2 Samuel 10 — Coptic (Sahidic)

1 ⲁⲥϣⲱⲡⲉ ⲇⲉ ⲙⲛⲛⲥⲁⲛⲁⲓ ⲁϥⲙⲟⲩ ⲛϭⲓⲡⲣⲣⲟ ⲛⲛϣⲏⲣⲉ ⲛⲁⲙⲙⲱⲛ ⲁⲩⲱ ⲁϥⲣⲣⲣⲟ ⲛϭⲓⲁⲛⲛⲱⲛ ⲡⲉϥϣⲏⲣⲉ ⲉⲡⲉϥⲙⲁ

2 ⲡⲉϫⲉⲇⲁⲩⲉⲓⲇ ϫⲉϯⲛⲁⲉⲓⲣⲉ ⲛⲟⲩⲛⲁ ⲙⲛⲁⲛⲛⲱⲛ ⲡϣⲏⲣⲉ ⲛⲛⲁⲁⲁⲥ ⲕⲁⲧⲁⲧϩⲉ ⲛⲧⲁⲡⲉϥⲉⲓⲱⲧ ⲉⲓⲣⲉ ⲛⲙⲙⲁⲓ ⲛⲟⲩⲛⲁ ⲁⲩⲱ ⲁϥϫⲟⲟⲩ ⲛϭⲓⲇⲁⲩⲉⲓⲇ ⲉⲥⲗⲥⲱⲗϥ ⲉⲃⲟⲗ ϩⲓⲧⲟⲟⲧⲟⲩ ⲛⲛⲉϥϩⲙϩⲁⲗ ⲉϫⲙⲡⲉϥⲉⲓⲱⲧ ⲁⲩⲉⲓ ⲇⲉ ⲛϭⲓⲛϩⲙϩⲁⲗ ⲛⲇⲁⲩⲉⲓⲇ ⲉϩⲣⲁⲓ ⲉⲡⲕⲁϩ ⲛⲁⲙⲙⲱⲛ

3 ⲁⲩⲱ ⲛⲁⲣⲭⲱⲛ ⲛⲛϣⲏⲣⲉ ⲛⲁⲙⲙⲱⲛ ⲡⲉϫⲁⲩ ⲉϩⲟⲩⲛ ϩⲛⲁⲛⲛⲱⲛ ⲡⲉⲩϫⲟⲉⲓⲥ ϫⲉⲙⲏ ⲉⲃⲟⲗ ϫⲉⲉⲣⲉⲇⲁⲩⲉⲓⲇ ⲟⲩⲱϣ ⲉϯⲉⲟⲟⲩ ⲙⲡⲉⲕⲉⲓⲱⲧ ⲙⲡⲉⲕⲙⲧⲟ ⲉⲃⲟⲗ ⲁϥⲧⲛⲛⲟⲟⲩ ⲛⲁⲕ ⲛⲛⲉⲧⲛⲁⲥⲗⲥⲱⲗⲕ ⲁⲗⲗⲁ ⲛⲧⲁϥⲧⲛⲛⲟⲟⲩⲥⲉ ⲛⲧⲟϥ ϫⲉⲕⲁⲥ ⲉⲩⲉⲙⲉϣⲧⲧⲡⲟⲗⲓⲥ ⲛⲥⲉϯϩⲧⲏⲩ ⲉⲣⲟⲥ ⲇⲁⲩⲉⲓⲇ ⲇⲉ ⲁϥⲧⲛⲛⲟⲟⲩ ⲛⲛⲉϥϩⲙϩⲁⲗ ϣⲁⲣⲟⲕ ⲉϫⲓϫⲛⲓⲧ ⲛⲧⲡⲟⲗⲓⲥ ⲉϯϩⲧⲏⲩ ⲉⲣⲟⲥ

4 ⲁⲩⲱ ⲁⲛⲛⲱⲛ ⲁϥϫⲓ ⲛⲛⲉϩⲙϩⲁⲗ ⲛⲇⲁⲩⲉⲓⲇ ⲁϥϩⲉⲕⲉⲛⲉⲩⲙⲟⲣⲧ ⲁⲩⲱ ⲁϥϣⲉϥⲛⲉⲩϩⲟⲉⲓⲧⲉ ⲉⲧⲉⲩⲡⲁϣⲉ ϣⲁⲉϩⲣⲁⲓ ⲉⲛⲉⲩⲓⲥⲭⲓⲟⲛ ⲁϥⲟⲩⲟⲟⲧⲟⲩ ⲉⲃⲟⲗ

5 ⲁⲩϫⲓⲡⲟⲩⲱ ⲇⲉ ⲛⲇⲁⲩⲉⲓⲇ ⲉⲧⲃⲉⲛⲉϥⲣⲱⲙⲉ ⲁⲩⲱ ⲁϥϫⲟⲟⲩ ⲉⲣⲁⲧⲟⲩ ⲉⲃⲟⲗ ϫⲉⲛⲣⲱⲙⲉ ⲁⲩⲥⲟϣⲟⲩ ⲉⲙⲁⲧⲉ ⲉⲣⲉⲡⲣⲣⲟ ϫⲱ ⲙⲙⲟⲥ ⲉⲣⲟⲟⲩ ϫⲉϩⲙⲟⲟⲥ ⲛⲏⲧⲛ ϩⲛϩⲓⲉⲣⲓⲭⲱ ϣⲁⲛⲧⲉⲛⲉⲧⲛⲙⲟⲣⲧ ⲣⲱⲧ ⲛⲧⲉⲧⲛⲕⲉⲧⲧⲏⲩⲧⲛ ϣⲁⲣⲟⲓ

6 ⲁⲩⲱ ⲛⲧⲉⲣⲟⲩⲛⲁⲩ ⲛϭⲓⲛϣⲏⲣⲉ ⲛⲁⲙⲙⲱⲛ ϫⲉⲁⲩϫⲓϣⲓⲡⲉ ⲛϭⲓⲛⲁⲡⲗⲁⲟⲥ ⲛⲇⲁⲩⲉⲓⲇ ⲁⲩϫⲟⲟⲩ ⲛϭⲓⲛϣⲏⲣⲉ ⲛⲁⲙⲙⲱⲛ ⲁⲩⲙⲓⲥⲑⲟⲩ ⲛⲧⲥⲩⲣⲓⲁ ⲙⲛϩⲣⲱⲟⲃ ⲉⲩⲛⲁⲣⲧⲃⲁ ⲥⲛⲁⲩ ⲛⲣⲙⲣⲁⲧⲟⲩ ⲁⲩⲱ ⲡⲣⲣⲟ ⲙⲙⲁⲁⲭⲁ ⲉⲩⲛⲁⲣⲙⲛⲧⲏ ⲛϣⲉ ⲛⲣⲱⲙⲉ ⲁⲩⲱ ⲛⲁⲉⲓⲥⲧⲱϥ ⲉⲩⲛⲁⲣⲙⲛⲧⲥⲛⲟⲟⲩⲥ ⲛϣⲉ ⲛⲣⲱⲙⲉ

7 ⲇⲁⲩⲉⲓⲇ ⲇⲉ ⲁϥϫⲟⲟⲩ ⲛⲓⲱⲁⲃ ⲛⲧⲉⲣⲉϥⲥⲱⲧⲙ ⲙⲛⲡⲉϥⲙⲏⲏϣⲉ ⲧⲏⲣϥ ⲛⲇⲩⲛⲁⲧⲟⲥ ⲧⲏⲣⲟⲩ

8 ⲁⲩⲉⲓ ⲇⲉ ⲉⲃⲟⲗ ⲛϭⲓⲛϣⲏⲣⲉ ⲛⲁⲙⲙⲱⲛ ⲁⲩⲥⲉⲣⲙⲗⲁϩ ⲉⲃⲟⲗ ⲉⲡⲡⲟⲗⲉⲙⲟⲥ ϩⲁⲧⲛⲡⲣⲟ ⲛⲧⲡⲩⲗⲏ ⲛⲧⲥⲩⲣⲓⲁ ⲛⲥⲟⲩⲃⲁ ⲙⲛϩⲣⲱⲟⲃ ⲙⲛⲉⲓⲥⲧⲱⲃ ⲛⲁⲙⲁⲗⲏⲕ ⲇⲉ ⲙⲁⲩⲁⲁⲩ ⲛⲉⲩϩⲛⲧⲥⲱϣⲉ

9 ⲛⲧⲉⲣⲉϥⲛⲁⲩ ⲇⲉ ⲛϭⲓⲓⲱⲁⲃ ϫⲉⲁⲩⲁϩⲉⲣⲁⲧⲟⲩ ⲉⲣⲟϥ ⲛϩⲟ ϩⲓϩⲟ ⲉⲡⲟⲗⲉⲙⲉⲓ ⲛⲙⲙⲁϥ ⲉⲡⲥⲁ ⲡⲥⲁ ⲁϥⲥⲱⲡⲧ ⲉⲃⲟⲗ ϩⲛⲛⲉϩⲉⲣϣⲓⲣⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲁⲩⲁϩⲉⲣⲁⲧⲟⲩ ⲟⲩⲃⲉ ⲧⲥⲩⲣⲓⲁ

10 ⲡⲕⲉⲥⲉⲉⲡⲉ ⲇⲉ ⲙⲡⲗⲁⲟⲥ ⲁϥⲧⲁⲁⲩ ⲉϩⲣⲁⲓ ⲉⲧϭⲓϫ ⲙⲡⲉϥⲥⲟⲛ ⲁⲩⲁϩⲉⲣⲁⲧⲟⲩ ϩⲱⲟⲩ ⲟⲩⲃⲉ ⲛϣⲏⲣⲉ ⲛⲁⲙⲙⲱⲛ

11 ⲉⲣⲉⲓⲱⲁⲃ ϫⲱ ⲙⲙⲟⲥ ⲛⲛⲁⲡⲉϥⲥⲟⲛ ϫⲉⲉⲣϣⲁⲛⲧⲥⲩⲣⲓⲁ ϭⲙϭⲟⲙ ⲉϩⲟⲩⲛ ⲉⲣⲟⲓ ⲉⲧⲉⲧⲛⲛⲉϯ ⲛⲧⲟⲟⲧⲧⲏⲩⲧⲛ ⲛⲙⲙⲁⲓ ⲉⲣϣⲁⲛⲛⲣⲱⲙⲉ ⲇⲉ ⲛⲁⲙⲙⲱⲛ ϭⲙϭⲟⲙ ⲉϩⲟⲩⲛ ⲉⲣⲟⲕ ⲁⲛⲟⲛ ϩⲱⲱⲛ ⲧⲛⲛⲁϯ ⲛⲧⲟⲟⲧⲛ ⲛⲙⲙⲁⲕ

12 ⲧⲱⲕ ⲛⲧⲉⲧⲛϭⲙϭⲟⲙ ⲉⲧⲃⲉⲡⲉⲛⲗⲁⲟⲥ ⲁⲩⲱ ⲉⲧⲃⲉⲙⲡⲟⲗⲓⲥ ⲙⲡⲉⲛⲛⲟⲩⲧⲉ ⲁⲩⲱ ⲡϫⲟⲉⲓⲥ ϥⲛⲁⲉⲓⲣⲉ ⲙⲡⲁⲅⲁⲑⲟⲛ ⲛⲁϩⲣⲁϥ

13 ⲓⲱⲁⲃ ⲇⲉ ⲙⲛⲡⲗⲁⲟⲥ ⲉⲧⲛⲙⲙⲁϥ ⲁⲩϯ ⲙⲡⲉⲩⲟⲩⲟⲓ ⲉϩⲟⲩⲛ ⲉⲡⲟⲗⲉⲙⲉⲓ ⲙⲛⲧⲥⲩⲣⲓⲁ ⲁⲩⲱ ⲁⲩϭⲱⲧⲡ ϩⲁⲧⲉϥϩⲏ

14 ⲛϣⲏⲣⲉ ⲇⲉ ϩⲱⲟⲩ ⲛⲁⲙⲙⲱⲛ ⲛⲧⲉⲣⲟⲩⲛⲁⲩ ϫⲉⲁⲧⲥⲩⲣⲓⲁ ϭⲱⲧⲡ ⲁⲩⲗⲟ ϩⲱⲟⲩ ϩⲁⲡϩⲟ ⲛⲁⲃⲓⲥⲁ ⲁⲩⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲓⲱⲁⲃ ϩⲱⲱϥ ⲁϥⲕⲧⲟϥ ⲉⲃⲟⲗ ϩⲛⲛϣⲏⲣⲉ ⲛⲁⲙⲙⲱⲛ ⲁϥⲉⲓ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ

15 ⲧⲥⲩⲣⲓⲁ ⲇⲉ ⲛⲧⲉⲣⲉⲥⲛⲁⲩ ϫⲉⲁⲩϭⲱⲧⲡ ϩⲓⲧϩⲏ ⲙⲡⲓⲥⲣⲁⲏⲗ ⲁⲩⲥⲱⲟⲩϩ ⲉϩⲟⲩⲛ ⲉⲛⲉⲩⲉⲣⲏⲩ

16 ⲁⲩⲱ ⲁϥϫⲟⲟⲩ ⲛϭⲓⲁⲇⲣⲁⲁⲍⲁⲣ ⲁϥⲥⲱⲟⲩϩ ⲉϩⲟⲩⲛ ⲛⲧⲥⲩⲣⲓⲁ ⲛⲉⲧϩⲓⲡⲉⲕⲣⲟ ⲙⲡⲓⲟⲣⲇⲁⲛⲏⲥ ⲭⲁⲗⲁⲙⲁⲭ ⲁⲩⲱ ⲁⲩⲉⲓ ⲉⲑⲁⲗⲁⲙ ⲥⲱⲃⲁⲗ ⲇⲉ ⲡⲁⲣⲭⲱⲛ ⲛⲧϭⲟⲙ ⲛⲁⲇⲣⲁⲁⲍⲁⲣ ⲛⲉϥⲙⲟⲟϣⲉ ϩⲓⲧϩⲏ ⲙⲙⲟⲟⲩ

17 ⲁⲩⲧⲁⲙⲉⲇⲁⲇ ⲇⲉ ⲁⲩⲱ ⲁϥⲥⲱⲟⲩϩ ⲉϩⲟⲩⲛ ⲙⲡⲓⲥⲣⲁⲏⲗ ⲧⲏⲣϥ ⲁϥϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲁϥⲉⲓ ⲉϩⲣⲁⲓ ⲉⲉⲗⲁⲙ ⲁⲧⲥⲩⲣⲓⲁ ⲁϩⲉⲣⲁⲧⲟⲩ ⲟⲩⲃⲉ ⲇⲁⲩⲉⲓⲇ ⲁⲩⲡⲟⲗⲉⲙⲉⲓ ⲛⲙⲙⲁϥ

18 ⲁⲩⲱ ⲧⲥⲩⲣⲓⲁ ⲁⲥϭⲱⲧⲡ ϩⲓⲧϩⲏ ⲛⲇⲁⲩⲉⲓⲇ ⲁⲩⲱ ⲇⲁⲩⲉⲓⲇ ⲁϥⲙⲟⲩⲟⲩⲧ ⲉⲃⲟⲗ ϩⲛⲧⲥⲩⲣⲓⲁ ⲛϥⲧⲟⲟⲩ ⲛϣⲉ ⲛϩⲁⲣⲙⲁ ⲁⲩⲱ ϥⲧⲟⲟⲩ ⲛⲧⲃⲁ ⲛϩⲓⲡⲡⲉⲩⲥ ⲁⲩⲱ ⲥⲱⲃⲁⲗ ⲡⲁⲣⲭⲱⲛ ⲛⲧⲉϥϭⲟⲙ ⲁϥⲡⲁⲧⲁⲥⲥⲉⲓ ⲙⲙⲟϥ ⲁϥⲙⲟⲩ ⲙⲡⲙⲁ ⲉⲧⲙⲙⲁⲩ

19 ⲁⲩⲱ ⲛⲧⲉⲣⲟⲩⲛⲁⲩ ⲛϭⲓⲛⲣⲣⲱⲟⲩ ⲧⲏⲣⲟⲩ ⲛⲉⲧⲟ ⲛϩⲙϩⲁⲗ ⲛⲁⲇⲣⲁⲁⲍⲁⲣ ϫⲉⲁⲩϭⲱⲧⲡ ϩⲓⲧϩⲏ ⲙⲡⲓⲥⲣⲁⲏⲗ ⲁⲩⲡⲱⲧ ⲉⲣⲁⲧϥ ⲙⲡⲓⲥⲣⲁⲏⲗ ⲁⲩⲥⲙⲛⲇⲓⲁⲑⲏⲕⲏ ⲛⲙⲙⲁⲩ ⲁⲩⲣϩⲙϩⲁⲗ ⲛⲁⲩ ⲁⲩⲱ ⲛⲁⲧⲥⲩⲣⲓⲁ ⲁⲩⲣϩⲟⲧⲉ ⲉⲃⲱⲕ ⲛϫⲓⲛ ⲉⲡⲉⲓⲛⲁⲩ ⲉⲙⲓϣⲉ ⲉϫⲛⲛϣⲏⲣⲉ ⲛⲁⲙⲙⲱⲛ