2 Kings 15 — Coptic (Sahidic)

1 ϩⲛⲧⲙⲉϩϫⲟⲩⲧⲥⲁϣϥⲉ ⲇⲉ ⲛⲣⲟⲙⲡⲉ ⲛϩⲓⲉⲣⲟⲃⲟⲁⲙ ⲡⲣⲣⲟ ⲙⲡⲓⲥⲣⲁⲏⲗ ⲁϥⲣⲣⲣⲟ ⲛϭⲓⲁⲍⲁⲣⲓⲁⲥ ⲡϣⲏⲣⲉ ⲛⲁⲙⲉⲥⲥⲓⲁⲥ ⲡⲣⲣⲟ ⲛⲓⲟⲩⲇⲁⲥ

2 ⲉⲩϣⲏⲣⲉ ⲡⲉ ⲉϥϩⲛⲙⲛⲧⲁⲥⲉ ⲛⲣⲟⲙⲡⲉ ⲉϥⲟ ⲛⲣⲣⲟ ϩⲛⲧϩⲓⲉⲣⲟⲩⲥⲁⲗⲏⲙ ⲡⲣⲁⲛ ⲇⲉ ⲛⲧⲉϥⲙⲁⲁⲩ ⲧⲉ ⲭⲁⲗⲓⲁ ⲉⲟⲩⲉⲃⲟⲗ ⲧⲉ ϩⲛⲧϩⲓⲉⲣⲟⲩⲥⲁⲗⲏⲙ

3 ⲁⲩⲱ ⲁϥⲉⲓⲣⲉ ⲙⲡⲉⲧⲥⲟⲩⲧⲱⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲕⲁⲧⲁϩⲱⲃ ⲛⲓⲙ ⲛⲧⲁϥⲁⲁⲩ ⲛϭⲓⲁⲙⲉⲥⲥⲓⲁⲥ ⲡⲉϥⲉⲓⲱⲧ

4 ⲙⲙⲁ ⲇⲉ ⲉⲧϫⲟⲥⲉ ⲙⲡⲉϥϥⲓⲧⲟⲩ ⲙⲙⲁⲩ ⲁⲗⲗⲁ ⲡⲗⲁⲟⲥ ⲟⲛ ⲛⲉϥⲣⲑⲩⲥⲓⲁ ⲁⲩⲱ ⲛⲉⲩϯϩⲏⲛⲉ ⲡⲉ ϩⲣⲁⲓ ϩⲓϫⲛⲙⲙⲁ ⲉⲧϫⲟⲥⲉ

5 ⲡϫⲟⲉⲓⲥ ⲇⲉ ⲁϥⲛⲧⲟⲟⲧϥ ⲉϩⲣⲁⲓ ⲉϫⲙⲡⲣⲣⲟ ⲁⲩⲱ ⲛⲉⲁϥⲥⲱⲃϩ ⲡⲉ ϣⲁⲡⲉϩⲟⲟⲩ ⲙⲡⲉϥⲙⲟⲩ ⲛⲉϥϩⲙⲟⲟⲥ ⲇⲉ ⲡⲉ ϩⲙⲡⲏⲓ ⲛⲁⲫⲉⲑ ⲁⲩⲱ ⲓⲱⲑⲁⲙ ⲡϣⲏⲣⲉ ⲙⲡⲣⲣⲟ ⲛⲉϥϩⲓϫⲙⲡⲏⲓ ⲉϥⲕⲣⲓⲛⲉ ⲙⲡⲗⲁⲟⲥ ⲙⲡⲕⲁϩ

6 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲛⲁⲍⲁⲣⲓⲁⲥ ⲙⲛⲛⲕⲉϩⲃⲏⲩⲉ ⲧⲏⲣⲟⲩ ⲛⲧⲁϥⲁⲁⲩ ⲙⲏ ⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲛⲓⲟⲩⲇⲁⲥ

7 ⲁⲩⲱ ⲁⲍⲁⲣⲓⲁⲥ ⲁϥⲛⲕⲟⲧⲕ ⲙⲛⲛⲉϥⲉⲓⲟⲧⲉ ⲁⲩⲧⲟⲙⲥϥ ϩⲁϩⲧⲏ ⲛⲛⲉϥⲉⲓⲟⲧⲉ ϩⲛⲧⲡⲟⲗⲓⲥ ⲛⲇⲁⲩⲉⲓⲇ ⲁⲩⲱ ⲓⲱⲑⲁⲙ ⲡⲉϥϣⲏⲣⲉ ⲁϥⲣⲣⲣⲟ ⲉⲡⲉϥⲙⲁ

8 ϩⲛⲧⲙⲉϩⲙⲁⲁⲃϣⲙⲏⲛⲉ ⲇⲉ ⲛⲣⲟⲙⲡⲉ ⲛⲁⲍⲁⲣⲓⲁⲥ ⲡⲣⲣⲟ ⲛⲓⲟⲩⲇⲁ ⲁϥⲣⲣⲣⲟ ⲛϭⲓⲁⲍⲁⲣⲓⲁⲥ ⲡϣⲏⲣⲉ ⲛϩⲓⲉⲣⲟⲃⲟⲁⲙ ⲉϫⲙⲡⲓⲥⲣⲁⲏⲗ ϩⲛⲧⲥⲁⲙⲁⲣⲓⲁ ⲛⲥⲟⲟⲩ ⲛⲉⲃⲟⲧ

9 ⲁⲩⲱ ⲁϥⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲕⲁⲧⲁⲧϩⲉ ⲛⲧⲁⲩⲁⲁⲥ ⲛϭⲓⲛⲉϥⲉⲓⲟⲧⲉ ⲙⲡⲉϥⲥⲁϩⲱϥ ⲉⲃⲟⲗ ⲛⲛⲛⲟⲃⲉ ⲛϩⲓⲉⲣⲟⲃⲟⲁⲙ ⲡϣⲏⲣⲉ ⲛⲛⲁⲃⲁⲧ ⲡⲉⲛⲧⲁϥⲧⲣⲉⲡⲓⲥⲣⲁⲏⲗ ⲣⲛⲟⲃⲉ

10 ⲁϥⲧⲱⲟⲩⲛ ⲇⲉ ⲉϩⲣⲁⲓ ⲉϫⲱϥ ⲛϭⲓⲥⲉⲗⲗⲟⲩⲙ ⲡϣⲏⲣⲉ ⲛⲓⲁⲃⲓⲥ ⲁϥⲡⲁⲧⲁⲥⲥⲉⲓ ⲙⲙⲟϥ ϩⲛⲃⲗⲁⲁⲙ ⲁϥⲙⲟⲟⲩⲧϥ ⲁⲩⲱ ⲁϥⲣⲣⲣⲟ ⲉⲡⲉϥⲙⲁ

11 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲛⲁⲍⲁⲣⲓⲁⲥ ⲉⲓⲥ ϩⲏⲏⲧⲉ ⲥⲉⲥϩⲏⲩⲧ ⲉⲡϫⲱⲱⲙⲉ ⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

12 ⲡϣⲁϫⲉ ⲙⲡϫⲟⲉⲓⲥ ⲛⲧⲁϥϫⲟⲟϥ ⲛⲓⲟⲩ ⲉϥϫⲱ ⲙⲙⲟⲥ ⲛⲁϥ ϫⲉϥⲧⲟⲟⲩ ⲛϣⲏⲣⲉ ⲛⲧⲁⲕ ⲥⲉⲛⲁϩⲙⲟⲟⲥ ϩⲓϫⲙⲡⲉⲑⲣⲟⲛⲟⲥ ⲙⲡⲓⲥⲣⲁⲏⲗ ⲛⲥⲉⲣⲣⲣⲟ ⲉϫⲱϥ ⲁⲥϣⲱⲡⲉ ϩⲓⲛⲁⲓ

13 ⲁⲩⲱ ⲥⲉⲗⲗⲟⲩⲙ ⲡϣⲏⲣⲉ ⲛⲓⲁⲃⲓⲥ ⲁϥⲣⲣⲣⲟ ϩⲛⲧⲙⲉϩⲙⲁⲁⲃ ⲯⲓⲧⲉ ⲛⲣⲟⲙⲡⲉ ⲛⲁⲍⲁⲣⲓⲁⲥ ⲡⲣⲣⲟ ⲛⲓⲟⲩⲇⲁ ⲥⲉⲗⲗⲟⲩⲙ ⲇⲉ ⲁϥⲣⲣⲣⲟ ⲛⲟⲩⲉⲃⲟⲧ ⲛϩⲟⲟⲩ ϩⲛⲧⲥⲁⲙⲁⲣⲓⲁ

14 ⲁⲩⲱ ⲁϥⲉⲓ ⲉϩⲣⲁⲓ ⲛϭⲓⲙⲁⲛⲁⲏⲙ ⲡϣⲏⲣⲉ ⲛⲅⲁⲇⲇⲉⲓ ⲡⲉⲃⲟⲗ ϩⲛⲑⲉⲣⲥⲁ ⲉϩⲣⲁⲓ ⲉⲧⲥⲁⲙⲁⲣⲓⲁ ⲁϥⲧⲱⲟⲩⲛ ⲁϥⲡⲁⲧⲁⲥⲥⲉⲓ ⲛⲥⲉⲗⲗⲟⲩⲙ ⲡϣⲏⲣⲉ ⲛⲓⲁⲃⲓⲥ ϩⲛⲧⲥⲁⲙⲁⲣⲓⲁ ⲁϥⲙⲟⲟⲩⲧϥ

15 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲛⲥⲉⲗⲗⲟⲩⲙ ⲁⲩⲱ ⲡⲉϥⲥⲱⲟⲩϩ ⲉϩⲟⲩⲛ ⲛⲧⲁϥⲁⲁϥ ⲉⲓⲥ ϩⲏⲏⲧⲉ ⲥⲉⲥⲏϩ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

16 ⲧⲟⲧⲉ ⲙⲁⲛⲁⲏⲙ ⲁϥⲡⲁⲧⲁⲥⲥⲉⲓ ⲛⲑⲉⲣⲥⲁ ⲙⲛⲛⲉⲧϩⲛϩⲏⲧⲥ ⲧⲏⲣⲟⲩ ⲁⲩⲱ ⲛⲉⲥⲕⲉⲧⲟϣ ⲉⲩϭⲱⲡⲉ ϫⲓⲛⲑⲉⲣⲥⲁ ⲉⲃⲟⲗ ϫⲉⲙⲡⲟⲩⲟⲩⲱⲛ ⲛⲁϥ ⲉⲧⲃⲉⲡⲁⲓ ⲁϥⲡⲁⲧⲁⲥⲥⲉⲓ ⲙⲙⲟⲥ ⲁⲩⲱ ⲛⲉϩⲓⲟⲙⲉ ⲉⲧⲛϩⲏⲧⲥ ⲁϥⲡⲉϩϩⲏⲧⲟⲩ

17 ϩⲛⲧⲙⲉϩⲙⲁⲁⲃⲯⲓⲧⲉ ⲇⲉ ⲛⲣⲟⲙⲡⲉ ⲛⲁⲍⲁⲣⲓⲁⲥ ⲡⲣⲣⲟ ⲛⲓⲟⲩⲇⲁ ⲁϥⲣⲣⲣⲟ ⲛϭⲓⲙⲁⲛⲁⲏⲙ ⲡϣⲏⲣⲉ ⲛⲅⲁⲇⲇⲉⲓ ⲉϫⲙⲡⲓⲥⲣⲁⲏⲗ ⲙⲙⲏⲧⲉ ⲛⲣⲟⲙⲡⲉ ϩⲛⲧⲥⲁⲙⲁⲣⲓⲁ

18 ⲁⲩⲱ ⲁϥⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲡⲉϥⲥⲁϩⲱϥ ⲉⲃⲟⲗ ⲛⲛⲛⲟⲃⲉ ⲧⲏⲣⲟⲩ ⲛϩⲓⲉⲣⲟⲃⲟⲁⲙ ⲡϣⲏⲣⲉ ⲛⲛⲁⲃⲁⲧ ⲛⲧⲁϥⲧⲣⲉⲡⲓⲥⲣⲁⲏⲗ ⲣⲛⲟⲃⲉ

19 ϩⲣⲁⲓ ⲇⲉ ϩⲛⲛⲉϥϩⲟⲟⲩ ⲁϥⲉⲓ ⲉϩⲣⲁⲓ ⲛϭⲓⲫⲟⲩⲁ ⲡⲣⲣⲟ ⲛⲛⲁⲥⲥⲩⲣⲓⲟⲥ ⲉϫⲙⲡⲕⲁϩ ⲁⲩⲱ ⲙⲁⲛⲁⲏⲙ ⲁϥϯ ⲙⲫⲟⲩⲁ ⲙⲙⲏⲧ ⲛϣⲉ ⲛϭⲓⲛϭⲱⲣ ⲛϩⲁⲧ ⲉⲧⲣⲉⲧⲟⲟⲧϥ ϣⲱⲡⲉ ⲉϥⲥⲙⲟⲛⲧ ⲛⲙⲙⲁϥ

20 ⲁⲩⲱ ⲙⲁⲛⲁⲏⲙ ⲁϥⲟⲩⲱϭⲥ ⲙⲡϩⲁⲧ ⲉϫⲙⲡⲓⲥⲣⲁⲏⲗ ⲉϫⲛⲇⲩⲛⲁⲧⲟⲥ ⲛⲓⲙ ⲉⲧⲣⲉⲩϯ ⲙⲙⲟϥ ⲙⲡⲣⲣⲟ ⲛⲛⲁⲥⲥⲩⲣⲓⲟⲥ ⲛⲧⲁⲉⲓⲟⲩ ⲛⲥⲓⲕⲗⲟⲥ ⲉⲧⲉⲧⲥⲁⲧⲉⲉⲣⲉ ⲧⲉ ⲛϩⲁⲧ ⲉⲡⲣⲱⲙⲉ ⲁⲩⲱ ⲡⲣⲣⲟ ⲛⲛⲁⲥⲥⲩⲣⲓⲟⲥ ⲁϥⲕⲧⲟϥ ⲁϥⲃⲱⲕ ⲙⲡⲉϥϭⲱ ϩⲓϫⲱⲟⲩ ⲙⲡⲕⲁϩ

21 ⲡⲥⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲙⲙⲁⲛⲁⲏⲙ ⲙⲛⲛⲉⲛⲧⲁϥⲧⲁⲁⲩ ⲧⲏⲣⲟⲩ ⲙⲏ ⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

22 ⲁⲩⲱ ⲙⲁⲛⲁⲏⲙ ⲁϥⲛⲕⲟⲧⲕ ⲙⲛⲛⲉϥⲉⲓⲟⲧⲉ ⲫⲁⲕⲉⲥⲓⲁⲥ ⲇⲉ ⲡⲉϥϣⲏⲣⲉ ⲁϥⲣⲣⲣⲟ ⲉⲡⲉϥⲙⲁ

23 ϩⲛⲧⲙⲉϩⲧⲁⲓⲟⲩ ⲇⲉ ⲛⲣⲟⲙⲡⲉ ⲛⲁⲍⲁⲣⲓⲁⲥ ⲡⲣⲣⲟ ⲛⲓⲟⲩⲇⲁ ⲫⲁⲕⲉⲥⲓⲁⲥ ⲡϣⲏⲣⲉ ⲙⲙⲁⲛⲁⲏⲙ ⲁϥⲣⲣⲣⲟ ⲉϫⲙⲡⲓⲥⲣⲁⲏⲗ ϩⲛⲧⲥⲁⲙⲁⲣⲓⲁ ⲛⲣⲟⲙⲡⲉ ⲥⲛⲧⲉ

24 ⲁⲩⲱ ⲁϥⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲡⲉϥⲥⲁϩⲱϥ ⲉⲃⲟⲗ ⲛⲛⲛⲟⲃⲉ ⲛϩⲓⲉⲣⲟⲃⲟⲁⲙ ⲡϣⲏⲣⲉ ⲛⲛⲁⲃⲁⲧ ⲛⲧⲁϥⲧⲣⲉⲡⲓⲥⲣⲁⲏⲗ ⲣⲛⲟⲃⲉ

25 ⲁⲩⲱ ⲁϥⲧⲱⲟⲩⲛ ⲉϩⲣⲁⲓ ⲉϫⲱϥ ⲛϭⲓⲫⲁⲕⲉⲉ ⲡϣⲏⲣⲉ ⲛϩⲣⲟⲙⲉⲗⲓⲁⲥ ⲡⲉϥⲧⲣⲓⲥⲧⲁⲧⲏⲥ ⲁϥⲡⲁⲧⲁⲥⲥⲉⲓ ⲙⲙⲟϥ ϩⲛⲧⲥⲁⲙⲁⲣⲓⲁ ϩⲓⲧϩⲏ ⲙⲡⲣⲣⲟ ⲙⲛⲁⲅⲣⲟⲃ ⲁⲩⲱ ⲙⲛⲁⲣⲓⲏ ⲉⲣⲉⲧⲁⲉⲓⲟⲩ ⲛⲣⲱⲙⲉ ⲛⲙⲙⲁϥ ⲉⲃⲟⲗ ϩⲛⲛϣⲏⲣⲉ ⲛⲅⲁⲇⲇⲉⲓⲙ ⲁϥⲙⲟⲟⲩⲧϥ ⲁⲩⲱ ⲁϥⲣⲣⲣⲟ ⲉⲡⲉϥⲙⲁ

26 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲙⲫⲁⲕⲉⲥⲓⲁⲥ ⲙⲛⲛⲉⲛⲧⲁϥⲧⲁⲁⲩ ⲧⲏⲣⲟⲩ ⲙⲏ ⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

27 ϩⲛⲧⲙⲉϩⲧⲁⲓⲟⲩ ⲥⲛⲟⲟⲩⲥⲉ ⲇⲉ ⲛⲣⲟⲙⲡⲉ ⲛⲁⲍⲁⲣⲓⲁⲥ ⲡⲣⲣⲟ ⲛⲓⲟⲩⲇⲁ ⲁϥⲣⲣⲣⲟ ⲛϭⲓⲫⲁⲕⲉⲉ ⲡϣⲏⲣⲉ ⲛϩⲣⲟⲙⲉⲗⲓⲁⲥ ⲉϫⲙⲡⲓⲥⲣⲁⲏⲗ ϩⲛⲧⲥⲁⲙⲁⲣⲓⲁ ⲛϫⲟⲩⲧⲉ ⲛⲣⲟⲙⲡⲉ

28 ⲁⲩⲱ ⲁϥⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲡⲉϥⲥⲁϩⲱϥ ⲉⲃⲟⲗ ⲛⲛⲛⲟⲃⲉ ⲛϩⲓⲉⲣⲟⲃⲟⲁⲙ ⲡϣⲏⲣⲉ ⲛⲛⲁⲃⲁⲧ ⲛⲧⲁϥⲧⲣⲉⲡⲓⲥⲣⲁⲏⲗ ⲣⲛⲟⲃⲉ

29 ϩⲣⲁⲓ ⲇⲉ ϩⲛⲛⲉϩⲟⲟⲩ ⲙⲫⲁⲕⲉⲉ ⲡⲣⲣⲟ ⲙⲡⲓⲥⲣⲁⲏⲗ ⲁϥⲉⲓ ⲛϭⲓⲑⲉⲅⲁⲑⲫⲁⲗⲗⲁⲥⲁⲣ ⲡⲣⲣⲟ ⲛⲛⲁⲥⲥⲩⲣⲓⲟⲥ ⲉϫⲛⲧⲡⲟⲗⲓⲥ ⲉⲧⲟⲩⲙⲟⲩⲧⲉ ⲉⲣⲟⲥ ϫⲉⲁⲉⲓⲛ ⲁⲩⲱ ⲧⲉⲧⲟⲩⲙⲟⲩⲧⲉ ⲉⲣⲟⲥ ϫⲉⲁⲃⲉⲗ ⲡⲏⲓ ⲙⲙⲁⲁⲭⲁ ⲁⲩⲱ ⲃⲉⲑⲁⲙ ⲙⲛⲇⲉⲃⲗⲁⲑⲁ ⲙⲛⲁⲛⲓⲱⲭ ⲁⲩⲱ ⲕⲉⲛⲉⲍ ⲙⲛⲁⲍⲱⲣ ⲙⲛⲧⲅⲁⲗⲁⲁ ⲙⲛⲧⲅⲁⲗⲓⲗⲁⲓⲁ ⲡⲕⲁϩ ⲧⲏⲣϥ ⲛⲉⲫⲑⲁⲗⲓⲙ ⲁϥⲡⲟⲟⲛⲟⲩ ⲉⲃⲟⲗ ⲉϩⲣⲁⲓ ⲉⲛⲁⲥⲥⲩⲣⲓⲟⲥ

30 ⲁⲩⲱ ⲱⲥⲏⲉ ⲡϣⲏⲣⲉ ⲛⲏⲗⲁ ⲁϥⲥⲱⲟⲩϩⲥ ⲉϫⲙⲫⲁⲕⲉⲉ ⲡϣⲏⲣⲉ ⲛϩⲣⲟⲙⲉⲗⲓⲁⲥ ⲁϥⲧⲱⲟⲩⲛ ⲁϥⲡⲁⲧⲁⲥⲥⲉⲓ ⲙⲙⲟϥ ⲁϥⲙⲟⲟⲩⲧϥ ⲁϥⲣⲣⲣⲟ ⲉⲡⲉϥⲙⲁ ϩⲛⲧⲙⲉϩϫⲟⲩⲧⲉ ⲛⲣⲟⲙⲡⲉ ⲛⲓⲟⲁⲑⲁⲙ ⲡϣⲏⲣⲉ ⲛⲁⲍⲁⲣⲓⲁⲥ

31 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲙⲫⲁⲕⲉⲉ ⲙⲛⲛⲧⲁϥⲁⲁⲩ ⲧⲏⲣⲟⲩ ⲙⲏ ⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

32 ⲧⲙⲉϩⲥⲛⲧⲉ ⲇⲉ ⲛⲣⲟⲙⲡⲉ ⲙⲫⲁⲕⲉⲉ ⲡϣⲏⲣⲉ ⲛϩⲣⲟⲙⲉⲗⲓⲁⲥ ⲡⲣⲣⲟ ⲙⲡⲓⲥⲣⲁⲏⲗ ⲁϥⲣⲣⲣⲟ ⲛϭⲓⲓⲱⲁⲑⲁⲙ ⲡϣⲏⲣⲉ ⲛⲁⲍⲁⲣⲓⲁⲥ ⲡⲣⲣⲟ ⲛⲓⲟⲩⲇⲁⲥ

33 ⲉⲩϣⲏⲣⲉ ⲡⲉ ⲉϥϩⲛϫⲟⲩⲧⲏ ⲛⲣⲟⲙⲡⲉ ⲛⲧⲉⲣⲉϥⲣⲣⲣⲟ ⲁⲩⲱ ⲙⲛⲧⲁⲥⲉ ⲛⲣⲟⲙⲡⲉ ⲁϥⲁⲁⲩ ⲉϥⲟ ⲛⲣⲣⲟ ϩⲛⲧϩⲓⲉⲣⲟⲩⲥⲁⲗⲏⲙ ⲡⲣⲁⲛ ⲇⲉ ⲛⲧⲉϥⲙⲁⲁⲩ ⲧⲉ ϩⲓⲉⲣⲟⲁⲥ ⲧϣⲉⲉⲣⲉ ⲛⲥⲁⲇⲱⲕ

34 ⲁⲩⲱ ⲁϥⲉⲓⲣⲉ ⲙⲡⲉⲧⲥⲟⲩⲧⲱⲛ ⲛⲛⲁϩⲣⲁϥ ⲙⲡϫⲟⲉⲓⲥ ⲕⲁⲧⲁⲛⲉⲛⲧⲁϥⲁⲁⲩ ⲧⲏⲣⲟⲩ ⲛϭⲓⲁⲍⲁⲣⲓⲁⲥ ⲡⲉϥⲉⲓⲱⲧ

35 ⲙⲙⲁ ⲇⲉ ⲉⲧϫⲟⲥⲉ ⲙⲡⲉϥϥⲓⲧⲟⲩ ⲙⲙⲁⲩ ⲛⲉⲣⲉⲡⲗⲁⲟⲥ ⲟⲛ ⲣⲑⲩⲥⲓⲁ ⲁⲩⲱ ⲛⲉⲩϯϩⲏⲛⲉ ⲉϩⲣⲁⲓ ϩⲓϫⲱⲟⲩ ⲛⲧⲟϥ ⲡⲉⲛⲧⲁϥⲕⲱⲧ ⲛⲧⲡⲩⲗⲏ ⲙⲡⲏⲓ ⲙⲡϫⲟⲉⲓⲥ ⲧⲉⲧⲛϩⲙⲡⲥⲁ ⲛⲧⲡⲉ

36 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲛⲓⲱⲁⲑⲁⲙ ⲙⲛⲛⲉⲛⲧⲁϥⲁⲁⲩ ⲧⲏⲣⲟⲩ ⲙⲏ ⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲛⲓⲟⲩⲇⲁ

37 ϩⲛⲛⲉϩⲟⲟⲩ ⲉⲧⲙⲙⲁⲩ ⲡϫⲟⲉⲓⲥ ⲁϥⲁⲣⲭⲓⲥⲑⲁⲓ ⲉϫⲟⲟⲩ ⲛϩⲣⲁⲁⲥⲥⲱⲛ ⲡⲣⲣⲟ ⲛⲧⲥⲩⲣⲓⲁ ⲉⲣⲱϥ ⲛⲓⲟⲩⲇⲁ ⲁⲩⲱ ⲫⲁⲕⲉⲉ ⲡϣⲏⲣⲉ ⲛϩⲣⲟⲙⲉⲗⲓⲁⲥ

38 ⲓⲱⲁⲑⲁⲙ ⲇⲉ ⲁϥⲛⲕⲟⲧⲕ ⲙⲛⲛⲉϥⲉⲓⲟⲧⲉ ⲁⲩⲧⲟⲙⲥϥ ϩⲁϩⲧⲏ ⲛⲛⲉϥⲉⲓⲟⲧⲉ ϩⲛⲧⲡⲟⲗⲓⲥ ⲛⲇⲁⲩⲉⲓⲇ ⲡⲉϥⲉⲓⲱⲧ ⲁⲭⲁⲍ ⲇⲉ ⲡⲉϥϣⲏⲣⲉ ⲁϥⲣⲣⲣⲟ ⲉⲡⲉϥⲙⲁ