Read 3 Maccabees 5 side by side with translations · The Final Bible
1 ܗܝܕܝܢ ܩܪܐ ܡܠܟܐ ܠܗܪܡܘܢ ܗܘ ܕܥܒܝܕ ܗܘܐ ܪܝܫܐ ܘܡܕܒܪܢܐ ܕܦ̈ܝܠܐ ܘܦܩܕܗ ܕܣܓܝ ܢܐܨܦ ܕܦܝ̈ܠܐ ܕܡܫܝܚܢ ܗܘܐ ܘܡܠܐ ܚܡܬܐ ܘܪܘܓܙܐ ܕܠܐ ܡܬܬܚܝܕܝܢ
2 ܘܐܡܪ ܠܗ ܕܠܡܚܪ ܐܣܓܐ ܐܫܩܐ ܠܒܘܢܬܐ ܘܚܡܪܐ ܚܝܐ ܠܦ̈ܝܠܐ ܟܠܗܘܢ ܕܗܘܝܢ ܗܘܘ ܒܡܢܝܢܐ ܐܝܟ ܚܡܫ ܡܐܐ ܘܫܝܚܢ ܐܢܘܢ ܒܫܩܝܐ ܣܓܝܐܐ ܕܪܘܝܘܬܐ ܕܢܥܠ ܘܢܪܡܐ ܐܢܘܢ ܥܠ ܝܘ̈ܕܝܐ ܕܢܚܒܠܘܢ ܘܢܘܒܕܘܢ ܐܢܘܢ
3 ܘܟܕ ܦܩܕ ܕܝܢ ܗܢܝܢ ܗܠܝܢ ܐܬܦܢܝ ܠܗ ܠܒܘܣܡܐ ܘܩܪܐ ܠܪ̈ܚܡܘܗܝ ܘܠܪ̈ܘܪܒܢܘܗܝ ܗܢܘܢ ܕܝܬܝܪܐܝܬ ܣܢܝܢ ܗܘܘ ܠܝܘ̈ܕܝܐ
4 ܡܕܒܪܢܗܘܢ ܕܝܢ ܕܦܝ̈ܠܐ ܕܫܡܗ ܗܘܐ ܐܪܗܪܘܛ ܡܕܡ ܕܐܬܦܩܕ ܗܘܐ ܠܗܪܡܘܢ ܥܒܕ
5 ܡܫܡ̈ܫܢܝܗܘܢ ܕܝܢ ܕܗܠܝܢ ܒܟܠ ܪܡܫܐ ܢܦܩܝܢ ܗܘܘ ܘܡܦܟܪܝܢ ܐܝ̈ܕܝܗܘܢ ܕܒܝܫ̈ܐ ܘܕܡܣܟ̈ܢܐ ܘܡܙܕܗܪܝܢ ܗܘܘ ܘܢܛܪܝܢ ܠܗܘܢ ܒܟܠ ܙܘܗܪ ܘܣܒܪܝܢ ܗܘܘ ܘܡܣܟܝܢ ܕܠܨܦܪܐ ܢܗܘܐ ܫܘܠܡܐ ܕܐܒܕܢܐ ܕܟܠܗܘܢ
6 ܝܘ̈ܕܝܐ ܕܝܢ ܗܢܘܢ ܕܡܣܬܒܪܝܢ ܗܘܘ ܠܗܘܢ ܠܥܡܡ̈ܐ ܕܠܐ ܐܝܬ ܠܗܘܢ ܥܘܕܪܢܐ ܐܦܠܐ ܩܠܝܠ ܡܢ ܕܘܟܐ ܡܛܠ ܐܣܘܪ̈ܝܗܘܢ ܘܐܘܠܨ̈ܢܝܗܘܢ ܡܪܝܪ̈ܐ
7 ܓܥܝܢ ܗܘܘ ܘܒܥܝܢ ܘܡܨܠܝܢ ܕܠܐ ܫܠܝܘ ܩܕܡ ܐܠܗܐ ܐܚܝܕ ܟܠ ܘܡܪܝܐ ܕܟܠ ܚܝ̈ܠܐ ܘܐܠܗܐ ܡܪܚܡܢܐ ܘܐܒܐ ܒܚ̈ܢܓܬܐ ܘܒܕܡ̈ܥܐ ܣܓܝ̈ܐܬܐ
8 ܕܢܦܪܘܩ ܐܢܘܢ ܡܢ ܬܪܥܝܬܐ ܘܡܚܫܒܬܐ ܒܝܫܬܐ ܕܡܬܚܫܒܝܢ ܗܘܘ ܥܠܝܗܘܢ ܘܢܚܘܐ ܒܗܘܢ ܦܘܪܩܢܗ ܓܠܝܐܝܬ ܘܢܦܨܐ ܐܢܘܢ ܡܢ ܡܘܬܐ ܡܪܝܪܐ ܕܡܛܝܒ ܠܗܘܢ
9 ܕܗܠܝܢ ܕܝܢ ܒܥܘܬܗܘܢ ܐܡܝܢܐܝܬ ܣܠܩܐ ܗܘܬ
10 ܘܗܪܡܘܢ ܕܝܢ ܠܦ̈ܝܠܐ ܕܠܐ ܪ̈ܚܡܐ ܐܫܩܝ ܘܐܪܘܝ ܐܢܘܢ ܒܚܡܪܐ ܕܡܚܠܛ ܥܡ ܠܒܘܢܬܐ ܘܠܨܦܪܗ ܕܝܘܡܐ ܐܬܐ ܠܕܪܬܗ ܕܡܠܟܐ ܕܢܘܕܥܝܘܗܝ ܗܝ ܗܕܐ
11 ܡܪܚܡܢܐ ܕܝܢ ܘܡܠܟ ܡܠܟ̈ܐ ܐܪܡܝ ܫܢܬܐ ܥܠ ܡܠܟܐ
12 ܘܕܡܟ ܒܫܢܬܐ ܝܩܝܪܬܐ ܡܢ ܪܡܫܐ ܘܥܕܡܐ ܠܬܫܥ ܫ̈ܥܝܢ ܒܡܥܒܕܢܘܬܐ ܕܗܘ ܕܫܠܝܛ ܥܠ ܟܠ ܘܡܢ ܥܕܢܐ ܕܣܝܡ ܗܘܐ ܠܗ ܕܢܘܒܕ ܐܢܘܢ ܣܓܝ ܐܫܬܘܚܪ ܘܐܬܒܛܠ ܪܥܝܢܐ ܪܡܐ ܘܫܒܗܪܢܐ
13 ܝܘ̈ܕܝܐ ܕܝܢ ܟܕ ܚܙܘ ܕܦܠܛܘ ܡܢ ܫܥܬܐ ܗܝ ܕܣܝܡܐ ܗܘܬ ܠܗܘܢ ܐܘܕܝܘ ܘܫܒܚܘ ܠܐܠܗܗܘܢ ܩܕܝܫܐ ܘܬܘܒ ܒܥܝܢ ܗܘܘ ܘܡܬܟܫܦܝܢ ܡܢ ܡܪܚܡܢܐ ܕܢܬܪܥܐ ܠܗܘܢ ܡܠܝܐܝܬ ܘܢܚܘܐ ܘܢܘܕܥ ܚܝܠܐ ܘܥܘܕܪܢܗ ܕܕܪܥܗ ܒܥ̈ܡܡܐ ܪ̈ܡܐ ܘܫܒܗܪ̈ܢܐ
14 ܟܕ ܓܝܪ ܩܪ̈ܝܒܢ ܕܢܗ̈ܘܝܢ ܥܣܪ̈ ܫ̈ܥܝܢ ܘܚܙܐ ܪܒܝܬܗ ܕܟܠܗܘܢ ܐܝܠܝܢ ܕܩܪܝܢ ܠܗ ܠܡܠܟܐ ܐܬܘ ܠܫܪܘܬܐ ܩܪܒ ܘܕܩܪܗ ܠܡܠܟܐ ܒܣܛܪܗ
15 ܘܠܡܚܣܢ ܐܬܬܥܝܪ ܘܐܘܕܥܗ ܕܥܕܢܐ ܗܘ ܕܫܪܘܬܐ ܗܘܐ ܘܐܡܪ ܠܗ ܥܠ ܟܠܡܕܡ ܕܗܘ ܡܠܟܐ ܐܬܚܫܒ ܗܘܐ ܕܢܥܒܕ
16 ܗܘ ܕܝܢ ܟܕ ܫܡܥ ܗܘܐ ܐܙܠ ܠܡܫܬܝܐ ܘܦܩܕ ܕܟܠܗܘܢ ܐܝܠܝܢ ܕܐܬܘ ܠܫܪܘܬܗܘܢ ܢܣܬܡܟܘܢ ܠܩܘܒܠܗ
17 ܘܗܘ ܡܓܪܓ ܗܘܐ ܠܗܘܢ ܠܒܘܣܡܐ ܘܟܕ ܗܘܐ ܪܡܫܐ ܘܣܓܝ ܡܓܪܝܢ ܗܘܘ ܒܡܫܬܝܐ
18 ܘܒܡܡܠܠܐ ܣܓܝܐܐ ܩܪܝܗܝ ܡܠܟܐ ܠܗܪܡܘܢ ܒܚܡܬܐ ܩܫܝܬܐ ܘܡܫܐܠ ܗܘܐ ܠܗ ܕܒܐܝܕܐ ܥܠܬܐ ܦܠܛܘ ܝܘ̈ܕܝܐ ܡܢ ܝܘܡܐ ܕܣܝܡ ܗܘܐ ܠܗܘܢ ܕܢܐܒܕܘܢ ܒܗ
19 ܘܗܘ ܥܢܐ ܘܐܡܪ ܠܗ ܕܟܠܡܕܡ ܕܦܩܕܬ ܛܝܒܬ ܘܥܬܕܬ ܡܢ ܠܠܝܐ ܐܦ ܪ̈ܚܡܘܗܝ ܣܗܕܘ ܘܐܡܪܘ ܕܗܟܢܐ ܥܒܕ
20 ܘܗܘ ܕܝܢ ܟܕ ܫܡܥ ܠܐ ܐܬܡܟܟ ܡܢ ܪܥܝܢܗ ܪܡܐ ܘܫܒܗܪܢܐ ܐܠܐ ܐܡܪܚ ܘܐܡܪ ܠܗܘܢ ܛܝܒܘܬܐ ܕܝܘܡܢܐ ܠܫܢܬܐ ܢܐܚܕܘܢ ܠܡܚܪ ܕܝܢ ܕܠܐ ܟܠܝܢܐ ܟܠܡܕܡ ܕܐܬܦܩܕܬ ܥܬܕ ܘܛܝܒ ܦܝ̈ܠܐ ܠܐܒܕܢܗܘܢ ܘܠܚܘܒܠܗܘܢ ܕܝܘ̈ܕܝܐ
21 ܘܟܕ ܗܠܝܢ ܦܩܕ ܡܠܟܐ ܟܠܗܘܢ ܪ̈ܘܪܒܢܘܗܝ ܚܕܝܐܝܬ ܐܙܠܘ ܠܒ̈ܬܝܗܘܢ
22 ܘܠܐ ܐܬܬ ܠܗܘܢ ܫܢܬܐ ܡܢ ܨܦܬܐ ܘܪܢܝܐ ܕܡܨܛܢܥܝܢ ܗܘܘ ܕܐܝܟܢܐ ܢܘܒܕܘܢ ܘܢܚܒܠܘܢ ܐܢܘܢ ܠܝܘ̈ܕܝܐ
23 ܟܕ ܩܪܐ ܬܪܢܘܓܠܐ ܘܩܪܝܒ ܕܢܢܗܪ ܙܝܢ ܗܪܡܘܢ ܠܦ̈ܝܠܐ ܘܐܬܐ ܩܕܡ ܕܪܬܗ ܕܡܠܟܐ
24 ܡܕܝܢܬܐ ܕܝܢ ܟܠܗ ܡܬܟܢܫܐ ܗܘܬ ܥܠ ܚܙܬܐ ܕܥܘܠܐ ܕܡܛܝܒܐ ܗܘܬ ܕܬܓܕܫ ܠܝܘ̈ܕܝܐ ܠܨܦܪܗ ܕܝܘܡܐ
25 ܝܘ̈ܕܝܐ ܕܝܢ ܟܕ ܚܙܘ ܕܩܪܒܬ ܫܥܬܐ ܕܣܝܡܐ ܕܢܐܒܕܘܢ ܒܗ ܒܟܝܢ ܗܘܘ ܒܕܡ̈ܥܐ ܣܓܝ̈ܐܬܐ ܘܦܪ̈ܝܣܢ ܗܘܝ ܐܝܕܝ̈ܗܘܢ ܠܫܡܝܐ ܘܓܥܝܢ ܗܘܘ ܘܒܥܝܢ ܡܢ ܐܠܗܐ ܪܒܐ ܘܚܝܠܬܢܐ ܕܥܓܠ ܘܡܣܪܗܒܐܝܬ ܢܥܕܪ ܐܢܘܢ
26 ܡܠܟܐ ܕܝܢ ܩܡ ܩܕܡ ܕܠܐ ܢܣܩ ܫܡܫܐ ܘܡܣܟܐ ܗܘܐ ܠܪ̈ܚܡܘܗܝ ܘܩܪܒ ܗܪܡܘܢ ܘܐܥܒܪ ܩܕܡܘܗܝ ܟܠܗܘܢ ܦܝ̈ܠܐ ܟܕ ܡܚܙܩܝܢ ܘܡܙܝܢܝܢ ܐܝܟ ܦܘܩܕܢܗ ܕܡܠܟܐ
27 ܗܘ ܕܝܢ ܟܕ ܚܙܐ ܬܡܗ ܘܐܬܕܡܪ ܥܠ ܥܘܬܕܗ ܕܥܘܠܐ ܗܘ ܕܒܟܠܡܕܡ ܥܘܝܪ ܗܘܐ ܒܡܚܫܒܬܗ ܘܡܫܐܠ ܗܘܐ ܠܗܘܢ ܕܐܢ ܟܠܡܕܡ ܕܦܩܕܬ ܗܘܐ ܒܒܛܝܠܘܬܐ
28 ܗܕܐ ܕܝܢ ܐܝܬܝܗ ܗܘܬ ܡܕܒܪܢܘܬܐ ܕܐܠܗܐ ܕܐܪܡܝ ܗܘܐ ܛܥܝܘܬܐ ܒܠܒܗ ܥܠ ܡܕܡ ܕܝܢ ܕܩܕܝܡ ܡܬܚܫܒ ܗܘܐ ܠܗ
29 ܩܪܒ ܕܝܢ ܗܪܡܘܢ ܘܟܠܗܘܢ ܪ̈ܚܡܘܗܝ ܘܐܡܪܘ ܠܡܠܟܐ ܟܠܡܕܡ ܕܦܩܕܬ ܡܥܬܕ ܘܡܛܝܒ ܐܦ ܦܝ̈ܠܐ ܐܦ ܚ̈ܝܠܐ
30 ܗܘ ܕܝܢ ܟܕ ܫܡܥ ܡܢܗܘܢ ܗܠܝܢ ܐܬܡܠܝ ܒܪܘܓܙܐ ܣܓܝܐܐ ܕܨܒܘ ܪ̈ܚܡܘܗܝ ܕܐܠܗܐ ܘܒܛܠ ܠܟܠܗ ܡܚܫܒܬܗ ܘܚܪ ܒܗܪܡܘܢ ܩܫܝܐܝܬ ܘܨܥܪܗ ܒܡ̈ܠܐ ܩܫ̈ܝܬܐ ܘܐܡܪ ܠܗ
31 ܐܠܘ ܗܘܘ ܐܢܫܝ̈ܟ ܘܒܢܝ̈ ܫܪܒܬܟ ܗܟܢܐ ܕܠܐ ܪ̈ܚܡܐ ܡܫܩܐ ܗܘܝܬ ܘܡܪܘܐ ܦܝ̈ܠܐ ܐܝܟ ܕܥܠ ܝܘ̈ܕܝܐ ܪ̈ܚܡܝ ܘܚܒ̈ܝܒܝ ܘܒܟܠ ܡܕܡ ܡܗܝܡ̈ܢܐ
32 ܘܐܠܘ ܠܐ ܡܪܚܡܢܘܬܢ ܣܓܝܐܬܐ ܕܠܘܬ ܟܠܢܫ ܚܝ̈ܝܟ ܚܠܦܝܗܘܢ ܡܘܒܕ ܗܘܝܬ
33 ܘܗܟܢܐ ܕܚܠ ܗܪܡܘܢ ܕܚܠܬܐ ܪܒܬܐ ܕܠܐ ܪܚܝܩ ܗܘܐ ܡܢ ܡܘܬܐ ܐܠܐ ܐܢ ܩܠܝܠ ܘܐܫܬܚܠܦ ܓܘܢܗ ܘܐܬܡܟܟ ܡܢ ܪܥܝܢܗ ܪܡܐ
34 ܘܐܦ ܪ̈ܚܡܘܗܝ ܟܕ ܚܙܘ ܢܓܕܘ ܢܦܫܗܘܢ ܠܒܣܬܪܗܘܢ ܒܕܚܠܬܐ ܪܒܬܐ ܘܫܪܘ ܠܥܡܐ ܕܐܝܬ ܗܘܐ ܥܡܗܘܢ ܐܢܫ ܐܢܫ ܠܐܬܪܗ ܘܠܥܒܕܗ
35 ܝܘ̈ܕܝܐ ܕܝܢ ܟܕ ܫܡܥܘ ܥܠ ܡܠܘ̈ܗܝ ܕܡܠܟܐ ܡܫܒܚܝܢ ܗܘܘ ܘܡܘܕܝܢ ܠܡܪܝܐ ܐܠܗܐ ܡܠܟ ܡܠܟ̈ܐ ܕܐܬܦܢܝ ܥܠܝܗܘܢ ܘܗܘܐ ܠܗܘܢ ܡܥܕܪܢܐ
36 ܘܟܕ ܦܛܪ ܡܠܟܐ ܡܢ ܗܠܝܢ ܐܙܠ ܠܫܪܘܬܐ ܗܘ ܘܟܠܗܘܢ ܪ̈ܚܡܘܗܝ
37 ܘܩܪܝܗܝ ܠܗܪܡܘܢ ܘܐܡܪ ܠܗ ܒܚܡܬܐ ܟܡܐ ܐܢܫ ܢܗܘܐ ܦܩܕ ܠܟ ܥܠܝܗܝܢ ܥܠ ܗܠܝܢ ܕܘܝܐ
38 ܙܠ ܥܬܕ ܘܛܝܒ ܦ̈ܝܠܐ ܠܡܚܪ ܠܐܒܕܢܗܘܢ ܘܚܘܒܠܗܘܢ ܕܝܘ̈ܕܝܐ
39 ܪ̈ܚܡܘܗܝ ܕܝܢ ܘܒ̈ܢܝ ܓܢܣܗ ܐܝܠܝܢ ܕܣܡܝܟܝܢ ܗܘܘ ܥܡܗ ܟܕ ܚܙܘ ܪܥܝܢܗ ܫܓܝܫܐ ܘܬܪܥܝܬܗ ܕܠܐ ܩܝܡܐ ܥܢܘ ܘܐܡܪܘ ܠܗ
40 ܡܠܟܐ ܥܕܡܐ ܠܐܡܬܝ ܡܢܣܐ ܐܢܬ ܠܢ ܕܗܐ ܬܠܬ ܙܒ̈ܢܝܢ ܦܩܕܬ ܕܢܐܒܕܘܢ ܘܬܘܒ ܗܦܟ ܐܢܬ ܘܫܪܐ ܐܢܬ ܦܘܩ̈ܕܢܝܟ
41 ܘܡܛܠ ܗܢܐ ܐܦ ܡܕܝܢܬܐ ܡܬܟܢܫܐ ܘܩܪܝܒܐ ܕܟܠܗ ܬܚܪܒ ܡܢ ܫܚܩܐ ܕܟܘܠ ܝܘܡ
42 ܘܡܠܟܐ ܟܕ ܫܡܥ ܗܠܝܢ ܐܬܡܠܝ ܪܡܘܬܐ ܘܫܘܒܗܪܐ ܘܐܥܘܪ ܟܠܗ ܡܕܥܗ ܘܛܥܐ ܥܘܕܪܢܐ ܕܗܘܘ ܥܡ ܝܘ̈ܕܝܐ ܡܢ ܩܕܝܡ ܘܕܐܬܒܛܠܬ ܡܚܫܒܬܗ ܬܠܬ ܙܒ̈ܢܝܢ ܥܕ ܗܫܐ ܘܝܡܐ ܡܘܡܬܐ ܗܝ ܕܠܐ ܡܫܬܠܡܐ ܘܐܡܪ ܕܠܗܠܝܢ ܡܢ ܩܕܡ ܟܠܡܕܡ ܠܡܚܪ ܐܫܕܪ ܠܫܝܘܠ ܥܡ ܐܒܗ̈ܐ ܘܒ̈ܢܝܐ ܒܫܚܩܐ ܕܚܡܬܐ ܘܕܝܫܐ ܕܪ̈ܓܠܐ
43 ܐܣܩ ܕܝܢ ܬܘܒ ܥܠ ܝܗܘܕܐ ܘܒܥܓܠ ܐܫܚܘܩ ܘܐܘܒܕܝܗ ܒܣܝܦܐ ܘܒܢܘܪܐ ܘܐܥܒܕܝܗ ܐܝܟ ܦܩܥܬܐ ܘܠܗܝܟܠܗܘܢ ܗܘ ܕܟܠܐܘܢܝ ܕܢܥܘܠ ܠܗ ܒܥܓܠ ܐܘܩܕܝܘܗܝ ܒܢܘܪܐ ܘܐܬܪܐ ܕܡܩܪܒܝܢ ܒܗ ܬܡܢ ܩܘܪ̈ܒܢܐ ܐܚܪܒܝܘܗܝ ܘܐܥܒܕܝܘܗܝ ܐܝܟ ܡܕܒܪܐ ܟܠܗܘܢ ܝܘ̈ܡܬܗ
44 ܗܝܕܝܢ ܪ̈ܚܡܘܗܝ ܘܒ̈ܢܝ ܓܢܣܗ ܫܢܝܘ ܡܢ ܠܘܬܗ ܒܚܕܘܬܐ ܟܕ ܫܡܥܘ ܕܒܡܘܡܬܐ ܐܫܪ ܕܢܘܒܕ ܐܢܘܢ ܘܐܙܠܘ ܘܥܬܕܘ ܘܟܢܫܘ ܚܝ̈ܠܐ ܒܐܬܪ̈ܘܬܐ ܪ̈ܘܝܚܐ ܕܡܕܝܢܬܐ ܕܢܗܘܘܢ ܢܛܪܝܢ ܠܗܘܢ ܠܝܘ̈ܕܝܐ
45 ܗܘ ܕܝܢ ܕܥܒܝܕ ܗܘܐ ܥܠ ܦܝ̈ܠܐ ܐܝܟ ܕܐܬܦܩܕ ܐܫܩܝ ܠܦ̈ܝܠܐ ܘܐܪܘܝ ܐܢܘܢ ܘܫܝܚܢ ܐܢܘܢ ܣܓܝ ܒܚܡܪܐ ܘܠܒܘܢܬܐ ܘܐܝܬܝ ܐܢܘܢ ܠܐܬܪܐ ܪܘܝܚܐ ܕܐܝܬ ܗܘܐ ܒܡܕܝܢܬܐ
46 ܥܡܐ ܕܝܢ ܣܓܝܐܐ ܐܬܟܢܫ ܗܘܐ ܠܒܪ ܡܢ ܡܕܝܢܬܐ ܥܠ ܚܙܬܐ ܕܥܘܠܐ ܘܥܠ ܗܘ ܕܥܒܝܕ ܗܘܐ ܥܠ ܦܝ̈ܠܐ ܠܕܪܬܗ ܕܡܠܟܐ ܘܐܡܪ ܠܗ ܘܓܘܙܠܗ ܠܪܥܝܢܗ
47 ܘܗܘ ܟܕ ܫܡܥ ܐܬܡܠܝ ܒܚܡܬܐ ܘܒܪܘܓܙܐ ܪܒܐ ܘܒܬܪܥܝܬܐ ܕܪܘܫܥܐ ܘܕܒܪ ܠܟܠܗ ܚܝܠܗ ܥܡ ܦ̈ܝܠܐ ܘܟܠܗ ܥܘܬܕܗ ܘܢܦܩ ܘܨܒܐ ܗܘܐ ܕܒܠܒܐ ܩܫܝܐ ܘܒܥܝܢܐ ܪܫܝܥܬܐ ܢܚܘܪ ܘܢܚܙܐ ܡܘܬܗܘܢ ܘܒܝܫܬܗܘܢ ܕܡܣܟ̈ܢܐ ܘܕܒܝܫ̈ܐ
48 ܘܟܕ ܢܦܩܘ ܦܝ̈ܠܐ ܠܒܪ ܡܢ ܬܪܥܗ ܕܡܕܝܢܬܐ ܥܡܐ ܣܓܝܐܐ ܢܩܝܦ ܗܘܐ ܠܗܘܢ ܘܟܕ ܚܙܘ ܝܘ̈ܕܝܐ ܚܠܐ ܣܓܝܐܐ ܕܣܠܩ ܘܩܠܐ ܕܪܘܒܐ ܥܫܝܢܐ
49 ܣܒܪܘ ܕܗܝ ܗܝ ܫܥܬܐ ܕܫܘܠܡܐ ܕܚܪܬܗܘܢ ܘܟܕ ܒܟܝܢ ܘܡܕܡܥܝܢ ܣܓܝ ܡܢܫܩܝܢ ܗܘܘ ܚܕ ܠܚܕ ܘܡܥܦܩܝܢ ܗܘܘ ܐܢܫ ܠܐܢܫ ܠܒܪ ܫܪܒܬܗ ܘܐܚܪ̈ܢܐ ܕܝܢ ܟܕ ܚܙܘ ܝܠܘ̈ܕܐ ܕܝܢܩܝܢ ܚܠܒܐ ܒܟܝܢ ܗܘܘ ܘܡܬܬܢܚܝܢ ܥܠܝܗܘܢ ܕܡܛܬ ܗܘܬ ܫܥܬܐ ܕܫܘܠܡܗܘܢ
50 ܘܟܕ ܐܬܕܟܪܘ ܥܘܕܪ̈ܢܐ ܘܦܘܪ̈ܩܢܐ ܕܡܢ ܫܡܝܐ ܕܗܘܘ ܥܡܗܘܢ ܡܢ ܩܕܝܡ ܫܕܘ ܢܦܫܗܘܢ ܟܠܗܘܢ ܥܠ ܐܪܥܐ ܘܦܪܫܘ ܝܠܘ̈ܕܐ ܡܢ ܬܕܝ̈ܐ ܕܐܡܗ̈ܝܗܘܢ
51 ܘܓܥܘ ܒܚܢܓܬܐ ܘܒܓܥܬܐ ܪܒܬܐ ܘܥܫܝܢܬܐ ܠܘܬ ܗܘ ܕܡܨܐ ܒܚܝܠܐ ܥܠ ܟܠ ܕܨܒܐ ܕܢܥܕܪ ܐܢܘܢ ܒܪ̈ܚܡܐ ܣܓܝ̈ܐܐ ܠܗܢܘܢ ܕܗܐ ܩܝܡܝܢ ܥܠ ܬܪ̈ܥܐ ܕܡܘܬܐ