Read 2 Samuel 18 side by side with translations · The Final Bible
1 ⲇⲁⲩⲉⲓⲇ ⲇⲉ ⲁϥⲉⲣⲁⲛⲛⲱⲙⲉⲓ ⲏ ⲁϥϭⲉⲙⲡϣⲓⲛⲉ ⲙⲡⲗⲁⲟⲥ ⲉⲧⲛⲙⲙⲁϥ ⲁⲩⲱ ⲁϥⲕⲱ ⲉϩⲣⲁⲓ ⲉϫⲱⲟⲩ ⲛϩⲉⲛⲭⲓⲗⲓⲁⲣⲭⲟⲥ ⲙⲛϩⲉⲛϩⲉⲕⲁⲧⲟⲛⲧⲁⲣⲭⲟⲥ
2 ⲁⲩⲱ ⲇⲁⲩⲉⲓⲇ ⲁϥⲥⲉⲣⲡⲗⲁⲟⲥ ⲉⲃⲟⲗ ϩⲓⲛⲁⲓ ⲡⲟⲩⲱⲛ ⲛϣⲟⲙⲛⲧ ⲙⲉⲛ ⲛⲧⲟⲟⲧϥ ⲛⲓⲱⲁⲃ ⲁⲩⲱ ⲡⲟⲩⲱⲛ ⲛϣⲟⲛⲙⲧ ⲛⲧⲟⲟⲧϥ ⲛⲁⲃⲓⲥⲁ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲡⲥⲟⲛ ⲛⲓⲱⲁⲃ ⲁⲩⲱ ⲡⲕⲉⲟⲩⲱⲛ ⲛϣⲟⲙⲛⲧ ⲛⲧⲟⲟⲧϥ ⲛⲉⲑⲑⲓ ⲡⲕⲉⲑⲉⲟⲥ ⲁⲩⲱ ⲡⲉϫⲉⲇⲁⲩⲉⲓⲇ ⲛⲁⲩ ϫⲉϩⲛⲟⲩⲉⲓ ⲁⲛⲟⲕ ϯⲛⲁⲉⲓ ⲉⲃⲟⲗ ⲛⲙⲙⲏⲧⲛ
3 ⲡⲉϫⲁⲩ ⲛⲁϥ ϫⲉⲛⲧⲉⲛⲛⲁⲕⲁⲁⲕ ⲁⲛ ⲉⲉⲓ ⲉⲃⲟⲗ ⲛⲙⲙⲁⲛ ϫⲉⲉⲛϣⲁⲛϭⲱⲧⲡ ⲁⲛⲟⲛ ⲛⲧⲛⲡⲱⲧ ⲛⲥⲉⲛⲁϯϩⲧⲏⲩ ⲉⲣⲟⲛ ⲁⲛ ⲁⲩⲱ ⲉⲣϣⲁⲛⲧⲉⲛⲡⲁϣⲉ ⲟⲛ ⲙⲟⲩ ϩⲙⲡⲉⲓⲕⲉ ⲟⲛ ⲛⲥⲉⲛⲁϯϩⲧⲏⲩ ⲉⲣⲟⲛ ⲁⲛ ϫⲉⲁⲛⲟⲛ ⲛⲁⲡⲗⲁⲟⲥ ⲉⲕⲛⲁⲣⲧϩⲉ ⲛⲧⲟⲕ ⲛⲟⲩⲧⲃⲁ ⲛⲣⲱⲙⲉ ⲛϩⲏⲧⲛ ⲧⲉⲛⲟⲩ ϭⲉ ⲟⲩⲁⲅⲁⲑⲟⲛ ⲛⲁⲛ ⲡⲉ ⲉⲧⲣⲉⲕϭⲱ ⲉⲡⲁϩⲟⲩ ϩⲛⲧⲡⲟⲗⲓⲥ ϫⲉⲛⲧⲟⲕ ⲕⲛⲁϣⲱⲡⲉ ⲛⲁⲛ ⲛⲛⲁϣⲧⲉ ⲉⲃⲟⲏⲑⲉⲓ ⲉⲣⲟⲛ
4 ⲡⲉϫⲉⲡⲣⲣⲟ ⲇⲁⲩⲉⲓⲇ ⲛⲁⲩ ϫⲉⲡϩⲱⲃ ⲉⲧⲉⲣⲁⲛⲏⲧⲛ ϯⲛⲁⲁⲁϥ ⲡⲣⲣⲟ ⲇⲉ ⲁϥϭⲱ ϩⲓϫⲛⲧⲡⲩⲗⲏ ⲁⲩⲱ ⲡⲗⲁⲟⲥ ⲧⲏⲣϥ ⲁϥⲙⲟⲟϣⲉ ⲉⲃⲟⲗ ⲉⲩⲛⲁⲣϣⲉ ϣⲉ ⲁⲩⲱ ⲉⲩⲛⲁⲣϣⲟ ϣⲟ
5 ⲡⲣⲣⲟ ⲇⲉ ⲁϥϩⲱⲛ ⲉⲧⲟⲟⲧϥ ⲛⲓⲱⲁⲃ ⲙⲛⲁⲃⲓⲥⲁ ⲙⲛⲉⲑⲑⲓ ⲉϥϫⲱ ⲙⲙⲟⲥ ⲛⲁⲩ ϫⲉϩⲁⲣⲉϩ ⲉⲡⲁϣⲏⲣⲉ ⲁⲃⲏⲥⲁⲗⲱⲙ ⲁⲩⲱ ⲡⲗⲁⲟⲥ ⲧⲏⲣϥ ⲁϥⲥⲱⲧⲙ ⲉⲡⲣⲣⲟ ⲉϥϩⲱⲛ ⲉⲧⲟⲟⲧⲟⲩ ⲛⲛⲁⲣⲭⲱⲛ ⲧⲏⲣⲟⲩ ⲉⲧⲃⲉⲁⲃⲏⲥⲁⲗⲱⲙ
6 ⲁⲩⲱ ⲡⲗⲁⲟⲥ ⲧⲏⲣϥ ⲁϥⲉⲓ ⲉⲃⲟⲗ ⲉⲡⲙⲁ ⲛϣⲏⲛ ⲟⲩⲃⲉ ⲡⲓⲥⲣⲁⲏⲗ ⲡⲡⲟⲗⲉⲙⲟⲥ ⲁϥϣⲱⲡⲉ ϩⲙⲡⲙⲁ ⲛϣⲏⲛ ϩⲙⲡⲕⲁϩ ⲛⲉⲫⲣⲉⲙ
7 ⲁⲩⲱ ⲡⲗⲁⲟⲥ ⲙⲡⲓⲥⲣⲁⲏⲗ ⲁϥϭⲱⲧⲡ ⲙⲡⲙⲁ ⲉⲧⲙⲙⲁⲩ ϩⲁⲧϩⲏ ⲛⲛⲉϩⲙϩⲁⲗ ⲛⲇⲁⲩⲉⲓⲇ ⲁⲩⲱ ⲧϭⲟⲡⲧⲥ ⲁⲥϣⲱⲡⲉ ⲉⲩⲛⲟϭ ⲧⲉ ϩⲙⲡⲉϩⲟⲟⲩ ⲉⲧⲙⲙⲁⲩ ⲁⲩϭⲱⲧⲡ ⲁⲩϩⲉ ⲛϭⲓⲧⲃⲁ ⲥⲛⲁⲩ ⲛⲣⲱⲙⲉ
8 ⲁⲩⲱ ⲡⲡⲟⲗⲉⲙⲟⲥ ⲁϥϣⲱⲡⲉ ⲙⲡⲙⲁ ⲉⲧⲙⲙⲁⲩ ⲉϥⲡⲟⲣϣ ⲉⲃⲟⲗ ϩⲓϫⲙⲡϩⲟ ⲙⲡⲕⲁϩ ⲧⲏⲣϥ ⲁⲩⲱ ⲡⲙⲁ ⲛϣⲏⲛ ⲛⲁϣⲉ ⲛⲉⲛⲧⲁϥⲟⲩⲟⲙⲟⲩ ⲉⲃⲟⲗ ϩⲙⲡⲗⲁⲟⲥ ⲉϩⲟⲩⲉ ⲉⲛⲉⲛⲧⲁⲧⲥⲏϥⲉ ⲟⲩⲟⲙⲟⲩ ϩⲙⲡⲗⲁⲟⲥ ⲙⲡⲉϩⲟⲟⲩ ⲉⲧⲙⲙⲁⲩ
9 ⲁⲩⲱ ⲁⲃⲏⲥⲁⲗⲱⲙ ⲁϥⲉⲓ ⲉϩⲟⲩⲛ ⲉϩⲣⲁⲩ ⲛⲛⲉϩⲙϩⲁⲗ ⲛⲇⲁⲩⲉⲓⲇ ⲁⲃⲏⲥⲁⲗⲱⲙ ⲇⲉ ⲛⲉϥⲧⲁⲗⲏⲩ ⲉⲩⲙⲁⲥⲡⲟⲣⲕ ⲁⲩⲱ ⲧⲉϥⲙⲁⲥⲡⲟⲣⲕ ⲁⲥⲡⲱⲧ ⲉϩⲟⲩⲛ ϩⲁⲟⲩⲕⲗⲁⲧⲟⲥ ⲛⲧⲉⲧⲛⲟϭ ⲛⲥⲉⲓ ⲉⲧⲣⲏⲧ ⲁⲩⲱ ⲧⲉϥⲁⲡⲉ ⲁⲥϭⲱⲗϫ ⲉϩⲟⲩⲛ ⲉⲧⲥⲉⲓ ⲉⲧⲙⲙⲁⲩ ⲁⲩⲱ ⲁϥϭⲱ ⲉϥⲁϣⲉ ⲟⲩⲇⲉ ⲧⲡⲉ ⲙⲛⲡⲕⲁϩ ⲁⲩⲱ ⲡⲙⲁⲥⲡⲟⲣⲕ ⲉⲧϩⲁⲣⲟϥ ⲁϥⲃⲱⲕ ⲁϥⲕⲁⲁϥ
10 ⲁⲩⲣⲱⲙⲉ ⲇⲉ ⲛⲁⲩ ⲉⲣⲟϥ ⲁⲩⲱ ⲁϥⲧⲁⲙⲉⲓⲱⲁⲃ ⲉϥϫⲱ ⲙⲙⲟⲥ ϫⲉⲉⲓⲥϩⲏⲏⲧⲉ ⲁⲓⲛⲁⲩ ⲉⲁⲃⲏⲥⲁⲗⲱⲙ ⲉϥⲁϣⲉ ⲉⲧⲛⲟϭ ⲛⲥⲉⲓ
11 ⲁⲩⲱ ⲡⲉϫⲉⲓⲱⲁⲃ ⲙⲡⲣⲱⲙⲉ ⲡⲉⲧⲧⲁⲙⲟ ⲙⲙⲟϥ ϫⲉⲉⲓⲥϩⲏⲏⲧⲉ ⲙⲉⲛ ⲁⲕⲛⲁⲩ ⲉⲣⲟϥ ⲉⲧⲃⲉⲟⲩ ϭⲉ ⲙⲡⲉⲕⲣⲁϩⲧϥ ⲛⲅⲉⲛⲧϥ ⲉⲡⲕⲁϩ ⲁⲩⲱ ⲁⲛⲟⲕ ⲛⲉⲓⲛⲁϯ ⲛⲁⲕ ⲙⲙⲏⲧⲉ ⲛⲥⲁⲧⲉⲉⲣⲉ ⲛϩⲁⲧ ⲙⲛⲟⲩⲛⲍⲱⲛⲏ ⲉⲛⲉⲥⲱⲥ
12 ⲡⲣⲱⲙⲉ ⲇⲉ ⲡⲉϫⲁϥ ⲉϩⲟⲩⲛ ϩⲛⲓⲱⲁⲃ ϫⲉⲉⲓⲥϩⲏⲏⲧⲉ ⲁⲛⲟⲕ ⲕⲁⲛ ⲉⲕϣⲁⲛϯ ⲉϩⲣⲁⲓ ⲉⲛⲁϭⲓϫ ⲙⲙⲏⲧⲉ ⲛϣⲉ ⲛⲥⲁⲧⲉⲉⲣⲉ ⲛϩⲁⲧ ⲛⲛⲁⲉⲛⲧⲟⲟⲧ ⲉϫⲙⲡϣⲏⲣⲉ ⲙⲡⲣⲣⲟ ϫⲉⲉⲛⲥⲱⲧⲙ ⲉⲡⲣⲣⲟ ⲉⲁϥϩⲱⲛ ⲉⲧⲟⲟⲧⲕ ⲁⲩⲱ ⲉⲧⲟⲟⲧϥ ⲛⲁⲃⲓⲥⲁ ⲁⲩⲱ ⲉⲧⲟⲟⲧϥ ⲛⲉⲑⲑⲓ ⲉϥϫⲱ ⲙⲙⲟⲥ ⲛⲏⲧⲛ ϫⲉϩⲁⲣⲉϩ ⲉⲡⲁϣⲏⲣⲉ ⲁⲃⲏⲥⲁⲗⲱⲙ
13 ⲉⲧⲙⲣⲛⲟⲃⲉ ⲉⲧⲉϥⲯⲩⲭⲏ ⲁⲩⲱ ⲡⲉⲓϣⲁϫⲉ ⲧⲏⲣϥ ⲛϥⲛⲁϩⲱⲡ ⲁⲛ ⲉⲡⲣⲣⲟ ϫⲉⲛⲧⲟⲕ ⲉⲧⲛⲁϯ ⲟⲩⲃⲏϥ
14 ⲡⲉϫⲉⲓⲱⲁⲃ ⲛⲁϥ ϫⲉⲡⲉⲓϩⲱⲃ ⲁⲛⲟⲕ ϯⲛⲁⲣϣⲟⲣⲡ ⲛⲁⲁⲁϥ ⲁⲩⲱ ⲛϯⲛⲁϭⲱ ⲁⲛ ⲉⲓⲟ ⲛϭⲱⲃ ⲛⲁϩⲣⲟⲕ ⲛⲧⲉⲓϩⲉ ⲁⲩⲱ ⲓⲱⲁⲃ ⲁϥϫⲓ ⲛϣⲟⲙⲛⲧ ⲛⲥⲟⲧⲉ ⲉϩⲣⲁⲓ ⲉⲧⲟⲟⲧϥ ⲁϥⲧⲣⲧⲱⲣⲟⲩ ϩⲙⲡϩⲏⲧ ⲛⲁⲃⲏⲥⲁⲗⲱⲙ ⲉⲧⲓ ⲉϥⲥⲟⲛϩ ϩⲙⲡϩⲏⲧ ⲙⲡϣⲏⲛ
15 ⲁⲩⲱ ⲙⲏⲧ ⲛϩⲙϩⲁⲗ ⲉⲩϥⲓ ⲛⲛⲉⲥⲕⲉⲩⲏ ⲛⲓⲱⲁⲃ ⲁⲩⲕⲧⲟ ⲉⲁⲃⲏⲥⲁⲗⲱⲙ ⲁⲩⲣⲁϩⲧϥ ⲁⲩⲙⲟⲟⲩⲧϥ
16 ⲁⲩⲱ ⲓⲱⲁⲃ ⲁϥⲥⲁⲗⲡⲓⲍⲉ ϩⲛⲧⲥⲁⲗⲡⲓⲅⲝ ⲛⲁϣⲧⲁⲡ ⲡⲗⲁⲟⲥ ⲁϥⲟⲗϥ ⲉⲃⲟⲗ ⲁⲩⲗⲟ ⲉⲩⲡⲏⲧ ⲛⲥⲁⲡⲓⲥⲣⲁⲏⲗ ⲁⲩⲱ ⲓⲱⲁⲃ ⲛⲉϥϯⲥⲁ ⲉⲡⲗⲁⲟⲥ
17 ⲁⲩⲱ ⲁϥϫⲓ ⲛⲁⲃⲏⲥⲁⲗⲱⲙ ⲁⲩⲛⲟϫϥ ⲉϩⲣⲁⲓ ⲉⲩⲛⲟϭ ⲛⲟⲩⲱϣ ϩⲙⲡⲙⲁ ⲛϣⲏⲛ ⲉϩⲣⲁⲓ ⲉⲡⲛⲟϭ ⲛϩⲓⲉⲓⲧ ⲁⲩⲱ ⲁϥϩⲱⲣϭ ⲉϫⲱϥ ⲛⲟⲩⲛⲟϭ ⲛⲥⲟⲟⲩϩⲥ ⲛⲱⲛⲉ ⲡⲓⲥⲣⲁⲏⲗ ⲇⲉ ⲧⲏⲣϥ ⲡⲟⲩⲁ ⲡⲟⲩⲁ ⲁϥⲃⲱⲕ ⲉϩⲣⲁⲓ ⲉⲧⲉϥⲥⲕⲏⲛⲏ
18 ⲁⲃⲏⲥⲁⲗⲱⲙ ⲇⲉ ⲉⲧⲓ ⲉϥⲟⲛϩ ⲁϥⲧⲁϩⲟ ⲉⲣⲁⲧⲥ ⲛⲁϥ ⲛⲧⲉϥⲥⲧⲏⲗⲏ ϩⲙⲡⲉⲓⲁ ⲉϥϫⲱ ⲙⲙⲟⲥ ϫⲉⲧⲁⲡⲣⲣⲟ ⲁⲃⲏⲥⲁⲗⲱⲙ ⲧⲉ ⲉⲃⲟⲗ ϫⲉⲁϥϫⲟⲟⲥ ϫⲉⲙⲛϣⲏⲣⲉ ϣⲟⲟⲡ ⲛⲁϥ ⲉⲧⲣⲉϥⲣⲡⲙⲉⲉⲩⲉ ⲙⲡⲉϥⲣⲁⲛ ⲁⲩⲱ ⲁⲩⲙⲟⲩⲧⲉ ⲉⲡⲉϥⲣⲁⲛ ⲉϫⲛⲧⲉⲥⲧⲏⲗⲏ ⲉⲁⲩⲙⲟⲩⲧⲉ ⲉⲣⲟⲥ ϫⲉⲧϭⲓϫ ⲛⲁⲃⲏⲥⲁⲗⲱⲙ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ
19 ⲁⲩⲱ ⲁⲭⲓⲙⲁⲁⲥ ⲡϣⲏⲣⲉ ⲛⲥⲁⲇⲱⲕ ⲡⲉϫⲁϥ ⲛⲓⲱⲁⲃ ϫⲉϯⲛⲁⲡⲱⲧ ⲛⲧⲁϫⲓⲡⲟⲩⲱ ⲙⲡⲣⲣⲟ ϫⲉⲁⲡϫⲟⲉⲓⲥ ⲣⲡⲉϥϩⲁⲡ ⲙⲛⲛⲉϥϫⲁϫⲉ
20 ⲡⲉϫⲉⲓⲱⲁⲃ ⲛⲁϥ ϫⲉⲛⲧⲕ ⲟⲩⲣⲱⲙⲉ ⲛⲧⲟⲕ ⲛϣⲟⲩⲡⲉⲓⲟⲩⲱ ⲕⲁⲧⲁⲡϩⲟⲟⲩ ⲛϩⲟⲟⲩ ⲉⲕⲉϫⲓⲟⲩⲱ ⲇⲉ ϩⲛⲕⲉϩⲟⲟⲩ ϩⲙⲡϩⲟⲟⲩ ⲇⲉ ⲛϩⲟⲟⲩ ⲛⲅⲛⲁϣⲃⲱⲕ ⲁⲛ ⲙⲛⲡⲉⲓⲟⲩⲱ ϫⲉⲁⲡϣⲏⲣⲉ ⲙⲡⲣⲣⲟ ⲙⲟⲩ
21 ⲡⲉϫⲉⲓⲱⲁⲃ ⲛⲭⲟⲩⲥⲓ ϫⲉⲡⲱⲧ ⲛⲅⲧⲁⲙⲉⲡⲣⲣⲟ ⲉⲛⲉⲛⲧⲁⲕⲛⲁⲩ ⲉⲣⲟⲟⲩ ⲁⲩⲱ ⲭⲟⲩⲥⲓ ⲁϥⲡⲁϩⲧϥ ⲁϥⲟⲩⲱϣⲧ ⲛⲓⲱⲁⲃ ⲁϥⲉⲓ ⲉⲃⲟⲗ ϩⲓⲧⲟⲟⲧϥ
22 ⲁⲭⲓⲙⲁⲁⲥ ⲇⲉ ⲡϣⲏⲣⲉ ⲛⲥⲁⲇⲱⲕ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲓⲱⲁⲃ ϫⲉⲕⲁⲁⲧ ⲛⲧⲁⲡⲱⲧ ϩⲱ ⲙⲛⲭⲟⲩⲥⲓ ⲡⲉϫⲉⲓⲱⲁⲃ ⲛⲁϥ ϫⲉⲉⲧⲃⲉⲟⲩ ⲛⲧⲟⲕ ⲉⲕⲛⲁⲡⲱⲧ ⲧⲉⲛⲟⲩ ⲡⲁϣⲏⲣⲉ ⲁⲙⲟⲩ ϭⲱ ϫⲉⲛⲧⲕ ⲟⲩϣⲟⲩⲡⲱⲧ ⲁⲛ ⲉϫⲓⲡⲉⲓⲟⲩⲱ ⲛⲟⲩϩⲏⲩ ⲛⲁⲕ ⲁⲛ ⲡⲉ
23 ⲡⲉϫⲉⲁⲭⲓⲙⲁⲁⲥ ⲛⲁϥ ϫⲉⲟⲩ ⲡⲉⲧϣⲟⲟⲡ ϭⲉ ⲉⲓϣⲁⲛⲡⲱⲧ ϩⲱ ⲡⲉϫⲉⲓⲱⲁⲃ ⲛⲁϥ ϫⲉⲉⲓⲉϩⲉ ⲡⲱⲧ ⲁⲩⲱ ⲁⲭⲓⲙⲁⲁⲥ ⲁϥⲡⲱⲧ ϩⲛⲧⲉϩⲓⲏ ⲛⲕⲉⲭⲁⲣ ⲁϥⲣϩⲓϩⲏ ⲛⲭⲟⲩⲥⲓ
24 ⲇⲁⲩⲉⲓⲇ ⲇⲉ ⲛⲉϥϩⲙⲟⲟⲥ ϩⲛⲧⲙⲏⲧⲉ ⲛⲧⲡⲩⲗⲏ ⲥⲛⲧⲉ ⲁⲩⲱ ⲡⲉⲥⲕⲟⲡⲟⲥ ⲁϥⲃⲱⲕ ⲉϩⲣⲁⲓ ⲉⲡⲉⲧⲡⲉ ⲛⲧⲡⲩⲗⲏ ⲥⲛⲧⲉ ϩⲁϩⲧⲙ ⲡⲉⲥⲧⲉⲓⲭⲟⲥ ⲁⲩⲱ ⲁϥϥⲉⲓⲁⲧϥ ⲉϩⲣⲁⲓ ⲁϥⲛⲁⲩ ⲁⲩⲱ ⲉⲓⲥ ⲟⲩⲣⲱⲙⲉ ⲉϥⲡⲏⲧ ⲟⲩⲁⲁϥ ⲉϥⲙⲟⲟϣⲉ ⲉⲣⲟϥ
25 ⲡⲉⲥⲕⲟⲡⲟⲥ ⲇⲉ ⲁϥⲱϣ ⲉⲃⲟⲗ ⲁϥⲧⲁⲙⲉⲡⲣⲣⲟ ⲉϥϫⲱ ⲙⲙⲟⲥ ϫⲉⲟⲩⲣⲱⲙⲉ ⲡⲉ ⲙⲁⲩⲁⲁϥ ⲁⲩⲱ ⲡⲣⲣⲟ ⲡⲉϫⲁϥ ϫⲉⲉϣϫⲉ ⲟⲩⲣⲱⲙⲉ ⲛⲟⲩⲱⲧ ⲡⲉ ⲟⲩⲛⲟⲩⲱ ϩⲛⲧⲉϥⲧⲁⲡⲣⲟ ϩⲛⲟⲩⲡⲱⲧ ⲇⲉ ⲛⲉϥⲡⲏⲧ ⲉϩⲟⲩⲛ ⲉⲣⲟⲟⲩ
26 ⲁⲩⲱ ⲡⲉⲥⲕⲟⲡⲟⲥ ⲁϥⲛⲁⲩ ⲉⲕⲉⲣⲱⲙⲉ ⲉϥⲡⲏⲧ ⲁⲩⲱ ⲡⲉⲥⲕⲟⲡⲟⲥ ⲁϥⲱϣ ⲉⲃⲟⲗ ϩⲓϫⲛⲧⲡⲩⲗⲏ ⲉϥϫⲱ ⲙⲙⲟⲥ ϫⲉⲉⲓⲥⲕⲉⲣⲱⲙⲉ ⲉϥⲡⲏⲧ ⲟⲩⲁⲁϥ ⲡⲉϫⲉⲡⲣⲣⲟ ϫⲉⲡⲉⲓⲕⲏⲧ ⲉϥⲛⲏⲩ ⲉϫⲓⲟⲩⲱ
27 ⲡⲉⲥⲕⲟⲡⲟⲥ ⲇⲉ ⲡⲉϫⲁϥ ϫⲉϯⲛⲁⲩ ⲁⲛⲟⲕ ⲉⲧϭⲓⲛⲡⲱⲧ ⲙⲡϣⲟⲣⲡ ⲉⲥⲟ ⲛⲧϩⲉ ⲛⲧϭⲓⲛⲡⲱⲧ ⲛⲁⲭⲓⲙⲁⲁⲥ ⲡϣⲏⲣⲉ ⲛⲥⲁⲇⲱⲕ ⲡⲉϫⲉⲡⲣⲣⲟ ϫⲉⲟⲩⲣⲱⲙⲉ ⲉⲛⲁⲛⲟⲩϥ ⲡⲉ ⲡⲁⲓ ⲁⲩⲱ ϥⲛⲁⲉⲓ ⲙⲛⲟⲩⲱ ⲉⲛⲁⲛⲟⲩϥ
28 ⲁⲩⲱ ⲁⲭⲓⲙⲁⲁⲥ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ⲉϩⲟⲩⲛ ϩⲙⲡⲣⲣⲟ ϫⲉⲧⲉⲓⲣⲏⲛⲏ ⲁⲩⲱ ⲁϥⲡⲁϩⲧϥ ⲉⲡⲕⲁϩ ϩⲓⲧϩⲏ ⲙⲡⲣⲣⲟ ⲁϥⲟⲩⲱϣⲧ ⲉϥϫⲱ ⲙⲙⲟⲥ ϫⲉϥⲥⲙⲁⲙⲁⲁⲧ ⲛϭⲓⲡϫⲟⲉⲓⲥ ⲡⲉⲕⲛⲟⲩⲧⲉ ⲡⲁⲓ ⲛⲧⲁϥⲱⲣϥ ⲉϩⲟⲩⲛ ⲛⲛⲣⲱⲙⲉ ⲉⲧⲙⲟⲥⲧⲉ ⲛⲉⲛⲧⲉⲩϭⲓϫ ⲉϫⲙⲡⲁϫⲟⲉⲓⲥ ⲡⲣⲣⲟ
29 ⲛⲧⲉⲩⲛⲟⲩ ⲇⲉ ⲡⲣⲣⲟ ⲡⲉϫⲁϥ ϫⲉⲧⲉⲓⲣⲏⲛⲏ ⲙⲡⲁϣⲏⲣⲉ ⲁⲃⲏⲥⲁⲗⲱⲙ ⲡⲉϫⲉⲁⲭⲓⲙⲁⲁⲥ ϫⲉⲁⲓⲛⲁⲩ ⲉⲡⲙⲏⲏϣⲉ ⲧⲏⲣϥ ⲉⲩⲉⲩⲫⲣⲁⲛⲉ ϩⲙⲡⲧⲣⲉⲓⲱⲁⲃ ⲡϩⲙϩⲁⲗ ⲙⲡⲣⲣⲟ ϫⲉⲩⲡⲉⲕϩⲙϩⲁⲗ ⲉⲃⲟⲗ ⲉⲧⲉⲁⲛⲟⲕ ⲡⲉ ⲁⲩⲱ ⲙⲡⲓⲉⲓⲙⲉ ϫⲉⲟⲩ ⲡⲉ ⲡϩⲱⲃ ⲛⲧⲁϥϣⲱⲡⲉ ⲙⲙⲟϥ
30 ⲡⲉϫⲉⲡⲣⲣⲟ ⲛⲁϥ ϫⲉⲁⲙⲟⲩ ⲛⲧⲟⲟⲩⲛ ⲛⲅⲁϩⲉⲣⲁⲧⲕ ⲙⲡⲉⲓⲙⲁ ⲁϥⲃⲱⲕ ⲇⲉ ⲁϥⲁϩⲉⲣⲁⲧϥ
31 ⲁⲩⲱ ⲉⲓⲥ ⲭⲟⲩⲥⲉⲓ ϩⲱⲱϥ ⲁϥⲉⲓ ⲡⲉϫⲁϥ ϩⲓⲧϩⲏ ⲙⲡⲣⲣⲟ ϫⲉⲙⲁⲣⲉⲡⲁϫⲟⲉⲓⲥ ⲡⲣⲣⲟ ⲥⲱⲧⲙ ⲉⲡϣⲉⲛⲟⲩⲃⲉ ϫⲉⲁⲡϫⲟⲉⲓⲥ ⲣⲡⲉⲕϩⲁⲡ ⲙⲡϩⲟⲟⲩ ⲉⲃⲟⲗ ϩⲛⲛⲉⲧⲧⲱⲟⲩⲛ ⲧⲏⲣⲟⲩ ⲉϩⲣⲁⲓ ⲉϫⲱⲕ
32 ⲡⲉϫⲉⲡⲣⲣⲟ ⲉϩⲟⲩⲛ ϩⲛⲭⲟⲩⲥⲓ ϫⲉⲧⲉⲓⲣⲏⲛⲏ ϣⲟⲟⲡ ⲙⲡⲁϣⲏⲣⲉ ⲁⲃⲏⲥⲁⲗⲱⲙ ⲡⲉϫⲉⲭⲟⲩⲥⲓ ϩⲓⲧϩⲏ ⲙⲡⲣⲣⲟ ϫⲉⲛⲉϫⲁϫⲉ ⲙⲡⲁϫⲟⲉⲓⲥ ⲡⲣⲣⲟ ⲉⲩⲉⲉⲣⲑⲉ ⲙⲡϣⲏⲣⲉ ⲉⲧⲙⲙⲁⲩ ⲁⲩⲱ ⲟⲩⲟⲛ ⲛⲓⲙ ⲛⲧⲁⲩⲧⲱⲟⲩⲛ ⲉϫⲱⲕ ⲉϩⲛⲡⲉⲧϩⲟⲟⲩ ⲉⲣⲟⲕ
2 Samuel 17 · 2 Samuel 19 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)