2 Samuel 16 — Coptic (Sahidic)

1 ⲇⲁⲩⲉⲓⲇ ⲇⲉ ⲁϥⲡⲁⲣⲁⲅⲉ ϩⲛⲧⲉϩⲓⲏ ⲛⲟⲩⲕⲟⲩⲓ ⲛϩⲣⲱⲟⲥ ⲧⲡⲟⲗⲓⲥ ⲁⲩⲱ ⲉⲓⲥ ⲥⲓⲃⲁ ⲡϩⲙϩⲁⲗ ⲙⲙⲉⲙⲫⲓⲃⲟⲥⲑⲉ ⲁϥⲉⲓ ⲉⲃⲟⲗ ϩⲏⲧϥ ⲉⲣⲉⲟⲩⲥⲟⲉⲓϣ ⲛⲓⲱ ϩⲏⲕ ⲉⲣⲉϣⲏⲧ ⲛⲟⲉⲓⲕ ϩⲓϫⲱⲟⲩ ⲁⲩⲱ ϣⲉ ⲛϣⲓ ⲛⲉⲗⲉⲗϣⲟⲩϣⲟⲩ ⲁⲩⲱ ϣⲉ ⲛϣⲓ ⲛⲃⲏⲛⲛⲉ ⲁⲩⲱ ⲟⲩϣⲓ ⲛⲏⲣⲡ

2 ⲡⲉϫⲉⲡⲣⲣⲟ ⲉϩⲟⲩⲛ ϩⲛⲥⲓⲃⲁ ϫⲉⲟⲩ ⲛⲉ ⲛⲁⲓ ⲛⲧⲁⲕⲉⲛⲧⲟⲩ ⲡⲉϫⲉⲥⲓⲃⲁ ϩⲓⲧϩⲏ ⲙⲡⲣⲣⲟ ϫⲉⲛⲉⲓⲃⲁⲓⲛⲁϩⲃ ⲉⲧⲃⲉⲛⲁⲡⲏⲓ ⲙⲡⲣⲣⲟ ⲉⲧⲣⲉⲩϩⲙⲟⲟⲥ ϩⲓϫⲱⲟⲩ ⲁⲩⲱ ⲛⲉⲓⲟⲉⲓⲕ ⲙⲛⲛⲉⲓⲃⲏⲛⲛⲉ ⲉⲧⲣⲉⲛϣⲏⲣⲉ ϣⲏⲙ ⲟⲩⲟⲙⲟⲩ ⲁⲩⲱ ⲡⲉⲓⲏⲣⲡ ⲉⲧⲣⲉⲛⲉⲧϩⲟⲥⲉ ϩⲙⲡϫⲁⲓⲉ ⲥⲟⲟϥ

3 ⲡⲉϫⲉⲡⲣⲣⲟ ⲛⲁϥ ϫⲉⲉϥⲧⲱⲛ ⲡϣⲏⲣⲉ ⲙⲡⲉⲕϫⲟⲉⲓⲥ ⲡⲉϫⲉⲥⲓⲃⲁ ϩⲓⲧϩⲏ ⲙⲡⲣⲣⲟ ϫⲉⲉⲓⲥϩⲏⲏⲧⲉ ϥϩⲙⲟⲟⲥ ϩⲛⲧϩⲓⲉⲣⲟⲩⲥⲁⲗⲏⲙ ϫⲉⲁϥϫⲟⲟⲥ ϫⲉⲙⲡϩⲟⲟⲩ ⲥⲉⲛⲁⲕⲧⲟ ⲉⲣⲟⲓ ⲛⲧⲙⲛⲧⲣⲣⲟ ⲙⲡⲁⲉⲓⲱⲧ ⲛϭⲓⲛⲁⲡⲏⲓ ⲙⲡⲓⲥⲣⲁⲏⲗ

4 ⲡⲣⲣⲟ ⲇⲉ ⲡⲉϫⲁϥ ⲛⲥⲓⲃⲁ ϫⲉⲉⲓⲥⲛⲉⲛⲕⲁ ⲧⲏⲣⲟⲩ ⲙⲙⲉⲙⲫⲓⲃⲟⲥⲑⲉ ⲉⲩⲉϣⲱⲡⲉ ⲛⲁⲕ ⲥⲓⲃⲁ ⲇⲉ ⲛⲧⲉⲣⲉϥⲟⲩⲱϣⲃ ϩⲓⲧϩⲏ ⲙⲡⲣⲣⲟ ⲡⲉϫⲁϥ ⲛⲁϥ ϫⲉⲉⲓⲉϭⲉⲛⲭⲁⲣⲓⲥ ⲛⲁϩⲣⲟⲕ ⲡⲁϫⲟⲉⲓⲥ ⲡⲣⲣⲟ

5 ⲇⲁⲩⲉⲓⲇ ⲇⲉ ⲁϥⲉⲓ ⲉϩⲣⲁⲓ ⲉⲃⲁⲟⲩⲣⲓⲙ ⲉⲓⲥ ⲟⲩⲣⲱⲙⲉ ⲇⲉ ⲁϥⲉⲓ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲉⲟⲩⲉ ⲉⲃⲟⲗ ⲡⲉ ϩⲙⲡⲏⲓ ⲛⲧⲥⲩⲅⲅⲉⲛⲉⲓⲁ ⲛⲥⲁⲟⲩⲗ ⲉⲡⲉϥⲣⲁⲛ ⲡⲉ ⲥⲉⲙⲏⲉⲓ ⲡϣⲏⲣⲉ ⲛⲕⲏⲣⲁ ⲁϥⲧⲱⲟⲩⲛ ⲇⲉ ⲁϥⲉⲓ ⲉⲃⲟⲗ ⲉϥⲥⲁϩⲟⲩ ⲛⲇⲁⲩⲉⲓⲇ

6 ⲁⲩⲱ ⲉϥⲛⲉϫⲱⲛⲉ ⲉⲣⲟϥ ϩⲛϩⲉⲛⲱⲛⲉ ⲁⲩⲱ ⲛϩⲙϩⲁⲗ ⲧⲏⲣⲟⲩ ⲙⲡⲣⲣⲟ ⲇⲁⲩⲉⲓⲇ ⲡⲗⲁⲟⲥ ⲇⲉ ⲧⲏⲣϥ ⲁⲩⲱ ⲛⲇⲩⲛⲁⲧⲟⲥ ⲧⲏⲣⲟⲩ ⲛⲉⲩⲙⲟⲟϣⲉ ⲛⲥⲁⲟⲩⲛⲁⲙ ⲁⲩⲱ ⲛⲥⲁϩⲃⲟⲩⲣ ⲙⲡⲣⲣⲟ

7 ⲥⲏⲙⲉⲉⲓ ⲇⲉ ⲉϥⲥⲁϩⲟⲩ ⲙⲡⲣⲣⲟ ⲛⲉϥϫⲱ ⲙⲙⲟⲥ ϩⲓⲛⲁⲓ ϫⲉⲙⲟⲟϣⲉ ⲉⲃⲟⲗ ⲡⲣⲱⲙⲉ ⲛⲥⲛⲱⲱϥ ⲁⲩⲱ ⲙⲡⲁⲣⲁⲛⲟⲙⲟⲥ

8 ⲁⲡϫⲟⲉⲓⲥ ⲕⲧⲟ ⲉϩⲣⲁⲓ ⲉϫⲱⲕ ⲛⲛⲉⲥⲛⲱⲱϥ ⲧⲏⲣⲟⲩ ⲙⲡⲏⲓ ⲛⲥⲁⲟⲩⲗ ⲉⲃⲟⲗ ϫⲉⲁⲕⲣⲣⲣⲟ ⲉⲡⲉϥⲙⲁ ⲁⲩⲱ ⲡϫⲟⲉⲓⲥ ⲁϥϯ ⲉϩⲣⲁⲓ ⲉⲧⲟⲟⲧϥ ⲛⲁⲃⲏⲥⲁⲗⲱⲙ ⲡⲉⲕϣⲏⲣⲉ ⲛⲧⲙⲛⲧⲣⲣⲟ ⲁⲩⲱ ⲉⲓⲥ ϩⲏⲏⲧⲉ ⲛⲧⲟⲕ ⲕϩⲛⲧⲉⲕⲕⲁⲕⲓⲁ ϫⲉⲛⲧⲉⲕ ⲟⲩⲣⲱⲙⲉ ⲛⲧⲟⲕ ⲛⲥⲛⲟϥ

9 ⲁⲩⲱ ⲁⲃⲓⲥⲁ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲡⲉϫⲁϥ ⲉϩⲟⲩⲛ ϩⲙⲡⲣⲣⲟ ϫⲉⲟⲩ ⲡⲉ ⲡⲉⲓⲟⲩϩⲟⲣ ⲉⲧⲙⲟⲟⲩⲧ ϫⲉⲉϥⲉⲥⲁϩⲟⲩ ⲙⲡⲁϫⲟⲉⲓⲥ ⲡⲣⲣⲟ ϯⲛⲁⲃⲱⲕ ⲉⲣⲟϥ ⲛⲧⲁϥⲓ ⲛⲧⲉϥⲁⲡⲉ

10 ⲡⲉϫⲉⲡⲣⲣⲟ ⲛⲁϥ ϫⲉⲁϩⲣⲱⲧⲛ ⲛⲙⲙⲁⲓ ⲛⲉϣⲏⲣⲉ ⲛⲥⲁⲣⲟⲩⲉⲓⲁⲥ ⲁⲗⲱⲧⲛ ϩⲁⲣⲟϥ ⲉⲧⲣⲉϥⲥⲁϩⲟⲩ ϩⲓⲛⲁⲓ ϫⲉⲡϫⲟⲉⲓⲥ ⲡⲉ ⲛⲧⲁϥϫⲟⲟⲥ ⲛⲁϥ ⲉⲧⲣⲉϥⲥⲁϩⲟⲩ ⲛⲇⲁⲩⲉⲓⲇ ⲁⲩⲱ ⲛⲓⲙ ⲡⲉⲧⲛⲁϣϫⲟⲟⲥ ⲛⲁϥ ϫⲉⲉⲧⲃⲉⲟⲩ ⲁⲕⲉⲓⲣⲉ ⲛⲁⲓ

11 ⲁⲩⲱ ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲛⲁⲃⲓⲥⲁ ⲁⲩⲱ ⲉϩⲟⲩⲛ ⲉⲛⲉϥϩⲙϩⲁⲗ ⲧⲏⲣⲟⲩ ⲉϥϫⲱ ⲙⲙⲟⲥ ⲛⲁⲩ ϫⲉⲉⲓⲥⲡⲁϣⲏⲣⲉ ⲣⲱ ⲁⲩⲱ ⲡⲉⲛⲧⲁϥⲉⲓ ⲉⲃⲟⲗ ϩⲛⲛⲁⲙⲉⲗⲟⲥ ⲁⲩⲱ ϥⲕⲱⲧⲉ ⲛⲥⲁⲧⲁⲯⲩⲭⲏ ⲉϥⲓⲧⲥ ⲉϫⲙⲡⲁⲓ ⲇⲉ ϩⲱⲱϥ ⲧⲉⲛⲟⲩ ⲡⲕⲉϣⲏⲣⲉ ⲛⲓⲉⲙⲉⲛⲉⲓ ⲁⲗⲱⲧⲛ ϩⲁⲣⲟϥ ⲙⲁⲣⲉϥⲥⲁϩⲟⲩ ϫⲉⲡϫⲟⲉⲓⲥ ⲡⲉⲛⲧⲁϥϫⲟⲟⲥ ⲛⲁϥ ⲉⲧⲣⲉϥⲣⲡⲁⲓ

12 ⲙⲉϣⲁⲕ ⲛⲧⲉⲡϫⲟⲉⲓⲥ ϭⲱϣⲧ ⲉϫⲙⲡⲁⲑⲃⲃⲓⲟ ⲛϥⲕⲧⲟ ⲉϩⲣⲁⲓ ⲉϫⲱⲓ ⲛϩⲉⲛⲁⲅⲁⲑⲟⲛ ⲉⲡⲙⲁ ⲙⲡⲉϥⲥⲁϩⲟⲩ ϩⲙⲡϩⲟⲟⲩ ⲛϩⲟⲟⲩ

13 ⲁⲩⲱ ⲇⲁⲩⲉⲓⲇ ⲙⲛⲛⲣⲱⲙⲉ ⲉⲧⲛⲙⲙⲁϥ ⲁⲩⲙⲟⲟϣⲉ ϩⲛⲧⲉϩⲓⲏ ⲥⲉⲙⲉⲉⲓ ⲇⲉ ϩⲱⲱϥ ⲛⲉϥⲙⲟⲟϣⲉ ⲛⲥⲁⲥⲡⲓⲣ ⲙⲡⲧⲟⲟⲩ ⲉϥϩⲏⲛ ⲉⲣⲟϥ ⲛⲉϥⲙⲟⲟϣⲉ ⲇⲉ ⲉϥⲥⲁϩⲟⲩ ⲁⲩⲱ ⲉϥⲛⲉϫⲱⲛⲉ ϩⲛϩⲉⲛⲱⲛⲉ ⲛⲥⲁⲥⲡⲓⲣ ⲙⲙⲟϥ ⲁⲩⲱ ⲉϥⲛⲉϫⲉⲓⲧⲛ ⲉϩⲟⲩⲛ ϩⲙⲡⲉϥϩⲟ

14 ⲡⲣⲣⲟ ⲇⲉ ⲙⲛⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲁⲩⲉⲓ ⲉⲩϩⲟⲥⲉ ⲁⲩⲱ ⲉⲩϣⲟⲥⲙ ⲁⲩϭⲱ ⲁⲩⲙⲧⲟⲛ ⲙⲙⲟⲟⲩ ⲙⲡⲙⲁ ⲉⲧⲙⲙⲁⲩ

15 ⲁⲃⲏⲥⲁⲗⲱⲙ ⲇⲉ ⲙⲛⲛⲣⲱⲙⲉ ⲙⲡⲓⲥⲣⲁⲏⲗ ⲁⲩⲃⲱⲕ ⲛⲙⲙⲁϥ ⲉϩⲟⲩⲛ ⲉⲧϩⲓⲉⲣⲟⲩⲥⲁⲗⲏⲙ ⲉⲣⲉⲁⲭⲓⲧⲟⲫⲉⲗ ⲛⲙⲙⲁϥ

16 ⲁⲥϣⲱⲡⲉ ⲇⲉ ⲛⲧⲉⲣⲉϥⲉⲓ ⲛϭⲓⲭⲟⲩⲥⲓ ⲡⲉϣⲃⲏⲣ ⲟⲛ ⲛⲇⲁⲩⲉⲓⲇ ⲉⲣⲁⲧϥ ⲛⲁⲃⲏⲥⲁⲗⲱⲙ ⲡⲉϫⲉⲭⲟⲩⲥⲉⲓ ⲛⲁⲃⲏⲥⲁⲗⲱⲙ ϫⲉⲙⲁⲣⲉϥⲱⲛϩ ⲛϭⲓⲡⲣⲣⲟ

17 ⲡⲉϫⲉⲁⲃⲏⲥⲁⲗⲱⲙ ⲉϩⲟⲩⲛ ϩⲛⲭⲟⲩⲥⲉⲓ ϫⲉⲡⲁⲓ ⲡⲉ ⲡⲉⲕⲛⲁ ⲛⲧⲁⲕⲁⲁϥ ⲙⲛⲡⲉⲕϣⲃⲏⲣ ⲉⲧⲃⲉⲟⲩ ⲙⲡⲉⲕⲃⲱⲕ ⲙⲛⲡⲉⲕϣⲃⲏⲣ

18 ⲡⲉϫⲉⲭⲟⲩⲥⲓ ⲉϩⲟⲩⲛ ϩⲛⲁⲃⲏⲥⲁⲗⲱⲙ ϫⲉⲛϯⲛⲁⲣⲡⲁⲓ ⲁⲛ ⲁⲗⲗⲁ ⲉⲓⲛⲁⲟⲩⲁϩⲧ ⲛⲧⲟϥ ⲛⲥⲁⲡⲉⲛⲧⲁⲡϫⲟⲉⲓⲥ ⲥⲟⲧⲡϥ ⲁⲩⲱ ⲡⲉⲛⲧⲁⲡⲉⲓⲗⲁⲟⲥ ⲙⲛⲛⲣⲱⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲥⲟⲧⲡϥ ⲉⲓⲛⲁⲱⲡ ⲉⲣⲟϥ ⲁⲩⲱ ⲉⲓⲛⲁϭⲱ ϩⲁⲧⲏϥ

19 ⲙⲛⲛⲥⲁⲡⲁⲓ ⲇⲉ ⲁⲛⲟⲕ ⲉⲓⲛⲁⲣϩⲙϩⲁⲗ ⲛⲛⲓⲙ ⲉⲓⲛⲁⲉⲓⲣⲉ ⲁⲛ ϩⲓⲧϩⲏ ⲙⲡⲉϥϣⲏⲣⲉ ⲕⲁⲧⲁⲧϩⲉ ϭⲉ ⲛⲧⲁⲓⲣϩⲙϩⲁⲗ ⲛⲁϩⲣⲁϥ ⲙⲡⲉⲕⲉⲓⲱⲧ ⲧⲁⲓ ⲧⲉ ⲧϩⲉ ⲉϯⲛⲁⲉⲓⲣⲉ ϩⲱⲱϥ ⲛⲁϩⲣⲟⲕ

20 ⲡⲉϫⲉⲁⲃⲏⲥⲁⲗⲱⲙ ⲛⲁⲭⲓⲇⲟⲫⲉⲗ ϫⲉⲛⲧⲱⲧⲛ ⲁⲛⲓⲟⲩⲅⲛⲱⲙⲏ ⲛⲁⲛ ⲉϩⲟⲩⲛ ϫⲉⲟⲩ ⲡⲉⲧⲛⲛⲁⲁⲁϥ

21 ⲡⲉϫⲉⲁⲭⲓⲇⲟⲫⲉⲗ ⲛⲁⲃⲏⲥⲁⲗⲱⲙ ϫⲉⲃⲱⲕ ⲉϩⲟⲩⲛ ϣⲁⲙⲡⲁⲗⲗⲁⲕⲏ ⲙⲡⲉⲕⲉⲓⲱⲧ ⲛⲁⲓ ⲛⲧⲁϥⲕⲁⲁⲩ ⲉⲡⲁϩⲟⲩ ⲉⲧⲣⲉⲩϩⲁⲣⲉϩ ⲉⲡⲉϥⲏⲓ ⲁⲩⲱ ⲥⲉⲛⲁⲥⲱⲧⲙ ⲛϭⲓⲡⲓⲥⲣⲁⲏⲗ ⲧⲏⲣϥ ϫⲉⲁⲕϯϣⲓⲡⲉ ⲙⲡⲉⲕⲉⲓⲱⲧ ⲁⲩⲱ ⲥⲉⲛⲁⲧⲁϫⲣⲟ ⲛϭⲓⲛϭⲓϫ ⲛⲟⲩⲟⲛ ⲛⲓⲙ ⲉⲧⲛⲙⲙⲁⲕ

22 ⲁⲩⲱ ⲁⲩⲧⲁϩⲟ ⲉⲣⲁⲧⲥ ⲛⲧⲉⲥⲕⲏⲛⲏ ⲛⲁⲃⲏⲥⲁⲗⲱⲙ ϩⲓⲧϫⲉⲛⲉⲡⲱⲣ ⲁⲁⲃⲏⲥⲁⲗⲱⲙ ⲃⲱⲕ ⲉϩⲟⲩⲛ ϣⲁⲙⲡⲁⲗⲗⲁⲕⲏ ⲙⲡⲉϥⲉⲓⲱⲧ ⲙⲡⲉⲙⲧⲟ ⲉⲃⲟⲗ ⲙⲡⲓⲥⲣⲁⲏⲗ ⲧⲏⲣϥ

23 ⲁⲩⲱ ⲡϣⲟϫⲛⲉ ⲛⲧⲁⲁⲭⲓⲧⲟⲫⲉⲗ ϣⲟϫⲛⲉ ⲙⲙⲟϥ ϩⲛⲛⲉϩⲟⲟⲩ ⲛϣⲟⲣⲡ ⲛⲧϩⲉ ⲛⲟⲩⲁ ⲉϥⲛⲁϣⲓⲛⲉ ϩⲙⲡϣⲁϫⲉ ⲙⲡⲛⲟⲩⲧⲉ ⲧⲁⲓ ⲧⲉ ⲧϩⲉ ⲙⲡϣⲟϫⲛⲉ ⲧⲏⲣϥ ⲛⲁⲭⲓⲇⲟⲫⲉⲗ ⲛⲁϩⲣⲁϥ ⲛⲇⲁⲩⲉⲓⲇ ⲁⲩⲱ ⲛⲁϩⲣⲁϥ ⲛⲁⲃⲏⲥⲁⲗⲱⲙ