2 Samuel 14 — Coptic (Sahidic)

1 ⲓⲱⲁⲃ ⲇⲉ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲛⲧⲉⲣⲉϥⲉⲓⲙⲉ ϫⲉⲡϩⲏⲧ ⲙⲡⲣⲣⲟ ⲙⲟⲕϩ ⲉϫⲛⲁⲃⲏⲥⲁⲗⲱⲙ

2 ⲁϥϫⲟⲟⲩ ⲛϭⲓⲓⲱⲁⲃ ⲉϩⲣⲁⲓ ⲉⲑⲉⲕⲟⲩⲉ ⲁϥϫⲓ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲛⲟⲩⲥϩⲓⲙⲉ ⲛⲥⲟⲫⲏ ⲁⲩⲱ ⲡⲉϫⲁϥ ⲛⲁⲥ ϫⲉⲁⲣⲓⲡⲉⲥⲙⲟⲧ ⲙⲡϩⲏⲃⲉ ⲛⲧⲉϯϩⲓⲱⲱⲧⲉ ⲛϩⲉⲛϩⲟⲉⲓⲧⲉ ⲛϩⲏⲃⲉ ⲛⲧⲉⲧⲙⲧⲁϩⲥⲉ ⲛⲛⲉϩ ⲛⲧⲉϣⲱⲡⲉ ⲛⲧϩⲉ ⲛⲟⲩⲥϩⲓⲙⲉ ⲉⲥⲣϩⲏⲃⲉ ⲉϫⲛⲟⲩⲁ ⲉⲁϥⲙⲟⲩ ⲛⲧⲟⲟⲧⲥ ⲉⲓⲥ ϩⲛϩⲟⲟⲩ ⲉⲛⲁϣⲱⲟⲩ

3 ⲁⲩⲱ ⲉⲣⲉⲃⲱⲕ ⲉⲣⲁⲧϥ ⲙⲡⲣⲣⲟ ⲛⲧⲉϣⲁϫⲉ ⲙⲡⲉϥⲙⲧⲟ ⲉⲃⲟⲗ ⲕⲁⲧⲁⲡⲧⲱϣ ⲙⲡⲉⲓϣⲁϫⲉ ⲓⲱⲁⲃ ⲇⲉ ⲁϥⲕⲱ ⲛⲛⲉϥϣⲁϫⲉ ϩⲛⲧⲉⲥⲧⲁⲡⲣⲟ

4 ⲁⲩⲱ ⲧⲉⲥϩⲓⲙⲉ ⲧⲉ ⲉⲃⲟⲗ ϩⲛⲑⲉⲕⲟⲩⲉ ⲁⲥⲃⲱⲕ ⲉϩⲟⲩⲛ ⲉⲣⲁⲧϥ ⲙⲡⲣⲣⲟ ⲁⲥⲡⲁϩⲧⲥ ⲉϫⲙⲡⲕⲁϩ ⲁⲥⲟⲩⲱϣⲧ ⲛⲁϥ ⲁⲩⲱ ⲡⲉϫⲁⲥ ϫⲉⲛⲁϩⲙⲉⲧ ⲡⲣⲣⲟ ⲛⲁϩⲙⲉⲧ

5 ⲡⲉϫⲉⲡⲣⲣⲟ ϫⲉⲟⲩ ⲡⲉ ⲡⲟⲩϩⲱⲃ ⲛⲧⲁϥⲧⲁϩⲟ ⲛⲧⲟⲥ ⲇⲉ ⲡⲉϫⲁⲥ ϫⲉⲛⲁⲙⲉ ⲁⲛⲅ ⲟⲩⲥϩⲓⲙⲉ ⲁⲛⲟⲕ ⲛⲭⲏⲣⲁ ⲉⲁⲡⲁϩⲁⲓ ⲙⲟⲩ

6 ⲧⲉⲕϩⲙϩⲁⲗ ⲇⲉ ⲛⲉⲟⲩⲛⲧⲥ ϣⲏⲣⲉ ⲥⲛⲁⲩ ⲁⲩⲱ ⲁⲩⲧⲱⲟⲩⲛ ⲁⲩⲙⲓϣⲉ ⲙⲛⲛⲉⲩⲉⲣⲏⲩ ϩⲛⲧⲥⲱϣⲉ ⲛⲉⲙⲛⲡⲉⲧⲛⲁⲃⲱⲕ ⲇⲉ ⲟⲩⲧⲱⲟⲩ ⲉⲧⲣⲉϥⲡⲟⲗϭⲟⲩ ⲁⲡⲟⲩⲁ ⲇⲉ ⲙⲙⲟⲟⲩ ⲛⲧⲟⲟⲧϥ ⲉϫⲙⲡⲉϥⲥⲟⲛ ⲁϥⲣⲁϩⲧϥ ⲁϥⲙⲟⲟⲩⲧϥ

7 ⲁⲧⲡⲁⲧⲣⲓⲁ ⲧⲏⲣⲥ ⲏ ⲛⲛⲟϭ ⲛⲧⲡⲟⲗⲓⲥ ⲁⲩⲧⲱⲟⲩⲛ ⲉϫⲛⲧⲉⲕϩⲙϩⲁⲗ ⲉⲩϫⲱ ⲙⲙⲟⲥ ⲛⲁⲥ ϫⲉⲁⲩⲉⲓⲥ ⲁⲩⲉⲡⲉⲛⲧⲁϥⲙⲉⲟⲩⲧ ⲡⲉϥⲥⲟⲛ ⲛⲧⲁⲣⲉⲛⲧⲁⲕⲟϥ ⲉⲡⲙⲁ ⲛⲧⲉⲯⲩⲭⲏ ⲙⲡⲏ ⲡⲁⲓ ⲛⲧⲁϥⲙⲟⲟⲩⲧϥ ⲛⲧⲉⲛϥⲓ ⲛⲧⲙⲏⲧⲉ ⲙⲡⲉⲧⲛⲕⲗⲏⲣⲟⲛⲟⲙⲟⲥ ⲛⲥⲉϫⲉⲛⲁ ⲛⲧⲁϫⲏⲃⲥ ⲏ ⲡⲁⲕⲉⲟⲩⲟⲉⲓⲛ ⲛⲧⲁϥⲥⲉⲉⲡⲉ ⲛⲁⲓ ϩⲱⲥⲧⲉ ⲉⲧⲙϣⲱϫⲡ ⲉⲡⲁϩⲟⲩ ⲙⲡⲣⲡⲙⲉⲉⲩⲉ ⲙⲡⲁϩⲁⲓ ⲛⲟⲩϣⲃⲃⲓⲱ ⲁⲩⲱ ⲟⲩⲣⲁⲛ ϩⲓϫⲙⲡϩⲟ ⲙⲡⲕⲁϩ

8 ⲡⲉϫⲉⲡⲣⲣⲟ ⲛⲁⲥ ϫⲉⲃⲱⲕ ϩⲛⲟⲩⲟⲩϫⲁⲓ ⲉⲡⲟⲩⲏⲓ ⲁⲩⲱ ⲁⲛⲟⲕ ϯⲛⲁⲟⲩⲉϩⲥⲁϩⲛⲉ ⲉⲧⲃⲏⲏⲧⲉ

9 ⲡⲉϫⲉⲧⲉⲥϩⲓⲙⲉ ⲧⲉ ⲉⲃⲟⲗ ϩⲛⲑⲉⲕⲟⲩⲉ ϫⲉⲡⲁϫⲟⲉⲓⲥ ⲡⲣⲣⲟ ⲉⲣⲉⲧⲁⲛⲟⲙⲓⲁ ϩⲓϫⲱⲓ ⲁⲩⲱ ⲉϫⲙⲡⲏⲓ ⲙⲡⲁⲉⲓⲱⲧ ⲡⲣⲣⲟ ⲇⲉ ⲁⲩⲱ ⲡⲉⲑⲣⲟⲛⲟⲥ ⲙⲡⲉⲕⲉⲟⲟⲩ ⲟⲩⲁⲁϥ

10 ⲡⲉϫⲉⲡⲣⲣⲟ ⲛⲁⲥ ϫⲉⲛⲓⲙ ⲡⲉⲧⲧⲟⲛϩ ⲛⲙⲙⲉ ⲁⲛⲓϥ ⲉⲣⲁⲧⲁⲩⲱ ⲛϥⲛⲁⲕⲧⲟϥ ϭⲉ ⲁⲛ ⲉⲧⲟⲛⲁϩϥ ⲙⲙⲟ

11 ⲡⲉϫⲉⲧⲉⲥϩⲓⲙⲉ ϩⲓⲧϩⲏ ⲙⲡⲣⲣⲟ ϫⲉⲙⲁⲣⲉⲡⲁϫⲟⲉⲓⲥ ⲡⲣⲣⲟ ⲣⲡⲙⲉⲉⲩⲉ ⲙⲡϫⲟⲉⲓⲥ ⲡⲉϥⲛⲟⲩⲧⲉ ⲉⲧⲁϣⲉ ⲡⲉⲧϫⲓ ⲉϩⲟⲩⲛ ⲉⲣⲟⲓ ⲕⲁⲧⲁⲡⲁⲥⲛⲟϥ ⲉⲧⲙⲧⲁⲕⲟϥ ⲛⲥⲉⲧⲙϥⲓ ⲙⲡⲁϣⲏⲣⲉ ⲛⲧⲙⲏⲧⲉ ⲡⲉϫⲉⲇⲁⲩⲉⲓⲇ ⲛⲁⲥ ϫⲉϥⲟⲛϩ ⲛϭⲓⲡϫⲟⲉⲓⲥ ϫⲉⲉϣⲱⲡⲉ ⲟⲩⲛⲟⲩⲃⲱ ⲛⲟⲩⲱⲧ ⲛⲧⲉⲧⲁⲡⲏ ⲙⲡⲟⲩϣⲏⲣⲉ ⲛⲁϩⲉ ⲉϫⲙⲡⲕⲁϩ

12 ⲡⲉϫⲉⲧⲉⲥϩⲓⲙⲉ ϩⲓⲧϩⲏ ⲙⲡⲣⲣⲟ ϫⲉⲁⲛⲟⲕ ⲧⲉⲕϩⲙϩⲁⲗ ⲙⲁⲣⲓϩⲉ ⲉⲧϩⲏ ⲛϣⲁϫⲉ ⲙⲛⲡⲁϫⲟⲉⲓⲥ ϩⲛⲟⲩϣⲁϫⲉ ⲡⲉϫⲉⲡⲣⲣⲟ ϫⲉϣⲁϫⲉ

13 ⲡⲉϫⲉⲧⲉⲥϩⲓⲙⲉ ϫⲉⲉⲧⲃⲉⲟⲩ ⲁⲕⲙⲉⲉⲩⲉ ⲛⲧⲉⲓⲙⲓⲛⲉ ⲉϫⲙⲡⲗⲁⲟⲥ ⲙⲡⲛⲟⲩⲧⲉ ⲏ ⲛⲧⲉⲡⲉⲓϣⲁϫⲉ ⲉⲓ ⲉⲃⲟⲗ ϩⲛⲣⲱϥ ⲙⲡⲣⲣⲟ ⲛⲧϩⲉ ⲛⲟⲩⲛⲟⲃⲉ ⲛⲧⲉⲧⲙⲡⲣⲣⲟ ⲕⲧⲟ ⲙⲡⲉⲧⲏⲡ ⲉⲣⲟϥ ⲉⲁⲩⲛⲟϫϥ ⲉⲃⲟⲗ

14 ϫⲉⲛⲧⲉⲓϩⲉ ϩⲛⲟⲩⲙⲟⲩ ⲧⲛⲛⲁⲙⲟⲩ ⲡⲉ ⲁⲩⲱ ⲛⲧϩⲉ ⲙⲡⲙⲟⲟⲩ ⲉϣⲁϥⲡⲱⲛ ⲉϫⲙⲡⲕⲁϩ ⲛⲥⲉⲛⲁϣⲟⲗϥ ⲁⲛ ⲉϩⲟⲩⲛ ⲧⲁⲓ ⲧⲉ ⲧϩⲉ ⲙⲡⲛⲟⲩⲧⲉ ⲛⲁϫⲓ ⲁⲛ ⲛⲧⲉⲯⲩⲭⲏ ⲙⲡⲉⲧⲙⲟⲕⲙⲉⲕ ⲉⲛⲟⲩϫⲉ ⲉⲃⲟⲗ ⲙⲙⲟϥ ⲙⲡⲉⲛⲧⲁϥⲣⲡⲉϥⲃⲟⲗ

15 ⲧⲉⲛⲟⲩ ϭⲉ ⲡϣⲁϫⲉ ⲛⲧⲁⲓⲉⲓ ⲉⲧⲃⲏⲏⲧϥ ⲉⲧⲁⲩⲟϥ ⲉⲡⲁϫⲟⲉⲓⲥ ⲡⲣⲣⲟ ⲡⲁⲓ ⲡⲉ ⲡⲗⲁⲟⲥ ϥⲛⲁⲛⲁⲩ ⲉⲣⲟⲓ ⲛϥϣⲁϫⲉ ⲧⲉⲕϩⲙϩⲁⲗ ⲇⲉ ⲉⲧⲉⲁⲛⲟⲕ ⲧⲉ ⲙⲁⲣⲉⲥϣⲁϫⲉ ⲙⲛⲡⲣⲣⲟ ϫⲉⲙⲉϣⲁⲕ ⲉⲣⲉⲡⲣⲣⲟ ⲉⲓⲣⲉ ⲙⲡϣⲁϫⲉ ⲛⲧⲉϥϩⲙϩⲁⲗ

16 ϫⲉⲡⲣⲣⲟ ⲉϥⲉⲥⲱⲧⲙ ⲛϥⲛⲟⲩϩⲙ ⲛⲧⲉϥϩⲙϩⲁⲗ ⲛⲧⲟⲟⲧϥ ⲙⲡⲣⲱⲙⲉ ⲉⲧⲕⲱⲧⲉ ⲛⲥⲁⲧϩⲏ ⲛϥⲓⲧⲧ ⲙⲙⲁⲩ ⲙⲛⲡⲁⲕⲉϣⲏⲣⲉ ⲉⲃⲟⲗ ϩⲛⲧⲉⲕⲗⲏⲣⲟⲛⲟⲙⲓⲁ ⲙⲡⲛⲟⲩⲧⲉ

17 ⲡⲉϫⲉⲧⲉⲥϩⲓⲙⲉ ⲟⲛ ϫⲉⲉⲣⲉⲡϣⲁϫⲉ ⲙⲡⲁϫⲟⲉⲓⲥ ⲡⲣⲣⲟ ϣⲱⲡⲉ ⲉⲩⲑⲩⲥⲓⲁ ϫⲉⲕⲁⲧⲁⲧϩⲉ ⲛⲟⲩⲁⲅⲅⲉⲗⲟⲥ ⲛⲧⲉⲡⲛⲟⲩⲧⲉ ⲧⲁⲓ ϩⲱⲱϥ ⲧⲉ ⲧϩⲉ ⲙⲡⲁϫⲟⲉⲓⲥ ⲡⲣⲣⲟ ⲉⲧⲣⲉϥⲥⲱⲧⲙ ⲉⲡⲁⲅⲁⲑⲟⲛ ⲁⲩⲱ ⲉⲡⲡⲟⲛⲏⲣⲟⲛ ⲁⲩⲱ ⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁϣⲱⲡⲉ ⲛⲙⲙⲁⲕ

18 ⲡⲣⲣⲟ ⲇⲉ ⲁϥⲟⲩⲱϣⲃ ⲡⲉϫⲁϥ ⲛⲧⲉⲥϩⲓⲙⲉ ϫⲉⲙⲡⲣϩⲉⲡⲡⲉⲓϣⲁϫⲉ ⲉⲣⲟⲓ ⲡⲁⲓ ⲉϯⲛⲁϫⲟⲟϥ ⲉⲣⲟⲁⲛⲟⲕ ⲡⲉϫⲉⲧⲉⲥϩⲓⲙⲉ ⲛⲁϥ ϫⲉⲙⲁⲣⲉⲡⲁϫⲟⲉⲓⲥ ⲡⲣⲣⲟ ϣⲁϫⲉ

19 ⲡⲉϫⲉⲡⲣⲣⲟ ⲛⲁⲥ ϫⲉⲙⲏ ⲧⲟⲟⲧϥ ⲛⲓⲓⲱⲁⲃ ⲥⲙⲟⲛⲧ ⲛⲙⲙⲉ ϩⲙⲡⲉⲓϣⲁϫⲉ ⲡⲉϫⲉⲧⲉⲥϩⲓⲙⲉ ϩⲓⲧϩⲏ ⲙⲡⲣⲣⲟ ϫⲉⲧⲉⲕⲯⲩⲭⲏ ⲟⲛϩ ⲡⲁϫⲟⲉⲓⲥ ⲡⲣⲣⲟ ⲉϣⲱⲡⲉ ⲟⲩⲛ ⲥⲁ ⲟⲩⲛⲁⲛ ⲏ ⲛⲥⲁϩⲃⲟⲩⲣ ⲉϥϣⲟⲃⲉ ⲉⲃⲟⲗ ϩⲛⲛⲉϣⲁϫⲉ ⲧⲏⲣⲟⲩ ⲛⲧⲁⲡⲁϫⲟⲉⲓⲥ ⲡⲣⲣⲟ ϫⲟⲟⲩ ϫⲉⲡⲉⲕϩⲙϩⲁⲗ ⲓⲱⲁⲃ ⲛⲧⲟϥ ⲡⲉⲛⲧⲁϥϩⲱⲛ ⲉⲧⲟⲟⲧⲁⲩⲱ ⲛⲧⲟϥ ⲡⲉ ⲛⲧⲁϥⲕⲱ ϩⲛⲧⲧⲁⲡⲣⲟ ⲛⲧⲉⲕϩⲙϩⲁⲗ ⲛⲛⲉⲓϣⲁϫⲉ ⲧⲏⲣⲟⲩ

20 ⲉⲧⲣⲉϥⲁϩⲉⲣⲁⲧϥ ⲛϭⲓⲡⲧⲱϣ ⲙⲡⲉⲓϣⲁϫⲉ ⲡⲁⲓ ⲛⲧⲁⲡⲉⲕϩⲙϩⲁⲗ ⲓⲱⲁⲃ ⲁⲁϥ ⲉⲧⲉⲡⲉⲓϣⲁϫⲉ ⲡⲉ ⲁⲩⲱ ⲡⲁϫⲟⲉⲓⲥ ⲡⲣⲣⲟ ⲟⲩⲥⲟⲫⲟⲥ ⲡⲉ ⲛⲧϩⲉ ⲛⲧⲥⲟⲫⲓⲁ ⲛⲟⲩⲁⲅⲅⲉⲗⲟⲥ ⲛⲧⲉⲡⲛⲟⲩⲧⲉ ⲉⲧⲣⲉϥⲥⲟⲩⲛϩⲱⲃ ⲛⲓⲙ ⲉⲧϣⲟⲟⲡ ϩⲙⲡⲕⲁϩ

21 ⲡⲉϫⲉⲡⲣⲣⲟ ⲉϩⲟⲩⲛ ϩⲛⲓⲱⲁⲃ ϫⲉⲉⲓⲥϩⲏⲏⲧⲉ ⲁⲓⲉⲓⲣⲉ ⲙⲡⲉⲕϣⲁϫⲉ ⲉⲧⲉⲡⲁⲓ ⲡⲉ ⲃⲱⲕ ⲛⲅⲕⲧⲟ ⲙⲡϣⲏⲣⲉ ϣⲏⲙ ⲉⲧⲉⲁⲃⲏⲥⲁⲗⲱⲙ ⲡⲉ

22 ⲁⲩⲱ ⲓⲱⲁⲃ ⲁϥⲡⲁϩⲧϥ ϩⲓⲧϩⲏ ⲙⲙⲟϥ ⲉϫⲙⲡⲕⲁϩ ⲁϥⲟⲩⲱϣⲧ ⲁⲩⲱ ⲁϥⲥⲙⲟⲩ ⲉⲡⲣⲣⲟ ⲡⲉϫⲉⲓⲱⲁⲃ ϩⲓⲧϩⲏ ⲙⲙⲟϥ ϫⲉⲙⲡϩⲟⲟⲩ ⲁⲡⲉⲕϩⲙϩⲁⲗ ⲉⲓⲙⲉ ϫⲉⲁⲓϭⲉⲛⲭⲁⲣⲓⲥ ⲛⲁϩⲣⲁⲕ ⲡⲁϫⲟⲉⲓⲥ ⲡⲣⲣⲟ ϫⲉⲡⲁϫⲟⲉⲓⲥ ⲡⲣⲣⲟ ⲁϥⲉⲓⲣⲉ ⲙⲡϣⲁϫⲉ ⲙⲡⲉϥϩⲙϩⲁⲗ

23 ⲓⲱⲁⲃ ⲇⲉ ⲁϥⲧⲱⲟⲩⲛ ⲁϥⲃⲱⲕ ⲉϩⲣⲁⲓ ⲉⲅⲉⲇⲥⲟⲩⲣ ⲁϥⲉⲓⲛⲉ ⲛⲁⲃⲏⲥⲁⲗⲱⲙ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ

24 ⲡⲣⲣⲟ ⲇⲉ ⲡⲉϫⲁϥ ⲛⲓⲱⲁⲃ ϫⲉⲙⲁⲣⲉϥⲃⲱⲕ ⲉϩⲣⲁⲓ ⲉⲡⲉϥⲏⲓ ⲛϥⲧⲉⲙⲉⲓ ⲉϩⲟⲩⲛ ⲉϩⲣⲁⲓ ⲁⲃⲏⲥⲁⲗⲱⲙ ⲇⲉ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ ⲁⲩⲱ ⲡϩⲟ ⲙⲡⲣⲣⲟ ⲙⲡⲉϥⲉⲓⲟⲣϩϥ

25 ⲁⲩⲱ ⲛⲛⲛ ϭⲉ ⲣⲱⲙⲉ ϩⲙⲡⲓⲥⲣⲁⲏⲗ ⲧⲏⲣϥ ⲛⲧϩⲉ ⲛⲁⲃⲏⲥⲁⲗⲱⲙ ⲉⲛⲉⲥⲱϥ ⲏ ⲉϥⲧⲏϣ ⲉⲙⲁⲧⲉ ϫⲓⲛⲛⲉⲉⲓⲃ ⲛⲣⲁⲧϥ ϣⲁⲉϩⲣⲁⲓ ⲉⲧⲉϥⲁⲡⲉ ⲉⲙⲛⲗⲁⲁⲩ ⲛϫⲃⲓⲛ ϩⲓⲱⲱϥ

26 ⲁⲩⲱ ⲟⲛ ⲛⲉ ϩⲙⲡⲧⲣⲉϥϣⲉϥⲡⲉϥⲃⲱ ⲁⲩⲱ ⲟⲛ ⲛϫⲓⲛ ⲡⲧⲱϣ ⲛϩⲏ ⲛⲛⲉϩⲟⲟⲩ ⲉⲛⲉϩⲟⲟⲩ ⲉϥϣⲁⲛⲧⲱϣ ⲉϣⲉϥⲡⲉϥⲃⲱ ϩⲙⲡⲧⲣⲉϥϣⲓⲁⲓ ϩⲓϫⲱϥ ⲁⲩⲱ ⲡⲃⲱ ⲛⲧⲉϥⲁⲡⲉ ⲉϥϣⲁⲛϣⲟϥϥ ϣⲁϥϣⲓⲧϥ ⲛϥⲣϣⲏⲧ ⲛⲥⲁⲧⲉⲉⲣⲉ ⲛϩⲣⲏϣⲉ ϩⲛⲧⲥⲁⲧⲉⲉⲣⲉ ⲙⲡⲣⲣⲟ

27 ⲁⲩⲱ ⲁⲃⲏⲥⲁⲗⲱⲙ ⲁϥϫⲡⲉϣⲟⲙⲛⲧ ⲛϣⲏⲣⲉ ⲛⲁϥ ⲙⲛⲟⲩϣⲉⲉⲣⲉ ⲉⲡⲉⲥⲣⲁⲛ ⲡⲉ ⲑⲏⲙⲁⲣ ⲧⲁⲓ ⲇⲉ ⲉⲛⲉⲟⲩⲥϩⲓⲙⲉ ⲧⲉ ⲉⲛⲉⲥⲉ ⲡⲉⲥϩⲣⲃ ⲉⲙⲁⲧⲉ ⲁⲩⲱ ⲁⲥⲣⲥϩⲓⲙⲉ ⲛϩⲣⲟⲃⲟⲁⲙ ⲡϣⲏⲣⲉ ⲛⲥⲟⲗⲟⲙⲟⲛ ⲁⲥϫⲡⲟ ⲛⲁϥ ⲛⲁⲃⲓⲁⲑⲁⲣ

28 ⲁⲃⲏⲥⲁⲗⲱⲙ ⲇⲉ ⲁϥϩⲙⲟⲟⲥ ϩⲛⲧϩⲓⲉⲣⲟⲩⲥⲁⲗⲏⲙ ⲛⲣⲟⲙⲡⲉ ⲥⲛⲧⲉ ⲛϩⲟⲟⲩ ⲙⲡⲉϥⲛⲁⲩ ⲉⲡϩⲟ ⲙⲡⲣⲣⲟ

29 ⲁⲃⲏⲥⲁⲗⲱⲙ ⲇⲉ ⲁϥⲙⲟⲩⲧⲉ ⲉⲓⲱⲁⲃ ⲉⲧⲣⲉϥϫⲟⲟⲩϥ ⲉⲣⲁⲧϥ ⲙⲡⲣⲣⲟ ⲁⲩⲱ ⲙⲡⲉϥⲟⲩⲱϣ ⲉⲉⲓ ⲉⲣⲁⲧϥ ⲁϥϫⲟⲟⲩ ⲟⲛ ⲙⲡⲙⲉϩⲥⲉⲡ ⲥⲛⲁⲩ ⲁⲩⲱ ⲙⲡⲉϥⲟⲩⲱϣ ⲉⲉⲓ ⲛⲁϥ

30 ⲡⲉϫⲉⲁⲃⲏⲥⲁⲗⲱⲙ ⲛⲛⲉϥϩⲙϩⲁⲗ ϫⲉⲉⲓⲥⲧⲙⲉⲣⲓⲥ ⲏ ⲡⲉϫⲛⲟⲟⲩ ϩⲛⲧⲥⲱϣⲉ ⲛⲓⲱⲁⲃ ⲉϥϩⲏⲛ ⲉⲣⲟⲓ ⲉⲣⲉϩⲉⲛⲉⲓⲱⲧ ϣⲟⲟⲡ ⲛⲁϥ ⲛϩⲏⲧϥ ⲃⲱⲕ ⲛⲧⲉⲧⲛⲣⲟⲕϩϥ ϩⲛⲟⲩⲥⲁⲧⲉ ⲁⲩⲱ ⲛϩⲙϩⲁⲗ ⲛⲁⲃⲏⲥⲁⲗⲱⲙ ⲁⲩⲣⲱⲕϩ ⲛⲧⲙⲉⲣⲓⲥ ⲛⲉⲓⲱⲧ ϩⲛⲟⲩⲥⲁⲧⲉ ⲛϩⲙϩⲁⲗ ⲇⲉ ⲛⲓⲱⲁⲃ ⲁⲩⲃⲱⲕ ⲉⲣⲁⲧϥ ⲛⲓⲱⲁⲃ ⲉⲣⲉⲛⲉⲩϩⲟⲉⲓⲧⲉ ⲡⲏϩ ϩⲓⲱⲟⲩ ⲡⲉϫⲁⲩ ⲙⲡⲉⲩϫⲟⲉⲓⲥ ϫⲉⲛϩⲙϩⲁⲗ ⲛⲁⲃⲏⲥⲁⲗⲱⲙ ⲁⲩϯ ⲙⲡⲕⲱϩⲧ ⲛⲧⲙⲉⲣⲓⲥ ⲛⲉⲓⲱⲧ

31 ⲓⲱⲁⲃ ⲇⲉ ⲁϥⲧⲱⲟⲩⲛ ⲁϥⲃⲱⲕ ⲉⲣⲁⲧϥ ⲛⲁⲃⲏⲥⲁⲗⲱⲙ ⲉⲡⲉϥⲏⲓ ⲡⲉϫⲁϥ ⲛⲁϥ ϫⲉⲉⲧⲃⲉⲟⲩ ⲛⲉⲕϩⲙϩⲁⲗ ⲁⲩϯⲡⲕⲱϩⲧ ⲉⲧⲁⲙⲉⲣⲓⲥ ⲁⲩⲣⲟⲕϩⲥ

32 ⲡⲉϫⲉⲁⲃⲏⲥⲁⲗⲱⲙ ⲛⲓⲱⲁⲃ ϫⲉⲁⲓⲧⲛⲛⲟⲟⲩ ⲛⲁⲕ ⲛⲟⲩⲥⲟⲡ ⲁⲩⲱ ⲥⲛⲁⲩ ⲉⲓϫⲱ ⲙⲙⲟⲥ ϫⲉⲁⲙⲟⲩ ϣⲁⲣⲟⲓ ϫⲉⲉⲓⲉϫⲟⲟⲩⲕ ⲉⲣⲁⲧϥ ⲙⲡⲣⲣⲟ ⲛⲅϫⲟⲟⲥ ⲛⲁϥ ϫⲉⲉⲧⲃⲉⲟⲩ ⲁⲓⲉⲓ ⲉⲃⲟⲗ ϩⲛⲅⲉⲇⲥⲟⲩⲣ ⲛⲉ ⲟⲩⲁⲅⲁⲑⲟⲛ ⲛⲁⲓ ⲡⲉ ⲉⲧⲣⲁϭⲱ ⲙⲙⲁⲩ ⲡⲉ ⲁⲩⲱ ⲉⲓⲥ ϩⲏⲏⲧⲉ ϣⲁⲧⲉⲛⲟⲩ ⲙⲡⲓⲛⲁⲩ ⲉⲡϩⲟ ⲙⲡⲣⲣⲟ ⲉϣϫⲉ ⲟⲩⲛⲁⲇⲓⲕⲓⲁ ⲇⲉ ⲛϩⲏⲧϥ ⲉⲓⲉ ⲙⲟⲟⲩⲧ

33 ⲓⲱⲁⲃ ⲇⲉ ⲁϥϯ ⲙⲡⲉϥⲟⲩⲟⲓ ⲉϩⲟⲩⲛ ⲉⲡⲣⲣⲟ ⲁϥⲧⲁⲩⲟ ⲉⲣⲟϥ ⲛⲛⲉⲓϣⲁϫⲉ ⲁⲩⲱ ⲁϥⲙⲟⲩⲧⲉ ⲉⲁⲃⲏⲥⲁⲗⲱⲙ ⲁϥⲃⲱⲕ ⲉϩⲟⲩⲛ ϣⲁⲡⲣⲣⲟ ⲁϥⲡⲁϩⲧϥ ⲉϫⲙⲡⲕⲁϩ ϩⲓⲧϩⲏ ⲙⲡⲣⲣⲟ ⲁϥⲟⲩⲱϣⲧ ⲛⲁϥ ⲁⲩⲱ ⲡⲣⲣⲟ ⲁϥϯⲡⲓ ⲉⲣⲱϥ ⲛⲁⲃⲏⲥⲁⲗⲱⲙ