Esther 4 — Coptic (Sahidic)

1 ⲙⲁⲣⲇⲟⲭⲁⲓⲟⲥ ⲇⲉ ⲛⲧⲉⲣⲉϥⲉⲓⲙⲉ ⲉⲡⲉⲧⲛⲁϫⲱⲕ ⲉⲃⲟⲗ ⲁϥⲡⲉϩⲛⲉϥϩⲟⲓⲧⲉ ⲁϥϯ ϩⲓⲱⲱϥ ⲛⲟⲩϭⲟⲟⲩⲛⲉ ⲁϥϣⲉϣⲕⲣⲙⲥ ⲉϫⲱϥ ⲁϥⲡⲱⲧ ⲉⲡⲥⲁ ⲛⲃⲟⲗ ϩⲓⲧⲛⲧⲉⲡⲗⲁϯⲁ ⲛⲧⲡⲟⲗⲓⲥ ⲉϥϫⲓϣⲕⲁⲕ ⲉⲃⲟⲗ ϩⲛⲟⲩⲛⲟϭ ⲛⲥⲙⲏ ϫⲉⲥⲉⲛⲁⲧⲁⲕⲉⲟⲩϩⲉⲑⲛⲟⲥ ⲉⲙⲡϥⲣⲗⲁⲁⲩ ⲛϫⲓ ⲛϭⲟⲛⲥ

2 ⲁϥⲉⲓ ϣⲁϩⲣⲁⲓ ⲉⲧⲡⲩⲗⲏ ⲙⲡⲣⲣⲟ ⲁϥⲁϩⲉⲣⲁⲧϥ ⲙⲡⲉⲥⲧⲟ ⲅⲁⲣ ⲛⲁϥ ⲁⲛ ⲡⲉ ⲉⲧⲣⲉϥⲃⲱⲕ ⲉϩⲟⲩⲛ ⲉⲧⲁⲩⲗⲏ ⲉⲣⲉⲟⲩϭⲟⲟⲩⲛⲉ ϩⲓⲱⲱϥ ⲉⲣⲉⲟⲩⲕⲣⲙⲥ ϩⲓϫⲱϥ

3 ⲁⲩⲱ ϩⲛⲛⲉⲭⲱⲣⲁ ⲧⲏⲣⲟⲩ ⲉⲛⲧⲁⲩⲧⲉϭⲛⲉⲥϩⲁⲓ ⲉⲃⲟⲗ ⲛϩⲏⲧⲟⲩ ⲟⲩⲁϣϣⲕⲁⲕ ⲙⲛⲟⲩⲛⲉϩⲡⲉ ⲙⲛⲟⲩϩⲏⲃⲉ ⲁⲩϣⲱⲡⲉ ⲛⲓⲟⲩⲇⲁⲓ ⲧⲏⲣⲟⲩ ⲁⲩⲡⲱⲣϣ ϩⲁⲣⲟⲟⲩ ⲛⲟⲩϭⲟⲟⲩⲛⲉ ⲙⲛⲟⲩⲕⲣⲙⲥ

4 ⲛϩⲙϩⲁⲗ ⲇⲉ ⲛⲧⲣⲣⲱ ⲁⲩⲃⲱⲕ ⲛⲁⲥ ⲉϩⲟⲩⲛ ⲁⲩϫⲓⲡⲟⲩⲟ ⲛⲁⲥ ⲁⲥϣⲧⲟⲣⲧⲣ ⲛⲧⲉⲣⲉⲥⲥⲱⲧⲙ ⲉⲡⲉⲛⲧⲁϥϣⲱⲡⲉ ⲁⲥϫⲟⲟⲩ ⲉⲃⲟⲗ ⲉϯ ⲛϩⲉⲛϩⲟⲓⲧⲉ ϩⲓⲱⲱϥ ⲙⲙⲁⲣⲇⲟⲩⲕⲁⲓⲟⲥ ⲉϥⲓ ⲛⲧϭⲟⲟⲩⲛⲉ ϩⲓϫⲱϥ ⲛⲧⲟϥ ⲇⲉ ⲙⲡϥⲕⲁⲁⲥ ⲉϩⲣⲁⲓ

5 ⲉⲥⲑⲏⲣ ⲇⲉ ⲁⲥⲙⲟⲩⲧⲉ ⲉⲁⲭⲣⲁⲑⲁⲓⲟⲥ ⲡⲉⲥⲥⲓⲟⲩⲣ ⲡⲉⲧⲁϩⲉⲣⲣⲁⲧϥ ⲙⲡⲉⲥⲃⲟⲗ ⲁⲥϫⲟⲟⲩϥ ⲉⲉⲓⲙⲉ ⲛⲧⲟⲟⲧϥ ⲙⲙⲁⲣⲇⲟⲩⲕⲁⲓⲟⲥ ϩⲛⲧⲉⲡⲗⲁϯⲁ ϩⲁⲧⲉ ⲙⲡⲉⲣⲓⲡⲉⲣⲟⲓ

7 ⲙⲁⲣⲇⲟⲭⲁⲓⲟⲥ ⲇⲉ ⲁϥⲧⲁⲙⲟϥ ⲉⲡⲉⲛⲧⲁϥϣⲱⲡⲉ ⲁⲩⲱ ⲡⲉⲣⲏⲧ ⲉⲛⲧⲁⲁⲙⲁⲛ ⲉⲣⲏⲧ ⲙⲙⲟϥ ⲙⲡⲣⲣⲟ ⲛⲟⲩⲁⲅⲟⲍⲁ ⲛⲟⲩⲧⲃⲁ ⲛϭⲓⲛϭⲱⲣ ϫⲉⲉϥⲉⲧⲁⲕⲉⲛⲓⲟⲩⲇⲁⲓ

8 ⲁⲩⲱ ⲡⲁⲛⲧⲓⲅⲣⲁⲫⲟⲛ ⲙⲡⲉⲥϩⲁⲓ ⲉⲛⲧⲁⲩⲧⲟϭϥ ⲉⲃⲟⲗ ϩⲛⲥⲟⲩⲥⲟⲥ ⲉⲧⲁⲕⲟⲟⲩ ⲁϥⲧⲁⲁϥ ⲛⲁϥ ⲉⲧⲟⲩⲟϥ ⲉⲉⲥⲑⲏⲣ ⲁϥϫⲟⲟⲥ ⲛⲁϥ ⲉⲧⲣⲉⲥⲃⲱⲕ ⲉϩⲟⲩⲛ ϣⲁⲡⲣⲣⲟ ⲛⲥⲁⲣⲉⲧⲓ ⲙⲡⲉⲓϩⲱⲃ ⲃⲱⲕ ϭⲉ ⲛⲧⲉⲁⲝⲓⲟⲩ ⲙⲙⲟϥ ⲉⲧⲃⲉⲡⲗⲁⲟⲥ ⲙⲛⲧⲡⲟⲗⲓⲥ ⲛⲧⲉⲣⲡⲙⲉⲉⲩⲉ ⲛⲛⲉϩⲟⲟⲩ ⲙⲡⲟⲩⲑⲃⲃⲓⲟ ⲛⲧϩⲉ ⲛⲧⲁⲉⲓ ⲉϩⲣⲁⲓ ϩⲛⲛⲁϭⲓϫ ⲉⲃⲟⲗ ϫⲉⲁⲙⲁⲛ ⲡⲉⲧⲟ ⲙⲙⲁϩⲥⲛⲁⲩ ⲙⲡⲣⲣⲟ ⲁϥϣⲁϫⲉ ⲉⲧⲃⲏⲏⲧⲛ ⲉⲡⲙⲟⲩ ⲉⲡⲓⲕⲁⲗⲓ ϭⲉ ⲙⲡϫⲟⲉⲓⲥ ⲉⲧⲃⲏⲏⲧⲛ ⲛⲧⲉⲛⲁϩⲙⲛ ⲉⲃⲟⲗ ϩⲙⲡⲙⲟⲩ

9 ⲁⲭⲣⲁⲑⲁⲓⲟⲥ ⲇⲉ ⲁϥⲃⲱⲕ ⲉϩⲟⲩⲛ ⲁϥϣⲁϫⲉ ⲙⲛⲉⲥⲑⲏⲣ ⲛⲛⲉⲓϣⲁϫⲉ ⲧⲏⲣⲟⲩ

10 ⲉⲥⲑⲏⲣ ⲇⲉ ⲡⲉϫⲁⲥ ⲛⲁⲭⲣⲁⲑⲁⲓⲟⲥ ϫⲉⲃⲱⲕ ϣⲁⲙⲁⲣⲇⲟⲭⲁⲓⲟⲥ ⲛⲅϫⲟⲟⲥ ⲛⲁϥ

11 ϫⲉⲛⲛⲛⲟⲙⲟⲥ ⲧⲏⲣⲟⲩ ⲕⲥⲟⲟⲩⲛ ⲙⲙⲟⲟⲩ ϫⲉⲣⲱⲙⲉ ⲛⲓⲙ ϩⲓⲥϩⲓⲙⲉ ⲉⲧⲛⲁⲃⲱⲕ ⲉϩⲟⲩⲛ ϣⲁⲡⲣⲣⲟ ⲉⲧⲁⲩⲗⲏ ⲉⲧϩⲓϩⲟⲩⲛ ⲁϫⲛⲧⲣⲉⲩⲙⲟⲩⲧⲉ ⲉⲣⲟϥ ⲙⲛⲧϥⲟⲩϫⲁⲓ ⲙⲙⲁⲩ ⲉⲣϣⲁⲛⲡⲣⲣⲟ ⲇⲉ ⲥⲟⲩⲧⲛⲡⲉϥϭⲉⲣⲱⲃ ⲛⲛⲟⲩⲃ ⲉⲃⲟⲗ ⲡⲁⲓ ϥⲛⲁⲟⲩϫⲁⲓ ⲁⲛⲟⲕ ϭⲉ ϩⲱⲱⲧ ⲙⲡⲟⲩⲙⲟⲩⲧⲉ ⲉⲣⲟⲓ ⲉⲃⲱⲕ ⲉϩⲟⲩⲛ ϣⲁⲡⲣⲣⲟ ⲉⲓⲥ ⲁⲟⲩⲉⲃⲟⲧ ⲛϩⲟⲟⲩ

12 ⲁⲁⲭⲣⲁⲑⲁⲓⲟⲥ ϫⲉⲛϣⲁϫⲉ ⲛⲉⲥⲑⲏⲣ ⲛⲁϥ ⲙⲙⲁⲣⲇⲟⲩⲭⲁⲓⲟⲥ

13 ⲁϥⲧⲣⲉⲩⲟⲩⲱϣⲃ ⲛⲉⲥⲑⲏⲣ ⲛⲕⲉⲥⲟⲡ ϫⲉⲙⲡⲣϩⲉⲗⲡⲓⲍⲉ ⲉϣⲡⲥⲱⲧⲏⲣⲓⲁ ⲟⲩⲁⲁⲧⲉ ϫⲉⲛⲧⲟ ϩⲙⲡⲁⲗⲗⲁϯⲟⲛ ⲉⲡⲉⲓⲇⲏ ⲅⲁⲣ ⲕⲁⲛ ⲉϣϫⲉ ⲉⲣⲉⲕⲁⲣⲱ ϩⲁⲣⲟⲥ ⲛⲧⲟ ⲛϣⲏⲣⲉ ⲙⲡⲓⲥⲣⲁⲏⲗ

14 ⲉⲣⲉⲧⲥⲱⲧⲏⲣⲓⲁ ⲙⲛⲧⲙⲛⲧⲣⲙϩⲉ ⲧⲟⲩⲛⲟⲥ ⲉⲃⲟⲗ ϩⲛⲕⲉⲥⲁ ⲛⲧⲱⲧⲛ ⲇⲉ ⲛⲧⲟ ⲙⲛⲡⲉⲏⲓ ⲧⲉⲧⲛⲉⲧⲁⲕⲟ ⲁⲩⲱ ⲧⲁⲭⲩ ⲡⲁⲓϩⲱⲃ ⲡⲉⲛⲧⲁⲩϫⲁⲥⲧⲉ ⲉⲧⲃⲏⲏⲧϥ ϩⲣⲁⲓ ⲉⲧⲙⲛⲧⲣⲣⲟ

15 ⲁⲩⲱ ⲉⲥⲑⲏⲣ ⲁⲥϫⲟⲟⲩ ⲟⲛ ⲙⲙⲁⲣⲇⲟⲩⲭⲁⲓⲟⲥ ⲉⲧⲣⲉⲥⲟⲩⲱϣⲃ ⲉⲥϫⲱ ⲙⲙⲟⲥ

16 ϫⲉⲃⲱⲕ ϭⲉ ⲛⲁⲕ ⲛⲅⲥⲩⲛⲁⲅⲉ ⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲉⲧⲟⲩⲏϩ ϩⲛⲥⲟⲩⲥⲟⲥ ⲧⲏⲣⲟⲩ ⲛⲧⲉⲧⲛⲛⲏⲥⲧⲉⲩⲉ ⲉⲧⲃⲏⲏⲧⲛⲛⲉⲧⲛⲟⲩⲱⲙ ⲛϣⲟⲙⲛⲧ ⲛϩⲟⲟⲩ ⲟⲩⲧⲉ ⲛⲛⲉⲧⲛⲥⲱ ⲁⲛⲟⲕ ⲇⲉ ⲙⲛⲛⲁϭⲁⲩⲱⲛⲉ ϩⲱⲛ ⲧⲛⲛⲁⲛⲏⲥⲧⲉⲩⲉ ⲙⲛⲛⲥⲱⲥ ϯⲛⲁⲃⲱⲕ ⲉϩⲟⲩⲛ ϣⲁⲡⲣⲣⲟ ⲕⲉⲧⲟⲓ ⲙⲡϩⲁⲡ ⲁⲛ ⲡⲉ ⲉⲓϣⲁⲛⲧⲁⲕⲟ ⲧⲟⲧⲉ ⲙⲁⲣⲓⲧⲁⲕⲟ

17 ⲁⲩⲱ ⲙⲁⲣⲇⲟⲩⲭⲁⲓⲟⲥ ⲁϥⲃⲱⲕ ⲁϥⲣϩⲱⲃ ⲛⲓⲙ ⲕⲁⲧⲁⲧϩⲉ ⲉⲛⲧⲁⲉⲥⲑⲏⲣ ϣⲁϫⲉ ⲉⲉⲓⲣⲉ ⲙⲙⲟⲥ ⲛⲧⲟϥ ⲇⲉ ⲙⲁⲣⲇⲟⲩⲭⲁⲓⲟⲥ ⲁϥϣⲗⲏⲗ ⲉⲡϫⲟⲉⲓⲥ ⲉϥⲣ ⲡⲙⲉⲉⲩⲉ ⲉⲛⲉϩⲃⲏⲩⲉ ⲛⲧⲉⲡⲛⲟⲩⲧⲉ ⲁϥⲧⲱⲃϩ ϩⲓⲛⲁⲓ ⲉϥϫⲱ ⲙⲙⲟⲥ ϫⲉⲡϫⲟⲉⲓⲥ ⲡⲣⲣⲟ ⲉϥⲁⲣⲭⲉⲓ ⲉϫⲛϩⲱⲃ ⲛⲓⲙ ⲡⲕⲟⲥⲙⲟⲥ ⲅⲁⲣ ⲉϥⲟ ⲛⲧⲟⲟⲧⲕ ⲙⲛⲗⲁⲁⲩ ⲉϥⲙⲓϣⲉ ⲛⲙⲙⲁⲕ ⲉⲕⲥⲱⲧⲉ ⲙⲡⲓⲥⲣⲁⲏⲗ ⲛⲧⲟⲕ ⲡⲉⲛⲧⲁϥⲧⲁⲙⲓⲉ ⲧⲡⲉ ⲙⲛⲡⲕⲁϩ ⲙⲛϣⲡⲏⲣⲉ ⲛⲓⲙ ⲉⲧϩⲁ ⲧⲉⲥϩⲁⲓⲃⲉⲥ ⲛⲧⲕⲡⲇⲉⲥⲡⲟⲧⲁ ⲛϩⲱⲃ ⲛⲓⲙ ⲉⲙⲛⲡⲉⲧϯ ⲟⲩⲃⲏⲕ ⲕⲥⲟⲟⲩⲛ ⲙⲡⲧⲏⲣϥ ⲡϫⲟⲉⲓⲥ ⲁⲩⲱ ⲕⲥⲟⲟⲩⲛ ϫⲉⲙⲡⲓⲣⲡⲁⲓ ϩⲛⲟⲩϣⲟⲩϣⲟⲩ ⲟⲩⲧⲉ ϩⲛⲟⲩⲙⲛⲧϫⲁⲥⲓϩⲏⲧ ⲟⲩⲧⲉ ⲟⲩⲫⲓⲗⲟⲇⲟⲝⲓⲁ ϫⲉⲙⲡⲓⲡⲁϩⲧ ⲉⲣⲁⲧϥ ⲛⲁⲙⲁⲛ ⲡⲇⲓⲁⲃⲟⲗⲟⲥ ⲉⲓⲥ ϩⲏⲏⲧⲉ ⲅⲁⲣ ⲧⲁⲥⲱⲧⲉ ⲙⲡⲓⲥⲣⲁⲏⲗ ⲉⲓⲛⲁϯⲡⲓ ⲉⲛⲉϥⲟⲩⲉⲣⲏⲧⲉ ⲁⲗⲗⲁ ⲉⲁⲓⲣⲡⲁⲓ ϫⲉⲛⲛⲁϯⲉⲟⲟⲩ ⲙⲙⲓⲛⲉ ⲙⲡⲉⲧⲡⲉ ⲙⲡⲉⲟⲟⲩ ⲙⲡⲁⲛⲟⲩⲧⲉ ⲁⲩⲱ ⲛϯⲛⲁⲟⲩⲱϣⲧ ⲁⲛ ⲛⲗⲁⲁⲩ ⲛⲥⲁⲃⲗⲗⲁⲕ ⲡϫⲟⲉⲓⲥ ⲟⲩⲇⲉ ⲛϯⲛⲁⲣⲗⲁⲁⲩ ⲁⲛ ϩⲛⲟⲩⲙⲛⲧϫⲁⲥⲓϩⲏⲧ ⲧⲉⲛⲟⲩ ϭⲉ ⲡϫⲟⲉⲓⲥ ⲡⲛⲟⲩⲧⲉ ⲛⲁⲃⲣⲁϩⲁⲙ ϯⲥⲟ ⲉⲡⲉⲕⲗⲁⲟⲥ ϫⲉⲥⲉϭⲱϣⲧ ⲉϫⲱⲛ ⲉⲩⲧⲁⲕⲟ ⲁⲩⲱ ⲁⲩⲉⲡⲓⲑⲩⲙⲉⲓ ⲉⲧⲁⲕⲉⲧⲉⲕⲕⲗⲏⲣⲟⲛⲟⲙⲓⲁ ϫⲓⲛⲧⲉϩⲟⲩⲉⲓⲧⲉ ⲙⲡⲣⲕⲱ ⲛⲥⲱⲕ ⲛⲧⲉⲕⲙⲉⲣⲓⲥ ⲧⲁⲓ ⲉⲛⲧⲁⲕⲥⲟⲧⲥ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ⲥⲱⲧⲙ ⲉⲡⲁⲧⲱⲃϩ ⲛⲅⲟⲩⲱⲛϩ ⲉⲃⲟⲗ ⲙⲡⲉⲕⲕⲗⲏⲣⲟⲥ ⲛⲅⲕⲧⲟ ⲙⲡⲉⲛϩⲏⲃⲉ ⲉⲩⲣⲁϣⲉ ϫⲉⲕⲁⲥ ⲉⲛⲉⲥⲙⲟⲩ ⲉⲣⲟⲕ ⲡϫⲟⲉⲓⲥ ⲉⲛⲟⲛϩ ⲙⲡⲣⲧⲁⲕⲟ ⲛⲧⲧⲁⲡⲣⲟ ⲛⲛⲉⲧⲥⲙⲟⲩ ⲉⲣⲟⲕ ⲁⲩⲱ ⲡⲓⲥⲣⲁⲏⲗ ⲧⲏⲣϥ ⲁϥⲁϣϣⲕⲁⲕ ⲉⲃⲟⲗ ϩⲛⲧⲉⲩϭⲟⲙ ϫⲉⲡⲉⲩⲙⲟⲩ ⲛⲉϥϩⲁⲛⲉⲩⲃⲁⲗ ⲉⲥⲑⲏⲣ ⲧⲣⲣⲱ ⲁⲥⲡⲱⲧ ⲉⲣⲁⲧϥ ⲙⲡϫⲟⲉⲓⲥ ϩⲛⲟⲩϩⲟⲧⲉ ⲙⲙⲟⲩ ⲁⲥⲕⲁⲁⲥ ⲕⲁϩⲏⲩ ⲛⲧϩⲃⲥⲱ ⲙⲡⲉⲥⲉⲟⲟⲩ ⲁⲩⲱ ⲁⲥϯ ϩⲓⲱⲱⲥ ⲛϩⲉⲛϩⲟⲓⲧⲉ ⲛϩⲏⲃⲉ ϩⲓϫⲱϫ ⲁⲩⲱ ⲉⲡⲙⲁ ⲛⲛⲉⲥϯⲛⲟⲩϥⲉ ⲙⲙⲛⲧϣⲟⲩϣⲟ ⲁⲥⲙⲉϩⲧⲉⲥⲁⲡⲉ ⲛⲕⲣⲙⲉⲥ ϩⲓⲉⲓⲧⲛ ⲁⲩⲱ ⲡⲉⲥⲥⲱⲙⲁ ⲁⲥⲑⲃⲃⲓⲟϥ ⲉⲙⲁⲧⲉ ⲁⲩⲱ ⲙⲁ ⲛⲓⲙ ⲙⲡⲕⲟⲥⲙⲟⲥ ⲙⲡⲉⲥⲧⲉⲗⲏⲗ ⲁⲥⲙⲁϩⲟⲩ ⲙⲡⲉⲥϥⲱ ⲉⲧⲥⲉϩⲥⲱϩ ⲁⲥⲧⲃϩⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲉⲥϫⲱ ⲙⲙⲟⲥ ϫⲉⲡϫⲟⲉⲓⲥ ⲛⲧⲟⲕ ⲙⲁⲩⲁⲁⲕ ⲡⲉ ⲡⲁⲃⲟⲏⲑⲟⲥ ⲃⲟⲏⲑⲉⲓ ⲉⲣⲟⲓ ⲧⲉⲥϩⲓⲙⲉ ⲛⲟⲩⲟⲟⲧⲥ ⲉⲙⲛⲧⲥⲃⲟⲏⲑⲟⲥ ⲙⲙⲁⲩ ⲛⲥⲁⲃⲗⲗⲁⲕ ϫⲉⲡⲁⲕⲓⲛⲇⲩⲛⲟⲥ ϩⲛⲧⲁϭⲓϫ ⲁⲛⲟⲕ ⲡϫⲟⲉⲓⲥ ϣⲁⲓⲥⲱⲧⲙ ⲛⲧⲟⲟⲧϥ ⲙⲡⲁⲉⲓⲱⲧ ϫⲉⲛⲧⲟⲕ ⲁⲕϫⲓⲡⲓⲥⲣⲁⲏⲗ ⲉⲃⲟⲗ ϩⲛⲛⲛϩⲉⲑⲛⲟⲥ ⲧⲏⲣⲟⲩ ⲁⲩⲱ ⲡⲉⲛⲉⲓⲱⲧ ⲉⲃⲟⲗ ϩⲛⲛⲉⲩⲉⲓⲟⲧⲉ ⲉⲩⲕⲗⲏⲣⲟⲛⲟⲙⲓⲁ ϣⲁⲉⲛⲉϩ ⲁⲩⲱ ⲁⲕⲉⲓⲣⲉ ⲛⲁⲩ ⲛⲛⲉⲛⲧⲁⲕϫⲟⲟⲩ ⲉⲣⲟⲟⲩ ⲁⲛⲣⲛⲟⲃⲉ ⲙⲡⲉⲕⲙⲧⲟ ⲉⲃⲟⲗ ⲁⲩⲱ ⲁⲕⲧⲁⲁⲛ ⲉϩⲣⲁⲓ ⲉⲧⲟⲟⲧⲟⲩ ⲛⲛⲛϫⲓϫⲓⲉⲉⲩ ⲉⲃⲟⲗ ϫⲉⲁⲛϯⲉⲟⲟⲩ ⲛⲛⲉⲩⲛⲟⲩⲧⲉ ⲛⲧⲕⲟⲩⲇⲓⲕⲁⲓⲟⲥ ⲡϫⲟⲉⲓⲥ ⲁⲩⲱ ⲧⲉⲛⲟⲩ ⲙⲛⲟⲩⲣⲱϣⲉ ϩⲙⲡⲡⲉⲓⲣⲁⲥⲙⲟⲥ ⲛⲧⲉⲛⲙⲛⲧϩⲙϩⲁⲗ ⲁⲗⲗⲁ ⲁⲩⲕⲁⲛⲉⲩϭⲓϫ ⲉϫⲛⲛϭⲓϫ ⲛⲛⲉⲩⲉⲓⲇⲱⲗⲟⲛ ⲉⲧⲣⲉⲩϥⲓ ⲙⲙⲁⲩ ⲛⲛⲧⲱϣ ⲛⲧⲉⲕⲧⲁⲡⲣⲟ ⲁⲩⲱ ⲉⲧⲁⲕⲟ ⲛⲧⲉⲕⲕⲗⲏⲣⲟⲛⲟⲙⲓⲁ ⲉϣⲧⲁⲙ ⲛⲧⲧⲁⲡⲣⲟ ⲛⲛⲉⲧⲥⲙⲟⲩ ⲉⲣⲟⲕ ⲁⲩⲱ ⲉⲱϣⲙ ⲙⲡⲉⲟⲟⲩ ⲙⲡⲉⲕⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲉⲧⲣⲉϥⲟⲩⲱⲛ ⲛⲧⲧⲁⲡⲣⲟ ⲛⲛϩⲉⲑⲛⲟⲥ ⲉϩⲉⲛⲁⲣⲉⲧⲏ ⲛⲉⲧϣⲟⲩⲓⲧ ⲛⲧⲉⲟⲩⲣⲣⲟ ⲛⲥⲁⲣⲝ ⲣ ϣⲡⲏⲣⲉ ϣⲁⲉⲛⲉϩ ⲡϫⲟⲉⲓⲥ ⲙⲡⲣⲏϯ ⲙⲡⲉⲕⲏⲡⲧⲱⲣ ⲛⲛⲉⲧⲉⲛⲥⲉϣⲟⲟⲡ ⲁⲛ ⲁⲩⲱ ⲙⲡⲣⲧⲣⲉⲩⲥⲱⲃⲉ ϩⲙⲡⲉⲛϩⲉ ⲁⲗⲗⲁ ⲕⲧⲉⲡⲉⲩϣⲟϫⲛⲉ ⲉϫⲱⲟⲩ ⲛⲅⲧⲁⲕⲉ ⲡⲉⲛⲧⲁϥⲧⲱⲟⲩⲛ ⲉϫⲱⲛ ⲁⲣⲓⲡⲙⲉⲉⲩⲉ ⲡϫⲟⲉⲓⲥ ⲟⲩⲟⲛϩⲕ ⲉⲃⲟⲗ ⲙⲡⲟⲩⲟⲉⲓϣ ⲛⲧⲉⲛⲑⲗⲓⲯⲓⲥ ⲁⲩⲱ ⲁⲛⲟⲕ ⲛⲅϯⲧⲱⲕ ⲛⲁⲓ ⲛϩⲏⲧ ⲡⲁⲛⲟⲩⲧⲉ ⲡⲉⲧⲁⲙⲁϩⲧⲉ ⲉϫⲛⲁⲣⲭⲏ ⲛⲓⲙ ϯ ⲟⲩϣⲁϫⲉ ⲉϥⲧⲏϣ ⲉⲧⲁⲧⲁⲡⲣⲟ ⲙⲡⲉⲙⲧⲟ ⲉⲃⲟⲗ ⲙⲡⲙⲟⲩⲓ ⲛⲅⲕⲧⲉ ⲡⲉϥϩⲏⲧ ⲉⲟⲩⲙⲟⲥⲧⲉ ⲉϫⲙⲡⲉⲧϯ ⲛⲙⲙⲁⲛ ⲉⲧⲉϥϩⲁⲏ ⲙⲛⲛⲉⲧϥⲓ ⲛⲙⲙⲁϥ ⲁⲛⲟⲛ ⲇⲉ ⲛⲁϩⲙⲛ ϩⲛⲧⲉⲕϭⲓϫ ⲛⲅⲃⲟⲏⲑⲉⲓ ⲉⲣⲟⲓ ⲧⲉⲥϩⲓⲙⲉ ⲛⲟⲩⲟⲟⲧⲥ ⲉⲙⲛⲧⲥⲗⲁⲁⲩ ⲛⲥⲁⲃⲗⲗⲁⲕ ⲙⲡϫⲟⲉⲓⲥ ⲟⲩⲛⲧⲁⲕ ⲙⲙⲁⲩ ⲙⲡⲥⲟⲟⲩⲛ ⲧⲏⲣϥ ⲁⲩⲱ ⲕⲥⲟⲟⲩⲛ ϫⲉⲁⲓⲙⲟⲥⲧⲉ ⲡⲉⲟⲟⲩ ⲛⲛⲁⲛⲟⲙⲟⲥ ⲁⲩⲱ ϯⲃⲱⲧⲉ ⲛⲙⲙⲁⲛⲛⲕⲟⲧⲕ ⲛⲁⲧⲥⲃⲃⲉ ⲛⲓⲙ ϩⲓϣⲙⲙⲟ ⲛⲓⲙ ⲛⲧⲟⲕ ⲉⲧⲥⲟⲟⲩⲛ ⲛⲧⲁⲁⲛⲁⲅⲕⲏ ⲉϯ ⲛϩⲏⲧⲥ ϫⲉϯⲃⲱⲧⲉ ⲙⲡⲙⲁⲉⲓⲛ ⲛⲧⲁⲙⲛⲧϫⲁⲥⲓϩⲏⲧ ⲡⲁⲓ ⲉⲧϩⲓϫⲛ ⲧⲁⲁⲡⲉ ϩⲙⲡⲉϩⲟⲟⲩ ⲙⲡⲁⲟⲩⲱⲛϩ ⲉⲃⲟⲗ ϯⲃⲱⲧⲉ ⲙⲙⲟϥ ⲛⲧϩⲉ ⲛⲟⲩⲧⲟⲓⲥ ⲛϣⲣⲱ ⲁⲩⲱ ⲙⲉⲓⲧⲁⲁϥ ⲉϫⲱⲓ ϩⲛⲛⲉϩⲟⲟⲩ ⲉϯϣⲟⲟⲡ ⲙⲁⲩⲁⲁⲧ ⲧⲉⲕϩⲙϩⲁⲗ ⲙⲡⲓⲟⲩⲱⲙ ϩⲛⲧⲉⲧⲣⲁⲡⲉⲍⲁ ⲛⲁⲙⲁⲛ ⲁⲩⲱ ⲙⲡⲓϯ ⲉⲟⲟⲩ ⲙⲡⲙⲁ ⲛⲥⲱⲛⲣⲣⲱⲟⲩ ⲟⲩⲇⲉ ⲙⲡⲓⲥⲱ ⲛⲟⲩⲏⲣⲡ ⲛⲟⲩⲱⲧⲛ ⲉⲃⲟⲗ ⲁⲩⲱ ⲧⲉⲕϩⲙϩⲁⲗ ⲙⲡⲓⲉⲩⲫⲣⲁⲛⲉ ⲉϫⲙⲡⲉⲟⲟⲩ ⲙⲡⲁϣⲓⲡⲉ ϣⲁⲧⲉⲛⲟⲩ ⲛⲥⲁϩⲣⲁⲓ ⲛϩⲏⲧⲕ ⲡϫⲟⲉⲓⲥ ⲡⲛⲟⲩⲧⲉ ⲛⲁⲃⲣⲁϩⲁⲙ ⲡⲛⲟⲩⲧⲉ ⲉⲧϭⲙϭⲟⲙ ⲉϫⲛⲟⲩⲟⲛ ⲛⲓⲙ ⲥⲱⲧⲙ ⲉⲡⲉϩⲣⲟⲟⲩ ⲛⲛⲉⲛⲧⲁⲧⲉⲩϩⲉⲗⲡⲓⲥ ⲱϫⲛ ⲛⲉⲧⲟⲩⲱϣ ⲉⲙⲟⲟⲩⲧⲟⲩ ⲁⲩⲱ ⲛⲅⲛⲁϩⲙⲛ ⲉⲧⲟⲟⲧⲟⲩ ⲛⲛⲉⲧⲡⲟⲛⲏⲣⲉⲩⲉ ⲉⲣⲟⲛ ⲛⲁϩⲙⲉⲧ ⲉⲃⲟⲗ ϩⲛⲧⲁϩⲟⲧⲉ