2 Samuel 2 — Coptic (Sahidic)

1 ⲙⲛⲛⲥⲁⲛⲁⲓ ⲇⲉ ⲇⲁⲩⲉⲓⲇ ⲁϥϣⲓⲛⲉ ⲙⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉⲉⲛⲉⲕⲟⲩⲱϣ ⲉⲧⲣⲁⲃⲱⲕ ⲉϩⲣⲁⲓ ⲉⲟⲩⲉⲓ ⲛⲛⲉⲡⲟⲗⲓⲥ ⲛⲓⲟⲩⲇⲁ ⲡⲉϫⲉⲡϫⲟⲉⲓⲥ ⲛⲁϥ ϫⲉⲃⲱⲕ ⲉϩⲣⲁⲓ ⲉⲣⲟⲥ ⲡⲉϫⲉⲇⲁⲩⲉⲓⲇ ⲛⲁϥ ϫⲉⲧⲁⲃⲱⲕ ⲉϩⲣⲁⲓ ⲉⲁϣ ⲡⲉϫⲉⲡϫⲟⲉⲓⲥ ⲛⲁϥ ϫⲉⲃⲱⲕ ⲉϩⲣⲁⲓ ⲉⲭⲉⲃⲣⲱⲛ

2 ⲁⲩⲱ ⲇⲁⲩⲉⲓⲇ ⲁϥⲃⲱⲕ ⲉϩⲣⲁⲓ ⲉⲭⲉⲃⲣⲱⲛ ⲁⲩⲱ ⲧⲉϥⲥϩⲓⲙⲉ ⲥⲛⲧⲉ ⲛⲙⲙⲁϥ ⲁⲭⲓⲛⲁⲁⲃ ⲧⲓⲥⲣⲁⲏⲗⲓⲧⲏⲥ ⲁⲩⲱ ⲁⲃⲓⲕⲓⲁ ⲧⲉⲥϩⲓⲙⲉ ⲛⲁⲃⲁⲗ ⲡⲕⲁⲣⲙⲏⲗⲟⲥ

3 ⲁⲩⲱ ⲛⲉϥⲣⲱⲙⲉ ⲉⲧⲛⲙⲙⲁϥ ⲡⲟⲩⲁ ⲡⲟⲩⲁ ⲙⲛⲡⲉϥⲏⲓ ⲁⲩⲟⲩⲱⲙ ϩⲛⲙⲡⲟⲗⲓⲥ ⲛⲭⲉⲃⲣⲱⲛ

4 ⲁⲩⲉⲓ ⲇⲉ ⲛϭⲓⲛⲣⲱⲙⲉ ⲛⲓⲟⲩⲇⲁ ⲁⲩⲧⲱϩⲥ ⲛⲇⲁⲩⲉⲓⲇ ϩⲙⲡⲙⲁ ⲉⲧⲙⲙⲁⲩ ⲉⲧⲣⲉϥⲣⲣⲣⲟ ϩⲙⲡⲙⲁ ⲉⲧⲙⲙⲁⲩ ⲉϫⲙⲡⲏⲓ ⲛⲓⲟⲩⲇⲁ ⲁⲩⲧⲁⲙⲉⲇⲁⲩⲉⲓⲇ ⲇⲉ ϫⲉⲛⲣⲱⲙⲉ ⲛⲓⲁⲃⲓⲥ ⲛⲧⲉⲅⲁⲗⲁⲁⲇ ⲁⲩⲧⲱⲙⲥ ⲛⲥⲁⲟⲩⲗ ⲙⲛⲓⲱⲛⲁⲑⲁⲛ

5 ⲁⲩⲱ ⲥⲁⲟⲩⲗ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧⲟⲩ ⲛⲛⲉⲛⲟϭ ⲛⲓⲁⲃⲓⲥ ⲛⲧⲉⲅⲁⲗⲁⲁⲇ ⲉϥϫⲱ ⲙⲙⲟⲥ ⲛⲁⲩ ϫⲉⲧⲉⲧⲛⲥⲙⲁⲙⲁⲁⲧ ⲛⲧⲱⲧⲛ ⲛⲧⲟⲟⲧϥ ⲙⲡϫⲟⲉⲓⲥ ϫⲉⲁⲧⲉⲧⲛⲉⲓⲣⲉ ⲙⲡⲉⲓⲛⲁ ⲉϫⲙⲡⲉⲧⲛϫⲟⲉⲓⲥ ⲥⲁⲟⲩⲗ ⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ ⲉⲁⲧⲉⲧⲛⲧⲟⲙⲥϥ ⲙⲛⲓⲱⲛⲁⲑⲁⲛ ⲡⲉϥϣⲏⲣⲉ

6 ⲧⲉⲛⲟⲩ ϭⲉ ⲉⲣⲉⲡϫⲟⲉⲓⲥ ⲉⲓⲣⲉ ⲛⲙⲙⲏⲧⲛ ⲛⲟⲩⲛⲁ ⲙⲛⲟⲩⲙⲉ ⲁⲛⲟⲕ ϩⲱ ⲉⲓⲉⲉⲓⲣⲉ ⲛⲙⲙⲏⲧⲛ ⲙⲡⲁⲅⲁⲑⲟⲛ ⲉⲃⲟⲗ ϫⲉⲁⲧⲉⲧⲛⲉⲓⲣⲉ ⲙⲡⲉⲓϣⲁϫⲉ

7 ⲧⲉⲛⲟⲩ ϭⲉ ⲙⲁⲣⲉⲛⲉⲧⲛϭⲓϫ ⲧⲁϫⲣⲟ ⲛⲧⲉⲧⲛϣⲱⲡⲉ ⲛϩⲉⲛⲣⲱⲙⲉ ⲛϫⲱⲱⲣⲉ ⲉⲃⲟⲗ ϫⲉⲡⲉⲧⲛϫⲟⲉⲓⲥ ⲥⲁⲟⲩⲗ ⲁϥⲙⲟⲩ ⲁⲩⲱ ⲁⲛⲟⲕ ⲁⲡⲏⲓ ⲛⲓⲟⲩⲇⲁ ⲧⲁϩⲥⲧ ⲉⲧⲣⲁⲣⲣⲣⲟ ⲉϩⲣⲁⲓ ⲉϫⲱⲟⲩ

8 ⲁⲩⲱ ⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲡⲁⲣⲭⲓⲥⲧⲣⲁⲧⲏⲅⲟⲥ ⲛⲥⲁⲟⲩⲗ ⲁϥϫⲓ ⲛⲓⲉⲃⲟⲩⲑⲉ ⲡϣⲏⲣⲉ ⲛⲥⲁⲟⲩⲗ ⲁϥⲉⲓⲛⲉ ⲙⲙⲟϥ ⲉⲃⲟⲗ ϩⲛⲧⲡⲁⲣⲉⲙⲃⲟⲗⲏ ⲉϩⲣⲁⲓ ⲉⲙⲁⲛⲁⲁⲛ

9 ⲁϥⲁⲁϥ ⲛⲣⲣⲟ ⲉϩⲣⲁⲓ ⲉϫⲛⲅⲁⲗⲁⲁⲇ ⲁⲩⲱ ⲉϩⲣⲁⲓ ⲉϫⲛⲑⲁⲥⲓⲣⲓ ⲁⲩⲱ ⲉϫⲙⲡⲓⲥⲣⲁⲏⲗ ⲁⲩⲱ ⲉϫⲛⲉⲫⲣⲁⲓⲙ ⲁⲩⲱ ⲉϫⲛⲃⲉⲛⲓⲁⲙⲓⲛ ⲁⲩⲱ ⲉϫⲙⲡⲓⲥⲣⲁⲏⲗ ⲧⲏⲣϥ

10 ⲓⲉⲃⲟⲩⲥⲑⲉ ⲇⲉ ⲡϣⲏⲣⲉ ⲛⲥⲁⲟⲩⲗ ⲛⲉϥϩⲛϩⲙⲉ ⲛⲣⲟⲙⲡⲉ ⲡⲉ ⲛⲧⲉⲣⲉϥⲣⲣⲣⲟ ⲉϫⲙⲡⲓⲥⲣⲁⲏⲗ ⲁⲩⲱ ⲁϥⲛⲣⲟⲙⲡⲉ ⲥⲛⲧⲉ ⲉϥⲟ ⲛⲣⲣⲟ ϣⲁⲧⲙ ⲡⲏⲓ ⲛⲓⲟⲩⲇⲁ ⲛⲁⲓ ⲛⲧⲁⲩⲟⲩⲁϩⲟⲩ ⲛⲥⲁⲇⲁⲩⲉⲓⲇ

11 ⲁⲩϣⲱⲡⲉ ⲛϭⲓⲛⲉϩⲟⲟⲩ ⲛⲧⲁⲇⲁⲩⲉⲓⲇ ⲁⲁⲩ ϩⲛⲭⲉⲃⲣⲱⲛ ⲉϥⲟ ⲛⲣⲣⲟ ⲉϫⲙⲡⲏⲓ ⲛⲓⲟⲩⲇⲁ ⲉⲩⲛⲁⲣⲥⲁϣϥⲉ ⲛⲣⲟⲙⲡⲉ ⲙⲛⲥⲟⲟⲩ ⲛⲉⲃⲟⲧ

12 ⲁⲩⲱ ⲁϥⲉⲓ ⲉⲃⲟⲗ ⲛϭⲓⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲁⲩⲱ ⲛϩⲙϩⲁⲗ ⲛⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲉⲃⲟⲗ ϩⲙⲙⲁⲛⲁⲉⲓⲙ ⲉϩⲣⲁⲓ ⲉⲅⲁⲃⲁⲱⲛ

13 ⲓⲱⲁⲃ ϩⲱⲱϥ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲁⲩⲱ ⲛϩⲙϩⲁⲗ ⲛⲇⲁⲩⲉⲓⲇ ⲉⲃⲟⲗ ϩⲛⲭⲉⲃⲣⲱⲛ ⲁⲩⲧⲱⲙⲛⲧ ⲉⲣⲟⲟⲩ ϩⲓϫⲛⲧⲉⲕⲉⲓⲣⲏⲛⲏ ⲛⲅⲁⲃⲁⲱⲛ ⲉⲩϩⲓ ⲛⲉⲩⲉⲣⲏⲩ ⲁⲩⲱ ⲛⲁⲓ ⲛⲉ ⲁⲩϩⲙⲟⲟⲥ ϩⲓϫⲛⲧⲉⲕⲉⲓⲣⲏⲛⲏ ⲛⲅⲁⲃⲁⲱⲛ ⲛⲥⲁⲡⲓⲥⲁ ⲛⲉⲓⲕⲟⲟⲩⲉ ⲁⲩϩⲙⲟⲟⲥ ⲛⲥⲁⲡⲓⲥⲁ

14 ⲡⲉϫⲉⲁⲃⲉⲛⲛⲏⲣ ⲇⲉ ⲉϩⲟⲩⲛ ϩⲛⲓⲱⲁⲃ ϫⲉⲙⲁⲣⲉⲛⲉϣⲏⲣⲉ ϣⲏⲙ ⲧⲱⲟⲩⲛ ⲛⲥⲉⲥⲱⲃⲉ ϩⲓϩⲏ ⲙⲙⲟⲛ ⲡⲉϫⲉⲓⲱⲁⲃ ⲛⲁϥ ϫⲉⲙⲁⲣⲟⲩⲧⲱⲟⲩⲛ

15 ⲁⲩⲱ ⲁⲩⲧⲱⲟⲩⲛ ⲁⲩⲉⲓ ⲉⲧⲙⲏⲧⲉ ⲛϭⲓⲙⲛⲧⲥⲛⲟⲟⲩⲥ ⲛϣⲏⲣⲉ ϣⲏⲙ ⲛⲧⲉⲃⲉⲛⲓⲁⲙⲓⲛ ⲉⲧⲏⲡ ⲉⲓⲉⲃⲟⲩⲥⲑⲉ ⲡϣⲏⲣⲉ ⲛⲥⲁⲟⲩⲗ ⲙⲛⲙⲛⲧⲥⲛⲟⲟⲩⲥ ϩⲱⲟⲩ ⲉⲃⲟⲗ ϩⲛⲛⲉϩⲙϩⲁⲗ ⲛⲇⲁⲩⲉⲓⲇ

16 ⲁⲩⲱ ⲡⲟⲩⲁ ⲡⲟⲩⲁ ⲁϥⲁⲙⲁϩⲧⲉ ⲛⲧⲁⲡⲉ ⲙⲡⲉⲑⲓⲧⲟⲩⲱϥ ⲉⲁⲡⲟⲩⲁ ⲡⲟⲩⲁ ⲧⲉⲣⲧⲣⲧⲉϥⲥⲏϥⲉ ⲉⲡⲉⲥⲡⲓⲣ ⲙⲡⲉⲑⲓⲧⲟⲩⲱϥ ⲁⲩⲣⲱϩⲧ ⲉⲡⲕⲁϩ ϩⲓⲟⲩⲥⲟⲡ ⲁⲩⲙⲟⲩⲧⲉ ⲇⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉⲧⲙⲉⲣⲓⲥ ⲛⲛⲉⲡⲓⲃⲟⲩⲗⲟⲥ ⲧⲁⲓ ⲉⲧϣⲟⲟⲡ ϩⲛⲅⲁⲃⲁⲱⲛ

17 ⲁⲩⲱ ⲟⲩⲛⲟϭ ⲙⲡⲟⲗⲉⲙⲟⲥ ⲉϥⲛⲁϣⲧ ⲉⲙⲁⲧⲉ ⲁϥϣⲱⲡⲉ ⲙⲡⲉϩⲟⲟⲩ ⲉⲧⲙⲙⲁⲩ ⲁϥϭⲱⲧⲡ ⲇⲉ ⲛϭⲓⲁⲃⲉⲛⲛⲏⲣ ⲙⲛⲛⲉⲣⲱⲙⲉ ⲙⲡⲓⲥⲣⲁⲏⲗ ϩⲓⲧϩⲏ ⲛⲛⲉϩⲙϩⲁⲗ ⲛⲇⲁⲩⲉⲓⲇ

18 ⲛⲉⲩⲙⲙⲁⲩ ⲇⲉ ⲛϭⲓⲡϣⲟⲙⲛⲧ ⲛϣⲏⲣⲉ ⲛⲥⲁⲣⲟⲩⲉⲓⲁⲥ ⲓⲱⲁⲃ ⲙⲛⲁⲃⲓⲥⲁ ⲁⲩⲱ ⲁⲍⲁⲏⲗ ⲉⲣⲉⲣⲁⲧϥ ⲁⲥⲱⲟⲩ ⲉⲣⲟϥ ⲛⲧϩⲉ ⲛⲟⲩⲉⲓ ⲛⲛⲉⲓϭⲁϩⲥⲉ ⲉⲧϩⲛⲧⲥⲱϣⲉ

19 ⲁⲍⲁⲏⲗ ⲇⲉ ⲁϥⲡⲱⲧ ⲛⲥⲁⲁⲃⲉⲛⲛⲏⲣ ⲙⲡⲉϥⲁⲗⲉϥ ⲉⲃⲟⲗ ⲙⲙⲟϥ ⲉⲃⲱⲕ ⲉⲟⲩⲛⲁⲙ ⲏ ⲉϩⲃⲟⲩⲣ ⲉϥⲡⲏⲧ ϩⲓⲛⲁⲓ ⲛⲥⲁⲁⲃⲉⲛⲛⲏⲣ

20 ⲁⲃⲉⲛⲛⲏⲣ ⲇⲉ ⲁϥⲕⲟⲧϥ ⲉⲡⲁϩⲟⲩ ⲡⲉϫⲁϥ ⲛⲁϥ ϫⲉⲉⲓⲉⲛⲧⲟⲕ ⲡⲉ ⲁⲍⲁⲏⲗ ⲉⲕⲡⲏⲧ ⲛⲥⲱⲓ ⲡⲉϫⲁϥ ϫⲉⲁⲛⲟⲕ ⲡⲉ

21 ⲡⲉϫⲉⲁⲃⲉⲛⲛⲏⲣ ⲛⲁϥ ϫⲉⲧⲁⲁⲕ ⲉⲟⲩⲛⲁⲙ ⲏ ⲉϩⲃⲟⲩⲣ ⲛⲅϭⲉⲡⲟⲩⲁ ⲛⲁⲕ ⲛⲛⲉϣⲏⲣⲉ ϣⲏⲙ ⲛⲅⲃⲟϣϥ ⲛⲧⲉϥⲡⲁⲛϩⲟⲡⲗⲓⲁ ⲛⲅϥⲓⲧⲥ ⲛⲁⲕ ⲁⲩⲱ ⲙⲡⲉⲁⲥⲁⲏⲗ ⲣϩⲛⲁϥ ⲉⲃⲱⲗ ⲉⲃⲟⲗ ⲙⲙⲟϥ ⲉⲃⲱⲕ ⲉⲗⲁⲁⲩ ⲛⲥⲁ

22 ⲁⲃⲉⲛⲛⲏⲣ ⲇⲉ ⲁϥⲟⲩⲱϩ ⲉⲧⲟⲟⲧϥ ⲉϣⲁϫⲉ ⲙⲛⲁⲍⲁⲏⲗ ⲉϥϫⲱ ⲙⲙⲟⲥ ϫⲉⲡⲁϣⲥⲕ ⲉⲃⲟⲗ ⲙⲙⲟⲓ ⲙⲡⲣⲧⲁⲕⲁⲧ ⲛⲧⲁⲣⲁϩⲧⲕ ⲉⲡⲕⲁϩ ⲁⲩⲱ ⲉⲓⲛⲁⲉϣϥⲓⲉⲓⲁⲧ ⲉϩⲣⲁⲓ ⲛⲁϣ ⲛϩⲉ ⲟⲩⲃⲉ ⲡⲉⲕⲥⲟⲛ ⲓⲱⲁⲃ ⲉⲕⲣⲣⲟⲩ ϩⲓⲛⲁⲓ ⲕⲁⲣⲁⲧⲕ ⲉⲣⲁⲧϥ ⲙⲡⲉⲕⲥⲟⲛ ⲓⲱⲁⲃ

23 ⲁⲩⲱ ⲙⲡⲉϥⲣϩⲛⲁϥ ⲉⲥⲁϩⲱⲱϥ ⲉⲃⲟⲗ ⲙⲙⲟϥ ⲁⲃⲉⲛⲛⲏⲣ ⲇⲉ ⲁϥϫⲁⲧϥ ⲛⲧⲉϥⲗⲟⲅⲭⲏ ⲉϫⲛⲛⲉϥϭⲗⲟⲟⲧⲉ ⲛⲥⲁⲡⲁϩⲟⲩⲟ ⲁⲧⲗⲟⲅⲭⲏ ϫⲱⲧⲉ ⲉⲃⲟⲗ ⲛϩⲏⲧϥ ⲁⲩⲱ ⲟⲩⲟⲛ ⲛⲓⲙ ⲉϥϣⲁⲛⲡⲱϩ ⲉⲡⲙⲁ ⲛⲧⲁⲁⲍⲁⲏⲗ ϩⲉ ⲛϩⲏⲧϥ ⲁϥⲙⲟⲩ ϣⲁϥⲧⲱⲱϭⲉ ⲛϥⲁϩⲉⲣⲁⲧϥ

24 ⲓⲱⲁⲃ ⲇⲉ ⲙⲛⲁⲃⲓⲥⲁ ⲁⲩⲧⲁⲁⲩ ⲛⲥⲁⲁⲃⲉⲛⲛⲏⲣ ⲁⲩⲱ ⲡⲣⲏ ⲁϥϩⲱⲧⲡ ⲛⲧⲟⲟⲩ ⲇⲉ ⲁⲩⲃⲱⲕ ⲉϩⲟⲩⲛ ϣⲁⲡⲃⲟⲩⲛⲟⲥ ⲛⲁⲙⲙⲁⲛ ⲡⲁⲓ ⲉⲧϩⲓϩⲏ ⲛⲅⲁⲓ ϩⲛⲧⲉϩⲓⲏ ⲛϫⲁⲓⲉ ⲛⲧⲉⲅⲁⲃⲁⲱⲛ

25 ⲁⲩⲥⲱⲟⲩϩ ⲇⲉ ⲉϩⲟⲩⲛ ⲛϭⲓⲛϣⲏⲣⲉ ⲛⲃⲉⲛⲓⲁⲙⲓⲛ ⲉⲧⲟⲩⲏϩ ⲛⲥⲁⲁⲃⲉⲛⲛⲏⲣ ⲁⲩϣⲱⲡⲉ ϩⲓⲛⲉⲩⲉⲣⲏⲩ ⲁⲩⲁϩⲉⲣⲁⲧⲟⲩ ϩⲓϫⲛⲧⲁⲡⲉ ⲛⲟⲩⲃⲟⲩⲛⲟⲥ ⲛⲟⲩⲱⲧ

26 ⲁⲩⲱ ⲁⲃⲉⲛⲛⲏⲣ ⲁϥⲙⲟⲩⲧⲉ ⲉⲃⲟⲗ ⲉⲓⲱⲁⲃ ⲉϥϫⲱ ⲙⲙⲟⲥ ⲛⲁϥ ϫⲉⲙⲏ ⲉⲣⲉⲧⲉⲕⲥⲏϥⲉ ⲛⲁⲟⲩⲱⲙ ϣⲁⲃⲟⲗ ⲉⲩϣⲟⲩϣⲟⲩ ⲏ ⲛⲅⲥⲟⲟⲩⲛ ⲁⲛ ϫⲉϣⲁⲥⲟⲩⲱ ⲛⲥⲥⲓϣⲉ ⲉⲧϩⲁⲏ ⲁⲩⲱ ϣⲁⲛⲧⲉⲟⲩ ϭⲉ ϣⲱⲡⲉ ⲛⲅⲛⲁϫⲟⲟⲥ ⲁⲛ ⲙⲡⲉⲕⲗⲁⲟⲥ ⲉⲧⲣⲉⲩⲗⲟ ⲉⲩⲡⲏⲧ ⲛⲥⲁⲛⲉⲩⲥⲛⲏⲩ

27 ⲡⲉϫⲉⲓⲱⲁⲃ ⲛⲁϥ ϫⲉϥⲟⲛϩ ⲛϭⲓⲡϫⲟⲉⲓⲥ ϫⲉⲉⲛⲉⲙⲡⲉⲕϣⲁϫⲉ ⲛⲉⲣⲉⲡⲗⲁⲟⲥ ⲛⲁϭⲱ ⲛϫⲓⲛ ⲉϩⲧⲟⲟⲩⲉ ⲉⲣⲉⲡⲟⲩⲁ ⲡⲟⲩⲁ ⲡⲏⲧ ⲛⲥⲁⲡⲉϥⲥⲟⲛ

28 ⲁⲩⲱ ⲓⲱⲁⲃ ⲁϥⲥⲁⲗⲡⲓⲍⲉ ϩⲛⲧⲥⲁⲗⲡⲓⲅⲝ ⲁⲡⲗⲁⲟⲥ ⲧⲏⲣϥ ⲱⲗ ⲉⲃⲟⲗ ⲁⲩⲗⲟ ⲉⲩⲡⲏⲧ ⲛⲥⲁⲡⲓⲥⲣⲁⲏⲗ ⲙⲡⲟⲩⲱϩ ϭⲉ ⲉⲧⲟⲟⲧⲟⲩ ⲉⲙⲓϣⲉ ⲙⲛⲛⲉⲩⲉⲣⲏⲩ

29 ⲁⲩⲱ ⲁⲃⲉⲛⲛⲏⲣ ⲙⲛⲛⲉϥⲣⲱⲙⲉ ⲁⲩⲃⲱⲕ ⲉϩⲣⲁⲓ ⲉⲙⲙⲁ ⲛϩⲱⲧⲡ ⲏ ⲉⲡⲉⲙⲛⲧ ⲛⲧⲉⲩϣⲏ ⲉⲧⲙⲙⲁⲩ ⲁⲩⲱ ⲁⲩϫⲓⲟⲟⲣ ϩⲙⲡⲓⲟⲣⲇⲁⲛⲏⲥ ⲁⲩⲙⲟⲟϣⲉ ϩⲛⲃⲟⲑⲟⲣⲟⲛ ⲧⲏⲣⲥ ⲁⲩⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ

30 ⲓⲱⲁⲃ ⲇⲉ ϩⲱⲱϥ ⲁϥⲕⲧⲟϥ ⲉⲃⲟⲗ ϩⲛⲁⲃⲉⲛⲛⲏⲣ ⲁⲩⲥⲱⲟⲩϩ ⲇⲉ ⲉϩⲟⲩⲛ ⲙⲡⲗⲁⲟⲥ ⲧⲏⲣϥ ⲁⲩⲕⲱⲧⲉ ⲛⲥⲁⲙⲛⲧⲯⲓⲥ ⲛⲣⲱⲙⲉ ⲉⲃⲟⲗ ϩⲛⲛϩⲙϩⲁⲗ ⲛⲇⲁⲩⲉⲓⲇ ⲙⲛⲁⲍⲁⲏⲗ ⲉⲁⲩⲙⲟⲩ

31 ⲛⲉϩⲙϩⲁⲗ ⲇⲉ ⲛⲇⲁⲩⲉⲓⲇ ⲁⲩⲡⲁⲧⲁⲥⲥⲉⲓ ⲉⲃⲟⲗ ϩⲛⲛϣⲏⲣⲉ ⲛⲃⲉⲛⲓⲁⲙⲓⲛ ⲛⲉⲧⲟⲩⲏϩ ⲛⲥⲁⲁⲃⲉⲛⲛⲏⲣ ⲉⲩⲛⲁⲣϣⲟⲙⲛⲧ ⲛϣⲉ ⲛⲣⲱⲙⲉ ⲉⲩⲏⲡ ⲉⲣⲟϥ

32 ⲁⲩϥⲓ ⲇⲉ ⲛⲁⲍⲁⲏⲗ ⲁⲩⲧⲟⲙⲥϥ ϩⲙⲡⲧⲁⲫⲟⲥ ⲙⲡⲉϥⲉⲓⲱⲧ ϩⲛⲃⲏⲑⲗⲉⲉⲙ ⲁⲩⲱ ⲁϥⲃⲱⲕ ⲛϭⲓⲓⲱⲁⲃ ⲙⲛⲛⲣⲱⲙⲉ ⲉⲧⲛⲙⲙⲁϥ ⲛⲧⲉⲩϣⲏ ⲧⲏⲣⲥ ⲁⲡⲟⲩⲟⲉⲓⲛ ⲉⲓ ⲉⲃⲟⲗ ⲛⲁⲩ ϩⲛⲭⲉⲃⲣⲱⲛ