4 Maccabees 5 — Aramaic (Peshitta)

1 ܟܕ ܝ̣ܬܒ ܗܟܝܠ ܛܪܘܢܐ ܐܢܛܝܟܘܣ ܥܡ ܪ̈ܘܪܒܢܘܗܝ ܒܕܘܟܬܐ ܪܡܬܐ ܘܟܕ ܚܝܠܘ̈ܬܗ ܚܕܝܪܝܢ ܗܘܘ ܠܗ ܡܟܐ ܘܡܟܐ ܟܕ ܙܝܢܗܘܢ ܠܒܝ̣ܫܝܢ ܗܘܘ ܦܩ̣ܕ ܠܐܚ̈ܝܕܝ ܪ̈ܘܡܚܐ ܕܠܟܠ ܚܕ ܚܕ ܡܢ ܥܒܪ̈ܝܐ ܢܝܬܘܢ ܘܢܥܨܘܢ ܕܒܣܪܐ ܕܚܙܝܪܐ ܘܕܕܒܝܚܐ ܢܐܟܠܘܢ

3 ܐܢ ܕܝܢ ܐܢ̈ܫܝܢ ܠܐ ܢܨܒܘܢ ܠܡܐܟܠ ܡܐܟܘܠܬܐ ܛܡܐܬܐ̣ ܗ̣ܢܘܢ ܒܡܣܡ ܒܪܝܫܐ ܕܪ̈ܓܝܓܬܐ ܢܡܘܬܘܢ

4 ܟܕ ܕܝܢ ܣܓܝܐ̈ܐ ܗܟܢܐ ܡܬܚܛܦܝܢ ܗܘܘ̣ ܚܕ ܩܕܡܝܬ ܡܢ ܓܙܪܐ ܥܒܪܝܐ ܕܫܡܗ ܗܘܐ ܐܠܝܥܙܪ ܡܢ ܓܢܣܐ ܕܟܗ̈ܢܐ ܣܦܪ ܢܡܘܣܐ ܕܩܫܝܫ ܗܘܐ ܒܝܘܡ̈ܬܗ ܘܡܛܠ ܣܝܒܘܬܗ ܐܦ ܠܣ̈ܓܝܐ̇ܐ ܡܢ ܩܪ̈ܝܒܘܗܝ ܕܛܪܘܢܐ ܝܕܝܥ ܗܘܐ ܠܗ ܠܗܢܐ ܗܟܝܠ ܐܝܬܝܘܗܝ ܩܕܡܘܗܝ ܕܛܪܘܢܐ

5 ܟܕ ܕܝܢ ܚܙܝܗܝ ܛܪܘܢܐ ܐܢܛܝܟܘܣ ܐܡ̣ܪ

6 ܐܘ ܣܒܐ ܥܕ ܠܐ ܐܫ̇ܪܐ ܒܫܢ̈ܕܐ ܕܥܠܝܟ̣ ܡ̇ܠܟ ܐܢܐ ܠܟ ܗܠܝܢ ܕܬܐܟܘܠ ܕܚܙܝܪܐ ܘܬܚܐ ܡܬܟܚܕ ܐܢܐ ܓܝܪ ܡܢ ܫ̈ܢܝܟ ܘܡܢ ܚܘܪ̈ܬܟ ܗܠܝܢ ܡܢ ܒܬܪ ܓܝܪ ܗܢܐ ܟܘܠܗ ܙܒܢܐ ܠܐ ܡܬܚܙܐ ܐܢܬ ܠܝ ܕܚܟܝܡܐܝܬ ܣܥܪ ܐܢܬ ܕܒܕܚܠܬܐ ܕܝܗܘܕ̈ܝܐ ܡܬܕܒܪ ܐܢܬ

7 ܥܠ ܡܢܐ ܓܝܪ ܟܕ ܟܝܢܐ ܝܗ̣ܒ ܡܐܟܘܠܬܐ ܡܝܬܪܬܐ ܕܒܣܪܐ ܕܚܝܘܬ̣ܐ̣ ܗܕܐ̇ ܐܢܬ ܢܐ̇ܕ ܐܢܬ ܡܢܗ̇ ܘܡܣܠܐ ܐܢܬ ܠܗ̇

8 ܐܦ ܓܝܪ ܣܟܠܐ ܗܝ ܕܠܐ ܐܢܫ ܢܬܒܣܡ ܒܗܢܝ̈ܝܬܐ ܕܚܣܕܐ ܠܝܬ ܒܗܝܢ ܘܪܘܫܥܐ ܗܘ ܕܐܢܫ ܢܗܦܟ ܡܕܡ ܕܟܝܢܐ ܡܩܪܒ ܘܝܗ̇ܒ

9 ܐܢܬ ܕܝܢ ܐܦ ܕܣܟܠܐ ܡܢ ܗܕܐ ܡܬܚܙܐ ܐܢܬ ܐܢܗ̣ܘ ܕܟܕ ܡܬܚܫܚ ܐܢܬ ܒܪܚܡܬ ܫܘܒܚܐ ܕܡܛܠ ܫܪܪܐ

10 ܐܦ ܥܠܝ ܬܒܣܪ ܘܠܡܣܡ ܒܪܫܐ ܬܫܘܛ ܠܐ ܡܬܬܥܝܪ ܐܢܬ ܡܢ ܫܛܘܪܘܬܗ ܕܝܘܠܦܢܐ ܗܢܐ

11 ܘܢ̇ܦܨ ܐܢܬ ܡܢܟ ܚܘܫܒܐ ܗܢܐ ܦܟܝܗܐ ܘܢܣ̇ܒ ܐܢܬ ܡܚܫܒܬܐ ܕܫ̇ܘܝܐ ܠܫܢ̈ܝܟ ܘܠܣܝܒܘܬܟ ܘܝ̇ܠܦ ܐܢܬ ܫܪܪܐ ܕܗܠܝܢ ܕܦܩ̈ܚܢ

12 ܘܣܓ̇ܕ ܐܢܬ ܠܢܝܚܐ ܕܡܪܚܡܢܘܬܝ ܘܚܐ̇ܣ ܐܢܬ ܥܠ ܣܝܒܘܬܟ

13 ܐܦ ܓܝܪ ܡܬܒܥܐ ܠܟ ܕܬܬܚܫܒ ܕܐܦܢ ܐܝܬ ܡܕܡ ܕܥܠ ܕܚܠܬܟܘܢ ܒܛܝܠ ܠܗ̣ ܫܒ̇ܩ ܗܘ ܠܟ ܟܠ ܥܒܪ ܢܡ̈ܘܣܝܢ ܕܡܢ ܩܛܝܪ ܣܥ̇ܪ ܐܢܬ

14 ܟܕ ܕܝܢ ܒܗܢܐ ܐܣܟܡܐ ܡܓܪܓ ܗܘܐ ܠܗ ܛܪܘܢܐ ܕܢܐܟܘܠ ܒܣܪܐ ܕܒܢܡܘܣܐ ܠܐ ܡܦܣ ܗܘܐ̣ ܫܐ̣ܠ ܐܠܝܥܙܪ ܕܢܦܣ ܠܗ ܠܡܡܠܠܘ

15 ܟܕ ܕܝܢ ܢܣܒ ܫܘܠܛܢܐ ܕܢܡܠܠ ܫ̇ܪܝ ܕܢܐܡܪ ܩܕܡ ܟܘܠܗ ܟܢܫܐ̣ ܗܟܢܐ

16 ܚܢܢ ܐܘ ܐܢܛܝܟܐ̣ ܒܕܡܦܣܝܢ ܚܢܢ ܕܢܡܘܣܐܝܬ ܢܬܕܒܪ̣ ܐܦ ܠܐ ܚܕ ܡܢ ܩܛܝܪܝܢ ܕܡܢ ܗܢܐ ܩܫ̣ܝ̇ܢ ܡܢ ܡܬܛܦܝܣܢܘܬܐ ܕܠܢܡܘܣܐ

17 ܘܡܛܠ ܗܕܐ̣ ܘܠܐ ܒܚܕ ܡܢ ܐܣܟܝܡ ܕܢܥܒܪܝܗ̇ ܡܬܪܡܝܢ ܚܢܢ

18 ܘܗܐ ܐܦܢ ܠܐ ܐܝܬܘܗܝ ܗܘܐ ܫܪܝܪܐܝܬ ܐܠܗܝܐ ܢܡܘܣܢ̇ ܐܝܟ ܡܐ ܕܐܢܬ ܫܪܝܪܐܝܬ ܣ̇ܒܪ ܐܢܬ ܣܒ̇ܪܝܢ ܗ̈ܘܝܢ ܕܝܢ ܐܦ ܗܟܢܐ ܕܐܝܬܘܗܝ ܐܠܗܐ ܐܦ ܠܐ ܗܟܢܐ ܡܦܣ ܗܘܐ ܠܢ ܕܠܡܣܒܪܢܘܬܐ ܕܕܚܠܬ ܐܠܗܐ ܢܒ̇ܛܠ

19 ܠܐ ܗܟܝܠ ܬܣܒܪ ܕܚܛܗܐ ܗܘ ܙܥܘܪܐ ܐܢܗ̣ܘ ܕܡܐܟܘܠܬܐ ܡܣܝܒܬܐ ܢܐܟܘܠ

20 ܒܙܥܘܪ̈ܝܬܐ ܓܝܪ ܐܘ ܒܪ̈ܘܪܒܬܐ ܕܐܢܫ ܢܥܒܪ ܥܠ ܢܡܘܣܐ ܚܕ ܚܝܠܐ ܩܢ̣ܝܐ

21 ܒܝܕ ܬܪܬܝܗܝܢ ܓܝܪ ܫܘܝܐܝܬ ܫܘܥܠܝܐ ܥܠ ܢܡ̣ܘܣܐ ܗ̇ܘܐ

22 ܡܒܙܚ ܐܢܬ ܕܝܢ ܒܝܘܠܦܢܢ ܐܝܟ ܗ̇ܘ ܕܠܘ ܒܪܥܝܢܐ ܬܩܢܐ ܒܗ ܡܬܕܒܪܝܢܢ

23 ܟܢܝܟܘܬܐ ܡܠܦ ܕܠܟܘܠܗܝܢ ܪ̈ܓܝܓܬܐ ܘܚܫ̈ܐ ܢܙܟ̣ܐ ܘܢܬܕܪܫ ܒܓܢܒܪܘܬܐ ܕܒܨܒܝܢܢ ܟܘܠ ܐܘ̈ܠܨܢܝܢ ܢܣܝ̇ܒܪ

24 ܡܠܦ ܕܝܢ ܙܕܝܩܘܬܐ ܗ̇ܝ ܕܒܟܝܢܢ ܕܒܟܠܗܘܢ ܙܢ̇ܝܢ ܗ̇ܘܝܢ ܫܠܡ̇ܝܢ ܚܢܢ ܠܢܡܘܣܐ ܡܠܦ ܕܝܢ ܐܦ ܕܚܠܬ ܐܠܗܐ ܫܪܝܪܐܝܬ ܕܠܗ̇ܘ ܕܗ̣ܘܝܘ ܒܠܚܘܕܘܗܝ ܐܠܗܐ ܢܣܓܘܕ ܙܗܝܐܝܬ

25 ܘܥܠ ܗܕܐ ܡܕܡ ܕܡܣܝܒ ܠܐ ܐ̇ܟܠܝܢ ܚܢܢ ܡܛܠ ܓܝܪ ܕܡܗܝܡܢܝܢܢ ܕܢܡܘܣܐ ܕܐܠܗܐ ܗܘ ܡܦܣܝܢܢ ܕܐܝܟ ܡܚܝܠܘܬܗ ܕ̣ܟܝܢܢ ܡܬܢܚܬ ܘܡܦܩܕ ܥܒܘܕܗ ܕܥܠܡܐ

26 ܗܠܝܢ ܗܟܝܠ ܕܠܐ ܐܝܬܝܗܝܢ ܣܩܘܒܠܐ ܠܢܦܫ̈ܬܢ ܐܦܣ ܠܢ ܠܡܐܟܠ ܡܢ ܗܠܝܢ ܕܝܢ ܕܐܝܬܝܗܝܢ ܣܩܘܒܠܐ ܟ̇ܠܐ ܠܢ ܕܡܢ ܒܣܪܗܝܢ ܠܐ ܢܐܟܘܠ

27 ܕܫܘܥܠܝܐ ܗܟܝܠ ܐܝܬܝܗ̇ ܠܐ ܗܘܐ ܒܠܚܘܕ ܕܬܥܨܐ ܠܢ ܠܡܥܒܪ ܥܠ ܢܡܘܣܐ̣ ܐܠܐ ܐܦ ܕܢܐܟܘܠ ܕܒܝܕ ܡܐܟܘܠܬܐ ܗܕܐ ܕܡܢ ܟܠܗܝܢ ܡܣܝܒܐ ܥܠܝܢ ܬܓܚܟ

28 ܐܠܐ ܠܐ ܓܚ̇ܟ ܐܢܬ ܥܠܝ

29 ܠܐ ܩܝܡܗܘܢ ܚܣܝܐ ܘܡܘܡ̈ܬܗܘܢ ܗܝ̣ ܕܐܒ̈ܗܝ̇ܢ ܠܡܛܪ ܢܡܘܣܐ ܝܡܘ

30 ܐܦ ܠܐ ܐܢ ܥ̈ܝܢܝ ܬܥܨܐ ܘܬܦܫܪ ܒܡܐ̈ܢܝ ܓܘܝ

31 ܠܐ ܗܘܐ ܗܟܢܐ ܣܐܒ ܐܢܐ̇ ܘܡܢ ܓܢܒܪܘܬܐ ܡܢܟܪܝ ܐܢܐ̇ ܕܡܛܘܠ ܕܚܠܬ ܐܠܗܐ ܠܐ ܐܟܪܘܒ ܘܐܥܠܡ ܚܘܫ̈ܒܝ

32 ܥܠ ܐ̈ܦܝ ܗܠܝܢ ܗܟܝܠ ܓܝ̈ܓܠܐ ܥܬܕ ܘܢܘܪܐ ܥܙܝܙܐܝܬ ܓܘܙܠ

33 ܠܐ ܗܘܐ ܗܟܢܐ ܚܐ̇ܣ ܐܢܐ ܥܠ ܣܝܒܘܬܝ̇ ܕܡܛܠ ܢܦܫܝ ܢܡܘܣܐ ܕܐܒ̈ܗܝ ܐܫܪܐ

34 ܠܐ ܡܕܓܠ ܐܢܐ ܒܟ ܢܡܘܣܐ ܪܕܘܝ ܘܠܐ ܟ̇ܦܪ ܐܢܐ ܒܟܝ ܐܘ ܢܟܦܘܬܐ ܚܒܝܒܬܝ

35 ܘܠܐ ܡܒܗܬ ܐܢܐ ܠܟ ܡܐܡܪܐ ܕܡܠܦ ܫܒܝܚܘܬܐ ܘܠܐ ܟܦ̇ܪ ܐܢܐ ܒܟܝ ܟܗܢܘܬܐ ܝܩܝܪܬܐ ܘܝܘܠܦܢܐ ܢܡܘܣܝܐ

36 ܘܠܐ ܡܣܝܒܐ ܣܝܒܘܬܝ ܣܦܘ̈ܬܝ ܘܠܐ ܡܛܡܐ ܐܢܐ ܫ̈ܢܝ̇ ܕܒܗܝܢ ܢܡܘܣܐܝܬ ܩ̇ܫܬ

37 ܟܕ ܕܟ̣ܐ ܐܢܐ ܐܒܗ̈ܝ ܡܩܒܠܝܢ ܠܝ̣ ܕܠܐ ܐܣܬܪܕܬ ܡܢ ܩܛܝܪ̈ܝܟ ܕܥܕܡܐ ܠܡܘܬܐ ܡܡܛܝܢ

38 ܒܕܡܪܫܥ ܐܢܬ ܕܝܢ ܡܬܚܫܚ ܐܢܬ ܒܩܛܝܪܐ ܥܠ ܚܘܫ̈ܒܝ ܕܝܢ ܕܥܠ ܐ̈ܦܝ ܕܚܠܬ ܐܠܗܐ̣ ܠܐ ܒܐܝ̈ܕܝܟ ܡܫܬܠܛ ܐܢܬ ܘܠܐ ܒܝܕ ܥܒ̈ܕܐ