Read 4 Maccabees 4 side by side with translations · The Final Bible
1 ܫܡܥܘܢ ܓܝܪ ܐܢܫ ܕܠܩܘܒܠܐ ܕܕܘܒܪ̈ܘܗܝ ܕܚܘܢܝܐ ܡܬܕܒܪ ܗܘܐ ܗ̇ܘ ܕܗܝ̇ܕܝܢ ܐܝܬ ܗܘܐ ܠܗ ܪܒܘܬ ܟܗܢܘܬܐ ܓܒܪܐ ܛ̇ܒܐ ܘܫܦܝܪܐ ܡܛܠ ܕܒܟܠ ܐܣܟܝܡ ܩܪ̈ܨܘܗܝ ܩܕܡ ܥܡܐ ܐܟ̣ܠ ܘܠܐ ܐܫܟܚ ܕܢܒܐܫ ܠܗ ܥ̣ܪܩ ܘܫ̇ܢܝ ܕܠܐܬܪܗ ܢܫܠܡ
2 ܘܥܠ ܗܕܐ ܐܬ̣ܐ ܠܘܬ ܐܦܘܠܘܢܝܣ ܕܒܣܘܪܝܐ ܘܒܦܘܢܝܩܐ ܘܒܩܝܠܝܩܝܐ ܫܘܠܛܢܐ ܐܚܝܕ ܗܘܐ
3 ܘܐܡ̣ܪ ܠܗ ܕܐܝܟ ܡ̇ܢ ܕܡܚܒ ܨܒ̈ܘܬܐ ܕܡ̇ܠܟܐ ܐܬܝ̇ܬ ܠܘܬܟ ܕܐܘܕܥܟ ܕܪ̈ܒܘܬܐ ܣܓ̈ܝܐܬܐ ܕܟܣܦܐ ܕܐܢܫܐ ܕܠܝܬ ܠܗܘܢ ܦܠܚܘܬܐ ܒܒܝܬ ܓܙܐ ܕܐܘܪܫܠܡ ܣܝ̣ܡܝܢ ܨܝܕ ܟܗ̈ܢܐ ܘܙܕ̈ܩܢ ܗ̣̈ܢܝܢ ܗܠܝܢ ܠܡܠܟܐ ܣܠܘܩܘܣ
4 ܐܦܘܠܘܢܝܘܣ ܕܝܢ ܟܕ ܫܡ̣ܥ ܗܠܝܢ̣ ܠܫܡܥܘܢ ܫܒ̇ܚ ܥܠ ܚܨܝܦܘܬܐ ܕܐܝܬ ܠܗ ܠܘܬ ܡܠܟܐ ܣ̣ܠܩ ܕܝܢ ܠܘܬ ܡ̇ܠܟܐ ܣܠܘܩܘܣ ܘܐܘܕܥܗ ܥܠ ܣܝܡ̣̈ܬܐ ܕܟܣܦܐ ܗܢܐ
5 ܘܢܣ̣ܒ̇ ܫܘܠܛܢܐ ܕܥܠܘܗܝ ܘܒܥܓܠ ܠܐܬܪܢ ܥܡ ܫܡܥܘܢ ܠܝܛܐ ܘܚܝܠܐ ܥܫܝܢܐ ܥܠ
6 ܘܐ̣ܡܪ ܗܘܐ ܕܐܝܟ ܡ̇ܢ ܕܠܦܘܩ̈ܕܢܘܗܝ ܕܡ̇ܠܟܐ ܡܫܬܡܥ ܐ̣ܬܐ ܕܟܣܦܐ ܕܕܩܘܛܢܐ ܐܝܬܘܗܝ ܡܢ ܒܝܬ ܓܙܐ ܢܣ̣ܒ
7 ܟܕ ܕܝܢ ܥܡܐ ܠܘܩܒܠ ܡ̈ܠܘܗܝ ܐܬܬܘܗ ܘܡܬܚܪܐ ܗܘܐ ܠܩܘܒܠܗ ܘܡܬܪܥܐ ܕܨܒܘܬܐ ܗܝ ܡܪܝܪܬܐ̇ ܐܢ ܗ̣ܘ ܕܐܢ ܡܢ ܓܘܥ̈ܠܢܝܗܘܢ ܗܠܝܢ ܕܐܬܬܟܠܘ ܥܠ ܒܝܬ ܓܙܐ ܕܩܘܕܫܐ ܡܬܛܠܡܝܢ
8 ܒܠܘܚܡܐ ܐܦܘܠܘܢܝܘܣ ܐ̇ܙܠ ܗܘܐ ܠܘܬ ܗܝܟܠܐ
9 ܣ̈ܒܐ ܕܝܢ ܥܡ ܢ̈ܫܐ ܘ̈ܛܠܝܐ ܡܢ ܐܠܗܐ ܒܥ̇ܝܢ ܗܘܘ ܕܢܓܢ ܐܝܕܗ ܥܠ ܕܘܟܬܐ ܩܕܝܫܬܐ ܕܡܬܫܝܛܐ
10 ܟܕ ܕܝܢ ܣܠ̣ܩ ܗܘܐ ܒܚܝܠܐ ܕܠܒ̈ܫܐ ܐܦܠܘܢܝܣ ܠܡܒܙ ܟܣܦܐ ܗ̇ܘ ܡܢ ܫܡܝܐ ܦܪ̈ܫܐ ܐܬܚܙܝܘ ܠܗ ܡܠܐ̈ܟܐ ܕܡܒܪܩܝܢ ܒܙܝܢܗܘܢ ܘܕܚܠܬܐ ܣܓܝܐܬܐ ܘܪܥܠܐ ܒܗ ܪܡ̇ܝܢ ܗܘܘ
11 ܗܟܢܐ ܕܐܦ ܢܦ̣ܠ ܐܦܘܠܘܢܝܘܣ ܥܠ ܐܪܥܐ ܕܗܝܟܠܐ ܘܩܪܝܒ ܗܘܐ ܠܡܡܬ ܘܬ̣ܠܐ ܐܝܕ̈ܘܗܝ ܠܫܡܝܐ ܘܒܕܡ̈ܥܐ ܣܓܝܐ̈ܬܐ ܡܢ ܥܒܪ̈ܝܐ ܡܬܟܫܦ ܗܘܐ ܕܢܨܠܘܢ ܥܠܘܗܝ ܘܢܪܥܘܢ ܠܚܝܠܘ̈ܬܐ ܕܡܢ ܫܡܝܐ ܥܠܘܗܝ ܐܬܘ
12 ܐܡ̇ܪ ܗܘܐ ܓܝܪ ܕܥܠ ܕܚܛ̣ܐ ܫ̇ܘܐ ܗܘܐ ܕܢܡܘܬ ܐܢܗ̣ܘ ܕܝܢ ܕܢܚܐ̣ ܠܟ̣ܠܗ̈ܘܢ ܒ̈ܢܝ ܐܢܫܐ ܢܬܢܐ ܛܘܒܗ ܕܗܝܟܠܐ
13 ܚܘܢܝܐ ܕܝܢ ܪܒ ܟܗ̈ܢܐ ܕܐܬܛܦܝܣ ܠܡ̈ܠܐ ܗܠܝܢ ܘܬܘܒ ܕܕ̇ܚܠ ܗܘܐ ܕܠܐ ܢܣܒܪ ܠܗ ܡ̇ܠܟܐ ܣܠܘܩܘܣ̇ ܕܡܢ ܢܟܠܐ ܐܢܫܝܐ ܘܠܐ ܗܘܐ ܡܢ ܕܝܢ̣ܐ ܐܠܗܝܐ̇ ܐܦܠܢܝܣ ܐܬܩܛܠ ܨ̇ܠܝ ܥܠܘܗܝ
14 ܘܗܟܢܐ ܚ̣ܝܐ ܬܗܝܪܐܝܬ ܘܫ̇ܢܝ ܠܡܚܘܝܘܬܗ ܠܡ̇ܠܟܐ ܗܠܝܢ ܕܓܕܫܝܗܝ
15 ܟܕ ܕܝܢ ܡ̣ܝܬ ܣܠܘܩܘܣ ܡ̇ܠܟܐ ܡܩ̇ܒܠ ܠܗ ܒܪܗ ܐܢܛܝܟܘܣ ܕܡܬܩܪܐ ܐܦܝܦܢܝܘܣ ܫܘܠܛܢܗ ܓܒܪܐ ܪܡ̇ܐ ܘܒܝܫܐ
16 ܗ̣ܘ ܗܢܐ ܫܪܝܗܝ ܠܚܘܢܝܐ ܡܢ ܪܒܘܬ ܟܗܢܘܬܐ ܘܐܩܝܡ ܠܐܝܣܘܢ ܐܚܘܗܝ ܪܒ ܟܗ̈ܢܐ ܒܬܢܘܝ
17 ܕܐܢ ܗ̣ܘ ܕܢܦܣ ܠܗ ܪܫܢܘܬܐ̣ ܢܬܠ ܠܗ ܡܕܐܬܐ ܟܠ ܫܢܬܐ ܕܐܝܬ̣ ܬܠܬܐ ܐ̈ܠܦܝܢ ܘܫܬܡܐܐ ܘܫܬܝܢ ܟ̇ܟܪ̈ܝܢ
18 ܐܦܣ ܠܗ ܕܝܢ ܕܢܗܘܐ ܪܒ ܟܗ̈ܢܐ ܘܐܫܠܛܗ ܕܢܕܒܪ ܠܥܡܐ
19 ܗ̣ܘ ܕܝܢ ܗܢܐ ܫܚܠܦ ܠܕܘܒܪ̈ܘܗܝ ܕܥܡܐ ܘܠܢܡܘ̈ܣܘܗܝ ܟܕ ܢ̇ܓܕ ܠܗ ܠܘܬ ܟܠ ܥܒܪ ܢܡܘ̈ܣܝܢ
20 ܐܝܟ ܕܠܐ ܗܘܐ ܒܪܫܐ ܕܟܘܠܗ ܐܬܪܢ ܓܘܡܢܣܝܢ ܐܬܩܢ ܐܠܐ ܐܦ ܢܒ̇ܛܠ ܐܟܝܦܘܬܐ ܕܥܠ ܗܝܟܠܐ
21 ܥܠ ܗܠܝܢ ܕܝܢ ܐܬܥܙܙ ܕܝܢ̣ܐ ܕܐܠܗܐ ܘܠܗ ܠܐܢܛܝܟܘܣ ܥܠܝܗܘܢ ܓ̇ܪܓ
22 ܡܛܠ ܓܝܪ ܕܡܩܪܒ ܗܘܐ ܒܐܓܘܦܛܘܣ ܥܡ ܦܛܠܡܐܘܣ ܘܫܡ̣ܥ ܕܛܒ̣ܐ ܐ̣ܙܠ ܕܡ̣ܝܬ ܠܗ ܘܒܗܕܐ ܚܕܘܬܐ ܪܒܬܐ ܗܘܬ ܠܥܡܘܪ̈ܝܗ̇ ܕܐܘܪܫܠ̣ܡ ܒܥܓܠ ܡܪ̈ܟܒܬܗ ܥܬܕ ܥܠܝܗܘܢ
23 ܘܡܢ ܕܒܙ ܐܢܘܢ ܦܣܩܐ ܦܣܩ ܕܐܢ ܗ̣ܘ ܕܐܢܫ ܡܢܗܘܢ ܡܬܚܙܐ ܕܒܢܡܘ̈ܣܐ ܕܐܒܗ̈ܘܗܝ ܢܬܕܒܪ ܢܡܘܬ
24 ܘܟܕ ܠܐ ܐܫܟܚ ܕܒܚܕ ܡܢ ܐܣ̈ܟܡܝܢ ܒܦܣܩ̈ܘܗܝ ܠܡܣܬܪ ܢܡܘ̈ܣܘܗܝ ܕܥܡܐ ܟܠܗܘܢ ܕܝܢ ܠܘܚ̈ܡܘܗܝ ܘܫܢ̈ܕܘܗܝ ܚ̇ܙܐ ܗܘܐ ܕܡܫܬܪܝܢ
25 ܐܝܟ ܕܐܦ ܢ̈ܫܐ ܕܓܙܪ̈ܢ ܗ̈ܘܝ ܝܠܘ̈ܕܐ ܥܡ ܫܒܪ̈ܝܗܝܢ ܡܢ ܕܘܟܝܬܐ ܪ̈ܡܬܐ ܡܫܬܕܝܢ ܟܕ ܡܢ ܩܕܝܡ ܝܕ̈ܥܢ ܗ̈ܘܝ ܕܗܟܢܐ ܓ̇ܕ̣ܫ ܗܘܐ ܠܗܝܢ
26 ܗ̣ܘ ܒܝܕ ܫ̈ܢܕܐ ܠܟܠܢܫ ܡܢ ܥܡܐ ܥ̇ܨܐ ܗܘܐ ܕܟܕ ܐܟ̇ܠܝܢ ܗܘܘ ܡܐܟܘܠܬܐ ܡܣܝܒܬܐ ܢܟܦܪܘܢ ܒܝܗܘܕܝܘܬܐ܀܀