2 Samuel 4 — Coptic (Sahidic)

1 ⲁⲩⲱ ⲓⲉⲃⲟⲩⲥⲑⲉ ⲡϣⲏⲣⲉ ⲛⲥⲁⲟⲩⲗ ⲁϥⲥⲱⲧⲙ ϫⲉⲁⲁⲃⲉⲛⲛⲏⲣ ⲙⲟⲩ ϩⲛⲭⲉⲃⲣⲱⲛ ⲁⲛⲉϥϭⲓϫ ⲕⲱ ⲉⲃⲟⲗ ⲁϥⲥⲧⲱⲧ ⲁⲩⲱ ⲛⲣⲱⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲁⲩϣⲧⲟⲣⲧⲣ

2 ⲣⲱⲙⲉ ⲇⲉ ⲥⲛⲁⲩ ⲛⲇⲩⲛⲁⲧⲟⲥ ⲛⲕⲣⲟϥ ⲉⲩⲏⲡ ⲉⲓⲉⲃⲟⲩⲥⲑⲉ ⲡϣⲏⲣⲉ ⲛⲥⲁⲟⲩⲗ ⲡⲣⲁⲛ ⲙⲡⲟⲩⲁ ⲙⲙⲟⲟⲩ ⲡⲉ ⲃⲁⲁⲛⲛⲁ ⲁⲩⲱ ⲡⲣⲁⲛ ⲙⲡⲙⲉϩⲥⲛⲁⲩ ⲡⲉ ϩⲣⲏⲭⲁⲃ ⲛϣⲏⲣⲉ ⲛϩⲣⲏⲙⲙⲱⲛ ⲡⲃⲏⲣⲟⲑⲉⲟⲥ ⲉⲃⲟⲗ ϩⲛⲛϣⲏⲣⲉ ⲛⲃⲉⲛⲓⲁⲙⲓⲛ ϫⲉⲃⲏⲣⲱⲑ ⲉⲥⲏⲡ ⲉⲛϣⲏⲣⲉ ⲛⲃⲉⲛⲓⲁⲙⲓⲛ

3 ⲛⲃⲏⲣⲱⲑⲉⲟⲥ ⲇⲉ ⲁⲩⲡⲱⲧ ⲉⲅⲉⲑⲑⲁⲓ ⲁⲩⲱ ⲛⲉⲩϭⲁⲗⲱⲟⲩ ⲉⲡⲙⲁ ⲉⲧⲙⲙⲁⲩ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ

4 ⲓⲱⲛⲁⲑⲁⲛ ⲇⲉ ⲡϣⲏⲣⲉ ⲛⲥⲁⲟⲩⲗ ⲛⲉⲟⲩⲛⲛⲧⲁϥ ⲙⲙⲁⲩ ⲛⲟⲩϣⲏⲣⲉ ⲉϥϣⲟⲟϭⲉ ⲉⲛⲉϥⲟⲩⲉⲣⲏⲧⲉ ⲉⲩϣⲏⲣⲉ ⲡⲉ ⲉϥϩⲛϯ ⲛⲣⲟⲙⲡⲉ ⲡⲁⲓ ⲇⲉ ⲛⲧⲉⲣⲟⲩⲛⲡⲟⲩⲱ ⲛⲥⲁⲟⲩⲗ ⲙⲛⲓⲱⲛⲁⲑⲁⲛ ⲡⲉϥϣⲏⲣⲉ ⲉⲃⲟⲗ ϩⲙⲡⲓⲥⲣⲁⲏⲗ ⲧⲉϥⲙⲟⲟⲛⲉ ⲁⲥϥⲓⲧϥ ⲁⲥⲡⲱⲧ ⲛⲙⲙⲁϥ ⲉⲥⲡⲏⲧ ⲇⲉ ⲛⲙⲙⲁϥ ⲉⲁϥϫⲱⲗϩⲥ ⲁϥϩⲉ ⲁϥⲣϭⲁⲗⲉ ⲡⲉϥⲣⲁⲛ ⲡⲉ ⲙⲉⲙⲫⲓⲃⲟⲥⲑⲉ

5 ⲁⲩⲃⲱⲕ ⲇⲉ ⲛϭⲓⲛⲣⲱⲙⲉ ⲛϩⲣⲉⲙⲙⲱⲛ ⲡⲃⲏⲣⲟⲑⲉⲟⲥ ϩⲣⲏⲭⲁⲃ ⲙⲛⲃⲁⲁⲛⲁ ⲁⲩⲟⲛϣⲟⲩ ⲉϩⲟⲩⲛ ⲙⲡⲛⲁⲩ ⲙⲡⲕⲁⲩⲙⲁ ⲙⲙⲉⲉⲣⲉ ⲉⲡⲏⲓ ⲛⲓⲉⲃⲟⲩⲥⲑⲉ ⲛⲧⲟϥ ⲇⲉ ⲛⲉϥⲛⲕⲟⲧⲕ ϩⲓϫⲙⲡⲉϥϭⲗⲟϭ ⲙⲡⲛⲁⲩ ⲙⲙⲉⲉⲣⲉ

6 ⲁⲩⲱ ⲧⲙⲛⲟⲟⲧⲉ ⲙⲡⲏⲓ ⲛⲉⲥⲧⲃⲃⲟ ⲛϩⲉⲛⲥⲟⲩⲟ ⲁⲥϫⲓⲣⲉⲕⲣⲓⲕⲉ ⲇⲉ ⲁⲥⲱⲃϣ ⲁⲩⲱ ⲃⲁⲛⲁⲁ ⲙⲛϩⲣⲏⲭⲁⲃ ⲛⲉϥⲥⲛⲏⲩ ⲙⲡⲉⲗⲁⲁⲩ ⲉⲓⲙⲉ ⲉⲣⲟⲟⲩ

7 ⲁⲩⲟⲛϣⲟⲩ ⲉϩⲟⲩⲛ ⲉⲡⲏⲓ ⲓⲉⲃⲟⲩⲥⲑⲉ ⲇⲉ ⲛⲉϥⲛⲕⲟⲧⲕ ϩⲓϫⲙⲡⲉϥϭⲗⲟϭ ϩⲙⲡⲉϥⲕⲟⲓⲧⲱⲛ ⲁⲩⲕⲟⲛⲥϥ ⲇⲉ ⲁⲩⲙⲟⲟⲩⲧϥ ⲁⲩⲱ ⲁⲩϥⲓ ⲛⲧⲉϥⲁⲡⲉ ⲁⲩⲉⲓ ⲉⲃⲟⲗ ⲉⲩⲙⲟⲟϣⲉ ϩⲛⲧⲉϩⲓⲏ ⲉⲧϫⲓ ⲙⲙⲁ ⲛϩⲱⲧⲡ ⲛⲧⲉⲩϣⲏ ⲧⲏⲣⲥ

8 ⲁⲩⲉⲓⲛⲉ ⲛⲧⲁⲡⲉ ⲛⲓⲉⲃⲟⲩⲥⲑⲉ ⲉⲣⲁⲧϥ ⲛⲇⲁⲩⲉⲓⲇ ϩⲛⲭⲉⲃⲣⲱⲛ ⲡⲉϫⲁⲩ ⲉϩⲟⲩⲛ ϩⲙⲡⲣⲣⲟ ϫⲉⲉⲓⲥⲧⲁⲡⲉ ⲛⲓⲉⲃⲟⲩⲥⲑⲉ ⲡϣⲏⲣⲉ ⲛⲥⲁⲟⲩⲗ ⲡⲉⲕϫⲁϫⲉ ⲉⲛⲉϥⲕⲱⲧⲉ ⲛⲥⲁⲧⲉⲕⲯⲩⲭⲏ ⲁⲩⲱ ⲡϫⲟⲉⲓⲥ ⲁϥϯ ⲙⲡⲉⲛϫⲟⲉⲓⲥ ⲡⲣⲣⲟ ⲛⲟⲩϫⲓⲕⲃⲁ ⲛⲛⲉⲕϫⲁϫⲉ ⲛⲧϩⲉ ⲙⲡϩⲟⲟⲩ ⲛϩⲟⲟⲩ ⲉⲃⲟⲗ ϩⲛⲥⲁⲟⲩⲗ ⲡⲉⲕϫⲁϫⲉ ⲁⲩⲱ ⲉⲃⲟⲗ ϩⲙⲡⲉϥⲥⲡⲉⲣⲙⲁ

9 ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ⲛϩⲣⲏⲭⲁⲃ ⲙⲛⲃⲁⲁⲛⲁ ⲡⲉϥⲥⲟⲛ ⲛϣⲏⲣⲉ ⲛϩⲣⲉⲙⲙⲱⲛ ⲡⲃⲏⲣⲱⲑⲉⲟⲥ ⲉϥϫⲱ ⲙⲙⲟⲥ ⲛⲁⲩ ϫⲉϥⲟⲛϩ ⲛϭⲓⲡϫⲟⲉⲓⲥ ⲡⲁⲓ ⲛⲧⲁϥⲥⲱⲧⲉ ⲛⲧⲁⲯⲩⲭⲏ ⲉⲃⲟⲗ ϩⲛⲑⲗⲓⲯⲓⲥ ⲛⲓⲙ

10 ϫⲉⲡⲉⲛⲧⲁϥⲛⲡⲟⲩⲱ ⲛⲁⲓ ϫⲉⲥⲁⲟⲩⲗ ⲁϥⲙⲟⲩ ⲁⲩⲱ ⲛⲧⲟϥ ⲉϥⲟ ⲛⲧϩⲉ ⲙⲡⲉⲧⲧⲁϣⲉⲟⲉⲓϣ ⲛⲁⲓ ⲛⲟⲩϩⲣⲟⲟⲩ ⲉⲛⲁⲛⲟⲩϥ ⲁⲓⲁⲙⲁϩⲧⲉ ⲙⲙⲟϥ ⲁⲓⲙⲟⲟⲩⲧϥ ϩⲛⲥⲉⲕⲉⲗⲁⲕ ⲡⲁⲓ ⲉⲛⲉⲡⲉⲧⲉϣϣⲉ ⲉⲧⲣⲁϯ ⲛⲁϥ ⲛϩⲛⲧⲁⲉⲓⲟ

11 ⲧⲉⲛⲟⲩ ϭⲉ ϩⲉⲛⲣⲱⲙⲉ ⲙⲡⲟⲛⲏⲣⲟⲥ ⲁⲩⲙⲟⲩⲟⲧ ⲛⲟⲩⲣⲱⲙⲉ ⲛⲇⲓⲕⲁⲓⲟⲥ ϩⲙⲡⲉϥⲏⲓ ϩⲓϫⲙⲡⲉϥⲙⲁ ⲛⲛⲕⲟⲧⲕ ⲁⲩⲱ ⲧⲉⲛⲟⲩ ϯⲛⲁϫⲡⲉⲕⲱⲧⲉ ⲛⲥⲁⲡⲉϥⲥⲛⲟϥ ⲛⲧⲉⲧⲏⲩⲧⲛ ⲁⲩⲱ ϯⲛⲁⲃⲉⲧⲧⲏⲩⲧⲛ ⲉⲃⲟⲗ ϩⲓϫⲙⲡⲕⲁϩ

12 ⲇⲁⲩⲉⲓⲇ ⲇⲉ ⲁϥⲟⲩⲉϩⲥⲁϩⲛⲉ ⲛⲛⲉϥϩⲙϩⲁⲗ ⲁⲩϯ ⲙⲡⲉϥⲟⲩⲟⲓ ⲉϩⲟⲩⲛ ⲉⲣⲟⲟⲩ ⲁⲩⲙⲟⲟⲩⲧⲟⲩ ⲁⲩⲱ ϩⲧⲏⲩ ⲛⲛⲉⲩϭⲓϫ ⲙⲛⲛⲉⲩⲟⲩⲉⲣⲏⲧⲉ ⲁⲩⲟϣⲧⲟⲩ ⲉϫⲛⲧⲉⲕⲉⲓⲣⲏⲛⲏ ⲉⲧϩⲛⲭⲉⲃⲣⲱⲛ ⲧⲁⲡⲉ ⲇⲉ ⲛⲓⲉⲃⲟⲩⲥⲑⲉ ⲁⲩⲧⲟⲙⲥⲥ ϩⲙⲡⲧⲁⲫⲟⲥ ⲛⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ