Read 3 Maccabees 2 side by side with translations · The Final Bible
1 ܫܡܥܘܢ ܕܝܢ ܪܒ ܟܗ̈ܢܐ ܣܡ ܒܘܪܟܐ ܩܕܡ ܡܕܒܚܐ ܘܦܫܛ ܐܝܕܘ̈ܗܝ ܘܨܠܝ ܒܚܟܡܬܐ ܘܐܡܪ ܗܟܢܐ
2 ܡܪܝܐ ܡܪܝܐ ܡܠܟܐ ܕܫܡܝܐ ܘܡܪܐ ܕܟܠ ܕܝܢܐ ܩܕܝܫܐ ܕܒܩܕܝܫ̈ܐ ܒܠܚܘܕܘܗܝ ܩܕܡܝܐ ܐܚܝܕ ܟܘܠ ܚܘܪ ܒܢ ܕܗܐ ܡܬܐܠܨܝܢܢ ܡܢ ܛܡܐܐ ܘܡܣܝܒܐ ܘܫܒܗܪܢܐ ܘܚܝܠܐ ܟܪܝܗܐ ܘܕܘܝܐ
3 ܐܢܬ ܗܘ ܓܝܪ ܕܒܪܝܬ ܟܠ ܘܟܠ ܐܚܝܕ ܐܢܬ ܒܚܝܠܟ ܙܕܝܩܐ ܐܢܬ ܗܘ ܓܝܪ ܕܠܟܘܠ ܐܝܠܝܢ ܕܡܬܬܪܝܡܝܢ ܘܡܫܬܩܠܝܢ ܒܟܠ ܥܒ̇ܕ ܐܢܬ
4 ܕܐܢ ܐܢܬ ܠܩܕܡܝ̈ܐ ܕܥܒܕܘ ܥܘܠܐ ܐܦ ܠܓܢܒܪ̈ܐ ܕܥܡܗܘܢ ܕܬܟܝܠܝܢ ܗܘܘ ܥܠ ܥܘܫܢܐ ܕܚܝܠܗܘܢ ܚܒܠܬ ܒܡ̈ܝܐ ܣܓܝ̈ܐܐ ܕܛܘܦܢܐ ܕܠܐ ܡܬܟܠܝܢ
5 ܐܢܬ ܠܣܕܘ̈ܡܝܐ ܕܡܫܬܩܠܝܢ ܗܘܘ ܘܡܬܬܪܝܡܝܢ ܒܥܒ̈ܕܝܗܘܢ ܟܕ ܐܬܓܠܝܬ ܘܐܬܝܕܥܬ ܒܝܫܘܬܗܘܢ ܐܘܩܕܬ ܐܢܘܢ ܒܢܘܪܐ ܘܒܟܒܪܝܬܐ ܘܥܒܕܬ ܐܢܘܢ ܚܙܘܐ ܕܬܕܡܘܪܬܐ ܠܟܠܗܘܢ ܕܪ̈ܐ ܕܡܢ ܒܬܪܗܘܢ
6 ܐܢܬ ܠܦܪܥܘܢ ܪܒܐ ܘܫܒܗܪܢܐ ܕܫܥܒܕ ܠܥܡܟ ܩܕܝܫܐ ܕܐܝܣܪܝܠ ܫܢܩܬ ܘܢܓܕܬ ܒܟܠ ܡܚܘ̈ܢ ܘܐܘܕܥܬ ܚܝܠܐ ܕܪܒܘܬܟ ܘܚܘܝܬ ܐܘܚܕܢܟ ܥܫܝܢܐ
7 ܘܟܕ ܪܕܦ ܒܬܪ ܥܡܟ ܒܪ̈ܟܫܐ ܘܒܡܪ̈ܟܒܬܐ ܘܒܥܡܐ ܣܓܝܐܐ ܛܒܥܬܝܗܝ ܒܥܘ̈ܡܩܘܗܝ ܕܝܡܐ ܥܡ ܟܠܗ ܚܝܠܗ ܠܗܢܘܢ ܕܝܢ ܕܗܝܡܢܘ ܒܟ ܒܗܘ ܕܡܬܡܨܐ ܐܢܬ ܒܟܠ ܕܨܒܝܬ ܒܟܘܠܗ̇ ܒܪܝܬܐ ܟܕ ܚܠܝܡܝܢ ܢܛܪܬ ܐܢܘܢ
8 ܘܟܕ ܚܙܘ ܥܒ̈ܕܝܟ ܫܒܚܘܟ ܠܟ ܐܚܝܕ ܟܠ
9 ܐܢܬ ܡܠܟܐ ܕܥܒܕܬ ܐܪܥܐ ܕܠܐ ܡܬܬܟܝܠܐ ܘܠܐ ܡܬܡܫܚܐ ܓܒܝܬ ܗܕܐ ܡܕܝܢܬܐ ܘܩܕܫܬ ܗܢܐ ܐܬܪܐ ܠܫܡܟ ܗܘ ܕܠܐ ܣܢܝܩ ܥܠ ܡܕܡ ܘܫܒܚܬܝܗܝ ܒܓܠܝܢܐ ܕܪܒܘܬ ܝܐܝܘܬܟ ܘܥܒܕܬ ܠܗ ܫܡܐ ܘܩܝܡܐ ܠܬܫܒܘܚܬܗ ܕܫܡܟ ܪܒܐ ܘܡܝܩܪܐ
10 ܘܡܛܠ ܕܥܒܕܬ ܘܐܚܒܬ ܠܒܝܬܐ ܕܒܝܬ ܐܝܣܪܝܠ ܐܫܬܘܕܝܬ ܠܗܘܢ ܕܐܢ ܢܚܛܘܢ ܘܢܗܦܟܘܢ ܡܢ ܠܘܬܟ ܘܢܩܕܡܘܢ ܐܢܘܢ ܐܘ̈ܠܨܢܐ ܘܥܩ̈ܬܐ ܘܢܐܬܘܢ ܘܢܨܠܘܢ ܒܐܬܪܐ ܗܢܐ ܕܬܫܡܥ ܒܩܠܐ ܕܒܥܘܬܗܘܢ
11 ܘܗܫܐ ܡܗܝܡܢ ܐܢܬ ܗܘ ܘܫܪܝܪ ܐܢܬ
12 ܡܛܠ ܕܙܒ̈ܢܬܐ ܣܓܝ̈ܐܬܐ ܕܐܬܐܠܨܘ ܐܒ̈ܗܝܢ ܥܕܪܬ ܐܢܘܢ ܡܢ ܐܘܠܨ̈ܢܝܗܘܢ ܘܦܪܩܬ ܐܢܘܢ ܡܢ ܟܠ ܥܩܐ ܘܟܘܠ ܩܝܢܕܘܢܘܣ
13 ܘܗܫܐ ܡܠܟܐ ܩܕܝܫܐ ܡܛܠ ܚܛܗ̈ܝܢ ܪ̈ܘܪܒܐ ܘܣܓܝ̈ܐܐ ܗܐ ܡܬܐܠܨܝܢܢ ܘܡܫܬܥܒܕܝܢܢ ܠܒܥܠܕܒ̈ܒܝܢ ܘܡܫܪܝܢܢ ܒܟܪܝܗܘܬܢ
14 ܘܗܐ ܗܢܐ ܪܫܝܥܐ ܘܛܡܐܐ ܘܡܣܝܒܐ ܨܒܐ ܕܢܨܥܪ ܠܐܬܪܐ ܩܕܝܫܐ ܕܐܬܓܒܝ ܘܐܬܝܕܥ ܥܠ ܐܪܥܐ ܠܫܡܟ ܡܝܬܪܐ ܘܩܕܝܫܐ
15 ܡܥܡܪܟ ܓܝܪ ܒܫܡ̈ܝ ܫܡܝܐ ܐܝܬܘܗܝ ܘܡܥܠܝ ܡܢ ܟܠܗܘܢ ܒܢܝ̈ܢܫܐ
16 ܐܠܐ ܡܛܠ ܕܨܒܝܬ ܕܬܫܪܐ ܬܫܒܘܚܬܟ ܒܥܡܟ ܐܝܣܪܝܠ ܩܕܫܬ ܠܐܬܪܐ ܗܢܐ
17 ܠܐ ܗܟܝܠ ܬܬܒܥ ܡܢܢ ܒܝܕ ܛܡܐܘܬܗܘܢ ܕܗܠܝܢ ܘܠܐ ܬܟܣܢ ܒܣܘܝܒܗܘܢ ܕܠܐ ܢܫܬܒܗܪܘܢ ܥܘ̈ܠܐ ܒܪܘܫܥܗܘܢ ܘܠܐ ܢܚܕܘܢ ܒܪܡܘܬܐ ܕܠܫܢܗܘܢ ܘܢܐܡܪܘܢ
18 ܕܚܢܢ ܕܫܢ ܒܝܬ ܡܩܕܫܐ ܐܝܟ ܕܡܬܬܕܝܫܝܢ ܒܝܬ ܦܬܟܪ̈ܐ
19 ܐܠܐ ܥܛܝ ܚܛܗ̈ܝܢ ܘܫܒܘܩ ܣܟ̈ܠܘܬܢ ܘܐܢܗܪ ܐܦܝ̈ܟ ܒܢ ܒܗܕܐ ܫܥܬܐ
20 ܘܒܥܓܠ ܢܩܕܡܘܢܢ ܪ̈ܚܡܝܟ ܡܪܝܐ ܘܗܒ ܬܫܒܘܚܬܟ ܒܦܘܡܗܘܢ ܕܡܡ̈ܟܟܐ ܘܫܚܝܩ̈ܝ ܢܦܫܐ ܘܥܒܕ ܠܢ ܫܠܡܐ
21 ܒܗܢܐ ܐܬܪܐ ܡܪܝܐ ܕܝܢ ܐܠܗܐ ܚܙܐ ܟܠ ܘܐܒܐ ܕܐܒܗ̈ܐ ܘܩܕܝܫܐ ܕܩܕܝ̈ܫܐ ܫܡܥ ܒܩܠܐ ܕܨܠܘܬܗ ܘܕܒܥܘܬܗ ܘܠܗܘ ܕܩܕܡ ܩܠܝܠ ܡܫܬܒܗܪ ܗܘܐ ܘܡܬܬܪܝܡ ܢܓܕܗ
22 ܡܟܐ ܘܡܟܐ ܘܫܢܩܗ ܒܐܘܠܨܢܐ ܣܓܝܐܐ ܘܐܫܬܪܝ ܘܢܦܠ ܥܠ ܐܪܥܐ ܘܪܥܠ ܗܘܐ ܟܠܗ ܐܝܟ ܩܢܝܐ ܡܢ ܩܕܡ ܪܘܚܐ ܐܝܟܢܐ ܕܐܦܠܐ ܡܠܬܐ ܡܫܟܚ ܗܘܐ ܠܡܡܠܠܘ ܒܦܘܪܥܢܐ ܕܕܝܢܐ ܟܐܢܐ ܕܩܕܡܗ
23 ܗܟܢܐ ܕܟܕ ܚܙܘ ܪ̈ܚܡܘܗܝ ܘܢܛܘܪ̈ܘܗܝ ܦܘܪܥܢܐ ܚܪܝܦܐ ܕܐܕܪܟܗ ܕܚܠܘ ܕܠܡܐ ܐܦ ܡܡܬ ܢܡܘܬ ܠܗ ܘܒܪܫܥܬܗ ܢܓܕܘ ܘܐܦܩܘܗܝ ܠܒܪ ܟܕ ܕܚܝܠܝܢ ܗܘܘ ܕܚܠܬܐ ܪܒܬܐ
24 ܡܢ ܒܬܪ ܩܠܝܠ ܕܝܢ ܬܒܬ ܢܦܫܗ ܘܗܘܐ ܥܠ ܗܘܢܗ ܘܠܐ ܨܒܐ ܕܢܬܘܒ ܡܢ ܪܥܝܢܗ ܩܫܝܐ ܐܠܐ ܟܕ ܡܬܠܚܡ ܠܗܘܢ ܒܚܡܬܐ ܪܒܬܐ ܘܩܫܝܬܐ ܫܩܠ ܘܐܙܠ ܡܢ ܬܡܢ
25 ܘܟܕ ܐܙܠ ܕܝܢ ܦܝܠܘܡܛܘܪ ܠܡܨܪܝܢ ܘܥܕܟܝܠ ܒܝܫܬܗ ܪܒܝܐ ܗܘܬ ܘܣܓܝܐ ܥܡ ܟܠܗܘܢ ܪ̈ܘܪܒܢܘܗܝ ܘܪ̈ܚܡܘܗܝ ܗܢܘܢ ܕܦܪܝܩܝܢ ܗܘܘ ܡܢ ܟܠܗ ܟܐܢܘܬܐ
26 ܠܐ ܣܦܩ ܠܗ ܪ̈ܘܫܠܝܗܘܢ ܣܓܝ̈ܐܐ ܕܠܐ ܡܬܡܢܝܢ ܐܠܐ ܥܕܡܐ ܠܗܕܐ ܟܠܗ ܡܪܚܘܬܐ ܐܬܐ ܥܕܡܐ ܕܢܡܠܠ ܡ̈ܠܐ ܕܓܘܕܦܐ ܥܠ ܐܬܪܐ ܐܦ ܣܓܝ̈ܐܐ ܡܢ ܪ̈ܚܡܘܗܝ ܟܕ ܚܙܘ ܪܥܝܢܗ ܕܡܠܟܐ ܐܦ ܗܢܘܢ ܫܠܡܘ ܠܬܪܥܝܬܗ ܕܪܫܝܥܐ
27 ܟܬܒ ܕܝܢ ܡܠܟܐ ܘܣܡ ܦܘܩܕܢܐ ܥܠ ܒ̈ܢܝ ܥܡܢ ܘܥܒܕ ܨܠܡܐ ܓܠܝܦܐ ܘܐܩܝܡ ܒܝܢܬ ܡ̈ܓܕܠܐ ܕܕܪܬܐ
28 ܘܟܬܒ ܕܟܠ ܡܢ ܕܠܐ ܢܕܒܚ ܠܗ ܠܐ ܢܗܘܐ ܥܐܠ ܠܗܝܟܠܐ ܕܐܠܗܐ ܘܟܠܗܘܢ ܕܝܢ ܝܘ̈ܕܝܐ ܢܬܟܬܒܘܢ ܘܢܐܬܘܢ ܠܦܘܠܚܢܐ ܘܠܫܘܥܒܕܐ ܕܥܒܕܘܬܐ ܘܠܐܝܠܝܢ ܕܥܨܝܢ ܡܢܗܘܢ ܢܗܘܘܢ ܡܝܬܝܢ ܒܩܛܝܪܐ ܘܒܫ̈ܢܕܐ ܢܩܛܠܘܢ ܐܢܘܢ
29 ܘܠܗܢܘܢ ܕܝܢ ܕܡܬܟܬܒܝܢ ܢܪܫܡܘܢ ܐܢܘܢ ܒܢܘܪܐ ܒܪܘܫܡܗ ܕܕܝܘܢܘܣܝܣ ܕܢܗܘܘܢ ܬܚܝܬ ܫܘܥܒܕܗ ܕܡܠܟܐ
30 ܘܕܠܐ ܕܝܢ ܢܬܚܙܐ ܠܣܓܝ̈ܐܐ ܐܝܟ ܕܒܩܛܝܪܐ ܐܠܝܨܝܢ ܚܢܢ ܟܬܒ ܗܟܢܐ ܕܟܠ ܐܝܠܝܢ ܕܨܒܝܢ ܡܢܗܘܢ ܕܢܫܬܘܬܦܘܢ ܠܪܥܝܢܐ ܕܕܚܠܬܢ ܢܬܟܬܒܘܢ ܐܠܟܣܢܕܪ̈ܝܐ ܒܢܝ̈ ܡܕܝܢܬܗ ܕܡܕܝܢܬܗ ܕܡܠܟܐ
31 ܘܐܢܫܝܢ ܡܢܗܘܢ ܩܠܝܠ ܐܝܠܝܢ ܕܠܐ ܡܫܪܪ ܗܘܐ ܪܥܝܢܗܘܢ ܒܦܘܠܚܢܐ ܕܕܚܠܬ ܐܠܗܐ ܘܒܩܝ̈ܡܝܗ ܕܡܕܝܢܬܢ ܥܬܝܕܐܝܬ ܐܫܠܡܘ ܢܦܫܗܘܢ ܐܝܟ ܐܢܫܐ ܕܠܡܕܡ ܕܛܒ ܘܡܝܬܪ ܐܫܬܘܬܦܘ ܠܦܘܩܕܢܗ ܕܡܠܟܐ
32 ܣܘܓܐܗ ܕܝܢ ܕܥܡܐ ܐܬܚܝܠܘ ܘܐܬܥܫܢܘ ܓܢܒܪܐܝܬ ܘܠܐ ܦܪܩܘ ܘܫܢܝܘ ܡܢ ܟܠܗ ܙܕܝܩܘܬܐ ܐܠܐ ܐܫܠܡܘ ܩܢܝ̈ܢܝܗܘܢ ܥܠ ܐܦܝ̈ ܚܝܝ̈ܗܘܢ ܕܢܦܪܩܘܢ ܢܦ̈ܫܬܗܘܢ ܡܢ ܡܟܬܒܢܘܬܐ
33 ܘܡܣܒܪܝܢ ܗܘܘ ܘܡܣܟܝܢ ܗܘܘ ܕܗܘܐ ܗܘܐ ܠܗܘܢ ܦܘܪܩܢܐ ܘܠܐܝܠܝܢ ܕܦܪܫܝܢ ܢܦܫܗܘܢ ܘܡܫܢܝܢ ܗܘܘ ܡܢܗܘܢ ܐܝܟ ܛܡ̈ܐܐ ܐܚܝܕܝܢ ܗܘܘ ܠܗܘܢ ܘܐܝܟ ܒܥܠܕܒ̈ܒܐ ܚܫܝܒܝܢ ܗܘܘ ܠܗܘܢ ܘܡܢ ܛܝܒܘܬܐ ܕܫܘܬܦܘܬܐ ܟܢܫ̈ܐ ܓܠܙܝܢ ܗܘܘ ܠܗܘܢ