Read 3 Maccabees 1 side by side with translations · The Final Bible
1 ܦܛܠܘܡܐܘܣ ܕܝܢ ܦܝܠܘܡܐܛܘܪ ܝܠܦ ܗܘܐ ܡܢ ܐܝܠܝܢ ܕܦܢܘ ܠܘܬܗ ܕܐܚܕ ܐܢܛܝܘܟܘܣ ܐܬܪ̈ܘܬܐ ܐܝܠܝܢ ܕܗܘ ܫܠܝܛ ܗܘܐ ܥܠܝܗܘܢ ܘܫܩܠ ܐܢܘܢ ܡܢܗ ܘܦܩܕ ܠܟܠܗܘܢ ܚܝܠܘ̈ܬܗ ܠܦܪ̈ܫܐ ܘܠܪ̈ܓܠܐ ܕܢܙܕܝܢܘܢ ܘܕܒܪ ܥܡܗ ܐܦ ܠܚܬܗ ܐܪܣܝܢܘܐܐ ܘܐܬܐ ܥܕܡܐ ܠܐܬܪ̈ܘܬܐ ܕܪܦܝ ܐܝܟܐ ܕܫܪܝܐ ܗܘܬ ܡܫܪܝܬܗ ܕܐܢܛܝܘܟܘܣ
2 ܓܒܪܐ ܕܝܢ ܚܕ ܕܫܡܗ ܗܘܐ ܬܐܕܛܘܣ ܟܕ ܨܒܐ ܗܘܐ ܕܢܫܡܠܐ ܢܟܠܗ ܐܬܚܫܒ ܘܕܒܪ ܥܡܗ ܓܒܪ̈ܐ ܚܝ̈ܠܬܢܐ ܟܕ ܡܙܝܢܝܢ ܐܝܠܝܢ ܕܡܢ ܩܕܝܡ ܡܫܠܡܝܢ ܗܘܘ ܠܗ ܡܢ ܚܝܠܘ̈ܗܝ ܕܦܛܘܠܡܘܣ ܘܐܬܐ ܒܠܠܝܐ ܘܢܦܠ ܥܠ ܡܫܟܢܗ ܕܦܛܘܠܡܐܘܣ ܕܢܩܛܠܝܘܗܝ ܠܗ ܒܠܚܘܕܘܗܝ ܘܗܟܢܐ ܢܫܬܪܐ ܘܪܒܐ
3 ܒܗܕܐ ܕܝܢ ܝܕܥ ܕܘܣܝܬܐܘܣ ܒܪ ܕܪܝܡܠܘܣ ܕܡܬܩܪܐ ܗܘܐ ܝܗܘܕܐ ܡܢ ܒܬܪܟܢ ܕܝܢ ܩܒܠ ܗܘܐ ܢܡܘܣܐ ܐܝܬܘܗܝ ܗܘܐ ܕܝܢ ܢܘܟܪܝܐ ܠܩܝܡܐ ܕܐܒܗ̈ܬܐ ܗܘ ܗܢܐ ܐܪܡܝ ܒܡܫܟܢܗ ܕܦܛܠܘܡܘܣ ܠܓܒܪܐ ܚܕ ܡܣܟܢܐ ܘܠܗ ܓܕܫ ܕܢܬܩܛܠ ܚܠܦ ܡܠܟܐ
4 ܗܘܐ ܗܘܐ ܕܝܢ ܩܪܒܐ ܥܫܝܢܐ ܘܨ̈ܒܘܬܗ ܕܐܢܛܝܘܟܘܣ ܣܓܝ ܡܬܩܢܢ ܗ̈ܘܝ ܐܪܣܝܢܘܐܐ ܕܝܢ ܥܒܪܐ ܗܘܬ ܥܠ ܚܝ̈ܠܐ ܟܕ ܫܪܐ ܣܥܪܗ ܘܒܟܝܐ ܗܘܬ ܒܕܡܥ̈ܐ ܣܓܝ̈ܐܬܐ ܘܒܚ̈ܢܓܬܐ ܘܒܥܝܐ ܗܘܬ ܡܢܗܘܢ ܕܢܥܕܪܘܢ ܢܦܫܗܘܢ ܘܢܫܝ̈ܗܘܢ ܘܒ̈ܢܝܗܘܢ ܘܢܬܟܬܫܘܢ ܓܢܒܪܐܝܬ ܘܡܫܬܘܕܝܐ ܗܘܬ ܠܗܘܢ ܕܬܬܠ ܠܟܠ ܓܒܪ ܡܢܗܘܢ ܬܪ̈ܬܝܢ ܡܢ̈ܝܢ ܕܕܗܒܐ ܐܢ ܗܘ ܕܢܬܟܬܫܘܢ ܘܢܙܟܘܢ
5 ܘܗܟܢܐ ܓܕܫ ܘܢܦܠܘ ܩܕܡܝܗܘܢ ܟܠܗܘܢ ܕܠܘܩܒܠܗܘܢ ܘܠܣܓܝ̈ܐܐ ܕܝܢ ܡܢܗܘܢ ܟܕ ܡܡܚܝܢ ܐܚܕܘ ܐܢܘܢ
6 ܘܟܕ ܙܟܐ ܦܛܘܠܘܡܘܣ ܐܬܚܫܒ ܕܢܣܩ ܠܡܕܝ̈ܢܬܐ ܕܩܪ̈ܝܒܢ ܠܗ ܘܢܒܢܐ ܐܢܝܢ
7 ܘܥܒܕ ܕܝܢ ܗܟܢܐ ܘܐܪܦܝ ܫܘܒܩ̈ܢܐ ܠܗܝܟ̈ܠܐ ܕܕܚܠܬܗܘܢ ܘܝܗܒ ܠܗܘܢ ܡܘ̈ܗܒܬܐ ܘܚܝܠ ܘܐܩܝܡ ܐܢܘܢ ܬܚܝܬ ܐܝܕܗ
8 ܐܦ ܝܘ̈ܕܝܐ ܕܝܢ ܫܕܪܘ ܠܘܬܗ ܕܦܝܠܘܡܛܘܪ ܡܢ ܣܒ̈ܐ ܘܩܫܝ̈ܫܐ ܕܥܡܐ ܘܢܫܐܠܘܢ ܒܫܠܡܗ ܘܢܘܒܠܘܢ ܠܗ ܩܘܪܒܢܐ ܘܚܕܘܬܐ ܕܙܟܘܬܗ ܘܟܕ ܩܒܠ ܡܢܗܘܢ ܚܕܝ ܘܝܬܝܪܐܝܬ ܐܬܪܓܪܓ ܕܢܐܬܐ ܠܘܬܗܘܢ
9 ܐܬܐ ܕܝܢ ܠܐܘܪܫܠܡ ܕܒܚ ܠܐܠܗܐ ܪܒܐ ܘܚܝܠܬܢܐ ܐܦ ܠܐܬܪܐ ܝܩܪ ܒܩܘܪ̈ܒܢܐ ܣܓܝ̈ܐܐ
10 ܟܕ ܓܝܪ ܚܙܐ ܒܢܝܢܗ ܕܐܬܪܐ ܘܛܘܟܣܗ ܘܬܫܒܘܚܬܗ ܕܗܝܟܠܐ ܐܬܚܫܒ ܕܢܥܘܠ ܐܦ ܠܓܘܗ ܕܗܝܟܠܐ
11 ܘܗܢܘܢ ܕܝܢ ܐܡܪܘ ܠܗ ܕܠܐ ܫܠܝܛ ܠܟ ܕܬܥܒܕ ܗܕܐ ܡܛܠ ܕܠܐ ܫܠܝܛ ܠܐ ܠܒ̈ܢܝ ܥܡܢ ܐܦܠܐ ܠܟܠܗܘܢ ܟܗ̈ܢܐ ܠܡܥܠ ܐܠܐ ܒܠܚܘܕ ܠܪܒܐ ܕܪ̈ܒܝ ܟܗ̈ܢܐ ܚܕܐ ܙܒܢ ܒܫܢܬܐ ܘܗܘ ܕܝܢ ܒܚܕܐ ܡܢ ܗܠܝܢ ܠܐ ܡܬܛܦܝܣ ܗܘܐ
12 ܘܐܝܬܝܘ ܘܩܪܘ ܩܕܡܘܗܝ ܢܡܘܣܐ ܘܬܘܒ ܠܐ ܡܬܛܦܝܣ ܗܘܐ ܐܠܐ ܐܡܪ ܕܠܡܥܠ ܗܘ ܡܬܒܥܐ ܠܝ ܘܐܢܗܘ ܕܗܢܘܢ ܐܬܓܠܙܘ ܡܢ ܗܢܐ ܐܝܩܪܐ ܐܠܐ ܐܢܐ ܠܐ ܡܬܓܠܙ ܡܢܗ
13 ܘܡܫܐܠ ܗܘܐ ܠܗܘܢ ܘܐܡܪ ܕܡܢܘ ܕܟܕ ܥܐܠ ܐܢܐ ܠܟܠܗܘܢ ܗܝܟ̈ܠܐ ܕܕܚܠܬܐ ܐܢܫ ܠܐ ܟܠܢܝ ܡܢ ܐܝܠܝܢ ܕܐܝܬ ܒܗܘܢ
14 ܘܥܢܐ ܚܕ ܡܢܗܘܢ ܘܐܡܪ ܠܗ ܬܟܝܠܐܝܬ ܕܒܝܫܐܝܬ ܗܝ ܗܕܐ ܡܥܪܝܢ ܐܢܬܘܢ
15 ܘܗܘ ܕܝܢ ܥܢܐ ܘܐܡܪ ܕܐܢ ܬܨܒܘܢ ܘܐܠܐ ܠܡܥܠ ܡܬܒܥܐ ܠܝ
16 ܟܗ̈ܢܐ ܕܝܢ ܐܬܟܣܝܘ ܠܒܘܫܗܘܢ ܩܕܝܫܐ ܘܢܦܠܘ ܥܠ ܐܦ̈ܝܗܘܢ ܘܓܥܝܢ ܗܘܘ ܘܒܥܝܢ ܩܕܡ ܐܠܗܐ ܪܒܐ ܘܚܝܠܬܢܐ ܕܢܥܕܪ ܘܢܦܪܘܩ ܐܢܘܢ ܘܢܗܦܟ ܬܪܥܝܬܗ ܒܝܫܬܐ ܘܡܚܫܒܬܗ ܕܥܘܠܐ ܘܡܠܐܘܗܝ ܗܘܘ ܕܝܢ ܠܗܝܟܠܐ ܕܡܥ̈ܐ ܘܩܠܐ ܕܓܥܬܐ
17 ܒ̈ܢܝ ܡܕܝܢܬܐ ܕܝܢ ܟܠܗܘܢ ܟܕ ܙܝܥܝܢ ܘܪܗܝܒܝܢ ܫܘܪ̈ܝܢ ܗܘܘ ܘܢܦܩܝܢ ܘܡܣܟܝܢ ܕܡܢܐ ܢܓܕܫ
18 ܘܒ̈ܬܘܠܬܐ ܚܒ̈ܝܫܬܐ ܥܡ ܐܡܗ̈ܬܗܝܢ ܢܦ̈ܩܢ ܗܘܝ ܟܕ ܪܡܐ ܥܦܪܐ ܘܩܛܡܐ ܥܠ ܪ̈ܝܫܝܗܝܢ ܘܒܒܟܬܐ ܘܒ̈ܕܡܥܐ ܘܒܚ̈ܢܓܬܐ ܡܬܟܪ̈ܟܢ ܗܘܝ ܒܫ̈ܘܩܐ
19 ܘܟ̈ܠܠܬܐ ܕܝܢ ܐܝܠܝܢ ܕܗܫܐ ܗܘܝ ܠܓܒܪ̈ܐ ܫܒ̈ܩܝ ܓܢܘ̈ܢܝܗܝܢ ܕܙܒܢܐ ܘܬܚܦܝܬܐ ܕܐܣܟܝܡܐ ܕܢܟܦܘܬܗܝܢ ܘܪ̈ܗܛܢ ܗܘܝ ܘܦܗ̈ܝܢ ܒܫܘܩܐ ܕܠܐ ܒܗܬܬܐ
20 ܘܢܫ̈ܐ ܫܒ̈ܩܝ ܝܠܘ̈ܕܝܗܝܢ ܘܡܬܟܪ̈ܟܢ ܗܘ̈ܝ ܘܚܕܪ̈ܢ ܠܟܐ ܘܠܟܐ ܒܫܘ̈ܩܐ ܘܒܒܪ̈ܝܬܐ ܘܟܠܗ ܕܝܢ ܥܡܐ ܡܬܟܢܫ ܗܘܐ ܘܐܬܐ ܠܘܬ ܗܝܟܠܐ ܡܫܒܚܐ
21 ܘܓܥܝܢ ܗܘܘ ܘܒܥܝܢ ܕܬܬܒܛܠ ܬܪܥܝܬܗ ܘܟܠܡܕܡ ܕܐܬܚܫܒ
22 ܒ̈ܢܝ ܥܡܐ ܕܝܢ ܟܕ ܚܙܘ ܕܥܨܐ ܗܘܐ ܕܢܥܘܠ ܘܠܐ ܡܬܛܦܝܣ ܕܢܬܟܠܐ ܡܢ ܪܥܝܢܗ ܒܝܫܐ
23 ܐܡܪܘ ܚܕ ܠܚܕ ܒܩܠܐ ܪܡܐ ܕܢܣܒܘܢ ܙܝܢܗܘܢ ܘܥܬܝܕܐܝܬ ܘܓܢܒܪܐܝܬ ܢܡܘܬܘܢ ܥܠ ܐܦ̈ܝ ܢܡܘܣܐ ܘܩܝ̈ܡܐ ܕܐܒܗ̈ܬܐ ܘܗܘܐ ܫܓܘܫܝܐ ܘܫܚܩܐ ܪܒܐ ܒܐܬܪܐ ܠܡܚܣܢ ܕܝܢ ܩܡܘ ܡܢ ܟܗ̈ܢܐ ܘܩܫܝ̈ܫܐ ܘܟܠܐܘܗܝ ܠܥܡܐ ܒܩܛܝܪܐ ܘܐܦܢܝܘ ܐܢܘܢ ܥܠ ܨܠܘܬܐ ܘܓܥܬܐ
24 ܟܠܗ ܕܝܢ ܥܡܐ ܩܐܡ ܗܘܐ ܒܨܠܘܬܐ ܘܒܒܥܘܬܐ ܩܕܡܝܗܘܢ ܕܗܢܘܢ
25 ܪ̈ܘܪܒܢܐ ܕܝܢ ܘܡܝܩܪ̈ܐ ܕܐܝܬ ܗܘܐ ܥܡܗ ܥܡ ܡܠܟܐ ܡܬܦܪܣܝܢ ܗܘܘ ܘܒܥܝܢ ܘܡܦܝܣܝܢ ܠܗ ܕܢܗܦܘܟ ܘܢܫܠܐ ܡܢ ܬܪܥܝܬܗ ܒܝܫܬܐ ܘܡܢ ܡܚܫܒܬܗ ܕܥܘܠܐ
26 ܗܘ ܕܝܢ ܒܚܕܐ ܡܢ ܗܠܝܢ ܠܐ ܡܬܛܦܝܣ ܗܘܐ ܐܠܐ ܡܬܬܪܝܡ ܗܘܐ ܘܡܫܬܩܠ ܘܫܪܝ ܗܘܐ ܕܢܥܘܠ ܒܥܙܝܙܘܬܗ ܟܕ ܣܒܪ ܗܘܐ ܕܢܫܠܡ ܬܪܥܝܬܗ
27 ܟܕ ܗܘܝܢ ܕܝܢ ܗܠܝܢ ܐܦ ܐܝܠܝܢ ܕܥܡܗ ܚܙܘ ܘܗܦܟܘ ܡܢ ܕܚܠܬܗܘܢ ܚܙܝܢ ܗܘܘ ܠܟܠܗ ܥܡܢ ܕܒܥܝܢ ܗܘܘ ܘܩܪܘ ܠܗܘ ܕܐܚܝܕ ܫܘܠܛܢܐ ܥܠ ܟܠ ܕܢܗܦܟ ܦܘܪܥܢܐ ܘܒܝܫܬܐ ܥܠ ܒܥܠܕܒ̈ܒܐ ܘܠܐ ܢܗܡܐ ܚܝܪܗ ܡܢ ܥܒܕܐ ܕܥܘܠܐ ܘܡܢ ܣܘܥܪܢܐ ܕܪܡܘܬܐ ܘܕܫܘܒܗܪܐ ܕܗܘܐ ܒܥܒܪ ܢܡܘܣܐ
28 ܡܬܟܢܫܝܢ ܗܘܘ ܕܝܢ ܟܠܗܘܢ ܐܟܚܕܐ ܘܒܥܝܢ ܗܘܘ ܘܓܥܝܢ ܒܩܠܐ ܕܚܢܓܬܐ ܝܬܝܪ ܡܢ ܕܠܡܐܡܪ
29 ܕܗܟܢܐ ܡܣܬܒܪ ܗܘܐ ܩܠܐ ܕܠܐ ܗܘܐ ܒ̈ܢܝܢܫܐ ܒܠܚܘܕ ܓܥܝܢ ܗܘܘ ܐܠܐ ܘܐܦ ܫܘܪ̈ܐ ܘܐܣ̈ܐ ܘܐܦ ܗܝ ܐܪܥܐ ܘܕܟܠܗܘܢ ܡܫܠܡܐ ܗܘܬ ܢܦܫܗܘܢ ܠܡܘܬܐ ܥܠ ܐܦܝ̈ ܗܝܟܠܐ ܕܠܐ ܢܣܬܝܒ