2 Kings 14 — Coptic (Sahidic)

1 ⲧⲙⲉϩⲣⲟⲙⲡⲉ ⲥⲛⲧⲉ ⲇⲉ ⲛⲓⲱⲁⲥ ⲡϣⲏⲣⲉ ⲛⲓⲱⲁⲭⲁⲍ ⲡⲣⲣⲟ ⲙⲡⲓⲥⲣⲁⲏⲗ ⲁϥⲣⲣⲣⲟ ⲛϭⲓⲁⲙⲉⲥⲥⲓⲁⲥ ⲡϣⲏⲣⲉ ⲛⲓⲱⲁⲥ ⲡⲣⲣⲟ ⲛⲓⲟⲩⲇⲁⲥ

2 ⲉⲩϣⲏⲣⲉ ⲡⲉ ⲉϥϩⲛϫⲟⲩⲧⲏ ⲛⲣⲟⲙⲡⲉ ⲛⲧⲉⲣⲉϥⲣⲣⲣⲟ ⲁⲩⲱ ϫⲟⲩⲧⲯⲓⲧⲉ ⲛⲣⲟⲙⲡⲉ ⲁϥⲁⲁⲩ ⲉϥⲟ ⲛⲣⲣⲣⲟ ϩⲛⲧϩⲓⲉⲣⲟⲩⲥⲁⲗⲏⲙ ⲡⲣⲁⲛ ⲇⲉ ⲛⲧⲉϥⲙⲁⲁⲩ ⲧⲉ ⲓⲱⲁⲇⲓⲙ ⲉⲟⲩⲉⲃⲟⲗ ⲧⲉ ϩⲛⲧϩⲓⲉⲣⲟⲩⲥⲁⲗⲏⲙ

3 ⲁⲩⲱ ⲁϥⲉⲓⲣⲉ ⲙⲡⲉⲧⲥⲟⲩⲧⲱⲛ ⲙⲡϩⲱⲧ ⲉⲃⲟⲗ ⲙⲡϫⲟⲉⲓⲥ ⲡⲗⲏⲛ ⲛⲧϩⲉ ⲁⲛ ⲛⲇⲁⲩⲉⲓⲇ ⲡⲉϥⲉⲓⲱⲧ ⲁⲩⲱ ⲛⲉⲛⲧⲁϥⲁⲁⲩ ⲧⲏⲣⲟⲩ ⲛϭⲓⲓⲱⲁⲥ ⲡⲉϥⲉⲓⲱⲧ ⲁϥⲁⲁⲩ ϩⲱⲱϥ

4 ⲙⲙⲁ ⲇⲉ ⲉⲧϫⲟⲥⲉ ⲙⲡⲉϥϥⲓⲧⲟⲩ ⲙⲙⲁⲩ ⲉⲧⲓ ⲛⲉⲣⲉⲡⲗⲁⲟⲥ ⲧⲁⲗⲉⲑⲩⲥⲓⲁ ⲉϩⲣⲁⲓ ϩⲓϣⲟⲩϩⲏⲛⲉ ϩⲓϫⲛⲙⲙⲁ ⲉⲧϫⲟⲥⲉ

5 ⲛⲧⲉⲣⲉⲧⲙⲛⲧⲣⲣⲟ ⲇⲉ ⲧⲁϫⲣⲟ ϩⲛⲧⲟⲟⲧϥ ⲁϥⲧⲱⲟⲩⲛ ⲁϥⲙⲟⲩⲟⲩⲧ ⲛⲛⲉϥϩⲙϩⲁⲗ ⲛⲧⲁⲩⲧⲱⲟⲩⲛ ⲁⲩⲙⲟⲩⲟⲩⲧ ⲙⲡⲣⲣⲟ ⲡⲉϥⲉⲓⲱⲧ

6 ⲛϣⲏⲣⲉ ⲇⲉ ⲛⲛⲉⲛⲧⲁⲩⲙⲟⲩⲟⲩⲧ ⲙⲡⲉϥⲉⲓⲱⲧ ⲙⲡⲉϥⲙⲟⲩⲟⲩⲧ ⲙⲙⲟⲟⲩ ⲕⲁⲧⲁⲡⲉⲧⲥⲏϩ ϩⲙⲡϫⲱⲱⲙⲉ ⲙⲡⲛⲟⲙⲟⲥ ⲙⲙⲱⲩⲥⲏⲥ ⲛⲧϩⲉ ⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲉϥϫⲱ ⲙⲙⲟⲥ ϫⲉⲛⲛⲉⲛⲉⲓⲟⲧⲉ ⲙⲟⲩ ϩⲁⲛϣⲏⲣⲉ ⲁⲩⲱ ⲛϣⲏⲣⲉ ⲛⲛⲉⲩⲙⲟⲩ ϩⲁⲛⲉⲩⲉⲓⲟⲧⲉ ϩⲱⲟⲩ ⲁⲗⲗⲁ ⲡⲟⲩⲁ ⲡⲟⲩⲁ ⲉϥⲛⲁⲙⲟⲩ ϩⲁⲡⲉϥⲛⲟⲃⲉ

7 ⲛⲧⲟϥ ⲟⲛ ⲡⲉⲛⲧⲁϥⲡⲁⲧⲁⲥⲥⲉⲓ ⲛⲉⲇⲱⲙ ϩⲙⲡⲉⲓⲁ ⲙⲡⲉϩⲙⲟⲩ ⲙⲙⲏⲧ ⲛϣⲟ ⲛⲣⲱⲙⲉ ⲁⲩⲱ ⲁϥϫⲓ ⲛⲧⲡⲉⲧⲣⲁ ϩⲙⲡⲡⲟⲗⲉⲙⲟⲥ ⲛⲧⲁϥⲁⲁϥ ⲁϥⲙⲟⲩⲧⲉ ⲉⲡⲉⲥⲣⲁⲛ ϫⲉⲅⲱⲑⲟⲏⲗ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ

8 ⲧⲟⲧⲉ ⲁϥϫⲟⲟⲩ ⲛϭⲓⲁⲙⲉⲥⲥⲓⲁⲥ ⲛϩⲉⲛϥⲁⲓϣⲓⲛⲉ ⲉⲣⲁⲧϥ ⲛⲓⲱⲁⲥ ⲡϣⲏⲣⲉ ⲛⲓⲱⲁⲭⲁⲍ ⲡϣⲏⲣⲉ ⲛⲓⲟⲩ ⲡⲣⲣⲟ ⲙⲡⲓⲥⲣⲁⲏⲗ ⲉϥϫⲱ ⲙⲙⲟⲥ ⲛⲁϥ ϫⲉⲁⲙⲟⲩ ⲛⲧⲛⲁⲡⲁⲛⲧⲁ ⲉⲛⲉⲛⲉⲣⲏⲩ

9 ⲁⲩⲱ ⲓⲱⲁⲥ ⲡⲣⲣⲟ ⲙⲡⲓⲥⲣⲁⲏⲗ ⲁϥϫⲟⲟⲩ ⲉⲣⲁⲧϥ ⲛⲁⲙⲉⲥⲥⲓⲁⲥ ⲡⲣⲣⲟ ⲛⲓⲟⲩⲇⲁⲥ ⲉϥϫⲱ ⲙⲙⲟⲥ ⲛⲁϥ ϫⲉⲁⲕⲁⲛ ⲡⲉⲧϩⲙⲡⲗⲓⲃⲁⲛⲟⲥ ⲁϥϫⲟⲟⲩ ⲉⲣⲁⲧⲥ ⲛⲧⲕⲉⲇⲣⲟⲥ ⲉⲧϩⲙⲡⲗⲓⲃⲁⲛⲟⲥ ⲉϥϫⲱ ⲙⲙⲟⲥ ⲛⲁⲥ ϫⲉⲙⲁ ⲛⲁⲓ ⲛⲧⲟⲩϣⲉⲉⲣⲉ ⲛⲥϩⲓⲙⲉ ⲙⲡⲁϣⲏⲣⲉ ⲁⲩⲱ ⲛⲉⲑⲏⲣⲓⲟⲛ ⲛⲧⲥⲱϣⲉ ⲉⲧϩⲙⲡⲗⲓⲃⲁⲛⲟⲥ ⲁⲩⲉⲓ ⲁⲩϩⲱⲙ ϩⲓⲟⲩⲥⲟⲡ ⲉϫⲛⲁⲕⲁⲛⲁ

10 ϩⲛⲟⲩϩⲓⲟⲩⲉ ϭⲉ ⲁⲕⲡⲁⲧⲁⲥⲥⲉⲓ ⲛⲧⲓⲇⲟⲩⲙⲁⲓⲁ ⲁⲩⲱ ⲁⲡⲉⲕϩⲏⲧ ϫⲓⲥⲉ ⲉⲣⲟⲕ ϫⲓⲉⲟⲟⲩ ⲉⲕϩⲙⲟⲟⲥ ϩⲙⲡⲉⲕⲏⲓ ⲁⲩⲱ ⲉⲧⲃⲉⲟⲩ ⲕⲉⲣⲓⲍⲉ ϩⲛⲧⲉⲕⲕⲁⲕⲓⲁ ⲕⲛⲁϩⲉ ϭⲉ ⲡⲉ ⲛⲅⲑⲃⲃⲓⲟ ⲁⲩⲱ ⲡⲕⲉⲓⲟⲩⲇⲁⲥ ⲛⲁϩⲉ ⲛⲙⲙⲁⲕ

11 ⲁⲙⲉⲥⲥⲓⲁⲥ ⲇⲉ ⲙⲡⲉϥⲥⲱⲧⲙ ⲛⲥⲱϥ ⲁⲩⲱ ⲁϥⲧⲱⲟⲩⲛ ⲛϭⲓⲡⲣⲣⲟ ⲙⲡⲓⲥⲣⲁⲏⲗ ⲁϥⲉⲓ ⲉϩⲣⲁⲓ ⲁⲩⲟⲩⲱⲛϩ ⲉⲛⲉⲩⲉⲣⲏⲩ ⲛⲧⲟϥ ⲙⲛⲁⲙⲉⲥⲥⲓⲁⲥ ⲡⲣⲣⲟ ⲛⲓⲟⲩⲇⲁⲥ ϩⲛⲃⲉⲑⲥⲁⲙⲩⲥ ⲛⲧⲉⲡⲕⲁϩ ⲛⲓⲟⲩⲇⲁ

12 ⲓⲟⲩⲇⲁⲥ ⲇⲉ ⲁϥϭⲱⲧⲡ ϩⲁⲧϩⲏ ⲙⲡⲓⲥⲣⲁⲏⲗ ⲁⲡⲟⲩⲁ ⲡⲟⲩⲁ ⲡⲱⲧ ⲉϩⲣⲁⲓ ⲉⲧⲉϥⲥⲕⲏⲛⲏ

13 ⲁⲙⲉⲥⲥⲓⲁⲥ ⲇⲉ ⲡϣⲏⲣⲉ ⲛⲓⲱⲁⲥ ⲡⲣⲣⲟ ⲛⲓⲟⲩⲇⲁⲥ ⲁϥϭⲟⲧⲡϥ ⲛϭⲓⲓⲱⲁⲥ ⲡⲣⲣⲟ ⲙⲡⲓⲥⲣⲁⲏⲗ ϩⲛⲃⲉⲑⲥⲁⲙⲩⲥ ⲁϥⲉⲓ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲁϥϣⲟⲣϣⲣ ϩⲙⲡⲥⲟⲃⲧ ⲛⲧϩⲓⲉⲣⲟⲩⲥⲁⲗⲏⲙ ⲙⲡⲥⲁ ⲛⲧⲡⲩⲗⲏ ⲛⲉⲫⲣⲁⲓⲙ ϣⲁϩⲣⲁⲓ ⲉⲧⲡⲩⲗⲏ ⲛⲕⲟⲛⲓⲁ ⲉⲧⲉⲧⲉⲧⲛⲟ ⲛⲕⲟⲟϩ ⲧⲉ ⲛⲁϣⲉ ⲙⲙⲁϩⲉ

14 ⲁⲩⲱ ⲟⲛ ⲁϥϫⲓ ⲙⲡϩⲁⲧ ⲙⲛⲡⲛⲟⲩⲃ ⲙⲛⲛⲉⲥⲕⲉⲩⲏ ⲧⲏⲣⲟⲩ ⲛⲧⲁⲩϩⲉ ⲉⲣⲟⲟⲩ ϩⲙⲡⲏⲓ ⲙⲡϫⲟⲉⲓⲥ ⲁⲩⲱ ϩⲛⲛⲁϩⲱⲱⲣ ⲙⲡⲏⲓ ⲙⲡⲣⲣⲟ ⲁⲩⲱ ⲛⲕⲉϣⲏⲣⲉ ⲛⲛⲉⲛⲧⲁⲩⲧⲱϩ ⲛⲙⲙⲁⲩ ⲁϥⲕⲧⲟⲟⲩ ⲉϩⲣⲁⲓ ⲉⲧⲥⲁⲙⲁⲣⲓⲁ

15 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲛⲓⲱⲁⲥ ⲛⲧⲁϥⲁⲁⲩ ϩⲛⲧⲉϥϭⲟⲙ ⲁⲩⲱ ⲛⲕⲉⲡⲟⲗⲉⲙⲟⲥ ⲛⲧⲁϥⲁⲁⲩ ⲙⲛⲁⲙⲉⲥⲥⲓⲁⲥ ⲡⲣⲣⲟ ⲛⲓⲟⲩⲇⲁⲥ ⲙⲛⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

16 ⲁⲩⲱ ⲓⲱⲁⲥ ⲁϥⲛⲧⲟⲧⲕ ⲙⲛⲛⲉϥⲉⲓⲟⲧⲉ ⲁⲩⲧⲟⲙⲥϥ ϩⲛⲧⲥⲁⲙⲁⲣⲓⲁ ⲙⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ ⲁⲩⲱ ϩⲓⲉⲣⲟⲃⲟⲁⲙ ⲡⲉϥϣⲏⲣⲉ ⲁϥⲣⲣⲣⲟ ⲉⲡⲉϥⲙⲁ

17 ⲁϥⲱⲛϩ ⲇⲉ ⲛϭⲓⲁⲙⲉⲥⲥⲓⲁⲥ ⲡϣⲏⲣⲉ ⲛⲓⲱⲁⲥ ⲡⲣⲣⲟ ⲛⲓⲟⲩⲇⲁⲥ ⲙⲛⲛⲥⲁⲧⲣⲉϥⲙⲟⲩ ⲛϭⲓⲓⲱⲁⲥ ⲡϣⲏⲣⲉ ⲛⲓⲱⲁⲭⲁⲍ ⲛⲁⲕⲉⲙⲛⲧⲏ ⲛⲣⲟⲙⲡⲉ

18 ⲁⲩⲱ ⲡⲕⲉⲥⲉⲉⲡⲉ ⲛⲛϣⲁϫⲉ ⲛⲁⲙⲉⲥⲥⲓⲁⲥ ⲙⲛⲛⲕⲉϩⲃⲏⲩⲉ ⲧⲏⲣⲟⲩ ⲛⲧⲁϥⲁⲁⲩ ⲙⲏ ⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲓⲟⲩⲇⲁ

19 ⲁⲩⲉⲓⲣⲉ ⲉⲣⲟϥ ⲛⲟⲩϣⲟϫⲛⲉ ⲁⲩⲧⲱⲟⲩⲛ ⲉϫⲱϥ ϩⲛⲧϩⲓⲉⲣⲟⲩⲥⲁⲗⲏⲙ ⲁϥⲧⲱⲟⲩⲛ ⲁϥⲡⲱⲧ ⲉϩⲣⲁⲓ ⲉⲗⲁⲭⲓⲥ ⲁⲩϩⲱⲙ ⲇⲉ ⲛⲥⲱϥ ⲉϩⲣⲁⲓ ⲉⲗⲁⲭⲓⲥ ⲁⲩⲧⲁϩⲟϥ ⲁⲩⲙⲟⲟⲩⲧϥ ϩⲙⲡⲙⲁ ⲉⲧⲙⲙⲁⲩ

20 ⲁⲩⲱ ⲁⲩⲧⲁⲗⲟϥ ⲉϩⲉⲛϩⲧⲱⲱⲣ ⲁⲩⲉⲓⲛⲉ ⲙⲙⲟϥ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲁⲩⲧⲟⲙⲥϥ ϩⲁϩⲧⲏ ⲛⲛⲉϥⲉⲓⲟⲧⲉ ϩⲛⲧⲡⲟⲗⲓⲥ ⲛⲇⲁⲩⲉⲓⲇ

21 ⲡⲗⲁⲟⲥ ⲇⲉ ⲧⲏⲣϥ ⲛⲓⲟⲩⲇⲁⲥ ⲁⲩϫⲓ ⲛⲁⲍⲁⲣⲓⲁⲥ ⲉⲩϣⲏⲣⲉ ⲡⲉ ⲉϥϩⲛⲙⲛⲧⲁⲥⲉ ⲛⲣⲟⲙⲡⲉ ⲁⲩⲁⲁϥ ⲡⲣⲣⲟ ⲉⲡⲙⲁ ⲙⲡⲉϥⲉⲓⲱⲧ ⲁⲙⲉⲥⲥⲓⲁⲥ

22 ⲛⲧⲟϥ ⲡⲉⲛⲧⲁϥⲕⲱⲧ ⲛⲧⲡⲟⲗⲓⲥ ⲉⲧⲟⲩⲙⲟⲩⲧⲉ ⲉⲣⲟⲥ ϫⲉⲉⲇⲱⲙ ⲁⲩⲱ ⲁϥⲕⲧⲟⲥ ⲉⲧⲣⲉⲥⲱⲡ ⲉⲓⲟⲩⲇⲁⲥ ⲙⲛⲛⲥⲁⲧⲣⲉⲡⲣⲣⲟ ⲛⲕⲟⲧⲕ ⲙⲛⲛⲉϥⲉⲓⲟⲧⲉ

23 ϩⲛⲧⲙⲉϩⲙⲛⲧⲏ ⲛⲣⲟⲙⲡⲉ ⲛⲁⲙⲉⲥⲥⲓⲁⲥ ⲡϣⲏⲣⲉ ⲛⲓⲱⲁⲥ ⲡⲣⲣⲟ ⲛⲓⲟⲩⲇⲁⲥ ⲁϥⲣⲣⲣⲟ ⲛϭⲓϩⲓⲉⲣⲟⲃⲟⲁⲙ ⲡϣⲏⲣⲉ ⲛⲓⲱⲁⲥ ⲡⲣⲣⲟ ⲙⲡⲓⲥⲣⲁⲏⲗ ϩⲛⲧⲥⲁⲙⲁⲣⲓⲁ ⲛϩⲙⲉ ⲟⲩⲉⲓ ⲛⲣⲟⲙⲡⲉ

24 ⲁⲩⲱ ⲁϥⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲡⲉϥⲥⲁϩⲱϥ ⲉⲃⲟⲗ ⲛⲛⲛⲟⲃⲉ ⲧⲏⲣⲟⲩ ⲛϩⲓⲉⲣⲟⲃⲟⲁⲙ ⲡϣⲏⲣⲉ ⲛⲛⲁⲃⲁⲧ ⲡⲉⲛⲧⲁϥⲧⲣⲉⲡⲓⲥⲣⲁⲏⲗ ⲣⲛⲟⲃⲉ

25 ⲛⲧⲟϥ ⲡⲉⲛⲧⲁϥⲡⲱⲱⲛⲉ ⲙⲡⲧⲟϣ ⲙⲡⲓⲥⲣⲁⲏⲗ ϫⲓ ⲛⲧⲉϩⲓⲏ ⲉϩⲟⲩⲛ ⲉⲏⲙⲁⲑ ϣⲁϩⲣⲁⲓ ⲉⲧⲉⲑⲁⲗⲁⲥⲥⲁ ⲛⲧⲡⲁⲣⲁⲃⲁ ⲕⲁⲧⲁⲡϣⲁϫⲉ ⲙⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲡⲉⲛⲧⲁϥϫⲟⲟϥ ⲉⲃⲟⲗ ϩⲛⲧⲟⲟⲧϥ ⲙⲡⲉϥϩⲙϩⲁⲗ ⲓⲱⲛⲁ ⲡϣⲏⲣⲉ ⲛⲁⲙⲁⲑⲉⲓ ⲡⲉⲡⲣⲟⲫⲏⲧⲏⲥ ⲡⲉⲃⲟⲗ ϩⲛⲉⲕⲅⲉⲑⲟⲃⲉⲣ

26 ⲉⲃⲟⲗ ϫⲉⲁⲡϫⲟⲉⲓⲥ ⲛⲁⲩ ⲉⲡⲉⲑⲃⲃⲓⲟ ⲙⲡⲓⲥⲣⲁⲏⲗ ⲉϥⲟⲩⲟϩⲉ ⲉⲙⲁⲧⲉ ⲁⲩⲱ ⲉⲁⲩⲥⲃⲟⲕ ⲉⲩϩⲏϣ ⲁⲩⲱ ⲉⲩϫⲟⲟⲣⲉ ⲉⲃⲟⲗ ⲁⲩⲱ ⲉⲁⲩⲕⲁⲁⲩ ⲛⲥⲱⲟⲩ ⲉⲙⲛⲡⲉⲧⲃⲟⲏⲑⲉⲓ ⲉⲡⲓⲥⲣⲁⲏⲗ

27 ⲙⲡⲉⲡϫⲟⲉⲓⲥ ⲇⲉ ϣⲁϫⲉ ⲉϥⲱⲧⲉ ⲉⲃⲟⲗ ⲙⲡⲉⲥⲡⲉⲣⲙⲁ ⲙⲡⲓⲥⲣⲁⲏⲗ ϩⲁⲣⲟⲥ ⲛⲧⲡⲉ ⲁⲩⲱ ⲁϥⲛⲁϩⲙⲟⲩ ϩⲛⲧⲟⲟⲧϥ ⲛϩⲓⲉⲣⲟⲃⲟⲁⲙ ⲡϣⲏⲣⲉ ⲛⲓⲱⲁⲥ

28 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲛϩⲓⲉⲣⲟⲃⲟⲁⲙ ⲡϣⲏⲣⲉ ⲛⲓⲱⲁⲥ ⲛⲉⲛⲧⲁϥⲁⲁⲩ ⲧⲏⲣⲟⲩ ⲁⲩⲱ ⲛⲉϥⲕⲉϭⲟⲙ ⲧⲏⲣⲟⲩ ⲛⲧⲁϥⲁⲁⲩ ⲉϥⲡⲟⲗⲉⲙⲉⲓ ⲁⲩⲱ ⲛⲉⲛⲧⲁϥⲁⲁⲩ ⲉⲧⲣⲉϥⲕⲧⲟ ⲛⲇⲁⲙⲁⲥⲕⲟⲥ ⲙⲛⲏⲙⲁⲑ ⲧⲡⲟⲗⲓⲥ ⲉⲣⲁⲧϥ ⲛⲓⲟⲩⲇⲁⲥ ϩⲙⲡⲓⲥⲣⲁⲏⲗ ⲙⲏ ⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

29 ⲁⲩⲱ ϩⲓⲉⲣⲟⲃⲟⲁⲙ ⲁϥⲛⲕⲟⲧⲕ ⲙⲛⲛⲉϥⲉⲓⲟⲧⲉ ⲙⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ ⲁⲍⲁⲣⲓⲁⲥ ⲇⲉ ⲡⲉϥϣⲏⲣⲉ ⲁϥⲣⲣⲣⲟ ⲉⲡⲉϥⲙⲁ