Amos 3 — Coptic (Sahidic)

1 ⲥⲱⲧⲙ ⲉⲡⲉⲓϣⲁϫⲉ ⲉⲛⲧⲁⲡϫⲟⲉⲓⲥ ϫⲟⲟϥ ⲉϫⲛⲧⲏⲩⲧⲛ ⲡⲏⲓ ⲙⲡⲓⲥⲣⲁⲏⲗ ⲁⲩⲱ ⲉϫⲛⲡϩⲩⲗⲏ ⲛⲓⲙ ⲧⲁⲓ ⲛⲧⲁⲓⲛⲧⲥ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ⲉⲓϫⲱ ⲙⲙⲟⲥ ϫⲉ

2 ⲡⲗⲏⲛ ⲛⲧⲱⲧⲛ ⲁⲓⲥⲟⲩⲛⲧⲏⲩⲧⲛ ⲟⲩⲧⲱⲟⲩ ⲛⲛⲉⲫⲩⲗⲟⲟⲩⲉ ⲧⲏⲣⲟⲩ ⲙⲡⲕⲁϩ ⲉⲧⲃⲉⲡⲁⲓ ϯⲛⲁϭⲙⲡϣⲓⲛⲉ ⲛⲛⲉⲧⲛϫⲓⲛϭⲟⲛⲥ ⲉϫⲛⲧⲏⲩⲧⲛ

3 ⲙⲏ ⲟⲩⲛⲥⲛⲁⲩ ⲛⲁⲙⲟⲟϣⲉ ϩⲓⲟⲩⲥⲟⲡ ⲛⲥⲉⲧⲙⲥⲟⲩⲛⲛⲉⲩⲉⲣⲏⲩ ⲉⲡⲧⲏⲣϥ

4 ⲏ ⲉϥⲛⲁⲱϣ ⲉⲃⲟⲗ ⲛϭⲓⲟⲩⲙⲟⲩⲓ ⲉⲃⲟⲗ ϩⲙⲡⲉϥⲙⲁ ⲛϣⲏⲛ ⲉⲙⲛⲧϥⲡⲁϩⲥ ⲙⲙⲁⲩ ⲙⲏ ⲟⲩⲛⲟⲩⲙⲁⲥ ⲙⲙⲟⲩⲓ ⲛⲁϯ ⲙⲡⲉϥϩⲣⲟⲟⲩ ⲉⲡⲧⲏⲣϥ ⲉⲃⲟⲗ ϩⲙⲡⲉϥⲃⲏⲃ ⲛϥⲧⲙϭⲉⲡⲟⲩⲗⲁⲁⲩ

5 ⲙⲏ ⲟⲩⲛⲟⲩϩⲁⲗⲏⲧ ⲛⲁϩⲉ ⲉϫⲙⲡⲕⲁϩ ⲁϫⲙ ⲡⲉⲧϭⲟⲣϭ ⲉⲣⲟϥ ⲙⲏ ⲟⲩⲛⲟⲩⲡⲁϣ ⲛⲁⲟⲩⲱⲛ ϩⲓϫⲙⲡⲕⲁϩ ⲁϫⲛϭⲉⲡⲟⲩⲗⲁⲁⲩ

6 ⲙⲏ ⲟⲩⲛⲟⲩⲥⲁⲗⲡⲓⲅⲝ ⲛⲁⲱϣ ⲉⲃⲟⲗ ϩⲛⲟⲩⲡⲟⲗⲓⲥ ⲛⲧⲉⲧⲙⲡⲙⲏⲏϣⲉ ϣⲧⲟⲣⲧⲣ ⲙⲏ ⲟⲩⲛⲟⲩⲕⲁⲕⲓⲁ ⲛⲁϣⲱⲡⲉ ϩⲛⲟⲩⲡⲟⲗⲓⲥ ⲉⲙⲡⲉⲡϫⲟⲉⲓⲥ ⲧⲣⲉⲥϣⲱⲡⲉ

7 ⲉⲧⲃⲉϫⲉⲙⲡϫⲟⲉⲓⲥ ⲛⲁⲉⲓⲣⲉ ⲁⲛ ⲛⲟⲩϩⲱⲃ ⲛϥⲧⲙϭⲱⲗⲡ ⲉⲃⲟⲗ ⲛⲧⲉϥⲥⲃⲱ ⲉⲛⲉϥϩⲙϩⲁⲗ ⲛⲉⲡⲣⲟⲫⲏⲧⲏⲥ

8 ⲟⲩⲛⲟⲩⲙⲟⲩⲓ ⲛⲁⲱϣ ⲉⲃⲟⲗ ⲁⲩⲱ ⲛⲓⲙ ⲡⲉⲧⲉⲛϥⲛⲁⲣϩⲟⲧⲉ ⲁⲛ ⲡϫⲟⲉⲓⲥ ⲡⲛⲟⲩⲧⲉ ⲁϥϣⲁϫⲉ ⲁⲩⲱ ⲛⲓⲙ ⲡⲉⲧⲉⲛϥⲛⲁⲡⲣⲟⲫⲏⲧⲉⲩⲉ ⲁⲛ

9 ⲧⲁⲟⲩⲟⲟⲩ ⲉⲛⲉⲭⲱⲣⲁ ⲉⲧϩⲛⲛⲁⲥⲥⲩⲣⲉⲓⲟⲥ ⲁⲩⲱ ⲉⲛⲉⲭⲱⲣⲁ ⲛⲕⲏⲙⲉ ⲛⲧⲉⲧⲛϫⲟⲟⲥ ϫⲉⲥⲉϩⲧⲏⲩⲧⲛ ⲉϩⲟⲩⲛ ⲉⲡⲧⲟⲟⲩ ⲛⲧⲥⲁⲙⲁⲣⲓⲁ ⲛⲧⲉⲧⲛⲛⲁⲩ ⲉϩⲉⲛϣⲡⲏⲣⲉ ⲉⲛⲁϣⲱⲟⲩ ϩⲛⲧⲉⲥⲙⲏⲧⲉ ⲁⲩⲱ ⲧⲙⲛⲧⲣⲉϥϫⲓϫⲛⲁϩ ⲉⲧⲛϩⲏⲧⲥ ⲛⲉⲧⲟⲩϩⲓⲗⲁ ⲉⲣⲟⲟⲩ ⲥⲉϩⲛⲧⲉⲥⲙⲏⲧⲉ

10 ⲁⲩⲱ ⲛⲧⲟⲟⲩ ⲙⲡⲟⲩⲥⲟⲩⲛⲡⲥⲟⲟⲩⲛ ⲉⲁⲁϥ ⲡⲉϫⲉⲡϫⲟⲉⲓⲥ ⲛⲉⲧⲥⲱⲟⲩϩ ⲛⲁⲩ ⲉϩⲟⲩⲛ ⲛⲟⲩϫⲓⲛϭⲟⲛⲥ ⲙⲛⲟⲩⲧⲁⲗⲁⲓⲡⲱⲣⲓⲁ ϩⲛⲛⲉⲩⲭⲱⲣⲁ

11 ⲉⲧⲃⲉⲡⲁⲓ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲧⲩⲣⲟⲥ ⲛⲁⲣϫⲁⲓⲉ ϩⲙⲡⲕⲁϩ ⲉⲧϩⲙⲡⲉⲥⲕⲱⲧⲉ ⲁⲩⲱ ϥⲛⲁⲧⲁⲩⲟ ⲉⲡⲉⲥⲏⲧ ⲛⲧⲟⲩϭⲟⲙ ⲉⲃⲟⲗ ⲛϩⲏⲧⲉ ⲛⲥⲉⲧⲱⲣⲡ ⲛⲟⲩⲭⲱⲣⲁ

12 ⲉⲧⲃⲉⲡⲁⲓ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲙⲡⲉⲥⲙⲟⲧ ⲉϥϣⲁⲛⲧⲱⲕⲙ ⲛϭⲓⲡϣⲱⲥ ⲉⲃⲟⲗ ϩⲛⲧⲧⲁⲡⲣⲟ ⲙⲡⲙⲟⲩⲓ ⲛⲟⲩⲉⲣⲏⲧⲉ ⲥⲛⲧⲉ ⲏ ⲟⲩⲙⲉⲣⲟⲥ ⲙⲙⲁⲁϫⲉ ⲧⲁⲓ ⲧⲉ ⲧϩⲉ ⲉⲧⲟⲩⲛⲁⲧⲱⲕⲙ ⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲉⲧⲟⲩⲏϩ ϩⲛⲧⲥⲁⲙⲁⲣⲓⲁ ⲙⲡⲉⲙⲧⲟ ⲉⲃⲟⲗ ⲛⲟⲩⲫⲩⲗⲏ ϩⲛⲇⲁⲙⲁⲥⲕⲟⲥ ⲛⲟⲩⲏⲏⲃ

13 ⲥⲱⲧⲙ ⲛⲧⲉⲧⲛⲣⲙⲛⲧⲣⲉ ⲙⲡⲏⲓ ⲛⲓⲁⲕⲱⲃ ⲡⲉϫⲉⲡϫⲟⲉⲓⲥ ⲡⲛⲟⲩⲧⲉ ⲛⲛϭⲟⲙ

14 ⲉⲃⲟⲗ ϫⲉϩⲙⲡⲉϩⲟⲟⲩ ⲉϯⲛⲁϫⲓⲕⲃⲁ ⲛⲛⲉⲙⲛⲧϣⲁϥⲧⲉ ⲙⲡⲓⲥⲣⲁⲏⲗ ⲉϩⲣⲁⲓ ⲉϫⲱϥ ϯⲛⲁϫⲓⲕⲃⲁ ⲟⲛ ⲡⲉ ⲛⲛⲉⲑⲩⲥⲓⲁⲥⲧⲏⲣⲓⲟⲛ ⲛⲃⲁⲓⲑⲏⲗ ⲁⲩⲱ ⲛⲧⲁⲡ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲥⲉⲛⲁϣⲣϣⲱⲣⲟⲩ ⲛⲥⲉϩⲉ ⲉϫⲙⲡⲕⲁϩ

15 ⲁⲩⲱ ϯⲛⲁϣⲧⲟⲣⲧⲣ ⲙⲡⲏⲓ ⲉⲧϣⲟϫⲡ ⲛⲧⲁⲡⲁⲧⲁⲥⲥⲉⲓ ⲙⲙⲟϥ ⲉϫⲙⲡⲏⲓ ⲉⲧϫⲓⲕⲃⲟ ⲙⲡϣⲱⲙ ⲁⲩⲱ ⲥⲉⲛⲁⲧⲁⲕⲟ ⲛϭⲓⲛⲏⲓ ⲛⲉⲗⲉⲫⲁⲛⲧⲓⲛⲟⲛ ⲛⲧⲉϩⲉⲛⲕⲉⲏⲓ ⲉⲛⲁϣⲱⲟⲩ ⲟⲩⲱϩ ⲉⲣⲟⲟⲩ ⲡⲉϫⲉⲡϫⲟⲉⲓⲥ ⲡⲛⲟⲩⲧⲉ