Read 2 Samuel 3 side by side with translations · The Final Bible
1 ⲡⲡⲟⲗⲉⲙⲟⲥ ⲇⲉ ⲁϥϣⲱⲡⲉ ⲉⲡⲉϩⲟⲩⲟ ⲟⲩⲧⲉ ⲡⲏⲓ ⲛⲥⲁⲟⲩⲗ ⲁⲩⲱ ⲟⲩⲧⲉ ⲡⲏⲓ ⲛⲇⲁⲩⲉⲓⲇ ⲡⲏⲓ ⲇⲉ ⲛⲇⲁⲩⲉⲓⲇ ⲛⲉϥⲛⲏⲩ ⲉⲧϩⲉ ⲁⲩⲱ ⲛⲉϥⲛⲏⲩ ⲛⲧⲁϫⲣⲟ ⲡⲏⲓ ⲇⲉ ⲛⲥⲁⲟⲩⲗ ⲛⲉϥⲛⲏⲩ ⲛϩⲏⲃⲉ ⲁⲩⲱ ⲛⲉϥⲛⲏⲩ ⲛⲣϭⲱⲃ
2 ⲁⲩϫⲡⲟ ⲇⲉ ⲛϩⲉⲛϣⲏⲣⲉ ⲛⲇⲁⲩⲉⲓⲇ ϩⲛⲭⲉⲃⲣⲱⲛ ⲁⲩⲱ ⲡⲉϥϣⲣⲡⲙⲓⲥⲉ ⲡⲉ ⲁⲙⲛⲱⲛ ⲡϣⲏⲣⲉ ⲛⲁⲭⲓⲛⲁⲁⲃ ⲧⲓⲥⲣⲁⲏⲗⲓⲧⲏⲥ
3 ⲁⲩⲱ ⲡⲙⲉϩⲥⲛⲁⲩ ⲛϣⲏⲣⲉ ⲡⲉ ⲭⲁⲗⲏⲃ ⲧⲁⲗⲟⲩⲓⲁ ⲡϣⲏⲣⲉ ⲛⲁⲃⲓⲕⲓⲁ ⲧⲉⲥϩⲓⲙⲉ ⲛⲁⲃⲁⲗ ⲡⲕⲁⲣⲙⲏⲗⲟⲥ ⲡⲙⲉϩϣⲟⲙⲛⲧ ⲇⲉ ⲛϣⲏⲣⲉ ⲡⲉ ⲁⲃⲏⲥⲁⲗⲱⲙ ⲡϣⲏⲣⲉ ⲙⲙⲁⲁⲭⲁ ⲧϣⲉⲉⲣⲉ ⲛⲑⲟⲙⲛⲓ ⲡⲣⲣⲟ ⲛⲅⲉⲥⲓⲣ
4 ⲁⲩⲱ ⲡⲉϥⲙⲉϩϥⲧⲟⲟⲩ ⲛϣⲏⲣⲉ ⲡⲉ ⲟⲣⲛⲓⲁ ⲡϣⲏⲣⲉ ⲙⲫⲉⲅⲉⲑ ⲡⲙⲉϩϯⲟⲩ ⲇⲉ ⲡⲉ ⲫⲁⲗⲓⲁⲥ ⲡϣⲏⲣⲉ ⲛⲁⲃⲓⲇⲁⲗ
5 ⲁⲩⲱ ⲡⲙⲉϩⲥⲟⲟⲩ ⲡⲉ ⲉⲓⲑⲉⲣⲁⲁⲛ ⲡϣⲏⲣⲉ ⲛⲉⲅⲁⲗ ⲧⲉⲥϩⲓⲙⲉ ⲛⲇⲁⲩⲉⲓⲇ ⲛⲁⲓ ⲁⲩϫⲡⲟⲟⲩ ⲛⲇⲁⲩⲉⲓⲇ ϩⲛⲭⲉⲃⲣⲱⲛ
6 ⲛⲧⲉⲣⲉⲡⲡⲟⲗⲉⲙⲟⲥ ⲇⲉ ⲧⲱⲟⲩⲛ ϩⲛⲧⲙⲏⲧⲉ ⲙⲡⲏⲓ ⲛⲥⲁⲟⲩⲗ ⲁⲩⲱ ϩⲛⲧⲙⲏⲧⲉ ⲙⲡⲏⲓ ⲛⲇⲁⲩⲉⲓⲇ ⲁⲃⲉⲛⲛⲏⲣ ⲛⲉϥⲁⲙⲁϩⲧⲉ ⲉϫⲙⲡⲏⲓ ⲛⲥⲁⲟⲩⲗ
7 ⲥⲁⲟⲩⲗ ⲇⲉ ⲛⲉⲟⲩⲛⲛⲧⲁϥ ⲙⲙⲁⲩ ⲛⲟⲩⲡⲁⲗⲗⲁⲕⲏ ⲉⲡⲉⲥⲣⲁⲛ ⲡⲉ ϩⲣⲉⲥⲫⲁ ⲧϣⲉⲉⲣⲉ ⲛⲓⲟⲗ ⲁⲩⲱ ⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲡⲉϫⲁϥ ⲉϩⲟⲩⲛ ϩⲛⲁⲃⲉⲛⲛⲏⲣ ϫⲉⲉⲧⲃⲉⲟⲩ ⲁⲕⲃⲱⲕ ⲉϩⲟⲩⲛ ϣⲁⲧⲡⲁⲗⲗⲁⲕⲏ ⲙⲡⲁⲉⲓⲱⲧ
8 ⲁⲩⲱ ⲁⲃⲉⲛⲛⲏⲣ ⲁϥϭⲱⲛⲧ ⲉⲙⲁⲧⲉ ⲉⲧⲃⲉⲡϣⲁϫⲉ ⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲡⲉϫⲉⲁⲃⲉⲛⲛⲏⲣ ⲉϩⲟⲩⲛ ⲉϩⲣⲁϥ ϫⲉⲙⲏ ⲁⲛⲅ ⲟⲩⲁⲡⲉ ⲁⲛⲟⲕ ⲛⲟⲩϩⲟⲣ ⲉⲁⲓⲉⲓⲣⲉ ⲛⲟⲩⲛⲁ ⲙⲡϩⲟⲟⲩ ⲙⲛⲡⲏⲓ ⲛⲥⲁⲟⲩⲗ ⲡⲉⲕⲉⲓⲱⲧ ⲁⲩⲱ ⲉⲧⲃⲉⲛⲉⲕⲥⲛⲏⲩ ⲙⲛⲛⲉⲣⲉⲙⲛⲥⲟⲟⲩⲛ ⲉⲙⲡⲓⲃⲱⲕ ⲉⲣⲁⲧϥ ⲙⲡⲏⲓ ⲛⲇⲁⲩⲉⲓⲇ ⲁⲩⲱ ⲛⲧⲟⲕ ⲕⲕⲱⲧⲉ ⲛⲥⲁⲟⲩⲡⲉⲧϩⲟⲟⲩ ⲉϩⲟⲩⲛ ⲉⲣⲟⲓ ⲉⲧⲃⲉⲟⲩⲥϩⲓⲙⲉ ⲙⲡϩⲟⲟⲩ
9 ⲛⲁⲓ ⲉⲣⲉⲡⲛⲟⲩⲧⲉ ⲁⲁⲩ ⲛⲁⲃⲉⲛⲛⲏⲣ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉϫⲱϥ ϫⲉⲕⲁⲧⲁⲧϩⲉ ⲛⲧⲁⲡϫⲟⲉⲓⲥ ⲱⲣⲕ ⲛⲇⲁⲩⲉⲓⲇ ⲧⲁⲓ ⲧⲉ ⲧϩⲉ ⲉⲧⲓⲛⲁⲁⲁⲥ ⲛⲁϥ ϩⲙⲡϩⲟⲟⲩ ⲛϩⲟⲟⲩ
10 ⲉⲧⲣⲁϥⲓ ⲛⲧⲙⲛⲧⲣⲣⲟ ⲉⲃⲟⲗ ϩⲙⲡⲏⲓ ⲛⲥⲁⲟⲩⲗ ⲁⲩⲱ ⲉⲧⲁϩⲟ ⲉⲣⲁⲧϥ ⲙⲡⲉⲑⲣⲟⲛⲟⲥ ⲛⲇⲁⲩⲉⲓⲇ ⲉϫⲙⲡⲓⲥⲣⲁⲏⲗ ⲁⲩⲱ ⲉϫⲛⲓⲟⲩⲇⲁ ϫⲓⲛⲇⲁⲛ ϣⲁⲃⲉⲣⲥⲁⲃⲉⲉ
11 ⲁⲩⲱ ⲓⲉⲃⲟⲩⲥⲑⲉ ⲙⲡⲉϥϣⲁϫⲉ ⲗⲁⲁⲩ ϩⲁⲣⲱϥ ⲛⲁⲃⲉⲛⲛⲏⲣ ϫⲉⲛⲉⲁϥⲣϩⲟⲧⲉ ⲛϩⲏⲧϥ
12 ⲁⲩⲱ ⲁⲃⲉⲛⲛⲏⲣ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧϥ ⲛⲇⲁⲩⲉⲓⲇ ⲛⲧⲉⲩⲛⲟⲩ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲡⲙⲁ ⲉⲛⲉϥⲛϩⲏⲧϥ ⲉϥϫⲱ ⲙⲙⲟⲥ ⲛⲁϥ ϫⲉⲥⲙⲓⲛⲉ ⲛⲧⲉⲕⲇⲓⲁⲑⲏⲕⲏ ⲛⲙⲙⲁⲓ ⲁⲩⲱ ⲉⲓⲥ ⲧⲟⲟⲧⲛⲁϣⲱⲡⲉ ⲛⲙⲙⲁⲕ ⲉⲕⲧⲟ ⲉⲣⲟⲕ ⲙⲡⲏⲓ ⲧⲏⲣϥ ⲙⲡⲓⲥⲣⲁⲏⲗ
13 ⲡⲉϫⲉⲇⲁⲩⲉⲓⲇ ⲛⲁϥ ϫⲉⲕⲁⲗⲱⲥ ⲁⲛⲟⲕ ϯⲛⲁⲥⲙⲓⲛⲉ ⲛⲙⲙⲁⲕ ⲛⲟⲩⲇⲓⲁⲑⲏⲕⲏ ⲡⲗⲏⲛ ⲟⲩϣⲁϫⲉ ⲛⲟⲩⲱⲧ ⲛⲧⲟⲕ ϯⲛⲁⲁⲓⲧⲉⲓ ⲙⲙⲟϥ ⲛⲧⲟⲟⲧⲕ ⲉⲓϫⲱ ⲙⲙⲟⲥ ϫⲉⲛⲅⲛⲁϣⲉⲓ ⲁⲛ ⲉϩⲟⲩⲛ ⲉϩⲣⲁⲓ ⲉⲕⲧⲙⲉⲓⲛⲉ ⲙⲙⲉⲗⲭⲱⲗ ⲧϣⲉⲉⲣⲉ ⲛⲥⲁⲟⲩⲗ ⲉⲕⲛⲁⲉⲓ ⲉⲧⲱⲙⲛⲧ ⲉⲣⲟⲓ
14 ⲁⲩⲱ ⲇⲁⲩⲉⲓⲇ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧϥ ⲛⲓⲉⲃⲟⲩⲥⲑⲉ ⲡϣⲏⲣⲉ ⲛⲥⲁⲟⲩⲗ ⲉϥϫⲱ ⲙⲙⲟⲥ ⲛⲁϥ ϫⲉⲙⲁ ⲛⲁⲓ ⲛⲧⲁⲥϩⲓⲙⲉ ⲙⲉⲗⲭⲱⲗ ⲧⲁⲓ ⲛⲧⲁⲓϫⲓⲧⲥ ϩⲁϣⲉ ⲙⲙⲛⲧⲁⲧⲥⲃⲃⲉ ⲛⲧⲉⲛⲁⲗⲗⲟⲫⲩⲗⲟⲥ
15 ⲁⲩⲱ ⲁϥϫⲟⲟⲩ ⲛϭⲓⲓⲉⲃⲟⲩⲥⲑⲉ ⲁϥϫⲓⲧⲥ ⲛⲧⲟⲟⲧϥ ⲙⲡⲉⲥϩⲁⲓ ⲫⲁⲗⲧⲓⲏⲗ ⲡϣⲏⲣⲉ ⲛⲥⲉⲗⲗⲏ
16 ⲡⲉⲥϩⲁⲓ ⲇⲉ ⲛⲉϥⲙⲟⲟϣⲉ ⲛⲙⲙⲁⲥ ⲉϥⲣⲓⲙⲉ ⲉϥⲟⲩⲏϩ ⲛⲥⲱⲥ ϣⲁⲉϩⲣⲁⲓ ⲉⲃⲁⲣⲁⲕⲓ ⲁⲩⲱ ⲁⲃⲉⲛⲛⲏⲣ ⲡⲉϫⲁϥ ϫⲉⲕⲟⲧⲕ ⲛⲅⲃⲱⲕ ⲁϥⲕⲧⲟϥ ⲇⲉ ⲁϥⲙⲟⲟϣⲉ
17 ⲡⲉϫⲉⲁⲃⲉⲛⲛⲏⲣ ⲉϩⲟⲩⲛ ϩⲛⲛⲉⲡⲣⲉⲥⲃⲩⲧⲉⲣⲟⲥ ⲙⲡⲓⲥⲣⲁⲏⲗ ⲉϥϫⲱ ⲙⲙⲟⲥ ⲛⲁⲩ ϫⲉⲛⲥⲁϥ ⲁⲩⲱ ⲛϣⲟⲙⲛⲧ ⲙⲡϩⲟⲟⲩ ⲛⲉⲧⲉⲧⲛⲕⲱⲧⲉ ⲛⲥⲁⲇⲁⲩⲉⲓⲇ ⲉⲧⲣⲉϥⲣⲣⲣⲟ ⲉϫⲛⲧⲏⲩⲧⲛ
18 ⲧⲉⲛⲟⲩ ϭⲉ ⲁⲣⲓⲡⲁⲓ ϫⲉⲡϫⲟⲉⲓⲥ ⲁϥϣⲁϫⲉ ⲉⲧⲃⲉⲇⲁⲩⲉⲓⲇ ⲉϥϫⲱ ⲙⲙⲟⲥ ϫⲉⲉⲃⲟⲗ ϩⲓⲧⲟⲟⲧϥ ⲛⲇⲁⲩⲉⲓⲇ ⲡⲁϩⲙϩⲁⲗ ϯⲛⲁⲧⲟⲩϫⲉⲡⲓⲏⲗ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲛⲧⲟⲟⲧⲟⲩ ⲛⲛⲉⲩϫⲁϫⲉ ⲧⲏⲣⲟⲩ
19 ⲁⲃⲉⲛⲛⲏⲣ ⲇⲉ ⲁϥϣⲁϫⲉ ⲉⲛⲉⲙⲁⲁϫⲉ ⲙⲡⲕⲉⲃⲉⲛⲓⲁⲙⲓⲛ ⲁⲩⲱ ⲁϥⲃⲱⲕ ⲛϭⲓⲁⲃⲉⲛⲛⲏⲣ ⲁϥⲧⲁⲩⲟ ⲉϩⲣⲁⲓ ⲉⲙⲙⲁⲁϫⲉ ⲛⲇⲁⲩⲉⲓⲇ ϩⲛⲭⲉⲃⲣⲱⲛ ⲛϣⲁϫⲉ ⲛⲓⲙ ⲛⲧⲁⲩⲣⲁⲛⲁϥ ⲙⲡⲓⲥⲣⲁⲏⲗ ⲁⲩⲱ ⲛⲉⲛⲧⲁⲩⲣⲁⲛⲁϥ ⲙⲡⲏⲓ ⲧⲏⲣϥ ⲛⲃⲉⲛⲓⲁⲙⲓⲛ
20 ⲁⲃⲉⲛⲛⲏⲣ ⲁϥⲉⲓ ⲉⲣⲁⲧϥ ⲛⲇⲁⲩⲉⲓⲇ ⲉϩⲣⲁⲓ ⲉⲭⲉⲃⲣⲱⲛ ⲉⲣⲉϫⲟⲩⲱⲧ ⲛⲣⲱⲙⲉ ⲛⲙⲙⲁϥ ⲇⲁⲩⲉⲓⲇ ⲇⲉ ⲁϥⲉⲓⲣⲉ ⲛⲟⲩϩⲟⲟⲩ ⲛⲥⲱⲉⲁⲃⲉⲛⲛⲏⲣ ⲙⲛⲛⲣⲱⲙⲉ ⲉⲧⲛⲙⲙⲁϥ
21 ⲡⲉϫⲉⲁⲃⲉⲛⲛⲏⲣ ⲛⲇⲁⲩⲉⲓⲇ ϫⲉϯⲛⲁⲧⲱⲟⲩⲛ ⲛⲧⲁⲃⲱⲕ ⲛⲧⲁⲥⲱⲟⲩϩ ⲉⲣⲁⲧϥ ⲙⲡⲁϫⲟⲉⲓⲥ ⲡⲣⲣⲟ ⲙⲡⲓⲥⲣⲁⲏⲗ ⲛⲧⲁⲥⲙⲓⲛⲉ ⲛⲙⲙⲁϥ ⲛⲟⲩⲇⲓⲁⲑⲏⲕⲏ ⲛⲅⲉⲣⲣⲣⲟ ⲉϩⲣⲁⲓ ⲉϫⲱⲟⲩ ⲧⲏⲣⲟⲩ ϩⲛⲛⲉⲧⲉⲣⲉⲧⲉⲕⲯⲩⲭⲏ ⲟⲩⲁϣⲟⲩ ⲁⲩⲱ ⲇⲁⲩⲉⲓⲇ ⲁϥⲕⲱ ⲉⲃⲟⲗ ⲛⲁⲃⲉⲛⲛⲏⲣ ⲙⲛⲛⲣⲱⲙⲉ ⲧⲏⲣⲟⲩ ⲉⲧⲛⲙⲙⲁϥ ϩⲛⲟⲩⲉⲓⲣⲏⲛⲏ
22 ⲛϩⲙϩⲁⲗ ⲇⲉ ⲛⲇⲁⲩⲉⲓⲇ ⲙⲛⲓⲱⲁⲃ ⲁⲩⲉⲓ ⲉⲃⲟⲗ ϩⲙⲡⲕⲉⲇⲇⲟⲩⲣ ⲉⲣⲉⲟⲩⲁϣⲏ ⲛϣⲟⲗⲥ ⲛⲙⲙⲁⲩ ⲁⲃⲉⲛⲛⲏⲣ ⲇⲉ ⲛⲉϥϩⲁⲧⲛⲇⲁⲩⲉⲓⲇ ⲁⲛ ϩⲛⲭⲉⲃⲣⲱⲛ ϫⲉⲛⲉⲁϥϫⲟⲟⲩϥ ⲉⲃⲟⲗ ⲡⲉ ⲁϥⲃⲱⲕ ϩⲛⲟⲩⲉⲓⲣⲏⲛⲏ
23 ⲓⲱⲁⲃ ⲇⲉ ⲙⲛⲡⲉϥⲙⲏⲏϣⲉ ⲧⲏⲣϥ ⲁϥⲉⲓ ⲁⲩⲱ ⲁⲩⲧⲁⲙⲉⲓⲱⲁⲃ ⲉⲩϫⲱ ⲙⲙⲟⲥ ϫⲉⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲁϥⲉⲓ ⲉⲣⲁⲧϥ ⲛⲇⲁⲩⲉⲓⲇ ⲁⲩⲱ ⲁϥⲕⲁⲁϥ ⲉⲃⲟⲗ ⲁϥⲃⲱⲕ ϩⲛⲟⲩⲉⲓⲣⲏⲛⲏ
24 ⲛⲧⲉⲩⲛⲟⲩ ⲇⲉ ⲓⲱⲁⲃ ⲁϥⲃⲱⲕ ⲉϩⲟⲩⲛ ϣⲁⲇⲁⲩⲉⲓⲇ ⲡⲣⲣⲟ ⲡⲉϫⲁϥ ⲛⲁϥ ϫⲉⲟⲩ ⲡⲉ ⲡⲉⲓϩⲱⲃ ⲛⲧⲁⲕⲁⲁϥ ⲉⲓⲥ ⲁⲃⲉⲛⲛⲏⲣ ⲁϥⲉⲓ ⲉⲣⲁⲧⲕ ⲁⲩⲱ ⲉⲧⲃⲉⲟⲩ ⲁⲕⲕⲁⲁϥ ⲉⲃⲟⲗ ⲉⲃⲱⲕ ϩⲛⲟⲩⲉⲓⲣⲏⲛⲏ
25 ⲛⲅⲥⲟⲟⲩⲛ ⲁⲛ ⲛⲧⲕⲁⲕⲓⲁ ⲛⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ϫⲉⲛⲧⲁϥⲉⲓ ⲉⲣϩⲁⲗ ⲙⲙⲟⲕ ⲁⲩⲱ ⲉⲉⲓⲙⲉ ⲉⲧⲉⲕϭⲓⲛⲃⲱⲕ ⲉⲃⲟⲗ ⲙⲛⲧⲉⲕϭⲓⲛⲉⲓ ⲉϩⲟⲩⲛ ⲁⲩⲱ ⲉⲉⲓⲙⲉ ⲉϩⲱⲃ ⲛⲓⲙ ⲉⲧⲉⲕⲛⲁⲁⲩ
26 ⲓⲱⲁⲃ ⲇⲉ ⲁϥⲉⲓ ⲉⲃⲟⲗ ϩⲓⲧⲟⲟⲧϥ ⲙⲡⲣⲣⲟ ⲇⲁⲩⲉⲓⲇ ⲁⲩⲱ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ϩⲓⲡⲁϩⲟⲩ ⲛⲁⲃⲉⲛⲛⲏⲣ ⲁϥⲕⲧⲟϥ ⲉⲡⲁϩⲟⲩ ⲉⲃⲟⲗ ϩⲛⲧϣⲱⲧⲉ ⲛⲥⲉⲉⲓⲣⲁⲙ ⲁⲩⲱ ⲇⲁⲩⲉⲓⲇ ⲛⲉϥⲥⲟⲟⲩⲛ ⲁⲛ
27 ⲁϥⲕⲧⲉⲁⲃⲉⲛⲛⲏⲣ ⲉϩⲣⲁⲓ ⲉⲭⲉⲃⲣⲱⲛ ⲓⲱⲁⲃ ⲇⲉ ⲁϥⲥⲟⲕϥ ⲛⲥⲁⲥⲡⲓⲣ ⲛⲧⲡⲩⲗⲏ ⲉϣⲁϫⲉ ⲛⲙⲙⲁϥ ⲉϥⲟ ⲛⲕⲣⲟϥ ⲉⲣⲟϥ ⲁϥⲡⲁⲧⲁⲥⲥⲉⲓ ⲙⲙⲟϥ ⲙⲡⲙⲁ ⲉⲧⲙⲙⲁⲩ ⲉϫⲛⲛⲉϥϭⲗⲟⲟⲧⲉ ⲁϥⲙⲟⲩ ⲉⲧⲃⲉⲡⲉⲥⲛⲟϥ ⲛⲁⲍⲁⲏⲗ ⲡⲥⲟⲛ ⲛⲓⲱⲁⲃ
28 ⲇⲁⲩⲉⲓⲇ ⲇⲉ ⲁϥⲥⲱⲧⲙ ⲙⲛⲛⲥⲁⲛⲁⲓ ⲡⲉϫⲁϥ ϫⲉϯⲟⲩⲁⲁⲃ ⲁⲛⲟⲕ ⲁⲩⲱ ⲧⲁⲙⲛⲧⲣⲣⲟ ⲛⲁϩⲣⲁϥ ⲙⲡϫⲟⲉⲓⲥ ϣⲁⲉⲛⲉϩ ⲉⲡⲉⲥⲛⲟϥ ⲛⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ
29 ⲁⲩⲱ ⲉⲣⲉⲛⲁⲓ ⲛⲁⲉⲓ ⲉϩⲣⲁⲓ ⲉϫⲛⲧⲁⲡⲉ ⲛⲓⲱⲁⲃ ⲁⲩⲱ ⲉϫⲙⲡⲏⲓ ⲧⲏⲣϥ ⲙⲡⲉϥⲉⲓⲱⲧ ⲛϥⲧⲉⲙⲱϫⲛ ⲉⲃⲟⲗ ϩⲙⲡⲏⲓ ⲛⲓⲱⲁⲃ ⲉϥϫⲁϩⲙ ⲁⲩⲱ ⲉϥⲥⲟⲃϩ ⲉϥⲁⲙⲁϩⲧⲉ ⲛⲟⲩⲟⲩⲣⲁⲥ ⲁⲩⲱ ⲉϥϩⲏⲩ ϩⲛⲧⲥⲏϥⲉ ⲁⲩⲱ ⲉϥⲣϭⲣⲱϩ ⲛⲟⲉⲓⲕ
30 ⲓⲱⲁⲃ ⲇⲉ ⲙⲛⲁⲃⲓⲥⲁ ⲡⲉϥⲥⲟⲛ ⲛⲉⲩϭⲟⲣϭ ⲉⲁⲃⲉⲛⲛⲏⲣ ⲉⲧⲃⲉⲡⲁⲓ ⲁⲩⲙⲟⲟⲩⲧϥ ⲉⲃⲟⲗ ϫⲉⲁϥⲙⲟⲩⲟⲩⲧ ⲛⲁⲍⲁⲏⲗ ⲡⲉⲩⲥⲟⲛ ϩⲙⲡⲡⲟⲗⲉⲙⲟⲥ ⲛⲧⲁϥϣⲱⲡⲉ ϩⲛⲅⲁⲃⲁⲱⲛ
31 ⲁⲩⲱ ⲇⲁⲩⲉⲓⲇ ⲡⲉϫⲁϥ ⲉϩⲟⲩⲛ ϩⲛⲓⲱⲁⲃ ⲁⲩⲱ ⲉϩⲟⲩⲛ ϩⲙⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ϫⲉⲡⲱϩ ⲛⲛⲉⲧⲛϩⲟⲉⲓⲧⲉ ⲛⲧⲉⲧⲛⲙⲉⲣⲧⲏⲩⲧⲛ ⲛϩⲉⲛϭⲟⲟⲩⲛⲉ ⲛⲧⲉⲧⲛⲛⲏϩⲡⲉ ϩⲓⲧϩⲏ ⲛⲁⲃⲉⲛⲛⲏⲣ ⲡⲣⲣⲟ ⲇⲉ ⲇⲁⲩⲉⲓⲇ ⲁϥⲙⲟⲟϣⲉ ⲉϥⲟⲩⲏϩ ⲛⲥⲁⲡⲉϥϭⲗⲟϭ ⲉⲩϥⲓ ⲙⲙⲟϥ ⲉⲃⲟⲗ
32 ⲁⲩⲱ ⲁⲩⲧⲱⲙⲥ ⲛⲁⲃⲉⲛⲛⲏⲣ ϩⲛⲭⲉⲃⲣⲱⲛ ⲡⲣⲣⲟ ⲇⲉ ⲁϥϥⲓϩⲣⲁϥ ⲉⲃⲟⲗ ⲁϥⲣⲓⲙⲉ ⲉϫⲙⲡⲉϥⲧⲁⲫⲟⲥ ⲡⲕⲉⲗⲁⲟⲥ ⲧⲏⲣϥ ⲁϥⲣⲓⲙⲉ ⲉⲁⲃⲉⲛⲛⲏⲣ
33 ⲁⲩⲱ ⲡⲣⲣⲟ ⲁϥⲧⲟⲉⲓⲧ ⲛⲟⲩⲧⲟⲉⲓⲧ ⲉϥϫⲱ ⲙⲙⲟⲥ ⲉϫⲛⲁⲃⲉⲛⲛⲏⲣ ϫⲉⲉⲛⲉⲕⲁⲧⲁ ⲡⲙⲟⲩ ⲛⲛⲁⲃⲁⲗ ⲉⲣⲉⲁⲃⲉⲛⲛⲏⲣ ⲛⲁⲙⲟⲩ
34 ⲛⲉⲕϭⲓϫ ⲙⲡⲟⲩⲥⲁⲛϩⲟⲩ ⲛⲉⲕⲟⲩⲉⲣⲏⲧⲉ ⲙⲡⲟⲩⲧⲁⲁⲩ ⲉϩⲉⲛⲡⲁⲓⲇⲏⲥ ⲏ ⲙⲡⲟⲩⲟⲃⲟⲩ ⲁⲩⲥⲁⲗⲡⲓⲍⲉ ⲛⲁⲕ ⲛⲧϩⲉ ⲛⲟⲩϭⲟⲡⲧⲥ ⲁϥϩⲉ ⲙⲡⲉⲙⲧⲟ ⲉⲃⲟⲗ ⲛⲛⲉϣⲏⲣⲉ ⲛⲧⲁⲛⲟⲙⲓⲁ ⲡⲗⲁⲟⲥ ⲇⲉ ⲧⲏⲣϥ ⲁϥⲟⲩⲱϩ ⲉⲧⲟⲟⲧϥ ⲉⲣⲓⲙⲉ ⲉⲣⲟϥ
35 ⲁⲩⲱ ⲁϥⲉⲓ ⲛϭⲓⲡⲗⲁⲟⲥ ⲧⲏⲣϥ ⲙⲡⲛⲁⲩ ⲙⲡⲉⲕⲃⲁ ⲉⲧⲙⲟ ⲛⲇⲁⲩⲉⲓⲇ ⲛⲟⲉⲓⲕ ⲉⲛϩⲟⲥⲟⲛ ⲉⲟⲩⲛ ⲛⲁⲩ ⲛⲃⲟⲗ ⲁⲩⲱ ⲇⲁⲩⲉⲓⲇ ⲁϥⲱⲣⲕ ⲉϥϫⲱ ⲙⲙⲟⲥ ϫⲉⲛⲁⲓ ⲉⲣⲉⲡⲛⲟⲩⲧⲉ ⲁⲁⲩ ⲛⲁⲓ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉⲣⲟⲓ ϫⲉⲉⲣⲉⲧⲙⲡⲣⲏ ϩⲱⲧⲡ ⲛϯⲛⲁⲟⲩⲉⲙⲟⲉⲓⲕ ⲁⲛ ⲟⲩⲇⲉ ⲛϯⲛⲁⲧⲉⲡⲗⲁⲁⲩ ⲁⲛ
36 ⲁⲩⲱ ⲡⲗⲁⲟⲥ ⲧⲏⲣϥ ⲁϥⲉⲓⲙⲉ ⲁϥⲣⲁⲛⲁⲩ ⲙⲡⲉⲩⲙⲧⲟ ⲉⲃⲟⲗ ⲛϭⲓϩⲱⲃ ⲛⲓⲙ ⲛⲧⲁⲡⲣⲣⲟ ⲁⲁⲩ
37 ⲡⲓⲥⲣⲁⲏⲗ ⲇⲉ ⲧⲏⲣϥ ⲁⲩⲉⲓⲙⲉ ⲙⲡⲉϩⲟⲟⲩ ⲉⲧⲙⲙⲁⲩ ϫⲉⲛⲧⲁⲡⲉⲓⲧⲱϣ ϣⲱⲡⲉ ⲁⲛ ϩⲓⲧⲙⲡⲣⲣⲟ ⲉⲙⲟⲩⲟⲩⲧ ⲛⲁⲃⲉⲛⲛⲏⲣ
38 ⲁⲩⲱ ⲡⲣⲣⲟ ⲡⲉϫⲁϥ ⲛⲛⲉϥϩⲙϩⲁⲗ ϫⲉⲛⲧⲉⲧⲛⲥⲟⲟⲩⲛ ⲁⲛ ϫⲉⲟⲩⲛⲟϭ ⲛⲁⲣⲭⲱⲛ ⲁϥⲙⲟⲩ ⲙⲡϩⲟⲟⲩ ϩⲙⲡⲓⲥⲣⲁⲏⲗ
39 ⲁⲩⲱ ϫⲉⲁⲛⲅ ⲡⲉϥⲥⲩⲅⲅⲉⲛⲏⲥ ⲙⲡϩⲟⲟⲩ ⲉⲡⲣⲣⲟ ⲡⲉⲛⲧⲁϥⲧⲁϩⲟϥ ⲉⲣⲁⲧϥ ⲛⲉⲓⲣⲱⲙⲉ ⲇⲉ ⲉⲧⲉⲛϣⲏⲣⲉ ⲛⲥⲁⲣⲟⲩⲉⲓⲁⲥ ⲛⲉ ⲥⲉⲛⲁϣⲧ ⲉⲙⲁⲧⲉ ⲛⲁϩⲣⲁⲓ ⲉⲣⲉⲡϫⲟⲉⲓⲥ ⲇⲉ ⲧⲱⲱⲃⲉ ⲙⲡⲉⲧⲉⲓⲣⲉ ⲙⲡⲡⲟⲛⲏⲣⲟⲛ ⲕⲁⲧⲁⲧⲉϥⲕⲁⲕⲓⲁ
2 Samuel 2 · 2 Samuel 4 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)