Read 4 Maccabees 16 side by side with translations · The Final Bible
1 ܐܢܗ̣ܘ ܗܟܝܠ ܕܐܢܬܬܐ ܣܒܬܐ ܘܐܡܐ ܕܫܒܥܐ ܛܠܝ̈ܝܢ ܣܝܒܪܬ ܟܕ ܚ̇ܙܝܐ ܫܢܕ̈ܐ ܕܒ̈ܢܝܗ̇ ܕܥܕܡܐ ܠܡܘܬܐ̣ ܓܠܝܐ ܗܝ ܕܡܫܠܛ ܗܘ ܥܠ ܚ̈ܫܐ ܪܥܝܢܐ ܕܡ̣ܠܐ ܕܚܠܬ ܐܠܗܐ܀
2 ܚܘܝܬ ܗܟܝܠ ܕܠܐ ܗܘܐ ܒܠܚܘܕ ܓܒܪ̈ܐ ܙܟܘ ܠܚ̈ܫܐ̣ ܐܠܐ ܐܦ ܐܢܬܬܐ ܐܒܣܪܬ ܥܠ ܫ̈ܢܕܐ ܪ̈ܘܪܒܐ
3 ܘܠܐ ܗܟܢܐ ܐܪ̈ܝܘܬܗ ܕܕܢܝܐܝܠ ܒܥܪܝܪܝܢ ܗܘܘ ܘܠܐ ܐܬܘܢܗ ܕܡܝܫܐܝܠ ܥܙܝܙ ܗܘܐ̇ ܟܕ ܡܫܬܠܗܒ ܗܘܐ ܒܢܘܪܐ ܬܟܝܒܬܐ ܐܝܟ ܕܡܘܩܕ ܗܘܐ ܠܗ̇ܝ ܟܝܢܐ ܕܪܚܡܬܐ ܕܒ̈ܢܝܐ ܟܕ ܚ̇ܙܝܐ ܗܘܬ ܕܗܟܢܐ ܡܫܚܠܦܐܝܬ ܫܒܥܐ ܒܢ̈ܝܗ̇ ܡܬܩܛܠܝܢ ܗܘܘ
4 ܐܠܐ ܒܪܥܝܢܐ ܕܕܚܠܬ ܐܠܗܐ ܕܥܟܬ ܐܡܐ ܗܠܝܢ ܘܕܐܝܟ ܗܠܝܢ ܚ̈ܫܐ
5 ܐܬܪܥܘ ܓܝܪ ܐܦ ܗܕܐ ܕܐܠܘ ܐܢܬܬܐ ܗܘܬ ܕܫܦܠܐ ܗܘܬ ܒܢܦܫܗ̣ ܝ̇ܬܝܪܐܝܬ ܕܐܦ ܐܡܐ ܐܝܬܝܗ̇ ܗܘܬ ܡܬܐܒܠܐ ܗܘܬ ܥܠܝܗܘܢ ܘܕܡ̇ܝܐ ܕܗܠܝܢ ܐܡܪܐ ܗܘܬ
6 ܐܘ ܚܠܫܬܐ ܐܢܐ ܘܕܣܓܝ ܕܘܝܐ ܫܒܥܐ ܒ̈ܢܝܢ ܝ̇ܠܕܬ ܘܕܚܕ ܡܢܗܘܢ ܐܡܐ ܠܐ ܗܘܝ̇ܬ
7 ܐܘ ܒ̈ܛܢܐ ܫܒܥܐ ܕܗܘܘ ܣܪ̈ܝܩܐ ܘܡܘܠܕܐ ܕܝܪ̈ܚܐ ܥܣܪܐ ܥܣܪܐ ܕܕܠܐ ܝܘܬܪܢ ܘܕܠܐ ܦܐܪ̈ܝܢ ܗܘܘ ܘܬܪܒܝܬܐ ܕܟܝܬܐ ܕܚ̣ܠܒܐ
8 ܣܪܝܩܐܝܬ ܥܠܝܟܘܢ ܐܘ ܛ̈ܠܝܐ ܚܒ̈ܠܐ ܣܓ̈ܝܐܐ ܣ̇ܒܠܬ ܘܨܦܬܐ ܩܫܝܬܐ ܕܬܪܒܝܬܟܘܢ
9 ܕܡܢܟܘܢ ܠܐ ܐܙܕܘܓܘ ܕܐܙܕܘܓܘ ܕܝܢ ܕܠܐ ܝܘܬܪܢ ܠܐ ܚ̇ܙܝܐ ܐܢܐ ܒܢܝ̈ܟܘܢ ܘܠܐ ܟܕ ܡܬܩܪܝܐ ܐܢܐ ܐܡܐ ܕܒ̈ܢܝܐ ܝܗ̇ܒܝܢ ܠܝ ܛܘ̣ܒܐ
10 ܐܘ ܣܓܝܐܬ ܒܢ̈ܝܐ ܘܫܦܝܪܬ ܒ̈ܢܝܐ ܐܠܐ ܐܢܬܬܐ ܐܪܡܠܬܐ ܕܝܠܝ ܒܠܚܘܕܝ ܣܓܝܘ ܐܒ̈ܠܝ
11 ܘܐܦ ܠܐ ܐܢ ܐܡܘܬ ܐܝܬ ܠܝ ܕܚܕ ܡܢ ܒܢ̈ܝ ܢܩܒܪܘܢܢܝ ܐܠܐ ܒܗܠܝܢ ܐܘ̈ܠܝܬܐ̣ ܘܠܐ ܠܚܕ ܡܢܗܘܢ ܐܠܬ ܐܡܐ ܛܘܒܬܢܝܬܐ ܘܕܚܠܬ ܡܢ ܐܠܗܐ
12 ܘܠܐ ܕܕܠܐ ܢܡܘܬܘܢ ܡܥܘܟܐ ܗܘܬ ܠܗܘܢ ܘܠܐ ܟܕ ܡܝܬܝܢ ܐܬܬܥܝܩܬ
13 ܐܠܐ ܐܝܟ ܗ̇ܘ ܪܥܝܢܐ ܕܐܕܡܘܣ ܐܝܬ ܗܘܐ ܠܗ̇ ܘܠܠܐ ܡܝܘܬܘܬܐ ܡܢܕܪܝܫ ܠܡܢܝܢܐ ܕܒ̈ܢܝܗ̇ ܡܚܒܠܐ ܗܘܬ ܠܡܐܠܕ ܝܬܝܪܐܝܬ ܥܠ ܡܘܬܐ ܕܥܠ ܐ̈ܦܝ ܫܪܪܐ ܡܚܦܛܐ ܗܘܬ ܠܗܘܢ̇ ܟܕ ܒ̇ܥܝܐ ܡܢܗܘܢ ܘܡܬܟܫܦܐ
14 ܐܘ ܐܡܐ ܕܡܛܠ ܫܪܪܐ ܒܣܝܒܘܬܐ ܐܦܠܚܬ ܘܐܢܬܬܐ ܣܒܬܐ ܕܒܝܕ ܚܘܡܣܢܟܝ ܠܛܪܘܢܐ ܙܟ̣ܝܬܝ ܘܒ̇ܥ̈ܒܕܐ ܘܒܡ̈ܠܐ ܐܫܬܟܚܬܝ ܕܡܢ ܓܒܪ̈ܐ ܚܝܠܬܢܝܐ ܐܢܬܝ
15 ܐܦ ܓܝܪ ܟܕ ܐܬܬܚܕܬܝ ܥܡ ܒܢܝ̈ܟܝ̣ ܩܝܡܐ ܗ̣ܘܝܬܝ ܘܡܬܒܩܝܐ ܗ̣ܘܝܬܝ ܒܐܠܝܥܙܪ ܟܕ ܡܫܬܢܕܝܢ ܒܗ ܘܐܡ̇ܪܐ ܗ̣ܘܝܬܝ ܠܒܢܝ̈ܟܝ ܒܠܫܢܐ ܥܒܪܝܐ
16 ܐܘ ܒ̈ܢܝܐ̣ ܓܢܒܪ ܗܘ ܐܓܘܢܐ ܕܠܗ ܡܛܠ ܣܗܕܘܬܐ ܕܥܡܢ ܐܬܩܪܝܢ ܕܒܪܥܝܢܐ ܚܦܝܛܐ ܢܬܟܬܫ ܘܚܠܦ ܢܡܘܣܐ ܕܐܒܗ̈ܝܢ
17 ܐܦ ܓܝܪ ܕܚܣܕܐ ܗܝ ܕܣܒܐ ܗܢܐ ܢܣܝܒܪ ܚܫ̈ܐ ܕܡܛܠ ܕܚܠܬ ܐܠܗܐ ܘܐܢܬܘܢ ܕܥܠܝܡܝܢ ܐܢܬܘܢ ܬܟܘܙܘܢ ܡܢ ܫܪܪܐ
18 ܐܬܕܟܪܘ ܕܡܛܠ ܐܠܗܐ ܐܬܝܬܘܢ ܠܒܪܝܬܐ ܘܗܘܝܬܘܢ ܒܚ̈ܝܐ ܗܠܝܢ
19 ܘܥܠ ܗܕܐ ܚܝ̇ܒܝܢ ܐܢܬܘܢ ܕܟܠ ܥܡ̈ܠܝܢ ܬܣܝܒܪܘܢ ܡܛܠ ܐܠܗܐ
20 ܕܡܛܠܬܗ ܐܦ ܐܒܪܗܡ ܐܒܘܢ ܐܣܬܪܗܒ ܕܠܐܒܐ ܕܥܡܢ ܐܝܣܚܩ ܒܪܗ ܢܟܘܣ ܗ̣ܘ ܓܝܪ ܐܝܣܚܩ ܟܕ ܚ̣ܙܐ ܗܘܐ ܠܐܝܕܐ ܕܐܒܘܗܝ ܕܐܚܝܕܐ ܣ̇ܟܝܢܐ ܘܢܚ̇ܬܐ ܥܠܘܗܝ̣ ܠܐ ܙܥ
21 ܘܕܢܝܐܝܠ ܙܕܝܩܐ ܠܐܪ̈ܝܘܬܐ ܢܦ̣ܠ ܘܚܢܢܝܐ ܘܥܙܪܝܐ ܘܡܝܫܐܝܠ ܒܓܘ ܐܬܘܢܐ ܐܝܟ ܕܒܩܠܥܐ ܐܫܬܕܝܘ ܘܣܝܒܪܘ ܡܛܠ ܐܠܗܐ
22 ܐܢܬܘܢ ܗܟܝܠ ܕܗܝ ܟܕ ܗ̣ܝ ܗܝܡܢܘܬܐ ܕܗܠܝܢ ܠܘܬ ܐܠܗܐ ܐܝܬ ܠܟܘܢ ܠܐ ܬܬܪܥܡܘܢ
23 ܣܟܠܐ ܗܝ ܓܝܪ ܕܟܕ ܝܕ̇ܥܝܢ ܐܢܬܘܢ ܕܚܠܬ ܐܠܗܐ ܡܢܐ ܗܝ̣ ܠܐ ܬܥܙܘܢ ܩܕܡ ܫܢܕ̈ܐ
24 ܒܝܕ ܗܠܝܢ ܡ̈ܠܐ ܐܡܗܘܢ ܕܫܒܥܐ ܡܢ ܟܠ ܚܕ ܚܕ ܡܢ ܒ̈ܢܝܗ̇ ܡܬܟܫܦܐ ܗܘܬ ܕܢܡܘܬܘܢ ܐܘ ܕܢܥܒܪܘܢ ܥܠ ܦܘܩܕܢܗ ܕܐܠܗܐ
25 ܘ̇ܠܐ ܠܟܘܢ ܕܝܢ ܠܡܕܥ ܕܕܡܝܬܘ ܡܛܠ ܐܠܗܐ̣ ܚܐܝܢ ܐܢܘܢ ܠܐܠܗܐ ܐܝܟ ܡܐ ܕܐܦ ܐܒܪܗܡ ܘܐܝܣܚܩ ܘܝܥܩܘܒ ܘܟܠܗܘܢ ܐܒܗ̈ܬܐ
4 Maccabees 15 · 4 Maccabees 17 · Greek (Septuagint / SBLGNT)