Esther 5 — Coptic (Sahidic)

1 ⲁⲥϣⲱⲡⲉ ⲇⲉ ϩⲙⲡⲙⲁϩϣⲟⲙⲛⲧ ⲛϩⲟⲟⲩ ⲛⲧⲉⲣⲉⲥⲟⲩⲱ ⲉⲥϣⲗⲏⲗ ⲁⲥⲕⲁⲁⲥ ⲕⲁϩⲏⲩ ⲛⲛϩⲟⲓⲧⲉ ⲙⲡⲉⲥⲑⲃⲃⲟ ⲁⲥϭⲟⲟⲗⲉⲥ ⲙⲡⲉⲥⲉⲟⲟⲩ ⲁⲩⲱ ⲛⲧⲉⲣⲉⲥⲥⲁ ⲁⲥⲉⲡⲓⲕⲁⲗⲉⲓ ⲙⲡⲉⲧϭⲱϣⲧ ⲉϫⲛⲟⲩⲟⲛ ⲛⲓⲙ ⲡⲛⲟⲩⲧⲉ ⲡⲥⲱⲧⲏⲣ ⲁⲥϫⲓ ⲧϩⲙϩⲁⲗ ⲥⲛⲧⲉ ⲛⲙⲙⲁⲥ ⲟⲩⲓ ⲙⲉⲛ ⲁⲥⲣⲁⲕⲧⲥ ⲉϫⲱⲥ ⲛⲧϩⲉ ⲉⲧⲥϭⲟⲟⲗⲉ ⲙⲙⲟⲥ ⲕⲉⲟⲩⲉⲓ ⲇⲉ ⲁⲥⲟⲩⲁϩⲥ ⲙⲛⲛⲥⲱⲥ ⲉⲥϥⲓ ⲉϩⲣⲁⲓ ⲛⲧⲉⲥϩⲟⲓⲧⲉ ⲛⲧⲟⲥ ϩⲱⲱⲥ ⲉⲥⲙⲟⲣϣ ϩⲛⲧⲁⲕⲙⲏ ⲙⲡⲉⲥⲥⲁ ⲉⲣⲉⲡⲉⲥϩⲟ ⲣⲟⲟⲩⲧ ⲛϣⲟⲩⲙⲉⲣⲓⲧϥ ⲡⲉⲥϩⲏⲧ ⲇⲉ ⲛⲉϥϩⲏϫ ⲡⲉ ⲉⲃⲟⲗ ϩⲛⲧϩⲟⲧⲉ ⲁⲩⲱ ⲛⲧⲉⲣⲉⲥⲃⲱⲕ ⲉϩⲟⲩⲛ ϩⲓⲧⲛⲛⲣⲟ ⲧⲏⲣⲟⲩ ⲁⲥⲁϩⲉⲣⲁⲧⲥ ⲙⲡⲙⲧⲟ ⲉⲃⲟⲗ ⲙⲡⲣⲣⲟ ⲛⲧⲟϥ ⲇⲉ ⲡⲣⲣⲟ ⲛⲛⲉϥϩⲙⲟⲟⲥ ⲡⲉ ϩⲓϫⲙⲡⲉⲑⲣⲟⲛⲟⲥ ⲛⲧⲉϥⲙⲛⲧⲣⲣⲟ ⲉⲣⲉⲑⲃⲥⲟ ⲧⲏⲣⲥ ⲙⲡⲉϥϣⲟⲩϣⲟⲩ ⲧⲟ ϩⲓⲱⲱϥ ⲉⲥⲟ ⲛⲉⲓⲉⲡⲛⲟⲩⲃ ⲧⲏⲣⲥ ⲉⲛⲁϣⲉⲥⲟⲩⲛⲧⲥ ⲉϥⲟ ⲛϩⲟⲧⲉ ⲉⲙⲁⲧⲉ ⲁⲩⲱ ⲛⲧⲉⲣⲉϥϥⲓ ⲙⲡⲉϥϩⲟ ⲉϩⲣⲁⲓ ⲉϥⲙⲟⲩϩ ϩⲁⲡⲉⲟⲟⲩ ⲛⲧⲁⲕⲙⲏ ⲙⲡⲉϥϭⲱⲛⲧ ⲧⲣⲣⲱ ⲁⲥϩⲉ ⲡⲉⲥϩⲟ ⲁϥϣⲓⲃⲉ ϩⲛⲟⲩϣⲱⲥⲙ ⲛϩⲏⲧ ⲁⲥⲣⲉⲕⲧⲡⲉⲥϩⲟ ⲉϫⲛⲧⲁⲡⲉ ⲛⲧϩⲙϩⲁⲗ ⲉⲧⲙⲟⲟϣⲉ ⲛⲙⲙⲁⲥ ⲁⲩⲱ ⲡⲛⲟⲩⲧⲉ ⲁϥⲕⲧⲉⲡⲉⲡⲛⲁ ⲙⲡⲣⲣⲟ ⲉⲩⲙⲛⲧⲣⲙⲣⲁϣ ⲡⲣⲣⲟ ⲇⲉ ⲛⲧⲉⲣⲉϥϣⲧⲟⲣⲧⲣ ⲁϥϥⲱϭⲉ ⲉⲃⲟⲗ ϩⲓϫⲙⲡⲉϥⲑⲣⲟⲛⲟⲥ ⲁϥⲡⲁⲣⲫⲉⲣ ⲛⲉϥϭⲓϫ ⲉⲃⲟⲗ ⲁϥϭⲱⲗϭ ⲉϩⲟⲩⲛ ⲉⲣⲟⲥ ϣⲁⲛⲧⲥⲥⲱⲟⲩⲛⲥ ⲙⲛⲛⲥⲱⲥ ⲁϥⲥⲟⲗⲥⲉⲗ ⲙⲙⲟⲥ ϩⲛϩⲉⲛϣⲁϫⲉ ⲙⲙⲛⲧⲛⲁ ⲉϥϫⲱ ⲙⲙⲟⲥ ⲛⲁⲥ ϫⲉⲁϩⲣⲟ ⲉⲥⲑⲏⲣ ⲁⲛⲟⲕ ⲅⲁⲣ ⲡⲉⲕⲥⲟⲛ ⲛⲛⲉⲙⲟⲩ ⲡⲉⲓϩⲱⲛ ⲇⲉ ⲡⲁⲓ ⲧⲏϣ ⲉⲡⲗⲁⲟⲥ ⲁⲙⲏ ϭⲉ ⲛⲧⲉϩⲱⲛⲧ ⲉϩⲟⲩⲛ

2 ⲁⲩⲱ ⲁϥⲥⲟⲩⲧⲛ ⲧⲉϥϭⲉⲣⲱⲃ ⲛⲛⲟⲩⲃ ⲉⲃⲟⲗ ⲉⲣⲟⲥ ⲁϥⲟⲩⲁϩϥ ⲉϫⲙⲡⲉⲥⲛⲁϩⲃ ⲁϥϯⲡⲓ ⲉⲣⲟⲥ ⲡⲉϫⲁϥ ϫⲉϣⲁϫⲉ ⲛⲙⲙⲁⲓ ⲁⲩⲱ ⲡⲉϫⲁⲥ ⲛⲁϥ ϫⲉⲉⲧⲁⲓⲛⲁⲩ ⲉⲣⲟⲕ ϩⲱⲥ ⲁⲅⲅⲉⲗⲟⲥ ⲛⲧⲉⲡⲛⲟⲩⲧⲉ ϩⲓⲧⲛⲧϩⲟⲧⲉ ϩⲁⲡⲉⲕϩⲟ ⲇⲉ ⲁⲡⲁϩⲏⲧ ϣⲧⲟⲣⲧⲣ ⲛⲁⲛⲟⲩⲕ ⲱ ⲡⲁϫⲟⲉⲓⲥ ϫⲉⲡⲉⲕϩⲟ ⲙⲟⲩϩ ⲉⲃⲟⲗ ⲙⲙⲛⲧⲛⲁ ⲁⲩⲱ ϩⲟⲧⲁⲛ ⲉⲥϣⲁϫⲉ ϩⲓⲛⲁⲓ ⲁⲥϩⲉ ⲟⲛ ⲉⲥϯ ⲙⲡⲉⲥⲡⲛⲉⲩⲙⲁ ϩⲙⲡⲁⲓ ⲇⲉ ⲁⲡⲣⲣⲟ ϣⲗⲁϩ ⲉⲙⲁⲧⲉ ⲁϥⲙⲕⲁϩ ⲉⲣⲉⲛⲉϥϩⲙϩⲁⲗ ⲧⲏⲣⲟⲩ ⲥⲟⲗⲥⲉⲗ ⲙⲙⲟϥ

3 ⲁⲩⲱ ⲡⲉϫⲉⲡⲣⲣⲟ ⲛⲁⲥ ⲉϥϫⲱ ⲙⲙⲟⲥ ϫⲉⲁϩⲣⲟ ⲉⲥⲑⲏⲣ ⲧⲣⲣⲱ ⲁⲩⲱ ⲟⲩ ⲡⲉ ⲡⲟⲩⲁⲓⲧⲏⲙⲁ ⲡⲉⲧⲉⲁⲝⲓⲟⲩ ⲙⲙⲟⲥ ⲛⲥϣⲱⲡⲉ ⲛⲉ ϣⲁϩⲣⲁⲓ ⲛⲧⲡⲁϣⲉ ⲛⲧⲁⲙⲛⲧⲣⲣⲟ

4 ⲁⲩⲱ ⲡⲉϫⲉⲉⲥⲑⲏⲣ ⲛⲁϥ ϫⲉⲉϩⲛⲉⲡⲣⲣⲟ ⲙⲁⲣⲉⲡⲣⲣⲟ ⲉⲓ ⲙⲛⲁⲙⲁⲛ ⲉⲡⲇⲉⲓⲡⲛⲟⲛ ⲉϯⲛⲁⲁⲁϥ ⲉⲡⲉϥⲧⲁⲉⲓⲟ

5 ⲁⲩⲱ ⲡⲉϫⲉⲡⲣⲣⲟ ϫⲉⲙⲟⲩⲧⲉ ⲉⲁⲙⲁⲛ ϫⲉⲕⲁⲥ ⲡⲁⲓⲧⲏⲙⲁ ⲛⲉⲥⲑⲏⲣ ⲉⲩⲉϫⲱⲕϥ ⲉⲃⲟⲗ ⲁⲩⲱ ⲡⲣⲣⲟ ⲁϥⲃⲱⲕ ⲉϩⲟⲩⲛ ⲙⲛϩⲁⲙⲁⲛ ⲉⲥⲱ ⲙⲛⲉⲥⲑⲏⲣ

6 ϩⲣⲁⲓ ϩⲙⲡⲥⲩⲙⲡⲟⲥⲓⲟⲛ ⲇⲉ ⲡⲉϫⲁϥ ⲛϭⲓⲡⲣⲣⲟ ⲛⲉⲥⲑⲏⲣ ϫⲉⲟⲩ ϭⲉ ⲡⲉ ⲡⲟⲩⲁⲓⲧⲏⲙⲁ ϩⲱⲃ ⲛⲓⲙ ⲉⲧⲉⲣⲉⲁⲝⲓⲟⲩ ⲛⲥϣⲱⲡⲉ ⲛⲉ ϣⲁϩⲣⲁⲓ ⲉⲧⲡⲁϣⲉ ⲛⲧⲁⲙⲛⲧⲣⲣⲟ

7 ⲁⲩⲱ ⲡⲉϫⲉⲉⲥⲑⲏⲣ ⲛⲁϥ ϫⲉⲡⲁⲓ ⲡⲉⲧⲓⲁⲝⲓⲟⲩ ⲙⲙⲟⲥ ⲁⲩⲱ ⲡⲁⲓ ⲡⲉ ⲡⲁⲁⲓⲧⲏⲙⲁ

8 ϫⲉⲉϣⲱⲡⲉ ϩⲛⲟⲩⲙⲉ ⲁⲓϭⲛⲭⲁⲣⲓⲥ ⲛⲛⲁϩⲣⲙⲡⲣⲣⲟ ⲁⲩⲱ ⲉϩⲛⲡⲣⲣⲟ ⲉⲧⲣⲉⲡⲁⲁⲓⲧⲏⲙⲁ ϣⲱⲡⲉ ⲛϥϫⲱⲕ ⲉⲃⲟⲗ ⲙⲡⲉⲧⲓⲁⲝⲓⲟⲩ ⲙⲙⲟⲥ ⲙⲁⲣⲉⲡⲣⲣⲟ ⲃⲱⲕ ⲉϩⲟⲩⲛ ⲙⲛⲁⲙⲁⲛ ⲟⲛ ⲛⲣⲁⲥⲧⲉ ⲉⲥⲱ ⲛⲙⲙⲁⲓ ⲧⲟⲧⲉ ⲉⲓⲉⲟⲩⲱϣⲃ ⲉⲡⲉϥϣⲓⲛⲉ ϩⲙⲡⲉϩⲟⲟⲩ ⲉⲧⲙⲙⲁⲩ

9 ⲁϥⲉⲓ ⲉⲃⲟⲗ ⲛϭⲓⲁⲙⲁⲛ ϩⲛⲟⲩⲁⲅⲁⲑⲟⲛ ⲙⲛⲟⲩⲉⲩⲫⲣⲟⲥⲩⲛⲏ ⲁⲗⲗⲁ ⲉϥϣⲁⲛⲛⲁⲩ ⲉⲙⲁⲣⲇⲟⲩⲭⲁⲓⲟⲥ ⲉϥϩⲛⲧⲁⲩⲗⲏ ⲁⲩⲱ ⲙⲡϥⲟⲩⲱϣⲧ ⲛⲁϥ ⲁϥϭⲱⲛⲧ ⲉⲣⲟϥ ⲉⲙⲁⲧⲉ ⲉⲙⲁⲧⲉ

10 ⲁⲙⲁⲛ ⲇⲉ ⲁϥϫⲓⲡⲙⲉⲉⲩⲉ ⲛϭⲟⲛⲥ ⲁϥⲕⲟⲧϥ ⲉϩⲣⲁⲓ ⲉⲡⲉϥⲏⲓ ⲁϥⲧⲣⲉⲛⲉϥϣⲃⲉⲉⲣ ⲧⲏⲣⲟⲩ ⲃⲱⲕ ⲉϩⲟⲩⲛ ⲉⲣⲟϥ ⲙⲛⲙⲟⲏⲉⲍⲱⲥⲁⲣⲁ ⲧⲉϥⲥϩⲓⲙⲉ

11 ⲁⲩⲱ ⲁϥⲧⲁⲙⲟⲟⲩ ⲛϭⲓⲁⲙⲁⲛ ⲉⲧⲃⲉⲧⲉϥⲙⲛⲧⲣⲙⲙⲁⲟ ⲁⲩⲱ ⲛⲉϥϣⲏⲣⲉ ⲉⲛⲁϣⲱⲟⲩ ⲁⲩⲱ ⲉⲧⲃⲉⲡϣⲟⲩϣⲟⲩ ⲉⲛⲧⲁⲩϯⲉⲟⲟⲩ ⲛⲁϥ ⲛϩⲏⲧϥ ⲁⲩⲱ ϫⲉⲉⲛⲧⲁⲩϫⲁⲥⲧϥ ⲉϩⲟⲩⲉ ⲛⲥⲓⲟⲩⲣ ⲙⲛⲛⲁⲣⲭⲱⲛ ⲧⲏⲣⲟⲩ ⲗⲟⲓⲡⲟⲛ

12 ⲡⲉϫⲁϥ ϫⲉⲉⲁⲥⲧⲁϩⲙⲉⲧ ⲛϭⲓⲉⲥⲑⲏⲣ ⲧⲣⲣⲟ ⲉⲡⲉⲙⲧⲟ ⲙⲡⲣⲣⲟ ⲉⲥⲱ ⲛⲙⲙⲁⲥ ⲟⲛ ⲁⲩⲱ ⲙⲛⲛⲥⲁⲡⲣⲣⲟ ϩⲱϥ ⲙⲡⲥⲧⲣⲉⲗⲁⲁⲩ ⲃⲱⲕ ⲉϩⲟⲩⲛ ⲉⲣⲟⲥ ⲉⲃⲏⲗ ⲉⲣⲟⲓ

13 ⲛⲁⲓ ⲇⲉ ⲧⲏⲣⲟⲩ ⲛⲥⲉⲣⲱϣⲉ ⲁⲛ ⲉⲣⲟⲓ ⲉϣⲁⲓⲛⲁⲩ ⲅⲁⲣ ⲙⲙⲁⲣⲇⲟⲩⲭⲁⲓⲟⲥ ⲡⲓⲟⲩⲇⲁⲓ ⲉϥϩⲙⲟⲟⲥ ϩⲁⲧⲛⲧⲡⲩⲗⲏ

14 ⲁⲩⲱ ⲁⲩϫⲱ ⲛⲁϥ ⲛϭⲓⲙⲟⲏⲉⲍⲱⲥⲁⲣⲁ ⲧⲉϥⲥϩⲓⲙⲉ ⲙⲛⲛⲉϥϣⲃⲉⲉⲣ ⲧⲏⲣⲟⲩ ϫⲉⲉⲩⲉⲧⲁⲗⲉⲟⲩϣⲉ ⲛⲧⲁⲉⲓⲟⲩ ⲙⲙⲁϩⲉ ⲣⲁⲥⲧⲉ ⲇⲉ ⲛⲧⲟⲕ ϣⲁϫⲉ ⲙⲛⲡⲣⲣⲟ ϩⲟⲡⲱⲥ ⲛⲥⲉⲁϣⲧⲙⲁⲣⲇⲟⲩⲭⲁⲓⲟⲥ ⲉϫⲱϥ ⲁⲩⲱ ⲙⲛⲛⲥⲱⲥ ⲉⲕⲛⲁⲃⲱⲕ ⲉϩⲟⲩⲛ ⲉⲣⲟϥ ⲉⲥⲱ ϩⲛⲟⲩⲣⲁϣⲉ ⲁⲩⲱ ⲁⲡⲁⲓϣⲟϫⲛⲉ ⲉϩⲛⲁϥ ⲉⲡⲉϩⲩⲟ ⲁϥⲧⲣⲉⲩⲥⲟⲃⲧⲉ ⲙⲡϣⲉ