Read 2 Samuel 17 side by side with translations · The Final Bible
1 ⲡⲉϫⲉⲁⲭⲓⲇⲟⲫⲉⲗ ⲛⲁⲃⲏⲥⲁⲗⲱⲙ ϫⲉⲧⲁⲥⲱⲧⲡ ⲛⲁⲓ ⲙⲙⲛⲧⲥⲛⲟⲟⲩⲥ ⲛϣⲟ ⲛⲣⲱⲙⲉ ⲛⲧⲁⲧⲱⲟⲩⲛ ⲛⲧⲁⲡⲱⲧ ⲛⲥⲁⲇⲁⲩⲉⲓⲇ ⲛⲧⲉⲩϣⲏ
2 ⲛⲧⲁⲡⲱϩⲧ ⲉϫⲱϥ ⲁⲩⲱ ⲛⲧⲟϥ ⲉⲓⲛⲁⲧⲁϩⲟϥ ⲉϥϩⲟⲥⲉ ⲉⲛϥⲙⲏⲣ ⲁⲛ ϩⲛⲛⲉϥϭⲓϫ ⲛⲧⲁⲑⲉⲣϣⲁϥ ⲉⲙⲁⲧⲉ ⲛϥⲧⲱⲟⲩⲛ ⲛϥⲡⲱⲧ ⲛⲧⲟϥ ⲁⲩⲱ ⲡⲙⲏⲏϣⲉ ⲧⲏⲣϥ ⲉⲧⲛⲙⲙⲁϥ ⲁⲩⲱ ⲛⲧⲁⲣⲁϩⲧ ⲡⲣⲣⲟ ⲙⲁⲩⲁⲁϥ
3 ⲛⲧⲁⲕⲧⲉⲡⲗⲁⲟⲥ ⲧⲏⲣϥ ⲉⲣⲁⲧⲕ ⲛⲧϩⲉ ⲛⲧϣⲉⲗⲉⲉⲧ ⲉϣⲁⲥⲕⲧⲟⲥ ⲉⲣⲁⲧϥ ⲙⲡⲉⲥϩⲁⲓ ⲡⲗⲏⲛ ⲧⲉⲯⲩⲭⲏ ⲛⲟⲩⲣⲱⲙⲉ ⲛⲟⲩⲱⲧ ⲧⲉⲕⲕⲱⲧⲉ ⲛⲥⲱⲥ ⲛⲧⲁⲕ ⲁⲩⲱ ⲡⲗⲁⲟⲥ ⲧⲏⲣϥ ⲟⲩⲛⲟⲩⲉⲓⲣⲏⲛⲏ ⲛⲁϣⲱⲡⲉ ⲛⲁϥ
4 ⲡϣⲁϫⲉ ⲇⲉ ⲛⲉϥⲥⲟⲩⲧⲱⲛ ⲛⲁϩⲣⲁϥ ⲛⲁⲃⲏⲥⲁⲗⲱⲙ ⲁⲩⲱ ⲛⲁϩⲣⲁⲩ ⲛⲛⲉⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ ⲙⲡⲓⲥⲣⲁⲏⲗ
5 ⲡⲉϫⲉⲁⲃⲏⲥⲁⲗⲱⲙ ⲇⲉ ϫⲉⲙⲟⲩⲧⲉ ϩⲱⲱϥ ⲉⲭⲟⲩⲥⲉⲓ ⲡϣⲏⲣⲉ ⲛⲁⲣⲁⲭⲓ ⲛⲧⲉⲛⲥⲱⲧⲙ ⲉⲡϣⲁϫⲉ ϩⲱⲱϥ ⲉⲧϩⲛⲧⲉϥⲧⲁⲡⲣⲟ
6 ⲁⲩⲱ ⲭⲟⲩⲥⲉⲓ ⲁϥⲃⲱⲕ ⲉϩⲟⲩⲛ ϣⲁⲁⲃⲏⲥⲁⲗⲱⲙ ⲡⲉϫⲉⲁⲃⲏⲥⲁⲗⲱⲙ ⲛⲁϥ ϫⲉⲛⲉⲧⲁⲉⲓⲣⲉ ⲕⲁⲧⲁⲡⲉⲓϣⲁϫⲉ ⲛⲧⲁⲁⲭⲓⲇⲟⲫⲉⲗ ϫⲟⲟϥ ⲉϣⲱⲡⲉ ⲇⲉ ⲙⲙⲟⲛ ⲉⲓⲉ ϣⲁϫⲉ ⲛⲧⲟⲕ
7 ⲡⲉϫⲉⲭⲟⲩⲥⲉⲓ ⲛⲁⲃⲏⲥⲁⲗⲱⲙ ϫⲉⲛⲁⲛⲟⲩ ⲡⲉⲓϣⲁϫⲛⲉ ⲁⲛ ⲛⲧⲁⲁⲭⲓⲇⲟⲫⲉⲗ ϣⲟϫⲛⲉ ⲙⲙⲟϥ ⲙⲡⲉⲓⲥⲟⲡ
8 ⲁϥⲟⲩⲱϩ ⲉⲧⲟⲟⲧϥ ⲟⲛ ⲛϭⲓⲭⲟⲩⲥⲉⲓ ⲉϥϫⲱ ⲙⲙⲟⲥ ⲟⲛ ϫⲉⲛⲧⲟⲕ ⲕⲥⲟⲟⲩⲛ ⲙⲡⲉⲕⲉⲓⲱⲧ ⲙⲛⲛⲉϥⲕⲉⲣⲱⲙⲉ ϫⲉϩⲛϫⲱⲱⲣⲉ ⲛⲉ ⲉⲙⲁⲧⲉ ⲁⲩⲱ ⲥⲉⲛⲁϣⲧ ϩⲛⲧⲉⲩⲯⲩⲭⲏ ⲛⲧϩⲉ ⲛⲟⲩⲁⲣⲝ ⲉⲁⲩϥⲓ ⲛⲛⲉⲥϣⲏⲣⲉ ϩⲛⲧⲥⲱϣⲉ ⲁⲩⲱ ⲛⲧϩⲉ ⲛⲟⲩⲣⲓⲣ ⲛϩⲟⲟⲩⲧ ⲉϥⲛⲁϣⲧ ϩⲛⲟⲩⲙⲁ ⲛϣⲏⲛ ⲁⲩⲱ ⲡⲉⲕⲉⲓⲱⲧ ⲟⲩⲣⲉϥⲙⲓϣⲉ ⲡⲉ ⲉϥⲛⲁϯϭⲟⲧⲡⲥ ⲁⲛ ⲉⲡⲗⲁⲟⲥ
9 ⲉⲓⲥ ϩⲏⲏⲧⲉ ⲛⲧⲟϥ ϥϩⲏⲡ ϩⲛⲟⲩⲁ ⲛⲛⲉⲃⲟⲩⲛⲟⲥ ⲏ ϩⲛⲟⲩⲁ ⲛⲛⲙⲁ ⲛⲗⲱϭⲉ ⲁⲩⲱ ϩⲙⲡⲧⲣⲉϥⲉⲓ ⲉϩⲣⲁⲓ ⲉϫⲱⲟⲩ ⲛϣⲟⲣⲡ ϥⲛⲁⲡⲁⲧⲁⲥⲥⲉⲓ ⲙⲙⲟⲟⲩ ⲁⲩⲱ ⲛϥⲥⲱⲧⲙ ⲛϭⲓⲡⲉⲧⲛⲁⲥⲱⲧⲙ ⲛϥϫⲟⲟⲥ ϫⲉⲁⲩⲣⲁϩⲧⲥ ϣⲱⲡⲉ ⲛⲥⲁⲡⲗⲁⲟⲥ ⲉⲧⲟⲩⲏϩ ⲛⲥⲁⲁⲃⲏⲥⲁⲗⲱⲙ
10 ⲁⲩⲱ ⲛⲧⲟϥ ⲡⲉⲕⲉⲓⲱⲧ ⲟⲩⲣⲱⲙⲉ ⲡⲉ ⲛϫⲱⲱⲣⲉ ⲉⲣⲉⲡⲉϥϩⲏⲧ ⲟ ⲛⲧϩⲉ ⲙⲡϩⲏⲧ ⲙⲡⲙⲟⲩⲓ ϩⲛⲟⲩⲱⲛ ⲉϥϣⲁⲛⲟⲩⲱⲛ ⲁⲩⲱ ⲡⲓⲥⲣⲁⲏⲗ ⲧⲏⲣϥ ⲥⲟⲟⲩⲛ ϫⲉⲟⲩⲇⲩⲛⲁⲧⲟⲥ ⲡⲉ ⲡⲉⲕⲉⲓⲱⲧ ⲁⲩⲱ ⲛⲕⲉⲣⲱⲙⲉ ⲉⲧⲛⲙⲙⲁϥ ϩⲉⲛⲣⲱⲙⲉ ⲛⲉ ⲛϫⲱⲱⲣⲉ
11 ⲡⲁϣⲟϫⲛⲉ ϭⲉ ⲁⲛⲟⲕ ⲉⲓϯ ⲙⲙⲟϥ ϩⲓⲛⲁⲓ ⲁⲩⲱ ϩⲛⲟⲩⲥⲱⲟⲩϩ ϥⲛⲁⲥⲱⲟⲩϩ ⲉⲣⲁⲧⲕ ⲛϭⲓⲡⲗⲁⲟⲥ ⲧⲏⲣϥ ⲛϫⲓⲛ ⲇⲁⲛ ϣⲁⲃⲉⲣⲥⲁⲃⲉ ⲉϥⲟϣ ⲛⲧϩⲉ ⲙⲡϣⲱ ⲉⲧⲡⲟⲣϣ ⲉⲃⲟⲗ ⲉϫⲙⲡⲉⲥⲡⲟⲧⲟⲩ ⲛⲧⲑⲁⲗⲁⲥⲥⲁ ⲉⲩⲁϣⲏ ⲁⲩⲱ ⲡⲉⲕϩⲟ ϥⲛⲁϣⲱⲡⲉ ⲉϥϩⲁⲉⲟⲟⲩ ϩⲛⲧⲉⲩⲙⲏⲧⲉ
12 ⲁⲩⲱ ⲧⲉⲛⲛⲁⲉⲓ ⲡⲉ ⲉϩⲣⲁⲓ ⲉϫⲱϥ ϩⲛⲟⲩⲁ ⲛⲛⲙⲁ ⲉⲧⲉⲛⲛⲁⲧⲁϩⲟϥ ⲛϩⲏⲧϥ ⲁⲩⲱ ⲧⲉⲛⲛⲁϭⲱ ϩⲓⲣⲱϥ ⲛⲧϩⲉ ⲛϯⲱⲧⲉ ⲉϣⲁⲥⲉⲓ ⲉϫⲙⲡⲕⲁϩ ⲛⲧⲉⲛⲧⲙⲕⲁⲟⲩⲁ ⲛϩⲏⲧⲟⲩ ⲉⲥⲉⲉⲡⲉ ⲟⲩⲇⲉ ⲛⲧⲟϥ ⲟⲩⲇⲉ ⲛⲕⲉⲣⲱⲙⲉ ⲉⲧⲛⲙⲙⲁϥ
13 ⲉϥϣⲁⲛⲡⲱⲧ ⲇⲉ ⲉϩⲟⲩⲛ ⲉⲩⲡⲟⲗⲓⲥ ⲡⲓⲥⲣⲁⲏⲗ ⲧⲏⲣϥ ⲛⲁⲥⲉⲣⲛⲟⲩϩ ⲉⲃⲟⲗ ⲉⲧⲡⲟⲗⲓⲥ ⲉⲧⲙⲙⲁⲩ ⲛⲧⲉⲛⲥⲟⲕⲥ ⲉⲃⲟⲗ ⲉⲡⲉⲭⲉⲓⲙⲁⲣⲣⲟⲥ ⲛⲧⲉⲛⲧⲙⲕⲁⲟⲩⲱⲛⲉ ⲛⲟⲩⲱⲧ ⲛϩⲏⲧⲥ
14 ⲡⲉϫⲉⲁⲃⲏⲥⲁⲗⲱⲙ ⲇⲉ ⲛⲛⲣⲱⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ϫⲉⲛⲁⲛⲟⲩ ⲡϣⲁϫⲉ ⲛⲭⲟⲩⲥⲉⲓ ⲡϣⲏⲣⲉ ⲛⲁⲣⲁⲭⲉⲓ ⲉϩⲟⲩⲉ ⲉⲡϣⲟϫⲛⲉ ⲛⲁⲭⲓⲇⲟⲫⲉⲗ ⲁⲩⲱ ⲡϫⲟⲉⲓⲥ ⲁϥⲟⲩⲉϩⲥⲁϩⲛⲉ ⲉϫⲱⲱⲣⲉ ⲉⲃⲟⲗ ⲙⲡϣⲟϫⲛⲉ ⲉⲧⲛⲁⲛⲟⲩϥ ⲛⲁⲭⲓⲇⲟⲫⲉⲗ ϫⲉⲕⲁⲥ ⲉⲣⲉⲡϫⲟⲉⲓⲥ ⲉⲓⲛⲉ ⲉϫⲛⲁⲃⲏⲥⲁⲗⲱⲙ ⲛⲛⲉⲡⲉⲧϩⲟⲟⲩ ⲧⲏⲣⲟⲩ
15 ⲭⲟⲩⲥⲉⲓ ⲇⲉ ⲡϣⲏⲣⲉ ⲛⲁⲣⲁⲭⲉⲓ ⲡⲉϫⲁϥ ⲛⲥⲁⲇⲱⲕ ⲙⲛⲁⲃⲓⲁⲑⲁⲣ ⲛⲉⲟⲩⲏⲏⲃ ϫⲉⲉⲓⲥⲧϩⲏ ⲙⲛⲧϩⲏ ⲛⲧⲁϥϯϣⲟϫⲛⲉ ⲛϭⲓⲁⲭⲓⲇⲟⲫⲉⲗ ⲛⲁⲃⲏⲥⲁⲗⲱⲙ ⲙⲛⲛⲉⲡⲣⲉⲥⲃⲩⲧⲉⲣⲟⲥ ⲙⲡⲓⲥⲣⲁⲏⲗ ⲉⲓⲥ ⲧⲁϩⲉ ϩⲱ ⲛⲧⲁⲓⲥⲩⲙⲃⲟⲩⲗⲉⲩⲉ
16 ⲧⲉⲛⲟⲩ ϭⲉ ϫⲟⲟⲩ ⲧⲁⲭⲏ ⲛⲧⲉⲧⲛⲧⲁⲙⲉⲇⲁⲇ ⲉⲧⲉⲧⲛϫⲱ ⲙⲙⲟⲥ ⲛⲁϥ ϫⲉⲙⲡⲣϭⲱ ϩⲛϯⲟⲩϣⲏ ϩⲛⲁⲣⲁⲃⲱⲑ ⲛⲧⲉⲧⲉⲣⲏⲙⲟⲥ ⲁⲗⲗⲁ ⲧⲱⲟⲩⲛ ⲛⲅⲡⲱⲱⲛⲉ ⲉⲃⲟⲗ ⲧⲁⲭⲏ ⲙⲏⲡⲟⲧⲉ ⲛϥⲧⲱⲟⲩⲛ ⲉϫⲙⲡⲣⲣⲟ ⲁⲩⲱ ⲡⲕⲉⲗⲁⲟⲥ ⲉⲧⲛⲙⲙⲁϥ
17 ⲓⲱⲛⲁⲑⲁⲛ ⲇⲉ ⲁⲩⲱ ⲁⲭⲓⲙⲁⲁⲥ ⲛⲉⲩⲁϩⲉⲣⲁⲧⲟⲩ ϩⲓϫⲛⲧⲡⲩⲗⲏ ⲛϩⲣⲱⲅⲏⲗ ⲧⲉϩⲙϩⲁⲗ ⲇⲉ ⲁⲥⲡⲱⲧ ⲁⲥⲧⲁⲙⲟⲟⲩ ⲛⲧⲟⲟⲩ ϩⲱⲟⲩ ⲁⲩⲡⲱⲧ ⲁⲩⲧⲁⲙⲉⲡⲣⲣⲟ ⲇⲁⲩⲉⲓⲇ ϫⲉⲙⲡⲟⲩⲉϣⲟⲩⲱⲛϩ ⲉⲃⲟⲗ ⲉⲧⲣⲉⲩⲣⲡϩⲟⲩⲛ ⲛⲧⲡⲩⲗⲏ
18 ⲁϥⲛⲁⲩ ⲇⲉ ⲉⲣⲟⲟⲩ ⲛϭⲓⲟⲩϣⲏⲣⲉ ϣⲏⲙ ⲁϥⲃⲱⲕ ⲁϥⲧⲁⲙⲉⲁⲃⲏⲥⲁⲗⲱⲙ ⲛⲧⲟⲟⲩ ⲇⲉ ⲙⲡⲉⲥⲛⲁⲩ ⲁⲩⲡⲱⲧ ⲧⲁⲭⲏ ⲁⲩⲃⲱⲕ ⲉϩⲟⲩⲛ ⲉⲡⲏⲓ ⲛⲟⲩⲣⲱⲙⲉ ϩⲛⲃⲁⲟⲩⲣⲓⲙ ⲛⲧⲟϥ ⲇⲉ ⲛⲉⲟⲩⲛⲧϥⲟⲩϣⲏⲓ ⲙⲙⲁⲩ ϩⲙⲡⲉϥⲟϩⲉ ⲁⲩⲃⲱⲕ ⲉⲡⲉⲥⲏⲧ ⲉⲣⲟϥ
19 ⲁⲩⲱ ⲧⲉⲥϩⲓⲙⲉ ⲙⲡⲣⲱⲙⲉ ⲁⲥⲕⲱ ⲛⲟⲩϩⲟⲃⲥ ⲉϫⲛⲧⲧⲁⲡⲣⲟ ⲙⲡϣⲏⲓ ⲁⲩⲱ ⲁⲥⲡⲱⲣϣ ⲉⲃⲟⲗ ⲉϫⲱϥ ⲛⲟⲩⲁⲣⲁⲫⲱⲑ ⲉⲧⲉϩⲉⲛⲛⲕⲁ ⲛⲟⲩⲱⲙ ⲛⲉ ⲁⲩⲱ ⲙⲡⲉϩⲱⲃ ⲟⲩⲱⲛϩ ⲉⲃⲟⲗ
20 ⲛϩⲙϩⲁⲗ ⲇⲉ ⲛⲁⲃⲏⲥⲁⲗⲱⲙ ⲁⲩⲉⲓ ⲉⲣⲁⲧⲥ ⲛⲧⲉⲥϩⲓⲙⲉ ⲉⲡⲉⲥⲏⲓ ⲡⲉϫⲁⲩ ⲛⲁⲥ ϫⲉⲉϥⲧⲱⲛ ⲁⲭⲓⲙⲁⲁⲥ ⲙⲛⲓⲱⲛⲁⲑⲁⲛ ⲧⲉⲥϩⲓⲙⲉ ⲇⲉ ⲡⲉϫⲁⲥ ⲛⲁⲩ ϫⲉⲁⲩⲉⲓⲛⲉ ⲙⲡϩⲟⲟⲩ ϩⲁⲧϩⲏ ⲛⲟⲩⲕⲟⲩⲓ ⲁⲩϯⲟⲩⲟⲓ ⲇⲉ ⲛⲥⲱⲟⲩ ⲙⲡⲟⲩϩⲉ ⲉⲣⲟⲟⲩ ⲁⲩⲱ ⲁⲩⲕⲧⲟⲟⲩ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ
21 ⲁⲥϣⲱⲡⲉ ⲇⲉ ⲙⲛⲛⲥⲁⲉⲧⲣⲉⲛⲏ ⲃⲱⲕ ⲛⲁⲓ ϩⲱⲟⲩ ⲁⲩⲉⲓ ⲉϩⲣⲁⲓ ϩⲙⲡϣⲏⲓ ⲁⲩⲡⲱⲧ ⲁⲩⲧⲁⲙⲉⲡⲣⲣⲟ ⲇⲁⲩⲉⲓⲇ ⲁⲩⲱ ⲡⲉϫⲁⲩ ⲉϩⲟⲩⲛ ϩⲛⲇⲁⲩⲉⲓⲇ ϫⲉⲧⲟⲩⲛⲧⲏⲩⲧⲛ ⲧⲉⲛⲟⲩ ⲛⲧⲉⲧⲛϫⲓⲟⲟⲣ ⲙⲡⲙⲟⲟⲩ ϫⲉⲉⲓⲥⲧϩⲏ ⲧⲉ ⲧⲁⲓ ⲛⲧⲁϥϯϣⲟϫⲛⲉ ⲉⲧⲃⲉⲧⲏⲩⲧⲛ ⲛϭⲓⲁⲭⲓⲇⲟⲫⲉⲗ
22 ⲁⲩⲱ ⲇⲁⲩⲉⲓⲇ ⲁϥⲧⲱⲟⲩⲛ ⲙⲛⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲁⲩϫⲓⲟⲟⲣ ⲙⲡⲓⲟⲣⲇⲁⲛⲏⲥ ϣⲁⲡⲛⲁⲩ ⲛⲧⲉⲡⲟⲩⲟⲉⲓⲛ ⲉⲓ ⲉϩⲣⲁⲓ ⲙⲡⲉⲟⲩⲁ ⲛⲟⲩⲱⲧ ϭⲱ ⲉⲡⲁϩⲟⲩ ⲛϩⲏⲧⲟⲩ ⲉⲙⲡⲉϥϫⲓⲟⲟⲣ ⲙⲡⲓⲟⲣⲇⲁⲛⲏⲥ
23 ⲁⲩⲱ ⲁⲭⲓⲧⲟⲫⲉⲗ ⲛⲧⲉⲣⲉϥⲛⲁⲩ ϫⲉⲙⲡⲉⲡϣⲟϫⲛⲉ ⲛⲧⲁϥⲁⲁϥ ϣⲱⲡⲉ ⲁϥϩⲉⲕⲧⲉϥⲉⲱ ⲁϥⲧⲱⲟⲩⲛ ⲁϥⲡⲱⲧ ⲉϩⲣⲁⲓ ⲉⲡⲉϥⲏⲓ ⲉⲧⲉϥⲡⲟⲗⲓⲥ ⲁⲩⲱ ⲛⲧⲉⲣⲉϥϩⲱⲛ ⲉⲧⲟⲟⲧⲟⲩ ⲛⲛⲁⲡⲉϥⲏⲓ ϩⲛⲛⲉⲛⲧⲁϥϫⲟⲟⲩ ⲁϥⲟϫⲧϥ ⲁϥⲙⲟⲩ ⲁⲩⲱ ⲁⲩⲧⲟⲙⲥϥ ϩⲙⲡⲧⲁⲫⲟⲥ ⲙⲡⲉϥⲉⲓⲱⲧ
24 ⲁⲩⲱ ⲇⲁⲩⲉⲓⲇ ⲁϥⲉⲓ ⲉϩⲣⲁⲓ ⲉⲙⲁⲛⲁⲓⲙ ⲁⲩⲱ ⲁⲃⲏⲥⲁⲗⲱⲙ ⲁϥϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲛⲧⲟϥ ⲁⲩⲱ ⲡⲗⲁⲟⲥ ⲧⲏⲣϥ ⲁϥⲉⲓ ⲉϩⲣⲁⲓ ⲛⲙⲙⲁϥ
25 ⲁⲙⲉⲥⲥⲉⲉⲓ ⲇⲉ ⲁϥⲕⲁⲑⲓⲥⲧⲁ ⲙⲙⲟϥ ⲛϭⲓⲁⲃⲉⲥⲁⲗⲱⲙ ⲉⲡⲙⲁ ⲛⲓⲱⲁⲃ ⲉⲧⲣⲉϥϭⲱ ⲉϫⲙⲡⲉϥⲙⲏⲏϣⲉ ⲁⲙⲉⲥⲥⲉⲉⲓ ⲇⲉ ⲡϣⲏⲣⲉ ⲡⲉ ⲛⲟⲩⲣⲱⲙⲉ ⲉⲡⲉϥⲣⲁⲛ ⲡⲉ ⲓⲱⲑⲱⲣ ⲡⲓⲥⲙⲁⲏⲗⲓⲧⲏⲥ ⲡⲁⲓ ⲁϥⲃⲱⲕ ⲉϩⲟⲩⲛ ϣⲁⲁⲃⲓⲕⲓⲁ ⲧϣⲉⲉⲣⲉ ⲛⲛⲁⲁⲥ ⲡⲥⲟⲛ ⲛⲥⲁⲣⲟⲩⲉⲓⲁⲥ ⲧⲙⲁⲁⲩ ⲛⲓⲱⲁⲃ
26 ⲁⲩⲱ ⲡⲓⲥⲣⲁⲏⲗ ⲧⲏⲣϥ ⲙⲛⲁⲃⲏⲥⲁⲗⲱⲙ ⲁⲩⲧⲁⲁⲩ ⲉϩⲣⲁⲓ ⲉⲡⲕⲁϩ ⲛⲅⲁⲗⲁⲁⲇ
27 ⲁⲥϣⲱⲡⲉ ⲇⲉ ⲛⲧⲉⲣⲉⲇⲁⲩⲉⲓⲇ ⲉⲓ ⲉϩⲣⲁⲓ ⲉⲙⲁⲛⲁⲉⲓⲙ ⲉⲡⲙⲁ ⲉⲧⲉⲣⲉⲉⲥⲃⲓⲛ ⲛϩⲏⲧϥ ⲡϣⲏⲣⲉ ⲛⲛⲁⲁⲥ ⲉⲃⲟⲗ ϩⲛϩⲣⲁⲃⲃⲁⲑ ⲡⲕⲁϩ ⲛⲛⲉϣⲏⲣⲉ ⲛⲁⲙⲙⲱⲛ ⲙⲁⲭⲓⲣ ⲡϣⲏⲣⲉ ⲛⲁⲙⲓⲏⲗ ⲡⲉⲉⲃⲟⲗ ϩⲛⲗⲁⲇⲁⲃⲁⲣ ⲁⲩⲱ ⲃⲉⲣⲇⲉⲗⲗⲓ ⲡⲅⲁⲗⲁⲧⲓⲧⲏⲥ ⲡⲉⲉⲃⲟⲗ ϩⲛϩⲣⲱⲅⲉⲗⲗⲓⲙ
28 ⲁⲩⲉⲓⲛⲉ ⲙⲙⲏⲧⲉ ⲛⲕⲓⲧⲉ ⲙⲛϩⲉⲛⲁⲙⲫⲓⲧⲁⲡⲟⲥ ⲁⲩⲱ ⲙⲏⲧ ⲛⲭⲁⲗⲕⲓⲟⲛ ⲙⲛϩⲉⲛⲥⲕⲉⲩⲏ ⲛϣⲁϣⲟⲩ ⲛⲏⲣⲡ ⲁⲩⲱ ϩⲉⲛⲥⲟⲩⲟ ⲙⲛⲟⲩⲉⲓⲱⲧ ⲙⲛⲟⲩⲛⲟⲉⲓⲧ ⲙⲛⲟⲩϩⲛⲁⲁⲩ ⲛⲉⲗⲉⲗϣⲱⲟⲩⲉ ⲙⲛϩⲉⲛⲕⲉⲁⲙⲟⲥ ⲁⲩⲱ ⲟⲩⲁⲣϣⲓⲛ
29 ⲙⲛⲟⲩⲉⲃⲓⲱ ⲁⲩⲱ ⲟⲩⲥⲟⲉⲓⲣⲉ ⲙⲛϩⲉⲛⲉⲥⲟⲟⲩ ⲁⲩⲱ ⲥⲁⲡⲫⲟⲧ ⲛⲛⲉϩ ⲉⲧⲉϩⲉⲛⲙⲁⲥⲉ ⲛⲉ ⲁⲩϫⲓⲧⲟⲩ ⲉϩⲟⲩⲛ ⲛⲇⲁⲩⲉⲓⲇ ⲁⲩⲱ ⲙⲡⲗⲁⲟⲥ ⲉⲧⲛⲙⲙⲁϥ ⲉⲧⲣⲉⲩⲟⲩⲱⲙ ⲉⲃⲟⲗ ϫⲉⲁⲩϫⲟⲟⲥ ϫⲉⲉⲓⲥⲡⲗⲁⲟⲥ ϩⲕⲁⲉⲓⲧ ⲁⲩⲱ ϥⲟⲃⲉ ⲉϥϣⲟⲥⲙ ϩⲛⲧⲉⲣⲏⲙⲟⲥ
2 Samuel 16 · 2 Samuel 18 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)