Read 3 Maccabees 3 side by side with translations · The Final Bible
1 ܘܒܪ ܫܥܬܗ ܕܝܢ ܕܫܡܥ ܗܠܝܢ ܪܫܝܥܐ ܐܬܚܡܬ ܣܓܝ ܕܠܐ ܗܘܐ ܒܠܚܘܕ ܥܠ ܐܝܠܝܢ ܕܥܡܪܝܢ ܒܐܠܟܣܢܕܪܝܐ ܢܪܓܙ ܐܠܐ ܐܦ ܥܠ ܥܡܐ ܕܥܡܪ ܒܐܬܪܐ ܩܫܝܐܝܬ ܗܘܐ ܠܗܘܢ ܣܩܘܒܠܐ ܘܦܩܕ ܕܒܥܓܠ ܘܡܣܪܗܒܐܝܬ ܢܟܢܫܘܢ ܐܢܘܢ ܠܟܠܗܘܢ ܐܟܚܕܐ ܘܒܡܘܬܐ ܩܫܝܐ ܘܡܪܝܪܐ ܢܩܛܠܘܢ ܐܢܘܢ
2 ܘܟܕ ܐܬܦܩܕܘ ܕܝܢ ܗܢܐ ܦܘܩܕܢܐ ܛܒܐ ܒܝܫܐ ܘܡܪܝܪܐ ܢܦܩ ܗܘܐ ܥܠ ܟܠܗ ܥܡܢ ܒܝܕ ܐܢܫ̈ܐ ܕܗܦܟܘ ܡܢ ܢܡܘܣܐ ܥܠ ܕܠܐ ܫܒܩܘ ܐܢܘܢ ܕܢܫܬܘܬܦܘܢ ܥܡܗܘܢ
3 ܝܘ̈ܕܝܐ ܕܝܢ ܢܛܪܝܢ ܗܘܘ ܪܚܡܘܬܐ ܠܘܬ ܡܠܟܐ
4 ܟܕ ܙܗܝܪܝܢ ܗܘܘ ܒܩ̈ܝܡܘܗܝ ܘܢܡ̈ܘܣܘܗܝ ܕܐܠܗܐ ܘܢܛܪܝܢ ܗܘܘ ܦܘܪ̈ܫܢܐ ܕܡܐܟ̈ܠܬܐ ܘܡܛܠܗܢܐ ܡܬܚܙܝܢ ܗܘܘ ܠܣܓ̈ܝܐܐ ܐܝܟ ܪ̈ܡܐ ܘܫܒܗܪ̈ܢܐ
5 ܗܢܘܢ ܕܝܢ ܒܟܠ ܦܘܠܚܢܐ ܕܟܐܢܘܬܐ ܡܬܕܒܪܝܢ ܗܘܘ ܘܡܬܚܙܝܢ ܗܘܘ ܕܓܒܝܢ ܘܒܚܝܪܝܢ ܡܢ ܟܠܗܘܢ ܒܢܝ̈ܢܫܐ
6 ܥܠ ܦܘܩܕܢܐ ܕܝܢ ܕܢܦܩ ܥܠ ܥܡܢ ܕܢܬܡܢܐ ܡܢ ܥܡ̈ܡܐ ܠܐ ܐܬܡܨܝܘ ܒܚܝܠܐ ܕܢܡܢܘܢ ܐܢܘܢ
7 ܘܡܛܠ ܕܠܐ ܡܬܪܡܝܢ ܗܘܘ ܠܡܐܟ̈ܠܬܗܘܢ ܘܠܣ̈ܓܕܬܗܘܢ ܐܦܩܘ ܥܠܝܗܘܢ ܛܒܐ ܕܐܡܪܝܢ ܕܠܐ ܠܡܠܟܐ ܚܫܒܝܢܢ ܘܠܐ ܫܠܡܝܢܢ ܠܦܘܠܚܢܐ ܕܚܝܠܘ̈ܗܝ ܡܛܠ ܕܐܝܬܝܗܘܢ ܐܢܫ̈ܐ ܡܪ̈ܘܕܐ ܘܣܓܝ ܩܝܡܝܢ ܠܘܩܒܠ ܦܘܩ̈ܕܢܘܗܝ ܘܨܒܘ̈ܬܗ ܕܡܠܟܐ ܘܠܐ ܗܘܐ ܫܚܝܡܐܝܬ ܐܦܩܘ ܣܢܐܬܗܘܢ ܘܛܒܗܘܢ ܒܝܫܐ
8 ܥܡ̈ܡܐ ܕܝܢ ܕܐܝܬ ܗܘܘ ܒܗ ܒܡܕܝܢܬܐ ܡܛܠ ܕܡܕܡ ܕܒܝܫ ܠܐ ܚܙܘ ܒܝܘ̈ܕܝܐ ܕܗܘܝܢ ܗܘܘ ܥܡܗܘܢ ܘܚܙܘ ܒܝܫܬܐ ܘܫܓܘܫܝܐ ܕܡܢ ܫܠܝܐ ܗܘܐ ܠܗܘܢ ܘܪܗܛܐ ܡܣܪܗܒܐ ܕܩܛܝܪܐ ܕܢܥܕܪܘܢ ܐܢܘܢ ܡܕܡ ܠܐ ܡܫܟܚܝܢ ܗܘܘ ܡܛܠ ܕܩܫܐ ܗܘܐ ܘܥܙܝܙ ܦܘܩܕܢܐ ܕܥܠܝܗܘܢ ܒܥܝܢ ܗܘܘ ܕܝܢ ܘܡܦܝܣܝܢ ܠܐܠܘܨ̈ܝܗܘܢ ܒܥܩܬܐ ܣܓܝܐܬܐ ܘܐܡܪܝܢ ܗܘܘ ܠܗܘܢ
9 ܕܠܐ ܗܟܢܐ ܩܫܝܐܝܬ ܬܐܠܨܘܢ ܐܢܘܢ ܠܐ ܓܝܪ ܡܫܟܚ ܟܠܗ ܗܢܐ ܣܘܓܐܐ ܕܥܡܐ ܕܢܐܒܕ ܕܠܐ ܣܟܠܘܬܐ
10 ܫܪܝܘ ܗܘܘ ܕܝܢ ܐܦ ܡܢ ܪ̈ܚܡܝܗܘܢ ܘܫܒ̈ܒܝܗܘܢ ܕܙܒܢܝܢ ܗܘܘ ܡܢܗܘܢ ܘܡܦܝܣܝܢ ܗܘܘ ܠܗܘܢ ܠܐܠܘ̈ܨܐ ܒܢܟܠܐ ܘܐܡܪܝܢ ܗܘܘ ܠܗܘܢ ܕܚܢܢ ܥܒܕܝܢܢ ܠܗܘܢ ܕܢܕܒܚܘܢ ܗܢܘܢ ܕܝܢ ܐܝܬܝܗܘܢ ܗܘܘ ܒܨܠܘܬܐ ܘܒܓܥܬܐ ܘܡܣܟܝܢ ܗܘܘ ܘܚܝܪܝܢ ܕܢܗܘܐ ܠܗܘܢ ܦܘܪܩܢܐ
11 ܡܠܟܐ ܕܝܢ ܡܫܬܒܗܪ ܗܘܐ ܘܡܬܬܪܝܡ ܘܡܬܥܙܙ ܒܪܥܝܢܗ ܡܫܩܠܐ ܘܠܐ ܚܐܪ ܗܘܐ ܘܡܣܟܐ ܠܐܘܚܕܢܗ ܕܐܠܗܐ ܪܒܐ ܐܠܐ ܣܒܪ ܗܘܐ ܕܒܟܠܙܒܢ ܒܗܕܐ ܬܪܥܝܬܐ ܡܩܘܐ ܗܘܐ ܘܒܗܢܐ ܫܘܠܛܢܐ ܕܚܝܠܗ ܟܬܒ ܘܫܕܪ ܥܠܝܗܘܢ ܐܓܪܬܐ ܗܟܢܐ
12 ܦܛܘܠܡܐܘܣ ܦܝܠܘܡܐܛܘܪ ܡܠܟܐ ܠܐܣܛܪ̈ܛܝܓܐ ܘܡܕܒܪ̈ܢܐ ܘܦ̈ܠܚܐ ܕܡܨܪܝܢ ܘܕܟܠ ܐܬܪ ܫܠܡܐ ܘܚܘܠܡܢܐ
13 ܚܠܝܡ ܐܢܐ ܕܝܢ ܐܦ ܐܢܐ ܘܨܒ̈ܘܬܢ
14 ܡܢ ܒܬܪ ܕܙܟܝܢ ܘܐܬܝܢ ܡܢ ܩܪܒܐ ܕܗܘܐ ܠܢ ܒܐܣܝܐ ܗܘ ܕܝܕܥܝܢ ܐܢܬܘܢ ܠܗ ܐܦ ܐܢܬܘܢ ܒܥܘܕܪܢܐ ܕܐܠܗ̈ܐ ܕܠܐ ܡܙܕܟܝܢ ܕܗܘܐ ܥܡܢ
15 ܨܒܝܢ ܕܠܐ ܒܐܘܠܨܢܐ ܘܠܐ ܒܩܛܝܪܐ ܐܠܐ ܒܡܟܝܟܘܬܐ ܣܓܝܐܬܐ ܘܒܡܪܚܡܢܘܬܐ ܢܣܥܘܪ ܥܡ ܟܠܗܘܢ ܥܡ̈ܡܐ ܕܥܡܪܝܢ ܒܣܘܪܝܐ ܘܒܦܘܢܝܩܐ ܐܟܡܐ ܕܐܦ ܥܒܕܢ
16 ܘܝܗܒܢ ܩܘܪ̈ܒܢܐ ܣܓܝ̈ܐܐ ܘܪ̈ܘܪܒܐ ܠܟܠܗܘܢ ܟܘܡܪ̈ܐ ܕܒܟܠ ܡܕܝ̈ܢܬܐ ܘܐܬܪܥܝܢ ܕܢܦܘܩ ܐܦ ܠܐܘܪܫܠܡ ܘܢܝܩܪ ܠܗܝܟܠܗܘܢ ܕܡܚܝ̈ܒܐ ܘܚܣܝܪ̈ܝ ܪܥܝܢܐ ܕܒܟܠܙܒܢ
17 ܗܢܘܢ ܕܝܢ ܒܡܠܬܐ ܩܒܠܘ ܡܐܬܝܬܢ ܘܒܥܒܕܐ ܐܝܟ ܢܘܟܪ̈ܝܐ ܚܫܒܘܢ ܟܕ ܓܝܪ ܨܒܝܢ ܕܢܥܘܠ ܠܗܝܟܠܗܘܢ ܘܢܝܩܪܝܘܗܝ ܒܡܘܗ̈ܒܬܐ ܘܐܝܩܪ̈ܐ ܪ̈ܘܪܒܐ
18 ܗܢܘܢ ܒܪܡܘܬܐ ܘܒܫܘܒܗܪܐ ܕܐܚܝܕ ܗܘܐ ܠܗܘܢ ܟܠܐܘܢ ܕܠܐ ܢܥܘܠ ܘܚܣܪܘ ܡܢ ܐܝܩܪܐ ܕܨܒܝܢ ܠܡܥܒܕ ܠܗܘܢ ܐܝܟ ܪܚܡܬܢ ܕܠܘܬ ܟܠ ܐܢܫ
19 ܘܗܢܘܢ ܓܠܘ ܘܚܘܝܘ ܣܢܐܬܗܘܢ ܕܠܘܬܢ ܕܐܝܟ ܕܥܠ ܥܡ̈ܡܐ ܗܘ ܒܠܚܘܕ ܡܡܠܟܝܢܢ ܘܠܥܒ̈ܕܝ ܛܒ̈ܬܗܘܢ ܕܒܟܠܙܒܢ ܗܢܘܢ ܡܛܠ ܪܡܘܬܗܘܢ ܘܫܘܒܗܪܗܘܢ ܒܨܥܪܐ ܩܒܠܘ ܘܡܕܡ ܕܚܘܒܐ ܨܝܕܝܗܘܢ ܠܐ ܚܘܝܘ
20 ܠܢ ܕܝܢ ܣܓܝ ܐܬܒܐܫ ܠܢ ܥܠ ܡܪܚܘܬܗܘܢ ܘܚܣܝܪܘܬ ܪܥܝܢܗܘܢ ܕܗܠܝܢ ܘܒܙܟܘܬܐ ܐܬܝܢ ܠܡܨܪܝܢ ܘܠܟܠܗܘܢ ܥܡ̈ܡܐ ܒܚܕܘܬܐ ܘܒܫܠܡܐ ܩܒܠܢ ܘܐܝܟ ܡܐ ܕܙܕܩ ܗܘܐ ܠܢ ܗܟܢܐ ܥܒܕܢ
21 ܘܥܠ ܗܠܝܢ ܕܝܢ ܘܥܠ ܒ̈ܢܝ ܥܡܗܘܢ ܐܟܬܐ ܐܘ ܪܘܓܙܐ ܡܕܡ ܠܐ ܐܝܬ ܗܘܐ ܠܢ ܡܛܠ ܕܒܫܘܝܘܬܐ ܘܒܐܘܝܘܬܐ ܐܝܬܝܢ ܗܘܝܢ ܘܨ̈ܒܘܬܐ ܗܝܡܢܢ ܐܢܘܢ ܘܫܒܩܢ ܒܐܝܕܝ̈ܗܘܢ ܘܣܟ̈ܠܘܬܐ ܘܡܪ̈ܚܘܬܐ ܕܥܒ̈ܝܕܢ ܗܘ̈ܝ ܠܗܘܢ ܙܒ̈ܢܬܐ ܣܓܝ̈ܐܬܐ ܡܢ ܩܕܝܡ ܫܒܩܢ ܠܗܘܢ ܘܨܒܝܢ ܕܢܟܬܘܒ ܐܢܘܢ ܐܠܟܣܢܕܪ̈ܝܐ ܒ̈ܢܝ ܡܕܝܢܬܢ ܘܫ̈ܘܬܦܐ ܠܟܘܡܪ̈ܐ ܕܐܒ̈ܗܝܢ
22 ܗܢܘܢ ܕܝܢ ܚܝܪܝܢ ܗܘܘ ܘܡܣܟܝܢ ܠܣܢܐܬܐ ܘܒܒܝܫܬܐ ܗܝ ܕܢܨܝܒܐ ܒܗܘܢ ܕܚܘ ܘܫܕܘ ܡܢܗܘܢ ܛܒܬܐ ܘܡܛܠ ܕܒܟܠܙܒܢ ܠܒܝܫܬܐ ܚܝܪܝܢ
23 ܠܐ ܗܘܐ ܒܠܚܘܕ ܡܦܪܩ ܠܐ ܦܪܩܘ ܘܫܢܝܘ ܡܢ ܕܚܠܬܗܘܢ ܫܛܝܬܐ ܘܡܨܥܪܬܐ ܐܠܐ ܐܦ ܡܣܠܝܢ ܒܡܠܬܐ ܘܒܥܒܕܐ ܠܐܝܠܝܢ ܕܩܠܝܠ ܐܫܟܚܘ ܒܗܘܢ ܕܒܚܘܒܐ ܘܒܫܠܡܘܬܐ ܐܝܬܝܗܘܢ ܨܐܝܕܝܢ ܘܒܟܠ ܙܒܢ ܠܩܘܒܠܢ ܩܝܡܝܢ ܘܫܪܝܢ ܟܠ ܦܘܩ̈ܕܢܐ ܘܢܡ̈ܘܣܐ ܕܡܬܬܣܝܡܝܢ ܡܢܢ
24 ܘܒܟܠܡܕܡ ܣܩܘܒܠܐ ܐܢܘܢ ܠܢ ܘܟܒܪ ܐܢ ܢܓܕܫ ܘܢܗܘܐ ܠܢ ܩܪܒܐ ܥܡ ܒܥܠܕܒܒ̈ܝܢ ܐܦ ܗܠܝܢ ܪ̈ܫܝܥܐ ܘܡܚܝ̈ܒܐ ܢܬܬܘܣܦܘܢ ܠܢ ܥܡܗܘܢ ܘܢܗܘܘܢ ܡܢ ܡܫܠܡ̈ܢܝܢ ܘܒܥܠܕܒܒ̈ܝܢ
25 ܡܛܠ ܗܢܐ ܗܟܝܠ ܦܩܕܢ ܘܫܕܪܢ ܕܒܗ ܒܫܥܬܐ ܕܡܩܒܠܝܢ ܐܢܬܘܢ ܐܓܪܬܢ ܗܕܐ ܠܗܠܝܢ ܕܟܬܝܒܝܢ ܒܗ ܬܐܚܕܘܢ ܐܢܘܢ ܥܡ ܢܫ̈ܝܗܘܢ ܘܒ̈ܢܝܗܘܢ ܘܥܡ ܟܠ ܕܐܝܬ ܠܗܘܢ ܘܒܨܥܪܐ ܘܒܐܣܘܪܝܐ ܬܫܕܪܘܢ ܐܢܘܢ ܠܘܬܢ ܟܕ ܦܟܝܪܝܢ ܒܦܪܙܠܐ ܘܐܠܝܨܝܢ ܒܟܠ ܐܘܠܨܢ
26 ܟܕ ܓܝܪ ܢܫܬܩܠܘܢ ܘܢܐܒܕܘܢ ܗܠܝܢ ܡܢܢ ܢܗܘܐ ܠܢ ܫܠܡܐ ܘܫܝܢܐ ܒܟܠܙܒܢ ܒܡܠܟܘܬܢ ܘܐܢܬܘܢ ܬܐܪܒܘܢ ܘܬܬܝܬܪܘܢ ܘܬܬܩܪܒܘܢ ܠܬܪܥܝܬܝ
27 ܐܢ ܐܢܫ ܕܝܢ ܢܛܫܐ ܡܢ ܝܘ̈ܕܝܐ ܡܢ ܣܒ̈ܐ ܘܥܕܡܐ ܠܛܠܝ̈ܐ ܘܝܠܘ̈ܕܐ ܕܝܢܩܝܢ ܚܠܒܐ ܒܐܘܠܨܢܐ ܘܒܫ̈ܢܕܐ ܣܓܝ̈ܐܐ ܢܡܘܬ ܥܡ ܟܠܗ ܒܝܬܗ
28 ܘܐܝܢܐ ܕܢܐܬܐ ܘܢܒܕܩ ܥܠܘܗܝ ܢܬܝܗܒ ܠܗ ܩܢܝܢܗ ܕܗܘ ܕܡܫܬܟܚ ܒܗܕܐ ܣܟܠܘܬܐ ܘܡܢ ܒܝܬ ܩܣܪ ܬ̈ܠܬܐ ܐܠܦ̈ܝܢ ܕܟܣܦܐ ܘܚܐܪܘܬܐ ܘܟܠܝܠܐ ܢܩܒܠ
29 ܟܠ ܐܬܪ ܕܝܢ ܕܢܫܬܟܚ ܒܗ ܝܘܕܝܐ ܕܡܛܫܝ ܢܗܘܐ ܝܩܝܕ ܒܢܘܪܐ ܘܚܪܒ ܐܝܟ ܡܕܒܪܐ ܘܒܢܝ̈ܢܫܐ ܕܐܝܬ ܒܗ ܢܣܬܪܚܘܢ ܘܢܐܒܕܘܢ ܡܢ ܒܢܝ̈ܢܫܐ
30 ܦܚܡܐ ܕܝܢ ܕܡܠܝ̈ܗ ܕܐܓܪܬܐ ܗܠܝܢ ܐܝܬܝܗܝܢ ܗܘܝ