ⲉⲩⲣⲁϣⲉ ⲁⲩⲱ ⲉⲃⲟⲗ ϩⲛⲟⲩϩⲟⲧⲉ ⲉϩⲉⲛϩⲟⲟⲩ ⲛⲁⲅⲁⲑⲟⲛ ⲉⲧⲣⲉⲩⲉⲓⲣⲉ ⲙⲙⲟϥ ⲛϩⲉⲛϩⲟⲟⲩ ⲛϣⲉⲗⲉⲉⲧ ϩⲓⲉⲩⲫⲣⲟⲥⲩⲛⲏ ⲉⲩϫⲟⲟⲩ ⲛϩⲉⲛⲧⲁⲉⲓⲟ ⲛⲛⲉⲩϣⲃⲉⲉⲣ ⲙⲛⲛⲛϩⲏⲕⲉ

23 ⲛⲓⲟⲩⲇⲁⲓⲟⲥ ϭⲉ ⲁⲩϣⲱⲡ ⲉⲣⲟⲟⲩ ⲛⲧϩⲉ ⲉⲛⲧⲁⲙⲁⲣⲇⲟⲩⲭⲁⲓⲟⲥ ⲥϩⲁⲓ ⲛⲁⲩ

24 ⲁⲙⲁⲛ ⲅⲁⲣ ⲡϣⲏⲣⲉ ⲛⲁⲙⲁⲇⲁⲛⲑⲟⲥ ⲡⲙⲁⲕⲉⲇⲱⲛⲟⲥ ⲛⲛⲉϥⲡⲟⲗⲉⲙⲉⲓ ⲙⲛⲛⲓⲟⲩⲇⲁⲓⲟⲥ ⲛⲧϩⲉ ⲉⲛⲧⲁϥⲕⲱ ⲉϩⲣⲁⲓ ⲛⲟⲩⲯⲩⲫⲓⲥⲙⲁ ⲙⲛⲟⲩⲕⲗⲏⲣⲟⲥ ⲉⲧⲁⲕⲟⲟⲩ

25 ⲁⲩⲱ ⲛⲧϩⲉ ⲉⲛⲧⲁϥⲉⲓ ⲉϩⲟⲩⲛ ⲙⲡⲣⲣⲟ ⲉⲧⲣⲉϥϫⲟⲟⲥ ⲛⲁϥ ⲉⲉⲓϣⲉ ⲙⲙⲁⲣⲇⲟⲩⲭⲁⲓⲟⲥ ⲛⲉⲓⲡⲉⲧϩⲟⲟⲩ ⲇⲉ ⲉⲛⲧⲁϥϩⲓⲧⲟⲟⲧϥ ⲉⲣⲟⲟⲩ ⲉⲛⲧⲟⲩ ⲉϫⲱⲟⲩ ⲁⲩⲉⲓ ⲉϩⲣⲁⲓ ⲉϫⲱϥ ⲁⲩⲁϣⲧϥ ⲛⲧⲟϥ ⲙⲛⲛⲉϥⲕⲉϣⲏⲣⲉ ⲉϫⲛⲛϣⲉ

26 ⲉⲧⲃⲉⲡⲁⲓ ⲁⲩⲙⲟⲩⲧⲉ ⲉⲛⲉⲓϩⲟⲟⲩ ϫⲉⲛⲉⲫⲣⲟⲩⲣⲁⲓ ⲉⲧⲃⲉⲛⲉⲕⲗⲏⲣⲟⲥ ⲉⲩⲙⲟⲩⲧⲉ ⲉⲣⲟⲟⲩ ϫⲉⲛⲉⲫⲣⲟⲩⲣⲁⲓ ϩⲛⲧⲉⲩⲁⲥⲡⲉ ⲉⲧⲃⲉⲛϣⲁϫⲉ ⲛⲧⲉⲓⲉⲡⲓⲥⲧⲟⲗⲏ ⲁⲩⲱ ⲛϩⲓⲥⲉ ⲉⲛⲧⲁⲩϣⲟⲡⲟⲩ ⲉⲧⲃⲉⲛⲁⲓ ⲙⲛⲛⲉⲛⲧⲁⲩϣⲱⲡⲉ ⲙⲙⲟⲟⲩ

27 ⲁϥⲧⲁϩⲟⲟⲩ ⲉⲣⲁⲧⲟⲩ ⲁⲩⲱ ⲛⲧϩⲉ ⲉⲛⲧⲁⲛⲓⲟⲩⲇⲁⲓ ϣⲟⲡⲟⲩ ⲉⲣⲟⲟⲩ ⲉϫⲱⲟⲩ ⲙⲛⲡⲉⲩⲥⲡⲉⲣⲙⲁ ⲁⲩⲱ ⲛⲉⲛⲧⲁⲩⲧⲟϭⲟⲩ ⲉⲃⲟⲗ ⲉϩⲣⲁⲓ ⲉϫⲱⲟⲩ ⲛⲛⲉⲩⲉⲓⲣⲉ ⲛⲕⲉⲥⲙⲟⲧ ⲛⲉⲓϩⲟⲟⲩ ⲇⲉ ϩⲉⲛⲣⲡⲙⲉⲉⲩⲉ ⲛⲉ ⲉⲩⲛⲁϫⲱⲕ ⲉⲃⲟⲗ ⲕⲁⲧⲁⲅⲉⲛⲉⲁ ϩⲓⲅⲉⲛⲉⲁ ⲕⲁⲧⲁⲙⲛⲧⲓⲱⲧ ⲕⲁⲧⲁⲡⲟⲗⲓⲥ ϩⲓⲭⲱⲣⲁ

28 ⲛⲉⲓϩⲟⲟⲩ ⲇⲉ ⲛⲉⲫⲣⲟⲩⲣⲁⲓ ⲥⲉⲛⲁⲁⲁⲩ ⲙⲡⲉⲩⲟⲩⲉⲓϣ ⲧⲏⲣϥ ⲡⲉⲩⲣⲡⲙⲉⲉⲩⲉ ⲛϥⲛⲁⲱϫⲛ ⲁⲛ ⲉⲃⲟⲗ ϩⲛⲛϫⲱⲙ

29 ⲉⲥⲑⲏⲣ ⲧⲣⲣⲱ ⲧϣⲉⲉⲣⲉ ⲛⲁⲙⲓⲛⲁⲇⲁⲃ ⲉⲥⲥϩⲁⲓ ⲙⲙⲁⲣⲇⲟⲩⲭⲁⲓⲟⲥ ⲛⲛⲉⲛⲧⲁⲥⲁⲁⲩ ⲁⲩⲱ ⲡⲧⲁϫⲣⲟ ⲛⲛⲉⲡⲓⲥⲧⲟⲗⲏ ⲛⲛⲉϥⲣⲟⲩⲣⲁⲓ

31 ⲙⲁⲣⲇⲟⲩⲭⲁⲓⲟⲥ ⲙⲛⲉⲥⲑⲏⲣ ⲧⲣⲣⲱ ⲁⲩⲧⲁϩⲟⲟⲩ ⲛⲁⲩ ⲉⲣⲁⲧⲟⲩ ϩⲁⲣⲓϩⲁⲣⲟⲟⲩ ⲁⲩⲱ ⲁⲩⲧⲁϩⲟⲟⲩ ⲉⲣⲁⲧⲟⲩ ⲛⲛⲁⲡⲉⲩⲟⲩϫⲁⲓ ⲙⲛⲛⲉⲩϣⲟϫⲛⲉ

32 ⲉⲥⲑⲏⲣ ⲁⲥⲧⲁϩⲟⲟⲩ ⲉⲣⲁⲧⲟⲩ ⲙⲡϣⲁϫⲉ ⲛϣⲁ ⲉⲛⲉϩ ⲁⲩⲱ ⲁⲩⲥϩⲁⲓⲥⲟⲩ ⲉⲩⲣⲡⲙⲉⲉⲩⲉ