Read 4 Maccabees 15 side by side with translations · The Final Bible
1 ܐܘ ܠܪܥܝܢܐ ܛܪܘܢܐ ܕܥܠ ܚܫ̈ܐ ܕܒ̈ܢܝܐ ܐܘ ܫܪܪܐ ܕܐܬܪܚ̣ܡܬ ܥܠ ܐܡܐ ܡܢ ܒܢ̈ܝܐ
2 ܐܡܐ ܟܕ ܣ̣ܝ̈ܡܢ ܗ̈ܘܝ ܩܕܡ ܥܝ̈ܢܝܗ̇ ܬܪ̈ܬܝܢ ܪܚܡܬ ܫܢ̈ܕܐ ܘܚ̈ܝܐ ܕܡ̣ܠܐ ܙܒܢܐ ܕܫܒܥܐ ܒܢ̈ܝܗ̇ ܐܝܟ ܫܘܘܕܝܗ ܕܛܪܘܢܐ
3 ܓܒܬ ܠܗ̇ ܪܚ̇ܡܬ ܫܪܪܐ ܕܡܚܐ ܚ̈ܝܐ ܕܠܐܠܡ ܒܐܠܗܐ
4 ܐܘ ܐܝܟ̇ܢܐ ܐܫ̇ܬܥܐ ܥܠ ܙܢ̈ܝܐ ܕܚܫ̈ܐ ܕܪܚܡܬ ܒܢ̈ܝܐ ܕܡܘܬܐ ܓܝܪ ܕܦܪܨܘܦܐ ܒܐ̈ܦܐ ܙܥܘܪ̈ܝܬܐ ܕ̈ܛܠܝܐ ܬܡܝܗܐܝܬ ܡܬܛܒܥܐ ܘܥܠ ܗܕܐ ܡܛܠ ܚ̈ܫܐ ܡܬܪܦܝܐ ܠܘܬ ܪ̈ܚܡ̣ܐ
5 ܟܡܐ ܓܝܪ ܕܡܚ̈ܝܠܢ ܢܦܫ̈ܬܗܝܢ ܘܣܓܝܐ̈ܝܢ ܝܠܕܝ̈ܗܝܢ ܕܐܡ̈ܗܬܐ̣ ܗܟܢܐ ܝܬܝ̇ܪܐܝܬ ܠܒܢܝ̈ܗܝܢ ܪܚ̇ܡܢ
6 ܡܢ ܟܠܗܝܢ ܕܝܢ ܐܡ̈ܗܬܐ ܐܡܗܘܢ ܕܫܒܥܐ ܠܒܢ̈ܝܗ̇ ܪܚܡ̇ܐ ܗܘܬ ܗ̇ܝ ܕܒܫܒܥܐ ܒܛܢ̈ܝܢ ܚܘܒܐ ܕܥܠܝܗܘܢ ܒܗ̇ ܐܬܢܨܒ
7 ܘܡܛܘܠ ܚܒ̣̈ܠܐ ܕܟܠܚܕ ܚܕ ܡܢܗܘܢ ܡܬܥܨܝܐ ܗܘܬ ܕܪܚܡܬܐ̇ ܠܘܬܗܘܢ ܬܗܘܐ ܠܗ̇
8 ܘܡܛܠ ܕܚܠܬ ܐܠܗܐ ܫܛܬ ܚ̈ܝܐ ܕܙܒܢܐ ܕܒܢ̈ܝܗ̇
9 ܗܢܘ ܕܝܢ ܐܦ ܡܛܘܠ ܝܐܝܘܬܗܘܢ ܘܡܛܦܝܣܢܘܬܗܘܢ ܕܠܢܡܘܣܐ ܪܚܡܬܐ ܝܬܝܪܐܝܬ ܠܘܬܗܘܢ ܩܢ̣ܝܐ ܗܘܬ
10 ܙܕܝܩܝܢ ܗܘܘ ܓܝܪ ܘܢܟܦܝܢ ܘܓܢܒܪܝܢ ܘܠܒܝܒܝܢ ܘܠܚܕ̈ܕܐ ܪܚ̇ܡܝܢ ܗܘܘ ܘܠܐܡܗܘܢ ܡܚܒܝܢ ܗܘܘ ܘܗܟܢܐ ܡܚܒܝܢ ܗܘܘ ܐܝܟ ܕܥܕܡܐ ܠܡܘܬܐ ܟܕ ܢ̇ܛܪܝܢ ܗܘܘ ܢܡܘܣܐ ܢܬܛܦܝܣܘܢ ܠܗ̇
11 ܐܠܐ ܘܟܕ ܛܒ ܗܠܝܢ ܟܠܗܝܢ ܗܟܢܐ ܐܝܬܝܗܝܢ ܗܘ̈ܝ ܕܡܛܠ ܪܚܡܬ ܒܢ̈ܝܐ̣ ܢ̈ܓܕܢ ܗ̈ܘܝ ܠܗ̇ ܠܐܡܐ ܠܪ̈ܚܡܐ ܘܠܐ ܒܚܕ ܡܢܗܘܢ ܠܪܥܝܢܗ̇ ܫܢ̈ܕܐ ܡܫܚ̈ܠܦܐ ܐܫܟܚܘ ܕܢܫܚܠܦܘܢ
12 ܐܠܐ ܐܦ ܠܚܕ ܚܕ ܡܢܗܘܢ ܒܝܢܘܗܝ ܘܠܗ ܘܠܟܘܠܗܘܢ ܬܘܒ ܐܟܚܕܐ ܠܡܘܬܐ ܕܥܠ ܐ̈ܦܝ ܫܪܪܐ ܡܓܪܓܐ ܗܘܬ
13 ܐܘ ܪܥܝܢܐ ܙܗܝܐ ܘܪܚܡܬܐ ܕܗܠܝܢ ܐܒܗ̈ܐ ܘܝܠܕܐ ܘܬܪܒܝܬܐ ܕܡ̣ܠܝܐ ܚܘܒܐ ܘܪ̈ܚ̣ܡܐ ܕܐܡܐ ܕܠܐ ܡܬܪܟܟܝܢ
14 ܟܕ ܚܙܝܐ ܠܟܠ ܚܕ ܚܕ ܡܢܗܘܢ ܕܪܡܐ ܗܘܐ ܒܫ̈ܢܕܐ ܘܝ̇ܩܕ ܠܐ ܡܫܬܚܠܦܐ ܗܘܬ ܡܛܠ ܫܪܪܐ
15 ܒܣܪܐ ܕܒܢ̈ܝܗ̇ ܚ̇ܙܝܐ ܕܥܠ ܢܘܪܐ ܫܐ̇ܚ ܗܘܐ ܘܨܒ̈ܥܬܐ ܕܐܝ̈ܕܝܐ ܘܕܪ̈ܓܠܐ ܕܥܠ ܐܪܥܐ ܡܬܥ̈ܘܩܕܢ ܗ̈ܘܝ ܘܡܫܟܐ ܕܪ̈ܫܝܗܘܢ ܕܥܕܡܐ ܠܒܣܪܐ ܕܕܩܢܐ ܢܫܝܛ ܗܘܐ ܘܐܝܟ ܐ̈ܦܐ ܢܘܟܪ̈ܝܬܐ ܥܠ ܪܝܫܐ ܡܠܒܫ
16 ܐܘ ܠܚ̈ܫܐ ܡܪܝܪ̈ܐ ܕܐܡܐ ܠܗܘܢ ܗܫܐ ܥܠܝܠܐ ܗܘܬ ܛܒ ܡܢ ܕܟܕ ܒܚܒ̈ܠܝܗܘܢ ܪܡܝܐ ܗܘܬ
17 ܐܘ ܐܢܬܬܐ ܕܒܠܚܘܕܝܟܝ ܒܕܚܠܬ ܐܠܗܐ ܡܫܡܠܝܐ ܗܘܝܬܝ
18 ܠܐ ܫܚܠܦܟܝ ܒܘܟܪܐ ܟܕ ܢܦܫܗ ܡܢܗ ܣ̇ܠܩܐ ܗܘܬ ܘܠܐ ܕܒܬܪܗ ܕܚܘܪܐ ܪܥܘܡܐ ܡܢ ܓܘ ܫܢ̈ܕܐ ܒܟܝ ܚܐ̇ܪ ܗܘܐ ܘܠܐ ܕܬܠܬܐ ܟܕ ܛ̇ܠܩ ܡܢ ܚ̈ܝܐ
19 ܐܢܬ ܕܝܢ ܟܕ ܚ̇ܝܪܐ ܗ̣ܘܝܬܝ ܒܥܝܢܐ ܕܟܠ ܚܕ ܚܕ ܡܢܗܝܢ ܕܚܘܪܗܝܢ ܡܢ ܐܘܠܨܢܐ ܗܦܝܟ ܗܘܐ ܘܒܢܚܝܪܝܗܝܢ ܕܩܕ̇ܡ̇ܝܢ ܡܘܕܥܝܢ ܥܠ ܡܘܬܐ ܠܐ ܒܟ̣ܝܬܝ
20 ܘܕܚܙܝܐ ܗ̣ܘܝܬ ܕܥܠ ܒܣܪܐ ܩܕܡܝܐ ܕܒܢ̈ܝܟܝ ܒܣܪܐ ܐܚܪܢܐ ܕܒܢ̈ܝܟܝ ܡܬܦܣܩ ܗܘܐ ܘܡܢ ܒܬܪ ܐܝ̈ܕܝܐ ܬܘܒ ܐܝ̈ܕܝܐ ܕܡ̈ܬܦܣܩܢ ܘܡܢ ܒܬܪ ܩܪ̈ܩܦܬܐ ܩܪ̈ܩܦܬܐ ܕܡ̈ܬܢܫܛܢ ܘܥܠ ܡܝ̈ܬܐ ܬܘܒ ܕܢ̇ܦܠܝܢ ܡܝ̈ܬܐ ܘܟܕ ܚ̇ܙܝܐ ܗ̣ܘܝܬܝ ܕܐܝܟ ܥܠܥܠܐ ܦܠܚ̈ܘܗܝ ܕܛܪܘܢܐ ܒܒܢܝ̈ܟܝ ܢܦ̇ܠܝܢ ܗܘܘ ܠܐ ܕܡܥܬܝ
21 ܠܐ ܗܟܢܐ ܢܥܡܬܐ ܕܣܝܪܝܢܘܣ ܘܩܠܐ ܕܩܘ̈ܩܢܘ ܠܪܚܡܬ ܫܡܥܐ ܠܗܠܝܢ ܕܨܝ̇ܬܝܢ ܢܬ̇ܦܝܢ ܐܝܟ ܩܠܐ ܕ̈ܒܢܝܐ ܕܡܢ ܫܢ̈ܕܐ ܩ̇ܪܝܢ ܗܘܘ
22 ܐܝܠܝܢ ܘܟܡܐ ܗ̣ܝ ܕܝܢ ܐܡܐ ܟܕ ܒܢ̈ܝܗ̇ ܡܬܐܠܨܝܢ ܗܘܘ ܘܒܓܝ̈ܓܠܐ ܘܒܟܘ̈ܝܐ ܡܫܬܢܩܝܢ ܗܘܘ̣
23 ܫܢ̈ܕܐ ܣ̇ܒܠܐ ܗܘܬ ܐܠܐ ܠܪ̈ܚܡܝܗ̇ ܪܥܝܢܐ ܕܕܚܠܬ ܐܠܗܐ ܒܓܘ ܚܫ̈ܐ ܓܒܪ ܘܚܝܠ ܕܪܚܡܬܐ ܥ̇ܒܘܪܬܐ ܕܒܢ̈ܝܐ ܬܫܘܛ
24 ܟܕ ܛܒ ܐܒܕܢܐ ܕܫܒܥܐ ܒ̈ܢܝܐ ܚ̇ܙܝܐ ܗܘܬ ܘܫܘܚ̈ܠܦܐ ܡܦ̈ܬܟܐ ܕܫܢ̈ܕܝܗܘܢ ܘܥܩܪܬܗ ܐܡܐ ܢܨܝܚܬܐ ܘܫܕܬܗ ܡܛܠ ܗܝܡܢܘܬܐ ܕܒܐܠܗܐ
25 ܐܝܟ ܗ̇ܘ ܓܝܪ ܕܒܒܝܬ ܟܢܘܫܝܐ ܕܡ̇ܠܘ̈ܟܐ ܚ̇ܙܝܐ ܗܘܬ ܡܠܘ̈ܟܐ ܣܢ̈ܝܐ ܕܝܠܗ̇ ܕܢܦܫܐ ܕܐܝܬܝܗܘܢ ܟܝܢܐ ܘܝܠܕܐ ܘܪܚܡܬ ܒܢ̈ܝܐ ܘܫ̈ܢܕܐ ܕܒ̈ܢܝܐ
26 ܘܬܪܝܢ ܕܝ̈ܢ̣ܝܢ ܐܡܐ ܕܢܬܝ ܕܡܘܬܐ ܘܕܚ̈ܝܐ
27 ܘܚܠܦ ܒܢ̈ܝܗ̇ ܠܗ̇ܘ ܕܡܚܐ ܫܒܥܐ ܒܢܝ̈ܗ̇ ܒܡ̣ܠܐ ܙܒܢܐ ܠܐ ܓܒܬ
28 ܐܠܐ ܒܪܬ ܐܒܪܗܡ ܠܚܘܡܣܢܗ̇ ܕܒܐܠܗܐ ܡܬܕܟܪܐ ܗܘܬ
29 ܐܘ ܐܡܐ ܕܥܡܐ ܘܬܒܥܬ ܨܥܪܗ ܕܢܡܘܣܐ ܘܡܬܟܬܫܬ ܥܠ ܐ̈ܦܝ ܫܪܪܐ ܕܡܢ ܐܓܘܢܐ ܕܪ̈ܚܡܝܟܝ ܫܩܠܬܝ ܙܟܘܬܐ
30 ܐܘ ܕܡܢ ܕܟܪ̈ܐ ܒܡܚܡܣܢܢܘܬܐ ܓܢܒܪܬܝ
31 ܐܟܙܢܐ ܓܝܪ ܕܕܟܘܝܠܗ ܕܢܘܚ ܒܛܘܦܢܐ ܕܠܟܠܗ ܥܠܡܐ ܚ̇ܒܠ ܒܓܘܗ̇ ܠܒ̣ܪܝܬܐ ܡܢܛܪܐ ܗܘܬ ܘܡܬܪܣܝܐ ܘܚܝܠܬܢܐܝܬ ܡܡܘܠܐ ܩܒܠܬܝ̣
32 ܗܟܢܐ ܐܦ ܐܢܬܝ ܢܛܘܪܬܗ ܕܢܡܘܣܐ ܡܢ ܟܠ ܕܘܟ ܒܡܡܘܠ ܚ̈ܫܐ ܡܬܢܓܕܐ ܗ̣ܘܝܬܝ ܘܪ̈ܘܚܐ ܥܙܝ̈ܙܬܐ ܫ̈ܢܕܝܗܘܢ ܕܒ̈ܢܝܟܝ̇ ܡܟܐ ܘܡܟܐ ܒܟܝ ܢܫ̈ܒܢ ܗܘ̈ܝ ܚܠܝܨܐܝܬ ܣܝܒܪܬܝ ܒܡܚܫ̈ܘܠܐ ܕܥܠ ܐ̈ܦܝ ܫܪܪܐ
4 Maccabees 14 · 4 Maccabees 16 · Greek (Septuagint / SBLGNT)