Read Esther 2 side by side with translations · The Final Bible
1 ⲁⲩⲱ ⲙⲛⲛⲥⲁⲛⲉⲓϣⲁϫⲉ ⲡⲣⲣⲟ ⲁϥϩⲣⲟⲕ ⲉⲃⲟⲗ ϩⲙⲡⲉϥϭⲱⲛⲧ ⲁϥⲣⲡⲙⲉⲉⲩⲉ ⲛⲁⲥⲧⲓⲛ ⲛⲧϩⲉ ⲉⲛⲧⲁⲥⲁⲁⲥ ⲁⲩⲱ ⲛⲧϩⲉ ⲛⲛⲉⲛⲧⲁⲥϭⲁⲓⲟ ⲛϩⲏⲧⲟⲩ
2 ⲡⲉϫⲉⲛⲇⲓⲁⲕⲟⲛⲟⲥ ⲙⲡⲣⲣⲟ ϫⲉⲙⲁⲣⲟⲩⲕⲱⲧⲉ ⲛⲥⲁϩⲉⲛϣⲉⲉⲣⲉ ϣⲏⲙ ⲛⲛⲁⲧⲧⲱⲗⲙ ⲙⲡⲣⲣⲟ ⲉⲛⲁⲛⲟⲩⲟⲩ ϩⲙⲡⲉⲩϩⲣⲃ
3 ⲁⲩⲱ ⲡⲣⲣⲟ ⲙⲁⲣⲉϥⲧⲁϩⲟ ⲉⲣⲁⲧⲟⲩ ⲛϩⲉⲛⲅⲟⲙⲁⲣⲭⲏⲥ ϩⲛⲛⲉⲭⲱⲣⲁ ⲧⲏⲣⲟⲩ ⲛⲧⲙⲛⲧⲣⲣⲟ ⲛⲥⲉⲥⲱⲧⲡ ⲛϩⲉⲛϣⲉⲉⲣⲉ ϣⲏⲙ ⲙⲡⲁⲣⲑⲉⲛⲟⲥ ⲉⲛⲉⲥⲱⲟⲩ ϩⲙⲡⲉⲩϩⲣⲃ ⲉⲥⲟⲩⲥⲟⲥ ⲧⲡⲟⲗⲓⲥ ⲡⲙⲁ ⲛⲛⲉϩⲓⲟⲙⲉ ⲛⲥⲉⲧⲁⲁⲩ ⲉⲧⲟⲟⲧϥ ⲙⲡⲉⲥⲓⲟⲩⲣ ⲙⲡⲣⲣⲟ ⲡⲉⲫⲩⲗⲁⲝ ⲛⲛⲉϩⲓⲟⲙⲉ ⲛⲥⲉϯ ⲛⲁⲩ ⲛⲟⲩⲥⲙⲏⲅⲙⲁ ⲁⲩⲱ ⲡⲕⲉⲥⲉⲉⲡⲉ ⲛⲛϣⲙϣⲉ
4 ⲧⲉⲥϩⲓⲙⲉ ⲉⲧⲛⲁⲣⲁⲛⲁϥ ⲙⲡⲣⲣⲟ ⲣⲡϩⲱⲃ ⲁⲩⲉⲓⲣⲉ ϩⲓⲛⲁⲓ
5 ⲁⲩⲱ ⲟⲩⲣⲱⲙⲉ ⲛⲓⲟⲩⲇⲁⲓⲟⲥ ⲉϥϩⲛ ⲥⲟⲩⲥⲟⲥ ⲧⲡⲟⲗⲓⲥ ⲉⲡⲉϥⲣⲁⲛ ⲡⲉ ⲙⲁⲣⲇⲟⲭⲁⲓⲟⲥ ⲡϣⲏⲣⲉ ⲛⲓⲁⲓⲣⲓⲟⲥ ⲡϣⲏⲣⲉ ⲛⲥⲉⲙⲉⲉⲓ ⲡϣⲏⲣⲉ ⲛϭⲓⲥⲁⲓⲟⲥ ⲉⲃⲟⲗ ϩⲛⲧⲉⲫⲩⲗⲏ ⲛⲃⲉⲛⲓⲁⲙⲓⲛ
6 ⲡⲉⲛⲧⲁⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲁⲓⲭⲙⲁⲗⲱⲧⲓⲍⲉ ⲙⲙⲟϥ
7 ⲉⲣⲉⲟⲩϣⲉⲉⲣⲉ ϣⲏⲙ ϣⲟⲟⲡ ⲛⲁϥ ⲉϥⲥⲁⲁⲛϣ ⲙⲙⲟⲥ ⲧϣⲉⲉⲣⲉ ⲛⲁⲙⲉⲓⲛⲁⲇⲁⲃ ⲡⲥⲟⲛ ⲙⲡⲉϥⲉⲓⲱⲧ ⲉⲡⲉⲥⲣⲁⲛ ⲡⲉ ⲉⲥⲑⲏⲣ ϩⲙⲡⲧⲣⲉⲛⲉⲥⲉⲓⲟⲧⲉ ⲇⲉ ⲥⲱⲕ ⲉⲃⲟⲗ ⲁϥⲡⲁⲓⲧⲉⲩⲉ ⲙⲙⲟⲥ ⲛⲁϥ ⲉⲩⲥϩⲓⲙⲉ ⲁⲩⲱ ⲧϣⲉⲉⲣⲉ ϣⲏⲙ ⲉⲛⲉⲛⲁⲛⲟⲩⲥ ⲡⲉ ϩⲙⲡⲉⲥϩⲣⲃ
8 ⲛⲧⲉⲣⲟⲩⲥⲱⲧⲙ ⲇⲉ ⲉⲡⲉⲡⲣⲟⲧⲁⲕⲙⲁ ⲙⲡⲣⲣⲟ ϩⲉⲛϣⲉⲉⲣⲉ ϣⲏⲙ ⲉⲛⲁϣⲱⲟⲩ ⲁⲩⲥⲟⲟⲩϩⲟⲩ ⲉⲥⲟⲩⲥⲟⲥ ⲧⲡⲟⲗⲓⲥ ⲧⲉⲧⲛϩⲁⲧⲛ ⲅⲁⲓ ⲁⲩⲱ ⲉⲥⲑⲏⲣ ⲧⲣⲣⲱ ⲁⲩⲛⲧⲥ ⲉⲣⲁⲧϥ ⲛⲅⲁⲓ ⲡⲉⲫⲩⲗⲁⲝ ⲛⲛⲉϩⲓⲟⲙⲉ
9 ⲧϣⲉⲉⲣⲉ ϣⲏⲙ ⲁⲥⲣⲁⲛⲁϥ ⲁⲥϭⲛⲭⲁⲣⲓⲥ ⲛⲛⲁϩⲣⲁϥ ⲁϥϭⲉⲡⲏ ⲉⲧⲣⲉⲥⲣⲱϣⲉ ⲛϩⲱⲃ ⲛⲓⲙ ⲉⲧⲥⲣⲭⲣⲉⲓⲁ ⲙⲙⲟⲥ ⲛⲟⲩⲥⲙⲏⲅⲙⲁ ⲁⲩⲱ ⲧⲉϩⲣⲉ ⲉⲧⲏⲡ ⲉⲣⲟⲥ ⲁⲩⲱ ⲉϯϭⲁⲩⲱⲛⲉ ⲍ ⲛⲁⲥ ⲉⲃⲟⲗ ϩⲙⲡⲡⲁⲗⲗⲁϯⲟⲛ ⲉⲩⲥⲟⲧⲡ ⲁⲩⲱ ⲉⲧⲱϣ ⲉⲣⲟⲟⲩ ⲛⲛⲧⲁⲙⲉⲓⲟⲛ ⲉⲧⲛⲉⲥⲱⲟⲩ ⲙⲡⲙⲁ ⲛⲛⲉϩⲓⲟⲙⲉ
10 ⲉⲥⲑⲏⲣ ⲇⲉ ⲙⲡⲥϫⲉ ⲟⲩϣⲁϫⲉ ⲛⲟⲩⲱⲧ ⲉⲧⲃⲉⲡⲉⲥⲗⲁⲟⲥ ⲁⲩⲱ ⲡⲉⲥⲙⲓⲥⲉ ϫⲉⲁⲙⲁⲣⲇⲟⲩⲭⲁⲓⲟⲥ ⲁϥⲟⲩⲉϩⲥⲁϩⲛⲉ ⲉⲣⲟⲥ ⲉⲧⲙⲧⲁⲩⲟϥ
11 ⲙⲁⲣⲇⲟⲩⲭⲁⲓⲟⲥ ⲇⲉ ⲛⲧⲟϥ ϣⲁϥⲛⲁ ϩⲟⲟⲩ ϩⲟⲟⲩ ⲉϥⲛⲏⲩ ϩⲁⲣⲱⲥ ⲛⲧⲁⲩⲗⲏ ⲙⲡⲙⲁ ⲛⲛⲉϩⲓⲟⲙⲉ ⲉⲧⲣⲉϥϣⲓⲛⲉ ⲉⲡⲟⲩϫⲁⲓ ⲛⲉⲥⲑⲏⲣ ⲁⲩⲱ ⲉⲥⲱⲧⲙ ϫⲉⲟⲩ ⲡⲉⲧⲛⲁϣⲱⲡⲉ ⲛⲙⲙⲁⲥ
12 ⲁⲩⲱ ⲉⲣϣⲁⲛⲟⲩⲁ ⲛⲛϣⲉⲉⲣⲉ ⲣⲁⲗⲱⲧ ⲉⲃⲱⲕ ⲉϩⲟⲩⲛ ⲉⲡⲣⲣⲟ ⲁⲣⲇⲁⲝⲉⲣⲝⲏⲥ ⲛⲧⲉⲣⲉⲥⲉⲓⲣⲉ ⲛⲛⲉⲓⲉⲃⲟⲧ ⲓⲃ ⲛⲥⲙⲏⲅⲙⲁ ⲡⲁⲓ ⲅⲁⲣ ⲡⲉ ⲡⲛⲁⲩ ⲉⲧⲧⲏϣ ⲉⲡⲥⲃⲧⲱⲧⲟⲩ ⲡⲉϣⲁⲩⲟⲩⲁϩⲙⲉϥ ϫⲉⲥⲟⲟⲩ ⲛⲉⲃⲟⲧ ⲉⲡⲙⲩⲣⲣⲟⲛ ⲕⲉⲥⲟⲟⲩ ⲛⲉⲃⲟⲧ ⲉⲡⲥⲟϭⲛ
13 ⲙⲛⲛⲥⲱⲥ ⲇⲉ ⲁⲩⲕⲁⲁⲥ ⲉϩⲟⲩⲛ ⲉⲁϩⲉⲣⲁⲧϥ ϩⲓⲧϩⲏ ⲙⲡⲣⲣⲟ ⲉⲁⲩϯ ⲛⲁⲥ ⲛϩⲱⲃ ⲛⲓⲙ ⲉⲧⲥⲟⲩⲁϣⲟⲩ ⲉⲃⲟⲗ ϩⲙⲡⲙⲁ ⲛⲛⲉϩⲓⲟⲙⲉ
14 ⲉϣⲁⲥⲉⲓ ⲉϩⲟⲩⲛ ⲛⲣⲟⲩϩⲉ ⲙⲡⲉϥⲣⲁⲥⲧⲉ ⲇⲉ ϣⲁⲥⲧⲥⲧⲟ ⲉⲡⲙⲁ ⲛⲛⲉϩⲓⲟⲙⲉ ⲁⲗⲗⲁ ⲡⲙⲉϩⲥⲛⲁⲩ ⲉⲃⲟⲗ ⲛϩⲏⲧⲟⲩ ⲉⲧϩⲁ ⲧⲉⲝⲟⲩⲥⲓⲁ ⲙⲡⲉⲥⲓⲟⲩⲣ ⲙⲡⲣⲣⲟ ⲥⲁⲁⲅⲁⲥ ⲡⲉⲫⲩⲗⲁⲝ ⲛⲛⲉϩⲓⲟⲙⲉ ⲁⲩⲱ ⲛⲛⲉⲥⲉⲓ ⲉϩⲟⲩⲛ ⲉⲣⲟϥ ⲟⲛ ϩⲓⲃⲟⲗ ⲛⲧⲉⲡⲣⲣⲟ ϭⲛ ⲭⲁⲣⲓⲥ ⲛⲛⲁⲣϩⲁⲥ ⲁⲩⲱ ⲉϥⲙⲟⲩⲧⲉ ⲉⲣⲟⲥ
15 ⲉⲓⲥ ⲉⲥⲑⲏⲣ ⲧϣⲛⲁⲃⲓϩⲁⲗ ⲛⲧⲉⲡⲥⲟⲛ ⲙⲡⲉϥⲉⲓⲱⲧ ⲙⲁⲣⲇⲟⲩⲭⲁⲓⲟⲥ ⲉⲧϥⲥⲁⲁⲛϣ ⲙⲙⲟⲥ ϩⲟⲧⲁⲛ ⲁⲥⲣⲡⲉⲥⲁⲗⲱⲧ ⲉⲃⲱⲕ ⲉϩⲟⲩⲛ ⲉⲡⲣⲣⲟ ⲙⲡⲥϫⲓϣϣⲱⲟⲩ ⲉⲗⲁⲁⲩ ⲥⲁⲃⲟⲗ ⲙⲡⲉⲧⲉⲣⲉⲡⲥⲓⲟⲩⲣ ⲙⲡⲣⲣⲟ ⲅⲁⲓ ⲡⲉⲫⲩⲗⲁⲝ ⲛⲛⲉϩⲓⲟⲙⲉ ϣⲟϫⲛⲉ ⲉⲣⲟⲥ ⲁⲩⲱ ⲟⲩⲟⲛ ⲛⲓⲙ ⲉⲧⲛⲁⲩ ⲉⲣⲟⲥ ⲉϩⲛⲁⲥ ⲙⲡⲉϥϩⲟ
16 ⲧⲁⲓ ϭⲉ ⲧⲉ ⲧϩⲉ ⲉⲛⲧⲁⲩⲉⲓⲛⲉ ⲛⲉⲥⲑⲏⲣ ⲉϩⲟⲩⲛ ⲉⲡⲡⲁⲗⲗⲁϯⲟⲛ ⲙⲡⲣⲣⲟ ⲁⲣⲇⲁⲝⲉⲣⲝⲏⲥ ϩⲙⲡⲙⲉϩⲙⲛⲧⲥⲛⲟⲟⲩⲥ ⲛⲛⲉⲃⲟⲧ ⲉⲧⲉⲁⲇⲁⲣ ⲡⲉ ϩⲛⲧⲙⲉϩⲥⲁϣϥⲉ ⲛⲣⲟⲙⲡⲉ ⲛⲧⲉϥⲙⲛⲧⲣⲣⲟ
17 ⲁⲩⲱ ⲡⲣⲣⲟ ⲁϥⲟⲩⲉϣ ⲉⲥⲑⲏⲣ ⲁⲥϭⲓⲛⲉ ⲛⲟⲩⲭⲁⲣⲓⲥ ⲡⲁⲣⲁⲙⲡⲁⲣⲑⲉⲛⲟⲥ ⲧⲏⲣⲟⲩ ⲁϥϯ ⲉϫⲱⲥ ⲛⲧⲉϭⲣⲏⲡⲉ ⲛⲧⲉⲣⲣⲱ
18 ⲡⲣⲣⲟ ⲁϥⲉⲓⲣⲉ ⲛⲟⲩϩⲟⲟⲡ ⲉⲛⲉϥϣⲃⲉⲉⲣ ⲙⲛⲛⲉϥⲛⲟϭ ⲛⲥⲁϣϥ ⲛϩⲟⲟⲩ ⲡⲅⲁⲙⲟⲥ ⲛⲉⲥⲑⲏⲣ ⲁϥϫⲁⲥⲧϥ
19 ⲁϥⲉⲓⲣⲉ ⲛⲟⲩⲕⲱ ⲉⲃⲟⲗ ⲛⲛⲉⲧϩⲁ ⲧⲉϥⲙⲛⲧⲣⲣⲟ
20 ⲉⲥⲑⲏⲣ ⲇⲉ ⲙⲡⲥⲟⲩⲱⲛϩ ⲉⲃⲟⲗ ⲛⲧⲉⲥⲡⲟⲗⲓⲥ ⲧⲁⲓ ⲅⲁⲣ ⲧⲉ ⲧϩⲉ ⲛⲧⲁⲙⲁⲣⲇⲟⲩⲭⲁⲓⲟⲥ ϩⲱⲛ ⲉⲧⲟⲟⲧⲥ ⲉⲧⲣⲉⲥⲣ ϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲛⲥⲉⲓⲣⲉ ⲛⲛⲉϥⲡⲣⲟⲥⲧⲁⲅⲙⲁ ⲛⲧϩⲉ ⲟⲛ ⲉⲧⲥϣⲟⲟⲡ ⲛⲙⲙⲁϥ ⲁⲩⲱ ⲉⲥⲑⲏⲣ ⲙⲡⲥϣⲓⲃⲉ ⲛⲛⲉⲥⲥⲙⲟⲧ
21 ⲁⲩⲙⲕⲁϩ ⲛϩⲏⲧ ⲛϭⲓⲡⲉⲥⲓⲟⲩⲣ ⲥⲛⲁⲩ ⲙⲡⲣⲣⲟ ⲛⲁⲣⲭⲓⲥⲱⲙⲁⲧⲟⲫⲩⲗⲁⲝ ⲉⲃⲟⲗ ϫⲉⲙⲁⲣⲇⲟⲩⲭⲁⲓⲟⲥ ⲁϥϫⲓⲥⲉ ⲁⲩⲱ ⲁⲩⲕⲱⲧⲉ ⲛⲥⲁⲧⲉϩⲓⲏ ⲙⲙⲟⲩⲟⲩⲧ ⲛⲁⲣⲇⲁⲝⲉⲣⲝⲏⲥ ⲡⲣⲣⲟ
22 ⲁϥⲧⲁⲙⲉ ⲙⲁⲣⲇⲟⲩⲭⲁⲓⲟⲥ ⲉⲡϣⲁϫⲉ ⲁϥⲧⲁⲩⲟϥ ⲉⲉⲥⲑⲏⲣ ⲁⲩⲱ ⲧⲣⲣⲱ ⲁⲥⲟⲩⲟⲛϩϥ ⲉⲡⲣⲣⲟ ⲁⲣⲇⲁⲝⲉⲣⲝⲏⲥ ⲉⲧⲃⲉⲧⲉⲡⲓⲃⲟⲩⲗⲏ
23 ⲡⲣⲣⲟ ⲁϥϩⲉⲧⲁⲍⲉ ⲙⲡⲉⲥⲓⲟⲩⲣ ⲥⲛⲁⲩ ⲉⲁϥⲁϣⲧⲟⲩ ⲁⲩⲱ ⲡⲣⲣⲟ ⲁϥⲟⲩⲉϩⲥⲁϩⲛⲉ ⲉⲕⲁⲧⲁⲭⲱⲣⲓⲍⲉ ⲉⲩⲣⲡⲙⲉⲉⲩⲉ ⲛⲧⲃⲓⲃⲗⲓⲟⲑⲏⲕⲏ ⲙⲡⲣⲣⲟ ⲉⲧⲃⲉⲡⲡⲉⲧⲛⲁⲛⲟⲩϥ ⲙⲙⲁⲣⲇⲟⲩⲭⲁⲓⲟⲥ ϩⲛⲟⲩϣⲟⲩϣⲟⲩ
Esther 1 · Esther 3 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)