2 Samuel 11 — Coptic (Sahidic)

1 ⲁⲥϣⲱⲡⲉ ⲇⲉ ⲛⲧⲉⲣⲉⲧⲉⲣⲟⲙⲡⲉ ϫⲱⲕ ⲉⲃⲟⲗ ⲙⲡⲉⲥⲟⲩⲟⲉⲓϣ ⲙⲡⲉⲓⲉⲃⲟⲗ ⲛⲛⲣⲣⲱⲟⲩ ⲁϥϫⲟⲟⲩ ⲛϭⲓⲇⲁⲩⲉⲓⲇ ⲛⲓⲱⲁⲃ ⲁⲩⲱ ⲛⲉϥϩⲙϩⲁⲗ ⲉⲧⲛⲙⲙⲁϥ ⲙⲛⲡⲓⲥⲣⲁⲏⲗ ⲧⲏⲣϥ ⲁⲩⲧⲁⲕⲟ ⲛⲛⲉϣⲏⲣⲉ ⲛⲁⲙⲙⲱⲛ ⲁⲩⲱ ⲁⲩϭⲱ ϩⲓⲣⲛ ϩⲣⲁⲃⲁⲑ ⲇⲁⲩⲉⲓⲇ ⲇⲉ ⲛⲉϥϩⲙⲟⲟⲥ ϩⲛⲧϩⲓⲉⲣⲟⲩⲥⲁⲗⲏⲙ

2 ⲁⲥϣⲱⲡⲉ ⲇⲉ ⲙⲡⲛⲁⲩ ⲛⲣⲟⲩϩⲉ ⲇⲁⲩⲉⲓⲇ ⲁϥⲧⲱⲟⲩⲛ ⲉⲃⲟⲗ ϩⲓϫⲛⲡⲉϥⲙⲁ ⲛⲛⲕⲟⲧⲕ ⲁϥⲙⲟⲟϣⲉ ϩⲓⲧϫⲉⲛⲉⲡⲱⲣ ⲙⲡⲏⲓ ⲙⲡⲣⲣⲟ ⲁⲩⲱ ⲁϥⲛⲁⲩ ϩⲓⲧⲉϥϫⲉⲛⲉⲡⲱⲣ ⲉⲩⲥϩⲓⲙⲉ ⲉⲥϫⲱⲕⲙ ⲧⲉⲥϩⲓⲙⲉ ⲇⲉ ⲛⲉ ⲛⲉⲥⲉ ϩⲣⲁⲥ ⲉⲙⲁⲧⲉ

3 ⲁϥϫⲟⲟⲩ ⲇⲉ ⲛϭⲓⲡⲣⲣⲟ ⲁϥϣⲓⲛⲉ ⲛⲥⲁⲧⲉⲥϩⲓⲙⲉ ⲡⲉϫⲁϥ ϫⲉⲛⲧⲁⲓ ⲁⲛ ⲧⲉ ⲃⲉⲣⲥⲁⲃⲉⲉ ⲧϣⲉⲉⲣⲉ ⲛⲉⲗⲓⲁⲃ ⲧⲉⲥϩⲓⲙⲉ ⲛⲟⲩⲣⲓⲁⲥ ⲡⲉⲭⲉⲇⲇⲁⲓⲟⲥ

4 ⲁϥϫⲟⲟⲩ ⲇⲉ ⲛϭⲓⲇⲁⲩⲉⲓⲇ ⲁϥϫⲓⲧⲥ ⲁϥⲃⲱⲕ ⲉϩⲟⲩⲛ ϣⲁⲣⲟⲥ ⲁϥⲉⲛⲕⲟⲧⲕ ⲛⲙⲙⲁⲥ ⲛⲧⲟⲥ ⲇⲉ ⲛⲉⲁⲥⲉⲓⲁⲁⲥ ⲉⲃⲟⲗ ϩⲙⲡⲉⲥϫⲱϩⲙ ⲉⲧⲥⲛϩⲏⲧϥ ⲁⲩⲱ ⲁⲥⲕⲧⲟⲥ ⲉϩⲣⲁⲓ ⲉⲡⲉⲥⲏⲓ

5 ⲧⲉⲥϩⲓⲙⲉ ⲇⲉ ⲁⲥⲱ ⲁⲩⲱ ⲁⲥϫⲟⲟⲩ ⲁⲥⲧⲁⲙⲉⲇⲁⲇ ⲉⲥϫⲱ ⲙⲙⲟⲥ ϫⲉⲁⲛⲟⲕ ⲡⲉ ⲧⲉⲓⲥϩⲓⲙⲉ ⲉⲓⲥ ϩⲏⲏⲧⲉ ϯⲉⲉⲧ

6 ⲁⲩⲱ ⲇⲁⲩⲉⲓⲇ ⲁϥϫⲟⲟⲩ ⲉⲣⲁⲧϥ ⲛⲓⲱⲁⲃ ⲉϥϫⲱ ⲙⲙⲟⲥ ⲛⲁϥ ϫⲉⲧⲛⲛⲟⲟⲩ ⲛⲁⲓ ⲛⲟⲩⲣⲓⲁⲥ ⲡⲉⲭⲉⲇⲇⲉⲟⲥ ⲓⲱⲁⲃ ⲇⲉ ⲁϥϫⲟⲟⲩ ⲛⲟⲩⲣⲓⲁⲥ ⲉⲣⲁⲧϥ ⲛⲇⲁⲩⲉⲓⲇ

7 ⲁⲩⲱ ⲟⲩⲣⲓⲁⲥ ⲁϥⲃⲱⲕ ⲉϩⲟⲩⲛ ϣⲁⲇⲁⲩⲉⲓⲇ ⲇⲁⲩⲉⲓⲇ ⲇⲉ ⲁϥϫⲛⲟⲩϥ ⲉⲧⲃⲉⲧⲉⲓⲣⲏⲛⲏ ⲛⲓⲱⲁⲃ ⲁⲩⲱ ⲉⲧⲃⲉⲧⲉⲓⲣⲏⲛⲏ ⲙⲡⲗⲁⲟⲥ ⲁⲩⲱ ⲉⲧⲃⲉⲡⲧⲱϣ ⲙⲡⲡⲟⲗⲉⲙⲟⲥ

8 ⲡⲉϫⲉⲇⲁⲩⲉⲓⲇ ⲛⲟⲩⲣⲓⲁⲥ ϫⲉⲃⲱⲕ ⲉϩⲣⲁⲓ ⲉⲡⲉⲕⲏⲓ ⲛⲅⲉⲓⲁⲣⲁⲧⲕ ⲉⲃⲟⲗ ⲟⲩⲣⲓⲁⲥ ⲇⲉ ⲁϥⲉⲓ ⲉⲃⲟⲗ ϩⲙⲡⲏⲓ ⲙⲡⲣⲣⲟ ⲁⲩⲱ ⲁϥⲉⲓ ⲉⲃⲟⲗ ⲛⲥⲱϥ ⲛϭⲓⲡⲃⲁⲓⲟⲩⲱ ⲙⲡⲣⲣⲟ

9 ⲁⲟⲩⲣⲓⲁⲥ ⲛⲕⲟⲧⲕ ϩⲛⲑⲟⲉⲓⲧ ⲙⲡⲏⲓ ⲙⲡⲣⲣⲟ ⲙⲛⲛⲉϭⲁⲩⲟⲛ ⲧⲏⲣⲟⲩ ⲙⲡⲉϥϫⲟⲉⲓⲥ ⲉⲙⲡⲉϥⲃⲱⲕ ⲉϩⲣⲁⲓ ⲉⲡⲉϥⲏⲓ

10 ⲁⲩⲧⲁⲙⲉⲡⲣⲣⲟ ⲇⲉ ⲉⲩϫⲱ ⲙⲙⲟⲥ ϫⲉⲙⲡⲉⲟⲩⲣⲓⲁⲥ ⲃⲱⲕ ⲉϩⲣⲁⲓ ⲉⲡⲉϥⲏⲓ ⲁⲩⲱ ⲇⲁⲩⲉⲓⲇ ⲁϥⲙⲟⲩⲧⲉ ⲉⲟⲩⲣⲓⲁⲥ ⲉϥϫⲱ ⲙⲙⲟⲥ ⲛⲁϥ ϫⲉⲙⲏ ⲛⲧⲁⲕⲉⲓ ⲁⲛ ⲛⲧⲟⲕ ϩⲛⲧⲉϩⲓⲏ ⲉⲧⲃⲉⲟⲩ ϭⲉ ⲛⲧⲟⲕ ⲙⲡⲉⲕⲃⲱⲕ ⲉϩⲣⲁⲓ ⲉⲡⲉⲕⲏⲓ

11 ⲡⲉϫⲉⲟⲩⲣⲓⲁⲥ ⲛⲇⲁⲩⲉⲓⲇ ϫⲉⲧⲕⲓⲃⲱⲧⲟⲥ ⲁⲩⲱ ⲡⲓⲥⲣⲁⲏⲗ ⲙⲛⲓⲟⲩⲇⲁ ⲥⲉϣⲟⲟⲡ ϩⲛⲛⲉⲥⲕⲏⲛⲏ ⲁⲩⲱ ⲡⲁϫⲟⲉⲓⲥ ⲓⲱⲁⲃ ⲙⲛⲛⲉϩⲙϩⲁⲗ ⲙⲡⲁϫⲟⲉⲓⲥ ⲥⲉⲡⲟⲣϣ ⲉⲃⲟⲗ ϩⲓϩⲣⲁⲥ ⲛⲧⲥⲱϣⲉ ⲁⲛⲟⲕ ϩⲱ ⲛⲧⲁⲃⲱⲕ ⲉϩⲣⲁⲓ ⲉⲡⲁⲏⲓ ⲉⲧⲣⲁⲟⲩⲱⲙ ⲛⲧⲁⲥⲱ ⲛⲧⲁⲛⲕⲟⲧⲕ ⲙⲛⲧⲁⲥϩⲓⲙⲉ ⲛⲁϣ ⲛϩⲉ ϯⲛⲁⲣⲡⲁⲓ ⲥⲟⲛϩ ⲛϭⲓⲧⲉⲯⲩⲭⲏ ⲙⲡⲁϫⲟⲉⲓⲥ ⲉϣⲱⲡⲉ ⲉⲓⲛⲁⲣⲡⲉⲓϣⲁϫⲉ

12 ⲡⲉϫⲉⲇⲁⲩⲉⲓⲇ ⲛⲟⲩⲣⲓⲁⲥ ϫⲉϩⲙⲟⲟⲥ ⲛⲁⲕ ⲙⲡⲉⲓⲙⲁ ⲙⲡⲕⲉⲡⲟⲟⲩ ⲙⲛⲣⲁⲥⲧⲉ ⲁⲩⲱ ϯⲛⲁϫⲟⲟⲩⲕ ⲉⲣⲁⲧϥ ⲛⲓⲱⲁⲃ ⲟⲩⲣⲓⲁⲥ ⲇⲉ ⲁϥϩⲙⲟⲟⲥ ϩⲛⲧϩⲓⲉⲣⲟⲩⲥⲁⲗⲏⲙ ⲙⲡⲉϩⲟⲟⲩ ⲉⲧⲙⲙⲁⲩ ⲙⲛⲡⲉϥⲣⲁⲥⲧⲉ

13 ⲁⲩⲱ ⲇⲁⲩⲉⲓⲇ ⲁϥⲙⲟⲩⲧⲉ ⲉⲣⲟϥ ⲁϥⲟⲩⲱⲙ ⲙⲡⲉϥⲙⲧⲟ ⲉⲃⲟⲗ ⲁϥⲥⲱ ⲁϥⲧⲣⲉϥϯϩⲉ ⲁⲩⲱ ⲁϥⲉⲓ ⲉⲃⲟⲗ ⲙⲡⲛⲁⲩ ⲛⲣⲟⲩϩⲉ ⲉⲛⲕⲟⲧⲕ ϩⲓⲡⲉϥⲙⲁ ⲛⲛⲕⲟⲧⲕ ⲙⲛⲛⲉϩⲙϩⲁⲗ ⲙⲡⲉϥϫⲟⲉⲓⲥ ⲙⲡⲉϥⲃⲱⲕ ⲇⲉ ⲉϩⲣⲁⲓ ⲉⲡⲉϥⲏⲓ

14 ϩⲧⲟⲟⲩⲉ ⲇⲉ ⲛⲧⲉⲣⲉϥϣⲱⲡⲉ ⲇⲁⲩⲉⲓⲇ ⲁϥϫⲟⲟⲩ ⲛⲟⲩϫⲱⲱⲙⲉ ⲛⲓⲱⲁⲃ ⲁⲩⲱ ⲁϥϫⲟⲟⲩϥ ⲛⲁϥ ⲉⲃⲟⲗ ϩⲓⲧⲟⲟⲧϥ ⲛⲟⲩⲣⲓⲁⲥ

15 ⲁϥⲥϩⲁⲓ ⲇⲉ ⲉϩⲣⲁⲓ ⲉⲡϫⲱⲱⲙⲉ ⲉϥϫⲱ ⲙⲙⲟⲥ ϫⲉⲛⲉϫⲟⲩⲣⲓⲁⲥ ⲉϩⲟⲩⲛ ⲉⲡⲥⲁ ⲉⲧⲛⲁϣⲧ ⲙⲡⲡⲟⲗⲉⲙⲟⲥ ⲛⲧⲉⲧⲛⲉⲗⲧⲏⲩⲧⲛ ⲉⲃⲟⲗ ⲙⲙⲟϥ ⲛⲥⲉⲡⲗⲏⲅⲏ ⲙⲙⲟϥ ⲛϥⲙⲟⲩ

16 ⲁⲥϣⲱⲡⲉ ⲇⲉ ⲛⲧⲉⲣⲉⲓⲱⲁⲃ ϭⲱ ϩⲓⲣⲱⲥ ⲛⲧⲡⲟⲗⲓⲥ ⲁϥϯⲟⲩⲣⲓⲁⲥ ⲉⲡⲙⲁ ⲏ ⲡⲉⲥⲡⲓⲣ ⲉⲧⲉϥⲥⲟⲟⲩⲛ ⲙⲙⲟϥ ϫⲉⲟⲩⲛϩⲉⲛⲣⲱⲙⲉ ⲛϫⲱⲱⲣⲉ ⲛϩⲏⲧϥ

17 ⲁⲩⲱ ⲛⲣⲱⲙⲉ ⲛⲧⲡⲟⲗⲓⲥ ⲉⲧⲙⲙⲁⲩ ⲁⲩⲉⲓ ⲉⲃⲟⲗ ⲁⲩⲡⲟⲗⲉⲙⲉⲓ ⲙⲛⲓⲱⲁⲃ ⲁⲩϩⲉ ⲇⲉ ⲉⲃⲟⲗ ϩⲙⲡⲗⲁⲟⲥ ⲉⲃⲟⲗ ϩⲛⲛⲉϩⲙϩⲁⲗ ⲛⲇⲁⲩⲉⲓⲇ ⲁⲩⲙⲟⲩ ⲡⲕⲉⲟⲩⲣⲓⲁⲥ ⲡⲉⲭⲉⲇⲇⲁⲓⲟⲥ ⲁϥⲙⲟⲩ

18 ⲓⲱⲁⲃ ⲇⲉ ⲁϥⲥϩⲁⲓ ⲛⲇⲁⲩⲉⲓⲇ ⲛⲛⲉϣⲁϫⲉ ⲧⲏⲣⲟⲩ ⲙⲡⲡⲟⲗⲉⲙⲟⲥ

19 ⲁⲩⲱ ⲓⲱⲁⲃ ⲁϥϩⲱⲛ ⲉⲧⲟⲟⲧϥ ⲙⲡⲃⲁⲓϣⲓⲛⲉ ⲉϥϫⲱ ⲙⲙⲟⲥ ϫⲉⲉⲕϣⲁⲛⲟⲩⲱ ⲉⲕⲧⲁⲩⲟ ⲛⲛⲉϣⲁϫⲉ ⲧⲏⲣⲟⲩ ⲙⲡⲡⲟⲗⲉⲙⲟⲥ ⲉⲡⲣⲣⲟ

20 ⲁⲩⲱ ⲉⲣϣⲁⲛⲡϭⲱⲛⲧ ⲙⲡⲣⲣⲟ ⲙⲟⲩϩ ⲛϥϫⲟⲟⲥ ⲉϩⲟⲩⲛ ⲉϩⲣⲁⲕ ϫⲉⲉⲧⲃⲉⲟⲩ ⲁⲧⲉⲧⲛϩⲉⲛⲧⲧⲏⲩⲧⲛ ⲉϩⲟⲩⲛ ⲉⲧⲡⲟⲗⲓⲥ ⲉⲙⲓϣⲉ ⲛⲙⲙⲁⲥ ⲛⲧⲉⲧⲛⲥⲟⲟⲩⲛ ⲁⲛ ϫⲉⲥⲉⲛⲁⲛⲉϫⲥⲟⲧⲉ ⲉⲃⲟⲗ ϩⲓϫⲛⲡⲥⲟⲃⲧ

21 ⲛⲓⲙ ⲡⲉ ⲛⲧⲁϥⲡⲗⲏⲅⲏ ⲛⲁⲃⲓⲙⲉⲗⲉⲭ ⲡϣⲏⲣⲉ ⲛϩⲓⲉⲣⲟⲃⲱⲁⲗ ⲡϣⲏⲣⲉ ⲛⲛⲏⲣⲉⲓ ⲛⲟⲩⲥϩⲓⲙⲉ ⲁⲛ ⲧⲉ ⲛⲧⲁⲥⲛⲟⲩϫⲉ ⲉⲃⲟⲗ ⲉϫⲱϥ ⲛⲟⲩⲗⲁⲕⲙ ⲛⲱⲛⲉ ⲛⲥⲓⲕⲉ ⲉⲃⲟⲗ ϩⲓϫⲙⲡⲥⲟⲃⲧ ⲁⲩⲱ ⲁϥⲙⲟⲩ ϩⲛⲑⲏⲃⲁⲓⲥ ⲉⲧⲃⲉⲟⲩ ϭⲉ ⲛⲧⲱⲧⲛ ⲁⲧⲉⲧⲛϩⲉⲛⲧⲧⲏⲩⲧⲛ ⲉϩⲟⲩⲛ ⲉⲡⲥⲟⲃⲧ ⲉⲕⲉϫⲟⲟⲥ ⲛⲁϥ ⲛⲧⲉⲩⲛⲟⲩ ϫⲉⲡⲕⲉⲟⲩⲣⲓⲁⲥ ⲁϥⲙⲟⲩ

22 ⲡⲃⲁⲓϣⲓⲛⲉ ⲇⲉ ⲛⲓⲓⲱⲁⲃ ⲁϥⲡⲱⲧ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲁⲩⲱ ⲁϥⲧⲁⲩⲟ ⲉⲇⲁⲩⲉⲓⲇ ⲛⲛⲉϣⲁϫⲉ ⲧⲏⲣⲟⲩ ⲙⲡⲡⲟⲗⲉⲙⲟⲥ ⲛⲧⲁⲓⲱⲁⲃ ⲧⲁⲩⲟⲟⲩ ⲉⲣⲟϥ ⲉϫⲟⲟⲩ ⲁⲩⲱ ⲇⲁⲩⲉⲓⲇ ⲁϥϭⲱⲛⲧ ⲉⲓⲱⲁⲃ ⲡⲉϫⲁϥ ⲉϩⲟⲩⲛ ϩⲙⲡⲃⲁⲓϣⲓⲛⲉ ϫⲉⲉⲧⲃⲉⲟⲩ ⲣⲱ ⲁⲧⲉⲧⲛϩⲉⲛⲧⲧⲏⲩⲧⲛ ⲉϩⲟⲩⲛ ⲉⲧⲡⲟⲗⲓⲥ ⲉⲙⲓϣⲉ ⲛⲙⲙⲁⲥ ⲛⲧⲉⲧⲛⲥⲟⲟⲩⲛ ⲁⲛ ϫⲉⲥⲉⲛⲁⲡⲗⲏⲅⲏ ⲙⲙⲱⲧⲛ ⲉⲃⲟⲗ ϩⲓϫⲛⲡⲥⲟⲃⲧ ⲛⲓⲙ ⲡⲉ ⲛⲣⲱϩⲧ ⲛⲁⲃⲓⲙⲉⲗⲉⲭ ⲡϣⲏⲣⲉ ⲛϩⲓⲉⲣⲟⲃⲱⲁⲗ ⲛⲟⲩⲥϩⲓⲙⲉ ⲁⲛ ⲧⲉ ⲛⲧⲁⲥⲛⲟⲩϫⲉ ⲉⲃⲟⲗ ϩⲓϫⲱϥ ⲛⲟⲩϣⲧⲟ ⲛⲱⲛⲉ ⲛⲥⲓⲕⲉ ⲉⲃⲟⲗ ϩⲓϫⲛⲡⲥⲟⲃⲧ ⲁϥⲙⲟⲩ ⲉⲧⲃⲉⲟⲩ ϭⲉ ⲁⲧⲉⲧⲛϯⲧⲏⲩⲧⲛ ⲉⲧⲟⲩⲛ ⲡⲥⲟⲃⲧ

23 ⲡⲉϫⲉⲛⲃⲁⲓϣⲓⲛⲉ ⲛⲇⲁⲩⲉⲓⲇ ϫⲉⲛⲣⲱⲙⲉ ⲁⲩϩⲟⲕⲟⲩ ⲁⲩⲉⲓ ⲉⲃⲟⲗ ⲉⲣⲟⲛ ⲉⲧⲥⲱϣⲉ ⲁⲛⲟⲛ ϩⲱⲱⲛ ⲁⲛⲧⲁⲁⲛ ⲉϩⲟⲩⲛ ⲛⲥⲱⲟⲩ ⲁⲛⲡⲱⲧ ⲛⲥⲱⲟⲩ ϣⲁⲉϩⲟⲩⲛ ⲉⲧⲡⲩⲗⲏ ⲛⲧⲉⲩⲡⲟⲗⲓⲥ

24 ⲛⲧⲟⲝⲟⲧⲏⲥ ⲇⲉ ⲉⲩϩⲓϫⲛⲡⲥⲟⲃⲧ ⲁⲩⲛⲉϫⲥⲟⲧⲉ ⲉⲃⲟⲗ ⲉⲛⲉⲕϩⲙϩⲁⲗ ⲁⲩⲱ ⲁⲟⲩⲁⲛ ⲙⲟⲩ ⲉⲃⲟⲗ ϩⲛⲛⲉϩⲙϩⲁⲗ ⲙⲡⲣⲣⲟ ⲡⲉⲕⲕⲉϩⲙϩⲁⲗ ⲟⲩⲣⲓⲁⲥ ⲡⲉⲭⲉⲇⲇⲁⲓⲟⲥ ⲁϥⲙⲟⲩ

25 ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲙⲡⲃⲁⲓϣⲓⲛⲉ ϫⲉⲛⲁⲓ ⲛⲉⲧⲉⲕⲛⲁϫⲟⲟⲩ ⲉⲓⲱⲁⲃ ϫⲉⲙⲡⲉⲣⲧⲣⲉⲡⲉⲓϣⲁϫⲉ ⲑⲟ ⲛⲁϩⲣⲟⲕ ϫⲉⲛⲧⲉⲓϩⲉ ⲙⲛⲧⲁⲓ ⲧⲥⲏϥⲉ ⲛⲁⲙⲟⲟϣⲉ ⲛⲥⲟⲩⲱⲙ ⲛⲧⲟⲕ ⲧⲁϫⲣⲉⲡⲉⲕⲡⲟⲗⲉⲙⲟⲥ ϩⲓⲣⲱⲥ ⲛⲧⲡⲟⲗⲓⲥ ⲛⲅϫⲓⲧⲥ ⲛⲅⲧⲁⲧⲥ ⲉⲡⲕⲁϩ ⲁⲩⲱ ⲁϥⲧⲁϫⲣⲉⲡⲉϥϩⲏⲧ

26 ⲧⲉⲥϩⲓⲙⲉ ⲇⲉ ⲛⲟⲩⲣⲓⲁⲥ ⲁⲥⲥⲱⲧⲙ ϫⲉⲁⲡⲉⲥϩⲁⲓ ⲟⲩⲣⲓⲁⲥ ⲙⲟⲩ ⲁⲥⲧⲟⲉⲓⲧ ⲉⲡⲉⲥϩⲁⲓ

27 ⲁⲛⲉϩⲟⲟⲩ ⲇⲉ ⲙⲡϩⲏⲏⲃⲉ ⲟⲩⲉⲓⲛⲉ ⲁϥϫⲟⲟⲩ ⲛϭⲓⲇⲁⲩⲉⲓⲇ ⲁϥϫⲓⲧⲥ ⲉϩⲟⲩⲛ ⲉⲡⲉϥⲏⲓ ⲁⲥϣⲱⲡⲉ ⲛⲁϥ ⲛⲥϩⲓⲙⲉ ⲁⲥϫⲡⲟ ⲛⲁϥ ⲛⲟⲩϣⲏⲣⲉ ⲁⲩⲱ ⲡϣⲁϫⲉ ⲛⲧⲁⲇⲁⲩⲉⲓⲇ ⲁⲁϥ ⲁϥϣⲱⲡⲉ ⲛⲟⲩⲡⲟⲛⲏⲣⲟⲛ ⲛⲁϩⲣⲁϥ ⲙⲡϫⲟⲉⲓⲥ