Esther 8 — Coptic (Sahidic)

1 ϩⲙⲡⲉϩⲟⲟⲩ ⲉⲧⲙⲙⲁⲩ ⲡⲣⲣⲟ ⲁⲣⲇⲁⲝⲉⲣⲝⲏⲥ ⲁϥϯ ⲛⲛϩⲩⲡⲁⲣⲭⲟⲛⲧⲁ ⲛⲁⲙⲁⲛ ⲡⲇⲓⲁⲃⲟⲗⲟⲥ ⲛⲉⲥⲑⲏⲣ ⲛⲧⲁⲉⲓⲟ ⲙⲁⲣⲇⲟⲩⲭⲁⲓⲟⲥ ⲇⲉ ⲁⲡⲣⲣⲟ ⲙⲟⲩⲧⲉ ⲉⲣⲟϥ ⲉϩⲟⲩⲛ ϫⲉⲁⲉⲥⲑⲏⲣ ⲧⲁⲩⲟϥ ϫⲉⲟⲩⲉⲃⲟⲗ ϩⲙⲡⲉϥⲏⲓ ⲡⲉ

2 ⲁⲩⲱ ⲡⲣⲣⲟ ⲁϥⲛ ⲡⲉϥⲝⲟⲩⲣ ⲉⲛⲧⲁⲩϫⲓⲧϥ ⲛⲧⲛⲁⲙⲁⲛ ⲉⲃⲟⲗ ϩⲙⲡⲉϥⲧⲏⲏⲃⲉ ⲁϥⲧⲁⲁϥ ⲛⲧⲟⲟⲧϥ ⲙⲙⲁⲣⲇⲟⲩⲭⲁⲓⲟⲥ ⲉⲥⲑⲏⲣ ⲇⲉ ⲁϥϯ ⲡⲏⲓ ⲛⲁⲙⲁⲛ ⲉⲧⲉⲥⲉⲝⲟⲩⲥⲓⲁ

3 ⲁⲩⲱ ⲁⲥⲧⲱⲙⲛⲧ ⲛϭⲓⲉⲥⲑⲏⲣ ⲙⲡⲉⲙⲧⲟ ⲉⲃⲟⲗ ⲙⲡⲣⲣⲟ ⲁⲥⲡⲁϩⲧⲥ ⲉⲣⲁⲧϥ ⲉⲥⲣⲓⲙⲉ ⲁⲩⲱ ⲁⲥⲁⲝⲓⲟⲩ ϫⲉⲕⲁⲥ ⲉϥⲉⲟⲩⲱⲧⲛ ⲉⲃⲟⲗ ⲛⲧⲉⲡⲓⲃⲟⲩⲗⲏ ⲉⲛⲧⲁⲁⲙⲁⲛ ⲟϭⲛ ⲉⲁⲁϥ ⲉⲛⲓⲟⲩⲇⲁⲓ

4 ⲁⲩⲱ ⲡⲣⲣⲟ ⲁϥⲥⲟⲩⲧⲛ ⲧⲉϥϭⲉⲣⲱⲃ ⲛⲛⲟⲩⲃ ⲉⲃⲟⲗ ⲉⲣⲟⲥ ⲁⲩⲱ ⲁⲉⲥⲑⲏⲣ ⲧⲱⲟⲩⲛ ⲉⲃⲟⲗ ϩⲁⲣⲁⲧϥ

5 ⲡⲉϫⲁⲥ ϫⲉⲉϣϫⲉ ⲁⲓϭⲛ ⲭⲁⲣⲓⲥ ⲙⲡⲉⲙⲧⲟ ⲉⲃⲟⲗ ⲙⲡⲣⲣⲟ ⲉϩⲛⲡⲣⲣⲟ ⲁⲩⲱ ⲛⲁϩⲟⲗϭⲧ ⲛⲛⲁϩⲣⲁϥ ⲙⲁⲣⲉⲡⲣⲣⲟ ϩⲱⲛ ⲉⲃⲱⲗ ⲉⲃⲟⲗ ⲙⲡⲉⲥϩⲁⲓ ⲁⲩⲱ ⲧⲉⲡⲓⲃⲟⲩⲗⲏ ⲛⲁⲙⲁⲛ ⲡϣⲏⲣⲉ ⲛⲁⲙⲁⲇⲁⲛⲑⲟⲥ ⲡⲃⲟⲩⲕⲁⲓⲟⲥ ⲡⲁⲓ ⲅⲁⲣ ⲁϥⲡⲁⲣⲁⲅⲅⲉⲓⲗⲉ ⲉⲧⲣⲉⲩⲧⲁⲕⲉ ⲛⲓⲟⲩⲇⲁⲓ ⲉⲧϩⲛⲛⲉⲭⲱⲣⲁ ⲙⲡⲣⲣⲟ

7 ⲁⲩⲱ ⲡⲉϫⲉⲡⲣⲣⲟ ⲁⲣⲇⲁⲝⲉⲣⲝⲏⲥ ⲛⲉⲥⲑⲏⲣ ⲧⲣⲣⲱ ⲙⲛⲙⲁⲣⲇⲩⲭⲁⲓⲟⲥ ϫⲉⲉⲓⲥϩⲏⲏⲧⲉ ⲡⲏⲓ ⲧⲏⲣϥ ⲛⲁⲙⲁⲛ ⲁⲓⲧⲁⲁϥ ⲛⲉⲥⲑⲏⲣ ⲛⲧⲟϥ ⲇⲉ ⲣⲱϥ ⲉⲁϥⲣ ⲡⲉⲧϩⲟⲟⲩ ⲉⲛⲓⲟⲩⲇⲁⲓ ⲁⲩⲁϣϥ ⲉϫⲙⲡϣⲉ

8 ⲧⲉⲛⲟⲩ ⲇⲉ ⲛⲧⲱⲧⲛ ⲕⲁⲧⲁⲧϩⲉ ⲉⲧⲉⲧⲛⲟⲩⲁϣⲥ ⲙⲁⲣⲉⲧⲛⲥϩⲁⲓ ⲛⲟⲩⲉⲡⲓⲥⲧⲟⲗⲏ ϩⲙⲡⲣⲁⲛ ⲙⲡⲣⲣⲟ ⲁⲩⲱ ⲛⲧⲉⲧⲛⲧⲱⲱⲃⲉ ⲙⲙⲟⲥ ⲙⲡⲉⲝⲟⲩⲣ ⲙⲡⲣⲣⲟ ⲡⲉⲛⲧⲁⲩϩⲱⲛ ⲅⲁⲣ ϩⲙⲡⲣⲁⲛ ⲙⲡⲣⲣⲟ ⲁⲩⲱ ⲁⲩⲧⲟⲟⲃϥ ⲙⲡⲉϥⲝⲟⲩⲣ ⲛⲛⲟⲩⲃⲟⲗϥ ⲉⲃⲟⲗ

9 ⲁⲩⲱ ⲁⲩⲙⲟⲩⲧⲉ ⲉⲛⲅⲣⲁⲙⲙⲁⲧⲉⲩⲥ ⲙⲡⲣⲣⲟ ϩⲙⲡⲙⲉϩⲙⲛⲧϣⲟⲙⲧⲉ ⲛⲉⲃⲟⲧ ⲛⲥⲟⲩ ⲕⲅ ⲙⲡⲉⲃⲟⲧ ⲉⲧⲉⲥⲓⲃⲁⲛ ⲡⲉ ⲁⲩϩⲟⲛϩⲉⲛ ⲉⲧⲃⲉⲛⲓⲟⲩⲇⲁⲓ ⲕⲁⲧⲁⲧϩⲉ ⲉⲛⲧⲁⲙⲁⲣⲇⲟⲩⲭⲁⲓⲟⲥ ϫⲟⲟⲥ ⲉⲧⲟⲟⲧⲟⲩ ⲛⲛⲉⲥⲧⲣⲁⲧⲓⲅⲟⲥ ⲙⲛⲛⲁⲣⲭⲱⲛ ϫⲓⲛϯⲛⲇⲓⲕⲏ ϣⲁϩⲣⲁⲓ ⲉⲡⲕⲁϩ ⲛⲛⲉϭⲟⲟϣ ⲁⲩϫⲟⲟⲩⲥ ⲛⲭⲱⲣⲁ ⲛⲓⲙ ⲕⲁⲧⲁⲧⲉⲩⲗⲉⲝⲓⲥ ⲙⲛⲗⲁⲟⲥ ⲛⲓⲙ ⲕⲁⲧⲁⲧⲉⲩⲁⲥⲡⲉ ⲁⲩⲱ ⲛⲓⲟⲩⲇⲁⲓ ϩⲱⲟⲩ ⲁⲩϫⲟⲟⲩⲥ ⲛⲁⲩ ⲕⲁⲧⲁⲧⲉⲩⲗⲉⲝⲓⲥ ⲁⲩⲱ ⲕⲁⲧⲁⲧⲉⲩⲁⲥⲡⲉ

10 ⲛⲧⲉⲣϥⲥϩⲁⲓ ⲛⲧⲉⲓⲉⲡⲓⲥⲧⲟⲗⲏ ϭⲉ ϩⲙⲡⲣⲁⲛ ⲙⲡⲣⲣⲟ ⲁⲣⲇⲁⲝⲉⲣⲝⲏⲥ ⲁϥⲧⲟⲟⲃⲥ ⲙⲡⲉϥⲝⲟⲩⲣ ⲁϥⲧⲁϩⲟⲟⲩ ⲉⲣⲁⲧⲟⲩ ϩⲓⲧⲉⲛ ⲛϩⲓⲡⲡⲉⲩⲥ

11 ϫⲉⲡⲣⲣⲟ ⲁϥϯ ⲧⲉϩⲓⲏ ⲛⲛⲓⲟⲩⲇⲁⲓ ⲉⲥⲟⲩⲱϩ ⲉϩⲟⲩⲛ ⲁⲩⲱ ⲉⲕⲧⲟ ⲉⲃⲟⲗ ⲛⲧϭⲟⲙ ⲛⲗⲁⲟⲥ ⲛⲓⲙ ⲏ ⲭⲱⲣⲁ ⲛⲓⲙ ⲉⲁⲩⲉⲓ ⲉⲙⲓϣⲉ ⲛⲙⲙⲁⲩ ⲗⲟⲓⲡⲟⲛ ⲉϩⲟⲧⲃⲟⲩ ⲙⲛⲛⲉⲩⲥϩⲓⲙⲉ ϩⲓⲛⲉⲩϣⲏⲣⲉ ⲁⲩⲱ ⲉⲧⲁⲕⲱⲟⲩ ⲁⲩⲱ ⲉϣⲱⲗ ⲙⲡⲉⲧⲉⲟⲩⲛⲧⲁⲩ

12 ϩⲙⲡⲙⲉϩⲙⲛⲧⲥⲛⲟⲟⲩⲥ ⲛⲛⲉⲃⲟⲧ ⲛⲥⲟⲩⲙⲛⲧϣⲟⲙⲧⲉ ⲙⲡⲉⲃⲧ ⲉⲧⲉⲁⲇⲁⲣ ⲡⲉ ⲡⲁⲓ ⲡⲁⲛⲧⲓⲅⲣⲁⲫⲟⲛ ⲡⲉ ⲛⲧⲉⲡⲓⲥⲧⲟⲗⲏ ⲁⲣⲇⲁⲝⲉⲣⲝⲏⲥ ⲡⲛⲟϭ ⲛⲣⲣⲟ ⲛⲛⲥⲁⲧⲣⲁⲡⲏⲥ ⲙⲛⲛⲁⲣⲭⲱⲛ ⲛⲛⲉⲧⲟϣ ⲣⲕⲍ ϫⲓⲛⲙⲡⲕⲁϩ ⲛϩⲛⲧⲟⲩ ϣⲁϩⲣⲁⲓ ⲉⲁⲓⲑⲓⲟⲡⲓⲁ ⲭⲁⲓⲣⲉ ⲟⲩⲙⲏⲏϣⲉ ⲛⲛⲉⲛⲧⲁⲩϣⲉⲡⲧⲁⲉⲓⲟ ϩⲓⲧⲉⲛ ⲡⲉⲩⲣⲉϥⲣⲡⲉⲧⲛⲁⲛⲟⲩϥ ⲛⲁⲩ ⲁⲩⲣⲙⲛⲧϫⲁⲥⲓϩⲏⲧ ⲟⲩ ⲙⲟⲛⲟⲛ ⲅⲁⲣ ⲥⲉⲟϭⲛ ⲉⲣⲃⲟⲟⲛⲉ ⲙⲡⲗⲁⲟⲥ ⲁⲗⲗⲁ ⲉⲃⲟⲗ ϫⲉⲛⲥⲉϣⲧⲱⲟⲩⲛ ⲁⲛ ϩⲁⲡϣⲟⲩϣⲟⲩ ⲡⲉⲧⲣⲡⲉⲧⲛⲁⲛⲟⲩϥ ⲛⲁⲩ ϩⲱϥ ⲟⲛ ⲉⲩⲧⲟⲗⲙⲁ ⲉϩⲓⲧⲟⲟⲧⲟⲩ ⲉⲣⲟϥ ⲉⲩⲁⲕⲉⲧⲉⲩⲭⲁⲣⲓⲥⲧⲉⲓⲁ ϩⲙⲡⲁⲓ ⲉⲧϩⲛⲧⲉⲛⲙⲏⲧⲉ ⲁⲩⲱ ϩⲙⲡⲧⲣⲉⲩϫⲁⲥⲓϩⲏⲧ ⲙⲛⲡⲟⲩⲱϣⲧ ⲛⲙⲡⲟⲛⲏⲣⲟⲥ ⲉⲩⲡⲱⲧ ⲉⲃⲟⲗ ⲛⲧⲉⲕⲣⲓⲥⲓⲥ ⲙⲡⲛⲟⲩⲧⲉ ⲁϥϣⲱⲡⲉ ⲇⲉ ⲟⲛ ϫⲉⲁⲩⲣⲛⲟⲃⲉ ⲛϭⲓⲛⲣⲣⲟ ⲙⲁⲩⲁⲁⲧⲟⲩ ⲉⲁⲩⲡⲉϩ ⲥⲛⲟϥ ⲉⲃⲟⲗ ⲛⲁⲧⲛⲟⲃⲉ ⲕⲁⲧⲁⲡϣⲟϫⲛⲉ ⲛⲛⲉⲩϣⲃⲏⲣ ⲉⲣⲉⲧⲡⲟⲗⲓⲧⲉⲓⲁ ϩⲛⲧⲉⲩϭⲓϫ ⲁⲩⲱ ϩⲓⲧⲛⲧⲉⲩⲙⲛⲧⲇⲩⲥⲙⲉⲛⲟⲥ ⲙⲛⲛⲉⲩϭⲟⲗ ⲧⲙⲛⲧⲛⲁ ⲇⲉ ⲙⲡⲇⲉⲥⲡⲟⲧⲁ ⲁⲛⲏ ⲧⲁⲕⲟⲥ ϩⲟⲡⲱⲥ ⲛⲧⲉⲧⲛⲉⲓⲙⲉ ⲉⲡⲁⲓ ⲙⲁϯϩⲧⲏⲧⲛ ⲉⲃⲟⲗ ϩⲛⲛⲉϩⲓⲥⲧⲟⲣⲓⲁ ⲛϣⲟⲣⲡ ⲉⲛⲧⲁⲩⲧⲁⲁⲩ ⲉⲧⲟⲧⲧⲏⲩⲧⲛ ⲉⲧⲣⲉⲧⲛϣⲓⲛⲉ ⲧⲉⲛⲟⲩ ⲛⲥⲁⲛⲉⲩϩⲃⲏⲩⲉ ⲉⲛⲧⲁⲩϫⲱⲕ ⲉⲃⲟⲗ ϩⲛⲟⲩⲙⲛⲧϣⲁϥⲧⲉ ϩⲛⲧⲙⲛⲧⲗⲟⲓⲙⲟⲥ ⲛⲛⲉⲧϫⲓ ⲛϭⲟⲛⲥ ⲉⲩⲙⲡϣⲁ ⲙⲙⲟⲥ ⲉⲧⲣⲉⲧⲛϯϩⲧⲏⲩⲧⲛ ⲙⲛⲛⲥⲁⲛⲁⲓ ⲉⲧⲣⲉⲧⲛϯ ⲛⲧⲙⲛⲉⲣⲟ ⲉⲥⲥϭⲣⲁϩⲧ ⲛⲣⲱⲙⲉ ⲛⲓⲙ ϩⲛⲟⲩⲉⲓⲣⲏⲛⲏ ⲛⲧⲛⲭⲣⲱ ⲁⲛ ϩⲛⲟⲩⲙⲛⲧⲁⲃⲟⲗⲏ ⲛⲉⲧⲛⲏⲩ ⲇⲉ ϩⲁⲛⲉⲛⲃⲁⲗ ⲉⲛⲇⲓⲁⲕⲣⲓⲛⲉ ⲙⲙⲟⲟⲩ ⲉⲛⲙⲏⲛ ⲙⲡⲉⲧⲛⲁϭⲱⲗⲡ ⲉⲃⲟⲗ ⲉⲣⲟⲛ ϩⲛⲟⲩⲙⲛⲧϩⲁⲕ ⲛⲧϩⲉ ⲅⲁⲣ ⲛⲁⲙⲁⲛ ⲡϣⲏⲣⲉ ⲛⲁⲙⲁⲇⲁⲛⲑⲟⲥ ⲉⲩⲙⲁⲕⲏⲇⲱⲛ ⲡⲉ ⲉϥⲟ ⲛϣⲙⲙⲟ ϩⲛⲟⲩⲙⲉ ⲉⲡⲉⲥⲛⲟϥ ⲛⲙⲡⲉⲣⲥⲟⲥ ⲉϥⲟⲩⲏⲩ ⲉⲃⲟⲗ ⲙⲙⲁⲧⲉ ⲛⲧⲉⲧⲙⲛⲧⲭⲣⲏⲥⲧⲟⲥ ⲉⲁϥϭⲟⲓⲗⲉ ⲉⲣⲟⲛ ⲁϥⲙⲁⲧⲉ ⲛⲧⲉⲛⲙⲛⲧⲙⲁⲓⲣⲱⲙⲉ ⲉⲧⲉⲟⲩⲛⲧⲁⲛⲥ ⲉϩⲟⲩⲛ ⲉϩⲉⲑⲛⲟⲥ ⲛⲓⲙ ϩⲱⲥⲧⲉ ⲛⲥⲉⲙⲟⲩⲧⲉ ⲉⲣⲟϥ ϩⲓⲛⲁⲓ ϫⲉⲡⲉⲛⲉⲓⲱⲧ ⲉⲣⲉⲟⲩⲟⲛ ⲛⲓⲙ ⲟⲩⲱϣⲧ ⲛⲁϥ ⲉⲧⲣⲉϥϫⲱⲕ ⲉⲃⲟⲗ ⲙⲡⲕⲉⲡⲣⲟⲥⲟⲡⲟⲛ ⲙⲛⲛⲥⲁⲡⲉⲑⲣⲟⲛⲟⲥ ⲙⲡⲣⲣⲟ ⲉⲙⲡϥⲉϣⲧⲱⲟⲩⲛ ⲇⲉ ϩⲁⲡϣⲟⲩϣⲟⲩ ⲁϥϩⲓⲧⲟⲟⲧϥ ⲉϥⲟϭⲛ ⲛⲧⲙⲛⲧⲣⲣⲟ ⲉϥⲓ ⲙⲡⲉⲙⲡⲛⲁ ⲡⲉⲛⲥⲱⲧⲏⲣ ⲇⲉ ⲙⲁⲣⲇⲟⲩⲭⲁⲓⲟⲥ ⲉⲁϥⲣⲡⲉⲧⲛⲁⲛⲟⲩϥ ⲛⲁⲛ ⲛⲟⲩⲟⲉⲓϣ ⲛⲓⲙ ⲁⲩⲱ ⲉⲥⲑⲏⲣ ⲧⲉⲧⲏⲡ ⲛⲙⲙⲁⲓ ⲉⲧⲙⲛⲧⲣⲣⲟ ⲁϫⲛⲛⲟⲃⲉ ⲙⲛⲡⲉⲩϩⲉⲑⲛⲟⲥ ⲧⲏⲣϥ ⲉϥⲁⲓⲧⲉⲓ ⲙⲙⲟⲟⲩ ⲉⲩⲧⲁⲕⲟ ϩⲛϩⲉⲛⲕⲟⲧⲥ ⲉⲛⲁϣⲱⲟⲩ ⲛⲣϩⲁⲗ ⲉⲃⲟⲗ ⲅⲁⲣ ϩⲛⲛⲉⲥⲙⲟⲧ ⲉϥϫⲱ ⲙⲙⲟⲥ ϫⲉⲉⲛⲟ ⲛⲉⲣⲏⲙⲟⲥ ⲁϥⲙⲉⲉⲩⲉ ϫⲉⲉϥⲛⲁϣⲡⲉⲉⲛⲉⲡⲉⲕⲣⲁⲧⲟⲥ ⲛⲙⲡⲉⲣⲥⲟⲥ ⲉⲙⲁⲕⲉⲇⲱⲛ ⲁⲩⲱ ⲛⲓⲟⲩⲇⲁⲓ ⲉⲛⲧⲁⲡⲉⲧⲙⲡϣⲁ ⲙⲡⲉⲧϩⲟⲟⲩ ⲛⲓⲙ ⲧⲁⲁⲩ ⲉⲧⲟⲟⲧⲛ ⲉⲩⲧⲁⲕⲟ ⲧⲛϭⲓⲛⲉ ⲙⲙⲟⲟⲩ ⲉⲛϩⲉⲛⲣⲉϥⲣⲡⲉⲧϩⲟⲟⲩ ⲁⲛ ⲛⲉ ⲉⲩⲡⲟⲗⲓⲧⲉⲩⲉ ϩⲛⲛⲛⲟⲙⲟⲥ ⲛⲇⲓⲕⲁⲓⲟⲛ ⲉⲩⲟ ⲛϣⲏⲣⲉ ⲙⲡⲛⲟⲩⲧⲉ ⲙⲁⲩⲁⲁϥ ⲉϥⲧⲁⲓⲏⲩⲧ ⲉϥⲟ ⲛϭⲙϭⲟⲙ ⲁⲩⲱ ⲛⲟⲛϩ ⲡⲉⲛⲧⲁϥⲧⲁϫⲣⲉⲧⲉⲓⲙⲛⲧⲣⲣⲟ ⲛⲛⲁⲉⲓⲟⲧⲉ ⲉⲥⲥϭⲣⲁϩⲧ ⲙⲡⲛⲁⲩ ⲁⲛⲟⲛ ⲛⲛⲉⲧⲛⲉⲓⲣⲉ ⲟⲩⲛ ⲕⲁⲧⲁⲡⲉⲡⲣⲟⲥⲧⲁⲅⲙⲁ ⲛⲁⲙⲁⲛ ⲡϣⲏⲣⲉ ⲛⲁⲙⲁⲇⲁⲧⲏⲥ ⲡⲉⲛⲧⲁϥⲥϩⲁⲓϥ ⲅⲁⲣ ⲙⲛⲡⲉϥⲏⲓ ⲧⲏⲣϥ ⲁⲩⲁϣϥ ϩⲁⲧⲛⲧⲡⲩⲗⲏ ⲛⲥⲟⲩⲥⲟⲥ ϫⲉⲡⲛⲟⲩⲧⲉ ⲁⲧⲉϥⲕⲣⲓⲥⲓⲥ ⲉⲓ ⲉϩⲣⲁⲓ ⲉϫⲱϥ ⲡⲁⲛⲧⲓⲅⲣⲁⲫⲟⲛ ⲇⲉ ⲛⲧⲉⲓⲉⲡⲓⲥⲧⲟⲗⲏ ⲉⲧⲉⲧⲛⲉⲧⲟϭϥ ⲉⲃⲟⲗ ⲙⲙⲁ ⲛⲓⲙ ϩⲛⲟⲩⲡⲁⲣⲣⲏⲥⲓⲁ ϫⲉⲉⲧⲉⲧⲛⲉⲧⲣⲉⲛⲓⲟⲩⲇⲁⲓⲟⲥ ⲟⲩⲱϩ ⲕⲁⲧⲁⲛⲉⲩⲛⲟⲙⲟⲥ ⲙⲙⲓⲛⲙⲟⲟⲩ ⲁⲩⲱ ⲛⲧⲉⲧⲛϯⲧⲉⲧⲛϭⲓϫ ⲛⲁⲩ ⲉⲡⲁⲧⲁⲥⲥⲉⲓ ⲛⲛⲉⲧⲡⲱⲣⲥ ⲙⲙⲟⲟⲩ ⲙⲡⲓⲛⲁⲩ ⲛⲑⲗⲓⲯⲓⲥ ϩⲙⲡⲙⲉϩⲙⲛⲧⲥⲛⲟⲟⲩⲥ ⲛⲛⲉⲃⲟⲧ ⲛⲥⲟⲩⲙⲛⲧϣⲟⲙⲧⲉ ⲙⲡⲉⲃⲟⲧ ⲉⲧⲉⲁⲇⲁⲣ ⲡⲉ ⲉⲃⲟⲗ ⲅⲁⲣ ϩⲛⲟⲩϩⲓⲥⲉ ⲁⲡⲛⲟⲩⲧⲉ ⲣⲡⲉⲓϩⲟⲟⲩ ⲛⲁⲩ ⲛⲉϩⲟⲟⲩ ⲛⲁⲅⲁⲑⲟⲛ ϩⲓⲉⲫⲣⲟⲥⲩⲛⲏ ⲧⲉⲛⲟⲩ ⲇⲉ ⲕⲁⲧⲁⲧϩⲉ ⲛⲛⲉⲧⲛϣⲁ ⲉⲧⲉⲧⲛⲉⲣϣⲁ ⲙⲙⲟϥ ⲉϥⲥⲟⲧⲡ ⲛⲣⲁϣⲉ ϫⲉⲕⲁⲥ ⲉϥⲉϣⲱⲡⲉ ⲛⲁⲛ ⲉⲩⲟⲩϫⲁⲓ ⲙⲛⲛⲡⲉⲣⲥⲟⲥ ⲉⲩϣⲓⲛⲉ ⲛⲧⲉⲛⲭⲁⲣⲓⲥ ⲛⲉⲧⲕⲱⲧⲉ ⲇⲉ ⲙⲙⲟⲛ ⲛⲥⲱⲛ ⲉϥⲉⲣⲡⲙⲉⲉⲩⲉ ⲙⲉⲩⲡⲧⲁⲕⲟ ⲁⲩⲱ ⲡⲟⲗⲓⲥ ⲛⲓⲙ ⲙⲛⲭⲱⲣⲁ ⲛⲓⲙ ⲉⲧⲉⲛⲥⲉⲉⲓⲣⲉ ⲕⲁⲧⲁⲣⲟⲥ ⲁⲛ ⲉⲩⲉⲧⲁⲕⲟⲥ ϩⲛⲟⲩⲣⲱⲕϩ ⲙⲛⲟⲩⲥⲏϥⲉ ⲙⲏⲡⲱⲥ ⲟⲩ ⲙⲟⲛⲟⲛ ⲛⲥⲉⲟⲩⲱϩ ⲛϩⲏⲧⲟⲩ ⲛϭⲓⲛⲣⲱⲙⲉ ⲁⲗⲗⲁ ϩⲱⲟⲩ ⲟⲛ ⲛⲉⲑⲏⲣⲓⲟⲛ ⲙⲛⲛϩⲁⲗⲁⲧⲉ ⲛⲛⲟⲩϫⲱϩ ⲉⲣⲟⲥ ϣⲁⲉⲛⲉϩ

13 ⲡⲁⲛⲧⲓⲅⲣⲁⲫⲟⲛ ⲇⲉ ⲛⲧⲉⲓⲉⲡⲓⲥⲧⲟⲗⲏ ⲉⲩⲉⲧⲁϩⲟ ⲉⲣⲁⲧϥ ⲕⲁⲧⲁⲛⲛⲟⲙⲟⲥ ⲁⲩⲱ ⲕⲁⲧⲁⲛⲗⲁⲟⲥ ϫⲉⲛⲓⲟⲩⲇⲁⲓ ⲉⲩⲥⲃⲧⲱⲧ ⲉⲡⲉⲓϩⲟⲟⲩ ⲉⲧⲣⲉⲩⲡⲟⲗⲉⲙⲉⲓ ⲙⲛⲛⲉⲩϫⲁϫⲉ

14 ⲛϩⲓⲡⲡⲉⲩⲥ ϭⲉ ⲁⲩⲉⲓ ⲉⲃⲟⲗ ϩⲛⲟⲩϭⲉⲡⲏ ⲉϫⲱⲕ ⲉⲃⲟⲗ ⲛⲛⲉⲧⲉⲣⲉⲡⲣⲣⲟ ϫⲱ ⲙⲙⲟⲟⲩ ⲁⲩⲱ ⲡⲉⲥϩⲁⲓ ⲁⲩⲧⲟϭϥ ⲉⲃⲟⲗ ϩⲛⲥⲟⲩⲥⲟⲥ

15 ⲁⲩⲱ ⲙⲁⲣⲇⲟⲩⲭⲁⲓⲟⲥ ⲁϥⲉⲓ ⲉⲃⲟⲗ ⲉϥⲥⲧⲟⲗⲓⲥⲉ ⲛⲧⲉⲥⲧⲟⲗⲏ ⲛⲧⲙⲛⲧⲣⲣⲟ ⲉⲣⲉⲟⲩⲕⲗⲟⲙ ⲛⲛⲟⲩⲃ ϩⲓϫⲱϥ ⲁⲩⲱ ⲟⲩϭⲣⲏⲡⲉ ⲛϣⲛⲥ ⲛϫⲏϭⲉ ⲛⲉⲧϩⲛ ⲥⲟⲩⲥⲟⲥ ⲇⲉ ⲛⲧⲉⲣⲟⲩⲛⲁⲩ ⲉⲣⲟϥ ⲁⲩⲣⲁϣⲉ

16 ⲛⲓⲟⲩⲇⲁⲓ ϭⲉ ⲁⲩⲟⲩⲟⲉⲓⲛ ϣⲱⲡⲉ ⲛⲁⲩ ⲙⲛⲟⲩⲉⲩⲫⲣⲱⲥⲩⲛⲏ

17 ⲕⲁⲧⲁⲡⲟⲗⲓⲥ ϩⲓⲭⲱⲣⲁ ϩⲙⲡⲙⲁ ⲉϣⲁⲩⲧⲉϭ ⲡⲉⲥϩⲁⲓ ⲉⲃⲟⲗ ⲛϩⲏⲧϥ ⲟⲩⲣⲁϣⲉ ⲙⲛⲟⲩⲟⲩⲛⲟϥ ⲁϥϣⲱⲡⲉ ⲛⲓⲟⲩⲇⲁⲓ ϩⲉⲛⲥⲱⲃⲉ ⲙⲛⲟⲩⲉⲩⲫⲣⲟⲥⲩⲛⲏ ϩⲁϩ ϩⲛⲛⲛϩⲉⲑⲛⲟⲥ ⲁⲩⲥⲃⲃⲏⲧⲟⲩ ⲁⲩⲣ ⲓⲟⲩⲇⲁⲓ