Esther 3 — Coptic (Sahidic)

1 ⲙⲛⲛⲥⲁⲛⲁⲓ ⲡⲣⲣⲟ ⲁϥϫⲓⲥⲉ ⲛⲁⲙⲁⲛ ⲡϣⲏⲣⲉ ⲛⲁⲙⲁⲇⲁⲛⲑⲟⲥ ⲡⲃⲟⲩⲕⲁⲓⲟⲥ ⲁϥϯⲉⲟⲟⲩ ⲛⲁϥ ⲁⲩⲱ ϣⲁϥⲃⲱⲕ ⲉϩⲟⲩⲛ ⲛϣⲟⲣⲡ ⲙⲡⲣⲣⲟ ⲟⲩⲧⲉⲛⲉϥϣⲃⲉⲉⲣ ⲧⲏⲣⲟⲩ

2 ⲛⲉⲧϩⲛ ⲧⲁⲩⲗⲏ ⲧⲏⲣⲟⲩ ⲁⲩⲟⲩⲱϣⲧ ⲛⲁϥ ⲧⲁⲓ ⲅⲁⲣ ⲧⲉ ⲧϩⲉ ⲉⲛⲧⲁⲡⲣⲣⲟ ⲟⲩⲉϩⲥⲁϩⲛⲉ ⲉⲧⲣⲉⲥϣⲱⲡⲉ ⲙⲁⲣⲇⲟⲩⲭⲁⲓⲟⲥ ⲇⲉ ⲙⲡϥⲟⲩⲱϣⲧ ⲛⲁϥ

3 ⲛⲉⲧϩⲛ ⲧⲁⲩⲗⲏ ⲙⲡⲣⲣⲟ ⲁⲩϣⲁϫⲉ ⲙⲛⲙⲁⲣⲇⲟⲩⲭⲁⲓⲟⲥ ⲉⲩϫⲱ ⲙⲙⲟⲥ ϫⲉⲁϩⲣⲟⲕ ϫⲉⲛⲅⲥⲱⲧⲙ ⲁⲛ ⲛⲥⲁⲛⲉⲧⲉⲡⲣⲣⲟ ϫⲱ ⲙⲙⲟⲟⲩ

4 ⲛⲛⲉⲩϣⲁϫⲉ ⲛⲙⲙⲁϥ ⲙⲙⲏⲛⲉ ⲙⲡϥⲥⲱⲧⲙ ⲛⲁⲩ ⲁⲩⲧⲁⲙⲉ ⲁⲙⲁⲛ ϫⲉⲙⲙⲁⲣⲇⲟⲩⲭⲁⲓⲟⲥ ⲥⲱⲧⲙ ⲁⲛ ⲛⲥⲁⲛⲛϣⲁϫⲉ ⲙⲡⲣⲣⲟ ⲁⲩⲧⲁⲙⲟϥ ⲅⲁⲣ ϫⲉⲟⲩⲓⲟⲩⲇⲁⲓ ⲡⲉ

5 ⲁⲁⲙⲁⲛ ⲇⲉ ⲉⲓⲙⲉ ϫⲉⲙⲙⲁⲣⲇⲟⲩⲭⲁⲓⲟⲥ ⲛⲁⲟⲩⲱϣⲧ ⲛⲁϥ ⲁⲛ ⲁⲙⲁⲛ ⲁϥϭⲱⲛⲧ

6 ⲁⲩⲱ ⲁϥϫⲓϣⲟϫⲛⲉ ⲉⲧⲁⲕⲟ ⲛⲛⲓⲟⲩⲇⲁⲓ ⲧⲏⲣⲟⲩ ⲉⲧϩⲛⲧⲙⲛⲧⲣⲣⲟ ⲛⲛⲁⲣⲇⲁⲝⲉⲣⲝⲏⲥ

7 ϩⲛⲧⲙⲉϩⲙⲛⲧⲥⲛⲟⲟⲩⲥ ⲛⲣⲟⲙⲡⲉ ⲉⲣⲉⲁⲣⲇⲁⲝⲉⲣⲝⲏⲥ ⲟ ⲛⲣⲣⲟ ⲁϥⲱϣ ⲛⲟⲩⲯⲩⲫⲓⲥⲙⲁ ⲁϥⲛⲟⲩϫⲉ ⲛⲟⲩϩⲟⲟⲩ ⲉⲃⲟⲗ ϩⲛⲟⲩϩⲟⲟⲩ ⲁⲩⲱ ⲟⲩⲉⲃⲟⲧ ⲉⲃⲟⲗ ϩⲛⲟⲩⲉⲃⲟⲧ ⲉⲧⲁⲕⲟ ⲙⲡⲅⲉⲛⲟⲥ ⲙⲙⲁⲣⲇⲟⲩⲭⲁⲓⲟⲥ ⲁⲩⲱ ⲡⲉⲕⲗⲏⲣⲟⲥ ⲁϥϩⲉ ⲉϩⲣⲁⲓ ⲉϫⲛⲥⲟⲩⲙⲛⲧⲁϥⲧⲉ ⲙⲡⲉⲃⲟⲧ ⲉⲧⲉⲁⲇⲁⲣ ⲡⲉ

8 ⲁϥϣⲁϫⲉ ⲛϭⲓⲁⲙⲁⲛ ⲙⲛⲡⲣⲣⲟ ⲁⲣⲇⲁⲝⲉⲣⲝⲏⲥ ⲉϥϫⲱ ⲙⲙⲟⲥ ϫⲉⲟⲩⲛⲟⲩϩⲉⲑⲛⲟⲩ ϣⲟⲟⲡ ⲉϥϫⲟⲟⲣⲉ ⲉⲃⲟⲗ ϩⲛⲛⲛϩⲉⲑⲛⲟⲥ ⲛⲧⲉⲕⲙⲛⲧⲣⲣⲟ ⲧⲏⲣⲥ ⲛⲉⲩⲛⲟⲙⲟⲥ ⲇⲉ ϣⲟⲃⲉ ⲡⲁⲣⲁⲛϩⲉⲑⲛⲟⲥ ⲧⲏⲣⲟⲩ ⲛⲛⲟⲙⲟⲥ ⲙⲡⲣⲣⲟ ⲛⲥⲉⲥⲱⲧⲙ ⲁⲛ ⲛⲥⲱⲟⲩ ⲁⲩⲱ ⲛⲥⲣⲛⲟⲃⲉ ⲁⲛ ⲙⲡⲣⲣⲟ ⲉⲧⲣⲉϥⲕⲁⲁⲩ

9 ⲉϣⲱⲡⲉ ϭⲉ ⲉϩⲛⲡⲣⲣⲟ ⲡⲉ ⲙⲁⲣⲉϥⲧⲱϭⲉ ⲉⲃⲟⲗ ⲛⲟⲩⲥϩⲁⲓ ⲉⲧⲁⲕⲟⲟⲩ ⲁⲩⲱ ⲁⲛⲟⲕ ϯⲛⲁⲇⲓⲁⲅⲣⲁⲫⲉ ⲉⲡⲅⲁⲍⲱⲫⲩⲗⲁⲕⲓⲟⲛ ⲙⲡⲣⲣⲟ ⲙⲡⲣⲣⲟ ⲛⲟⲩⲧⲃⲁ ⲛϭⲓⲛϭⲱⲣ

10 ⲡⲣⲣⲟ ⲇⲉ ⲁϥⲛⲡⲉϥⲝⲟⲩⲣ ⲉⲃⲟⲗ ⲁϥⲧⲁⲁϥ ⲉϩⲣⲁⲓ ⲉⲧⲟⲟⲧϥ ⲛⲁⲙⲁⲛ ⲡⲉⲧⲥϩⲁⲓ ⲉⲧⲃⲉⲛⲓⲟⲩⲇⲁⲓ

11 ⲁⲩⲱ ⲡⲉϫⲉⲡⲣⲣⲟ ⲛⲁⲙⲁⲛ ϫⲉⲛϩⲟⲙⲛⲧ ⲙⲉⲛ ⲕⲁⲁⲩ ⲛⲁⲕ ⲡϩⲉⲑⲛⲟⲥ ⲇⲉ ⲁⲣⲓⲣⲉ ⲛⲁϥ ⲛⲧϩⲉ ⲉⲧⲕⲟⲩⲁϣⲥ

12 ⲁϥⲙⲟⲩⲧⲉ ⲉⲛⲉⲅⲣⲁⲙⲙⲁⲧⲉⲩⲥ ⲙⲡⲣⲣⲟ ⲙⲡϣⲟⲣⲡ ⲛⲉⲃⲟⲧ ⲁⲩⲥϩⲁⲓ ⲕⲁⲧⲁⲧϩⲉ ⲉⲛⲧⲁⲁⲙⲁⲛ ⲟⲩⲉϩⲥⲁϩⲛⲉ ⲛⲛⲉⲥⲧⲣⲁⲧⲏⲅⲟⲥ ⲙⲛⲛⲛⲁⲣⲭⲱⲛ ⲛⲛⲉⲭⲱⲣⲁ ⲧⲏⲣⲟⲩ ϫⲓⲛϯⲛⲇⲓⲕⲏ ϣⲁϩⲣⲁⲓ ⲉⲡⲕⲁϩ ⲛⲛⲉϭⲟⲟϣ ϣⲉⲇⲟⲩ ⲧⲥⲁϣϥⲉ ⲛⲭⲱⲣⲁ ⲛⲁⲣⲭⲱⲛ ⲛⲛϩⲉⲑⲛⲟⲥ ⲕⲁⲧⲁⲧⲉⲩⲗⲉⲝⲏⲥ ⲁⲩⲱ ⲡⲉⲥϩⲁⲓ ⲉⲁⲩⲧⲁⲩⲟϥ ϩⲙⲡⲣⲁⲛ ⲙⲡⲣⲣⲟ ⲁⲣⲇⲁⲝⲉⲣⲝⲏⲥ ⲁⲩϫⲟⲟⲩⲥⲟⲩ ⲇⲉ ϩⲓⲧⲛⲛϩⲓⲡⲡⲉⲩⲥ

13 ⲡⲁⲓ ⲡⲉ ⲡⲁⲛⲧⲓⲅⲣⲁⲫⲟⲛ ⲛⲧⲉⲡⲓⲥⲧⲟⲗⲏ ϫⲉⲁⲣⲇⲁⲝⲉⲣⲝⲏⲥ ⲡⲛⲟϭ ⲛⲣⲣⲟ ⲛⲛⲥⲁⲧⲣⲁⲡⲏⲥ ⲙⲛⲛⲉⲩⲁⲣⲭⲱⲛ ⲧⲏⲣⲟⲩ ⲛⲧⲉⲛⲧⲟϣ ⲣⲕⲍ ϫⲓⲛⲙⲡⲕⲁϩ ⲛϩⲛⲧⲟⲩ ϣⲁϩⲣⲁⲓ ⲉⲧⲁⲓⲑⲓⲟⲡⲓⲁ ⲭⲁⲓⲣⲉ ⲁⲛⲅⲡⲇⲉⲥⲡⲟⲧⲁ ⲉϫⲛⲛⲗⲁⲟⲥ ⲉⲩⲟϣ ⲉⲓⲃⲁⲥⲓⲗⲉⲩⲉ ⲉϫⲙⲡⲕⲁϩ ⲧⲏⲣϥ ⲁⲩⲱ ϩⲙⲡⲧⲣⲁϣⲟⲩϣⲟⲩ ϩⲁⲧⲉⲝⲟⲩⲥⲓⲁ ⲉⲧⲛⲧⲟⲟⲧ ⲁⲓⲧⲱϣ ⲉⲣⲣⲣⲟ ϩⲛⲟⲩⲙⲛⲧϩⲁⲕ ⲙⲛⲟⲩⲛⲁ ⲁⲩⲱ ⲉⲧⲣⲁϯ ⲛⲧⲙⲛⲧⲣⲣⲟ ϩⲱⲥⲧⲉ ⲛⲧⲉⲡⲟⲩⲉⲓ ⲡⲟⲩⲉⲓ ⲱⲛϩ ⲛϩⲏⲧϥ ⲉϥⲥϭⲣⲁϩⲧ ⲉⲣⲉⲛϩⲓⲟⲟⲩⲉ ⲧⲏⲣⲟⲩ ⲧⲁϫⲣⲏⲩⲧ ϣⲁⲛⲉⲥⲧⲟϣ ⲗⲟⲓⲡⲟⲛ ⲉⲥⲙⲛⲉⲑⲓⲣⲏⲛⲏ ⲛⲁⲩ ⲧⲁⲓ ⲉⲧⲉⲣⲉⲣⲱⲙⲉ ⲛⲓⲙ ⲟⲩⲁϣⲥ ⲉⲛⲉⲓⲛⲁϫⲓϣⲟϫⲛⲉ ⲙⲛⲛⲁⲥⲩⲙⲃⲟⲩⲗⲟⲥ ⲉⲧⲃⲉⲧϩⲉ ⲉⲧⲓⲛⲁⲁⲁⲥ ϩⲏⲡⲡⲉ ⲉⲓⲥ ⲁⲙⲁⲛ ⲡⲁⲣⲓⲥⲧⲟⲥ ⲙⲡⲉϥⲧⲱⲣϩ ⲉϥⲥⲟⲧⲡ ϩⲛⲧⲉϥⲙⲉⲅⲁⲗⲟⲯⲩⲭⲉⲓⲁ ⲙⲛⲧⲉϥⲡⲓⲥⲧⲓⲥ ⲡⲉⲧϫⲱⲕ ⲉⲃⲟⲗ ⲙⲡⲕⲉⲡⲣⲟⲥⲟⲡⲟⲛ ϩⲙⲡⲡⲁⲗⲗⲁϯⲟⲛ ⲁϥⲧⲁⲙⲓⲟⲛ ϫⲉⲟⲩⲛⲟⲩⲗⲁⲟⲥ ϣⲱⲡⲉ ϩⲛⲧⲙⲏⲧⲉ ⲛⲛⲉⲫⲩⲗⲏ ⲉϥϩⲱⲟⲩ ⲛⲉϥⲛⲟⲙⲟⲥ ⲅⲁⲣ ⲥⲉϣⲟⲃⲉ ⲡⲁⲣⲁⲛϩⲉⲑⲛⲟⲥ ⲛⲓⲙ ⲉⲩⲕⲁⲛϩⲁⲡ ⲙⲡⲣⲣⲟ ⲛⲥⲱⲟⲩ ⲛⲧⲉⲧⲉⲛⲙⲛⲧⲣⲣⲟ ⲧⲙⲥⲙⲓⲛⲉ ⲉⲧⲃⲏⲏⲧⲟⲩ ⲁⲗⲗⲁ ⲁⲛⲉⲓⲙⲉ ϫⲉⲡⲉⲓⲗⲁⲟⲥ ⲡⲁⲓ ⲟⲩⲁⲁⲧϥ ⲡⲉⲧϯ ⲙⲛⲟⲩⲟⲛ ⲛⲓⲙ ⲁⲩⲱ ⲛⲉⲛϩⲁⲡ ⲛⲥⲉⲥⲱⲧⲙ ⲁⲛ ⲛⲥⲱⲟⲩ ⲁⲩⲱ ϩⲙⲡⲧⲣⲉⲩⲙⲉⲥⲧⲉⲧⲉⲧⲉⲛⲡⲟⲗⲓⲧⲉⲓⲁ ⲛⲥⲉⲉⲓⲣⲉ ⲛⲙⲡⲉⲧϩⲟⲟⲩ ⲉⲧⲙⲕⲁⲧⲉⲓⲙⲛⲧⲣⲣⲟ ⲉⲥⲙⲓⲛⲉ ⲁⲩⲱ ⲉϣⲱⲡⲉ ϩⲛⲟⲩⲥϭⲣⲁϩⲧ ⲁⲛⲟⲩⲉϩⲥⲁϩⲛⲉ ⲇⲉ ϫⲉⲕⲁⲥ ⲛⲉⲧⲉⲣⲉⲁⲙⲁⲛ ⲛⲁⲟⲩⲟⲛϩⲟⲩ ⲉⲃⲟⲗ ⲡⲉⲧϣⲟⲟⲡ ⲉϫⲛⲛⲉϩⲃⲏⲩⲉ ⲉϥⲟ ⲙⲙⲁϩⲥⲛⲁⲩ ⲛⲉⲓⲱⲧ ⲛⲁⲛ ⲉⲧⲁⲕⲟⲟⲩ ⲧⲏⲣⲟⲩ ⲉⲡⲧⲏⲣϥ ⲙⲛⲛⲉⲩϩⲓⲟⲙⲉ ⲙⲛⲛⲉⲩϣⲏⲣⲉ ϩⲛⲧⲥⲏϥⲉ ⲛⲛⲉⲩϫⲁϫⲉ ⲁϫⲛⲛⲁⲛⲓⲙ ϩⲓϯⲥⲟ ϩⲛⲥⲟⲩⲙⲛⲧⲁϥⲧⲉ ⲙⲡⲙⲁϩⲙⲛⲧⲥⲛⲟⲟⲩⲥ ⲛⲛⲉⲃⲟⲧ ⲉⲧⲉⲁⲇⲁⲣ ⲡⲉ ⲛⲧⲉⲓⲣⲟⲙⲡⲉ ⲉⲧϣⲟⲟⲡ ϫⲉⲕⲁⲥ ⲉⲧⲉⲧⲛⲉⲧⲁⲕⲟⲟⲩ ⲛⲧⲉⲧⲛⲧⲣⲉⲩⲃⲱⲕ ⲧⲉⲛⲟⲩ ⲉϩⲉⲛϣⲁϥⲧⲉⲛⲉ ⲛⲟⲩϩⲟⲟⲩ ⲛⲟⲩⲱⲧ ϩⲛⲟⲩϭⲟⲙ ⲉⲁⲙⲛⲧⲉ ϫⲉⲕⲁⲥ ⲡⲟⲩⲟⲉⲓϣ ⲉⲧⲛⲏⲩ ⲉⲩⲉϯ ⲛⲁⲛ ϣⲁⲃⲟⲗ ⲛⲛⲉϩⲃⲏⲩⲉ ⲉⲩⲥϭⲣⲁϩⲧ ⲁⲩⲱ ⲉⲩⲥⲙⲟⲛⲧ

14 ⲛⲁⲛⲧⲓⲅⲣⲁⲫⲟⲛ ⲇⲉ ⲛⲛⲉⲡⲓⲥⲧⲟⲗⲏ ⲛⲛⲉⲩⲧⲱϭⲉ ⲙⲙⲟⲟⲩ ⲉⲃⲟⲗ ⲡⲉ ⲕⲁⲧⲁⲭⲱⲣⲁ ⲭⲱⲣⲁ ⲉⲩⲟⲩⲉϩⲥⲁϩⲛⲉ ⲛⲛϩⲉⲑⲛⲟⲥ ⲧⲏⲣⲟⲩ ⲉⲧⲣⲉⲩϣⲱⲡⲉ ⲉⲩⲥⲃⲧⲱⲧ ⲉⲡⲉⲓϩⲟⲟⲩ

15 ⲡⲟⲩⲉϩⲥⲁϩⲛⲉ ⲇⲉ ⲛⲛⲉϥϭⲉⲡⲏ ⲉⲥⲟⲩⲥⲟⲥ ⲧⲡⲟⲗⲓⲥ ⲡⲣⲣⲟ ⲇⲉ ⲙⲛⲁⲙⲁⲛ ⲛⲛⲉⲩϫⲓⲕⲣⲟϥ ⲡⲉ ⲁⲩⲱ ⲧⲡⲟⲗⲓⲥ ⲉⲛⲉⲁⲥϣⲧⲟⲣⲧⲣ ⲡⲉ