Read Baruch 3 side by side with translations · The Final Bible
1 ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲟⲩⲩⲩⲭⲏ ⲉⲥϩⲉϫϩⲱϫ ⲙⲛⲟⲩⲡⲛⲉⲩⲙⲁ ⲉϥϩⲛ ⲟⲩⲙⲕⲁϩ ⲛϩⲏⲧ ⲁϥⲱϣ ⲉϩⲣⲁⲓ ⲉⲣⲟⲕ
2 ⲥⲱⲧⲙ ⲡϫⲟⲉⲓⲥ ⲁⲩⲱ ⲛⲅⲛⲁ ϫⲉⲛⲧⲕ ⲟⲩⲛⲟⲩⲧⲉ ⲛⲛⲁϩⲏⲧ ϫⲉⲁⲛⲣⲛⲟⲃⲉ ⲙⲡⲉⲕⲙⲧⲟ ⲉⲃⲟⲗ
3 ⲛⲧⲟⲕ ⲕϣⲟⲟⲡ ϣⲁⲉⲛⲉϩ ⲁⲩⲱ ⲁⲛⲟⲛ ⲧⲛⲛⲁⲧⲁⲕⲟ ⲛϣⲁ ⲉⲛⲉϩ
4 ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲥⲱⲧⲙ ⲉⲧⲉⲡⲣⲟⲥⲉⲩⲭⲏ ⲛⲛϣⲏⲣⲉ ⲙⲡⲓⲥⲣⲁⲏⲗ ⲙⲛⲛϣⲏⲣⲉ ⲛⲛⲉⲛⲧⲁⲩⲣⲛⲟⲃⲉ ⲙⲡⲉⲕⲙⲧⲟ ⲉⲃⲟⲗ ⲛⲁⲓ ⲉⲧⲉⲙⲡⲟⲩⲥⲱⲧⲙ ⲛⲥⲁⲧⲉⲥⲙⲏ ⲙⲡⲉⲩⲛⲟⲩⲧⲉ ⲉⲧⲃⲉⲡⲁⲓ ⲁⲛⲉⲓⲡⲉⲧϩⲟⲟⲩ ⲧⲟϭⲟⲩ ⲉⲣⲟⲛ
5 ⲙⲡⲣⲣⲡⲙⲉⲉⲩⲉ ⲛⲛϫⲓⲛϭⲟⲛⲥ ⲛⲛⲉⲛⲉⲓⲟⲧⲉ ⲁⲗⲗⲁ ⲁⲣⲓⲡⲙⲉⲉⲩⲉ ⲛⲧⲉⲕϭⲓϫ ⲙⲛⲡⲉⲕⲣⲁⲛ ϩⲣⲁⲓ ϩⲙⲡⲉⲓⲟⲩⲟⲉⲓϣ
6 ϫⲉⲛⲧⲟⲕ ⲡⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ⲁⲩⲱ ⲧⲛⲛⲁⲥⲙⲟⲩ ⲉⲣⲟⲕ ⲡϫⲟⲉⲓⲥ
7 ϫⲉⲉⲧⲃⲉⲡⲁⲓ ⲁⲕϯ ⲛⲧⲉⲕϩⲟⲧⲉ ⲉϩⲣⲁⲓ ⲉⲡⲉⲛϩⲏⲧ ⲉⲧⲣⲉⲛⲉⲡⲓⲕⲁⲗⲉⲓ ⲙⲡⲉⲕⲣⲁⲛ ⲛⲧⲛⲥⲙⲟⲩ ⲉⲣⲟⲕ ϩⲙⲡⲕⲁϩ ⲉⲛⲧⲁⲩⲡⲟⲟⲛⲉⲛ ⲉⲃⲟⲗ ⲉⲣⲟϥ ϫⲉϩⲣⲁⲓ ϩⲛⲛϭⲓϫ ⲛⲛⲉⲛⲉⲓⲟⲧⲉ ⲙⲛⲡⲕⲁϩ ⲉⲛⲧⲁⲛⲡⲟⲟⲛⲉ ⲉⲃⲟⲗ ⲉⲣⲟϥ ⲙⲛⲛⲛⲟⲃⲉ ⲉⲛⲧⲁⲩⲁⲁⲩ ⲙⲡⲉⲕⲙⲧⲟ ⲉⲃⲟⲗ
8 ϫⲉⲉⲓⲥϩⲏⲏⲧⲉ ⲙⲡϩⲟⲟⲩ ⲧⲛϩⲛ ⲧⲕⲁⲧⲟⲓⲕⲓⲁ ⲧⲁⲓ ⲉⲛⲧⲁⲕϫⲟⲟⲣⲛ ⲉⲃⲟⲗ ⲉⲣⲟⲥ ⲉⲩⲛⲟϭⲛⲉϭ ⲛⲁⲛ ⲙⲛⲟⲩⲥⲁϩⲟⲩ ⲉⲃⲟⲗ ϫⲉⲟⲩⲛⲟⲩⲟⲛ ⲉⲣⲟⲛ ⲕⲁⲧⲁⲛϫⲓⲛϭⲟⲛⲥ ⲛⲛⲉⲛⲉⲓⲟⲧⲉ ϫⲉⲁⲩⲥⲁϩⲱⲟⲩ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ
9 ⲥⲱⲧⲙ ⲡⲓⲥⲣⲁⲏⲗ ⲉⲛⲉⲛⲧⲟⲗⲏ ⲙⲡⲱⲛϩ ⲣⲓⲕⲉ ⲙⲡⲉⲕⲙⲁⲁϫⲉ ⲉⲩⲙⲛⲧⲥⲁⲃⲉ
10 ⲟⲩ ⲡⲉ ⲡⲓⲥⲣⲁⲏⲗ ⲉⲧⲃⲉⲟⲩ ⲣⲱ ⲕϩⲙ ⲡⲕⲁϩ ⲛⲛⲉⲕϫⲓϫⲉⲉⲩⲉ ⲁⲕⲣⲁⲥ ϩⲛⲟⲩⲕⲁϩ ⲛϣⲙⲙⲟ
11 ⲁⲕⲥⲟⲟϥ ⲙⲛⲛⲉⲧⲙⲟⲟⲩⲧ ⲁⲩⲟⲡⲕ ⲙⲛⲛⲉⲧⲃⲏⲕ ⲉⲡⲉⲥⲏⲧ ⲉⲁⲙⲛⲧⲉ
12 ⲁⲕⲕⲱ ⲛⲥⲱⲕ ⲛⲧⲡⲏⲅⲏ ⲛⲧⲥⲟⲫⲓⲁ
13 ⲉⲛⲉⲛⲧⲁⲕⲃⲱⲕ ⲅⲁⲣ ϩⲛⲧⲉϩⲓⲏ ⲙⲡⲛⲟⲩⲧⲉ ⲡⲉ ⲛⲉⲕⲛⲁⲟⲩⲱϩ ⲡⲉ ϩⲛⲧⲉⲓⲣⲏⲛⲏ ϣⲁⲉⲛⲉϩ ⲛⲟⲩⲟⲉⲓϣ
14 ϣⲓⲛⲉ ϭⲉ ϫⲉⲉⲣⲉⲧⲙⲛⲧⲣⲙⲛϩⲏⲧ ⲧⲱⲛ ⲁⲩⲱ ϫⲉⲉⲣⲉⲧϭⲟⲙ ϩⲛⲁϣ ⲙⲙⲁ ⲁⲩⲱ ϫⲉⲉⲥⲧⲱⲛ ⲛϭⲓⲧⲙⲛⲧⲥⲁⲃⲉ ϫⲉⲉⲕⲉⲥⲟⲩⲱⲛⲟⲩ ϩⲓⲟⲩⲥⲟⲡ ⲉⲣⲉⲡⲁϩⲉ ⲉⲧⲛⲁϣⲱϥ ϩⲛⲁϣ ⲙⲙⲁ ⲙⲛⲡⲱⲛϩ ⲁⲩⲱ ⲉⲣⲉⲡⲟⲩⲟⲉⲓⲛ ⲛⲛⲃⲁⲗ ϩⲛⲁϣ ⲙⲙⲁ ⲙⲛϯⲣⲏⲛⲏ
15 ⲛⲓⲙ ⲡⲉⲛⲧⲁϥϩⲉ ⲉⲡⲉⲥⲙⲁ ⲛⲓⲙ ⲡⲉⲛⲧⲁϥⲃⲱⲕ ⲉϩⲟⲩⲛ ⲉⲛⲉⲥⲁϩⲱⲣ
16 ⲉⲩⲧⲱⲛ ϭⲉ ⲛⲁⲣⲭⲱⲛ ⲛⲛϩⲉⲑⲛⲟⲥ ⲙⲛⲛⲉⲧⲟ ⲛϫⲟⲉⲓⲥ ⲉϫⲛⲛⲉⲑⲏⲣⲓⲟⲛ ⲙⲡⲕⲁϩ
17 ⲛⲉⲧⲥⲱⲃⲉ ⲛⲛϩⲁⲗⲁⲧⲉ ⲛⲧⲡⲉ ⲁⲩⲱ ⲛⲣⲱⲙⲉ ⲉⲧⲕⲱ ⲛϩⲧⲏⲩ ⲉⲡⲛⲟⲩⲃ ⲁⲩⲱ ⲙⲛϩⲁⲏ ⲙⲡⲉⲩⲥⲱⲟⲩϩ ⲉϩⲟⲩⲛ
18 ⲛⲉⲧϫⲡⲟ ⲙⲫⲁⲧ ⲉⲧϥⲓⲣⲟⲟⲩϣ ϩⲁⲣⲟϥ ⲁⲩⲱ ⲙⲛϩⲁⲏ ⲛⲛⲉⲩϩⲃⲏⲩⲉ
19 ϫⲉⲁⲩⲧⲁⲕⲟ ⲁⲩⲱ ⲥⲉⲛⲁⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ⲁⲩⲱ ⲛⲧⲉϩⲉⲛⲕⲟⲟⲩⲉ ⲧⲱⲟⲩⲛ ⲉⲡⲉⲩⲙⲁ
20 ⲁⲛϣⲏⲣⲉ ⲕⲟⲩⲓ ⲛⲁⲩ ⲉⲡⲟⲩⲟⲉⲓⲛ ⲁⲩⲱ ⲁⲩⲟⲩⲱⲙ ϩⲓϫⲙⲡⲕⲁϩ ⲧⲉϩⲓⲏ ⲇⲉ ⲙⲙⲛⲧⲥⲁⲃⲉ ⲙⲡⲟⲩⲥⲟⲩⲱⲛⲥ
21 ⲟⲩⲇⲉ ⲙⲡⲟⲩϭⲛ ⲧⲉⲥϩⲓⲏ ⲙⲙⲟⲟϣⲉ ⲟⲩⲇⲉ ⲙⲡⲟⲩϭⲟⲗϫⲟⲩ ⲙⲙⲟⲥ ⲁⲛⲉⲩϣⲏⲣⲉ ϣⲱⲡⲉ ⲉⲩⲟⲩⲏⲟⲩ ⲉⲃⲟⲗ ϩⲛⲧⲉϩⲓⲏ
22 ⲟⲩⲇⲉ ⲙⲡⲟⲩⲥⲟⲧⲙⲟⲩ ϩⲛⲭⲁⲛⲁⲁⲛ ⲟⲩⲇⲉ ⲙⲡⲟⲩⲱⲛϩ ⲉⲃⲟⲗ ϩⲛⲑⲁⲓⲙⲁⲛ
23 ⲟⲩⲇⲉ ⲛϣⲏⲣⲉ ⲛⲁⲅⲁⲣ ⲛⲉⲧϣⲓⲛⲉ ⲛⲥⲁⲧⲙⲛⲧⲣⲙⲛϩⲏⲧ ⲛⲉⲧϩⲓϫⲙⲡⲕⲁϩ ⲛⲉϣⲟⲧⲉ ⲙⲙⲉⲣⲣⲁⲛ ⲙⲛⲑⲁⲓⲙⲁⲛ ⲁⲩⲱ ⲛⲣⲉϥϣⲁϫⲉ ⲙⲛⲛⲉⲧϯⲟⲩⲟⲓ ϩⲛⲧⲙⲛⲧⲣⲙⲛⲧϩⲏⲧ ⲙⲡⲟⲩⲥⲟⲩⲱⲛ ⲧⲉϩⲓⲏ ⲛⲧⲥⲟⲫⲓⲁ ⲟⲩⲇⲉ ⲙⲡⲟⲩⲣⲡⲙⲉⲉⲩⲉ ⲛⲛⲉⲥϩⲓⲟⲟⲩⲉ ⲙⲙⲟⲟϣⲉ
24 ⲱ ⲡⲓⲥⲣⲁⲏⲗ ϫⲉⲟⲩⲛⲟϭ ⲡⲉ ⲡⲏⲓ ⲙⲡⲛⲟⲩⲧⲉ ⲉϥⲉⲟⲩⲟϣⲥ ⲉⲃⲟⲗ ⲉⲡⲉϩⲟⲩⲟ ⲛϭⲓⲡⲙⲁ ⲙⲡⲉϥⲙⲁ ⲛϣⲱⲡⲉ
25 ⲟⲩⲛⲟϭ ⲡⲉ ⲉⲙⲛⲧⲏϥ ϩⲁⲏ ⲉⲙⲛⲧϥϣⲓ ⲙⲡⲉϥϫⲓⲥⲉ
26 ϫⲉⲙⲡⲙⲁ ⲉⲧⲙⲙⲁⲩ ⲛⲧⲁⲩϫⲡⲟ ⲛⲛⲅⲓⲅⲁⲥ ⲛⲉⲛⲧⲁⲩϣⲱⲡⲉ ⲛⲟⲛⲟⲙⲁⲥⲧⲟⲥ ϫⲓⲛⲛϣⲟⲣⲡ ⲉⲛⲁϣⲱⲟⲩ ϩⲛⲧⲉⲩϣⲓ ⲛⲉⲧⲥⲟⲟⲩⲛ ⲙⲙⲓϣⲉ
27 ⲛⲁⲓ ⲁⲛ ⲛⲉⲛⲧⲁⲡⲛⲟⲩⲧⲉ ⲥⲟⲧⲡⲟⲩ ⲟⲩⲇⲉ ⲙⲡϥϯϩⲓⲏ ⲛⲁⲩ ⲛⲧⲙⲛⲧⲥⲁⲃⲉ
28 ⲁⲩⲧⲁⲕⲟ ϫⲉⲙⲛⲧⲟⲩⲙⲙⲁⲩ ⲛⲧⲙⲛⲧⲣⲙⲛϩⲏⲧ ⲁⲩϩⲉ ⲉⲃⲟⲗ ⲉⲧⲃⲉⲧⲉⲩⲙⲛⲧⲁⲧϣⲟϫⲛⲉ
29 ⲛⲓⲙ ⲡⲉⲛⲧⲁϥⲃⲱⲕ ⲉϩⲣⲁⲓ ⲉⲧⲡⲉ ⲁϥϫⲓ ⲙⲙⲟⲥ ⲛⲁϥ ⲁⲩⲱ ⲁϥⲉⲓⲛⲉ ⲙⲙⲟⲥ ⲉⲡⲉⲥⲏⲧ ⲉⲃⲟⲗ ϩⲛⲛⲉⲕⲗⲟⲟⲗⲉ
30 ⲛⲓⲙ ⲡⲉⲛⲧⲁϥϫⲓⲟⲟⲣ ⲛⲧⲑⲁⲗⲁⲥⲥⲁ ⲁϥϭⲓⲛⲉ ⲙⲙⲟⲥ ϫⲉⲉϥⲉⲛⲧⲥ ⲛⲁϥ ⲛⲧϩⲉ ⲛⲟⲩⲛⲟⲩⲃ ⲉϥⲥⲟⲧⲡ
31 ⲙⲛⲗⲁⲁⲩ ⲥⲟⲟⲩⲛ ⲛⲧⲉⲥϩⲓⲏ ⲟⲩⲧⲉ ⲉϥⲥⲟⲩⲧⲱⲛ ⲛⲉⲥϩⲓⲟⲟⲩⲉ
32 ⲁⲗⲗⲁ ⲡⲉⲧⲛⲟⲉⲓ ⲛϩⲱⲃ ⲛⲓⲙ ⲡⲉⲧⲥⲟⲟⲩⲛ ⲙⲙⲟⲥ ⲁϥϭⲓⲛⲉ ⲙⲙⲟⲥ ϩⲛⲧⲉϥⲙⲛⲧⲣⲙⲛϩⲏⲧ ⲡⲉⲛⲧⲁϥⲥⲟⲃⲧⲉ ⲡⲕⲁϩ ϣⲁⲉⲛⲉϩ ⲛⲟⲩⲟⲉⲓϣ ⲁϥⲙⲟⲩϩ ⲙⲙⲟϥ ⲛⲧⲃⲛⲏ ⲛⲛⲁⲧⲉϥⲧⲟ ⲛⲟⲩⲣⲏⲧⲉ
33 ⲡⲉⲛⲧⲁϥⲧⲛⲛⲟⲟⲩ ⲙⲡⲉϥⲟⲩⲟⲉⲓⲛ ⲁⲩⲱ ⲁϥⲙⲟⲟϣⲉ ⲁϥⲙⲟⲩⲧⲉ ⲉⲣⲟϥ ⲁϥⲥⲱⲧⲙ ⲛⲥⲱϥ ϩⲛⲟⲩⲥⲧⲱⲧ
34 ⲁⲛⲥⲓⲟⲩ ⲇⲉ ⲉⲩⲫⲣⲁⲛⲉ ⲉⲩⲣⲟⲩⲟⲉⲓⲛ ϩⲛⲛⲉⲩⲣϣⲉ
35 ⲁϥⲙⲟⲩⲧⲉ ⲉⲣⲟⲟⲩ ⲡⲉϫⲁⲩ ϫⲉⲉⲓⲥϩⲏⲏⲧⲉ ⲧⲛⲙⲡⲉⲓⲙⲁ ⲁⲩⲣⲟⲩⲟⲉⲓⲛ ϩⲛⲟⲩⲟⲩⲛⲟϥ ⲙⲡⲉⲛⲧⲁϥⲧⲁⲙⲓⲟⲟⲩ
36 ⲡⲁⲓ ⲡⲉ ⲡⲉⲛⲛⲟⲩⲧⲉ ⲙⲛϭⲉ ⲛⲁϣⲱⲡⲉ ⲉϥⲧⲛⲧⲱⲛ ⲉⲣⲟϥ
37 ⲁϥϭⲓⲛⲉ ⲛⲧⲉϩⲓⲏ ⲧⲏⲣⲥ ⲛⲧⲙⲛⲧⲥⲁⲃⲉ ⲁϥϯ ⲙⲙⲟⲥ ⲛⲓⲁⲕⲱⲃ ⲡⲉϥϩⲙϩⲁⲗ ⲙⲛⲡⲓⲥⲣⲁⲏⲗ ⲡⲉⲛⲧⲁϥⲙⲉⲣⲓⲧϥ
38 ⲙⲛⲛⲥⲁⲛⲁⲓ ⲁϥⲟⲩⲟⲛϩϥ ⲉⲃⲟⲗ ϩⲓϫⲛⲡⲕⲁϩ ⲁⲩⲱ ⲁϥⲥⲁⲛϣ ϩⲛⲛⲣⲱⲙⲉ
Baruch 2 · Baruch 4 · Greek (Septuagint / SBLGNT) · Aramaic (Peshitta) · Latin (Vulgate)