Esther 1 — Coptic (Sahidic)

1 ϩⲛⲧⲥⲡⲥⲛⲧⲉ ⲉϥⲟ ⲛⲣⲣⲟ ⲛϭⲓⲡⲛⲟϭ ⲛⲛⲁⲣⲇⲁⲝⲉⲣⲝⲏⲥ ⲛⲥⲟⲩⲟⲩⲁ ⲙⲡⲉⲃⲟⲧ ⲛⲛⲓⲥⲁⲛ ⲙⲁⲣⲇⲟⲩⲕⲁⲓⲟⲥ ⲁϥⲛⲁⲩ ⲉⲩⲣⲁⲥⲟⲩ ⲡϣⲏⲣⲉ ⲛⲉⲓⲣⲁⲓⲟⲥ ⲡϣⲏⲣⲉ ⲛⲥⲉⲙⲉⲓ ⲡϣⲏⲣⲉ ⲛϭⲓⲥⲥⲁⲓⲟⲥ ⲉⲃⲟⲗ ϩⲛⲧⲉⲫⲩⲗⲏ ⲙⲃⲉⲛⲓⲁⲙⲓⲛ ⲟⲩⲛⲟϭ ⲛⲣⲱⲙⲉ ⲛⲓⲟⲩⲇⲁ ⲉϥⲟⲩⲏ ϩⲛⲥⲟⲩⲥⲟⲥ ⲉϥϣⲙϣⲉ ϩⲛⲧⲁⲩⲗⲏ ⲙⲡⲣⲣⲟ ⲧⲁⲓⲭⲙⲁⲗⲱⲥⲓⲁ ⲉⲛⲧⲁⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲁⲓⲭⲙⲁⲗⲱⲧⲓⲍⲉ ⲙⲙⲟⲥ ⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ ⲙⲛⲓⲉⲭⲟⲛⲓⲁⲥ ⲡⲣⲣⲟ ⲛⲧⲓⲟⲩⲇⲁⲓⲁ ⲁⲩⲱ ⲧⲁⲓ ⲧⲉ ⲧⲣⲁⲥⲟⲩ ⲉⲓⲥ ϩⲉⲛϩⲣⲟⲟⲩ ⲛϣⲧⲟⲣⲧⲣ ϩⲉⲛϩⲣⲟⲩⲃⲁⲓ ⲙⲛⲟⲩⲕⲙⲧⲟ ⲙⲛⲟⲩϣⲧⲟⲣⲧⲣ ϩⲓϫⲙⲡⲕⲁϩ ⲉⲓⲥ ⲛⲟϭ ⲥⲛⲁⲩ ⲛⲇⲣⲁⲕⲱⲛ ⲉⲩⲥⲃⲧⲱⲧ ⲁⲩϯⲡⲉⲩⲟⲩⲟⲓ ⲉϩⲟⲩⲛ ⲉⲙⲓϣⲉ ⲙⲛⲛⲟⲩⲉⲣⲏⲩ ⲡⲉⲩϩⲣⲟⲟⲩ ⲁϥϫⲓⲥⲉ ⲁⲩⲱ ϩⲙⲡⲉⲩϩⲣⲟⲟⲩ ⲁⲩⲥⲃⲧⲉⲛϩⲉⲑⲛⲟⲥ ⲧⲏⲣⲟⲩ ⲉⲩⲡⲟⲗⲉⲙⲟⲥ ⲁⲩⲱ ⲟⲩⲕⲁⲓⲣⲟⲥ ⲉⲡⲟⲗⲉⲙⲉⲓ ⲙⲛⲟⲩϩⲉⲑⲛⲟⲥ ⲟⲩϩⲟⲟⲩ ⲛⲕⲁⲕⲉ ϩⲓϭⲟⲥⲙ ⲟⲩⲑⲗⲓⲯⲓⲥ ⲙⲛⲟⲩϣⲧⲟⲣⲧⲣ ⲁⲩⲱ ⲟⲩⲛⲟϭ ⲛⲧϩⲙⲕⲟ ϩⲓϫⲙⲡⲕⲁϩ ⲛϩⲉⲑⲛⲟⲥ ⲧⲏⲣⲟⲩ ⲁⲩϣⲧⲟⲣⲧⲣ ⲉⲩⲣϩⲟⲧⲉ ϩⲏⲧⲟⲩ ⲛⲛⲉⲩⲡⲉⲧϩⲟⲟⲩ ⲁⲩⲥⲃⲧⲱⲧⲟⲩ ⲉⲧⲁⲕⲟⲟⲩ ⲁⲩⲱ ⲁⲩⲱϣ ⲉϩⲣⲁⲓ ⲉⲡⲛⲟⲩⲧⲉ ⲉⲃⲟⲗ ϫⲉϩⲙⲡⲉⲩϩⲣⲟⲟⲩ ⲁⲩⲕⲟⲩⲓ ⲙⲡⲏⲅⲏ ϣⲱⲡⲉ ⲉⲩⲛⲟϭ ⲛⲓⲉⲣⲟ ⲙⲙⲟⲟⲩ ⲉϥϣⲟⲩⲟ ⲡⲟⲩⲟⲉⲓⲛ ⲙⲛⲡⲣⲏ ⲁⲩϣⲁ ⲛⲉⲧⲑⲃⲃⲓⲏⲩ ⲁⲩϫⲁⲥⲧⲟⲩ ⲛⲗⲁϣⲁⲛⲉ ⲇⲉ ⲁⲩⲟϫⲙⲟⲩ ⲛⲧⲉⲣⲉⲙⲁⲣⲇⲟⲩⲭⲁⲓⲟⲥ ⲛⲁⲩ ⲉⲡⲉⲓⲣⲁⲥⲟⲩ ⲙⲛⲛⲟⲩⲁϩⲥⲁϩⲛⲉ ⲛⲧⲉⲡⲛⲟⲩⲧⲉ ⲁϥⲙⲟⲕⲙⲉⲕ ⲉⲣⲟϥ ϩⲣⲁⲓ ϩⲙⲡⲉϥϩⲏⲧ ⲉⲧⲣⲉϥⲉⲓⲙⲉ ⲙⲙⲟϥ ϩⲛⲟⲩⲱⲣϫ ϣⲁⲧⲉⲩϣⲏ ⲉⲧⲛⲏⲩ ⲁⲩⲱ ⲁϥϣⲱⲡⲉ ϩⲛⲛⲉϩⲟⲟⲩ ⲛⲁⲣⲇⲁⲝⲉⲣⲝⲏⲥ ⲉⲧⲉⲡⲉⲓⲁⲣⲇⲁⲝⲉⲣⲝⲏⲥ ⲡⲁⲓ ⲉⲛⲧⲁϥⲣ ⲣⲣⲟ ϫⲓⲙ ⲡⲕⲁϩ ⲛϩⲛⲧⲟⲩ ϣⲁϩⲣⲁⲓ ⲉⲁⲓⲑⲓⲟⲡⲓⲁ ⲉⲩⲛⲁⲣⲧⲟϣ ⲣⲕⲍ

2 ϩⲛⲛⲉϩⲟⲟⲩ ⲉⲛⲧⲁⲁⲣⲇⲁⲝⲉⲣⲝⲏⲥ ϩⲙⲟⲟⲥ ϩⲓϫⲙⲡⲉϥⲑⲣⲟⲛⲟⲥ ⲙⲃⲁⲥⲓⲗⲓⲕⲟⲛ ⲉⲧϩⲛⲥⲟⲩⲥⲟⲥ ⲧⲡⲟⲗⲓⲥ

3 ϩⲛⲧⲣⲟⲙⲡⲉ ⲅ ⲛⲧⲉⲧⲉϥⲙⲛⲧⲣⲣⲟ ⲁϥⲉⲓⲣⲉ ⲛⲟⲩⲇⲉⲓⲡⲛⲟⲛ ⲛⲛⲉϥⲁⲣⲭⲱⲛ ⲙⲛⲛⲉϥϩⲙϩⲁⲗ ⲧⲏⲣⲟⲩ ⲉⲣⲉⲛⲥⲧⲣⲁⲧⲓⲗⲁⲧⲏⲥ ⲛⲙⲡⲉⲣⲥⲟⲥ ⲙⲛⲙⲙⲏⲇⲟⲥ ⲙⲡⲉϥⲙⲧⲟ ⲉⲃⲟⲗ ⲙⲛⲛⲥⲁⲧⲣⲁⲡⲏⲥ ⲛⲛⲉⲧⲟϣ

4 ⲉⲧⲣⲉⲩϭⲱϣⲧ ⲉⲡⲟⲩⲱⲱⲗⲉ ⲛⲧⲉϥⲙⲛⲧⲣⲣⲟ ⲉⲡⲉⲟⲟⲩ ⲙⲛⲡⲧⲁⲉⲓⲟ ⲛⲧⲉⲧⲉϥⲙⲡϣⲁ ⲛϩⲟⲟⲩ ⲉⲛⲁϣⲱⲟⲩ ⲉⲧⲣⲣⲟ

5 ⲁⲩⲱ ⲛⲧⲉⲣⲉⲛⲉⲓϩⲟⲟⲩ ϫⲱⲕ ⲉⲃⲟⲗ ⲁⲡⲣⲣⲟ ⲉⲓⲣⲉ ⲛⲕⲉⲇⲉⲓⲡⲛⲟⲛ ⲙⲡⲗⲁⲟⲥ ⲧⲏⲣϥ ⲉⲧϩⲛⲥⲟⲩⲥⲟⲥ ⲧⲡⲟⲗⲓⲥ ϫⲓⲙⲡⲛⲟϭ ϣⲁⲡⲕⲟⲩⲓ ⲛⲥⲁϣϥ ⲛϩⲟⲟⲩ ϩⲛⲧⲁⲩⲗⲏ ⲙⲡϣϣⲏⲛ ⲉⲧϩⲁⲧⲙ ⲡⲡⲁⲗⲗⲁϯⲟⲛ

6 ϩⲁⲛϩⲏⲛⲉ ⲉⲩⲟⲩⲃⲁϣ ⲁⲩⲱ ⲛϭⲉⲗⲃⲉⲥⲓ ⲛⲉⲩⲁϣⲉ ⲡⲉ ⲉⲛⲥⲧⲩⲗⲗⲟⲥ ⲉϩⲉⲛⲱⲛⲉ ⲛϩⲟⲩⲁⲓⲛ ⲛⲉ ⲁⲩⲱ ⲛⲁⲗⲱ ⲛϣⲛⲥ ⲛϫⲏϭⲉ ⲉⲩⲉⲓ ⲉⲃⲟⲗ ϩⲓⲧⲛϩⲉⲛϣϭⲟⲩⲣ ⲛϩⲁⲧ ⲁⲩⲱ ⲛⲉⲩⲛϩⲉⲛϭⲗⲟϭ ⲙⲙⲁⲩ ⲛⲉⲓⲉⲡⲛⲟⲩⲃ ⲁⲩⲱ ⲛϩⲁⲧ ⲉⲣⲉⲥⲁⲡⲉⲥⲏⲧ ⲙⲙⲟⲟⲩ ⲧⲟϭⲥ ⲛⲁⲗⲁⲃⲁⲥⲧⲣⲟⲛ ⲙⲛⲁⲛⲁⲙⲏⲓ ⲙⲛⲱⲛⲉ ⲛⲭⲟⲩⲁⲓⲛ ⲉϥⲟⲩⲃⲁϣ ϩⲓⲕⲁⲙⲉ

7 ⲥⲉⲥⲉ ⲇⲉ ⲉⲃⲟⲗ ϩⲛϩⲉⲛⲁⲡⲟⲧ ⲛⲛⲟⲩⲃ ⲟⲩⲁⲓ ⲙⲙⲟⲟⲩ ⲉϥⲟⲩⲟⲟⲧⲉ ⲉⲟⲩⲁⲓ ϥϣⲟⲟⲡ ⲇⲉ ⲛϭⲓⲡⲏⲣⲡ ⲙⲡⲣⲣⲟ ⲉⲛⲁϣⲱϥ ⲛϩⲟⲩⲟ ⲛⲧϩⲉ ⲉⲧϣⲟⲩⲣⲟⲥ ⲛⲧⲙⲛⲧⲛⲟϭ ⲛⲛϭⲓϫ ⲛⲁⲡⲣⲣⲟ

8 ⲛⲉⲡϩⲁⲡ ⲇⲉ ⲡⲉ ⲙⲡⲥⲩⲙⲡⲟⲥⲓⲟⲛ ⲉⲕⲁ ⲙⲁ ⲛⲣⲱⲙⲉ ⲛⲓⲙ ⲡⲣⲣⲟ ⲅⲁⲣ ⲁϥϩⲱⲛ ⲉⲧⲟⲟⲧⲟⲩ ⲉⲛⲉⲡⲣⲉⲥⲃⲩⲧⲉⲣⲟⲥ ⲛⲧⲉⲡⲉϥⲡⲁⲗⲗⲁϯⲟⲛ ⲉⲧⲣⲉⲟⲩⲟⲛ ⲛⲓⲙ ⲣ ⲕⲁⲧⲁⲡⲉϥⲟⲩⲱϣ

9 ⲁⲩⲱ ⲁⲥϯⲛ ⲙⲁⲩⲁⲁⲧⲥ ⲁⲥⲣ ⲟⲩⲇⲉⲓⲡⲛⲟⲛ ⲛⲛⲥϩⲓⲙⲉ ⲛⲧⲉⲡⲡⲁⲗⲗⲁϯⲟⲛ ⲙⲡⲣⲣⲟ ⲁⲣⲇⲁⲝⲉⲣⲝⲏⲥ

10 ⲡⲙⲉϩⲥⲁϣϥ ⲇⲉ ⲛϩⲟⲟⲩ ⲉϥⲛⲏⲩ ⲉⲣⲉⲡϩⲏⲧ ⲙⲡⲣⲣⲟ ⲟⲩⲛⲟϥ ϩⲓⲧⲙⲡⲥⲉⲏⲣⲡ ⲁϥϩⲱⲛ ⲉⲙⲉⲑⲟⲩⲙⲁⲛ ⲙⲛⲃⲓⲥⲑⲁ ⲙⲛϩⲁⲣⲃⲟⲛⲁ ⲙⲛⲃⲁⲕⲧⲁ ⲙⲛⲁⲃⲁⲕⲧⲁ ⲙⲛⲥⲉⲑⲁⲣ ⲙⲛⲭⲁⲣⲕⲉⲥ ⲉⲧⲉⲡⲥⲁϣϥ ⲛⲥⲓⲟⲩⲣ ⲛⲉ ⲉⲩϣⲙϣⲉ ϩⲱⲱϥ ⲛⲁⲣⲇⲁⲝⲉⲣⲝⲏⲥ ⲡⲣⲣⲟ

11 ⲛ ⲁⲥϯⲛ ⲧⲣⲣⲱ ϩⲓⲡϩⲟ ⲙⲡⲣⲣⲟ ⲧⲁⲣⲉⲥⲟⲩ ⲡⲉⲥⲥⲁⲓⲉ ⲉⲃⲟⲗ ϩⲁⲧϩⲏ ⲙⲡⲗⲁⲟⲥ ⲧⲏⲣϥ ⲁⲩⲱ ⲛⲛⲁⲣⲭⲱⲛ ⲟⲩⲥⲁⲓⲉ ⲉⲙⲁⲧⲉ ⲅⲁⲣ ⲡⲉ ⲡⲉⲥⲥⲙⲟⲧ

12 ⲁⲩⲱ ⲙⲡⲉⲁⲥϯⲛ ⲧⲣⲣⲱ ⲥⲱⲧⲙ ⲛⲥⲱⲟⲩ ⲉⲃⲱⲕ ⲉϩⲟⲩⲛ ⲙⲛⲛⲉⲥⲓⲟⲩⲣ ⲡⲣⲣⲟ ⲁϥⲙⲕⲁϩ ⲛϩⲏⲧ ⲁⲩⲱ ⲁϥϭⲱⲛⲧ

13 ⲡⲉϫⲉⲡⲣⲣⲟ ⲛⲛⲉϥϣⲃⲉⲉⲣ ϫⲉⲧⲁⲓ ⲧⲉ ⲧϩⲉ ⲉⲛⲧⲁⲁⲥϯⲛ ϣⲁϫⲉ ⲁⲩⲱ ⲡⲣⲣⲟ ⲁϥⲧⲁⲩⲉ ⲟⲩⲛⲟⲙⲟⲥ ⲙⲛⲟⲩⲕⲣⲓⲥⲓⲥ ⲉⲛⲁⲣⲭⲱⲛ

14 ⲁⲣⲕⲉⲥⲁⲓⲟⲥ ⲇⲉ ⲁϥϯⲡⲉϥⲟⲩⲟⲓ ⲉⲣⲟϥ ⲙⲛⲍⲁⲗⲁⲑⲁⲓⲟⲥ ⲙⲛⲙⲁⲗⲏⲥⲉⲁⲣ ⲛⲁⲣⲭⲱⲛ ⲛⲙⲡⲉⲣⲥⲟⲥ ⲙⲛⲙⲙⲏⲇⲟⲥ ⲛⲉⲧϩⲏⲛ ⲉⲡⲣⲣⲟ ⲛϣⲟⲣⲡ ⲉⲧϩⲙⲟⲟⲥ ϩⲓⲧⲟⲩⲱϥ

15 ⲁⲩϩⲱⲛ ⲉⲧⲟⲟⲧϥ ⲛⲛⲛⲟⲙⲟⲥ ⲛⲁⲓ ⲉϣϣⲉ ⲉⲧⲣⲉϥⲁⲁⲩ ⲛⲁⲥⲧⲓⲛ ⲧⲣⲣⲱ ϫⲉⲙⲡⲥⲉⲓⲣⲉ ⲛⲛⲉⲧⲉⲡⲣⲣⲟ ϫⲱ ⲙⲙⲟⲟⲩ ⲛⲁⲥ ⲉⲃⲟⲗ ϩⲓⲧⲛⲛⲉϥⲥⲓⲟⲩⲣ

16 ⲁⲩⲱ ⲁⲙⲟⲩⲭⲁⲓⲟⲥ ϫⲟⲟⲥ ⲙⲡⲣⲣⲟ ⲙⲙⲁⲧⲉ ⲁⲛ ⲡⲉⲛⲧⲁⲁⲥϯⲛ ⲧⲣⲣⲱ ϫⲓⲧϥ ⲛϭⲟⲛⲥ ⲁⲗⲗⲁ ⲛⲕⲉⲁⲣⲭⲱⲛ ⲧⲏⲣⲟⲩ ⲙⲡⲣⲣⲟ

17 ⲁϥⲧⲁⲩⲟ ⲉⲣⲟⲟⲩ ⲛⲛϣⲁϫⲉ ⲛⲧⲉⲣⲣⲱ ⲁⲩⲱ ⲛⲧϩⲉ ⲉⲧⲉⲙⲡⲥⲥⲱⲧⲙ ⲛⲁϥ

18 ⲁⲩⲱ ⲙⲡϩⲟⲟⲩ ⲛⲉⲭⲱⲣⲁ ⲛⲙⲡⲉⲣⲥⲟⲥ ⲙⲛⲙⲙⲏⲇⲟⲥ ⲙⲁⲣⲟⲩⲥⲱⲧⲙ ⲉⲛⲉⲧⲉⲣⲉⲡⲣⲣⲟ ϫⲱ ⲙⲙⲟⲟⲩ ϫⲉⲁⲩⲥⲱϣ ϣⲱⲡⲉ ϩⲛⲛⲥϩⲓⲙⲉ ⲛⲛⲟϭ ⲛⲛⲉⲩϩⲁⲓ

19 ⲙⲁⲣⲉϥⲟⲩⲉϩⲥⲁϩⲛⲉ ϩⲛⲟⲩⲉϩⲥⲁϩⲛⲉ ⲙⲙⲛⲧⲣⲣⲟ ⲁⲩⲱ ⲙⲁⲣⲉϥⲥϩⲁⲓ ⲕⲁⲧⲁⲡⲛⲟⲙⲟⲥ ⲛⲙⲙⲏⲇⲟⲥ ⲙⲛⲙⲡⲉⲣⲥⲟⲥ ⲛⲧⲉⲧⲙⲧⲣⲣⲱ ⲃⲱⲕ ⲉϩⲟⲩⲛ ϣⲁⲡⲣⲣⲟ ⲁⲣⲇⲁⲝⲉⲣⲝⲏⲥ ⲁⲩⲱ ⲧⲉⲥⲙⲛⲧⲣⲣⲱ ⲙⲁⲣⲉⲡⲣⲣⲟ ⲧⲁⲁⲥ ⲛⲟⲩⲥϩⲓⲙⲉ ⲉⲥⲥⲟⲧⲡ ⲉⲣⲟⲥ

20 ⲁⲩⲱ ⲡϣⲁϫⲉ ⲙⲡⲣⲣⲟ ⲉⲧϥⲛⲁⲁⲁϥ ⲙⲁⲣⲟⲩⲥⲱⲧⲙ ⲉⲣⲟϥ ϩⲛⲧⲉϥⲙⲛⲧⲣⲣⲟ ϫⲉⲟⲩⲙⲉⲉ ⲡⲉ ⲁⲩⲱ ⲛⲉϩⲓⲟⲙⲉ ⲧⲏⲣⲟⲩ ⲥⲉⲛⲁⲧⲙⲁⲓⲉⲛⲉⲩϩⲁⲓ ϫⲓⲛⲟⲩϩⲏⲕⲉ ϣⲁⲟⲩⲣⲙⲙⲁⲟ

21 ⲡϣⲁϫⲉ ⲇⲉ ⲣⲁⲛⲁϥ ⲙⲡⲣⲣⲟ ⲙⲛⲛⲁⲣⲭⲱⲛ ⲁϥⲉⲓⲣⲉ ⲕⲁⲧⲁⲧϩⲉ ⲉⲛⲧⲁⲙⲟⲩⲭⲁⲓⲟⲥ ϣⲁϫⲉ

22 ⲁϥϫⲟⲟⲩ ⲉⲃⲟⲗ ϩⲛⲧⲉϥⲙⲛⲧⲣⲣⲟ ⲧⲏⲣⲥ ⲕⲁⲧⲁⲭⲱⲣⲁ ⲭⲱⲣⲁ ⲕⲁⲧⲁⲧⲉⲩⲁⲥⲡⲉ ⲉⲧⲣⲉϩⲟⲧⲉ ϣⲱⲡⲉ ⲛⲁⲩ ϩⲛⲛⲉⲩⲏⲓ