Baruch 1 — Coptic (Sahidic)

1 ⲁⲩⲱ ⲛⲁⲓ ⲛⲉ ⲛϣⲁϫⲉ ⲙⲡϫⲱⲱⲙⲉ ⲉⲛⲧⲁϥⲥⲁϩϥ ⲛϭⲓⲃⲁⲣⲟⲩⲭ ⲡϣⲏⲣⲉ ⲛⲛⲏⲣⲓⲁⲥ ⲡϣⲏⲣⲉ ⲛⲥⲉⲇⲉⲕⲓⲁⲥ ⲡϣⲏⲣⲉ ⲛⲁⲥⲁⲇⲓⲁⲥ ⲡϣⲏⲣⲉ ⲛⲭⲉⲗⲕⲓⲁⲥ ϩⲣⲁⲓ ϩⲛⲧⲃⲁⲃⲩⲗⲱⲛ

2 ϩⲛⲧⲙⲉϩϯ ⲛⲣⲟⲙⲡⲉ ⲛⲥⲟⲩ ⲥⲁϣϥ ⲙⲡⲉⲃⲟⲧ ⲙⲡⲉⲟⲩⲟⲉⲓϣ ⲉⲛⲧⲁⲛⲉⲭⲁⲗⲇⲁⲓⲟⲥ ϫⲓ ⲛⲧϩⲓⲏⲙ ⲁⲩⲱ ⲁⲩⲣⲟⲭϩⲥ ϩⲛⲟⲩⲕⲱϩⲧ

3 ⲁⲩⲱ ⲁⲃⲁⲣⲟⲩⲭ ⲱϣ ⲛⲛϣⲁϫⲉ ⲙⲡⲉⲓϫⲱⲱⲙⲉ ⲉⲙⲙⲁⲁϫⲉ ⲛⲓⲉⲭⲟⲛⲓⲁⲥ ⲡϣⲏⲣⲉ ⲛⲓⲱⲁⲕⲉⲓⲙ ⲡⲣⲣⲟ ⲡⲓⲟⲩⲇⲁ ⲁⲩⲱ ⲉⲙⲙⲁⲁϫⲉ ⲛⲟⲩⲟⲛ ⲛⲓⲙ ⲉⲃⲟⲗ ϩⲛⲛⲁⲡⲗⲁⲟⲥ ⲉⲧⲛⲏⲟⲩ ⲉϩⲟⲩⲛ ⲉⲣⲁⲧϥ ⲙⲡϫⲱⲱⲙⲉ

4 ⲁⲩⲱ ⲉⲛⲙⲁⲁϫⲉ ⲛⲛⲇⲩⲛⲁⲧⲟⲥ ⲙⲛⲛϣⲏⲣⲉ ⲛⲛⲉⲣⲣⲱⲟⲩ ⲁⲩⲱ ⲉⲛⲙⲁⲁϫⲉ ⲛⲛⲉⲡⲣⲉⲥⲃⲩⲧⲉⲣⲟⲥ ⲁⲩⲱ ⲉⲛⲙⲁⲁϫⲉ ⲙⲡⲗⲁⲟⲥ ⲧⲏⲣϥ ϫⲓⲛⲡⲉⲩⲕⲟⲩⲓ ϣⲁⲡⲉⲩⲛⲟϭ ⲟⲩⲟⲛ ⲛⲓⲙ ⲉⲧϣⲟⲟⲡ ϩⲛⲧⲃⲁⲃⲩⲗⲱⲛ ϩⲣⲁⲓ ϩⲓϫⲙⲡⲓⲉⲣⲟ ⲛⲥⲟⲩⲇ

5 ⲁⲩⲣⲓⲙⲉ ⲁⲩⲛⲏⲥⲧⲉⲩⲉ ⲁⲩⲉⲓⲣⲉ ⲛⲟⲩϣⲗⲏⲗ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

6 ⲁⲩⲱ ⲁⲩⲥⲱⲟⲩϩ ⲉϩⲟⲩⲛ ⲛⲟⲩϩⲁⲧ ⲕⲁⲧⲁⲧϭⲟⲙ ⲙⲡⲟⲩⲁ ⲡⲟⲩⲁ ϩⲛⲧⲉϥϭⲓϫ

7 ⲁⲩⲱ ⲁⲩϫⲟⲟⲩⲥⲉ ⲉⲧϩⲓⲏⲙ ϣⲁⲓⲱⲁⲕⲓⲙ ⲡϣⲏⲣⲉ ⲛⲭⲉⲗⲕⲓⲁⲥ ⲡϣⲏⲣⲉ ⲛⲥⲉⲗⲱⲙ ⲡⲟⲩⲏⲏⲃ ⲁⲩⲱ ϣⲁⲛⲟⲩⲏⲏⲃ ⲁⲩⲱ ϣⲁⲡⲗⲁⲟⲥ ⲧⲏⲣϥ ⲡⲉⲛⲧⲁⲩϭⲛⲧϥ ⲛⲙⲙⲁⲩ ϩⲛⲧϩⲓⲏⲙ

8 ϩⲙⲡⲧⲣⲉϥϫⲓ ⲛⲛⲉⲥⲕⲉⲩⲏ ⲙⲡⲏⲓ ⲙⲡϫⲟⲉⲓⲥ ⲛⲉⲛⲧⲁⲩⲛⲧⲟⲩ ⲉⲃⲟⲗ ϩⲙⲡⲉⲣⲡⲉ ⲉⲕⲧⲟⲟⲩ ⲉⲡⲕⲁϩ ⲛⲓⲟⲩⲇⲁ ϩⲛⲥⲟⲩ ⲙⲏⲧ ⲛⲥⲟⲩⲁⲛ ⲁⲥⲉⲇⲉⲕⲓⲁⲥ ⲡϣⲏⲣⲉ ⲛⲛⲏⲣⲓⲁⲥ ⲡⲣⲣⲟ ⲛⲓⲟⲩⲇⲁ ⲧⲁⲙⲓⲟ ⲛϩⲉⲛⲥⲕⲉⲩⲏ ⲛϩⲁⲧ

9 ⲙⲛⲛⲥⲁⲧⲣⲉⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲡⲡⲱⲱⲛⲉ ⲉⲃⲟⲗ ⲛⲓⲉⲭⲟⲛⲓⲁⲥ ⲙⲛⲛⲁⲣⲭⲱⲛ ⲙⲛⲛⲉⲧⲙⲏⲣ ⲙⲛⲛⲇⲩⲛⲁⲧⲟⲥ ⲙⲛⲡⲗⲁⲟⲥ ⲧⲏⲣϥ ⲙⲡⲕⲁϩ ϫⲓⲛⲑⲓⲏⲙ ⲁⲩⲱ ⲁϥⲉⲓⲛⲉ ⲙⲙⲟϥ ⲉⲧⲃⲁⲃⲩⲗⲱⲛ

10 ⲁⲩⲱ ⲡⲉϫⲁⲩ ϫⲉⲉⲓⲥϩⲏⲏⲧⲉ ϭⲉ ⲁⲛⲧⲛⲛⲟⲟⲩ ⲛⲏⲧⲛ ⲛⲟⲩϩⲁⲧ ⲛⲧⲉⲧⲛϣⲱⲡ ⲉⲃⲟⲗ ϩⲙⲡⲉⲛϩⲁⲧ ⲛϩⲉⲛϭⲗⲓⲗ ϩⲁⲛⲟⲃⲉ ⲙⲛⲟⲩⲗⲓⲃⲁⲛⲟⲥ ⲁⲩⲱ ⲛⲧⲉⲧⲛⲧⲁⲙⲓⲟ ⲛⲟⲩⲙⲁⲛⲛⲁ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲛⲛⲁϩⲣⲛⲡϫⲟⲉⲓⲥ ⲡⲉⲛⲛⲟⲩⲧⲉ

11 ⲛⲧⲉⲧⲛϣⲗⲏⲗ ⲉϫⲙⲡⲁϩⲉ ⲛⲛⲁⲃⲟⲩϫⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ⲉϫⲙⲡⲁϩⲉ ⲛⲃⲁⲗⲧⲁⲥⲁⲣ ⲡⲉϥϣⲏⲣⲉ ϫⲉⲕⲁⲁⲥ ⲉⲣⲉⲛⲉⲩϩⲟⲟⲩ ⲁⲓⲁⲓ ϩⲓϫⲙⲡⲕⲁϩ ⲛⲧϩⲉ ⲛⲛⲉϩⲟⲟⲩ ⲛⲧⲡⲉ

12 ⲁⲩⲱ ϫⲉⲉⲣⲉⲡϫⲟⲉⲓⲥ ϯ ⲛⲁⲛ ⲛⲟⲩϭⲟⲙ ϩⲱⲱⲛ ⲁⲩⲱ ⲛϥⲣⲟⲩⲟⲉⲓⲛ ⲉⲛⲉⲛⲃⲁⲗ ⲛⲧⲛⲱⲛϩ ϩⲁⲧϩⲁⲓⲃⲉⲥ ⲛⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ϩⲁⲧϩⲁⲓⲃⲉⲥ ⲛⲃⲁⲗⲧⲁⲥⲁⲣ ⲡⲉϥϣⲏⲣⲉ ϫⲉⲕⲁⲥ ⲉⲛⲉⲣϩⲙϩⲁⲗ ⲛⲁⲩ ⲛⲟⲩⲙⲏⲏϣⲉ ⲛϩⲟⲟⲩ ϫⲉⲉⲛⲉϭⲓⲛⲉ ⲛⲟⲩⲭⲁⲣⲓⲥ ⲙⲡⲉⲩⲙⲧⲟ ⲉⲃⲟⲗ

13 ⲛⲧⲉⲧⲛϣⲗⲏⲗ ϩⲱⲱⲛ ⲉϫⲱⲛ ⲛⲛⲁϩⲣⲛⲡϫⲟⲉⲓⲥ ⲡⲉⲛⲛⲟⲩⲧⲉ ϫⲉⲁⲛⲣⲛⲟⲃⲉ ⲉⲡϫⲟⲉⲓⲥ ⲡⲉⲛⲛⲟⲩⲧⲉ ⲁⲩⲱ ⲙⲡⲉⲡϭⲱⲛⲧ ⲛⲧⲉϥⲟⲣⲅⲏ ⲥⲁϩⲱϥ ⲉⲃⲟⲗ ⲙⲙⲟⲛ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ

14 ⲛⲧⲉⲧⲛⲱϣ ⲙⲡⲉⲓϫⲱⲱⲙⲉ ⲡⲁⲓ ⲉⲛⲧⲁⲛⲧⲛⲛⲟⲟⲩϥ ϣⲁⲣⲱⲧⲛ ⲉⲟⲩⲟⲛϩϥ ⲉⲃⲟⲗ ϩⲙⲡⲏⲓ ⲙⲡϫⲟⲉⲓⲥ ϩⲛⲟⲩϩⲟⲟⲩ ⲙⲡϣⲁ ⲁⲩⲱ ϩⲣⲁⲓ ϩⲛⲛⲉϩⲟⲟⲩ ⲙⲡⲉⲟⲩⲟⲉⲓϣ

15 ⲉⲧⲉⲧⲛⲉϫⲟⲟⲥ ϫⲉⲡϫⲟⲉⲓⲥ ⲡⲉⲛⲛⲟⲩⲧⲉ ⲧⲇⲓⲕⲁⲓⲟⲥⲩⲛⲏ ϣⲟⲟⲡ ⲛⲁⲕ ⲡϣⲓⲡⲉ ⲇⲉ ⲙⲫⲟ ⲉϥϣⲟⲟⲡ ⲛⲁⲛ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲛⲣⲱⲙⲉ ⲛⲓⲟⲩⲇⲁ ⲙⲛⲛⲉⲧⲟⲩⲏϩ ϩⲛⲧϩⲓⲏⲙ

16 ⲁⲩⲱ ⲛⲉⲛⲉⲣⲱⲟⲩ ⲙⲛⲛⲉⲛⲁⲣⲭⲱⲛ ⲙⲛⲛⲉⲛⲟⲩⲏⲏⲃ ⲙⲛⲛⲉⲛⲡⲣⲟⲫⲏⲧⲏⲥ ⲙⲛⲛⲉⲛⲉⲓⲟⲧⲉ

17 ⲛⲉⲛⲧⲁⲩⲣⲛⲟⲃⲉ ⲙⲡⲉⲕⲙⲧⲟ ⲉⲃⲟⲗ ⲡϫⲟⲉⲓⲥ

18 ⲁⲩⲱ ⲁⲛⲣⲁⲧⲥⲱⲧⲙ ⲙⲡⲛⲥⲱⲧⲙ ⲛⲥⲁⲧⲉⲥⲙⲏ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲉⲧⲣⲉⲛⲃⲱⲕ ϩⲣⲁⲓ ϩⲛⲛⲉⲡⲣⲟⲥⲧⲁⲅⲙⲁ ⲙⲡϫⲟⲉⲓⲥ ⲛⲁⲓ ⲉⲛⲧⲁϥⲧⲁⲁⲩ ⲙⲡⲉⲛⲙⲧⲟ ⲉⲃⲟⲗ ⲉⲧⲣⲉⲛⲃⲱⲕ ϩⲣⲁⲓ ⲛϩⲏⲧⲟⲩ

19 ϫⲓⲛⲡⲉϩⲟⲟⲩ ⲉⲛⲧⲁⲡϫⲟⲉⲓⲥ ⲉⲓⲛⲉ ⲉⲃⲟⲗ ⲛⲛⲉⲛⲉⲓⲟⲧⲉ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲧⲛⲟ ⲛⲁⲧⲥⲱⲧⲙ ⲛⲛⲁϩⲣⲛⲡϫⲟⲉⲓⲥ ⲡⲉⲛⲛⲟⲩⲧⲉ ⲁⲩⲱ ⲁⲛⲧⲁⲛϩⲉⲧ ⲧⲉⲛⲙⲛⲧⲁⲧⲥⲱⲧⲙ ⲙⲡⲉⲛⲥⲱⲧⲙ ⲛⲥⲁⲧⲉϥⲥⲙⲏ

20 ϣⲁⲧⲉ ⲛⲉⲓⲡⲉⲧϩⲟⲟⲩ ⲙⲛⲛⲉⲓⲥⲁϩⲟⲩ ⲧⲟϭⲟⲩ ⲉⲣⲟⲛ ⲛⲁⲓ ⲉⲛⲧⲁⲡϫⲟⲉⲓⲥ ϫⲟⲟⲩ ⲉⲃⲟⲗ ϩⲓⲧⲟⲟⲧϥ ⲙⲙⲱⲩⲥⲏⲥ ⲡⲉϥϩⲙϩⲁⲗ ϩⲛⲛⲉϩⲟⲟⲩ ⲉⲛⲧⲁϥⲉⲓⲛⲉ ⲉⲃⲟⲗ ⲛⲛⲉⲛⲉⲓⲟⲧⲉ ϩⲙⲡⲕⲁϩ ⲛⲕⲏⲙⲉ ⲉϯ ⲛⲁⲛ ⲛⲟⲩⲕⲁϩ ⲉϥϣⲟⲩⲉ ⲉⲣⲱⲧⲉ ⲉⲃⲟⲗ ϩⲓⲉⲃⲓⲱ ⲛⲧϩⲉ ⲙⲡϩⲟⲟⲩ ⲛϩⲟⲟⲩ

21 ⲁⲩⲱ ⲙⲡⲛⲥⲱⲧⲙ ⲛⲥⲁⲧⲉⲥⲙⲏ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲕⲁⲧⲁⲛϣⲁϫⲉ ⲧⲏⲣⲟⲩ ⲛⲛⲉⲡⲣⲟⲫⲏⲧⲏⲥ ⲛⲁⲓ ⲉⲛⲧⲁϥⲧⲛⲛⲟⲟⲩⲥⲉ ϣⲁⲣⲟⲛ

22 ⲁⲩⲱ ⲁⲛⲃⲱⲕ ⲡⲟⲩⲁ ⲡⲟⲩⲁ ϩⲛⲛⲟⲩⲱϣ ⲙⲡⲉⲛϩⲏⲧ ⲉⲧϩⲟⲟⲩ ⲉⲧⲣⲉⲛⲉⲓⲣⲉ ⲛϩⲉⲛϩⲃⲏⲩⲉ ⲛϩⲉⲛⲛⲟⲩⲧⲉ ⲛϣⲙⲙⲟ ϫⲉⲉⲛⲉⲣⲡⲉⲧϩⲟⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ