2 Samuel 21 — Coptic (Sahidic)

1 ⲁⲩⲱ ⲁⲩϩⲉⲃⲱⲱⲛ ϣⲱⲡⲉ ϩⲛⲛⲉϩⲟⲟⲩ ⲛⲇⲁⲩⲉⲓⲇ ⲛϣⲟⲙⲧⲉ ⲛⲣⲟⲙⲡⲉ ⲛⲥⲁⲛⲉⲩⲉⲣⲏⲩ ⲁⲩⲱ ⲇⲁⲩⲉⲓⲇ ⲁϥⲕⲱⲧⲉ ⲛⲥⲁⲡϩⲟ ⲙⲡϫⲟⲉⲓⲥ ⲡⲉϫⲉⲡϫⲟⲉⲓⲥ ϫⲉⲉⲣⲉⲧⲁⲇⲓⲕⲓⲁ ϣⲟⲟⲡ ⲉϫⲛⲥⲁⲟⲩⲗ ⲁⲩⲱ ⲉϫⲙⲡⲉϥⲏⲓ ⲉⲃⲟⲗ ϫⲉⲁϥⲙⲟⲩⲟⲩⲧ ⲛⲛⲉⲕⲁⲃⲁⲱⲛⲓⲧⲏⲥ

2 ⲁⲩⲱ ⲡⲣⲣⲟ ⲇⲁⲩⲉⲓⲇ ⲁϥⲙⲟⲩⲧⲉ ⲛⲕⲁⲃⲁⲱⲛⲓⲧⲏⲥ ⲁϥϣⲁϫⲉ ⲛⲙⲙⲁⲩ ⲛⲕⲁⲃⲁⲱⲛⲓⲧⲏⲥ ⲇⲉ ⲛϣⲏⲣⲉ ⲁⲛ ⲛⲉ ⲙⲡⲓⲥⲣⲁⲏⲗ ⲁⲗⲗⲁ ⲡⲥⲉⲉⲡⲉ ⲛⲉ ⲙⲡⲁⲙⲟⲣⲁⲓⲟⲥ ⲁⲩⲱ ⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲣⲁⲛⲁϣ ⲛⲁⲩ ⲥⲁⲟⲩⲗ ⲇⲉ ⲁϥⲕⲱⲧⲉ ⲛⲥⲁⲧϩⲉ ⲙⲙⲟⲟⲧⲟⲩ ϩⲙⲡⲧⲣⲉϥⲕⲱϩ ⲉⲛϣⲏⲣⲉ ⲙⲡⲓⲥⲣⲁⲏⲗ ⲙⲛⲓⲟⲩⲇⲁ

3 ⲡⲉϫⲉⲇⲁⲩⲉⲓⲇ ⲇⲉ ⲉⲛⲕⲁⲃⲁⲱⲛⲓⲧⲏⲥ ϫⲉⲟⲩ ⲡⲉϯⲛⲁⲁⲁϥ ⲛⲏⲧⲛ ⲁⲩⲱ ⲉⲓⲛⲁϣⲧⲱⲃϩ ϩⲛⲟⲩⲉⲧⲣⲉⲧⲉⲧⲛⲥⲙⲟⲩ ⲉⲧⲉⲕⲗⲏⲣⲟⲛⲟⲙⲓⲁ ⲙⲡϫⲟⲉⲓⲥ

4 ⲛⲕⲁⲃⲁⲱⲛⲓⲧⲏⲥ ⲇⲉ ⲡⲉϫⲁⲩ ⲛⲁϥ ϫⲉⲙⲛϩⲁⲧ ⲟⲩⲇⲉ ⲙⲛⲛⲟⲩⲃ ϣⲟⲟⲡ ⲛⲁⲛ ⲙⲛⲥⲁⲟⲩⲗ ⲁⲩⲱ ⲙⲛⲡⲉϥⲏⲓ ⲁⲩⲱ ⲙⲛⲣⲱⲙⲉ ϩⲙⲡⲓⲥⲣⲁⲏⲗ ⲉⲟⲩⲛⲧⲁⲛϩⲱⲃ ⲛⲙⲙⲁϥ ⲉⲙⲟⲟⲩⲧϥ ⲡⲉϫⲉⲇⲁⲩⲉⲓⲇ ⲛⲁⲩ ϫⲉⲛⲧⲱⲧⲛ ⲉⲧⲉⲧⲛϫⲱ ⲙⲙⲟⲥ ϫⲉⲟⲩ ⲁⲩⲱ ϯⲛⲁⲁⲁϥ ⲛⲏⲧⲛ

5 ⲡⲉϫⲁⲩ ⲉϩⲟⲩⲛ ϩⲙⲡⲣⲣⲟ ϫⲉⲡⲣⲱⲙⲉ ⲛⲧⲁϥϫⲱⲕ ⲉⲃⲟⲗ ⲉϩⲣⲁⲓ ⲉϫⲱⲛ ⲛⲟⲩⲕⲁⲕⲓⲁ ⲁⲩⲱ ⲁϥⲇⲓⲱⲕⲉⲓ ⲙⲙⲟⲛ ⲁⲩⲱ ⲁϥⲣⲕⲣⲟϥ ⲉⲃⲟⲧⲛ ⲉⲃⲟⲗ ϩⲛⲟⲩⲧⲁⲕⲟ ⲙⲁⲣⲉⲛⲧⲁⲕⲟϥ ⲉⲧⲙⲧⲣⲉϥⲁϩⲉⲣⲁⲧϥ ϩⲛⲗⲁⲁⲩ ⲛⲧⲟϣ ⲛⲧⲉⲡⲓⲥⲣⲁⲏⲗ

6 ⲙⲁ ⲛⲁⲛ ⲛⲥⲁϣϥ ⲛⲣⲱⲙⲉ ⲉⲃⲟⲗ ϩⲛⲛⲉϥϣⲏⲣⲉ ⲛⲧⲛⲕⲁⲁⲩ ⲉⲩϭⲗϭⲱⲗ ⲉⲃⲟⲗ ϩⲁⲡⲣⲏ ⲛⲁϩⲣⲙ ⲡϫⲟⲉⲓⲥ ϩⲛⲅⲁⲃⲁⲱⲛ ⲉⲃⲟⲗ ϩⲛⲥⲁⲟⲩⲗ ⲡⲥⲱⲧⲡ ϩⲙⲡϫⲟⲉⲓⲥ ⲡⲉϫⲉⲇⲁⲩⲉⲓⲇ ϫⲉⲁⲛⲟⲕ ϯⲛⲁⲧⲁⲁⲩ ⲛⲏⲧⲛ

7 ⲁⲩⲱ ⲡⲣⲣⲟ ⲁϥϯⲥⲟ ⲉⲉⲛⲧⲟⲟⲧϥ ⲉϫⲙⲙⲉⲙⲫⲓⲃⲟⲥⲑⲉ ⲉⲧⲃⲉⲡⲁⲛⲁϣ ⲙⲡϫⲟⲉⲓⲥ ⲉⲧⲟⲩⲧⲱϥ ⲁⲩⲱ ⲉⲧⲟⲩⲧⲱϥ ⲛⲓⲱⲛⲁⲑⲁⲛ ⲡϣⲏⲣⲉ ⲛⲥⲁⲟⲩⲗ

8 ⲡⲣⲣⲟ ⲇⲉ ⲁϥϫⲓ ⲙⲡϣⲏⲣⲉ ⲥⲛⲁⲩ ⲛϩⲣⲉⲥⲫⲁ ⲧϣⲉⲉⲣⲉ ⲛⲁⲓⲁ ⲛⲁⲓ ⲛⲧⲁⲩϫⲡⲟⲟⲩ ⲛⲥⲁⲟⲩⲗ ϩⲉⲣⲙⲱⲑⲓ ⲙⲛⲙⲉⲙⲫⲓⲃⲟⲥⲑⲉ ⲁⲩⲱ ⲡϯⲟⲩ ⲛϣⲏⲣⲉ ⲙⲙⲉⲗⲭⲱⲗ ⲧϣⲉⲉⲣⲉ ⲛⲥⲁⲟⲩⲗ ⲛⲁⲓ ⲛⲧⲁⲥϫⲡⲟⲟⲩ ⲛⲉⲥⲣⲓ ⲡϣⲏⲣⲉ ⲛⲃⲉⲣⲍⲉⲗⲗⲉⲓ ⲡⲙⲟⲟⲩⲗⲁⲑⲉⲓ

9 ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧⲟⲩ ⲛⲛⲉⲛⲕⲁⲃⲁⲱⲛⲓⲧⲏⲥ ⲁⲩϭⲗϭⲱⲗⲟⲩ ϩⲁⲡⲣⲏ ϩⲙⲡⲧⲟⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲛⲧⲟⲟⲩ ⲙⲡⲥⲁϣϥ ⲁⲩⲣⲱϩⲧ ϩⲓⲟⲩⲥⲟⲡ ⲁⲩⲱ ⲛⲧⲟⲟⲩ ⲁⲩⲙⲟⲟⲩⲧⲟⲩ ϩⲛⲛⲉϩⲟⲟⲩ ⲛϣⲟⲣⲡ ⲙⲡⲱϩⲥ ϩⲛⲧⲁⲣⲭⲏ ⲙⲡⲉϩⲥⲉⲓⲱⲧ

10 ⲁⲩⲱ ϩⲣⲉⲥⲫⲁ ⲧϣⲉⲉⲣⲉ ⲛⲁⲓⲁ ⲁⲥϫⲓ ⲛⲟⲩϭⲟⲟⲩⲛⲉ ⲁⲥⲡⲏⲥⲥⲉ ⲙⲙⲟⲥ ϩⲁⲧⲛⲧⲡⲉⲧⲣⲁ ϩⲛⲧⲁⲣⲭⲏ ⲙⲡⲉϩⲥⲉⲓⲱⲧ ϣⲁⲛⲧⲉⲟⲩⲙⲟⲟⲩ ⲉⲓ ⲉϫⲱⲥ ⲉⲃⲟⲗ ϩⲛⲧⲡⲉ ⲙⲡⲉⲥϯⲧϩⲉ ⲛⲛⲉϩⲁⲗⲁⲧⲉ ⲛⲧⲡⲉ ⲉⲧⲣⲉⲩⲟⲩⲱϩ ϩⲓϫⲱⲟⲩ ⲙⲡⲉϩⲟⲟⲩ ⲟⲩⲇⲉ ⲛⲉⲑⲏⲣⲓⲟⲛ ⲛⲧⲥⲱϣⲉ ⲉⲧⲣⲉⲩⲉⲓ ⲉϫⲱⲟⲩ ⲛⲧⲉⲩϣⲏ

11 ⲁⲩⲧⲁⲙⲉⲇⲁⲇ ⲇⲉ ⲉⲛⲉⲛⲧⲁⲥⲁⲁⲩ ⲛϭⲓϩⲣⲉⲥⲫⲁ ⲧϣⲉⲉⲣⲉ ⲛⲁⲓⲁ ⲧⲡⲁⲗⲗⲁⲕⲏ ⲛⲥⲁⲟⲩⲗ ⲁⲩⲱ ⲁⲩⲃⲱⲗ ⲉⲃⲟⲗ ⲁⲩⲧⲁϩⲟⲟⲩ ⲇⲉ ⲛϭⲓⲇⲁⲛ ⲡϣⲏⲣⲉ ⲛⲓⲱⲁ ⲡⲉ ⲉⲃⲟⲗ ϩⲙⲡⲉϫⲡⲟ ⲛⲛⲉⲅⲓⲅⲁⲥ

12 ⲁⲩⲱ ⲁϥⲃⲱⲕ ⲛϭⲓⲇⲁⲩⲉⲓⲇ ⲁϥϫⲓ ⲛⲛⲉⲕⲉⲉⲥ ⲛⲥⲁⲟⲩⲗ ⲁⲩⲱ ⲛⲕⲉⲉⲥ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲛⲧⲟⲟⲧⲟⲩ ⲛⲛⲣⲱⲙⲉ ⲛⲓⲁⲃⲓⲥ ⲛⲧⲉⲡⲕⲁϩ ⲛⲅⲁⲗⲁⲁⲇ ⲛⲁⲓ ⲛⲧⲁⲩϩⲟⲃⲧⲟⲩ ⲉⲃⲟⲗ ϩⲛⲧⲉⲡⲗⲁϯⲁ ⲛⲃⲏⲑⲥⲁⲛ ϫⲉⲛⲁⲗⲗⲟⲫⲩⲗⲟⲥ ⲁⲩⲕⲁⲁⲩ ϩⲙⲡⲙⲁ ⲉⲧⲙⲙⲁⲩ ϩⲙⲡⲉϩⲟⲟⲩ ⲛⲧⲁⲛⲁⲗⲗⲟⲫⲩⲗⲟⲥ ⲡⲁⲧⲁⲥⲥⲉⲓ ⲛⲥⲁⲟⲩⲗ ϩⲛⲅⲉⲗⲃⲟⲩⲉ

13 ⲁⲩⲱ ⲁϥⲉⲓⲛⲉ ⲉϩⲣⲁⲓ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲛⲛⲉⲕⲉⲉⲥ ⲛⲥⲁⲟⲩⲗ ⲁⲩⲱ ⲛⲕⲉⲉⲥ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁϥⲥⲱⲟⲩϩ ⲟⲛ ⲉϩⲟⲩⲛ ⲛⲛⲉⲕⲉⲉⲥ ⲛⲛⲉⲛⲧⲁⲩϭⲗϭⲱⲗⲟⲩ ⲉⲃⲟⲗ ϩⲁⲡⲣⲏ

14 ⲁⲩⲱ ⲁϥⲧⲱⲙⲥ ⲛⲛⲉⲕⲉⲉⲥ ⲛⲥⲁⲟⲩⲗ ⲙⲛⲛⲉⲕⲉⲉⲥ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲙⲛⲛⲉⲕⲉⲉⲥ ⲛⲛⲉⲛⲕⲟⲟⲩⲉ ⲛⲧⲁⲩϭⲗϭⲱⲗⲟⲩ ϩⲁⲡⲣⲏ ϩⲙⲡⲕⲁϩ ⲛⲃⲉⲛⲓⲁⲙⲓⲛ ⲛⲥⲁⲥⲡⲓⲣ ⲙⲡⲧⲁⲫⲟⲥ ⲛϭⲓⲥ ⲡⲉϥⲉⲓⲱⲧ ⲁⲩⲱ ⲁⲩⲉⲓⲣⲉ ⲛϩⲱⲃ ⲛⲓⲙ ⲛⲧⲁⲡⲣⲣⲟ ϩⲱⲛ ⲙⲙⲟⲟⲩ ⲉⲧⲟⲟⲧⲟⲩ ⲁⲩⲱ ⲡⲛⲟⲩⲧⲉ ⲁϥⲥⲱⲧⲙ ⲁϥϣⲛϩⲧⲏϥ ϩⲁⲡⲕⲁϩ

15 ⲁⲩⲡⲟⲗⲉⲙⲟⲥ ⲇⲉ ϣⲱⲡⲉ ⲛⲧⲉⲛⲁⲗⲗⲟⲫⲩⲗⲟⲥ ⲙⲛⲡⲓⲥⲣⲁⲏⲗ ⲁⲩⲱ ⲇⲁⲩⲉⲓⲇ ⲁϥⲃⲱⲕ ⲉⲃⲟⲗ ⲙⲛⲛⲉϥϩⲙϩⲁⲗ ⲛⲙⲙⲁϥ ⲁⲩⲡⲟⲗⲉⲙⲉⲓ ⲙⲛⲛⲁⲗⲗⲟⲫⲩⲗⲟⲥ ⲁⲩⲱ ⲇⲁⲩⲉⲓⲇ ⲁϥϣⲧⲟⲣⲧⲣ

16 ⲓⲉⲥⲃⲓⲛ ⲇⲉ ⲡⲉⲧϩⲛⲛⲉϣⲏⲣⲉ ⲛϩⲣⲁⲫⲁ ⲉⲃⲟⲗ ϩⲛⲛⲉϣⲏⲣⲉ ⲛⲛⲉⲅⲓⲅⲁⲥ ⲡⲁⲓ ⲉⲣⲉⲡϣⲓ ⲛⲧⲉϥⲗⲟⲅⲭⲏ ⲛⲁⲣϣⲟⲙⲛⲧ ⲛϣⲉ ⲛⲥⲁⲧⲉⲉⲣⲉ ⲛϩⲣⲏϣⲉ ⲛϩⲟⲙⲛⲧ ⲁⲩⲱ ⲛⲧⲟϥ ⲛⲉϥϩⲏⲕ ϩⲛⲟⲩϩⲱⲕ ⲛϣⲛⲃⲉ ⲉⲛⲉϥϯ ⲛϩⲧⲏϥ ⲉⲣⲱϩⲧ ⲛⲇⲁⲩⲉⲓⲇ

17 ⲁⲩⲱ ⲁⲃⲓⲥⲁ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲁϥⲃⲟⲏⲑⲉⲓ ⲉⲣⲟϥ ⲁϥⲡⲁⲧⲁⲥⲥⲉⲓ ⲙⲡⲁⲗⲗⲟⲫⲩⲗⲟⲥ ⲁϥⲙⲟⲟⲩⲧϥ ⲧⲟⲧⲉ ⲁⲩⲱⲣⲕ ⲛⲇⲁⲩⲉⲓⲇ ⲛϭⲓⲛⲣⲱⲙⲉ ⲉⲩϫⲱ ⲙⲙⲟⲥ ⲛⲁϥ ϫⲉⲛⲛⲉⲕⲉⲓ ⲛϫⲓⲛ ⲉⲡⲉⲓⲛⲁⲩ ⲉⲃⲟⲗ ⲉⲡⲡⲟⲗⲉⲙⲟⲥ ⲛⲙⲙⲁⲛ ϫⲉⲛⲛⲉⲕϫⲛⲉⲡϩⲏⲃⲥ ⲙⲡⲓⲥⲣⲁⲏⲗ

18 ⲁⲥϣⲱⲡⲉ ⲇⲉ ⲙⲛⲛⲥⲁⲛⲁⲓ ⲁⲩⲡⲟⲗⲉⲙⲟⲥ ⲟⲛ ϣⲱⲡⲉ ϩⲛⲅⲉⲑ ⲙⲛⲛⲁⲗⲗⲟⲫⲩⲗⲟⲥ ⲧⲟⲧⲉ ⲁϥⲡⲁⲧⲁⲥⲥⲉⲓ ⲛϭⲓⲁⲃⲟⲭⲁⲉⲓ ⲡⲁⲥⲧⲟⲑⲁⲉⲓ ⲛⲥⲉⲫ ⲡⲉⲧϩⲛⲛⲉϫⲡⲟ ⲛϩⲣⲁⲫⲁ

19 ⲁⲩⲡⲟⲗⲉⲙⲟⲥ ⲟⲛ ϣⲱⲡⲉ ϩⲛⲣⲟⲟⲃ ⲙⲛⲛⲁⲗⲗⲟⲫⲩⲗⲟⲥ ⲁⲩⲱ ⲉⲗⲓⲁⲛⲁⲛ ⲡϣⲏⲣⲉ ⲛⲁⲣⲓⲱⲅⲉⲙ ⲡⲉⲉⲃⲟⲗ ϩⲙⲃⲏⲑⲗⲉⲉⲙ ⲁϥⲡⲁⲧⲁⲥⲥⲉⲓ ⲛⲅⲟⲇⲟⲗⲓⲁⲥ ⲡⲅⲉⲇⲇⲁⲓⲟⲥ ⲡϣⲓ ⲇⲉ ⲙⲡⲉϥⲙⲉⲣⲉϩ ⲛⲉϥⲟ ⲛⲧϩⲉ ⲙⲡϩⲟ ⲛⲛⲉϣⲁⲩⲥⲱϩⲉ

20 ⲁⲩⲡⲟⲗⲉⲙⲟⲥ ⲟⲛ ϣⲱⲡⲉ ϩⲛⲅⲉⲑ ⲛⲉⲣⲉⲟⲩⲣⲱⲙⲉ ⲇⲉ ⲙⲙⲁⲩ ⲉⲡⲉϥⲣⲁⲛ ⲡⲉ ⲁⲇⲱⲛⲓ ⲁⲩⲱ ⲛⲧⲏⲏⲃⲉ ⲛⲛⲉϥϭⲓϫ ⲙⲛⲛⲁⲛⲉϥⲟⲩⲉⲣⲏⲧⲉ ⲛⲉⲩⲛⲁⲣⲥⲟⲟⲩ ϩⲓⲥⲟⲟⲩ ⲉⲧⲣϫⲟⲩⲧⲁϥⲧⲉ ⲛⲏⲡⲉ ⲛⲧⲟϥ ϩⲱⲱϥ ⲉⲁⲩϫⲡⲟϥ ⲛϩⲣⲁⲫⲁ

21 ⲁⲩⲱ ⲁϥⲛⲟϭⲛⲉϭ ⲙⲡⲓⲥⲣⲁⲏⲗ ⲡⲁⲓ ⲇⲉ ⲁϥⲡⲁⲧⲁⲥⲥⲉⲓ ⲙⲙⲟϥ ⲛϭⲓⲓⲱⲛⲁⲑⲁⲛ ⲡϣⲏⲣⲉ ⲛⲥⲉⲙⲉⲉⲓ ⲡⲥⲟⲛ ⲛⲇⲁⲩⲉⲓⲇ

22 ⲡⲉⲓϥⲧⲟⲟⲩ ⲁⲩϫⲡⲟⲟⲩ ⲉϩⲉⲛⲉⲃⲟⲗ ⲛⲉ ϩⲛⲛϣⲏⲣⲉ ⲛⲛⲉⲅⲓⲅⲁⲥ ϩⲛⲅⲉⲑ ⲙⲡⲏⲓ ⲛϩⲣⲁⲫⲁ ⲁⲩϩⲉ ⲇⲉ ϩⲁⲧⲟⲟⲧϥ ⲛⲇⲁⲩⲉⲓⲇ ⲁⲩⲱ ϩⲁⲧⲟⲟⲧⲟⲩ ⲛⲛⲉϥϩⲙϩⲁⲗ