Read 2 Samuel 12 side by side with translations · The Final Bible
1 ⲡϫⲟⲉⲓⲥ ⲇⲉ ⲁϥϫⲟⲟⲩ ⲛⲁⲑⲁⲛ ⲡⲉⲡⲣⲟⲫⲏⲧⲏⲥ ⲉⲣⲁⲧϥ ⲛⲇⲁⲩⲉⲓⲇ ⲁⲩⲱ ⲁϥⲃⲱⲕ ⲉϩⲟⲩⲛ ⲛⲁϥ ⲡⲉϫⲁϥ ⲛⲁϥ ϫⲉⲉⲛⲉⲟⲩⲛⲣⲱⲙⲉ ⲥⲛⲁⲩ ϩⲛⲟⲩⲡⲟⲗⲓⲥ ⲟⲩⲁ ⲟⲩⲣⲙⲙⲁⲟ ⲡⲉ ⲁⲩⲱ ⲡⲕⲉⲟⲩⲁ ⲟⲩϩⲏⲕⲉ ⲡⲉ
2 ⲡⲣⲙⲙⲁⲟ ⲇⲉ ⲛⲉⲟⲩⲛⲛⲧⲁϥ ⲙⲙⲁⲩ ⲛϩⲉⲛⲟϩⲉ ⲛⲉⲥⲟⲟⲩ ⲙⲛϩⲉⲛⲉϩⲟⲟⲩ ⲉⲛⲁϣⲱⲟⲩ ⲉⲙⲁⲧⲉ
3 ⲡϩⲏⲕⲉ ⲇⲉ ϩⲱⲱϥ ⲛⲉⲙⲛⲧϥⲗⲁⲁⲩ ⲙⲙⲁⲩ ⲛⲥⲁⲟⲩϩⲓⲉⲓⲃ ⲛⲟⲩⲱⲧ ⲧⲁⲓ ⲛⲧⲁϥⲕⲁⲁⲥ ⲛⲁⲥ ⲁⲩⲱ ⲁϥϩⲁⲣⲉϩ ⲉⲣⲟⲥ ⲉϥⲥⲁⲁⲛϣ ⲙⲙⲟⲥ ⲁⲥϫⲁⲧⲉ ⲇⲉ ⲉⲥⲛⲙⲙⲁϥ ⲁⲩⲱ ⲛⲉⲥⲟⲩⲱⲙ ⲛⲙⲙⲁϥ ⲙⲛⲛⲉϥⲕⲉϣⲏⲣⲉ ⲉⲃⲟⲗ ϩⲙⲡⲉϥⲟⲉⲓⲕ ⲁⲩⲱ ⲛⲉⲥⲥⲱ ⲉⲃⲟⲗ ϩⲙⲡⲉϥⲁⲡⲟⲧ ⲁⲩⲱ ⲛⲉⲥⲛⲕⲟⲧⲕ ϩⲛⲕⲟⲩⲛϥ ⲉⲥⲟ ⲛⲁϥ ⲛⲧϩⲉ ⲛⲟⲩϣⲉⲉⲣⲉ
4 ⲟⲩⲣⲙⲛϭⲟⲉⲓⲗⲉ ⲇⲉ ⲁϥⲉⲓ ⲉⲣⲁⲧϥ ⲙⲡⲣⲙⲙⲁⲟ ⲁϥϭⲟⲉⲓⲗⲉ ⲉⲣⲟϥ ⲁϥϯⲥⲟ ⲉϫⲓ ⲉⲃⲟⲗ ϩⲛⲛⲉϥⲧⲃⲛⲟⲟⲩⲉ ⲛⲉⲥⲟⲟⲩ ⲁⲩⲱ ⲉⲃⲟⲗ ϩⲛⲛⲉϥⲉϩⲟⲟⲩ ⲉϣⲱⲱⲧ ⲙⲡⲣⲙⲛϭⲟⲉⲓⲗⲉ ⲛⲧⲁϥⲉⲓ ⲛⲁϥ ⲁϥϥⲓ ⲛⲧⲉϩⲓⲉⲓⲃ ⲇⲉ ⲙⲡⲣⲱⲙⲉ ⲛϩⲏⲕⲉ ⲁϥⲧⲁⲙⲓⲟⲥ ⲙⲡⲣⲱⲙⲉ ⲛⲧⲁϥⲉⲓ ⲛⲁϥ
5 ⲛⲧⲉⲩⲛⲟⲩ ⲇⲉ ⲇⲁⲩⲉⲓⲇ ⲁϥϭⲱⲛⲧ ϩⲛⲟⲩⲛⲟϭ ⲛⲟⲣⲅⲏ ⲉⲡⲣⲱⲙⲉ ⲛⲧⲁϥⲣⲡⲁⲓ ⲡⲉϫⲉⲇⲁⲩⲉⲓⲇ ⲇⲉ ⲉϩⲟⲩⲛ ϩⲛⲛⲁⲑⲁⲛ ϫⲉϥⲟⲛϩ ⲛϭⲓⲡϫⲟⲉⲓⲥ ϫⲉⲡⲣⲱⲙⲉ ⲛⲧⲁϥⲉⲓⲣⲉ ⲙⲡⲁⲓ ϥⲙⲡϣⲁ ⲙⲡⲙⲟⲩ
6 ⲁⲩⲱ ⲧⲉϩⲓⲉⲓⲃ ⲛϥⲧⲁⲁⲥ ⲛⲥⲁϣϥ ⲛⲕⲱⲃ ⲉⲃⲟⲗ ϫⲉⲁϥⲉⲓⲣⲉ ⲙⲡⲉⲓϣⲁϫⲉ ⲙⲡⲉϥϯⲥⲟ ⲉⲡϩⲏⲕⲉ
7 ⲡⲉϫⲉⲛⲁⲑⲁⲛ ⲉϩⲟⲩⲛ ϩⲛⲇⲁⲩⲉⲓⲇ ϫⲉⲛⲧⲟⲕ ⲡⲉ ⲡⲣⲱⲙⲉ ⲛⲧⲁϥⲉⲓⲣⲉ ⲙⲡⲉⲓϩⲱⲃ ⲧⲉⲛⲟⲩ ϭⲉ ⲛⲁⲓ ⲛⲉⲧⲉϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϫⲉⲁⲛⲟⲕ ⲡⲉ ⲛⲧⲁⲓⲧⲁϩⲥⲕ ⲉⲧⲣⲉⲕⲣⲣⲣⲟ ⲉϫⲙⲡⲓⲥⲣⲁⲏⲗ ⲁⲩⲱ ⲁⲛⲟⲕ ⲡⲉⲧⲛⲟⲩϩⲙ ⲙⲙⲟⲕ ⲛⲧⲟⲟⲧϥ ⲛⲥⲁⲟⲩⲗ
8 ⲁⲩⲱ ⲁⲓϯ ⲛⲁⲕ ⲙⲡⲏⲓ ⲙⲡⲉⲕϫⲟⲉⲓⲥ ⲁⲩⲱ ⲛⲉϩⲓⲟⲙⲉ ⲙⲡⲉⲕϫⲟⲉⲓⲥ ⲁⲓⲧⲁⲁⲩ ⲉϩⲣⲁⲓ ⲉⲕⲟⲩⲟⲩⲛⲅ ⲁⲓϯ ⲛⲁⲕ ⲟⲛ ⲙⲡⲏⲓ ⲙⲡⲓⲥⲣⲁⲏⲗ ⲙⲛⲓⲟⲩⲇⲁ ⲁⲩⲱ ⲉϣⲱⲡⲉ ⲛⲁⲓ ⲥⲟⲃⲉⲕ ϯⲛⲁⲟⲩⲱϩ ⲉϫⲱⲟⲩ ⲛⲁⲕ ⲕⲁⲧⲁⲛⲁⲓ
9 ⲉⲧⲃⲉⲟⲩ ϭⲉ ⲁⲕⲥⲉϣϥⲡϣⲁϫⲉ ⲙⲡϫⲟⲉⲓⲥ ⲉⲧⲣⲉⲕⲉⲓⲣⲉ ⲙⲡⲡⲟⲛⲏⲣⲟⲛ ϩⲁⲛⲁⲃⲁⲗ ⲟⲩⲣⲓⲁⲥ ⲡⲉⲭⲉⲇⲇⲁⲓⲟⲥ ⲁⲕⲣⲁϩⲧϥ ⲛⲧⲥⲏϥⲉ ⲁⲩⲱ ⲧⲉϥⲥϩⲓⲙⲉ ⲁⲕϫⲓⲧⲥ ⲛⲁⲕ ⲛⲥϩⲓⲙⲉ ⲛⲧⲟϥ ϩⲱⲱϥ ⲁⲕⲙⲟⲟⲩⲧϥ ϩⲛⲧⲥⲏϥⲉ ⲛⲛϣⲏⲣⲉ ⲛⲁⲙⲙⲱⲛ
10 ⲧⲉⲛⲟⲩ ϭⲉ ⲛⲛⲉⲧⲥⲏϥⲉ ⲉⲣⲃⲟⲗ ⲙⲡⲉⲕⲏⲓ ⲛϣⲁ ⲉⲛⲉϩ ⲉⲃⲟⲗ ϫⲉⲁⲕⲥⲟϣⲧ ⲁⲩⲱ ⲁⲕϫⲓ ⲛⲧⲉⲥϩⲓⲙⲉ ⲛⲟⲩⲣⲓⲁⲥ ⲡⲉⲭⲉⲇⲇⲁⲓⲟⲥ ⲉⲧⲣⲉⲥϣⲱⲡⲉ ⲛⲁⲕ ⲛⲥϩⲓⲙⲉ
11 ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲧⲟⲩⲛⲉⲥ ϩⲉⲛⲕⲁⲕⲱⲛ ⲉϩⲣⲁⲓ ⲉϫⲱⲕ ϩⲙⲡⲉⲕⲏⲓ ⲛⲧⲁϫⲓ ⲛⲛⲉⲕϩⲓⲟⲙⲉ ϩⲁⲛⲉⲕⲃⲁⲗ ⲛⲧⲁⲧⲁⲁⲩ ⲙⲡⲉⲧϩⲓⲧⲟⲩⲱⲕ ⲛϥⲛⲕⲟⲧⲕ ⲙⲛⲛⲉⲕϩⲓⲟⲙⲉ ⲙⲡϩⲁⲧⲉ ⲉⲃⲟⲗ ⲙⲡⲉⲓⲣⲏ
12 ⲉⲃⲟⲗ ϫⲉⲛⲧⲟⲕ ⲛⲧⲁⲕⲉⲓⲣⲉ ⲙⲛⲛϩⲱⲡ ⲙⲡⲉⲓϩⲱⲃ ⲁⲛⲟⲕ ⲇⲉ ϯⲛⲁⲉⲓⲣⲉ ⲙⲡⲉⲓϣⲁϫⲉ ⲙⲡⲉⲙⲧⲟ ⲉⲃⲟⲗ ⲙⲡⲓⲥⲣⲁⲏⲗ ⲧⲏⲣϥ ⲁⲩⲱ ⲛⲁϩⲣⲁϥ ⲙⲡⲣⲏ
13 ⲡⲉϫⲉⲇⲁⲩⲉⲓⲇ ⲛⲛⲁⲑⲁⲛ ϫⲉⲁⲓⲣⲛⲟⲃⲉ ⲉⲡϫⲟⲉⲓⲥ ⲡⲉϫⲉⲛⲁⲑⲁⲛ ⲉϩⲟⲩⲛ ϩⲛⲇⲁⲩⲉⲓⲇ ϫⲉⲡϫⲟⲉⲓⲥ ⲁϥϥⲓ ⲙⲙⲁⲩ ⲙⲡⲉⲕⲛⲟⲃⲉ ⲛⲅⲛⲁⲙⲟⲩ ⲁⲛ
14 ⲡⲗⲏⲛ ϩⲛⲟⲩϭⲱⲛⲧ ⲁⲕϯⲛⲟⲩϭⲥ ⲙⲡϣⲁϫⲉ ⲙⲡϫⲟⲉⲓⲥ ϩⲛⲡⲉⲓϣⲁϫⲉ ⲁⲩⲱ ⲡⲕⲉϣⲏⲣⲉ ⲛⲧⲁⲩϫⲡⲟϥ ⲛⲁⲕ ϩⲛⲟⲩⲙⲟⲩ ⲉϥⲉⲙⲟⲩ
15 ⲛⲁⲑⲁⲛ ⲇⲉ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ ⲁⲩⲱ ⲡϫⲟⲉⲓⲥ ⲁϥⲡⲁⲧⲁⲥⲥⲉⲓ ⲙⲡϣⲏⲣⲉ ⲕⲟⲩⲓ ⲛⲧⲁⲧⲉⲥϩⲓⲙⲉ ⲛⲟⲩⲣⲓⲁⲥ ϫⲡⲟϥ ⲛⲇⲁⲩⲉⲓⲇ ⲁϥⲣⲱϩⲧ ⲉⲡϣⲱⲛⲉ
16 ⲇⲁⲩⲉⲓⲇ ⲇⲉ ⲁϥϣⲓⲛⲉ ⲛⲧⲟⲟⲧϥ ⲙⲡϫⲟⲉⲓⲥ ⲉⲧⲃⲉⲡϣⲏⲣⲉ ⲕⲟⲩⲓ ⲁⲩⲱ ⲇⲁⲩⲉⲓⲇ ⲁϥⲛⲏⲥⲧⲉⲩⲉ ⲛⲟⲩⲛⲏⲥⲧⲉⲓⲁ ⲁϥⲃⲱⲕ ⲉϩⲟⲩⲛ ⲁϥⲛⲕⲟⲧⲕ ϩⲓⲡⲉⲥⲏⲧ
17 ⲁⲩⲧⲱⲟⲩⲛ ⲇⲉ ⲛϭⲓⲛⲉⲡⲣⲉⲥⲃⲩⲧⲉⲣⲟⲥ ⲙⲡⲉϥⲏⲓ ⲁⲩⲁϩⲉⲣⲁⲧⲟⲩ ϩⲓϫⲱϥ ⲉⲧⲟⲩⲛⲟⲥϥ ⲉⲃⲟⲗ ϩⲙⲡⲕⲁϩ ⲁⲩⲱ ⲙⲡⲉϥⲣϩⲛⲁϥ ⲉⲧⲱⲟⲩⲛ ⲟⲩⲇⲉ ⲙⲡⲉϥⲟⲩⲉⲙⲟⲉⲓⲕ ⲛⲙⲙⲁⲩ
18 ⲁⲥϣⲱⲡⲉ ⲇⲉ ϩⲙⲡⲙⲉϩⲥⲁϣϥ ⲛϩⲟⲟⲩ ⲡϣⲏⲣⲉ ⲕⲟⲩⲓ ⲁϥⲙⲟⲩ ⲁⲩⲱ ⲛϩⲙϩⲁⲗ ⲛⲇⲁⲩⲉⲓⲇ ⲁⲩⲣϩⲟⲧⲉ ⲉⲧⲁⲙⲟϥ ϫⲉⲁⲡϣⲏⲣⲉ ⲕⲟⲩⲓ ⲙⲟⲩ ⲉⲁⲩϫⲟⲟⲥ ⲛⲛⲉⲩⲉⲣⲏⲩ ϫⲉⲉⲓⲥϩⲏⲏⲧⲉ ⲣⲱ ⲉⲣⲉⲡϣⲏⲣⲉ ⲕⲟⲩⲓ ⲟⲛϩ ⲁⲛϣⲁϫⲉ ⲛⲙⲙⲁϥ ⲁⲩⲱ ⲙⲡⲉϥⲥⲱⲧⲙ ⲉⲡⲉⲛϩⲣⲟⲟⲩ ⲧⲉⲛⲟⲩ ϭⲉ ⲉⲛⲛⲁϫⲟⲟⲥ ⲛⲁϥ ⲛⲁϣ ⲛϩⲉ ϫⲉⲁⲡϣⲏⲣⲉ ⲕⲟⲩⲓ ⲙⲟⲩ ⲛϥⲧⲱⲟⲩⲛ ϭⲉ ⲧⲉⲛⲟⲩ ⲛϥⲉⲓⲣⲉ ⲛⲁⲛ ⲛϩⲉⲛⲡⲉⲧϩⲟⲟⲩ
19 ⲁⲩⲱ ⲇⲁⲩⲉⲓⲇ ⲁϥⲛⲁⲩ ⲉⲛⲉϥϩⲙϩⲁⲗ ⲉⲩⲕⲁⲥⲕⲉⲥ ⲇⲁⲩⲉⲓⲇ ⲇⲉ ⲁϥⲛⲟⲉⲓ ϫⲉⲁⲡϣⲏⲣⲉ ⲕⲟⲩⲓ ⲙⲟⲩ ⲡⲉϫⲉⲇⲁⲩⲉⲓⲇ ⲛⲛⲉϥϩⲙϩⲁⲗ ϫⲉⲉⲛⲉⲁⲡϣⲏⲣⲉ ⲕⲟⲩⲓ ⲙⲟⲩ ⲡⲉϫⲁⲩ ϫⲉⲁϩⲉ ⲁϥⲙⲟⲩ
20 ⲇⲁⲩⲉⲓⲇ ⲇⲉ ⲁϥⲧⲱⲟⲩⲛ ⲉⲃⲟⲗ ϩⲙⲡⲕⲁϩ ⲁϥϫⲁⲕⲙⲉϥ ⲁⲩⲱ ⲁϥⲧⲁϩⲥϥ ⲁϥϯϩⲓⲱⲱϥ ⲛⲛⲉϥϩⲟⲉⲓⲧⲉ ⲁϥⲃⲱⲕ ⲉϩⲟⲩⲛ ⲉⲡⲏⲓ ⲙⲡϫⲟⲉⲓⲥ ⲁϥⲡⲁϩⲧϥ ⲁϥⲟⲩⲱϣⲧ ⲛⲁϥ ⲁⲩⲱ ⲁϥⲃⲱⲕ ⲉϩⲟⲩⲛ ⲉⲡⲉϥⲏⲓ ⲁϥⲟⲩⲉϩⲥⲁϩⲛⲉ ⲉⲛⲟⲉⲓⲕ ⲛⲁϥ ⲉⲟⲩⲱⲙ ⲁⲩⲕⲁⲟⲉⲓⲕ ϩⲁⲣⲱϥ ⲁϥⲟⲩⲱⲙ
21 ⲛⲉϥϩⲙϩⲁⲗ ⲇⲉ ⲡⲉϫⲁⲩ ⲛⲁϥ ϫⲉⲟⲩ ⲡⲉ ⲡⲧⲱϣ ⲙⲡⲉⲓϣⲁϫⲉ ⲛⲧⲁⲕⲁⲁϥ ⲉⲧⲃⲉⲟⲩ ⲡϣⲏⲣⲉ ⲕⲟⲩⲓ ⲉⲧⲓ ⲉϥⲟⲛϩ ⲛⲉⲕⲛⲏⲥⲧⲉⲩⲉ ⲉⲕⲣⲓⲙⲉ ⲉⲕⲟ ⲛⲟⲩϣⲏ ⲛⲣⲟⲉⲓⲥ ⲛⲧⲉⲣⲉⲡϣⲏⲣⲉ ⲇⲉ ⲕⲟⲩⲓ ⲙⲟⲩ ⲁⲕⲧⲱⲟⲩⲛ ϩⲓⲡⲉⲥⲏⲧ ⲁⲩⲱ ⲁⲕⲟⲩⲉⲙⲟⲉⲓⲕ ⲁⲕⲥⲱ
22 ⲡⲉϫⲉⲇⲁⲩⲉⲓⲇ ϫⲉⲉⲧⲓ ⲉⲣⲉⲡϣⲏⲣⲉ ⲕⲟⲩⲓ ⲟⲛϩ ⲁⲓⲛⲏⲥⲧⲉⲩⲉ ⲁⲩⲱ ⲁⲓⲣⲓⲙⲉ ⲉⲁⲓϫⲟⲟⲥ ϫⲉⲛⲓⲙ ⲡⲉⲧⲥⲟⲟⲩⲛ ϫⲉⲉⲛⲉⲡϫⲟⲉⲓⲥ ⲣⲁⲛⲁ ⲛⲁⲓ ⲛⲧⲉⲡϣⲏⲣⲉ ⲕⲟⲩⲓ ⲱⲛϩ
23 ⲧⲉⲛⲟⲩ ⲇⲉ ⲁⲡϣⲏⲣⲉ ⲕⲟⲩⲓ ⲙⲟⲩ ⲉⲧⲃⲉⲟⲩ ϭⲉ ⲁⲛⲟⲕ ϯⲛⲁⲛⲏⲥⲧⲉⲩⲉ ⲙⲏ ϯⲛⲁⲥⲧⲟϥ ⲉⲡⲉⲓⲥⲁ ⲛϫⲓⲛ ⲉⲡⲉⲓⲛⲁⲩ ⲁⲛⲟⲕ ⲉⲓⲛⲁⲃⲱⲕ ⲉⲣⲁⲧϥ ⲛⲧⲟϥ ⲇⲉ ⲛϥⲛⲁⲕⲧⲟϥ ⲁⲛ ⲉⲉⲓ ⲛⲁⲓ ⲛϫⲓⲛ ⲉⲡⲉⲓⲛⲁⲩ
24 ⲁⲩⲱ ⲇⲁⲩⲉⲓⲇ ⲁϥⲥⲗⲥⲗⲃⲉⲣⲥⲁⲃⲉⲉ ⲧⲉϥⲥϩⲓⲙⲉ ⲁⲩⲱ ⲁϥⲃⲱⲕ ⲉϩⲟⲩⲛ ϣⲁⲣⲟⲥ ⲁϥⲉⲛⲕⲟⲧⲕ ⲛⲙⲙⲁⲥ ⲁⲩⲱ ⲁⲥⲱ ⲁⲥϫⲡⲟ ⲛⲟⲩϣⲏⲣⲉ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉⲥⲟⲗⲟⲙⲱⲛ ⲡϫⲟⲉⲓⲥ ⲇⲉ ⲁϥⲙⲉⲣⲓⲧϥ
25 ⲁϥϫⲟⲟⲩ ⲉⲃⲟⲗ ϩⲓⲧⲟⲟⲧϥ ⲛⲁⲑⲁⲛ ⲡⲉⲡⲣⲟⲫⲏⲧⲏⲥ ⲁϥⲙⲟⲩⲧⲉ ⲉⲡⲉϥⲣⲁⲛ ϫⲉⲉⲓⲇⲉⲓⲇⲉⲓ ⲉⲧⲉⲡⲉϥⲟⲩⲱϩⲙ ⲡⲉ ϫⲉⲉⲧⲃⲉⲡϫⲟⲉⲓⲥ
26 ⲁⲩⲱ ⲓⲱⲁⲃ ⲁϥⲡⲟⲗⲉⲙⲉⲓ ⲙⲛϩⲣⲁⲃⲃⲁⲑ ⲛⲧⲉⲛϣⲏⲣⲉ ⲛⲁⲙⲙⲱⲛ ⲁϥϫⲓ ⲛⲧⲡⲟⲗⲓⲥ ⲛⲧⲙⲛⲧⲣⲣⲟ
27 ⲁⲩⲱ ⲓⲱⲁⲃ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧϥ ⲛⲇⲁⲩⲉⲓⲇ ⲉϥϫⲱ ⲙⲙⲟⲥ ϫⲉⲁⲓⲡⲟⲗⲉⲙⲉⲓ ⲙⲛϩⲣⲁⲃⲃⲁⲑ ⲁⲩⲱ ⲁⲓϫⲓ ⲛⲧⲡⲟⲗⲓⲥ ⲛⲛⲉⲙⲟⲩⲉⲓⲟⲟⲩⲉ
28 ⲧⲉⲛⲟⲩ ϭⲉ ⲥⲱⲟⲩϩ ⲉϩⲟⲩⲛ ⲙⲡϣⲱϫⲡ ⲙⲡⲗⲁⲟⲥ ⲛⲅⲉⲓ ⲛⲅϭⲱ ϩⲓⲣⲛ ⲧⲡⲟⲗⲓⲥ ⲛⲅϫⲓⲧⲥ ϫⲉⲛⲛⲁⲃⲱⲕ ⲁⲛⲟⲕ ⲛⲧⲁϫⲓ ⲛⲧⲡⲟⲗⲓⲥ ⲛⲥⲉϯ ⲙⲡⲁⲣⲁⲛ ⲉϫⲱⲥ ϫⲉⲁⲛⲟⲕ ⲁⲓϫⲓⲧⲥ
29 ⲁⲩⲱ ⲇⲁⲩⲉⲓⲇ ⲁϥⲥⲱⲟⲩϩ ⲉϩⲟⲩⲛ ⲙⲡⲗⲁⲟⲥ ⲧⲏⲣϥ ⲁϥⲃⲱⲕ ⲉϩⲣⲁⲃⲃⲁⲑ ⲁϥⲡⲟⲗⲉⲙⲉ ⲛⲙⲙⲁⲥ ⲁϥϫⲓⲧⲥ
30 ⲁⲩⲱ ⲁϥϫⲓ ⲙⲡⲉⲕⲗⲟⲙ ⲙⲙⲉⲗⲭⲱⲗ ⲡⲉⲩⲣⲣⲟ ⲉⲃⲟⲗ ϩⲓϫⲛⲧⲉϥⲁⲡⲉ ⲡⲉϥϣⲓ ⲇⲉ ⲛⲉϥⲛⲁⲣⲟⲩϭⲓⲛϭⲱⲣ ⲛⲛⲟⲩⲃ ϩⲛⲧⲉϥϩⲣⲏϣⲉ ⲉⲣⲉⲟⲩⲱⲛⲉ ⲙⲙⲉ ϩⲓⲱⲱϥ ⲁⲩⲱ ⲛⲉϥϩⲓϫⲛⲧⲁⲡⲉ ⲛⲇⲁⲩⲉⲓⲇ ⲁⲩⲱ ⲛⲉϣⲟⲗⲥ ⲛⲧⲡⲟⲗⲓⲥ ⲁϥⲉⲛⲧⲟⲩ ⲉⲃⲟⲗ ⲉⲛⲁϣⲱⲟⲩ ⲉⲙⲁⲧⲉ
31 ⲁⲩⲱ ⲡⲗⲁⲟⲥ ⲉⲧⲛϩⲏⲧⲥ ⲁϥⲉⲛⲧⲟⲩ ⲉⲃⲟⲗ ⲁϥⲟⲩⲟⲥⲧⲟⲩ ϩⲛⲧⲃⲁϣⲟⲩⲣ ⲁⲩⲱ ϩⲛⲛⲥⲉⲣϭⲁⲙⲟⲩⲗ ⲙⲡⲉⲛⲓⲡⲉ ⲉⲁϥⲡⲟⲙⲡⲉⲩⲉ ⲙⲙⲟⲟⲩ ⲉⲃⲟⲗ ϩⲓⲧⲙⲡⲙⲁ ⲧⲏⲣϥ ⲧⲁⲓ ⲧⲉ ⲧϩⲉ ⲛⲧⲁϥⲁⲁⲥ ⲛⲛⲉⲡⲟⲗⲓⲥ ⲧⲏⲣⲟⲩ ⲛⲛⲉϣⲏⲣⲉ ⲛⲁⲙⲙⲱⲛ ⲁⲩⲱ ⲇⲁⲩⲉⲓⲇ ⲁϥⲕⲧⲟϥ ⲙⲛⲡⲗⲁⲟⲥ ⲧⲏⲣϥ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ
2 Samuel 11 · 2 Samuel 13 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)