2 Samuel 19 — Coptic (Sahidic)

1 ⲡⲣⲣⲟ ⲇⲉ ⲁϥϣⲧⲟⲣⲧⲣ ⲁⲩⲱ ⲁϥⲃⲱⲕ ⲉϩⲣⲁⲓ ⲉϫⲛⲧⲡⲩⲗⲏ ⲁϥⲣⲓⲙⲉ ⲁⲩⲱ ⲛⲉϥϫⲱ ⲙⲙⲟⲥ ϩⲓⲛⲁⲓ ⲉϥⲙⲟⲟϣⲉ ϫⲉⲡⲁϣⲏⲣⲉ ⲁⲃⲏⲥⲁⲗⲱⲙ ⲡⲁϣⲏⲣⲉ ⲡⲁϣⲏⲣⲉ ⲁⲃⲏⲥⲁⲗⲱⲙ ⲛⲓⲙ ⲡⲉⲧⲛⲁϯ ⲙⲡⲁⲙⲟⲩ ϩⲁⲡⲱⲕ ⲁⲛⲟⲕ ⲉⲩⲉⲧⲁⲁⲧ ⲉⲡⲉⲕⲙⲁ ⲡⲁϣⲏⲣⲉ ⲁⲃⲉⲥⲥⲁⲗⲱⲙ ⲡⲁϣⲏⲣⲉ

2 ⲁⲩⲧⲁⲙⲉⲓⲱⲁⲃ ⲇⲉ ⲉⲩϫⲱ ⲙⲙⲟⲥ ϫⲉⲉⲓⲥⲡⲣⲣⲟ ⲣⲓⲙⲉ ⲉⲁⲃⲏⲥⲁⲗⲱⲙ ⲡⲉϥϣⲏⲣⲉ ⲁⲩⲱ ϥⲣϩⲏⲃⲉ ⲛⲁϥ

3 ⲁⲩⲱ ⲧⲥⲱⲧⲏⲣⲓⲁ ⲙⲛⲡⲉϫⲣⲟ ⲙⲡⲉϩⲟⲟⲩ ⲉⲧⲙⲙⲁⲩ ⲁⲩϣⲱⲡⲉ ⲉⲩϩⲏⲃⲉ ⲙⲡⲗⲁⲟⲥ ⲧⲏⲣϥ ⲉⲃⲟⲗ ϫⲉⲡⲗⲁⲟⲥ ⲁϥⲥⲱⲧⲙ ⲙⲡⲉϩⲟⲟⲩ ⲉⲧⲙⲙⲁⲩ ⲉⲩϫⲱ ⲙⲙⲟⲥ ϫⲉⲡⲣⲣⲟ ⲟⲩⲟⲗⲥ ⲉϫⲙⲡⲉϥϣⲏⲣⲉ

4 ⲁⲩⲱ ⲛⲉⲣⲉⲡⲗⲁⲟⲥ ϫⲓⲕⲱⲡ ⲕⲱⲡ ⲙⲡⲉϩⲟⲟⲩ ⲉⲧⲙⲙⲁⲩ ⲉⲩⲛⲁⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲕⲁⲧⲁⲧϩⲉ ⲛϣⲁϥϫⲓ ⲕⲱⲡ ⲕⲱⲡ ⲛϭⲓⲡⲗⲁⲟⲥ ⲛⲧⲁϥϫⲓϣⲓⲡⲉ ϩⲙⲡⲧⲣⲉⲩϭⲱⲧⲡ ϩⲙⲡⲡⲟⲗⲉⲙⲟⲥ

5 ⲡⲣⲣⲟ ⲇⲉ ⲁϥϩⲉⲃⲥⲡⲉϥϩⲟ ⲁⲩⲱ ⲁϥⲛⲟⲩⲛⲣⲟ ⲛϭⲓⲡⲣⲣⲟ ϩⲛⲟⲩⲛⲟϭ ⲛⲁϣϣⲕⲁⲕ ⲉϥϫⲱ ⲙⲙⲟⲥ ϫⲉⲡⲁϣⲏⲣⲉ ⲁⲃⲏⲥⲁⲗⲱⲙ ⲁⲃⲏⲥⲁⲗⲱⲙ ⲡⲁϣⲏⲣⲉ

6 ⲓⲱⲁⲃ ⲇⲉ ⲁϥⲃⲱⲕ ⲉϩⲟⲩⲛ ⲉⲡⲏⲓ ⲙⲡⲣⲣⲟ ⲉϥϫⲱ ⲙⲙⲟⲥ ⲛⲁϥ ϫⲉⲁⲕϯϣⲓⲡⲉ ⲙⲡϩⲟⲟⲩ ⲙⲡϩⲟ ⲛⲛⲉⲕϩⲙϩⲁⲗ ⲧⲏⲣⲟⲩ ⲛⲉⲧⲙⲓϣⲉ ⲉϫⲱⲕ ⲙⲡϩⲟⲟⲩ ⲁⲩⲱ ⲧⲉⲯⲩⲭⲏ ⲛⲛⲉⲕϣⲏⲣⲉ ⲙⲛⲛⲉⲕϣⲉⲉⲣⲉ ⲙⲛⲛⲉⲕⲡⲁⲗⲗⲁⲕⲏ

7 ⲉⲧⲣⲉⲕⲙⲉⲣⲓⲛⲉⲧⲙⲟⲥⲧⲉ ⲙⲙⲟⲕ ⲁⲩⲱ ⲛⲅⲙⲉⲥⲧⲉ ⲛⲉⲧⲙⲉ ⲙⲙⲟⲕ ⲁⲩⲱ ⲁⲕⲟⲩⲟⲛϩⲕ ⲉⲃⲟⲗ ⲙⲡϩⲟⲟⲩ ϫⲉϩⲉⲛⲗⲁⲁⲩ ⲛⲉ ⲛⲉⲕⲁⲣⲭⲱⲛ ⲙⲛⲛⲉⲕϩⲙϩⲁⲗ ⲁⲓⲉⲓⲙⲉ ⲅⲁⲣ ⲙⲡϩⲟⲟⲩ ϫⲉⲉⲛⲉⲉⲣⲉⲁⲃⲏⲥⲁⲗⲱⲙ ⲟⲛϩ ⲉϣϫⲉ ⲁⲛⲟⲛ ⲧⲏⲣⲛ ⲙⲡϩⲟⲟⲩ ⲧⲛⲙⲟⲟⲩⲧ ⲡⲉ ϫⲉⲉⲛⲉⲡⲁⲓ ⲣⲱ ⲡⲉ ⲡⲉⲧⲥⲟⲩⲧⲱⲛ ⲛⲁϩⲣⲟⲕ

8 ⲧⲉⲛⲟⲩ ϭⲉ ⲧⲱⲟⲩⲛ ⲛⲅⲉⲓ ⲉⲃⲟⲗ ⲛⲅϣⲁϫⲉ ⲛϩⲏⲧ ⲛⲛⲉⲕϩⲙϩⲁⲗ ϫⲉⲁⲓⲱⲣⲕ ϩⲙⲡϫⲟⲉⲓⲥ ϫⲉⲉϣⲱⲡⲉ ⲛⲅⲛⲏⲩ ⲁⲛ ⲉⲃⲟⲗ ⲙⲡϩⲟⲟⲩ ⲉⲛⲉⲟⲩⲛⲗⲁⲁⲩ ⲛⲣⲱⲙⲉ ⲛⲁϭⲱ ⲛⲙⲙⲁⲕ ⲛⲧⲉⲓⲟⲩϣⲏ ⲁⲩⲱ ⲉⲓⲙⲉ ⲛⲁⲕ ϫⲉⲡⲉⲓϩⲱⲃ ⲛⲁⲧϩⲟ ⲛⲁⲕ ⲉϩⲟⲩⲉ ⲉⲙⲡⲉⲧϩⲟⲟⲩ ⲧⲏⲣⲟⲩ ⲛⲧⲁⲩⲉⲓ ⲉϫⲱⲕ ⲛϫⲓⲛ ⲧⲉⲕⲙⲛⲧⲕⲟⲩⲓ ϣⲁⲉϩⲣⲁⲓ ⲉϯⲟⲩⲛⲟⲩ

9 ⲁⲩⲱ ⲡⲣⲣⲟ ⲁϥⲧⲱⲟⲩⲛ ⲁϥϩⲙⲟⲟⲥ ϩⲓⲣⲛ ⲧⲡⲩⲗⲏ ⲁⲩϫⲓⲡⲟⲩⲱ ⲇⲉ ⲙⲡⲗⲁⲟⲥ ⲉⲩϫⲱ ⲙⲙⲟⲥ ϫⲉⲉⲓⲥⲡⲣⲣⲟ ϩⲙⲟⲟⲥ ϩⲓϫⲛⲧⲡⲩⲗⲏ ⲁⲩⲱ ⲡⲗⲁⲟⲥ ⲧⲏⲣϥ ⲁϥⲉⲓ ⲉⲃⲟⲗ ϩⲓⲧϩⲏ ⲙⲡⲣⲣⲟ ⲡⲓⲥⲣⲁⲏⲗ ⲇⲉ ⲡⲟⲩⲁ ⲡⲟⲩⲁ ⲁϥⲃⲱⲕ ⲉϩⲣⲁⲓ ⲉⲡⲉϥⲙⲁ ⲛϣⲱⲡⲉ

10 ⲁⲩⲱ ⲡⲗⲁⲟⲥ ⲧⲏⲣϥ ⲛⲉⲩϣⲁϫⲉ ⲙⲛⲛⲉⲫⲩⲗⲏ ⲧⲏⲣⲟⲩ ⲙⲡⲓⲥⲣⲁⲏⲗ ⲉⲩϫⲱ ⲙⲙⲟⲥ ⲛⲛⲉⲩⲉⲣⲏⲩ ϫⲉⲡⲣⲣⲟ ⲇⲁⲩⲉⲓⲇ ⲛⲧⲟϥ ⲁϥⲛⲁϩⲙⲉⲛ ⲛⲧⲟⲟⲧⲟⲩ ⲛⲛⲉⲛϫⲁϫⲉ ⲧⲏⲣⲟⲩ ⲁⲩⲱ ⲡⲉⲛⲧⲁϥⲥⲟⲧⲛ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲧⲉⲛⲟⲩ ⲁϥⲡⲱⲧ ⲉⲃⲟⲗ ϩⲙⲡⲉϥⲕⲁϩ ⲁⲩⲱ ⲉⲃⲟⲗ ϩⲛⲧⲉϥⲙⲛⲧⲣⲣⲟ

11 ⲁⲃⲏⲥⲁⲗⲱⲙ ⲇⲉ ⲛⲧⲁⲩⲧⲁϩⲥϥ ⲛⲣⲣⲟ ⲉϩⲣⲁⲓ ⲉϫⲱⲛ ⲁϥⲙⲟⲩ ϩⲙⲡⲡⲟⲗⲉⲙⲟⲥ ⲧⲉⲛⲟⲩ ϭⲉ ⲁϩⲣⲱⲧⲛ ⲛⲧⲱⲧⲛ ⲧⲉⲧⲛϩⲙⲟⲟⲥ ⲉⲧⲉⲧⲛⲕⲱ ⲛⲣⲱⲧⲛ ⲉⲕⲧⲉⲡⲉⲛⲣⲣⲟ ⲟⲛ ⲉⲣⲟⲛ ⲡϣⲁϫⲉ ⲇⲉ ⲙⲡⲓⲥⲣⲁⲏⲗ ⲧⲏⲣϥ ⲁϥⲡⲱϩ ϣⲁⲡⲣⲣⲟ

12 ⲁⲩⲱ ⲡⲣⲣⲟ ⲇⲁⲩⲉⲓⲇ ⲁϥϫⲟⲟⲩ ⲛⲥⲁⲇⲱⲕ ⲙⲛⲁⲃⲓⲁⲑⲁⲣ ⲛⲉⲟⲩⲏⲏⲃ ⲉϥϫⲱ ⲙⲙⲟⲥ ⲛⲁⲩ ϫⲉϣⲁϫⲉ ⲙⲛⲛⲉⲡⲣⲉⲥⲃⲩⲧⲉⲣⲟⲥ ⲛⲓⲟⲩⲇⲁ ⲉⲧⲉⲧⲛϫⲱ ⲙⲙⲟⲥ ⲛⲁⲩ ϫⲉⲉⲧⲃⲉⲟⲩ ⲛⲧⲱⲧⲛ ⲉⲧⲉⲧⲛⲛⲁⲥⲉⲕϩⲁⲉ ⲉⲧⲣⲉⲧⲉⲧⲛⲕⲧⲉⲡⲣⲣⲟ ⲉϩⲣⲁⲓ ⲉⲡⲉϥⲏⲓ

13 ⲛⲧⲉⲧⲛⲛⲁⲥⲛⲏⲩ ⲛⲧⲉⲧⲛⲛⲁⲕⲉⲉⲥ ⲟⲛ ⲁⲩⲱ ⲛⲧⲉⲧⲛⲛⲁⲥⲁⲣⲝ ⲁϩⲣⲱⲧⲛ ϭⲉ ⲉⲧⲉⲧⲛⲛⲁⲥⲉⲕϩⲁⲉ ⲉⲧⲣⲉⲧⲉⲧⲛⲕⲧⲉⲡⲣⲣⲟ ⲉϩⲣⲁⲓ ⲉⲡⲉϥⲏⲓ ⲁⲩⲱ ⲡϣⲁϫⲉ ⲙⲡⲓⲥⲣⲁⲏⲗ ⲧⲏⲣϥ ⲁϥⲡⲱϩ ϣⲁⲡⲣⲣⲟ ⲁⲩⲱ ⲡⲣⲣⲟ ⲇⲁⲩⲉⲓⲇ ⲁϥϫⲟⲟⲩ ⲛⲥⲁⲇⲱⲕ ⲉϩⲣⲁⲓ ⲉⲡⲉϥⲏⲓ ⲁⲩⲱ ⲡϣⲁϫⲉ ⲙⲡⲓⲥⲣⲁⲏⲗ ⲁϥⲡⲱϩ ϣⲁⲡⲣⲣⲟ

14 ⲁⲩⲱ ⲁⲙⲉⲥⲥⲁⲉⲓ ⲇⲉ ⲉⲧⲉⲧⲛⲛⲁϫⲟⲟⲥ ⲛⲁϥ ϫⲉⲙⲏ ⲛⲧⲟⲕ ⲡⲉ ⲛⲁⲕⲉⲉⲥ ⲁⲛ ⲛⲧⲟⲕ ⲁⲩⲱ ⲛⲁⲥⲁⲣⲝ ⲧⲉⲛⲟⲩ ϭⲉ ⲛⲁⲓ ⲉⲣⲉⲡⲛⲟⲩⲧⲉ ⲁⲁⲩ ⲛⲁⲓ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉⲣⲟⲓ ϫⲉⲉϣⲱⲡⲉ ⲛⲉⲕⲛⲁϭⲱ ⲁⲛ ⲉⲕⲟ ⲛⲁⲣⲭⲱⲛ ⲙⲡⲁⲙⲧⲟ ⲉⲃⲟⲗ ⲛⲛⲉϩⲟⲟⲩ ⲧⲏⲣⲟⲩ ⲉⲡⲙⲁ ⲛⲓⲱⲁⲃ

15 ⲁⲩⲱ ⲁϥⲥⲉⲕⲡϩⲏⲧ ⲛⲛⲉⲣⲱⲙⲉ ⲧⲏⲣⲟⲩ ⲛⲓⲟⲩⲇⲁ ⲛⲧϩⲉ ⲛⲟⲩⲣⲱⲙⲉ ⲛⲟⲩⲱⲧ ⲁⲩⲱ ⲁⲩϫⲟⲟⲩ ⲙⲡⲣⲣⲟ ⲉⲩϫⲱ ⲙⲙⲟⲥ ⲛⲁϥ ϫⲉⲛⲧⲟⲕ ⲉⲣⲟⲛ ⲛⲧⲟⲕ ⲙⲛⲛⲉⲕϩⲙϩⲁⲗ

16 ⲁⲩⲱ ⲡⲣⲣⲟ ⲁϥⲕⲧⲟϥ ⲁϥⲉⲓ ⲉϫⲙⲡⲓⲟⲣⲇⲁⲛⲏⲥ

17 ⲁⲩⲱ ⲁϥⲡⲱⲧ ⲛϭⲓⲥⲉⲙⲉⲉⲓ ⲡϣⲏⲣⲉ ⲛⲕⲏⲣⲁ ⲡϣⲏⲣⲉ ⲛⲓⲉⲙⲉⲛⲉⲓ ⲉⲃⲟⲗ ϩⲛⲃⲁⲟⲩⲣⲓⲙ ⲁϥⲉⲓ ⲉϩⲣⲁⲓ ⲙⲛⲛⲣⲱⲙⲉ ⲛⲓⲟⲩⲇⲁ ⲉⲧⲱⲙⲛⲧ ⲉⲡⲣⲣⲟ ⲇⲁⲩⲉⲓⲇ

18 ⲉⲣⲉⲙⲏⲧ ⲛϣⲉ ⲛⲣⲱⲙⲉ ⲛⲙⲙⲁϥ ⲉⲃⲟⲗ ϩⲛⲃⲉⲛⲓⲁⲙⲓⲛ ⲁⲩⲱ ⲥⲓⲃⲁ ⲡϩⲙϩⲁⲗ ⲛⲥⲁⲟⲩⲗ ⲉⲣⲉⲡⲉϥⲙⲛⲧⲏ ⲛϣⲏⲣⲉ ⲛⲙⲙⲁϥ ⲁⲩⲱ ⲡⲉϥϫⲟⲩⲱⲧ ⲛϩⲙϩⲁⲗ ⲛⲙⲙⲁϥ ⲁϥⲥⲃⲧⲉⲡⲓⲟⲣⲇⲁⲛⲏⲥ ϩⲓⲧϩⲏ ⲙⲡⲣⲣⲟ

19 ⲁⲩⲱ ⲁⲩϯⲧⲟⲟⲧⲟⲩ ⲙⲛⲛⲉⲩⲉⲣⲏⲩ ⲉϫⲓⲟⲟⲣ ⲙⲡⲣⲣⲟ ⲁⲩⲱ ⲁϥϫⲓⲟⲟⲣ ⲛϭⲓⲡⲙⲏⲏϣⲉ ⲉⲧⲁϩⲟ ⲉⲣⲁⲧϥ ⲙⲡⲏⲓ ⲙⲡⲣⲣⲟ ⲁⲩⲱ ⲉⲉⲓⲣⲉ ⲙⲡⲉⲧⲥⲟⲩⲧⲱⲛ ⲙⲡⲉϥⲙⲧⲟ ⲉⲃⲟⲗ ⲥⲉⲙⲉⲉⲓ ⲇⲉ ⲡϣⲏⲣⲉ ⲛⲅⲏⲣⲁ ⲁϥⲡⲁϩⲧϥ ϩⲓⲧϩⲏ ⲙⲡⲣⲣⲟ ⲉϥⲛⲁϫⲓⲟⲟⲣ ⲙⲡⲓⲟⲣⲇⲁⲛⲏⲥ

20 ⲡⲉϫⲁϥ ϩⲓⲧϩⲏ ⲙⲡⲣⲣⲟ ϫⲉⲙⲡⲣⲧⲣⲉⲡⲁϫⲟⲉⲓⲥ ⲡⲣⲣⲟ ⲙⲉⲉⲩⲉ ⲉⲩⲁⲛⲟⲙⲓⲁ ⲁⲩⲱ ⲙⲡⲣⲕⲱ ϩⲙⲡⲉⲕϩⲏⲧ ⲛⲛⲛⲟⲃⲉ ⲛⲧⲁⲡⲉⲕϩⲙϩⲁⲗ ⲁⲁⲩ ⲙⲡⲉϩⲟⲟⲩ ⲛⲧⲁⲡⲁϫⲟⲉⲓⲥ ⲉⲓ ⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ ⲉⲧⲣⲉⲡⲣⲣⲟ ⲙⲉⲉⲩⲉ ⲉⲡⲁⲓ ϩⲙⲡⲉϥϩⲏⲧ

21 ϫⲉⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ⲁⲓⲉⲓⲙⲉ ϫⲉⲁⲛⲟⲕ ⲡⲉ ⲛⲧⲁⲓⲣⲛⲟⲃⲉ ⲁⲩⲱ ⲉⲓⲥ ϩⲏⲏⲧⲉ ⲁⲛⲟⲕ ⲙⲡϩⲟⲟⲩ ⲁⲓⲉⲓ ϩⲓⲧϩⲏ ⲙⲡⲏⲓ ⲧⲏⲣϥ ⲛⲓⲱⲥⲏⲫ ⲉⲣⲁⲧϥ ⲙⲡⲁϫⲟⲉⲓⲥ ⲡⲣⲣⲟ

22 ⲁϥⲟⲩⲱϣⲃ ⲇⲉ ⲛϭⲓⲁⲃⲓⲥⲁ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲉϥϫⲱ ⲙⲙⲟⲥ ϫⲉⲙⲏ ⲉⲧⲃⲉⲡⲉⲓϩⲱⲃ ⲉⲧⲉⲛϥⲛⲁⲙⲟⲩ ⲁⲛ ⲛϭⲓⲥⲏⲙⲉⲉⲓ ϫⲉⲁϥⲥⲁϩⲟⲩ ⲙⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ

23 ⲇⲁⲩⲉⲓⲇ ⲇⲉ ⲡⲉϫⲁϥ ϫⲉⲁϩⲣⲱⲧⲛ ⲛⲙⲙⲁⲓ ⲛϣⲏⲣⲉ ⲛⲥⲁⲣⲟⲩⲉⲓⲁⲥ ϫⲉⲉⲧⲉⲧⲛⲟ ⲛⲁⲓ ⲙⲡϩⲟⲟⲩ ⲛⲉⲡⲓⲃⲟⲩⲗⲟⲥ ϫⲉⲙⲡϩⲟⲟⲩ ⲛϩⲟⲟⲩ ⲙⲛⲣⲱⲙⲉ ⲛⲁⲙⲟⲩ ⲉⲃⲟⲗ ϩⲙⲡⲓⲥⲣⲁⲏⲗ ϫⲉⲛϯⲥⲟⲟⲩⲛ ⲁⲛ ϫⲉⲙⲡϩⲟⲟⲩ ϯⲛⲁⲣⲣⲣⲟ ⲉϫⲙⲡⲓⲥⲣⲁⲏⲗ

24 ⲁⲩⲱ ⲡⲣⲣⲟ ⲡⲉϫⲁϥ ⲉϩⲟⲩⲛ ϩⲛⲥⲉⲙⲉⲉⲓ ϫⲉⲛⲅⲛⲁⲙⲟⲩ ⲁⲛ ⲁⲩⲱ ⲡⲣⲣⲟ ⲁϥⲱⲣⲕ ⲛⲁϥ

25 ⲙⲉⲙⲫⲓⲃⲟⲥⲑⲉ ⲇⲉ ⲡϣⲏⲣⲉ ⲛⲓⲱⲛⲁⲑⲁⲛ ⲡϣⲏⲣⲉ ⲛⲥⲁⲟⲩⲗ ⲁϥⲉⲓ ⲉⲃⲟⲗ ⲉⲧⲱⲙⲛⲧ ⲉⲡⲣⲣⲟ ⲉⲁϥϭⲱ ⲛⲟⲩⲉϣⲑⲉⲣⲁⲡⲉⲩⲉ ⲛⲛⲉϥⲟⲩⲉⲣⲏⲧⲉ ⲟⲩⲇⲉ ⲙⲡⲉϥⲉⲛⲛⲉϥⲓⲉⲓⲃ ⲟⲩⲇⲉ ⲙⲡⲉϥⲕⲁⲑⲁⲣⲓⲍⲉ ⲛⲛⲉϥⲥⲡⲟⲧⲟⲩ ⲁⲩⲱ ⲛⲉϥϩⲟⲉⲓⲧⲉ ⲙⲡⲉϥϣⲟⲙⲟⲩ ⲛϫⲓⲛ ⲡⲉϩⲟⲟⲩ ⲛⲧⲁⲡⲣⲣⲟ ⲙⲟⲟϣⲉ ⲉⲃⲟⲗ ϣⲁⲡⲉϩⲟⲟⲩ ⲛⲧⲁϥⲉⲓ ⲛⲧⲟϥ ϩⲛⲟⲩⲉⲓⲣⲏⲛⲏ

26 ⲁⲩⲱ ⲛⲧⲉⲣⲉϥⲉⲓ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲉⲧⲣⲉϥⲧⲱⲙⲛⲧ ⲉⲡⲣⲣⲟ ⲡⲉϫⲉⲡⲣⲣⲟ ⲛⲁϥ ϫⲉⲉⲧⲃⲉⲟⲩ ⲙⲡⲉⲕⲣⲛⲁⲙⲟⲟϣⲉ ⲉⲃⲟⲗ ⲙⲉⲙⲫⲓⲃⲟⲥⲑⲉ

27 ⲡⲉϫⲉⲙⲉⲙⲫⲓⲃⲟⲥⲑⲉ ⲛⲁϥ ϫⲉⲡⲁϫⲟⲉⲓⲥ ⲡⲣⲣⲟ ⲡⲉⲕϩⲙϩⲁⲗ ⲡⲉ ⲛⲧⲁϥⲣϩⲁⲗ ⲙⲙⲟⲓ ϫⲉⲁⲛⲟⲕ ⲡⲉⲕϩⲙϩⲁⲗ ⲁⲓϫⲟⲟⲥ ⲛⲁϥ ϫⲉϩⲉⲕⲡⲉⲓⲱ ⲛⲁⲓ ⲛⲧⲁⲁⲗⲉ ⲉⲣⲟϥ ⲛⲧⲁⲡⲱⲧ ϩⲱ ⲙⲛⲡⲣⲣⲟ ϫⲉⲁⲛⲟⲕ ⲡⲉⲕϩⲙϩⲁⲗ ⲁⲛⲅ ⲟⲩϭⲁⲗⲉ

28 ⲁⲩⲱ ⲁϥϣⲁϫⲉ ⲛⲥⲁⲡⲉⲕϩⲙϩⲁⲗ ϩⲁⲧⲙ ⲡⲁϫⲟⲉⲓⲥ ⲡⲣⲣⲟ ⲁⲩⲱ ⲡⲁϫⲟⲉⲓⲥ ⲡⲣⲣⲟ ⲁϥⲉⲓⲣⲉ ⲙⲡⲉⲧⲥⲟⲩⲧⲱⲛ ⲛⲁϩⲣⲁϥ ⲛⲧϩⲉ ⲛⲟⲩⲁⲅⲅⲉⲗⲟⲥ ⲛⲧⲉⲡⲛⲟⲩⲧⲉ ⲁⲩⲱ ⲡⲁⲅⲁⲑⲟⲛ ⲉⲕⲉⲁⲁϥ ⲙⲡⲉⲙⲧⲟ ⲉⲃⲟⲗ ⲛⲛⲉⲕⲃⲁⲗ

29 ϫⲉⲡⲏⲓ ⲧⲏⲣϥ ⲛⲧⲁϥⲣⲡⲁⲓ ⲁⲛ ⲁⲗⲗⲁ ϩⲉⲛⲣⲱⲙⲉ ⲉⲩⲙⲡϣⲁ ⲙⲡⲙⲟⲩ ⲛⲉ ⲛⲧⲁⲩⲣⲡⲁⲓ ⲙⲡⲁϫⲟⲉⲓⲥ ⲡⲣⲣⲟ ⲁⲩⲱ ⲁⲕⲕⲱ ⲙⲡⲉⲕϩⲙϩⲁⲗ ⲙⲛⲛⲉⲧⲟⲩⲱⲙ ϩⲛⲧⲉⲕⲧⲣⲁⲡⲏⲍⲁ ⲁⲩⲱ ⲁϣ ⲡⲉ ⲡⲕⲉⲇⲓⲕⲁⲓⲱⲙⲁ ⲉⲧⲉⲟⲩⲉⲛⲧⲁⲓϥ ⲙⲙⲁⲩ ⲉⲧⲣⲁⲱϣ ⲟⲛ ⲉⲃⲟⲗ ⲉϩⲣⲁⲓ ⲉⲡⲣⲣⲟ

30 ⲡⲉϫⲉⲡⲣⲣⲟ ⲛⲁϥ ϫⲉⲉⲧⲃⲉⲟⲩ ⲕⲧⲁⲩⲟ ⲛⲛⲉⲕϣⲁϫⲉ ⲉⲃⲟⲗ ϫⲉⲁⲓϫⲟⲟⲥ ϫⲉⲛⲧⲟⲕ ⲙⲛⲥⲓⲃⲁ ⲡⲉϣⲡⲓⲱϩⲉ ⲉϫⲱⲧⲛ

31 ⲡⲉϫⲉⲙⲉⲙⲫⲓⲃⲟⲥⲑⲉ ϩⲓⲧϩⲏ ⲙⲡⲣⲣⲟ ϫⲉⲉⲛⲕⲁⲛⲓⲙ ⲙⲁⲣⲉϥϫⲓⲧⲟⲩ ⲉⲛϩⲟⲥⲟⲛ ⲁⲡⲁϫⲟⲉⲓⲥ ⲡⲣⲣⲟ ⲉⲓ ⲉϩⲣⲁⲓ ⲉⲡⲉϥⲏⲓ ϩⲛⲟⲩⲉⲓⲣⲏⲛⲏ

32 ⲁⲩⲱ ⲃⲉⲣⲍⲉⲗⲗⲓ ⲡⲅⲁⲗⲁⲧⲓⲧⲏⲥ ⲁϥⲉⲓ ⲉϩⲣⲁⲓ ϩⲛϩⲣⲟⲅⲁⲗⲗⲓⲙ ⲁϥϫⲓⲟⲟⲣ ⲙⲡⲣⲣⲟ ϩⲙⲡⲓⲟⲣⲇⲁⲛⲏⲥ ⲉⲡⲟⲟⲛⲉϥ ⲉⲃⲟⲗ ϩⲙⲡⲓⲟⲣⲇⲁⲛⲏⲥ

33 ⲃⲉⲣⲍⲉⲗⲗⲓ ⲇⲉ ⲟⲩⲣⲱⲙⲉ ⲡⲉ ⲉⲁϥⲣϩⲗⲗⲟ ⲉⲙⲁⲧⲉ ⲉⲩⲣⲱⲙⲉ ⲡⲉ ⲉϥϩⲛϥⲧⲟⲟⲩ ⲛϫⲟⲩⲱⲧ ⲛⲣⲟⲙⲡⲉ ⲁⲩⲱ ⲛⲧⲟϥ ⲡⲉ ⲛⲧⲁϥⲥⲁⲁⲛϣ ⲙⲡⲣⲣⲟ ϩⲙⲡⲧⲣⲉϥⲟⲩⲱϩ ϩⲙⲙⲁⲛⲁⲉⲓⲙ ⲉⲃⲟⲗ ϫⲉⲟⲩⲛⲟϭ ⲛⲣⲱⲙⲉ ⲉⲙⲁⲧⲉ ⲡⲉ

34 ⲡⲣⲣⲟ ⲇⲉ ⲡⲉϫⲁϥ ⲛⲃⲉⲣⲍⲉⲗⲗⲓ ϫⲉⲛⲧⲟⲕ ⲁⲙⲟⲩ ⲛⲙⲙⲁⲓ ⲁⲩⲱ ⲧⲉⲕⲙⲛⲧϩⲗⲗⲟ ϯⲛⲁⲥⲁⲛⲟⲩϣⲥ ⲛⲙⲙⲁⲓ ϩⲛⲧϩⲓⲉⲣⲟⲩⲥⲁⲗⲏⲙ

35 ⲡⲉϫⲉⲃⲉⲣⲍⲉⲗⲗⲓ ⲇⲉ ⲙⲡⲣⲣⲟ ϫⲉⲕⲉⲟⲩⲏⲣ ⲛⲉ ⲛⲁϩⲟⲟⲩ ⲛⲛⲉⲣⲟⲙⲡⲉ ⲙⲡⲁⲱⲛϩ ϫⲉⲉⲓⲉⲧⲱⲟⲩⲛ ⲛⲧⲁⲉⲓ ⲙⲛⲡⲣⲣⲟ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ

36 ⲁⲛⲅ ⲟⲩⲣⲱⲙⲉ ⲁⲛⲟⲕ ⲉⲓϩⲛϥⲧⲟⲟⲩ ⲛϫⲟⲩⲱⲧ ⲛⲣⲟⲙⲡⲉ ⲉⲡϩⲟⲟⲩ ⲙⲏ ϯⲛⲁϣⲉⲓⲙⲉ ⲛϫⲓⲛ ⲉⲡⲉⲓⲛⲁⲩ ⲉⲩϩⲱⲃ ⲉⲛⲁⲛⲟⲩϥ ⲁⲩⲱ ⲉⲩϩⲱⲃ ⲉϥϩⲟⲟⲩ ⲉⲛⲉⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ϯⲛⲁϣⲉⲓⲙⲉ ⲉⲧϯⲡⲉ ⲙⲡⲉϯⲛⲁⲟⲩⲟⲙϥ ⲏ ⲡⲉⲧⲓⲛⲁⲥⲟⲟϥ ⲏ ϯⲛⲁϣⲥⲱⲧⲙ ⲛϫⲓⲛ ⲉⲡⲉⲓⲛⲁⲩ ⲉⲡⲉϩⲣⲟⲟⲩ ⲛⲛⲉϩⲟⲟⲩⲧ ⲉⲩϫⲱ ⲏ ⲛⲉϩⲓⲟⲙⲉ ⲉⲩϫⲱ ⲉⲧⲃⲉⲟⲩ ⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ⲉϥⲛⲁⲣⲧϩⲉ ⲛⲟⲩⲉⲧⲡⲱ ⲉϫⲙⲡⲁϫⲟⲉⲓⲥ ⲡⲣⲣⲟ

37 ⲏ ⲉⲣⲉⲡϩⲱⲃ ⲁⲥⲱⲟⲩ ⲉⲧⲣⲉⲡⲉⲕϩⲙϩⲁⲗ ϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲙⲛⲡⲁϫⲟⲉⲓⲥ ⲡⲣⲣⲟ ⲁⲩⲱ ⲉⲧⲃⲉⲟⲩ ⲡⲁϫⲟⲉⲓⲥ ϥⲟⲩⲱϣ ⲉⲧⲱⲱⲃⲉ ⲛⲁⲓ ⲙⲡⲓⲧⲱⲱⲃⲉ

38 ⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ⲙⲁⲣⲉϥϭⲱ ⲉⲡⲁϩⲟⲩ ϫⲉⲉⲓⲉⲙⲟⲩ ϩⲛⲧⲁⲡⲟⲗⲓⲥ ϩⲁϩⲧⲙ ⲡⲧⲁⲫⲟⲥ ⲙⲡⲁⲉⲓⲱⲧ ⲙⲛⲧⲁⲙⲁⲁⲩ ⲁⲩⲱ ⲉⲓⲥ ⲡⲉⲕϩⲙϩⲁⲗ ⲭⲁⲙⲁⲁⲙ ϥⲛⲁⲉⲓ ⲙⲛⲡⲁϫⲟⲉⲓⲥ ⲡⲣⲣⲟ ⲁⲩⲱ ⲉⲕⲉⲉⲓⲣⲉ ⲛⲙⲙⲁϥ ⲙⲡⲁⲅⲁⲑⲟⲛ ⲙⲡⲉⲕⲙⲧⲟ ⲉⲃⲟⲗ

39 ⲡⲣⲣⲟ ⲇⲉ ⲡⲉϫⲁϥ ⲛⲁϥ ϫⲉⲙⲁⲣⲉϥⲉⲓ ⲛⲙⲙⲁⲓ ⲛϭⲓⲭⲁⲙⲁⲁⲙ ⲁⲩⲱ ⲁⲛⲟⲕ ϯⲛⲁⲉⲓⲣⲉ ⲛⲁϥ ⲙⲡⲁⲅⲁⲑⲟⲛ ⲛⲁϩⲣⲁⲕ

40 ⲡⲗⲁⲟⲥ ⲇⲉ ⲧⲏⲣϥ ⲁϥϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲡⲣⲣⲟ ϩⲱⲱϥ ⲁϥϫⲓⲟⲟⲣ ⲁⲡⲣⲣⲟ ϯⲡⲓ ⲉⲣⲱϥ ⲛⲃⲉⲣⲍⲉⲗⲗⲓ ⲁⲩⲱ ⲁϥⲥⲙⲟⲩ ⲉⲣⲟϥ ⲁϥⲕⲧⲟϥ ⲉϩⲣⲁⲓ ⲉⲛⲉϥⲙⲁ

41 ⲁⲩⲱ ⲡⲣⲣⲟ ⲁϥϫⲓⲟⲟⲣ ⲉⲅⲁⲗⲅⲁⲗⲁ ⲭⲁⲙⲁⲁⲙ ⲇⲉ ⲁϥϫⲓⲟⲟⲣ ⲛⲙⲙⲁϥ ⲁⲩⲱ ⲡⲗⲁⲟⲥ ⲧⲏⲣϥ ⲛⲓⲟⲩⲇⲁ ⲁⲩϫⲓⲟⲟⲣ ⲙⲛⲡⲣⲣⲟ ⲁⲩⲱ ⲧⲡⲁϣⲉ ⲙⲡⲗⲁⲟⲥ ⲙⲡⲓⲥⲣⲁⲏⲗ

42 ⲁⲩⲱ ⲉⲓⲥ ⲛⲣⲱⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲁⲩⲉⲓ ⲉⲣⲁⲧϥ ⲙⲡⲣⲣⲟ ⲡⲉϫⲁⲩ ⲉϩⲟⲩⲛ ϩⲙⲡⲣⲣⲟ ϫⲉⲉⲧⲃⲉⲟⲩ ⲁⲩϥⲓⲧⲕ ⲛϭⲓⲛⲉⲥⲛⲏⲩ ⲛⲣⲱⲙⲉ ⲛⲓⲟⲩⲇⲁ ⲁⲩⲱ ⲁⲩϫⲓⲟⲟⲣ ⲙⲡⲣⲣⲟ ⲙⲡⲓⲟⲣⲇⲁⲛⲏⲥ ⲙⲛⲡⲉϥⲏⲓ ⲁⲩⲱ ⲛⲣⲱⲙⲉ ⲧⲏⲣⲟⲩ ⲛⲇⲁⲩⲉⲓⲇ ⲉⲩⲛⲙⲙⲁϥ

43 ⲛⲣⲱⲙⲉ ⲇⲉ ⲧⲏⲣⲟⲩ ⲛⲓⲟⲩⲇⲁ ⲁⲩⲟⲩⲱϣⲃ ⲉⲩϫⲱ ⲙⲙⲟⲥ ⲛⲛⲣⲱⲙⲉ ⲙⲡⲓⲥⲣⲁⲏⲗ ϫⲉⲡⲣⲣⲟ ϥϫⲓ ⲉϩⲟⲩⲛ ⲉⲣⲟⲓ ⲉⲧⲃⲉⲟⲩ ⲁⲧⲉⲧⲛϭⲱⲛⲧ ⲉⲧⲃⲉⲡⲉⲓϣⲁϫⲉ ⲙⲏ ⲁⲛⲟⲩⲉⲙⲗⲁⲁⲩ ⲛⲧⲟⲟⲧϥ ⲏ ⲁϥϯⲧⲁⲉⲓⲟ ⲛⲁⲛ ⲏ ⲁϥϥⲓⲗⲁⲁⲩ ⲉⲃⲟⲗ ϩⲓϫⲱⲛ

44 ⲁⲩⲱ ⲛⲣⲱⲙⲉ ⲙⲡⲓⲥⲣⲁⲏⲗ ⲁⲩⲟⲩⲱϣⲃ ⲉⲩϫⲱ ⲙⲙⲟⲥ ⲛⲛⲣⲱⲙⲉ ⲛⲓⲟⲩⲇⲁ ϫⲉⲟⲩⲛⲟⲩⲧⲃⲁ ⲛⲣⲱⲙⲉ ⲛⲧⲟⲟⲧⲛ ⲙⲛⲡⲣⲣⲟ ⲁⲩⲱ ⲁⲛⲟⲕ ⲡⲉ ⲛϣⲣⲡⲙⲓⲥⲉ ⲙⲡⲁⲣⲁⲣⲟⲕ ⲁⲩⲱ ⲁⲛⲟⲕ ϯⲏⲡ ⲉⲇⲁⲩⲉⲓⲇ ⲉϩⲟⲩⲉ ⲉⲣⲟⲕ ⲉⲧⲃⲉⲟⲩ ϭⲉ ⲁⲕⲥⲟϣⲧ ϩⲙⲡⲁⲓ ⲉⲙⲡⲟⲩϫⲓ ⲙⲡⲁϣⲁϫⲉ ⲛϣⲟⲣⲡ ⲉⲧⲣⲉⲡⲣⲣⲟ ⲕⲧⲟϥ ⲉⲣⲟⲓ ⲁⲩⲱ ⲡϣⲁϫⲉ ⲛⲛⲣⲱⲙⲉ ⲛⲓⲟⲩⲇⲁ ⲁϥϭⲙϭⲟⲙ ⲡⲁⲣⲁ ⲡϣⲁϫⲉ ⲛⲛⲣⲱⲙⲉ ⲙⲡⲓⲥⲣⲁⲏⲗ