2 Samuel 9 — Coptic (Sahidic)

1 ⲡⲉϫⲉⲇⲁⲩⲉⲓⲇ ⲇⲉ ϫⲉⲉϣⲱⲡⲉ ⲟⲩⲛⲣⲱⲙⲉ ⲉⲁϥⲥⲉⲉⲡⲉ ⲉⲃⲟⲗ ϩⲙⲡⲏⲓ ⲛⲥⲁⲟⲩⲗ ϯⲛⲁⲉⲓⲣⲉ ⲛⲁϥ ⲛⲟⲩⲛⲁ ⲉⲧⲃⲉⲓⲱⲛⲁⲑⲁⲛ

2 ⲛⲉⲟⲩⲛⲟⲩϩⲙϩⲁⲗ ⲇⲉ ϣⲟⲟⲡ ⲉⲃⲟⲗ ϩⲙⲡⲏⲓ ⲛⲥⲁⲟⲩⲗ ⲉⲡⲉϥⲣⲁⲛ ⲡⲉ ⲥⲓⲃⲁ ⲁⲩⲙⲟⲩⲧⲉ ⲇⲉ ⲉⲣⲟϥ ⲁⲩⲉⲛⲧϥ ⲉⲣⲁⲧϥ ⲛⲇⲁⲩⲉⲓⲇ ⲡⲉϫⲉⲡⲣⲣⲟ ⲛⲁϥ ϫⲉⲉⲛⲉⲛⲧⲟⲕ ⲡⲉ ⲥⲓⲃⲁ ⲡⲉϫⲁϥ ϫⲉⲁⲛⲟⲕ ⲡⲉⲕϩⲙϩⲁⲗ

3 ⲡⲉϫⲉⲡⲣⲣⲟ ⲛⲁϥ ϫⲉⲉϣⲱⲡⲉ ⲟⲩⲛ ⲁⲣⲱⲙⲉ ⲥⲉⲉⲡⲉ ⲉⲃⲟⲗ ϩⲙⲡⲏⲓ ⲛⲥⲁⲟⲩⲗ ϯⲛⲁⲉⲓⲣⲉ ⲛⲁϥ ⲛⲟⲩⲛⲁ ⲛⲧⲉⲡⲛⲟⲩⲧⲉ ⲡⲉϫⲉⲥⲓⲃⲁ ϩⲓⲧϩⲏ ⲙⲡⲣⲣⲟ ϫⲉⲟⲩⲛⲟⲩϣⲏⲣⲉ ⲉⲡⲁⲓⲱⲛⲁⲑⲁⲛ ⲡⲉ ⲉⲣⲉⲛⲉϥⲟⲩⲉⲣⲏⲧⲉ ϣⲟⲟϭⲉ

4 ⲡⲉϫⲉⲡⲣⲣⲟ ⲛⲁϥ ϫⲉⲉⲣⲉⲡⲁⲓ ⲛⲧⲱⲛ ⲡⲉϫⲉⲥⲓⲃⲁ ϫⲉⲉⲓⲥϩⲏⲏⲧⲉ ϥϩⲙⲡⲏⲓ ⲙⲙⲁⲭⲓⲣ ⲡϣⲏⲣⲉ ⲛⲥⲁⲙⲁⲏⲗ ⲡⲉⲉⲃⲟⲗ ϩⲛⲗⲁⲇⲁⲃⲁⲣ

5 ⲁⲩⲱ ⲡⲣⲣⲟ ⲇⲁⲩⲉⲓⲇ ⲁϥϫⲟⲟⲩ ⲁϥϫⲓⲧϥ ⲉⲃⲟⲗ ϩⲙⲡⲏⲓ ⲛⲙⲁⲭⲓⲣ ⲡϣⲏⲣⲉ ⲛⲥⲁⲙⲁⲏⲗ ⲡⲉⲉⲃⲟⲗ ϩⲛⲗⲁⲇⲁⲃⲁⲣ

6 ⲁϥⲉⲓ ⲇⲉ ⲛϭⲓⲙⲉⲙⲫⲓⲃⲟⲥⲑⲉ ⲡϣⲏⲣⲉ ⲛⲓⲱⲛⲁⲑⲁⲛ ⲡϣⲏⲣⲉ ⲛⲥⲁⲟⲩⲗ ⲉⲣⲁⲧϥ ⲙⲡⲣⲣⲟ ⲇⲁⲩⲉⲓⲇ ⲁϥⲡⲁϩⲧϥ ϩⲓⲧϩⲏ ⲙⲙⲟϥ ⲁϥⲟⲩⲱϣⲧ ⲛⲁϥ ⲡⲉϫⲉⲇⲁⲩⲉⲓⲇ ⲛⲁϥ ϫⲉⲙⲉⲙⲫⲓⲃⲟⲥⲑⲉ ⲡⲉϫⲁϥ ϫⲉⲉⲓⲥϩⲏⲏⲧⲉ ⲁⲛⲟⲕ ⲡⲉⲕϩⲙϩⲁⲗ

7 ⲡⲉϫⲉⲇⲁⲩⲉⲓⲇ ⲛⲁϥ ϫⲉⲙⲡⲣⲣϩⲟⲧⲉ ϫⲉϩⲛⲟⲩⲉⲓⲣⲉ ϯⲛⲁⲉⲓⲣⲉ ⲛⲙⲙⲁⲕ ⲛⲟⲩⲛⲁ ⲉⲧⲃⲉⲓⲱⲛⲁⲑⲁⲛ ⲡⲉⲕⲉⲓⲱⲧ ⲁⲩⲱ ϯⲛⲁϯ ⲛⲁⲕ ⲛⲛⲉⲓⲱϩⲉ ⲧⲏⲣⲟⲩ ⲛⲥⲁⲟⲩⲗ ⲡⲉⲓⲱⲧ ⲙⲡⲉⲕⲉⲓⲱⲧ ⲁⲩⲱ ⲛⲧⲟⲕ ⲕⲛⲁϭⲱ ⲉⲕⲟⲩⲉⲙⲟⲉⲓⲕ ⲛⲙⲙⲁⲓ ϩⲓϫⲛⲧⲁⲧⲣⲁⲡⲉⲍⲁ ⲛⲟⲩⲟⲉⲓϣ ⲛⲓⲙ

8 ⲙⲉⲙⲫⲓⲃⲟⲥⲑⲉ ⲇⲉ ⲁϥⲡⲁϩⲧϥ ⲁϥⲟⲩⲱϣⲧ ⲉϥϫⲱ ⲙⲙⲟⲥ ϫⲉⲟⲩ ⲡⲉ ⲡⲉⲕϩⲙϩⲁⲗ ϫⲉⲁⲕϭⲱϣⲧ ⲉϫⲛⲟⲩⲟⲩϩⲟⲣ ⲉϥⲙⲟⲟⲩⲧ ⲕⲁⲧⲁⲧⲁⲙⲓⲛⲉ

9 ⲁⲩⲱ ⲇⲁⲩⲉⲓⲇ ⲁϥⲙⲟⲩⲧⲉ ⲉⲥⲓⲃⲁ ⲡϩⲙϩⲁⲗ ⲛⲥⲁⲟⲩⲗ ⲡⲉϫⲁϥ ⲛⲁϥ ϫⲉⲛⲕⲁ ⲛⲓⲙ ⲉⲛⲁⲥⲁⲟⲩⲗ ⲛⲉ ⲁⲩⲱ ⲉⲧⲏⲡ ⲧⲏⲣⲟⲩ ⲉⲡⲉϥⲏⲓ ⲉⲓⲥ ϩⲏⲏⲧⲉ ⲁⲓⲧⲁⲁⲩ ⲧⲏⲣⲟⲩ ⲙⲡϣⲏⲣⲉ ⲙⲡⲉⲕϫⲟⲉⲓⲥ

10 ⲁⲣⲓϩⲱⲃ ϭⲉ ⲉⲡⲉϥⲕⲁϩ ⲛⲧⲟⲕ ⲙⲛⲛⲉⲕϣⲏⲣⲉ ⲙⲛⲛⲉⲕϩⲙϩⲁⲗ ⲛⲅϫⲓⲟⲉⲓⲕ ⲉϩⲟⲩⲛ ⲙⲡϣⲏⲣⲉ ⲙⲡⲉⲕϫⲟⲉⲓⲥ ⲛⲥⲉⲟⲩⲱⲙ ⲙⲙⲟⲟⲩ ⲁⲩⲱ ⲙⲉⲙⲫⲓⲃⲟⲥⲑⲉ ⲡϣⲏⲣⲉ ⲙⲡⲉⲕϫⲟⲉⲓⲥ ⲉϥⲉϭⲱ ⲉϥⲟⲩⲉⲙⲟⲉⲓⲕ ⲛⲙⲙⲁⲓ ⲛⲟⲩⲟⲉⲓϣ ⲛⲓⲙ ϩⲓϫⲛⲧⲁⲧⲣⲁⲡⲉⲍⲁ ⲥⲓⲃⲁ ⲇⲉ ⲛⲉⲟⲩⲛⲛⲧⲁϥ ⲙⲙⲁⲩ ⲙⲙⲛⲧⲏ ⲛϣⲏⲣⲉ ⲁⲩⲱ ϫⲟⲩⲱⲧ ⲛϩⲙϩⲁⲗ

11 ⲡⲉϫⲉⲥⲓⲃⲁ ϩⲓⲧϩⲏ ⲙⲡⲣⲣⲟ ϫⲉⲕⲁⲧⲁϩⲱⲃ ⲛⲓⲙ ⲛⲧⲁⲡⲁϫⲟⲉⲓⲥ ⲡⲣⲣⲟ ϩⲱⲛ ⲙⲙⲟⲟⲩ ⲛⲧⲟⲟⲧϥ ⲙⲡⲉϥϩⲙϩⲁⲗ ⲧⲁⲓ ⲧⲉ ⲧϩⲉ ⲉⲧⲉⲣⲉⲡⲉⲕϩⲙϩⲁⲗ ⲛⲁⲁⲁⲩ ⲁⲩⲱ ⲙⲉⲙⲫⲓⲃⲟⲥⲑⲉ ⲇⲉ ⲛⲉϥⲟⲩⲱⲙ ϩⲓϫⲛⲧⲉⲧⲣⲁⲡⲉⲍⲁ ⲛⲇⲁⲩⲉⲓⲇ ⲛⲧϩⲉ ⲛⲟⲩⲁ ⲛⲛϣⲏⲣⲉ ⲙⲡⲣⲣⲟ

12 ⲙⲉⲙⲫⲓⲃⲟⲥⲑⲉ ⲇⲉ ⲛⲉⲟⲩⲛⲧⲁϥ ⲙⲙⲁⲩ ⲛⲟⲩϣⲏⲣⲉ ⲉⲡⲉϥⲣⲁⲛ ⲡⲉ ⲙⲓⲭⲁ ⲁⲩⲱ ⲛⲉⲧⲏⲡ ⲧⲏⲣⲟⲩ ⲉⲡⲏⲓ ⲛⲥⲓⲃⲁ ⲛⲉ ⲛϩⲙϩⲁⲗ ⲙⲙⲉⲙⲫⲓⲃⲟⲥⲑⲉ

13 ⲙⲉⲙⲫⲓⲃⲟⲥⲑⲉ ⲇⲉ ⲛⲉϥⲟⲩⲏϩ ϩⲛⲧϩⲓⲉⲣⲟⲩⲥⲁⲗⲏⲙ ⲉⲃⲟⲗ ϫⲉⲛⲉϥⲟⲩⲱⲙ ⲛⲟⲩⲟⲉⲓϣ ⲛⲓⲙ ϩⲓϫⲛⲧⲉⲧⲣⲁⲡⲉⲍⲁ ⲙⲡⲣⲣⲟ ⲛⲧⲟϥ ⲇⲉ ⲛⲉ ⲟⲩϭⲁⲗⲉ ⲡⲉ ⲛⲧⲉϥⲟⲩⲉⲣⲏⲧⲉ ⲥⲛⲧⲉ