2 Samuel 15 — Coptic (Sahidic)

1 ⲙⲛⲛⲥⲁⲛⲁⲓ ⲁⲁⲃⲏⲥⲁⲗⲱⲙ ⲧⲁⲙⲓⲟ ⲛⲁϥ ⲛϩⲉⲛϩⲁⲣⲙⲁ ⲙⲛϩⲉⲛϩⲓⲡⲡⲉⲩⲥ ⲁⲩⲱ ⲁϥⲧⲁϩⲟ ⲉⲣⲁⲧϥ ⲛⲧⲁⲉⲓⲟⲩ ⲛⲣⲱⲙⲉ ⲉⲧⲣⲉⲩⲡⲱⲧ ϩⲓⲧϩⲏ ⲙⲙⲟϥ

2 ⲁⲃⲏⲥⲁⲗⲱⲙ ⲇⲉ ⲁϥϣⲟⲣⲡϥ ⲉϩⲧⲟⲟⲩⲉ ⲁϥⲁϩⲉⲣⲁⲧϥ ⲉϫⲛⲧⲉϩⲓⲏ ⲙⲙⲟⲟϣⲉ ⲛⲧⲡⲩⲗⲏ ⲁⲩⲱ ⲣⲱⲙⲉ ⲛⲓⲙ ⲉⲧⲉⲟⲩⲛⲧⲟⲩⲥⲓϭⲉ ⲙⲙⲁⲩ ⲉⲧⲣⲉⲩⲉⲓ ⲉⲣⲁⲧϥ ⲙⲡⲣⲣⲟ ⲉϫⲓϩⲁⲡ ϩⲓⲱⲱϥ ϣⲁⲣⲉⲁⲃⲏⲥⲁⲗⲱⲙ ⲁϩⲉⲣⲁⲧϥ ⲛⲟⲩⲉ ⲡⲟⲩⲁ ⲡⲟⲩⲁ ⲛϥⲱϣ ⲉⲃⲟⲗ ⲉϥϫⲱ ⲙⲙⲟⲥ ⲛⲁϥ ϫⲉⲉⲕⲏⲡ ⲛⲧⲟⲕ ⲉⲁϣ ⲙⲡⲟⲗⲓⲥ ⲡⲉϫⲉⲡⲣⲱⲙⲉ ⲛⲁϥ ϫⲉⲁⲛⲅ ⲡⲉⲕϩⲙϩⲁⲗ ⲁⲛⲅ ⲟⲩⲉ ⲉⲃⲟⲗ ϩⲛⲛⲉⲫⲩⲗⲏ ⲛⲧⲉⲛⲉⲫⲩⲗⲟⲟⲩⲉ ⲙⲡⲓⲥⲣⲁⲏⲗ

3 ⲡⲉϫⲉⲁⲃⲏⲥⲁⲗⲱⲙ ⲛⲁϥ ϫⲉⲉⲓⲥⲛⲉⲕϣⲁϫⲉ ⲉⲧⲉⲕϫⲱ ⲙⲙⲟⲟⲩ ⲛⲁⲛⲟⲩⲟⲩ ⲁⲩⲱ ⲥⲉⲥⲟⲩⲧⲱⲛ ⲙⲛⲡⲉⲧⲛⲁⲥⲱⲧⲙ ⲇⲉ ⲉⲣⲟⲕ ⲛⲧⲟⲟⲧϥ ⲙⲡⲣⲣⲟ

4 ⲁⲩⲱ ⲁⲃⲏⲥⲁⲗⲱⲙ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉⲛⲓⲙ ⲡⲉⲧⲛⲁⲧⲁϩⲟⲓ ⲉⲣⲁⲧⲛⲕⲣⲓⲧⲏⲥ ϩⲓϫⲙⲡⲕⲁϩ ⲛⲥⲉⲉⲓ ⲉⲣⲁⲧⲛϭⲓⲣⲱⲙⲉ ⲛⲓⲙ ⲉⲟⲩⲛⲧϥⲥⲓϭⲉ ⲙⲙⲁⲩ ⲁⲩⲱ ⲉⲟⲩⲛⲧϥϩⲁⲡ ⲙⲙⲁⲩ ⲛⲧⲁⲧⲙⲁⲓⲟϥ

5 ⲁⲥϣⲱⲡⲉ ⲇⲉ ⲉⲣⲉⲡⲣⲱⲙⲉ ⲛⲁϩⲱⲛ ⲉϩⲟⲩⲛ ⲉⲣⲟϥ ⲉⲟⲩⲱϣⲧ ⲛⲁϥ ϣⲁϥⲥⲟⲩⲧⲛⲧⲟⲟⲧϥ ⲉⲃⲟⲗ ⲛϥⲁⲙⲁϩⲧⲉ ⲙⲙⲟϥ ⲛϥϯⲡⲓ ⲉⲣⲱϥ

6 ⲁⲩⲱ ⲁⲃⲏⲥⲁⲗⲱⲙ ⲁϥⲉⲓⲣⲉ ⲕⲁⲧⲁⲡⲉⲓϣⲁϫⲉ ⲙⲡⲓⲥⲣⲁⲏⲗ ⲧⲏⲣϥ ⲛⲛⲉϣⲁⲩⲉⲓ ⲉⲣⲁⲧϥ ⲙⲡⲣⲣⲟ ⲉϫⲓϩⲁⲡ ⲁⲩⲱ ⲁⲃⲏⲥⲁⲗⲱⲙ ⲛⲉϥϥⲓ ⲙⲡϩⲏⲧ ⲛⲛⲣⲱⲙⲉ ⲙⲡⲓⲥⲣⲁⲏⲗ ϩⲙⲡⲉⲓⲥⲙⲟⲧ

7 ⲁⲥϣⲱⲡⲉ ⲇⲉ ⲙⲛⲛⲥⲁⲡϫⲱⲕ ⲉⲃⲟⲗ ⲛϩⲙⲉ ⲛⲣⲟⲙⲡⲉ ⲡⲉϫⲉⲁⲃⲏⲥⲁⲗⲱⲙ ⲙⲡⲉϥⲉⲓⲱⲧ ϫⲉϯⲛⲁⲃⲱⲕ ⲛⲧⲁϯ ⲛⲛⲁⲉⲣⲏⲧ ⲛⲁⲓ ⲛⲧⲁⲓⲉⲣⲏⲧ ⲙⲙⲟⲟⲩ ⲙⲡϫⲟⲉⲓⲥ ϩⲛⲭⲉⲃⲣⲱⲛ

8 ϫⲉⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ⲁⲓⲉⲣⲏⲧ ⲛⲟⲩⲉⲣⲏⲧ ϩⲙⲡⲧⲣⲁⲟⲩⲱϩ ϩⲛⲅⲉⲇⲥⲟⲩⲣ ⲛⲧⲉⲧⲥⲩⲣⲓⲁ ⲉⲓϫⲱ ⲙⲙⲟⲥ ϫⲉϩⲛⲟⲩⲕⲧⲟ ⲉϥϣⲁⲛⲕⲧⲟⲓ ⲛϭⲓⲡϫⲟⲉⲓⲥ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲛⲧⲁⲟⲩⲱϣⲧ ⲙⲡϫⲟⲉⲓⲥ

9 ⲡⲉϫⲉⲡⲣⲣⲟ ⲛⲁϥ ϫⲉⲃⲱⲕ ϩⲛⲟⲩⲉⲓⲣⲏⲛⲏ ⲁϥⲧⲱⲟⲩⲛ ⲇⲉ ⲁϥⲃⲱⲕ ⲉϩⲣⲁⲓ ⲉⲭⲉⲃⲣⲱⲛ

10 ⲁⲩⲱ ⲁⲃⲏⲥⲁⲗⲱⲙ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲛⲉⲫⲩⲗⲏ ⲧⲏⲣⲟⲩ ⲙⲡⲓⲥⲣⲁⲏⲗ ⲉϥϫⲱ ⲙⲙⲟⲥ ϫⲉϩⲙⲡⲧⲣⲉⲧⲉⲧⲛⲥⲱⲧⲙ ⲉⲡⲉϩⲣⲟⲟⲩ ⲛⲧⲥⲁⲗⲡⲓⲅⲝ ⲛⲁϣⲧⲁⲡ ⲉⲧⲉⲧⲛⲛⲉⲱϣ ⲉⲃⲟⲗ ⲉⲧⲉⲧⲛϫⲱ ⲙⲙⲟⲥ ϫⲉⲁⲃⲉⲥⲁⲗⲱⲙ ⲁϥⲣⲣⲣⲟ ϩⲛⲭⲉⲃⲣⲱⲛ

11 ⲁⲩⲱ ⲁⲩⲟⲩⲁϩⲟⲩ ⲛⲥⲁⲁⲃⲏⲥⲁⲗⲱⲙ ⲛϭⲓⲁϣⲏⲧ ⲛⲣⲱⲙⲉ ⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ ⲛⲧⲁϥⲧⲁϩⲙⲟⲩ ⲉⲃⲟⲗ ϩⲛⲧⲉⲩⲙⲛⲧϩⲁⲡⲗⲟⲩⲥ ⲉⲩⲙⲟⲟϣⲉ ⲉⲙⲡⲟⲩⲉⲓⲙⲉ ⲉⲗⲁⲁⲩ ⲛϣⲁϫⲉ

12 ⲁⲩⲱ ⲁⲃⲏⲥⲁⲗⲱⲙ ⲁϥϫⲟⲟⲩ ⲛⲁⲭⲓⲧⲟⲫⲉⲗ ⲡⲑⲉⲅⲱⲛⲓⲧⲏⲥ ⲡⲥⲩⲙⲃⲟⲗⲟⲥ ⲛⲇⲁⲩⲉⲓⲇ ⲉϩⲣⲁⲓ ⲉⲧⲉϥⲡⲟⲗⲓⲥ ⲉⲕⲱⲗⲁ ϩⲙⲡⲧⲣⲉϥⲑⲩⲥⲓⲁⲍⲉ ⲛⲛⲉϥⲛⲟⲩⲧⲉ ⲁⲩⲱ ⲁⲩⲛⲟϭ ⲛⲥⲟⲟⲩϩⲥ ϣⲱⲡⲉ ⲁⲩⲱ ⲡⲙⲏⲏϣⲉ ⲉⲧⲙⲟⲟϣⲉ ⲙⲛⲁⲃⲏⲥⲁⲗⲱⲙ ⲛⲉⲛⲁϣⲱϥ

13 ⲟⲩⲃⲁⲓϣⲓⲛⲉ ⲇⲉ ⲁϥⲉⲓ ⲉⲣⲁⲧϥ ⲛⲇⲁⲩⲉⲓⲇ ⲉϥϫⲱ ⲙⲙⲟⲥ ⲛⲁϥ ϫⲉⲁⲡϩⲏⲧ ⲛⲛⲣⲱⲙⲉ ⲙⲡⲓⲥⲣⲁⲏⲗ ⲣⲓⲕⲉ ⲛⲥⲁⲁⲃⲏⲥⲁⲗⲱⲙ

14 ⲁⲩⲱ ⲡⲉϫⲉⲇⲁⲩⲉⲓⲇ ⲛⲛⲉϥϩⲙϩⲁⲗ ⲧⲏⲣⲟⲩ ⲉⲧϩⲛⲧϩⲓⲉⲣⲟⲩⲥⲁⲗⲏⲙ ⲉⲧⲛⲙⲙⲁϥ ⲉϥϫⲱ ⲙⲙⲟⲥ ⲛⲁⲩ ϫⲉⲧⲟⲩⲛⲧⲏⲩⲧⲛ ⲛⲧⲉⲛⲡⲱⲧ ϫⲉⲙⲛⲟⲩϫⲟⲉⲓ ϣⲟⲟⲡ ⲛⲁⲛ ϩⲁⲡϩⲟ ⲛⲁⲃⲏⲥⲁⲗⲱⲙ ⲙⲁⲣⲉⲛⲧⲁⲭⲏ ϫⲉⲛⲛⲉϥⲡⲱⲧ ⲛϥⲧⲁϩⲟⲛ ⲁⲩⲱ ⲛϥⲉⲓⲛⲉ ⲉϩⲣⲁⲓ ⲉϫⲱⲛ ⲛⲧⲕⲁⲕⲓⲁ ⲛϥⲡⲁⲧⲁⲥⲥⲉⲓ ⲛⲧⲡⲟⲗⲓⲥ ϩⲛⲧⲧⲁⲡⲣⲟ ⲛⲧⲥⲏϥⲉ

15 ⲛϩⲙϩⲁⲗ ⲇⲉ ⲙⲡⲣⲣⲟ ⲡⲉϫⲁⲩ ⲙⲡⲣⲣⲟ ⲇⲁⲩⲉⲓⲇ ϫⲉϩⲱⲃ ⲛⲓⲙ ⲉⲧϥⲛⲁⲧⲟϣⲛ ⲉⲣⲟⲟⲩ ⲛϭⲓⲡⲉⲛϫⲟⲉⲓⲥ ⲡⲣⲣⲟ ⲉⲓⲥ ϩⲏⲏⲧⲉ ⲁⲛⲟⲛ ⲛⲉⲕϩⲙϩⲁⲗ ⲧⲉⲛⲛⲙⲙⲁⲕ

16 ⲁⲩⲱ ⲡⲣⲣⲟ ⲁϥⲧⲱⲟⲩⲛ ⲁϥⲉⲓ ⲉⲃⲟⲗ ⲙⲛⲡⲉϥⲏⲓ ⲧⲏⲣϥ ⲉⲩⲙⲟⲟϣⲉ ⲛⲣⲁⲧⲟⲩ ⲡⲣⲣⲟ ⲇⲉ ⲁϥⲕⲱ ⲉⲡⲁϩⲟⲩ ⲙⲙⲏⲧⲉ ⲛⲥϩⲓⲙⲉ ⲙⲡⲁⲗⲗⲁⲕⲏ ⲛⲧⲁϥⲧⲣⲉⲩⲣⲟⲉⲓⲥ ⲉⲡⲉϥⲏⲓ

17 ⲁⲩⲱ ⲡⲣⲣⲟ ⲁϥⲉⲓ ⲉⲃⲟⲗ ⲙⲛⲛⲉϥϩⲙϩⲁⲗ ⲧⲏⲣⲟⲩ ⲉⲩⲙⲟⲟϣⲉ ⲛⲣⲁⲧⲟⲩ ⲁⲩⲱ ⲁⲩⲁϩⲉⲣⲁⲧⲟⲩ ϩⲙⲡⲏⲓ ⲉⲧⲟⲩⲏⲩ

18 ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ ⲛⲉⲩⲙⲟⲟϣⲉ ϩⲓⲧⲟⲩⲱϥ ⲁⲩⲱ ⲡⲉⲭⲉⲣⲉⲑⲓ ⲧⲏⲣϥ ⲙⲛⲡⲟⲫⲉⲗⲉⲑⲓ ⲧⲏⲣϥ ⲁⲩⲱ ⲛⲕⲉⲑⲉⲟⲥ ⲧⲏⲣⲟⲩ ⲁⲩⲱ ⲁⲩⲉⲓ ⲉϩⲣⲁⲓ ⲉϫⲛⲧⲃⲱ ⲛϫⲟⲉⲓⲧ ⲉⲧϩⲙⲡϫⲁⲓⲉ ⲡⲗⲁⲟⲥ ⲇⲉ ⲧⲏⲣϥ ⲛⲉϥⲡⲁⲣⲁⲅⲉ ⲙⲙⲟϥ ⲁⲩⲱ ⲛⲉⲧϩⲙⲡⲉϥⲕⲱⲧⲉ ⲧⲏⲣⲟⲩ ⲉⲩⲛⲁⲣⲥⲟⲟⲩ ⲛϣⲉ ⲛⲣⲱⲙⲉ ⲛⲉⲩⲁϩⲉⲣⲁⲧⲟⲩ ϩⲓⲧⲟⲩⲱϥ ⲁⲩⲱ ⲡⲉⲭⲉⲣⲉⲑⲓ ⲧⲏⲣϥ ⲙⲛⲡⲟⲫⲉⲗⲉⲑⲓ ⲧⲏⲣϥ ⲁⲩⲱ ⲛⲕⲉⲑⲁⲓⲟⲥ ⲧⲏⲣⲟⲩ ⲉⲩⲛⲁⲣⲥⲟⲟⲩ ⲛϣⲉ ⲛⲣⲱⲙⲉ ⲛⲉⲛⲧⲁⲩⲉⲓ ⲉⲣⲁⲧϥ ⲛⲅⲉⲑ ⲉⲩⲙⲟⲟϣⲉ ⲁⲩⲡⲁⲣⲁⲅⲉ ϩⲱⲟⲩ ϩⲓⲧϩⲏ ⲙⲡⲣⲣⲟ

19 ⲡⲣⲣⲟ ⲇⲉ ⲡⲉϫⲁϥ ⲛⲉⲧϩⲓⲡⲕⲉⲑⲁⲓⲟⲥ ⲙⲛⲛⲉϥⲣⲱⲙⲉ ϫⲉⲉⲧⲃⲉⲟⲩ ⲛⲧⲟⲕ ϩⲱⲱⲕ ⲉⲕⲛⲁⲉⲓ ⲛⲙⲙⲁⲛ ⲕⲟⲧⲕ ⲛⲅⲟⲩⲱϩ ⲏ ⲛⲅⲱⲡ ⲉⲡⲣⲣⲟ ϫⲉⲛⲧⲕ ⲟⲩϣⲙⲙⲟ ⲛⲧⲟⲕ ⲁⲩⲱ ϫⲉⲛⲧⲟⲕ ⲛⲧⲁⲕⲡⲉⲉⲛⲉ ⲣⲁⲧⲕ ⲉⲃⲟⲗ ϩⲛⲅⲉⲑ

20 ⲁⲩⲱ ⲉϣϫⲉ ⲛⲧⲁⲕⲉⲓ ⲛⲥⲁϥ ⲙⲡϩⲟⲟⲩ ϭⲉ ⲉⲓⲛⲁⲡⲟⲟⲛⲉⲕ ⲉⲃⲟⲗ ...

30 ⲛⲧⲟϥ ⲛⲉϥⲙⲟⲟϣⲉ ⲉⲣⲉⲣⲁⲧϥ ϩⲓⲡⲉⲥⲏⲧ ⲁⲩⲱ ⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲁⲡⲟⲩⲁ ⲡⲟⲩⲁ ϩⲱⲃⲥ ⲛⲧⲉϥⲁⲡⲉ ⲁⲩⲱ ⲛⲉⲩⲙⲟⲟϣⲉ ⲉⲩⲣⲓⲙⲉ

31 ⲁⲩⲧⲁⲙⲉⲇⲁⲇ ⲉⲩϫⲱ ⲙⲙⲟⲥ ϫⲉⲁⲭⲓⲧⲟⲫⲉⲗ ϣⲟⲟⲡ ⲙⲛⲛⲉⲧⲟ ⲛϣⲟϫⲛⲉ ⲙⲛⲁⲃⲉⲥⲁⲗⲱⲙ ⲡⲉϫⲉⲇⲁⲩⲉⲓⲇ ϫⲉϫⲱⲱⲣⲉ ⲉⲃⲟⲗ ⲙⲡϣⲟϫⲛⲉ ⲛⲁⲭⲓⲇⲟⲫⲉⲗ ⲡϫⲟⲉⲓⲥ ⲡⲁⲛⲟⲩⲧⲉ

32 ⲇⲁⲩⲉⲓⲇ ⲇⲉ ⲛⲉϥⲙⲟⲟϣⲉ ϣⲁⲉϩⲣⲁⲓ ⲉⲡⲧⲟⲟⲩ ⲙⲛⲡⲟⲩⲧⲉ ⲡⲙⲁ ⲛⲧⲁϥⲟⲩⲱϣⲧ ⲛϩⲏⲧϥ ⲙⲡⲛⲟⲩⲧⲉ ⲁⲩⲱ ⲉⲓⲥ ϩⲏⲏⲧⲉ ⲁϥⲉⲓ ⲉⲣⲁⲧϥ ⲛϭⲓⲭⲟⲩⲥⲉⲓ ⲡⲉϣⲃⲏⲣ ⲟⲛ ⲛⲇⲁⲩⲉⲓⲇ ⲉⲣⲉⲧⲉϥϣⲧⲏⲛ ⲡⲏϩ ϩⲓⲱⲱϥ ⲁⲩⲱ ⲉⲣⲉⲧⲉϥⲁⲡⲉ ⲙⲉϩ ⲛⲓⲧⲛ

33 ⲡⲉϫⲉⲇⲁⲩⲉⲓⲇ ϫⲉⲉⲕϣⲁⲛⲉⲓ ⲛⲙⲙⲁⲓ ⲕⲛⲁϣⲱⲡⲉ ϩⲓϫⲱⲓ ⲉⲓϥⲓ ϩⲁⲣⲁⲕ

34 ⲉⲕϣⲁⲛⲕⲧⲟⲕ ⲇⲉ ⲉϩⲣⲁⲓ ⲉⲧⲡⲟⲗⲓⲥ ⲉⲕⲉϫⲟⲟⲥ ⲛⲁⲃⲏⲥⲁⲗⲱⲙ ϫⲉⲛⲉⲕⲥⲛⲏⲩ ⲁⲩⲡⲁⲣⲁⲅⲉ ⲁⲩⲱ ⲡⲉⲕⲉⲓⲱⲧ ⲡⲣⲣⲟ ⲁϥⲡⲁⲣⲁⲅⲉ ⲙⲙⲟⲓ ⲧⲉⲛⲟⲩ ϭⲉ ⲁⲛⲅ ⲡⲉⲕϩⲙϩⲁⲗ ⲁⲛⲟⲕ ⲡⲣⲣⲟ ⲕⲁⲁⲧ ⲛⲧⲁⲱⲛϩ ⲛⲉⲓⲟ ⲛϩⲙϩⲁⲗ ⲙⲡⲉⲕⲉⲓⲱⲧ ⲛϣⲟⲣⲡ ⲧⲉⲛⲟⲩ ϭⲉ ϩⲱⲱϥ ⲁⲛⲅ ⲡⲉⲕϩⲙϩⲁⲗ ⲁⲛⲟⲕ ⲛⲅϫⲱⲱⲣⲉ ⲉⲃⲟⲗ ⲛⲁⲓ ⲙⲡϣⲟϫⲛⲉ ⲛⲁⲭⲓⲧⲟⲫⲉⲗ

35 ⲁⲩⲱ ⲉⲓⲥ ϩⲏⲏⲧⲉ ϥⲙⲙⲁⲩ ⲛⲙⲙⲁⲕ ⲛϭⲓⲥⲁⲇⲱⲕ ⲙⲛⲁⲃⲓⲁⲑⲁⲣ ⲛⲉⲟⲩⲏⲏⲃ ⲁⲩⲱ ϣⲁϫⲉ ⲛⲓⲙ ⲉⲧⲉⲕⲛⲁⲥⲟⲧⲙⲟⲩ ⲉⲃⲟⲗ ϩⲙⲡⲏⲓ ⲙⲡⲣⲣⲟ ⲉⲕⲉϫⲟⲟⲩ ⲉⲥⲁⲇⲱⲕ ⲙⲛⲁⲃⲓⲁⲑⲁⲣ ⲛⲉⲟⲩⲏⲏⲃ

36 ⲉⲓⲥ ϩⲏⲏⲧⲉ ⲟⲛ ⲥⲉⲛⲙⲙⲁⲕ ⲛϭⲓⲡⲉⲩϣⲏⲣⲉ ⲥⲛⲁⲩ ⲁⲭⲓⲙⲁⲁⲥ ⲡϣⲏⲣⲉ ⲛⲥⲁⲇⲱⲕ ⲙⲛⲓⲱⲛⲁⲑⲁⲛ ⲡϣⲏⲣⲉ ⲛⲁⲃⲓⲁⲑⲁⲣ ⲛⲧⲉⲧⲛϫⲁⲟⲩ ⲛⲁⲓ ⲉⲃⲟⲗ ϩⲓⲧⲟⲟⲧⲟⲩ ⲛϣⲁϫⲉ ⲛⲓⲙ ⲉⲧⲉⲧⲛⲛⲁⲥⲟⲧⲙⲟⲩ

37 ⲁⲩⲱ ⲭⲟⲩⲥⲉⲓ ⲡⲉϣⲃⲏⲣ ⲛⲇⲁⲩⲉⲓⲇ ⲁϥⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲁⲃⲏⲥⲁⲗⲱⲙ ϩⲱⲱϥ ⲉϥⲛⲁⲧⲁⲁϥ ⲉϩⲟⲩⲛ ⲉⲧϩⲓⲉⲣⲟⲩⲥⲁⲗⲏⲙ