Read 3 Maccabees 4 side by side with translations · The Final Bible
1 ܘܟܠ ܐܝܟܐ ܕܡܫܬܡܥ ܗܘܐ ܗܢܐ ܦܘܩܕܢܐ ܚܕܘܬܐ ܘܕܝܨܐ ܪܒܐ ܘܒܘܣܡܐ ܗܘܐ ܗܘܐ ܠܗܘܢ ܠܥܡ̈ܡܐ ܐܝܟ ܐܢܫܐ ܕܠܗܕܐ ܡܣܟܝܢ ܗܘܘ ܕܬܓܕܫ ܘܐܬܝܗܒܬ ܠܗܘܢ ܒܓܠܝܐ ܕܢܥܒܕܘܢܗ
2 ܠܝܘ̈ܕܝܐ ܕܝܢ ܐܒܠܐ ܪܒܐ ܐܝܬ ܗܘܐ ܠܗܘܢ ܘܒܩܠܐ ܒܟܝܢ ܗܘܘ ܘܓܥܝܢ ܘܡܬܬܢܚܝܢ ܗܘܘ ܣܓܝ ܕܡܛܐ ܟܐܒܐ ܘܚܫܐ ܥܕܡܐ ܠܠܒܗܘܢ ܡܛܠ ܕܚܕܪܘ ܐܢܘܢ ܐܘܠܨܢܐ ܡܢ ܟܠ ܐܬܪ ܘܕܝܢܐ ܕܚܒܠܐ ܘܕܡܘܬܐ ܡܢ ܫܠܝܐ ܐܝܢܐ ܕܠܐ ܡܣܟܝܢ ܗܘܘ ܠܗ
3 ܐܝܕܐ ܓܝܪ ܡܕܝܢܬܐ ܐܘ ܐܝܢܐ ܐܬܪܐ ܕܝܬܝܒ ܐܘ ܐܝܠܝܢ ܫܘ̈ܩܐ ܐܘ ܐܝܠܝܢ ܒܪ̈ܝܬܐ ܕܠܐ ܡܠܝ̈ܢ ܗܘܝ ܐܒܠܐ ܘܡܪܩܘܕܬܐ ܣܓܝܐܬܐ
4 ܗܟܢܐ ܓܝܪ ܡܬܬܚܕܝܢ ܗܘܘ ܡܢ ܐܣܛܪ̈ܛܝܓܐ ܕܒܟܠ ܡܕܝ̈ܢܬܐ ܒܩܛܝܪܐ ܘܒܐܘܠܨܢܐ ܣܓܝܐܐ ܘܡܪܝܪܐ ܘܡܫܬܢܕܝܢ ܗܘܘ ܗܟܢܐ ܕܝܢ ܩܫܐ ܗܘܐ ܘܡܪܝܪ ܐܘܠܨܢܗܘܢ ܕܟܕ ܚܙܘ ܒܥܠܕܒ̈ܒܝܗܘܢ ܟܪܝܬ ܠܗܘܢ ܘܒܟܝܢ ܗܘܘ ܥܠܝܗܘܢ
5 ܚܙܝܢ ܗܘܘ ܓܝܪ ܠܣܘܓܐܐ ܕܣܒ̈ܐ ܡܝܩܪ̈ܐ ܕܡܬܕܒܪܝܢ ܗܘܘ ܒܨܥܪܐ ܘܒܩܛܝܪܐ ܣܓܝܐܐ ܟܕ ܐܦܠܐ ܩܠܝܠ ܒܗܬܝܢ ܗܘܘ ܡܢܗܘܢ
6 ܘܟ̈ܠܠܬܐ ܕܝܢ ܐܝܠܝܢ ܕܗܫܐ ܗܘܝ ܗܘܝ ܠܓܒܪ̈ܐ ܫܒ̈ܩܝ ܓܢܘ̈ܢܐ ܕܥܠܝܡܘܬܗܝܢ ܘܚܠܦ ܚܕܘܬܐ ܢܣܒ̈ܝ ܥܠܝܗܝܢ ܒܟܝܐ ܘܚܠܦ ܒܣܡ̈ܢܐ ܢܣ̈ܟܝ ܗܘܝ ܪ̈ܝܫܝܗܝܢ ܒܩܛܡܐ ܘܐܬܝܢ ܗܘܝ ܒܩܛܝܪܐ ܟܕ ܫܩܝܠܐ ܡܢܗܝܢ ܬܚܦܝܬܐ ܘܒܗܬܬܐ ܕܟ̈ܠܠܬܐ
7 ܟܕ ܡܦܟܪ̈ܢ ܘܐܣܝܪ̈ܢ ܒܦܪܙܠܐ ܡܢ ܥܡ̈ܡܐ ܢܘܟܪ̈ܝܐ ܘܡܬܕܒܪ̈ܢ ܒܐܘ̈ܠܨܢܐ ܘܐܬܝܢ ܒܫܘ̈ܩܐ ܥܕܡܐ ܠܐܠܦ̈ܐ
8 ܘܫܘܬܦ̈ܝܗܝܢ ܕܝܢ ܕܗܠܝܢ ܡܬܕܒܪܝܢ ܗܘܘ ܘܐܬܝܢ ܒܩܛܝܪܐ ܘܚܠܦ ܟܠܝܠܐ ܪܡܝܢ ܗܘܘ ܩܘ̈ܠܪܐ ܕܦܪܙܠܐ ܒܨܘܪ̈ܝܗܘܢ ܘܚܠܦ ܚܕܘܬܐ ܘܒܘܣܡܐ ܕܥܠܝܡܘܬܐ ܘܕܝܨܐ ܕܫܪܟܐ ܕܝܘܡ̈ܬܐ ܕܡܫܬܘܬܗܘܢ ܒܐܒܠܐ ܘܒܒܟܬܐ ܘܒܬܐܢܚ̈ܬܐ ܐܝܬܝܗܘܢ ܗܘܘ ܕܚܙܝܢ ܗܘܘ ܡܘܬܗܘܢ ܩܕܡ ܥܝܢܝ̈ܗܘܢ
9 ܡܚܬܝܢ ܗܘܘ ܠܗܘܢ ܕܝܢ ܒܩܛܝܪܐ ܠܐܠܦ̈ܐ ܐܝܟ ܚܝܘ̈ܬܐ ܟܕ ܡܦܟܪܝܢ ܘܐܣܝܪܝܢ ܒܦܪܙܠܐ ܡܢܗܘܢ ܓܝܪ ܐܣܝܪܝܢ ܗܘܘ ܒܨܘܪ̈ܝܗܘܢ ܘܡܢܗܘܢ ܒܪ̈ܓܠܝܗܘܢ
10 ܘܡܢܗܘܢ ܡܦܟܪܝܢ ܗܘܘ ܘܐܣܝܪܝܢ ܒܕܦ̈ܐ ܕܐ̈ܠܦܐ ܕܡܢ ܟܠ ܦܪܘܣ ܢܗܘܘܢ ܐܠܝܨܝܢ ܡܢ ܟܠܗܘܢ ܓܒ̈ܝܗܘܢ ܐܝܟܢܐ ܕܐܦ ܠܐ ܩܠܝܠ ܬܗܘܐ ܠܗܘܢ ܪܘܚܬܐ
11 ܘܟܕ ܟܠܗܘܢ ܢܚܬܘ ܠܐܠܦ̈ܐ ܘܐܬܘ ܠܘܬ ܡܠܟܐ ܦܩܕ ܕܢܫܪܘܢ ܠܒܪ ܡܢ ܡܕܝܢܬܐ ܒܐܬܪܐ ܪܘܝܚܐ ܐܝܟ ܕܠܨܥܪܐ ܘܠܦܘܪܣܝܐ ܢܦܩ ܟܠ ܡܢܘ ܕܨܒܐ ܘܚܙܐ ܠܗܘܢ ܘܐܚܕܪ ܘܐܟܪܟ ܐܢܘܢ ܚܝܠܐ ܕܦܠܚ̈ܘܗܝ ܕܠܐ ܐܢܫ ܡܢܗܘܢ ܢܥܪܘܩ
12 ܘܟܕ ܥܒܕ ܗܟܢܐ ܫܡܥ ܕܢܦܩܝܢ ܗܘܘ ܡܢ ܒܢܝ̈ ܥܡܗܘܢ ܠܘܬܗܘܢ ܘܒܟܝܢ ܗܘܘ ܘܡܬܬܢܚܝܢ ܥܠ ܕܘܘ̈ܢܐ ܘܒܝܫܬܐ ܕܓܕܫܬ ܠܐܚܝ̈ܗܘܢ
13 ܘܐܬܚܡܬ ܘܪܓܙ ܣܓܝ ܘܦܩܕ ܕܐܦ ܠܗܠܝܢ ܒܗ ܒܕܡܘܬܐ ܕܚܒܪ̈ܝܗܘܢ ܢܐܠܨܘܢ ܐܢܘܢ ܒܟܠ ܐܘܠܨܢ ܘܡܕܡ ܠܐ ܢܬܒܨܪ ܠܗܘܢ ܡܢ ܗܢܘܢ
14 ܘܢܟܬܒܘܢ ܐܢܘܢ ܠܟܠܗܘܢ ܒܫܡܐ ܘܐܩܝܡ ܝܘܡܐ ܕܠܟܠܗܘܢ ܢܚܒܠ ܘܢܘܒܕ ܐܢܘܢ
15 ܘܫܪܝܘ ܗܘܘ ܡܟܬܒܝܢ ܠܗܘܢ ܒܐܘܠܨܢܐ ܩܫܝܐ ܘܡܪܝܪܐ ܒܚܦܝܛܘܬܐ ܣܓܝܐܬܐ ܡܢ ܕܕܢܚ ܫܡܫܐ ܘܥܕܡܐ ܕܥܪܒ ܘܝܗܒ ܗܘܐ ܠܗܘܢ ܙܒܢܐ ܐܪ̈ܒܥܝܢ ܝܘ̈ܡܝܢ ܕܢܟܬܒܘܢ ܠܟܠܗܘܢ
16 ܡܠܟܐ ܕܝܢ ܚܕܐ ܗܘܐ ܘܡܬܒܣܡ ܘܥܒܕ ܡܫܬܝܐ ܣܓܝܐܐ ܒܝܬ ܦܬܟܪ̈ܘܗܝ ܒܥܘܝܪܘܬܐ ܘܒܫܘܒܗܪܐ ܣܓܝܐܐ ܕܐܚܝܕ ܗܘܐ ܠܗ ܘܒܦܘܡܗ ܗܘ ܡܣܝܒܐ ܘܒܬܪܥܝܬܐ ܫܛܝܬܐ ܠܚܪ̈ܫܐ ܥܘܝܪ̈ܐ ܕܠܐ ܡܡܠܠܝܢ ܘܠܐ ܫܡܥܝܢ ܡܫܒܚ ܗܘܐ ܘܠܟܐܢܘܬܐ ܘܙܕܝܩܘܬܐ ܫܐܛ ܗܘܐ ܘܡܣܠܐ ܘܡܡܠܠ ܗܘܐ ܡ̈ܠܐ ܕܓܘܕܦܐ
17 ܡܢ ܒܬܪ ܕܝܢ ܙܒܢܐ ܕܣܝܡ ܗܘܐ ܠܗܘܢ ܠܡܟܬܒ̈ܢܐ ܩܪܒܘ ܠܘܬ ܡܠܟܐ ܘܐܡܪܘ ܠܗ ܕܠܐ ܡܬܡܨܝܢܢ ܚܝܠܐ ܠܡܟܬܒܘ ܐܢܘܢ ܠܟܠܗܘܢ ܝܘ̈ܕܝܐ ܡܛܠ ܕܣܓܝ̈ܐܝܢ ܐܢܘܢ ܛܒ
18 ܘܠܐ ܡܫܟܚܝܢ ܠܡܬܡܢܝܘ ܡܛܠ ܕܡܠܐ ܗܘܐ ܡܢܗܘܢ ܐܬܪܐ ܘܠܐ ܐܝܬ ܒܝܬܐ ܕܠܐ ܐܝܬ ܒܗ ܡܢܗܘܢ ܘܩܛܝܥܐ ܗܝ ܗܕܐ ܕܠܐ ܡܫܟܚܝܢ ܐܣܛܪ̈ܛܝܓܐ ܕܡܨܪܝܢ ܕܢܡܢܘܢ ܐܢܘܢ
19 ܘܟܕ ܫܡܥ ܡܠܟܐ ܠܗܘܢ ܠܗܠܝܢ ܐܬܚܡܬ ܥܠܝܗܘܢ ܣܓܝ ܐܝܟ ܕܫܘܚܕܐ ܠܡ ܫܩܠܘ ܡܢܗܘܢ ܘܥܠܬܐ ܐܚܕܘ ܠܗܘܢ ܕܢܐܡܪܘܢ ܥܠܝܗܘܢ ܗܠܝܢ ܗܝܕܝܢ ܩܪܒܘ ܘܡܦܝܣܝܢ ܗܘܘ ܠܗ ܒܫܪܪܐ
20 ܘܡܚܘܝܢ ܗܘܘ ܠܗ ܟܪ̈ܛܐܣܐ ܐܝܟܐ ܕܐܟܬܒܘ ܗܘܘ ܐܢܘܢ ܘܐܡܪܝܢ ܗܘܘ ܠܗ ܕܐܦ ܟܠܗܘܢ ܩܢܝܢ ܓܡܪܘ ܘܐܘܦܝܘ
21 ܗܕܐ ܕܝܢ ܐܝܬܝܗ ܗܘܬ ܒܡܥܒܕܢܘܬܐ ܕܚܝܠܗ ܕܐܠܗܐ ܕܠܐ ܡܙܕܟܐ ܠܥܘܕܪܢܐ ܕܝܘ̈ܕܝܐ