Read 3 Maccabees 6 side by side with translations · The Final Bible
1 ܐܠܝܥܙܪ ܕܝܢ ܓܒܪܐ ܚܕ ܝܕܝܥܐ ܕܐܝܬܘܗܝ ܗܘܐ ܡܢ ܟܗ̈ܢܐ ܕܒܘܟܪ̈ܐ ܘܒܫܢܝ̈ܐ ܣܒܐ ܗܘܐ ܘܒܦܘܠܚܢܐ ܕܕܚܠܬ ܐܠܗܐ ܡܫܡܠܝ ܗܘܐ ܒܟܠܡܕܡ ܦܩܕ ܠܩܫ̈ܝܫܐ ܕܥܡܗ ܕܢܨܠܘܢ ܘܢܒܥܘܢ ܡܢ ܐܠܗܐ ܩܕܝܫܐ ܐܦ ܗܘ ܨܠܝ ܟܕ ܐܡܪ ܗܟܢܐ
2 ܡܠܟܐ ܥܫܝܢ ܐܘܚܕܢܐ ܡܪܝܡܐ ܕܐܚܝܕ ܟܠ ܕܡܕܒܪܬ ܟܠܗ ܒܪܝܬܟ ܒܪ̈ܚܡܐ
3 ܚܘܪ ܘܐܬܦܢܝ ܥܠ ܙܪܥܗ ܕܐܒܪܗܡ ܘܒܢܘ̈ܗܝ ܕܝܥܩܘܒ ܩܕܝܫܟ ܡܢܬܐ ܩܕܝܫܬܐ ܕܓܒܝܬ ܠܟ ܥܡܟ ܒܐܪܥܐ ܢܘܟܪܝܬܐ ܥܡܐ ܐܟܣܢܝܐ ܘܡܣܟܢܐ ܕܐܒܕ ܣܪܝܩܐܝܬ ܒܥܘܠܐ ܐܒܐ
4 ܐܢܬ ܠܦܪܥܘܢ ܚܝܠܬܢܗ ܕܡܨܪܝܢ ܕܐܣܓܝ ܗܘܐ ܠܗ ܡܪ̈ܟܒܬܐ ܘܐܬܬܪܝܡ ܘܐܫܬܩܠ ܒܫܘܒܗܪܐ ܪܒܐ ܘܒܠܫܢܐ ܕܡܡܠܠ ܪ̈ܘܪܒܬܐ ܥܡ ܚܝܠܗ ܥܫܝܢܐ ܘܪܡܐ ܛܒܥܬ ܘܐܘܒܕܬ ܒܥܘ̈ܡܩܘܗܝ ܕܝܡܐ ܘܐܕܢܚܬ ܢܘܗܪܐ ܕܪ̈ܚܡܐ ܠܙܪܥܗ ܕܐܝܣܪܝܠ
5 ܐܢܬ ܠܣܢܚܪܝܒ ܡܠܟܐ ܕܐܬܘܪ ܕܐܬܬܪܝܡ ܘܐܫܬܒܗܪ ܥܠ ܚܝܠܗ ܕܠܐ ܡܬܡܢܐ ܕܟܒܫ ܘܫܩܠ ܐܪ̈ܥܬܐ ܣܓܝ̈ܐܬܐ ܘܐܬܬܪܝܡ ܐܦ ܥܠ ܡܕܝܢܬܟ ܩܕܝܫܬܐ ܘܡܠܠ ܡ̈ܠܐ ܕܓܘܕܦܐ ܘܕܫܘܒܗܪܐ ܫܚܩܬ ܘܡܟܟܬ ܡܪܝܐ ܘܐܘܕܥܬ ܠܥ̈ܡܡܐ ܣܓܝ̈ܐܐ ܐܘܚܕܢܟ ܪܒܐ ܘܥܫܝܢܐ
6 ܐܢܬ ܠܬܠܬܝ̈ܗܘܢ ܚܒܪ̈ܐ ܒܒܒܝܠ ܕܐܫܠܡܘ ܢܦܫܗܘܢ ܠܝܩܕܢܐ ܕܢܘܪܐ ܕܠܐ ܢܦܠܚܘܢ ܠܣܪܝܩܘܬܐ ܘܠܣܦܝܩܘܬܐ ܢܛܪܬ ܐܢܘܢ ܒܓܘ ܐܬܘܢܐ ܕܢܘܪܐ ܘܐܦܩܬ ܐܢܘܢ ܟܕ ܡܫܠܡܝܢ ܕܠܐ ܢܟܝܢ ܥܕܡܐ ܠܡܢܬܐ ܕܣܥܪܐ ܘܠܒܥܠܒ̈ܒܝܗܘܢ ܐܘܩܕܬ ܫܠܗܒܝܬܐ ܕܢܘܪܐ
7 ܐܢܬ ܗܟܝܠ ܠܕܢܝܐܝܠ ܕܐܬܐܟܠܘ ܩܪ̈ܨܘܗܝ ܘܐܫܬܪܝ ܠܓܘܒܐ ܕܐܪ̈ܝܘܬܐ ܕܢܚܒܠܘܢ ܘܢܘܒܕܘܢܗ ܐܦܩܬ ܠܢܘܗܪܐ ܟܕ ܠܝܬ ܒܗ ܢܟܝܢܐ
8 ܘܠܝܘܢܢ ܕܐܫܬܕܝ ܒܥܘܡܩ̈ܘܗܝ ܕܝܡܐ ܘܐܬܒܠܥ ܡܢ ܢܘܢܐ ܘܒܟܐ ܘܨܠܝ ܩܕܡܝܟ ܡܢ ܟܪܣܗ ܕܢܘܢܐ ܫܡܥܬ ܒܩܠܗ ܘܐܚܝܬܝܗܝ ܘܦܠܛܬܝܗܝ ܡܢ ܟܪܣܗ ܕܢܘܢܐ ܘܚܘܝܬ ܠܟܠܗܘܢ ܕܪ̈ܐ ܐܒܐ ܚܝܠܟ ܘܪܒܘܬܟ
9 ܘܗܫܐ ܠܢ ܕܗܐ ܐܝܬܝܢ ܒܨܥܪܐ ܘܒܐܘܠܨܢܐ ܪܒܐ ܐܢܬ ܡܪܚܡܢܐ ܕܡܓܢ ܐܢܬ ܟܢܦ̈ܝܟ ܥܠ ܟܘܠ ܚܘܪ ܘܐܬܦܢܝ ܒܥܓܠ ܥܠ ܙܪܥܗ ܕܐܝܣܪܝܠ ܕܗܐ ܡܨܛܥܪܝܢ ܡܢ ܥܡ̈ܡܐ ܪ̈ܫܝܥܐ ܘܛܡ̈ܐܐ
10 ܐܢ ܚܛܗ̈ܝܢ ܘܣܟ̈ܠܘܬܢ ܣܗܕܘ ܒܢ ܕܗܟܢܐ ܢܡܘܬ ܦܪܘܩ ܠܢ ܡܪܝܐ ܡܢ ܐܝܕܐ ܕܒܥܠܕܒ̈ܒܝܢ ܘܐܢܬ ܐܝܟܢܐ ܕܨܒܐ ܐܢܬ ܒܐܝܕܝܟ ܐܪܕܝܢ ܘܐܘܒܕܢ
11 ܕܠܐ ܢܫܒܚܘܢ ܚܣܝܪ̈ܝ ܪܥܝܢܐ ܠܕܚ̈ܠܬܗܘܢ ܣܪ̈ܝܩܬܐ ܥܠ ܐܒܕܢܗܘܢ ܕܚܒ̈ܝܒܝܟ ܘܢܐܡܪܘܢ ܕܐܦܠܐ ܐܠܗܗܘܢ ܐܫܟܚ ܢܥܕܪ ܐܢܘܢ ܘܢܦܪܘܩ ܐܢܘܢ
12 ܐܢܬ ܡܪܝܐ ܕܟܠ ܚܝܠܐ ܘܥܘܫܢܐ ܡܢ ܠܘܬܗ ܗܘ ܗܘ ܕܡܢ ܥܠܡ ܗܫܐ ܚܘܪ ܡܪܝܐ ܘܪܚܡ ܥܠܝܢ ܥܠ ܗܢܘܢ ܕܐܒܕܝܢ ܣܪܝܩܐܝܬ ܡܢ ܐܝܕܐ ܕܥܘ̈ܠܐ ܘܚܣܝܪ̈ܝ ܪܥܝܢܐ
13 ܐܠܐ ܢܬܓܠܐ ܚܝܠܟ ܗܘ ܕܠܐ ܡܙܕܟܐ ܒܗܢܐ ܝܘܡܐ ܕܢܫܪܐ ܕܚܠܬܐ ܘܙܘܥܬܐ ܒܗܠܝܢ ܥܡ̈ܡܐ ܘܢܦܪܫ ܠܒ̈ܘܬܗܘܢ ܘܢܦܪܘܩ ܠܙܪܥܗ ܕܐܝܣܪܝܠ
14 ܕܗܐ ܒܥܐ ܡܢܟ ܘܡܬܟܫܦ ܠܟ ܣܘܓܐܐ ܕܝܠܘ̈ܕܐ ܘܐܢܫ̈ܝܗܘܢ ܕܗܠܝܢ ܒܕܡ̈ܥܐ ܘܒܒܟܬܐ ܣܓܝܐܬܐ
15 ܘܢܬܝܕܥ ܠܟܠܗܘܢ ܥܡ̈ܡܐ ܕܥܡܢ ܐܢܬ ܡܪܝܐ ܘܠܐ ܐܗܦܟܬ ܐܦܝ̈ܟ ܡܢܢ ܐܠܐ ܐܝܟ ܕܐܡܪܬ ܕܐܦܠܐ ܟܕ ܐܝܬܝܗܘܢ ܗܘܘ ܒܐܪܥܐ ܕܒܥܠܕܒ̈ܒܝܗܘܢ ܠܐ ܐܗܡܝܬ ܥܝ̈ܢܝ ܡܢܗܘܢ ܗܟܢܐ ܐܦ ܗܫܐ ܫܠܡ ܥܡܢ ܡܪܝܐ
16 ܘܟܕ ܫܠܡ ܐܠܝܥܙܪ ܨܠܘܬܗ ܐܬܐ ܡܠܟܐ ܥܡ ܟܠܗ ܚܝܠܗ ܘܥܘܬܕܐ ܕܐܝܬ ܗܘܐ ܥܡܗ ܠܐܝܟܐ ܕܫܪܝܢ ܗܘܘ ܝܘ̈ܕܝܐ
17 ܘܟܕ ܚܙܘ ܝܘ̈ܕܝܐ ܓܥܘ ܒܓܥܬܐ ܪܒܬܐ ܠܫܡܝܐ ܐܝܟ ܕܬܬܙܝܥ ܟܠܗ ܐܪܥܐ ܘܢܬܪܗܒܘܢ ܟܠܗܘܢ ܚܝܠܘ̈ܗܝ ܕܡܠܟܐ ܡܢ ܩܠ ܓܥܬܗܘܢ
18 ܗܝܕܝܢ ܡܪܝܐ ܐܚܝܕ ܟܠ ܘܪܒ ܬܫܒܘܚܬܐ ܘܐܠܗܐ ܕܫܪܪܐ ܐܢܗܪ ܐܦܘ̈ܗܝ ܩܕܝܫ̈ܬܐ ܘܦܬܚ ܬܪ̈ܥܐ ܕܫܡܝܐ ܘܢܚܬܘ ܬܪ̈ܝܢ ܡܠܐܟ̈ܐ ܡܫܒ̈ܚܐ ܘܕܚܝ̈ܠܐ ܟܕ ܠܐ ܡܬܚܙܝܢ ܗܘܘ ܠܟܠܢܫ ܐܠܐ ܐܢ ܠܝܘ̈ܕܝܐ ܒܠܚܘܕ
19 ܘܩܡܘ ܠܘܩܒܠ ܒܥܠܕܒ̈ܒܐ ܘܠܟܠܗ ܚܝܠܗܘܢ ܘܡܫܪ̈ܝܬܗܘܢ ܡܠܐܘܗ ܕܚܠܬܐ ܘܙܘܥܬܐ ܘܪܗܝܒܘܬܐ ܘܐܣܪܘ ܘܦܟܪܘ ܐܢܘܢ ܕܠܐ ܢܬܬܙܝܥܘܢ
20 ܘܐܫܪܝܘ ܙܘܥܬܐ ܘܪܬܝܬܐ ܒܦܓܪܗ ܕܡܠܟܐ ܘܛܥܐ ܠܟܠܗ ܪܥܝܢܗ ܗܘ ܪܡܐ ܘܫܒܗܪܢܐ ܕܡܬܓܘܙܠ ܗܘܐ ܒܪܘܓܙܐ ܘܒܚܡܬܐ
21 ܘܗܦܟܘ ܦܝ̈ܠܐ ܥܠ ܚܝ̈ܠܘܗܝ ܘܡܕܝܫܝܢ ܗܘܘ ܘܡܘܒܕܝܢ ܘܡܩܛܠܝܢ ܠܗܘܢ
22 ܘܐܬܗܦܟ ܪܘܓܙܗ ܕܡܠܟܐ ܠܪ̈ܚܡܐ ܘܒܟܐ ܥܠ ܟܠܡܕܡ ܕܐܨܛܢܥ ܗܘܐ ܘܥܬܕ ܕܢܥܒܕ
23 ܟܕ ܓܝܪ ܫܡܥ ܗܘܐ ܩܠܐ ܕܓܥܬܗܘܢ ܘܚܙܐ ܕܟܠܗܘܢ ܪܡܝܢ ܗܘܘ ܥܠ ܐܦ̈ܝܗܘܢ ܐܝܟ ܕܠܐܒܕܢܐ ܒܟܐ ܘܐܬܚܡܬ ܒܪܘܓܙܐ ܥܠ ܪ̈ܚܡܘܗܝ ܘܐܡܪ ܠܗܘܢ
24 ܕܝܬܝܪ ܥܠ ܡܠܟ̈ܐ ܘܛܪ̈ܘܢܐ ܥܒܪܬ ܒܝܫܘܬܟܘܢ ܘܠܗ ܠܥܒܕ ܛܒܬܟܘܢ ܡܨܛܢܥܝܢ ܐܢܬܘܢ ܕܐܝܟܢܐ ܬܣܒܘܢܗ ܡܢܗ ܪܝܫܢܘܬܐ ܕܗܐ ܚܙܝܢ ܐܢܬܘܢ ܓܡܪܬ ܠܗ ܪܘܚܝ ܘܡܬܚܫܒܝܢ ܐܢܬܘܢ ܐܝܠܝܢ ܕܠܐ ܫܦܝܪ̈ܢ ܠܡܠܟܘܬܐ
25 ܡܢܘ ܕܠܐܝܠܝܢ ܕܢܛܪܘ ܥܡܢ ܪ̈ܚܡܘܬܐ ܘܢܛܪܘ ܚܣ̈ܢܐ ܕܐܪܥܢ ܗܟܢܐ ܦܟܪ ܘܐܝܬܝ ܐܢܘܢ ܐܝܟ ܕܠܚܝܘ̈ܬܐ
26 ܐܘ ܡܢܘ ܕܠܐܝܠܝܢ ܕܡܢ ܕܪܝܫ ܘܒܟܠܙܒܢ ܗܘܘ ܥܡܢ ܒܫܠܡܘܬܐ ܘܢܛܪܘ ܪ̈ܚܡܘܬܐ ܕܨܐܝܕܝܢ ܝܬܝܪ ܡܢ ܟܠܗܘܢ ܥܡ̈ܡܐ ܘܙܒ̈ܢܬܐ ܣܓܝ̈ܐܬܐ ܩܡܘ ܠܘܩܒܠ ܒܥܠܕܒ̈ܒܝܢ ܗܟܢܐ ܦܟܪ ܘܐܠܨ ܒܐܘܠܨ̈ܢܐ ܩܫܝ̈ܐ
27 ܫܪܘ ܫܪܘ ܐܣܘܪ̈ܐ ܕܥܘܠܐ ܘܫܕܪܘ ܐܢܘܢ ܒܫܠܡܐ ܠܒ̈ܬܝܗܘܢ ܕܒܝܫܐܝܬ ܐܬܚܫܒܢ ܘܐܝܬܝܢ ܐܢܘܢ
28 ܫܪܘ ܠܒ̈ܢܘܗܝ ܕܐܚܝܕ ܟܠ ܐܠܗܐ ܕܫܡܝܐ ܗܘ ܕܗܘܐ ܡܢ ܩܕܝܡ ܥܡ ܐܒ̈ܗܝܢ ܘܥܡܢ ܕܝܠܢ ܘܢܛܪ ܡܠܟܘܬܢ ܡܢ ܟܠ ܫܚܩܐ ܘܐܘܠܨܢܐ ܘܐܬܩܢ ܐܘܪ̈ܚܬܢ ܒܟܠܙܒܢ
29 ܘܟܕ ܐܡܪ ܡܠܟܐ ܗܠܝܢ ܐܫܬܪܝܘ ܟܠܗܘܢ ܘܒܪܟܘ ܘܐܘܕܝܘ ܠܐܠܗܐ ܦܪܘܩܗܘܢ ܕܐܬܦܨܝܘ ܡܢ ܡܘܬܐ
30 ܘܡܢ ܒܬܪ ܗܠܝܢ ܥܠ ܡܠܟܐ ܠܡܕܝܢܬܐ ܘܦܩܕ ܕܢܬܝܗܒ ܠܗܘܢ ܠܝܘ̈ܕܝܐ ܚܡܪܐ ܘܣܝܒܪܬܐ ܫܒ̈ܥܐ ܝܘ̈ܡܝܢ ܘܐܡܪ ܕܒܗܘ ܐܬܪܐ ܕܒܗ ܡܛܝܒ ܗܘܐ ܠܗܘܢ ܕܒܗ ܢܡܘܬܘܢ ܘܢܐܒܕܘܢ ܒܗ ܢܥܒܕܘܢ ܒܣܡܐ ܘܕܝܨܐ ܕܦܘܪܩܢܗܘܢ
31 ܗܝܕܝܢ ܗܢܘܢ ܕܡܢ ܩܕܝܡ ܡܬܚܣܕܝܢ ܗܘܘ ܘܩܪܝܒܝܢ ܗܘܘ ܠܡܘܬܐ ܒܪܡ ܕܝܢ ܐܦ ܡܛܝܘ ܗܘܘ ܚܠܦ ܥܩܬܐ ܘܐܒܠܐ ܡܪܝܪܐ ܥܒܕܘ ܕܝܨܐ ܕܦܘܪܩܢܐ ܘܐܬܪܐ ܗܘ ܕܡܛܝܒ ܗܘܐ ܠܗܘܢ ܕܢܦܠܘܢ ܘܢܬܩܒܪܘܢ ܒܗ ܦܠܓܘܗܝ ܠܣܡ̈ܟܐ ܘܡܠܐ ܗܘܐ ܒܣܡܐ ܘܚܕܘܬܐ
32 ܘܫܒܩܘ ܥܩܬܐ ܘܐܒܠܐ ܘܢܣܒܘ ܬܫܒ̈ܚܬܐ ܘܡܙܡܘܪ̈ܐ ܕܐܒܗ̈ܬܐ ܘܡܘܕܝܢ ܗܘܘ ܘܡܒܪܟܝܢ ܒܩܠܐ ܘܒܩܥܬܐ ܠܐܠܗܐ ܕܥܒܕ ܨܐܝܕܝܗܘܢ ܬܕܡܪ̈ܬܐ ܘܚܕܝܢ ܗܘܘ ܘܕܝܨܝܢ ܥܠ ܐܬܐ ܕܫܠܡܐ ܕܥܒܕ ܠܗܘܢ
33 ܐܦ ܡܠܟܐ ܕܝܢ ܥܒܕ ܐܦ ܗܘ ܒܣܡܐ ܪܒܐ ܘܩܪܐ ܠܥܡܐ ܣܓܝܐܐ ܘܕܠܐ ܫܠܝܘ ܡܘܕܐ ܗܘܐ ܠܐܠܗܐ ܕܫܡܝܐ ܠܗܘ ܕܒܬܫܒܘܚܬܐ ܪܒܬܐ ܥܒܕ ܠܗ ܦܘܪܩܢܐ
34 ܗܢܘܢ ܕܝܢ ܕܡܢ ܩܕܝܡ ܡܛܝܒܝܢ ܗܘܘ ܠܐܒܕܢܗܘܢ ܕܝܘ̈ܕܝܐ ܘܕܢܗܘܘܢ ܡܐܟܘܠܬܐ ܠܚܝܘ̈ܬܐ ܘܠܦܪ̈ܚܬܐ ܐܟܬܒܘ ܗܘܘ ܡܢܝܢܗܘܢ ܒܚܕܘܬܐ ܘܟܕ ܚܙܘ ܗܠܝܢ ܕܗܘܝܢ ܠܗܘܢ ܐܬܬܢܚܘ ܘܐܬܬܥܝܩܘ ܘܠܒܫܘ ܒܗܬܬܐ ܘܡܪܚܘܬܗܘܢ ܘܪܘܓܙܗܘܢ ܕܝܩܕ ܗܘܐ ܐܝܟ ܢܘܪܐ ܕܥܟܘ ܘܗܘܘ ܒܒܗܬܬܐ ܘܒܨܥܪܐ
35 ܝܘ̈ܕܝܐ ܕܝܢ ܐܝܟ ܕܩܕܡܢ ܐܡܪܢ ܥܒܕܘ ܒܣܡܐ ܘܕܝܨܐ ܘܚܕܘܬܐ ܒܡܙܡܘܪ̈ܐ ܘܒܬܫܒ̈ܚܬܐ ܘܒܬܘ̈ܕܝܬܐ
36 ܘܐܬܚܫܒܘ ܒܝܢܬܗܘܢ ܕܟܠ ܐܝܟܐ ܕܥܡܪܝܢ ܢܗܘܘܢ ܥܒܕܝܢ ܠܗܘܢ ܠܗܠܝܢ ܝܘ̈ܡܬܐ ܒܕܝܨܐ ܘܒܚܕܘܬܐ ܠܐ ܗܘܐ ܐܝܟ ܕܡܛܠ ܡܐܟܠܐ ܘܡܫܬܝܐ ܐܠܐ ܡܛܠ ܦܘܪܩܢܐ ܕܥܒܕ ܠܗܘܢ ܐܠܗܐ
37 ܘܩܪܒܘ ܘܐܡܪܘ ܠܡܠܟܐ ܕܢܫܬܪܘܢ ܘܢܐܙܠܘܢ ܠܒ̈ܬܝܗܘܢ
38 ܐܟܬܒܘ ܗܘܘ ܐܢܘܢ ܕܝܢ ܡܢ ܚܡ̈ܫܐ ܘܥܣܪ̈ܝܢ ܒܝܪܚܐ ܥܕܡܐ ܠܐܪܒܥܬܐ ܐܪ̈ܒܥܝܢ ܝܘ̈ܡܝܢ ܐܩܝܡܘ ܗܘܘ ܓܝܪ ܕܢܘܒܕܘܢ ܐܢܘܢ ܡܢ ܚܡܫܬܐ ܥܕܡܐ ܠܫܒܥܬܐ ܬܠ̈ܬܐ ܝܘ̈ܡܝܢ
39 ܕܒܗܘܢ ܚܘܝ ܬܫܒܘܚܬܐ ܕܪܒܘܬܗ ܘܕܪ̈ܚܡܘܗܝ ܡܪܝܐ ܕܫܠܝܛ ܥܠ ܟܠ ܘܦܪܩ ܐܢܘܢ ܒܬܕܡܘܪܬܐ ܪܒܬܐ
40 ܟܠܗܘܢ ܕܝܢ ܡܬܒܣܡܝܢ ܗܘܘ ܡܢ ܡܕܡ ܕܝܗܒ ܗܘܐ ܠܗܘܢ ܡܠܟܐ ܥܕܡܐ ܠܐܪܒܥܣܪ̈ܐ ܕܒܗ ܩܪܒܘ ܗܘܘ ܠܡܠܟܐ ܕܢܫܬܕܪܘܢ
41 ܡܠܟܐ ܕܝܢ ܫܒܚ ܐܢܘܢ ܘܟܬܒ ܠܗܘܢ ܐܓܪܬܐ ܗܟܢܐ ܠܘܬ ܐܣܛܪ̈ܛܝܓܐ ܕܒܟܠ ܡܕܝ̈ܢܬܐ ܟܕ ܡܘܕܐ ܗܘܐ ܠܗܘܢ ܣܓܝ