2 Samuel 20 — Coptic (Sahidic)

1 ⲛⲉϥⲙⲙⲁⲩ ⲇⲉ ⲛϭⲓⲟⲩⲣⲱⲙⲉ ⲉⲩⲙⲟⲩⲧⲉ ⲉⲣⲟϥ ϫⲉⲡϣⲏⲣⲉ ⲙⲡⲁⲣⲁⲛⲟⲙⲟⲥ ⲉⲡⲉϥⲣⲁⲛ ⲡⲉ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ ⲟⲩⲣⲱⲙⲉ ⲛⲓⲉⲙⲓⲛⲓⲛ ⲁⲩⲱ ⲁϥⲥⲁⲗⲡⲓⲍⲉ ϩⲛⲧⲥⲁⲗⲡⲓⲅⲝ ⲛⲧⲁⲡ ⲉϥϫⲱ ⲙⲙⲟⲥ ϫⲉⲙⲛⲙⲉⲣⲓⲥ ϣⲟⲟⲡ ⲛⲁⲛ ϩⲛⲇⲁⲩⲉⲓⲇ ⲟⲩⲇⲉ ⲙⲛⲕⲗⲏⲣⲟⲥ ϣⲟⲟⲡ ⲛⲁⲛ ϩⲛⲡϣⲏⲣⲉ ⲛⲓⲉⲥⲥⲁⲓ ⲡⲣⲱⲙⲉ ⲙⲡⲓⲥⲣⲁⲏⲗ ⲃⲱⲕ ⲉϩⲣⲁⲓ ⲉⲛⲉⲕⲥⲕⲏⲛⲏ

2 ⲛⲣⲱⲙⲉ ⲇⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲁⲩⲕⲧⲟⲟⲩ ⲉⲡⲁϩⲟⲩ ⲉⲃⲟⲗ ϩⲛⲇⲁⲩⲉⲓⲇ ⲁⲩⲃⲱⲕ ⲁⲩⲟⲩⲁϩⲟⲩ ⲛⲥⲁⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ ⲛϣⲏⲣⲉ ⲇⲉ ⲛⲓⲟⲩⲇⲁ ⲁⲩⲃⲱⲕ ⲁⲩⲧⲟϭⲟⲩ ⲉⲡⲉⲩⲣⲣⲟ ⲛϫⲓⲛ ⲡⲓⲟⲣⲇⲁⲛⲏⲥ ϣⲁⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ

3 ⲁⲩⲱ ⲇⲁⲩⲉⲓⲇ ⲁϥⲃⲱⲕ ⲉϩⲟⲩⲛ ⲉⲡⲉϥⲏⲓ ⲉⲧϩⲛⲧϩⲓⲉⲣⲟⲩⲥⲁⲗⲏⲙ ⲡⲣⲣⲟ ⲇⲉ ⲁϥϫⲓ ⲛⲧⲉϥⲙⲏⲧⲉ ⲛⲥϩⲓⲙⲉ ⲛⲉϥⲡⲁⲗⲗⲁⲕⲏ ⲛⲉⲛⲧⲁϥⲕⲁⲁⲩ ⲉⲡⲁϩⲟⲩ ⲉⲣⲟⲉⲓⲥ ⲉⲡⲉϥⲏⲓ ⲁⲩⲧⲁⲁⲩ ⲉϩⲣⲁⲓ ⲉⲡⲏⲓ ⲛⲧⲉⲫⲩⲗⲁⲕⲏ ⲁϥϭⲱ ⲉϥⲥⲁⲁⲛϣ ⲙⲟⲟⲩ ⲙⲡⲉϥⲃⲱⲕ ⲇⲉ ⲉϩⲟⲩⲛ ϣⲁⲣⲟⲟⲩ ⲛⲉⲩⲟⲧⲡ ⲇⲉ ⲉϩⲟⲩⲛ ⲉⲩⲟ ⲛⲭⲏⲣⲁ ⲉⲩⲟⲛϩ ϣⲁⲡⲉϩⲟⲟⲩ ⲙⲡⲉⲩⲙⲟⲩ

4 ⲡⲣⲣⲟ ⲇⲉ ⲡⲉϫⲁϥ ⲛⲁⲙⲉⲥⲥⲁⲉⲓ ϫⲉⲙⲟⲩⲧⲉ ⲛⲁⲓ ⲉⲛⲉⲣⲱⲙⲉ ⲛⲓⲟⲩⲇⲁ ⲙⲡϩⲟⲩⲛ ⲛϣⲟⲙⲛⲧ ⲛϩⲟⲟⲩ ⲛⲧⲟⲕ ⲇⲉ ⲁϩⲉⲣⲁⲧⲕ ⲙⲡⲉⲓⲙⲁ

5 ⲁⲩⲱ ⲁⲙⲉⲥⲥⲁⲉⲓ ⲁϥⲃⲱⲕ ⲉⲙⲟⲩⲧⲉ ⲉⲓⲟⲩⲇⲁ ⲁϥⲱⲥⲕ ⲇⲉ ⲛϫⲓⲛ ⲡⲉⲟⲩⲟⲉⲓϣ ⲛⲧⲁϥⲧⲁⲥⲥⲉ ⲉⲉⲓ ⲛϩⲏⲧϥ

6 ⲇⲁⲩⲉⲓⲇ ⲇⲉ ⲡⲉϫⲁϥ ⲛⲁⲃⲓⲥⲁ ϫⲉⲧⲉⲛⲟⲩ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ ϥⲟⲩⲱϣ ⲉⲣⲡⲉⲧϩⲟⲟⲩ ⲛⲁⲛ ⲉϩⲟⲩⲉ ⲉⲁⲃⲏⲥⲁⲗⲱⲙ ⲧⲉⲛⲟⲩ ϭⲉ ⲛⲧⲟⲕ ϫⲓ ⲛⲛⲉϩⲙϩⲁⲗ ⲙⲡⲉⲕϫⲟⲉⲓⲥ ⲛⲅⲡⲱⲧ ⲛⲥⲱϥ ⲙⲏⲡⲱⲥ ⲛϥϭⲓⲛⲉ ⲛⲁϥ ⲛϩⲉⲛⲡⲟⲗⲓⲥ ⲉⲩⲟⲣϫ ⲛϥⲕⲱ ⲛⲟⲩⲙⲛⲧϩⲁⲗϩⲟ ϩⲓⲣⲛ ⲛⲉⲛⲃⲁⲗ

7 ⲁⲩⲱ ⲁϥⲡⲱⲧ ⲛⲥⲱϥ ⲛϭⲓⲁⲃⲓⲥⲁ ⲙⲛⲛⲣⲱⲙⲉ ⲛⲓⲱⲁⲃ ⲁⲩⲱ ⲡⲉⲭⲉⲣⲉⲑⲑⲓ ⲙⲛⲡⲟⲫⲉⲗⲉⲑⲑⲓ ⲁⲩⲱ ⲛⲕⲉⲇⲩⲛⲁⲧⲟⲥ ⲧⲏⲣⲟⲩ ⲁⲩⲉⲓ ⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ ⲉⲧⲣⲉⲩⲡⲱⲧ ⲛⲥⲁⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ

8 ⲛⲧⲟⲟⲩ ⲇⲉ ⲛⲉⲩϩⲁⲧⲙⲡⲛⲟϭ ⲛⲱⲛⲉ ⲉⲧϩⲛⲅⲁⲃⲁⲱⲛ ⲁⲩⲱ ⲁⲙⲉⲥⲥⲁⲉⲓ ⲁϥⲃⲱⲕ ⲉϩⲟⲩⲛ ϩⲓⲧϩⲏ ⲙⲙⲟⲟⲩ ⲁⲩⲱ ⲓⲱⲁⲃ ⲛⲉϥⲙⲏⲣ ⲛⲧⲉϥϣⲧⲏⲛ ⲛⲣⲉⲃⲧ ⲉⲧϩⲓⲱⲱϥ ⲉⲣⲉⲧⲉϥⲥⲏϥⲉ ⲙⲏⲣ ⲉϩⲟⲩⲛ ⲉⲣⲟⲥ ϩⲓϫⲛⲧⲉϥϯⲡⲉ ϩⲓϫⲛⲡⲉⲥⲕⲟⲉⲓϩ ⲁⲥⲉⲓ ⲇⲉ ⲉⲃⲟⲗ ⲁⲥϩⲓⲟⲩⲉ

9 ⲡⲉϫⲉⲓⲱⲁⲃ ⲇⲉ ⲛⲁⲙⲉⲥⲥⲁⲉⲓ ϫⲉⲉⲛⲉⲕⲟⲩⲟϫ ⲡⲁⲥⲟⲛ ⲁⲩⲱ ⲧϭⲓϫ ⲛⲟⲩⲛⲁⲙ ⲛⲓⲱⲁⲃ ⲁⲥⲁⲙⲁϩⲧⲉ ⲛⲧⲙⲟⲣⲧ ⲛⲁⲙⲉⲥⲥⲁⲉⲓ ⲉϯⲡⲓ ⲉⲣⲱϥ

10 ⲁⲩⲱ ⲁⲙⲉⲥⲥⲁⲉⲓ ⲙⲡⲉϥϯⲥⲟ ⲉϩⲟⲣⲃ ⲉⲣⲟϥ ⲉⲕⲧⲉⲧⲥⲏϥⲉ ⲉⲧⲉⲛⲧⲟⲟⲧϥ ⲛⲓⲱⲁⲃ ⲓⲱⲁⲃ ⲇⲉ ⲁϥϫⲟⲧⲥ ⲛϩⲏⲧϥ ⲁⲛⲉⲧⲛϩⲏⲧϥ ⲡⲱⲛ ⲉⲃⲟⲗ ⲉϫⲙⲡⲕⲁϩ ⲙⲡⲉϥⲕⲟⲧϥ ⲉⲟⲩⲁϩⲙⲉϥ ⲁϥⲙⲟⲩ ⲁⲩⲱ ⲓⲱⲁⲃ ⲙⲛⲁⲃⲓⲥⲁ ⲡⲉϥⲥⲟⲛ ⲁⲩⲡⲱⲧ ⲛⲥⲁⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ

11 ⲁⲩⲱ ⲟⲩⲣⲱⲙⲉ ⲁϥⲁϩⲉⲣⲁⲧϥ ϩⲓϫⲱϥ ϩⲛⲛⲉϩⲙϩⲁⲗ ⲛⲓⲱⲁⲃ ⲉϥϫⲱ ⲙⲙⲟⲥ ϫⲉⲛⲓⲙ ⲡⲉⲧⲟⲩⲱϣ ϩⲛⲓⲱⲁⲃ ⲁⲩⲱ ⲛⲓⲙ ϩⲛⲛⲁⲇⲁⲇ ⲉϥⲟⲩⲏϩ ⲛⲥⲁⲓⲱⲁⲃ

12 ⲁⲙⲉⲥⲥⲁⲓ ⲇⲉ ⲛⲉϥⲧⲟⲗⲙ ϩⲙⲡⲉϥⲥⲛⲟϥ ϩⲛⲧⲙⲏⲏⲧⲉ ⲙⲡⲙⲟⲉⲓⲧ ⲙⲙⲟⲟϣⲉ ⲁⲩⲱ ⲡⲣⲱⲙⲉ ⲁϥⲛⲁⲩ ϫⲉⲁϥⲁϩⲉⲣⲁⲧϥ ⲛϭⲓⲡⲗⲁⲟⲥ ⲧⲏⲣϥ ⲁϥⲡⲉⲉⲛⲉ ⲁⲙⲉⲥⲥⲁⲉⲓ ⲉⲃⲟⲗ ϩⲙⲡⲙⲟⲉⲓⲧ ⲛⲧⲥⲱϣⲉ ⲁϥⲛⲟⲩϫⲉ ⲉⲃⲟⲗ ϩⲓϫⲱϥ ⲛⲟⲩϩⲟⲉⲓⲧⲉ ⲕⲁⲧⲁⲧϩⲉ ⲛⲧⲁϥⲛⲁⲩ ⲉⲛⲉⲧⲛⲏⲩ ⲧⲏⲣⲟⲩ ⲉⲁⲩⲡⲱϩ ⲉⲣⲟϥ ⲁⲩⲁϩⲉⲣⲁⲧⲟⲩ

13 ⲛⲧⲉⲣⲉϥⲡⲟⲟⲛⲉϥ ⲇⲉ ⲉⲃⲟⲗ ϩⲙⲡⲙⲟⲉⲓⲧ ⲛⲣⲱⲙⲉ ⲇⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲁⲩⲡⲁⲣⲁⲅⲉ ⲉⲩⲟⲩⲏϩ ⲛⲥⲁⲓⲱⲁⲃ ⲉⲡⲱⲧ ⲛⲥⲁⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ

14 ⲁⲩⲱ ⲁϥⲉⲓ ⲉⲃⲟⲗ ϩⲛⲛⲉⲫⲩⲗⲏ ⲧⲏⲣⲟⲩ ⲉϩⲣⲁⲓ ⲉⲁⲃⲉⲗ ⲧⲉⲧⲛϩⲛⲙⲉⲭⲙⲁⲭⲁ ⲛⲧⲟⲟⲩ ⲇⲉ ⲧⲏⲣⲟⲩ ⲛⲉⲩϩⲛⲭⲁⲣⲣⲓ ⲁⲩⲥⲱⲟⲩϩ ⲇⲉ ⲉϩⲟⲩⲛ ⲁⲩⲉⲓ ⲉⲩⲡⲏⲧ ⲛⲥⲱϥ

15 ⲁⲩⲱ ⲁⲩⲉⲓ ⲁⲩϭⲱ ϩⲓⲣⲱϥ ϩⲛⲁⲃⲉⲗ ⲧⲉⲧⲛϩⲙⲙⲉⲭⲙⲁⲭⲁ ⲁⲩⲱ ⲁⲩⲕⲱ ⲛⲟⲩⲧⲏⲛⲉ ϩⲓⲣⲛ ⲧⲡⲟⲗⲓⲥ ⲁⲩⲱ ⲁϥⲁϩⲉⲣⲁⲧϥ ϩⲓϫⲙⲡⲥⲟⲃⲧ ⲡⲗⲁⲟⲥ ⲧⲏⲣϥ ⲉⲧⲟⲩⲏϩ ⲛⲥⲁⲓⲱⲁⲃ ⲛⲉⲩⲙⲟⲕⲙⲉⲕ ⲉⲧⲁⲩⲉⲡⲥⲟⲃⲧ ⲉⲡⲉⲥⲏⲧ

16 ⲁⲩⲱ ⲁⲥⲱϣ ⲉⲃⲟⲗ ⲛϭⲓⲟⲩⲥϩⲓⲙⲉ ⲛⲥⲟⲫⲏ ⲉⲃⲟⲗ ϩⲙⲡⲥⲟⲃⲧ ⲉⲥϫⲱ ⲙⲙⲟⲥ ϫⲉⲥⲱⲧⲙ ⲉⲣⲟⲓ ⲥⲱⲧⲙ ⲉⲣⲟⲓ ⲁϫⲓⲥ ⲉⲓⲱⲁⲃ ϫⲉϩⲛⲧⲕ ⲉϩⲟⲩⲛ ⲉⲡⲉⲓⲙⲁ ϫⲉⲉⲓⲉϣⲁϫⲉ ⲛⲙⲙⲁⲕ

17 ⲁϥϩⲛⲧϥ ⲇⲉ ⲉϩⲟⲩⲛ ⲉⲣⲟⲥ ⲡⲉϫⲁⲥ ⲛⲁϥ ⲛϭⲓⲧⲉⲥϩⲓⲙⲉ ϫⲉⲉⲛⲉⲛⲧⲟⲕ ⲡⲉ ⲓⲱⲁⲃ ⲡⲉϫⲁϥ ϫⲉⲁⲛⲟⲕ ⲡⲉ ⲡⲉϫⲉⲧⲉⲥϩⲓⲙⲉ ⲛⲁϥ ϫⲉⲥⲱⲧⲙ ⲉⲛϣⲁϫⲉ ⲛⲧⲉⲕϩⲙϩⲁⲗ ⲡⲉϫⲉⲓⲱⲁⲃ ⲛⲁⲥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲥⲱⲧⲙ

18 ⲡⲉϫⲁⲥ ϫⲉⲟⲩϣⲁϫⲉ ⲡⲉⲛⲧⲁⲩⲧⲁⲩⲟϥ ϩⲛⲛϣⲟⲣⲡ ⲉⲩϫⲱ ⲙⲙⲟⲥ ϫⲉϩⲛⲟⲩϣⲓⲛⲉ ⲁⲩϫⲛⲟⲩϥ ϩⲛⲁⲃⲁⲗ ⲁⲩⲱ ϩⲛⲇⲁⲛ ⲉⲛⲉⲁⲩⲱϫⲛ ϭⲉ ⲛϭⲓⲛⲉⲛⲧⲁⲩⲕⲁⲁⲩ ⲛϭⲓⲙⲡⲓⲥⲧⲟⲥ ⲙⲡⲓⲥⲣⲁⲏⲗ ϩⲛⲟⲩϣⲓⲛⲉ ⲥⲉⲛⲁϣⲓⲛⲉ ϩⲛⲁⲃⲉⲗ ⲁⲩⲱ ⲉⲛⲉⲁⲩⲱϫⲛ ϩⲓⲛⲁⲓ

19 ⲁⲛⲟⲕ ⲉⲧⲧⲁⲩⲟ ⲛϩⲉⲛⲉⲓⲣⲏⲛⲓⲕⲟⲛ ϩⲛⲛⲙⲁ ⲉⲧⲧⲁϫⲣⲏⲩ ϩⲙⲡⲓⲥⲣⲁⲏⲗ ⲛⲧⲟⲕ ⲕⲕⲱⲧⲉ ⲛⲥⲁⲧϩⲉ ⲙⲙⲟⲩⲟⲩⲧ ⲛⲟⲩⲡⲟⲗⲓⲥ ⲟⲩⲙⲉⲧⲣⲟⲡⲟⲗⲓⲥ ϩⲙⲡⲓⲥⲣⲁⲏⲗ ⲉⲧⲃⲉⲟⲩ ⲉⲕⲛⲁⲧⲁⲕⲟ ⲛⲧⲉⲕⲗⲏⲣⲟⲛⲟⲙⲓⲁ ⲙⲡϫⲟⲉⲓⲥ

20 ⲓⲱⲁⲃ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁⲥ ϫⲉⲉⲓⲉⲟⲩϫⲁⲓ ⲉⲓⲉⲟⲩϫⲁⲓ ⲉϣⲱⲡⲉ ϯⲛⲁϣⲣϣⲱⲣⲧⲡⲟⲗⲓⲥ ⲁⲩⲱ ⲉϣⲱⲡⲉ ϯⲛⲁⲧⲁⲕⲟⲥ

21 ⲙⲡϣⲁϫⲉ ⲁⲛ ϩⲓⲛⲁⲓ ⲡⲉ ⲡⲁⲓ ϫⲉⲟⲩⲣⲱⲙⲉ ⲉⲃⲟⲗ ϩⲙⲡⲧⲟⲟⲩ ⲛⲉⲫⲣⲁⲓⲙ ⲉⲡⲉϥⲣⲁⲛ ⲡⲉ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲉⲓ ⲉⲁϥⲉⲛⲧⲟⲟⲧϥ ⲉϫⲙⲡⲣⲣⲟ ⲇⲁⲩⲉⲓⲇ ⲡⲉⲧⲓⲕⲱⲧⲉ ⲛⲥⲱϥ ⲙⲁ ⲛⲁⲓϥ ⲙⲙⲁⲧⲉ ⲁⲩⲱ ϯⲛⲁⲃⲱⲕ ⲛⲧⲁⲗⲟ ϩⲓⲣⲛ ⲧⲉⲧⲛⲡⲟⲗⲓⲥ ⲡⲉϫⲉⲧⲉⲥϩⲓⲙⲉ ⲛⲓⲱⲁⲃ ϫⲉⲉⲓⲥⲧⲉϥⲁⲡⲉ ⲥⲉⲛⲁⲛⲟϫⲥ ⲛⲁⲕ ⲉⲃⲟⲗ ϩⲓϫⲙⲡⲥⲟⲃⲧ

22 ⲧⲉⲥϩⲓⲙⲉ ⲇⲉ ⲁⲥⲃⲱⲕ ⲉϩⲟⲩⲛ ϣⲁⲡⲉⲥⲗⲁⲟⲥ ⲧⲏⲣϥ ⲁⲥϣⲁϫⲉ ⲙⲛⲧⲡⲟⲗⲓⲥ ⲧⲏⲣⲥ ϩⲛⲧⲉⲥⲥⲟⲫⲓⲁ ⲉⲧⲣⲉⲩϥⲓ ⲛⲧⲁⲡⲉ ⲛⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ ⲁⲩϥⲓⲧⲥ ⲇⲉ ⲁⲩⲛⲟϫⲥ ⲉⲃⲟⲗ ⲛⲓⲱⲁⲃ ⲁⲩⲱ ⲓⲱⲁⲃ ⲁϥⲥⲁⲗⲡⲓⲍⲉ ϩⲛⲧⲥⲁⲗⲡⲓⲅⲝ ⲛⲁϣⲧⲁⲡ ⲁⲡⲟⲩⲁ ⲡⲟⲩⲁ ⲙⲙⲟⲟⲩ ⲕⲧⲟϥ ⲁϥⲃⲱⲕ ⲉⲡⲉϥⲙⲁ ⲛϣⲱⲡⲉ ⲁⲩⲱ ⲁϥⲕⲧⲟϥ ⲛϭⲓⲓⲱⲁⲃ ⲁϥⲃⲱⲕ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲉⲣⲁⲧϥ ⲙⲡⲣⲣⲟ

23 ⲓⲱⲁⲃ ⲇⲉ ⲛⲉϥϣⲟⲟⲡ ⲉϫⲙⲡⲙⲏⲏϣⲉ ⲧⲏⲣϥ ⲙⲡⲓⲥⲣⲁⲏⲗ ⲁⲩⲱ ⲃⲁⲛⲉⲁⲥ ⲡϣⲏⲣⲉ ⲛⲓⲱⲇⲁⲉ ⲛⲉϥϣⲟⲟⲡ ⲉϫⲙⲡⲉⲭⲉⲣⲉⲑⲑⲓ ⲁⲩⲱ ⲉϫⲙⲡⲟⲫⲉⲗⲉⲑⲑⲓ

24 ⲁⲇⲱⲛⲓⲗⲁⲙ ⲇⲉ ⲛⲉϥϣⲟⲟⲡ ⲉϫⲙⲡⲉⲡϩⲟⲣⲟⲥ ⲁⲩⲱ ⲓⲱⲥⲁⲫⲁⲧ ⲡϣⲏⲣⲉ ⲛⲁⲭⲓⲗⲟⲩⲑ ⲛⲧⲟϥ ⲡⲉⲧⲧⲣⲉⲡⲣⲣⲟ ⲣⲡⲙⲉⲉⲩⲉ

25 ⲁⲩⲱ ⲓⲏⲥⲟⲩⲥ ⲛⲧⲟϥ ⲡⲉⲧⲟ ⲛⲅⲣⲁⲙⲙⲁⲧⲉⲩⲥ ⲁⲩⲱ ⲥⲁⲇⲱⲕ ⲙⲛⲁⲃⲓⲁⲑⲁⲣ ⲛⲉⲩⲟ ⲛⲟⲩⲏⲏⲃ

26 ⲡⲕⲉⲉⲓⲣⲁⲥ ⲡϣⲏⲣⲉ ⲛⲓⲁⲣⲓⲛ ⲛⲉϥⲟ ⲛⲟⲩⲏⲏⲃ ⲛⲇⲁⲩⲉⲓⲇ