2 Samuel 8 — Coptic (Sahidic)

1 ⲁⲩⲱ ⲙⲛⲛⲥⲁⲛⲉⲓϣⲁϫⲉ ⲇⲁⲩⲉⲓⲇ ⲁϥⲡⲁⲧⲁⲥⲥⲉⲓ ⲛⲛⲁⲗⲗⲟⲫⲩⲗⲟⲥ ⲁϥϭⲟⲧⲡⲟⲩ ⲉⲃⲟⲗ ⲁⲩⲱ ⲇⲁⲩⲉⲓⲇ ⲁϥϫⲓ ⲛⲧⲡⲟⲗⲓⲥ ⲉⲧⲛⲏϩ ⲉⲃⲟⲗ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ

2 ⲁⲩⲱ ⲇⲁⲩⲉⲓⲇ ⲁϥⲡⲁⲧⲁⲥⲥⲉⲓ ⲙⲡⲕⲁϩ ⲙⲙⲱⲁⲃ ⲁϥϣⲓⲧⲟⲩ ϩⲛϩⲉⲛⲛⲟⲩϩ ⲉⲁϥⲣⲟⲕⲧⲟⲩ ⲉⲡⲕⲁϩ ⲁⲩⲱ ⲁϥϣⲓ ⲡⲉⲥⲕⲛⲟⲩϩ ⲥⲛⲁⲩ ⲉⲙⲟⲩⲟⲩⲧ ⲙⲙⲟⲟⲩ ⲡϫⲱⲕ ϫⲉⲙⲡⲉⲥⲕⲛⲟⲩϩ ⲁϥϥⲓⲧⲟⲩ ⲉϥⲟⲛϩ ⲁⲩⲱ ⲡⲗⲁⲟⲥ ⲙⲙⲱⲁⲃ ⲁϥϣⲱⲡⲉ ⲉⲩⲟ ⲛϩⲙϩⲁⲗ ⲛⲇⲁⲩⲉⲓⲇ ⲉⲩϫⲓⲧⲁⲉⲓⲟ ⲛⲁϥ

3 ⲇⲁⲩⲉⲓⲇ ⲇⲉ ⲟⲛ ⲁϥⲡⲁⲧⲁⲥⲥⲉⲓ ⲛⲁⲇⲣⲁⲁⲍⲁⲣ ⲡϣⲏⲣⲉ ⲛⲣⲱⲁⲃ ⲡⲣⲣⲟ ⲛⲥⲟⲩⲃⲁ ⲉϥⲛⲁⲃⲱⲕ ⲉⲕⲧⲉⲧⲟⲟⲧϥ ⲉϫⲙⲡⲓⲉⲣⲟ ⲡⲉⲩⲫⲣⲁⲧⲏⲥ

4 ⲁⲩⲱ ⲇⲁⲩⲉⲓⲇ ⲁϥϫⲓ ϩⲁⲣⲱϥ ⲙⲡⲉϥⲙⲏⲏϣⲉ ⲁϥϥⲓ ⲙⲙⲏⲧ ⲛϣⲉ ⲛϩⲁⲣⲙⲁ ⲛⲧⲟⲟⲧϥ ⲁⲩⲱ ⲥⲁϣϥ ⲛⲧⲃⲁ ⲛϩⲓⲡⲡⲉⲩⲥ ⲁⲩⲱ ⲧⲃⲁ ⲥⲛⲁⲩ ⲛⲣⲙⲣⲁⲧⲟⲩ ⲛϩⲁⲣⲙⲁ ⲇⲉ ⲧⲏⲣⲟⲩ ⲛⲇⲁⲩⲉⲓⲇ ⲁϥⲧⲁⲕⲟⲟⲩ ⲁϥⲕⲱ ⲇⲉ ⲛⲁϥ ⲛϣⲉ ⲛϩⲁⲣⲙⲁ ⲉⲃⲟⲗ ⲛϩⲏⲧⲟⲩ

5 ⲁⲥⲉⲓ ⲇⲉ ⲛϭⲓⲧⲥⲩⲣⲓⲁ ⲛⲇⲁⲙⲁⲥⲕⲟⲥ ⲉⲃⲟⲉⲓⲑⲉⲓ ⲉⲁⲇⲣⲁⲁⲍⲁⲣ ⲡⲣⲣⲟ ⲛⲥⲟⲩⲃⲁ ⲁⲩⲱ ⲇⲁⲩⲉⲓⲇ ⲁϥⲡⲁⲧⲁⲥⲥⲉⲓ ⲛⲧⲥⲩⲣⲓⲁ ⲛϫⲟⲩⲧⲥⲛⲟⲟⲩⲥ ⲛϣⲟ ⲛⲣⲱⲙⲉ

6 ⲁⲩⲱ ⲇⲁⲩⲉⲓⲇ ⲁϥⲕⲱ ⲛϩⲉⲛⲡⲁⲣⲉⲙⲃⲟⲗⲏ ϩⲛⲧⲥⲩⲣⲓⲁ ⲛⲇⲁⲙⲁⲥⲕⲟⲥ ⲉⲧⲣⲉⲩⲣⲟⲉⲓⲥ ⲁⲩⲱ ⲧⲥⲩⲣⲓⲁ ⲁⲥⲣϩⲙϩⲁⲗ ⲛⲇⲁⲩⲉⲓⲇ ⲉⲩⲛⲧⲁⲓⲟ ⲛⲁϥ ⲁⲩⲱ ⲡϫⲟⲉⲓⲥ ⲁϥⲧⲟⲩϫⲉⲇⲁⲇ ϩⲛⲛⲙⲁ ⲛⲧⲁϥⲃⲱⲕ ⲉⲣⲟⲟⲩ

7 ⲇⲁⲩⲉⲓⲇ ⲇⲉ ⲁϥϫⲓ ⲛⲛⲉⲭⲗⲓⲛⲟⲛ ⲏ ⲛⲉⲕⲗⲁⲗ ⲛⲛⲟⲩⲃ ⲛⲁⲓ ⲛⲧⲁⲩⲧⲁⲙⲓⲟⲟⲩ ⲛⲁⲩ ⲛϭⲓⲛϩⲙϩⲁⲗ ⲛⲁⲇⲣⲁⲁⲍⲁⲣ ⲡⲣⲣⲟ ⲛⲥⲟⲩⲃⲁ ⲁϥⲉⲛⲧⲟⲩ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲁϥϫⲓⲧⲟⲩ ⲛϭⲓⲫⲁⲣⲁⲱ ⲡⲣⲣⲟ ⲛⲕⲏⲙⲉ ϩⲙⲡⲧⲣⲉϥⲉⲓ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ϩⲛⲛⲉϩⲟⲟⲩ ⲛⲣⲟⲃⲟⲁⲙ ⲡϣⲏⲣⲉ ⲛⲥⲟⲗⲟⲙⲟⲛ

8 ⲁⲩⲱ ⲇⲁⲩⲉⲓⲇ ⲁϥϫⲓ ⲉⲃⲟⲗ ϩⲛⲛⲉⲙⲁⲥⲃⲁⲕ ⲉⲃⲟⲗ ϩⲛⲙⲡⲟⲗⲓⲥ ⲉⲧⲥⲟⲧⲡ ⲛⲧⲉⲁⲇⲣⲁⲁⲍⲁⲣ ⲛⲟⲩϩⲟⲙⲛⲧ ⲉⲛⲁϣⲱϥ ⲉⲙⲁⲧⲉ ⲛⲧⲁⲥⲟⲗⲟⲙⲟⲛ ⲧⲁⲙⲓⲟ ⲛϩⲏⲧϥ ⲛⲧⲉⲑⲁⲗⲁⲥⲥⲁ ⲛϩⲟⲙⲛⲧ ⲙⲛⲛⲉⲥⲧⲩⲗⲟⲥ ⲁⲩⲱ ⲛⲗⲟⲩⲧⲏⲣ ⲙⲛⲛⲉⲥⲕⲉⲩⲏ ⲧⲏⲣⲟⲩ

9 ⲁⲩⲱ ⲁϥⲥⲱⲧⲙ ⲛϭⲓϩⲟⲟⲩ ⲡⲣⲣⲟ ⲛⲉⲙⲁⲑ ϫⲉⲁⲇⲁⲇ ⲡⲁⲧⲁⲥⲥⲉⲓ ⲛⲧϭⲟⲙ ⲧⲏⲣⲥ ⲛⲁⲇⲣⲁⲁⲍⲁⲣ

10 ⲁⲑⲟⲟⲩ ϫⲟⲟⲩ ⲛⲓⲉⲍⲟⲩⲣⲁⲛ ⲡⲉϥϣⲏⲣⲉ ⲉⲣⲁⲧϥ ⲙⲡⲣⲣⲟ ⲇⲁⲩⲉⲓⲇ ⲉⲥⲉⲡⲥⲱⲡϥ ⲉⲩⲉⲓⲣⲏⲛⲏ ⲁⲩⲱ ⲉⲥⲙⲟⲩ ⲉⲣⲟϥ ϫⲉⲁϥⲡⲁⲧⲁⲥⲥⲉⲓ ⲛⲁⲇⲣⲁⲁⲍⲁⲣ ⲉⲃⲟⲗ ϫⲉⲛⲉⲣⲉⲧϩⲟⲟⲩ ⲡⲟⲗⲉⲙⲉⲓ ⲙⲛⲁⲇⲣⲁⲁⲍⲁⲣ ⲁⲩⲱ ⲛⲉⲩⲉⲛⲧⲟⲟⲧϥ ⲛϭⲓϩⲉⲛⲥⲕⲉⲩⲏ ⲛϩⲁⲧ ⲙⲛϩⲉⲛⲥⲕⲉⲩⲏ ⲛⲛⲟⲩⲃ ⲙⲛϩⲉⲛⲥⲕⲉⲩⲏ ⲛϩⲟⲙⲛⲧ

11 ⲛⲉⲛⲕⲟⲟⲩⲉ ⲁⲡⲣⲣⲟ ⲇⲁⲩⲉⲓⲇ ⲧⲃⲃⲟⲟⲩ ⲁϥⲉⲣⲏⲧ ⲙⲙⲟⲟⲩ ⲙⲡϫⲟⲉⲓⲥ ⲙⲛⲡϩⲁⲧ ⲙⲛⲡⲛⲟⲩⲃ ⲡⲁⲓ ⲛⲧⲁϥⲧⲃⲃⲟϥ ⲉⲃⲟⲗ ϩⲛⲛⲉⲡⲟⲗⲓⲥ ⲧⲏⲣⲟⲩ ⲛⲧⲁϥϭⲙϭⲟⲙ ⲉϩⲣⲁⲓ ⲉϫⲱⲟⲩ

12 ⲉⲃⲟⲗ ϩⲛⲧⲓⲇⲟⲩⲙⲁⲓⲁ ⲁⲩⲱ ⲉⲃⲟⲗ ϩⲙⲙⲱⲁⲃ ⲁⲩⲱ ⲉⲃⲟⲗ ϩⲛⲛϣⲏⲣⲉ ⲛⲁⲙⲙⲱⲛ ⲁⲩⲱ ⲉⲃⲟⲗ ϩⲙⲡⲁⲙⲁⲗⲏⲕ ⲁⲩⲱ ⲉⲃⲟⲗ ϩⲛⲛϣⲟⲗⲥ ⲛⲁⲇⲣⲁⲁⲍⲁⲣ ⲡϣⲏⲣⲉ ⲛϩⲣⲱⲁⲃ ⲡⲣⲣⲟ ⲛⲥⲁⲃⲁ

13 ⲇⲁⲩⲉⲓⲇ ⲇⲉ ⲁϥⲥⲙⲓⲛⲉ ⲛⲁϥ ⲛⲟⲩⲣⲁⲛ ⲛⲥⲟⲉⲓⲧ ⲁⲩⲱ ⲛⲧⲉⲣⲉϥⲕⲧⲟϥ ⲁϥⲡⲁⲧⲁⲥⲥⲉⲓ ⲛⲧⲓⲇⲟⲩⲙⲁⲓⲁ ϩⲙⲡⲉⲓⲁ ⲛⲛⲉϩⲙⲟⲩ ⲙⲙⲛⲧϣⲙⲏⲛ ⲛϣⲟ ⲛⲣⲱⲙⲉ

14 ⲁⲩⲱ ⲁϥⲕⲱ ⲛϩⲉⲛⲣⲉϥⲣⲟⲉⲓⲥ ϩⲛⲧⲓⲇⲟⲩⲙⲁⲓⲁ ⲧⲏⲣⲥ ⲁⲩⲱ ⲛⲓⲇⲟⲩⲙⲁⲓⲟⲥ ⲧⲏⲣⲟⲩ ⲁⲩⲣϩⲙϩⲁⲗ ⲙⲡⲣⲣⲟ ⲁⲩⲱ ⲁⲡϫⲟⲉⲓⲥ ⲧⲟⲩϫⲉⲇⲁⲩⲉⲓⲇ ϩⲛⲛⲙⲁ ⲧⲏⲣⲟⲩ ⲛⲧⲁϥⲃⲱⲕ ⲉⲣⲟⲟⲩ

15 ⲁⲩⲱ ⲁϥⲧⲣⲉⲇⲁⲩⲉⲓⲇ ⲉⲣⲣⲟ ⲉϫⲙⲡⲓⲥⲣⲁⲏⲗ ⲧⲏⲣϥ ⲇⲁⲩⲉⲓⲇ ⲇⲉ ⲛⲉϥⲉⲓⲣⲉ ⲛⲟⲩⲕⲣⲓⲙⲁ ⲙⲛⲟⲩⲇⲓⲕⲁⲓⲟⲥⲩⲛⲏ ϩⲙⲡⲉϥⲗⲁⲟⲥ ⲧⲏⲣϥ

16 ⲁⲩⲱ ⲓⲱⲁⲃ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲛⲉϥϣⲟⲟⲡ ⲉϫⲙⲡⲉϥⲙⲏⲏϣⲉ ⲁⲩⲱ ⲓⲱⲥⲁⲫⲁⲧ ⲡϣⲏⲣⲉ ⲛⲁⲭⲓⲁ ⲛⲧⲟϥ ⲡⲉ ⲉϥⲧⲣⲉⲡⲣⲣⲟ ⲣⲡⲙⲉⲉⲩⲉ

17 ⲥⲁⲇⲇⲟⲩⲕ ⲇⲉ ⲡϣⲏⲣⲉ ⲛⲁⲭⲓⲇⲱⲃ ⲁⲩⲱ ⲁⲃⲓⲙⲉⲗⲉⲭ ⲡϣⲏⲣⲉ ⲛⲁⲃⲓⲁⲑⲁⲣ ⲛⲧⲟⲟⲩ ⲛⲉⲧⲟ ⲛⲟⲩⲏⲏⲃ ⲁⲩⲱ ⲁⲍⲁ ⲛⲧⲟϥ ⲡⲉⲧⲟ ⲛⲅⲣⲁⲙⲙⲁⲧⲉⲩⲥ

18 ⲁⲩⲱ ⲃⲁⲛⲉⲁⲥ ⲡϣⲏⲣⲉ ⲛⲓⲱⲇⲁⲉ ⲛⲧⲟϥ ⲡⲉⲧⲟ ⲛⲥⲩⲙⲃⲟⲗⲟⲥ ⲡⲉⲭⲉⲣⲉⲑⲑⲓ ⲇⲉ ⲙⲛⲡⲟⲫⲉⲗⲉⲑⲓ ⲛϣⲏⲣⲉ ⲛⲇⲁⲩⲉⲓⲇ ⲛⲧⲟⲟⲩ ⲛⲉ ⲛⲁⲣⲭⲱⲛ ⲛⲧⲁⲩⲗⲏ ⲙⲡⲣⲣⲟ