Read 2 Samuel 1 side by side with translations · The Final Bible
1 ⲁⲥϣⲱⲡⲉ ⲇⲉ ⲛⲧⲉⲣⲉⲥⲁⲟⲩⲗ ⲙⲟⲩ ⲇⲁⲩⲉⲓⲇ ⲁϥⲕⲟⲧϥ ⲉϩⲓⲟⲩⲉ ⲛⲥⲁⲡⲁⲙⲁⲗⲏⲕ ⲁⲩⲱ ⲇⲁⲩⲉⲓⲇ ⲁϥϩⲙⲟⲟⲥ ϩⲛⲥⲉⲕⲉⲗⲁⲕ ⲛϩⲟⲟⲩ ⲥⲛⲁⲩ
2 ϩⲙⲡⲙⲉϩϣⲟⲙⲛⲧ ⲇⲉ ⲛϩⲟⲟⲩ ⲉⲓⲥ ⲟⲩⲣⲱⲙⲉ ⲁϥⲉⲓ ⲉⲃⲟⲗ ϩⲛⲧⲡⲁⲣⲉⲙⲃⲟⲗⲏ ⲏ ⲉⲃⲟⲗ ϩⲙⲡⲗⲁⲟⲥ ⲛⲥⲁⲟⲩⲗ ⲉⲣⲉⲛⲉϥϩⲟⲓⲧⲉ ⲡⲏϩ ϩⲓⲱⲱϥ ⲁⲩⲱ ⲉⲣⲉⲧⲉϥⲁⲡⲉ ⲙⲉϩ ⲛⲓⲧⲛ ⲛⲧⲉⲣⲉϥⲡⲱⲧ ⲇⲉ ⲉϩⲟⲩⲛ ϣⲁⲇⲁⲩⲉⲓⲇ ⲁϥⲡⲁϩⲧϥ ⲁϥⲟⲩⲱϣⲧ ⲛⲁϥ ⲉϫⲙⲡⲕⲁϩ
3 ⲡⲉϫⲉⲇⲁⲩⲉⲓⲇ ⲛⲁϥ ϫⲉⲛⲧⲁⲕⲉⲓ ⲛⲧⲱⲛ ⲡⲉϫⲁϥ ⲛⲁϥ ϫⲉⲛⲧⲁⲓⲣⲃⲟⲗ ⲁⲛⲟⲕ ϩⲛⲧⲡⲁⲣⲉⲙⲃⲟⲗⲏ ⲙⲡⲓⲥⲣⲁⲏⲗ
4 ⲡⲉϫⲉⲇⲁⲩⲉⲓⲇ ⲛⲁϥ ϫⲉⲟⲩ ⲡⲉ ⲡⲉⲓϣⲁϫⲉ ⲁϫⲓϥ ⲉⲣⲟⲓ ⲡⲉϫⲁϥ ⲛⲁϥ ϫⲉⲡⲗⲁⲟⲥ ⲁϥϭⲱⲧⲡ ϩⲙⲡⲡⲟⲗⲉⲙⲟⲥ ⲁⲩⲱ ⲁⲟⲩⲙⲏⲏϣⲉ ϩⲉ ⲉⲃⲟⲗ ϩⲙⲡⲗⲁⲟⲥ ⲁⲩⲙⲟⲩ ⲡⲕⲉⲥⲁⲟⲩⲗ ⲁⲩⲱ ⲓⲱⲛⲁⲑⲁⲛ ⲁⲩⲱ ⲛⲉϥϣⲏⲣⲉ ⲁⲩⲙⲟⲩ
5 ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲙⲡϣⲏⲣⲉ ϣⲏⲙ ⲡⲉⲧⲧⲁⲩⲟ ⲉⲣⲟϥ ⲛⲛⲉⲓϣⲁϫⲉ ϫⲉⲉⲕⲥⲟⲟⲩⲛ ⲛⲁϣ ⲛϩⲉ ϫⲉⲁⲥⲁⲟⲩⲗ ⲙⲟⲩ ⲙⲛⲓⲱⲛⲁⲑⲁⲛ ⲡⲉϥϣⲏⲣⲉ
6 ⲡⲉϫⲉⲡϣⲏⲣⲉ ϣⲏⲙ ⲛⲇⲁⲩⲉⲓⲇ ϫⲉϩⲛⲟⲩϩⲉ ⲁⲩϩⲉ ϩⲙⲡⲧⲟⲟⲩ ⲛⲕⲉⲗⲃⲟⲩⲉ ⲁⲩⲱ ⲉⲓⲥ ⲥⲁⲟⲩⲗ ⲛⲉϥⲧⲁϫⲣⲏⲩ ⲉϫⲛⲧⲉϥⲗⲟⲅⲭⲏ ⲉⲓⲥ ⲛϩⲁⲣⲙⲁ ⲇⲉ ⲙⲛⲛⲉⲧϩⲓϫⲛ ⲛⲉϩⲧⲱⲱⲣ ⲁⲩⲧⲁϩⲟϥ
7 ⲁϥⲕⲧⲟϥ ⲉⲡⲁϩⲟⲩ ⲙⲙⲟϥ ⲁϥⲛⲁⲩ ⲉⲣⲟⲓ ⲁϥⲙⲟⲩⲧⲉ ⲉⲣⲟⲓ ⲡⲉϫⲁⲓ ⲛⲁϥ ϫⲉⲉⲓⲥϩⲏⲏⲧⲉ ϯⲙⲡⲉⲓⲙⲁ
8 ⲡⲉϫⲁϥ ⲛⲁⲓ ϫⲉⲛⲧⲕ ⲛⲓⲙ ⲛⲧⲟⲕ ⲡⲉϫⲁⲓ ⲛⲁϥ ϫⲉⲁⲛⲅ ⲟⲩϩⲙϩⲁⲗ ⲛϩⲁⲙⲁⲗⲏⲕⲓⲧⲏⲥ ⲁⲛⲟⲕ
9 ⲡⲉϫⲁϥ ⲛⲁⲓ ϫⲉⲁϩⲉⲣⲁⲧⲕ ϩⲓϫⲱⲓ ⲛⲅⲙⲟⲟⲩⲧ ϫⲉⲁⲩⲛⲟϭ ⲛⲕⲁⲕⲉ ϩⲱⲃⲥ ⲉⲃⲟⲗ ϩⲓϫⲱⲓ ϫⲉⲧⲁⲯⲩⲭⲏ ⲧⲏⲣⲥ ⲛϩⲏⲧ ⲁⲛ
10 ⲁⲓⲁϩⲉⲣⲁⲧ ϩⲓϫⲱϥ ⲁⲓⲙⲟⲟⲩⲧϥ ϫⲉⲛⲉⲓⲥⲟⲟⲩⲛ ϫⲉⲛϥⲛⲁⲱⲛϩ ⲁⲛ ⲙⲛⲛⲥⲁⲉⲧⲣⲉϥϩⲉ ⲁⲩⲱ ⲁⲓϥⲓ ⲛⲧⲉϭⲣⲏⲡⲉ ⲉⲧϩⲓϫⲛⲧⲉϥⲁⲡⲉ ⲁⲩⲱ ⲡⲉⲕⲗⲁⲗ ⲉⲧⲉⲛϩⲟⲩⲛ ⲉⲡⲉϥϭⲃⲟⲓ ⲁⲓⲉⲛⲧⲟⲩ ⲉⲡⲉⲓⲙⲁ ⲉⲣⲁⲧϥ ⲙⲡⲁϫⲟⲉⲓⲥ
11 ⲇⲁⲩⲉⲓⲇ ⲇⲉ ⲁϥϯⲧⲟⲟⲧϥ ⲉⲛⲉϥϩⲟⲉⲓⲧⲉ ⲁϥⲡⲁϩⲟⲩ ⲁⲩⲱ ⲛⲕⲉⲣⲱⲙⲉ ⲧⲏⲣⲟⲩ ⲉⲧⲛⲙⲙⲁϥ ⲁⲩⲡⲉϩⲛⲉⲩϩⲟⲉⲓⲧⲉ
12 ⲁⲩⲱ ⲁⲩⲧⲟⲉⲓⲧ ⲁⲩⲛⲏⲥⲧⲉⲩⲉ ϣⲁⲡⲛⲁⲩ ⲛⲣⲟⲩϩⲉ ⲉϫⲛⲥⲁⲟⲩⲗ ⲁⲩⲱ ⲉϫⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩⲱ ⲉϫⲙⲡⲗⲁⲟⲥ ⲛⲓⲟⲩⲇⲁ ⲁⲩⲱ ⲉϫⲙⲡⲗⲁⲟⲥ ⲙⲡⲓⲥⲣⲁⲏⲗ ⲉⲃⲟⲗ ϫⲉⲁⲩⲡⲗⲏⲅⲏ ϩⲛⲟⲩⲥⲏϥⲉ
13 ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲙⲡϣⲏⲣⲉ ϣⲏⲙ ⲡⲉⲧⲧⲁⲩⲟ ⲉⲣⲟϥ ⲛⲛⲉⲓϣⲁϫⲉ ϫⲉⲛⲧⲕ ⲟⲩⲉ ⲉⲃⲟⲗ ⲧⲱⲛ ⲛⲧⲟⲕ ⲡⲉϫⲁϥ ϫⲉⲁⲛⲅ ⲡϣⲏⲣⲉ ⲛⲟⲩⲣⲱⲙⲉ ⲛⲣⲙⲛϭⲟⲉⲓⲗⲉ ⲛϩⲁⲙⲁⲗⲏⲕⲓⲧⲏⲥ
14 ⲡⲉϫⲉⲇⲁⲩⲉⲓⲇ ⲛⲁϥ ϫⲉⲙⲡⲉⲕⲣϩⲟⲧⲉ ⲛⲧⲟⲕ ⲉⲉⲛⲧⲟⲟⲧⲕ ⲉϫⲙⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ
15 ⲁⲩⲱ ⲇⲁⲩⲉⲓⲇ ⲁϥⲙⲟⲩⲧⲉ ⲉⲟⲩⲁ ⲛⲛⲉϥϩⲙϩⲁⲗ ⲉϥϫⲱ ⲙⲙⲟⲥ ⲛⲁϥ ϫⲉϯⲙⲡⲉⲕⲟⲩⲟⲓ ⲉϩⲟⲩⲛ ⲉⲣⲟϥ ⲛⲅⲣⲁϩⲧϥ ⲛⲅⲧⲁⲩⲟϥ ⲁⲩⲱ ⲁϥⲡⲁⲧⲁⲥⲥⲉⲓ ⲙⲙⲟϥ ⲁϥⲙⲟⲟⲩⲧϥ
16 ⲡⲉϫⲉⲇⲁⲩⲉⲓⲇ ⲉϩⲟⲩⲛ ⲉϩⲣⲁϥ ϫⲉⲡⲉⲕⲥⲛⲟϥ ϩⲓϫⲛⲧⲉⲕⲁⲡⲉ ⲉⲃⲟⲗ ϫⲉⲧⲉⲕⲧⲁⲡⲣⲟ ⲧⲉ ⲛⲧⲁⲥⲣⲙⲛⲧⲣⲉ ϩⲁⲣⲟⲕ ⲉⲕϫⲱ ⲙⲙⲟⲥ ϫⲉⲁⲛⲟⲕ ⲡⲉ ⲛⲧⲁⲓⲙⲟⲩⲟⲩⲧ ⲙⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ
17 ⲁⲩⲱ ⲇⲁⲩⲉⲓⲇ ⲁϥⲧⲟⲉⲓⲧ ⲙⲡⲓⲧⲟⲉⲓⲧ ⲉϫⲛⲥⲁⲟⲩⲗ ⲁⲩⲱ ⲉϫⲛⲓⲱⲛⲁⲑⲁⲛ ⲡⲉϥϣⲏⲣⲉ
18 ⲁϥϫⲟⲟⲥ ⲉⲧⲥⲁⲃⲉⲛϣⲏⲣⲉ ⲛⲓⲟⲩⲇⲁ ⲉⲡⲉⲓⲧⲟⲉⲓⲧ ⲉⲓⲥ ϩⲏⲏⲧⲉ ϥⲥⲏϩ ⲉⲡϫⲱⲱⲙⲉ ⲙⲡⲉⲧⲥⲟⲩⲧⲱⲛ ⲏ ⲛⲧⲙⲉ ⲉϥϫⲱ ⲙⲙⲟⲥ
19 ϫⲉⲁϩⲉⲣⲁⲧⲕ ⲡⲓⲥⲣⲁⲏⲗ ⲉϫⲛⲛⲉⲛⲧⲁⲩⲙⲟⲩ ⲉϫⲛⲛⲉⲧⲱⲉⲓ ⲛⲧⲟⲟⲧⲕ ⲛⲧⲁⲩⲣⲁϩⲧⲟⲩ ⲟⲩ ⲧⲉ ⲧϩⲉ ⲛⲧⲁⲛⲉⲇⲩⲛⲁⲧⲟⲥ ϩⲉ
20 ⲙⲡⲉⲣⲧⲁⲩⲉⲡⲁⲓ ϩⲛⲅⲉⲑ ⲁⲩⲱ ⲙⲡⲉⲣⲧⲁϣⲉⲟⲉⲓϣ ⲙⲡⲁⲓ ϩⲓⲛⲉϩⲓⲟⲟⲩⲉ ⲛⲁⲥⲕⲁⲗⲱⲛ ⲙⲡⲉⲣⲧⲣⲉⲩⲟⲩⲛⲟϥ ⲉϫⲙⲡⲁⲓ ⲛϭⲓⲛϣⲉⲉⲣⲉ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲙⲏⲡⲟⲧⲉ ⲛⲥⲉⲧⲉⲗⲏⲗ ⲛϭⲓⲛϣⲉⲉⲣⲉ ⲛⲛⲉⲓⲁⲧⲥⲃⲃⲉ
21 ⲛⲧⲟⲩⲉⲓⲏ ⲉⲧϩⲛⲕⲉⲗⲃⲟⲩⲉ ⲙⲡⲣⲧⲣⲉϯⲱⲧⲉ ⲉⲓ ⲉϫⲱⲟⲩ ⲁⲩⲱ ⲛⲛⲉϩⲟⲩⲙⲡⲉ ⲉⲓ ⲉϫⲛⲧⲏⲩⲧⲛ ⲁⲩⲱ ⲉϫⲛⲛⲉⲥⲱϣⲉ ⲉⲧⲥⲟⲧⲡ ϫⲉⲛⲧⲁⲩϩⲉ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲛϭⲓⲛⲑⲩⲣⲱⲛ ⲛⲛϫⲱⲱⲣⲉ ⲡⲉⲑⲩⲣⲱⲛ ⲛⲥⲁⲟⲩⲗ ⲙⲡⲟⲩϩⲓⲧϥ ⲛⲟⲩⲛⲉϩ
22 ⲉⲃⲟⲗ ϩⲙⲡⲉⲥⲛⲟϥ ⲛⲛⲉⲛⲧⲁⲩϣⲟⲟϭⲟⲩ ⲉⲃⲟⲗ ϩⲙⲡⲱⲧ ⲛⲛⲉⲇⲩⲛⲁⲧⲟⲥ ⲧⲡⲓⲧⲉ ⲛⲓⲱⲛⲁⲑⲁⲛ ⲙⲡⲉⲥⲕⲟⲧⲥ ⲉⲡⲁϩⲟⲩ ⲉⲥϣⲟⲩⲉⲓⲧ ⲁⲩⲱ ⲧⲡⲓⲧⲉ ⲛⲥⲁⲟⲩⲗ ⲙⲡⲉⲥⲕⲟⲧⲥ ⲉⲡⲁϩⲟⲩ ⲉⲥϣⲟⲩⲉⲓⲧ
23 ⲥⲁⲟⲩⲗ ⲙⲛⲓⲱⲛⲁⲑⲁⲛ ⲙⲙⲉⲣⲁⲧⲉ ⲁⲩⲱ ⲉⲛⲉⲥⲱⲟⲩ ⲙⲡⲟⲩⲡⲱⲣϫ ⲉⲃⲟⲗ ⲛⲛⲉⲩⲉⲣⲏⲩ ⲉⲛⲉⲥⲱⲟⲩ ⲉⲩⲟⲩⲟⲓ ϩⲙⲡⲉⲩⲱⲛϩ ϩⲙⲡⲉⲩⲕⲉⲙⲟⲩ ⲟⲛ ⲙⲡⲟⲩⲡⲱⲣϫ ⲉⲃⲟⲗ ⲛⲛⲉⲩⲉⲣⲏⲩ ⲉⲩⲁⲥⲱⲟⲩ ⲉϩⲟⲩⲉ ⲉⲛⲁⲓⲧⲟⲥ ⲉⲁⲩⲧⲁϫⲣⲟ ⲟⲛ ⲉϩⲟⲩⲉ ⲉϩⲛⲙⲟⲩⲓ
24 ⲛϣⲉⲉⲣⲉ ⲙⲡⲓⲥⲣⲁⲏⲗ ϫⲓⲣⲓⲙⲉ ⲉϫⲛⲥⲁⲟⲩⲗ ⲣⲓⲙⲉ ⲉϫⲛⲡⲉⲧϯϩⲃⲥⲱ ⲛⲕⲟⲕⲕⲟⲥ ⲉϫⲛⲧⲏⲩⲧⲛ ⲙⲛⲡⲉⲧⲛⲕⲟⲥⲙⲟⲥ ⲡⲉⲧϯϩⲛⲓⲉⲡⲛⲟⲩⲃ ⲉϫⲛⲛⲉⲧⲛϩⲉⲃⲥⲟⲟⲩⲉ
25 ⲟⲩ ⲧⲉ ⲧϩⲉ ⲛⲧⲁⲛⲉⲇⲩⲛⲁⲧⲟⲥ ϩⲉ ϩⲛⲧⲙⲏⲧⲉ ⲙⲡⲡⲟⲗⲉⲙⲟⲥ ⲟⲩ ⲧⲉ ⲧϩⲉ ⲛⲧⲁⲕϩⲉ ⲓⲱⲛⲁⲑⲁⲛ ϩⲙⲡⲁϣⲁⲓ ⲛⲛⲉⲛⲧⲁⲕⲣⲁϩⲧⲟⲩ
26 ϯⲙⲟⲕϩ ⲛϩⲏⲧ ϩⲓϫⲱⲕ ⲡⲁⲥⲟⲛ ⲓⲱⲛⲁⲑⲁⲛ ⲁⲕϣⲱⲡⲉ ⲉⲕⲥⲟⲧⲡ ⲉⲙⲁⲧⲉ ⲛⲧⲟⲟⲧⲡⲉⲕⲙⲉ ⲁϥϣⲱⲡⲉ ⲉⲩϣⲡⲏⲣⲉ ⲡⲉ ⲛⲧⲟⲟⲧⲉϩⲟⲩⲉ ⲉⲩⲙⲉ ⲛⲥϩⲓⲙⲉ
27 ⲟⲩ ⲧⲉ ⲧϩⲉ ⲛⲧⲁⲛⲉⲓϫⲱⲱⲣⲉ ϩⲉ ⲁⲩⲱ ⲁⲩϩⲉ ⲉⲃⲟⲗ ⲛϭⲓⲛⲉⲩⲥⲟⲧⲃⲉϥ ⲙⲙⲓϣⲉ
2 Samuel 2 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)