2 Samuel 13 — Coptic (Sahidic)

1 ⲙⲛⲛⲥⲁⲛⲁⲓ ⲇⲉ ⲁⲃⲉⲥⲁⲗⲱⲙ ⲡϣⲏⲣⲉ ⲛⲇⲁⲩⲉⲓⲇ ⲁⲩⲥⲱⲛⲉ ϣⲱⲡⲉ ⲛⲁϥ ⲉⲛⲉⲥⲉ ϩⲣⲁⲥ ⲉⲙⲁⲧⲉ ⲉⲡⲉⲥⲣⲁⲛ ⲡⲉ ⲑⲁⲙⲁⲣ ⲁⲩⲱ ⲁⲙⲛⲱⲛ ⲡϣⲏⲣⲉ ⲛⲇⲁⲩⲉⲓⲇ ⲁϥⲙⲉⲣⲓⲧⲥ

2 ⲁⲙⲛⲱⲛ ⲇⲉ ⲛⲉϥⲑⲗⲓⲃⲉ ⲉⲙⲁⲧⲉ ϩⲱⲥⲧⲉ ⲉⲧⲣⲉϥϣⲧⲟ ⲉⲡϣⲱⲛⲉ ⲉⲧⲃⲉⲑⲁⲙⲁⲣ ⲧⲉϥⲥⲱⲛⲉ ϫⲉⲛⲉⲟⲩⲡⲁⲣⲑⲉⲛⲟⲥ ⲧⲉ ⲉⲥⲥⲟⲃⲕ ⲁⲩⲱ ⲛⲉⲣⲉⲡϩⲱⲃ ⲙⲟⲕϩ ⲛⲁϩⲣⲁϥ ⲛⲁⲙⲙⲱⲛ ⲉⲧⲣⲉϥⲣⲟⲩϩⲱⲃ ⲛⲁⲥ ⲛⲧⲉⲓⲙⲓⲛⲉ

3 ⲁⲙⲛⲱⲛ ⲇⲉ ⲛⲉⲟⲩⲛⲛⲧⲁϥ ⲙⲙⲁⲩ ⲛⲟⲩϣⲃⲏⲣ ⲉⲡⲉϥⲣⲁⲛ ⲡⲉ ⲓⲱⲛⲁⲇⲁⲃ ⲡϣⲏⲣⲉ ⲛⲥⲁⲗⲉⲙⲗⲁ ⲡⲥⲟⲛ ⲛⲇⲁⲩⲉⲓⲇ ⲁⲩⲱ ⲓⲱⲛⲁⲇⲁⲃ ⲛⲉ ⲟⲩⲣⲱⲙⲉ ⲡⲉ ⲛⲥⲟⲫⲟⲥ ⲉⲙⲁⲧⲉ

4 ⲡⲉϫⲁϥ ⲛⲁϥ ϫⲉⲟⲩ ⲡⲉ ⲡϩⲱⲃ ⲉⲧⲛⲙⲙⲁⲕ ϫⲉⲉⲕⲟⲩⲉⲧⲟⲩⲱⲧ ϩⲓⲛⲁⲓ ⲉⲕϣⲱⲛⲉ ⲡϣⲏⲣⲉ ⲙⲡⲣⲣⲟ ⲧⲉⲛⲟⲩ ⲉⲓⲥ ϩⲏⲏⲧⲉ ⲛⲅⲛⲁⲧⲁⲙⲟⲓ ⲁⲛ ⲡⲉϫⲉⲁⲙⲛⲱⲛ ⲛⲁϥ ϫⲉⲑⲁⲙⲁⲣ ⲧⲥⲱⲛⲉ ⲛⲁⲃⲏⲥⲁⲗⲱⲙ ⲡⲁⲥⲟⲛ ⲁⲛⲟⲕ ϯⲙⲉ ⲙⲙⲟⲥ ⲁⲩⲱ ⲙⲡⲓϭⲉⲛ ⲉⲓⲛⲁⲣⲟⲩ

5 ⲡⲉϫⲉⲓⲱⲛⲁⲇⲁⲃ ⲛⲁϥ ϫⲉⲛⲟϫⲕ ϩⲓϫⲛⲡⲉⲕⲙⲁ ⲛⲛⲕⲟⲧⲕ ⲛⲅⲟⲡⲥ ϫⲉⲉⲕϣⲱⲛⲉ ⲁⲩⲱ ⲡⲉⲕⲉⲓⲱⲧ ϥⲛⲁⲉⲓ ⲉϩⲟⲩⲛ ϣⲁⲣⲟⲕ ⲉϭⲉⲙⲡⲉⲕⲟⲩⲱ ⲛⲅϫⲟⲟⲥ ⲛⲁϥ ϫⲉⲙⲁⲣⲉⲑⲁⲙⲁⲣ ⲧⲁⲥⲱⲛⲉ ⲉⲓ ⲛⲥⲧⲙⲟⲓ ⲛⲧⲟⲥ ⲛⲥⲧⲁⲙⲓⲟ ϩⲁϩⲧⲏⲓ ⲛⲕⲟⲗⲗⲩⲣⲓⲟⲛ ⲥⲛⲧⲉ ⲏ ⲡⲉⲧⲓⲛⲁⲟⲩⲟⲙϥ ϫⲉⲉⲓⲉⲛⲁⲩ ⲉⲣⲟⲥ ⲛⲧⲁⲟⲩⲱⲙ ⲉⲃⲟⲗ ϩⲛⲛⲉⲥϭⲓϫ

6 ⲁⲩⲱ ⲁⲙⲛⲱⲛ ⲁϥⲉⲛⲕⲟⲧⲕ ⲁϥⲧⲁⲁϥ ⲉⲡϣⲱⲛⲉ ⲡⲣⲣⲟ ⲁϥⲃⲱⲕ ⲉϩⲟⲩⲛ ϣⲁⲣⲟϥ ⲁϥϭⲉⲙⲡⲉϥⲟⲩⲱ ⲁⲩⲱ ⲁⲙⲛⲱⲛ ⲡⲉϫⲁϥ ⲙⲡⲉϥⲉⲓⲱⲧ ϫⲉⲙⲁⲣⲉⲑⲁⲙⲁⲣ ⲧⲁⲥⲱⲛⲉ ⲉⲓ ⲛⲥⲧⲁⲙⲓⲉⲕⲟⲗⲗⲩⲣⲓⲟⲛ ⲥⲛⲧⲉ ϩⲁϩⲧⲏⲓ ⲛⲧⲁⲟⲩⲱⲙ ϩⲛⲛⲉⲥϭⲓϫ

7 ⲁⲩⲱ ⲇⲁⲩⲉⲓⲇ ⲁϥϫⲟⲟⲩ ⲛⲑⲁⲙⲁⲣ ⲉϩⲣⲁⲓ ⲉⲡⲉϥⲏⲓ ⲉϥϫⲱ ⲙⲙⲟⲥ ⲛⲁⲥ ϫⲉⲃⲱⲕ ⲉϩⲣⲁⲓ ⲉⲡⲏⲓ ⲛⲁⲙⲛⲱⲛ ⲡⲟⲩⲥⲟⲛ ⲛⲧⲉⲧⲁⲙⲓⲟ ⲛⲁϥ ⲙⲡⲉⲧⲉϥⲛⲁⲟⲩⲟⲙϥ

8 ⲁⲩⲱ ⲑⲁⲙⲁⲣ ⲁⲥⲃⲱⲕ ⲉϩⲣⲁⲓ ⲉⲡⲏⲓ ⲛⲁⲙⲙⲱⲛ ⲡⲉⲥⲥⲟⲛ ⲛⲧⲟϥ ⲇⲉ ⲛⲉϥⲛⲕⲟⲧⲕ ⲡⲉ ⲁⲥϫⲓ ⲇⲉ ⲙⲡϣⲱⲧⲉ ⲁⲥⲟⲩⲟϣⲙⲉϥ ⲁⲥⲧⲁⲙⲓⲟ ⲛⲛⲉⲕⲟⲗⲗⲩⲣⲓⲟⲛ ϩⲁϩⲧⲏϥ ⲁⲩⲱ ⲁⲥⲡⲁⲥⲧⲟⲩ

9 ⲁⲥϫⲓ ⲇⲉ ⲛⲧⲗⲁⲕⲛⲧ ⲁⲥⲟⲩⲁⲧⲃⲉⲥ ⲙⲡⲉϥϩⲁⲁⲧⲉ ⲉⲃⲟⲗ ⲙⲡⲉϥⲟⲩⲱϣ ⲇⲉ ⲉⲟⲩⲱⲙ ⲡⲉϫⲉⲁⲙⲛⲱⲛ ϫⲉⲛⲉϫⲣⲱⲙⲉ ⲛⲓⲙ ⲉⲃⲟⲗ ϩⲓϫⲱⲓ ⲁⲩⲱ ⲛⲣⲱⲙⲉ ⲧⲏⲣⲟⲩ ⲁⲩⲗⲟ ⲙⲙⲁⲩ ϩⲁⲧⲏϥ

10 ⲡⲉϫⲁϥ ⲇⲉ ⲛⲑⲁⲙⲁⲣ ϫⲉⲡⲉⲧⲓⲛⲁⲟⲩⲟⲙϥ ϫⲓⲧϥ ⲉϩⲟⲩⲛ ⲉⲡⲧⲁⲙⲉⲓⲟⲛ ϫⲉⲉⲓⲉⲟⲩⲟⲙϥ ⲛⲧⲟⲟⲧⲉ ⲁⲩⲱ ⲑⲁⲙⲁⲣ ⲁⲥϫⲓ ⲛⲛⲉⲕⲟⲗⲗⲩⲣⲓⲟⲛ ⲉϩⲟⲩⲛ ⲉⲡⲧⲁⲙⲉⲓⲟⲛ ⲛⲁⲙⲛⲱⲛ ⲡⲉⲥⲥⲟⲛ

11 ⲁⲥⲉⲛⲧⲟⲩ ϩⲁⲣⲱϥ ⲉⲧⲣⲉϥⲟⲩⲱⲙ ⲁϥⲥⲟⲕⲥ ⲇⲉ ⲉⲣⲟϥ ⲉϥϫⲱ ⲙⲙⲟⲥ ⲛⲁⲥ ϫⲉⲁⲙⲏ ⲛⲧⲉⲛⲕⲟⲧⲕ ϩⲁϩⲧⲏⲓ ⲧⲁⲥⲱⲛⲉ

12 ⲡⲉϫⲁⲥ ⲛⲁϥ ϫⲉⲙⲡⲱⲣ ⲡⲁⲥⲟⲛ ⲙⲡⲉⲣⲑⲃⲃⲓⲟⲓ ϫⲉⲙⲉⲩⲣⲧⲉⲓϩⲉ ϩⲛⲡⲓⲥⲣⲁⲏⲗ ⲙⲡⲣⲉⲓⲣⲉ ⲛⲧⲉⲓⲙⲛⲧⲥⲟϭ

13 ⲁⲩⲱ ⲁⲛⲟⲕ ϩⲱ ⲉⲓⲛⲁϩⲉ ⲉⲡⲁⲛⲟϭⲛⲉϭ ⲧⲱⲛ ⲛⲧⲟⲕ ⲇⲉ ϩⲱⲱⲕ ⲛⲅⲣⲧϩⲉ ⲛⲟⲩⲁ ⲛⲛⲉⲓⲁⲧϩⲏⲧ ϩⲙⲡⲓⲥⲣⲁⲏⲗ ⲧⲉⲛⲟⲩ ϭⲉ ϣⲁϫⲉ ⲙⲛⲡⲣⲣⲟ ⲉⲕⲥⲟⲟⲩⲛ ϫⲉⲛϥⲛⲁϥⲓⲧⲧ ⲁⲛ ⲛⲧⲟⲟⲧⲕ

14 ⲁⲩⲱ ⲙⲡⲉⲁⲙⲛⲱⲛ ⲣϩⲛⲁϥ ⲉⲥⲱⲧⲙ ⲛⲥⲁⲡⲉⲥϩⲣⲟⲟⲩ ⲁⲗⲗⲁ ⲁϥϭⲙϭⲟⲙ ⲉϩⲣⲁⲓ ⲉϫⲱⲥ ⲁϥⲛⲕⲟⲧⲕ ⲛⲙⲙⲁⲥ ⲁϥⲑⲃⲃⲓⲟⲥ

15 ⲁⲩⲱ ⲁⲁⲙⲛⲱⲛ ⲙⲉⲥⲧⲱⲥ ϩⲛⲟⲩⲛⲟϭ ⲙⲙⲟⲥⲧⲉ ⲉⲙⲁⲧⲉ ϫⲉⲛⲁϣⲉ ⲡⲙⲟⲥⲧⲉ ⲛⲧⲁϥⲙⲉⲥⲧⲱⲥ ⲛϩⲏⲧϥ ⲉⲛⲁϣⲉ ⲧⲕⲁⲕⲓⲁ ⲛϩⲁⲉ ⲉϩⲟⲩⲉ ⲉⲡⲙⲁ ⲛⲧⲁϥⲟⲩⲁϣⲥ ⲛϩⲏⲧϥ ⲁⲩⲱ ⲡⲉϫⲉⲁⲙⲛⲱⲛ ⲉϩⲟⲩⲛ ⲉϩⲣⲁⲥ ϫⲉⲧⲱⲟⲩⲛ ⲛⲧⲉⲃⲱⲕ ⲉⲡⲟⲩⲏⲓ

16 ⲡⲉϫⲉⲑⲁⲙⲁⲣ ⲛⲁϥ ϫⲉⲡⲉⲓⲛⲟϭ ⲛⲥϯ ⲛⲃⲱⲱⲛ ⲁⲕⲁⲁϥ ⲛⲁⲓ ⲉⲁⲕⲉⲓⲣⲉ ⲛⲁⲓ ⲉϩⲟⲩⲉ ⲉⲟⲩⲁⲧⲣⲟⲩϩⲉ ⲁⲩⲱ ⲕϫⲱ ⲙⲙⲟⲥ ⲛⲁⲓ ϫⲉⲧⲱⲟⲩⲛ ⲛⲧⲉⲃⲱⲕ ⲉⲡⲟⲩⲏⲓ ⲁⲙⲛⲱⲛ ⲇⲉ ⲙⲡⲉϥⲟⲩⲱϣ ⲉⲥⲱⲧⲙ ⲛⲥⲱⲥ

17 ⲁⲗⲗⲁ ⲁϥⲙⲟⲩⲧⲉ ⲉⲡⲉϥϩⲙϩⲁⲗ ⲡⲉⲧϩⲓϫⲛⲡⲉϥⲏⲓ ⲡⲉϫⲁϥ ⲛⲁϥ ϫⲉϥⲓ ⲧⲁⲓ ⲛⲅⲛⲟϫⲥ ⲉⲃⲟⲗ ϩⲁⲧⲏⲓ ⲉⲡϩⲓⲣ ⲛⲅϣⲧⲁⲙ ⲙⲡⲣⲟ ⲉⲣⲱⲥ

18 ⲛⲉⲣⲉⲟⲩϣⲧⲏⲛ ⲇⲉ ϩⲓⲱⲱⲥ ⲉⲥⲟ ⲛⲙⲟⲩⲛⲅ ⲛϣⲛⲥ ϫⲉⲧⲁⲓ ⲧⲉ ⲧϩⲉ ⲉϣⲁⲩϯ ϩⲓⲱⲟⲩ ⲛϭⲓⲙⲡⲁⲣⲑⲉⲛⲟⲥ ⲛϣⲉⲉⲣⲉ ⲙⲡⲣⲣⲟ ⲛⲛⲉⲩϩⲟⲉⲓⲧⲉ ⲉⲧϩⲓⲃⲟⲗ ⲁⲩⲱ ⲡⲉϥϩⲙϩⲁⲗ ⲁϥⲥⲟⲕⲥ ⲁϥϥⲓⲧⲥ ϩⲁϩⲧⲏϥ ⲁϥϣⲉⲧⲙⲡⲣⲟ ⲉⲣⲱⲥ

19 ⲑⲁⲙⲁⲣ ⲇⲉ ⲁⲥϫⲓ ⲛⲟⲩⲕⲣⲙⲉⲥ ⲁⲥⲛⲟϫϥ ⲉϫⲛⲧⲉⲥⲁⲡⲉ ⲁⲩⲱ ⲧⲉϣⲧⲏⲛ ⲉⲧⲟ ⲛⲓⲉⲡⲥⲁ ⲉⲧϩⲓⲱⲱⲥ ⲁⲥϯⲧⲟⲟⲧⲥ ⲙⲙⲟⲥ ⲁⲥⲡⲁϩⲥ ⲁⲩⲱ ⲁⲥⲕⲁ ⲛⲉⲥϭⲓϫ ⲉϫⲛⲧⲉⲥⲁⲡⲉ ⲁⲥⲙⲟⲟϣⲉ ⲉⲥϫⲓϣⲕⲁⲕ ⲉⲃⲟⲗ

20 ⲁⲩⲱ ⲁⲃⲉⲥⲥⲁⲗⲱⲙ ⲡⲉⲥⲥⲟⲛ ⲡⲉϫⲁϥ ⲛⲁⲥ ϫⲉⲙⲏ ⲁⲙⲛⲱⲛ ⲡⲟⲩⲥⲟⲛ ⲡⲉ ⲛⲧⲁϥϣⲱⲡⲉ ⲛⲙⲙⲉ ⲧⲉⲛⲟⲩ ⲇⲉ ⲕⲁⲣⲱ ⲧⲁⲥⲱⲛⲉ ⲡⲟⲩⲥⲟⲛ ⲡⲉ ⲙⲡⲣⲕⲁⲡⲉⲓϣⲁϫⲉ ϩⲙⲡⲟⲩϩⲏⲧ ⲉⲕⲟⲧⲉ ⲉϫⲟⲟϥ ⲁⲩⲱ ⲑⲁⲙⲁⲣ ⲁⲥϩⲙⲟⲟⲥ ⲉⲥⲟ ⲛⲭⲏⲣⲁ ⲉⲥⲟ ⲛϩⲱⲣⲁ ϩⲙⲡⲏⲓ ⲛⲁⲃⲏⲥⲁⲗⲱⲙ ⲡⲉⲥⲥⲟⲛ

21 ⲡⲣⲣⲟ ⲇⲉ ⲇⲁⲩⲉⲓⲇ ⲁϥⲥⲱⲧⲙ ⲉⲛⲉⲓϣⲁϫⲉ ⲧⲏⲣⲟⲩ ⲁϥϭⲱⲛⲧ ⲉⲙⲁⲧⲉ ⲙⲡⲉϥⲗⲩⲡⲉⲓ ⲙⲡⲉⲡⲛⲉⲩⲙⲁ ⲛⲁⲙⲛⲱⲛ ⲡⲉϥϣⲏⲣⲉ ⲛⲉϥⲙⲉ ⲅⲁⲣ ⲙⲙⲟϥ ϫⲉⲡⲉϥϣⲣⲡⲙⲓⲥⲉ ⲡⲉ

22 ⲁⲩⲱ ⲁⲃⲏⲥⲁⲗⲱⲙ ⲙⲡⲉϥϣⲁϫⲉ ⲙⲛⲁⲙⲛⲱⲛ ⲟⲩⲇⲉ ϩⲛⲟⲩⲡⲉⲧϩⲟⲟⲩ ⲟⲩⲇⲉ ϩⲛⲟⲩⲡⲉⲧⲛⲁⲛⲟⲩϥ ⲁⲩⲱ ⲛⲉⲣⲉⲁⲃⲏⲥⲁⲗⲱⲙ ⲙⲟⲥⲧⲉ ⲛⲁⲙⲛⲱⲛ ⲉⲧⲃⲉⲡϣⲁϫⲉ ⲛⲧⲁϥⲑⲃⲃⲓⲟ ⲛⲑⲁⲙⲁⲣ ⲧⲉϥⲥⲱⲛⲉ ⲛϩⲏⲧϥ

23 ⲁⲣⲟⲙⲡⲉ ⲇⲉ ⲥⲛⲧⲉ ⲛϩⲟⲟⲩ ϣⲱⲡⲉ ⲁⲩⲱ ⲛⲉⲩϩⲱⲱⲕⲉ ⲡⲉ ⲛⲛⲉⲥⲟⲟⲩ ⲛⲁⲃⲏⲥⲁⲗⲱⲙ ϩⲛⲃⲏⲗⲁⲥⲱⲣ ⲧⲉⲧⲛϩⲛⲉϩⲟⲩⲛ ⲉⲉⲫⲣⲁⲓⲙ ⲁⲩⲱ ⲁⲃⲉⲥⲁⲗⲱⲙ ⲁϥⲧⲱϩⲙ ⲛⲛⲉϣⲏⲣⲉ ⲧⲏⲣⲟⲩ ⲙⲡⲣⲣⲟ

24 ⲁⲃⲏⲥⲁⲗⲱⲙ ⲇⲉ ⲁϥⲉⲓ ⲉⲣⲁⲧϥ ⲙⲡⲣⲣⲟ ⲉϥϫⲱ ⲙⲙⲟⲥ ⲛⲁϥ ϫⲉⲉⲓⲥϩⲏⲏⲧⲉ ⲥⲉϩⲱⲱⲕⲉ ⲛⲛⲉⲥⲟⲟⲩ ⲙⲡⲉⲕϩⲙϩⲁⲗ ⲙⲁⲣⲉⲡⲣⲣⲟ ϭⲉ ⲧⲱⲟⲩⲛ ⲛϥⲉⲓ ⲉⲡϩⲟⲟⲡ ⲙⲛⲛⲉϥϣⲏⲣⲉ ⲙⲡⲉⲕϩⲙϩⲁⲗ

25 ⲡⲣⲣⲟ ⲇⲉ ⲡⲉϫⲁϥ ⲛⲁⲃⲏⲥⲁⲗⲱⲙ ϫⲉⲙⲡⲱⲣ ⲡⲁϣⲏⲣⲉ ⲙⲡⲣⲧⲣⲉⲛⲧⲱⲟⲩⲛ ⲧⲏⲣⲛ ⲛⲧⲛⲉⲓ ⲛⲙⲙⲁⲕ ⲛⲧⲉⲛⲟⲩⲉϩⲃⲁⲣⲟⲥ ⲉⲣⲟⲕ ⲁⲃⲉⲥⲁⲗⲱⲙ ⲇⲉ ⲁϥⲁⲛⲁⲅⲕⲁⲍⲉ ⲙⲙⲟϥ ⲙⲡⲉⲡⲣⲣⲟ ⲟⲩⲱϣ ⲉⲃⲱⲕ ⲁⲗⲗⲁ ⲁϥⲥⲙⲟⲩ ⲉⲣⲟϥ

26 ⲡⲉϫⲉⲁⲃⲏⲥⲁⲗⲱⲙ ⲛⲁϥ ϫⲉⲉϣϫⲉ ⲛⲅⲛⲁⲟⲡⲧ ⲁⲛ ⲉⲉⲓ ⲙⲁⲣⲉⲁⲙⲛⲱⲛ ⲡⲁⲥⲟⲛ ⲉⲓ ⲛⲙⲙⲁⲓ ⲡⲉϫⲉⲡⲣⲣⲟ ⲛⲁϥ ϫⲉⲉⲧⲃⲉⲟⲩ ⲉⲣⲉⲁⲙⲛⲱⲛ ⲉⲓ ⲛⲙⲙⲁⲕ

27 ⲁⲃⲏⲥⲁⲗⲱⲙ ⲇⲉ ⲁϥⲁⲛⲁⲅⲕⲁⲍⲉ ⲙⲙⲟϥ ⲁϥϫⲟⲟⲩ ⲛⲙⲙⲁϥ ⲛⲁⲙⲛⲱⲛ ⲁⲩⲱ ⲛϣⲏⲣⲉ ⲧⲏⲣⲟⲩ ⲙⲡⲣⲣⲟ ⲁⲃⲏⲥⲁⲗⲱⲙ ⲇⲉ ⲁϥⲉⲓⲣⲉ ⲛⲟⲩϩⲟⲟⲡ ⲛⲣⲣⲟ

28 ⲁⲩⲱ ⲁⲃⲏⲥⲁⲗⲱⲙ ⲁϥϩⲱⲛ ⲉⲧⲟⲟⲧⲟⲩ ⲛⲛⲉϥϩⲙϩⲁⲗ ⲉϥϫⲱ ⲙⲙⲟⲥ ⲛⲁⲩ ϫⲉϯϩⲧⲏⲧⲛ ⲉⲣϣⲁⲛⲡϩⲏⲧ ⲛⲁⲙⲛⲱⲛ ⲟⲩⲣⲟⲧ ⲉⲣⲟϥ ϩⲁⲡⲏⲣⲡ ⲁⲩⲱ ⲛⲧⲁϫⲟⲟⲥ ⲛⲏⲧⲛ ϫⲉⲡⲁⲧⲁⲥⲥⲉⲓ ⲙⲙⲟϥ ⲛⲧⲉⲧⲛⲙⲟⲟⲩⲧϥ ⲙⲡⲣⲣϩⲟⲧⲉ ⲛϩⲏⲧϥ ⲉⲃⲟⲗ ϫⲉⲁⲛⲟⲕ ⲡⲉⲧϩⲱⲛ ⲛⲧⲉⲧⲧⲏⲩⲧⲛ ⲧⲱⲕ ⲙⲙⲱⲧⲛ ⲛⲧⲉⲧⲛϣⲱⲡⲉ ⲛϩⲉⲛⲣⲱⲙⲉ ⲛϫⲱⲱⲣⲉ

29 ⲁⲩⲱ ⲛϩⲙϩⲁⲗ ⲛⲁⲃⲏⲥⲁⲗⲱⲙ ⲁⲩⲉⲓⲣⲉ ⲛⲁⲙⲛⲱⲛ ⲕⲁⲧⲁⲧϩⲉ ⲛⲧⲁⲁⲃⲏⲥⲁⲗⲱⲙ ϩⲱⲛ ⲉⲧⲟⲟⲧⲟⲩ ⲁⲩⲧⲱⲟⲩⲛ ⲇⲉ ⲧⲏⲣⲟⲩ ⲛϭⲓⲛϣⲏⲣⲉ ⲙⲡⲣⲣⲟ ⲁⲡⲟⲩⲁ ⲡⲟⲩⲁ ⲁⲗⲉ ⲉⲡⲉϥⲙⲁⲥ ⲡⲟⲣⲕ ⲁⲩϫⲱⲣⲙ ⲁⲩⲡⲱⲧ

30 ⲁⲥϣⲱⲡⲉ ⲇⲉ ⲉⲩⲡⲏⲧ ϩⲛⲧⲉϩⲓⲏ ⲡⲥⲟⲉⲓⲧ ⲁϥⲧⲁϩⲉⲡⲣⲣⲟ ⲉⲩϫⲱ ⲙⲙⲟⲥ ⲛⲁϥ ϫⲉⲁⲃⲏⲥⲁⲗⲱⲙ ⲁϥⲡⲁⲧⲁⲥⲥⲉⲓ ⲛⲛⲉϣⲏⲣⲉ ⲧⲏⲣⲟⲩ ⲙⲡⲣⲣⲟ ⲁⲩⲱ ⲙⲡⲉⲗⲁⲁⲩ ⲛϩⲏⲧⲟⲩ ⲟⲩϫⲁⲓ

31 ⲡⲣⲣⲟ ⲇⲉ ⲁϥⲧⲱⲟⲩⲛ ⲁϥϯⲧⲟⲟⲧϥ ⲉⲛⲉϥϩⲟⲉⲓⲧⲉ ⲁϥⲡⲁϩⲟⲩ ⲁⲩⲱ ⲁϥⲛⲟϫϥ ⲉϫⲙⲡⲕⲁϩ ⲁϥⲛⲕⲟⲧⲕ ⲛⲉϥⲕⲉϩⲙϩⲁⲗ ⲇⲉ ⲧⲏⲣⲟⲩ ⲉⲧⲁϩⲉⲣⲁⲧⲟⲩ ⲙⲡⲉϥⲃⲟⲗ ⲁⲩϯⲧⲟⲟⲧⲟⲩ ⲉⲛⲉⲩϩⲟⲉⲓⲧⲉ ⲁⲩⲡⲁϩⲟⲩ

32 ⲁϥⲟⲩⲱϣⲃ ⲇⲉ ⲛϭⲓⲓⲱⲛⲁⲇⲁⲃ ⲡϣⲏⲣⲉ ⲛⲥⲁⲙⲁⲁ ⲡⲥⲟⲛ ⲛⲇⲁⲩⲉⲓⲇ ⲉϥϫⲱ ⲙⲙⲟⲥ ⲙⲡⲣⲣⲟ ϫⲉⲙⲡⲣⲧⲣⲉⲡⲁϫⲟⲉⲓⲥ ϫⲟⲟⲥ ϫⲉⲛϩⲙϩⲁⲗ ⲧⲏⲣⲟⲩ ⲉⲧⲉⲛϣⲏⲣⲉ ⲛⲉ ⲙⲡⲣⲣⲟ ⲁⲁⲃⲏⲥⲁⲗⲱⲙ ⲙⲟⲟⲩⲧⲟⲩ ⲁⲗⲗⲁ ⲁⲙⲛⲱⲛ ⲙⲁⲩⲁⲁϥ ⲡⲉⲛⲧⲁϥⲙⲟⲩ ⲉⲃⲟⲗ ϫⲉⲛⲉϥϩⲓⲧⲧⲁⲡⲣⲟ ⲛⲁⲃⲉⲥⲁⲗⲱⲙ ⲛϫⲓⲛ ⲡⲉϩⲟⲟⲩ ⲛⲧⲁϥⲑⲃⲃⲓⲟ ⲛⲑⲁⲙⲁⲣ ⲧⲉϥⲥⲱⲛⲉ ⲉⲣⲡⲉⲓϩⲱⲃ ⲛⲁϥ

33 ⲧⲉⲛⲟⲩ ϭⲉ ⲙⲡⲣⲧⲣⲉⲡⲁϫⲟⲉⲓⲥ ⲡⲣⲣⲟ ⲕⲁⲡⲉⲓϩⲱⲃ ϩⲙⲡⲉϥϩⲏⲧ ⲉϥϫⲱ ⲙⲙⲟⲥ ϫⲉⲛϣⲏⲣⲉ ⲙⲡⲣⲣⲟ ⲁⲩⲙⲟⲩ ⲁⲗⲗⲁ ⲁⲙⲛⲱⲛ ⲙⲁⲩⲁⲁϥ ⲡⲉⲛⲧⲁϥⲙⲟⲩ

34 ⲁⲩⲱ ⲁϥⲡⲱⲧ ⲛϭⲓⲁⲃⲏⲥⲁⲗⲱⲙ ⲡϩⲙϩⲁⲗ ⲇⲉ ⲉⲧⲉⲡⲣⲉϥⲛⲟⲩⲱ ⲡⲉ ⲙⲡⲣⲣⲟ ⲁϥϥⲉⲓⲁⲧϥ ⲉϩⲣⲁⲓ ⲁϥⲛⲁⲩ ⲁⲩⲱ ⲉⲓⲥ ⲟⲩⲛⲟϭ ⲙⲙⲏⲏϣⲉ ⲛⲉϥⲙⲟⲟϣⲉ ϩⲛⲧⲉϩⲓⲏ ⲉⲣⲁⲧϥ ⲛⲥⲁⲥⲡⲓⲣ ⲙⲡⲧⲟⲟⲩ ⲙⲡⲙⲁ ⲛⲉⲓⲉϩⲣⲁⲓ ⲛⲉⲥⲕⲟⲡⲟⲥ ⲇⲉ ⲁϥⲧⲁⲙⲉⲡⲣⲣⲟ ⲉϥϫⲱ ⲙⲙⲟⲥ ⲛⲁϥ ϫⲉⲉⲓⲥⲛⲣⲱⲙⲉ ⲁⲓⲛⲁⲩ ⲉⲣⲟⲟⲩ ⲛⲧⲉϩⲓⲏ ⲛⲟⲣⲱⲛⲏ ⲛⲥⲁⲥⲡⲓⲣ ⲙⲡⲧⲟⲟⲩ

35 ⲡⲉϫⲉⲓⲱⲛⲁⲇⲁⲃ ⲙⲡⲣⲣⲟ ϫⲉⲉⲓⲥⲛϣⲏⲣⲉ ⲙⲡⲣⲣⲟ ⲁⲩⲉⲓ ⲕⲁⲧⲁⲡϣⲁϫⲉ ⲙⲡⲉⲕϩⲙϩⲁⲗ ⲧⲁⲓ ⲧⲉ ⲧϩⲉ ⲛⲧⲁⲥϣⲱⲡⲉ

36 ⲛⲧⲉⲣⲉϥⲟⲩⲱ ⲇⲉ ⲉϥϣⲁϫⲉ ⲉⲓⲥ ⲛϣⲏⲣⲉ ⲙⲡⲣⲣⲟ ⲁⲩⲉⲓ ⲁⲩⲱ ⲁⲩϥⲓϩⲣⲁⲩ ⲉⲃⲟⲗ ⲁⲩⲣⲓⲙⲉ ⲡⲣⲣⲟ ⲇⲉ ϩⲱⲱϥ ⲁϥⲣⲓⲙⲉ ⲙⲛⲛⲉϥϩⲙϩⲁⲗ ϩⲛⲟⲩⲛⲟϭ ⲛⲣⲓⲙⲉ ⲉⲙⲁⲧⲉ

37 ⲁⲃⲏⲥⲁⲗⲱⲙ ⲇⲉ ⲁϥⲡⲱⲧ ⲁϥⲃⲱⲕ ⲉⲣⲁⲧϥ ⲛⲑⲟⲗⲙⲉⲗⲏⲙ ⲡϣⲏⲣⲉ ⲛⲉⲙⲓⲟⲩⲇ ⲡⲣⲣⲟ ⲛⲕⲉⲇⲥⲟⲩⲣ ⲉϩⲣⲁⲓ ⲉⲡⲕⲁϩ ⲙⲙⲁⲭⲁⲗⲙⲁ ⲁⲩⲱ ⲡⲣⲣⲟ ⲇⲁⲩⲉⲓⲇ ⲁϥⲣϩⲏⲃⲉ ⲙⲡⲉϥϣⲏⲣⲉ ⲛⲛⲉϩⲟⲟⲩ ⲧⲏⲣⲟⲩ

38 ⲁⲃⲏⲥⲁⲗⲱⲙ ⲇⲉ ⲁϥⲡⲱⲧ ⲁϥⲡⲱⲧ ⲉϩⲣⲁⲓ ⲉⲕⲉⲇⲥⲟⲩⲣ ⲁⲩⲱ ⲛⲉϥⲙⲙⲁⲩ ⲛϣⲟⲙⲧⲉ ⲛⲣⲟⲙⲡⲉ

39 ⲡⲣⲣⲟ ⲇⲉ ⲁϥϩⲣⲟⲕ ⲉⲧⲙⲉⲓ ⲉⲃⲟⲗ ⲉⲕⲱⲧⲉ ⲛⲥⲁⲁⲃⲏⲥⲁⲗⲱⲙ ⲉⲙⲟⲟⲩⲧϥ ⲉⲃⲟⲗ ϫⲉⲁⲩⲥⲉⲗⲥⲱⲗϥ ⲉϫⲛⲁⲙⲛⲱⲛ ϫⲉⲁϥⲙⲟⲩ