Baruch 2 — Coptic (Sahidic)

1 ⲁⲩⲱ ⲁⲡϫⲟⲉⲓⲥ ⲧⲁϩⲟ ⲉⲣⲁⲧϥ ⲙⲡⲉϥϣⲁϫⲉ ⲡⲉⲛⲧⲁϥϫⲟⲟϥ ⲉϩⲣⲁⲓ ⲉϫⲱⲛ ⲁⲩⲱ ⲉϫⲛⲛⲉⲛⲣⲉϥϯϩⲁⲡ ⲉⲧϯϩⲁⲡ ⲉⲡⲓⲥⲣⲁⲏⲗ ⲁⲩⲱ ⲉϫⲛⲛⲉⲛⲣⲣⲱⲟⲩ ⲙⲛⲛⲉⲛⲁⲣⲭⲱⲛ ⲁⲩⲱ ⲉϫⲙⲡⲣⲱⲙⲉ ⲙⲡⲓⲥⲣⲁⲏⲗ ⲙⲛⲓⲟⲩⲇⲁ

2 ϫⲉⲉⲣⲉⲡϫⲟⲉⲓⲥ ⲉⲓⲛⲉ ⲛⲛⲉⲓⲛⲟϭ ⲙⲡⲉⲧϩⲟⲟⲩ ⲉϫⲱⲛ ⲛⲁⲓ ⲉⲙⲡⲟⲩϣⲱⲡⲉ ϩⲙⲡⲕⲁϩ ⲧⲏⲣϥ ⲕⲁⲧⲁⲛⲉⲛⲧⲁϥⲁⲁⲩ ϩⲛⲧϩⲓⲏⲙ ⲕⲁⲧⲁⲛⲉⲧⲥⲏϩ ⲧⲏⲣⲟⲩ ϩⲙⲡⲛⲟⲙⲟⲥ ⲙⲙⲱⲩⲥⲏⲥ

3 ⲉⲧⲣⲉⲡⲣⲱⲙⲉ ⲟⲩⲱⲙ ⲛⲛⲥⲁⲣⲝ ⲙⲡⲉϥϣⲏⲣⲉ ⲁⲩⲱ ⲛⲧⲉⲡⲣⲱⲙⲉ ⲟⲩⲱⲙ ⲛⲧⲥⲁⲣⲝ ⲛⲛⲉϥϣⲉⲉⲣⲉ

4 ⲁⲩⲱ ⲁⲕϯ ⲙⲙⲟⲛ ⲉⲧⲟⲟⲧⲟⲩ ⲛⲛⲉⲣⲣⲱⲟⲩ ⲉⲧⲕⲱⲧⲉ ⲉⲣⲟⲛ ⲉⲩⲛⲟϭⲛⲉϭ ⲁⲩⲱ ⲉⲩⲙⲁ ⲉⲙⲉⲩⲙⲟⲟϣⲉ ⲛϩⲏⲧϥ ϩⲛⲛⲗⲁⲟⲥ ⲧⲏⲣⲟⲩ ⲉⲧⲕⲱⲧⲉ ⲉⲣⲟⲛ ⲛⲁⲓ ⲉⲛⲧⲁⲡϫⲟⲉⲓⲥ ϫⲟⲟⲣⲟⲩ ⲉⲃⲟⲗ ⲛϩⲏⲧⲟⲩ

5 ⲁⲩⲱ ⲁⲛϣⲱⲡⲉ ⲉⲛⲙⲡⲉⲥⲏⲧ ⲉⲛⲧⲛⲛⲧⲡⲉ ⲁⲛ ϫⲉⲁⲛⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲙⲡⲛⲥⲱⲧⲙ ⲛⲥⲁⲧⲉϥⲥⲙⲏ

6 ⲡϫⲟⲉⲓⲥ ⲡⲉⲛⲛⲟⲩⲧⲉ ⲧⲇⲓⲕⲁⲓⲟⲥⲩⲛⲏ ϣⲟⲟⲡ ⲛⲁⲕ ⲡϣⲓⲡⲉ ⲇⲉ ⲙⲫⲟ ⲉϥϣⲟⲟⲡ ⲛⲁⲛ ⲙⲛⲛⲉⲛⲉⲓⲟⲧⲉ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ

7 ⲁⲩⲉⲓ ⲉϩⲣⲁⲓ ⲉϫⲱⲛ ⲛϭⲓⲛⲉⲓⲡⲉⲧϩⲟⲟⲩ ⲧⲭⲣⲟⲩ ϩⲛⲛⲉⲛⲧⲁϥϫⲟⲟⲩ ⲛϭⲓⲡϫⲟⲉⲓⲥ ⲉϩⲣⲁⲓ ⲉϫⲱⲛ

8 ⲁⲩⲱ ⲙⲡⲛⲥⲟⲡⲥⲡ ⲛⲛⲁϩⲣⲛⲡϩⲟ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲉⲧⲣⲉⲡⲟⲩⲁ ⲡⲟⲩⲁ ⲙⲙⲟⲛ ⲕⲧⲟϥ ⲉⲃⲟⲗ ϩⲛⲙⲙⲉⲉⲩⲉ ⲙⲡⲉϥϩⲏⲧ ⲉⲧϩⲟⲟⲩ

9 ⲁⲡϫⲟⲉⲓⲥ ⲣⲟⲉⲓⲥ ⲉⲣⲟⲛ ⲁϥⲉⲓⲛⲉ ⲉϫⲱⲛ ⲛⲛⲉⲓⲡⲉⲧϩⲟⲟⲩ ϫⲉⲟⲩⲇⲓⲕⲁⲓⲟⲥ ⲡⲉ ⲡϫⲟⲉⲓⲥ ⲉϫⲛⲛⲉϥϩⲃⲏⲩⲉ ⲧⲏⲣⲟⲩ ϫⲉϩⲛⲛⲉⲛⲧⲁϥϩⲱⲛ ⲙⲙⲟⲟⲩ ⲉⲧⲟⲟⲧⲛ

10 ⲙⲡⲛⲥⲱⲧⲙ ⲛⲥⲁⲧⲉϥⲥⲙⲏ ⲉⲧⲣⲉⲛⲃⲱⲕ ϩⲣⲁⲓ ϩⲛⲛⲉϥⲟⲩⲉϩ ⲥⲁϩⲛⲉ ⲛⲁⲓ ⲉⲛⲧⲁⲡϫⲟⲉⲓⲥ ⲧⲁⲁⲩ ⲙⲡⲉⲛⲙⲧⲟ ⲉⲃⲟⲗ

11 ⲧⲉⲛⲟⲩ ϭⲉ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲡⲉⲛⲧⲁϥⲉⲓⲛⲉ ⲙⲡⲉϥⲗⲁⲟⲥ ⲉⲃⲟⲗ ⲙⲡⲕⲁϩ ⲛⲕⲏⲙⲉ ϩⲛⲟⲩϭⲓϫ ⲉⲥϫⲟⲟⲣ ϩⲛϩⲉⲛⲙⲁⲉⲓⲛ ⲙⲛϩⲉⲛϣⲡⲏⲣⲉ ⲙⲛϩⲉⲛϭⲟⲙ ϩⲛⲟⲩϭⲃⲟⲓ ⲉϥϫⲟⲥⲉ ⲉⲧⲣⲉⲕⲧⲁⲙⲓⲟ ⲛⲁⲕ ⲙⲡⲉⲓⲛⲟϭ ⲛⲣⲁⲛ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ

12 ⲁⲛⲣⲛⲟⲃⲉ ⲁⲛⲁⲥⲉⲃⲉⲓ ⲁⲛϫⲓ ⲛϭⲟⲛⲥ ⲛϩⲏⲧⲕ ⲡϫⲟⲉⲓⲥ ⲡⲉⲛⲛⲟⲩⲧⲉ ⲉϩⲣⲁⲓ ϭⲉ ⲉϫⲛⲛⲉⲕⲡⲉⲧⲛⲁⲛⲟⲩϥ ⲧⲏⲣⲟⲩ

13 ⲙⲁⲣⲉϥⲕⲧⲟϥ ⲛϭⲓⲡϭⲱⲛⲧ ⲛⲧⲉⲕⲟⲣⲅⲏ ⲉⲃⲟⲗ ⲙⲙⲟⲛ ϫⲉⲁⲛϣⲱⲡⲉ ⲉⲛⲥⲟⲃⲕ ϩⲛⲛϩⲉⲑⲛⲟⲥ ⲛⲁⲓ ⲉⲛⲧⲁⲕϫⲟⲟⲣⲛ ⲉⲃⲟⲗ ⲛϩⲏⲧⲟⲩ

14 ⲥⲱⲧⲙ ⲡϫⲟⲉⲓⲥ ⲉⲡⲉⲛϣⲗⲏⲗ ⲛⲅϯ ϩⲧⲏⲕ ⲉⲡⲉⲛϩⲣⲟⲟⲩ ⲙⲡⲉⲛⲥⲟⲡⲥ ⲛⲅⲛⲁϩⲙⲛ ⲉⲧⲃⲏⲧⲕ ⲛⲅϯ ⲛⲁⲛ ⲛⲟⲩⲭⲁⲣⲓⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲛⲧⲁⲩⲡⲱⲱⲛⲉ ⲙⲙⲟⲛ ⲉⲃⲟⲗ

15 ϫⲉⲉⲣⲉⲡⲕⲁϩ ⲧⲏⲣϥ ⲉⲓⲙⲉ ϫⲉⲛⲧⲟⲕ ⲡⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ϫⲉⲡⲉⲕⲣⲁⲛ ⲁⲕⲧⲁⲩⲟϥ ⲉϩⲣⲁⲓ ⲉϫⲙⲡⲓⲥⲣⲁⲏⲗ ⲁⲩⲱ ⲉϩⲣⲁⲓ ⲉϫⲛⲡⲉϥⲅⲉⲛⲟⲥ

16 ⲡϫⲟⲉⲓⲥ ϭⲱϣⲧ ⲉⲃⲟⲗ ϩⲙⲡⲉⲕⲙⲁ ⲛϣⲱⲡⲉ ⲉⲧⲟⲩⲁⲁⲃ ϯ ϩⲧⲏⲕ ⲉⲣⲟⲛ ⲁⲩⲱ ⲛⲅⲣⲓⲕⲉ ⲙⲡⲉⲕⲙⲁⲁϫⲉ ⲛⲅⲥⲱⲧⲙ ⲉⲣⲟⲛ

17 ⲁⲩⲱⲛ ⲛⲛⲉⲕⲃⲁⲗ ⲛⲅⲛⲁⲩ ϫⲉⲛⲉⲛⲧⲁⲩⲙⲟⲩ ⲁⲛ ⲛⲉⲧϩⲛⲁⲙⲛⲧⲉ ⲛⲉⲛⲧⲁⲩϫⲓ ⲙⲡⲉⲩⲡⲛⲉⲩⲙⲁ ⲉⲃⲟⲗ ϩⲛⲛⲉⲩⲥⲡⲗⲁⲅⲭⲛⲟⲛ ⲛⲉⲧⲛⲁϯⲉⲟⲟⲩ ⲛⲁⲕ ⲏ ⲥⲉϫⲱ ⲛⲛⲇⲓⲕⲁⲓⲱⲙⲁ ⲙⲡϫⲟⲉⲓⲥ

18 ⲁⲗⲗⲁ ⲟⲩⲩⲩⲭⲏ ⲛⲧⲟϥ ⲉⲥⲣⲗⲩⲡⲏ ⲉϩⲣⲁⲓ ⲉϫⲛⲧⲉⲕⲙⲛⲧⲛⲟϭ ⲧⲁⲓ ⲉⲧⲙⲟⲟϣⲉ ⲉⲣⲉϫⲱⲥ ⲃⲏϩ ⲉⲡⲉⲥⲏⲧ ⲉⲥⲑⲃⲃⲓⲏⲩ ⲙⲛϩⲉⲛⲃⲁⲗ ⲉⲁⲩⲱϫⲛ ⲙⲛⲟⲩⲯⲩⲭⲏ ⲉⲧϩⲕⲁⲉⲓⲧ ⲛⲧⲟⲟⲩ ⲛⲉⲧⲛⲁϯ ⲉⲟⲟⲩ ⲛⲁⲕ ⲙⲛⲟⲩⲇⲓⲕⲁⲓⲟⲥⲩⲛⲏ ⲡϫⲟⲉⲓⲥ

19 ϫⲉϩⲣⲁⲓ ⲁⲛ ⲉϫⲛⲛⲇⲓⲕⲁⲓⲱⲙⲁ ⲛⲛⲉⲛⲉⲓⲟⲧⲉ ⲙⲛⲛⲁⲛⲉⲛⲉⲣⲱⲟⲩ ⲁⲛⲟⲛ ⲉⲛⲡⲱϩⲧ ⲙⲡⲉⲛⲛⲁ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ

20 ϫⲉⲁⲕⲁⲙⲁϩⲧⲉ ⲉϫⲱⲛ ⲙⲡⲉⲕϭⲱⲛⲧ ⲙⲛⲧⲉⲕⲟⲣⲅⲏ ⲕⲁⲧⲁⲧϩⲉ ⲉⲛⲧⲁⲕϣⲁϫⲉ ϩⲛⲧϭⲓϫ ⲛⲛⲉⲕϩⲙϩⲁⲗ ⲛⲉⲡⲣⲟⲫⲏⲧⲏⲥ ⲉⲩϫⲱ ⲙⲙⲟⲥ ϫⲉ

21 ⲧⲁⲓ ⲧⲉ ⲧϩⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉⲕⲱⲗϫ ⲙⲡⲧⲉⲧⲛⲙⲁⲭϩ ⲛⲧⲉⲧⲛⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ ϫⲉⲉⲧⲉⲧⲛⲉϩⲙⲟⲟⲥ ϩⲙⲡⲉⲧⲛⲕⲁϩ ⲡⲁⲓ ⲉⲛⲧⲁⲓϯ ⲙⲙⲟϥ ⲛⲛⲉⲧⲛⲉⲓⲟⲧⲉ

22 ⲉϣⲱⲡⲉ ⲇⲉ ⲉⲧⲉⲧⲛⲧⲙⲥⲱⲧⲙ ⲉⲧⲉⲥⲙⲏ ⲙⲡϫⲟⲉⲓⲥ ⲉⲧⲉⲧⲛⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ

23 ϯⲛⲁⲉⲓⲣⲉ ⲛϩⲉⲛⲱϫⲛ ϩⲛⲙⲡⲟⲗⲓⲥ ⲛⲓⲟⲩⲇⲁ ⲁⲩⲱ ϯⲛⲁϥⲓ ⲉⲃⲟⲗ ⲛⲧϩⲓⲏⲙ ⲛⲧⲉⲥⲙⲏ ⲙⲡⲟⲩⲛⲟϥ ⲙⲛⲧⲉⲥⲙⲏ ⲙⲡⲣⲁϣⲉ ⲧⲉⲥⲙⲏ ⲛⲟⲩⲡⲁ ⲧϣⲉⲗⲉⲉⲧ ⲙⲛⲧⲉⲥⲙⲏ ⲛⲟⲩϣⲉⲗⲉⲉⲧ ⲛⲧⲉⲡⲉⲧⲛⲕⲁϩ ⲧⲏⲣϥ ϣⲱⲡⲉ ⲛⲉⲣⲏⲙⲟⲥ ϫⲉⲙⲛⲛⲉⲧⲟⲩⲏϩ ϩⲣⲁⲓ ⲛϩⲏⲧϥ

24 ⲁⲩⲱ ⲙⲡⲛⲥⲱⲧⲙ ⲛⲥⲁⲧⲉⲕⲥⲙⲏ ⲉⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ⲁⲕⲧⲁϩⲟ ⲉⲣⲁⲧⲟⲩ ⲛⲛϣⲁϫⲉ ⲛⲁⲓ ⲉⲛⲧⲁⲕϫⲟⲟⲩ ϩⲛⲛϭⲓϫ ⲛⲛⲉⲕϩⲙϩⲁⲗ ⲛⲉⲡⲣⲟⲫⲏⲧⲏⲥ ⲉⲧⲣⲉⲩⲉⲓⲛⲉ ⲉⲃⲟⲗ ⲛⲛⲕⲉⲉⲥ ⲛⲛⲉⲛⲉⲣⲱⲟⲩ ⲙⲛⲛⲕⲉⲉⲥ ⲛⲛⲉⲛⲉⲓⲟⲧⲉ ⲉⲃⲟⲗ ϩⲙⲡⲉⲩⲙⲁ

25 ⲁⲩⲱ ⲉⲓⲥ ϩⲏⲏⲧⲉ ⲥⲉⲛⲏϫ ϩⲙⲡⲕⲁⲩⲙⲁ ⲙⲡⲉϩⲟⲟⲩ ⲁⲩⲱ ϩⲙⲡϫⲁϥ ⲛⲧⲉⲩϣⲏ ⲁⲩⲙⲟⲩ ϩⲛϩⲉⲛϩⲓⲥⲉ ⲙⲡⲟⲛⲏⲣⲟⲛ ϩⲙⲡϩⲉⲃⲱⲱⲛ ⲙⲛⲧⲥⲏϥⲉ ⲛⲧϩⲉ ⲉⲛⲧⲁⲕⲧⲛⲛⲟⲟⲩⲥⲉ ⲉϫⲱⲛ

26 ⲁⲩⲱ ⲁⲕⲕⲱ ⲙⲡⲉⲛⲏⲓ ⲉⲛⲧⲁⲩⲉⲡⲓⲕⲁⲗⲉⲓ ⲙⲡⲉⲕⲣⲁⲛ ⲉϩⲣⲁⲓ ⲉϫⲱϥ ⲛⲧϩⲉ ⲙⲡϩⲟⲟⲩ ⲛϩⲟⲟⲩ ⲉⲧⲃⲉⲙⲡⲟⲛⲏⲣⲓⲁ ⲙⲡⲏⲓ ⲙⲡⲓⲥⲣⲁⲏⲗ ⲙⲛⲡⲏⲓ ⲛⲓⲟⲩⲇⲁ

27 ⲁⲩⲱ ⲁⲕⲉⲓⲣⲉ ⲉϩⲟⲩⲛ ⲉⲣⲟⲛ ⲡϫⲟⲉⲓⲥ ⲡⲉⲛⲛⲟⲩⲧⲉ ⲕⲁⲧⲁⲧⲉⲕⲙⲛⲧϩⲁⲕ ϩⲛϩⲱⲃ ⲛⲓⲙ ⲕⲁⲧⲁⲧⲉⲕⲙⲛⲧϣⲁⲛϩⲧⲏϥ ⲉⲧⲛⲁϣⲱⲥ

28 ⲕⲁⲧⲁⲧϩⲉ ⲉⲛⲧⲁⲕϣⲁϫⲉ ϩⲛⲧϭⲓϫ ⲙⲙⲱⲩⲥⲏⲥ ⲡⲉⲕϩⲙϩⲁⲗ ϩⲙⲡⲉϩⲟⲟⲩ ⲉⲛⲧⲁⲕϩⲱⲛ ⲉⲧⲟⲟⲧϥ ⲉⲥϩⲁⲓ ⲙⲡⲉⲓⲛⲟⲙⲟⲥ ⲙⲡⲉⲙⲧⲟ ⲉⲃⲟⲗ ⲛⲛϣⲏⲣⲉ ⲙⲡⲓⲥⲣⲁⲏⲗ ⲉⲕϫⲱ ⲙⲙⲟⲥ

29 ϫⲉⲉⲧⲉⲧⲛⲧⲙⲥⲱⲧⲙ ⲛⲥⲁⲧⲁⲥⲙⲏ ⲧⲉⲧⲛⲛⲟϭ ⲙⲙⲛⲧϩⲁϩ ⲛϣⲁϫⲉ ⲉⲧⲛⲁϣⲱⲥ ⲉⲛⲁⲕⲧⲟ ⲙⲙⲟⲥ ⲉⲡⲟⲩⲉ ϩⲛⲛϩⲉⲑⲛⲟⲥ ⲛⲁⲓ ⲉϯⲛⲁϫⲟⲟⲣⲟⲩ ⲉⲃⲟⲗ ⲙⲙⲁⲩ

30 ϫⲉⲁⲓⲉⲓⲙⲉ ⲁⲛⲟⲕ ϫⲉⲛⲥⲉⲛⲁⲥⲱⲧⲙ ⲁⲛ ⲛⲥⲱⲓ ϫⲉⲟⲩⲗⲁⲟⲥ ⲛⲛⲁϣⲧ ⲙⲁⲭϩ ⲛⲉ ⲛⲥⲉⲕⲧⲟⲟⲩ ϩⲙⲡⲉⲩϩⲏⲧ ⲉⲡⲕⲁϩ ⲉⲛⲧⲁⲩⲡⲟⲟⲛⲟⲩ ⲉⲃⲟⲗ ⲉⲣⲟϥ

31 ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲡⲉⲩⲛⲟⲩⲧⲉ ⲁⲩⲱ ϯⲛⲁϯ ⲛⲁⲩ ⲛⲟⲩϩⲏⲧ ⲁⲩⲱ ϩⲉⲛⲙⲁⲁϫⲉ ⲉⲧⲣⲉⲩⲥⲱⲧⲙ

32 ⲛⲥⲉⲥⲙⲟⲩ ⲉⲣⲟⲓ ϩⲙⲡⲕⲁϩ ⲉⲛⲧⲁⲩⲡⲟⲟⲛⲟⲩ ⲉⲃⲟⲗ ⲉⲣⲟϥ ⲁⲩⲱ ⲛⲥⲉⲣⲡⲙⲉⲉⲩⲉ ⲙⲡⲁⲣⲁⲛ

33 ⲛⲥⲉⲕⲧⲟ ⲛⲧⲉⲩϫⲓⲥⲉ ⲉⲃⲟⲗ ϩⲙⲡⲉⲛϣⲟⲧ ⲁⲩⲱ ⲉⲃⲟⲗ ϩⲛⲛⲉⲩϩⲃⲏⲩⲉ ⲧⲏⲣⲟⲩ ⲙⲡⲟⲛⲏⲣⲟⲛ ϫⲉⲥⲉⲛⲁⲣⲡⲙⲉⲉⲩⲉ ⲛⲧⲉϩⲓⲏ ⲛⲛⲉⲩⲉⲓⲟⲧⲉ ⲛⲁⲓ ⲉⲛⲧⲁⲩⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

34 ϫⲉϯⲛⲁⲕⲧⲟ ⲙⲙⲟⲟⲩ ⲉⲡⲕⲁϩ ⲡⲉⲛⲧⲁⲓⲱⲣⲕ ⲙⲙⲟϥ ⲛⲛⲉⲩⲉⲓⲟⲧⲉ ⲁⲃⲣⲁϩⲁⲙ ⲙⲛⲓⲥⲁⲁⲕ ⲙⲛⲓⲁⲕⲱⲃ ⲛⲥⲉⲣϫⲟⲉⲓⲥ ⲉⲣⲟϥ ⲛⲧⲁⲧⲁϣⲟⲟⲩ ⲛⲥⲉⲧⲙϣⲱⲡⲉ ⲉⲩⲥⲟⲃⲕ

35 ⲛⲧⲁⲧⲁϩⲟ ⲛⲁⲩ ⲉⲣⲁⲧⲥ ⲛⲟⲩⲇⲓⲁⲑⲏⲕⲏ ϣⲁⲉⲛⲉϩ ⲛⲧⲁϣⲱⲡⲉ ⲛⲁⲩ ⲛⲛⲟⲩⲧⲉ ⲛⲧⲟⲟⲩ ϩⲱⲟⲩ ⲛⲥⲉϣⲱⲡⲉ ⲛⲁⲓ ⲉⲩⲗⲁⲟⲥ ⲁⲩⲱ ⲛϯⲛⲁⲟⲩⲱϩ ⲁⲛ ⲉⲧⲟⲟⲧⲉⲡⲱⲛⲉ ⲉⲃⲟⲗ ⲙⲡⲁⲗⲁⲟⲥ ⲡⲓⲥⲣⲁⲏⲗ ⲉⲃⲟⲗ ϩⲙⲡⲕⲁϩ ⲉⲛⲧⲁⲓϯ ⲙⲙⲟϥ ⲛⲛⲉⲩⲉⲓⲟⲧⲉ