2 Kings 13 — Coptic (Sahidic)

1 ϩⲛⲧⲙⲉϩϫⲟⲩⲧϣⲟⲙⲧⲉ ⲇⲉ ⲣⲟⲙⲡⲉ ⲛⲓⲱⲁⲥ ⲡϣⲏⲣⲉ ⲛⲟⲭⲟⲍⲓⲁⲥ ⲡⲣⲣⲟ ⲛⲓⲟⲩⲇⲁⲥ ⲁϥⲣⲣⲣⲟ ⲛϭⲓⲓⲱⲁⲭⲁⲍ ⲡϣⲏⲣⲉ ⲛⲓⲟⲩ ϩⲛⲧⲥⲁⲙⲁⲣⲓⲁ ⲉϫⲙⲡⲓⲥⲣⲁⲏⲗ ⲙⲙⲛⲧⲥⲁϣϥⲉ ⲛⲣⲟⲙⲡⲉ

2 ⲁⲩⲱ ⲁϥⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁϥⲟⲩⲁϩϥ ⲛⲥⲁⲛⲛⲟⲃⲉ ⲛϩⲓⲉⲣⲟⲃⲟⲁⲙ ⲡϣⲏⲣⲉ ⲛⲛⲁⲃⲁⲧ ⲛⲧⲁϥⲧⲣⲉⲡⲓⲥⲣⲁⲏⲗ ⲣⲛⲟⲃⲉ ⲁⲩⲱ ⲙⲡⲉϥⲥⲁϩⲱϥ ⲉⲃⲟⲗ ϩⲙⲡⲉϥⲛⲟⲃⲉ

3 ⲡϫⲟⲉⲓⲥ ⲇⲉ ⲁϥⲛⲟⲩϭⲥ ϩⲛⲟⲩϭⲱⲛⲧ ⲉⲡⲓⲥⲣⲁⲏⲗ ⲁⲩⲱ ⲁϥⲧⲁⲁϥ ⲉϩⲣⲁⲓ ⲉⲧⲟⲟⲧϥ ⲛⲁⲍⲁⲏⲗ ⲡⲣⲣⲟ ⲛⲧⲥⲩⲣⲓⲁ ⲁⲩⲱ ⲉϩⲣⲁⲓ ⲉⲧⲟⲟⲧϥ ⲛⲁⲣⲁⲇ ⲡϣⲏⲣⲉ ⲛⲁⲍⲁⲏⲗ ⲛⲛⲉϩⲟⲟⲩ ⲧⲏⲣⲟⲩ

4 ⲓⲱⲁⲥ ⲇⲉ ⲁϥⲧⲉⲃϩⲡϩⲟ ⲙⲡϫⲟⲉⲓⲥ ⲁⲡϫⲟⲉⲓⲥ ⲥⲱⲧⲙ ⲉⲣⲟϥ ⲉⲃⲟⲗ ϫⲉⲁϥⲛⲁⲩ ⲉⲧⲉⲑⲗⲓⲯⲓⲥ ⲙⲡⲓⲥⲣⲁⲏⲗ ⲉⲧⲃⲉϫⲉⲁϥⲑⲗⲓⲃⲉ ⲙⲙⲟⲟⲩ ⲛϭⲓⲡⲣⲣⲟ ⲛⲧⲥⲩⲣⲓⲁ

5 ⲁⲩⲱ ⲡϫⲟⲉⲓⲥ ⲁϥϯ ⲛⲁⲩ ⲛⲟⲩⲟⲩϫⲁⲓ ⲁⲩⲗⲟ ⲉⲩϩⲁⲧⲟⲟⲧϥ ⲙⲡⲣⲣⲟ ⲛⲧⲥⲩⲣⲓⲁ ⲁⲩⲱ ⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲥⲙⲛⲧⲟⲩ ϩⲛⲛⲉⲩⲙⲁⲛϣⲱⲡⲉ ⲛⲧϩⲉ ⲛⲥⲁϥ ⲙⲛϣⲙⲧⲉ ⲡϩⲟⲟⲩ ⲛϩⲟⲟⲩ

6 ⲙⲡⲟⲩⲥⲁϩⲱⲟⲩ ⲇⲉ ⲉⲃⲟⲗ ⲛⲛⲛⲟⲃⲉ ⲙⲡⲏⲓ ⲛϩⲓⲉⲣⲟⲃⲟⲁⲙ ⲡⲉⲛⲧⲁϥⲧⲣⲉⲡⲓⲥⲣⲁⲏⲗ ⲣⲛⲟⲃⲉ ⲁⲗⲗⲁ ⲁⲩⲙⲟⲟϣⲉ ⲛϩⲏⲧⲟⲩ ⲡⲕⲉⲙⲁ ⲛϣⲏⲛ ⲇⲉ ⲁⲩⲥⲙⲛⲧϥ ϩⲛⲧⲥⲁⲙⲁⲣⲓⲁ

7 ϫⲉⲙⲡⲉⲗⲁⲁⲩ ⲥⲉⲉⲡⲉ ⲛⲓⲱⲁⲭⲁⲍ ⲛⲥⲁⲧⲁⲉⲓⲟⲩ ⲛϩⲓⲡⲡⲉⲩⲥ ⲁⲩⲱ ⲙⲏⲧ ⲛϩⲁⲣⲙⲁ ⲁⲩⲱ ⲟⲩⲧⲃⲁ ⲙⲡⲉⲍⲟⲥ ⲏ ⲣⲙⲛⲣⲁⲧⲟⲩ ⲉⲃⲟⲗ ϫⲉⲁϥⲧⲁⲕⲉⲡⲉⲩⲙⲏⲏϣⲉ ⲛϭⲓⲡⲣⲣⲟ ⲛⲧⲥⲩⲣⲓⲁ ⲁⲩⲱ ⲁϥⲕⲁⲁⲩ ⲛⲧϩⲉ ⲛⲟⲩⲕⲁϩ ⲉⲧⲣⲉⲩϩⲱⲙ ϩⲓϫⲱⲟⲩ

8 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲛⲓⲱⲁⲭⲁⲍ ⲙⲛⲛⲕⲉϩⲃⲏⲩⲉ ⲧⲏⲣⲟⲩ ⲛⲧⲁϥⲁⲁⲩ ⲙⲛⲛⲉϥϭⲉϭⲟⲙ ⲙⲏ ⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

9 ⲁⲩⲱ ⲓⲱⲁⲭⲁⲍ ⲁϥⲛⲕⲟⲧⲕ ⲙⲛⲛⲉϥⲉⲓⲟⲧⲉ ⲁⲩⲧⲟⲙⲥϥ ϩⲁϩⲧⲏ ⲛⲛⲉϥⲉⲓⲟⲧⲉ ϩⲛⲧⲥⲁⲙⲁⲣⲓⲁ ⲓⲱⲁⲥ ⲇⲉ ⲡⲉϥϣⲏⲣⲉ ⲁϥⲣⲣⲣⲟ ⲉⲡⲉϥⲙⲁ

10 ϩⲛⲧⲙⲉϩⲙⲁⲁⲃ ⲥⲁϣϥⲉ ⲛⲣⲟⲙⲡⲉ ⲛⲓⲱⲁⲥ ⲡⲣⲣⲟ ⲛⲓⲟⲩⲇⲁ ⲁϥⲣⲣⲣⲟ ⲛϭⲓⲓⲱⲁⲥ ⲡϣⲏⲣⲉ ⲛⲓⲱⲁⲭⲁⲍ ⲉϫⲙⲡⲓⲥⲣⲁⲏⲗ ϩⲛⲧⲥⲁⲙⲁⲣⲓⲁ ⲙⲙⲛⲧⲁⲥⲉ ⲛⲣⲟⲙⲡⲉ

11 ⲁⲩⲱ ⲁϥⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲡⲉϥⲥⲁϩⲱϥ ⲉⲃⲟⲗ ⲛⲛⲛⲟⲃⲉ ⲛϩⲓⲉⲣⲟⲃⲟⲁⲙ ⲡⲉⲛⲧⲁϥⲧⲣⲉⲡⲓⲥⲣⲁⲏⲗ ⲣⲛⲟⲃⲉ ⲁⲗⲗⲁ ⲁϥⲙⲟⲟϣⲉ ⲛϩⲏⲧⲟⲩ

12 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲛⲓⲱⲁⲥ ⲙⲛⲛⲕⲉϩⲃⲏⲩⲉ ⲧⲏⲣⲟⲩ ⲁⲩⲱ ⲧⲉϥϭⲟⲙ ⲛⲧⲁϥⲁⲁⲥ ⲙⲛⲁⲙⲉⲥⲥⲓⲁⲥ ⲡⲣⲣⲟ ⲛⲓⲟⲩⲇⲁⲥ ⲙⲛⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

13 ⲁⲩⲱ ⲓⲱⲁⲥ ⲁϥⲛⲧⲟⲧⲕ ⲙⲛⲛⲉϥⲉⲓⲟⲧⲉ ϩⲓⲉⲣⲟⲃⲟⲁⲙ ⲇⲉ ⲁϥⲣⲣⲣⲟ ϩⲓϫⲙⲡⲉϥⲑⲣⲟⲛⲟⲥ ϩⲛⲧⲥⲁⲙⲁⲣⲓⲁ ⲁⲩⲱ ⲓⲱⲁⲥ ⲁⲩⲧⲟⲙⲥϥ ϩⲛⲧⲥⲁⲙⲁⲣⲓⲁ ⲙⲛⲛⲉⲣⲣⲱⲟⲩ ⲙⲡⲓⲥⲣⲁⲏⲗ

14 ⲉⲗⲓⲥⲁⲓⲟⲥ ⲇⲉ ⲡⲉⲡⲣⲟⲫⲏⲧⲏⲥ ⲁϥϣⲱⲛⲉ ϩⲙⲡⲉϥϣⲱⲛⲉ ⲛⲧⲁϥⲙⲟⲩ ⲉⲧⲃⲏⲏⲧϥ ⲁⲩⲱ ⲓⲱⲁⲥ ⲡⲣⲣⲟ ⲙⲡⲓⲥⲣⲁⲏⲗ ⲁϥⲧⲱⲟⲩⲛ ⲁϥⲉⲓ ϣⲁⲣⲟϥ ⲁϥⲡⲁϩⲧϥ ⲉϩⲣⲁⲓ ⲉϫⲱϥ ⲁϥⲣⲓⲙⲉ ⲉϥϫⲱ ⲙⲙⲟⲥ ϫⲉⲡⲁⲉⲓⲱⲧ ⲡⲁⲉⲓⲱⲧ ⲡϩⲁⲣⲙⲁ ⲙⲡⲓⲥⲣⲁⲏⲗ ⲁⲩⲱ ⲛⲉϥϩⲓⲡⲡⲉⲩⲥ

15 ⲉⲗⲓⲥⲁⲓⲟⲥ ⲇⲉ ⲡⲉϫⲁϥ ⲛⲁϥ ϫⲉϫⲓ ⲛⲁⲓ ⲛⲟⲩⲡⲓⲧⲉ ⲙⲛϩⲉⲛⲥⲟⲧⲉ ⲁⲩϫⲓ ⲛⲁϥ ⲛⲟⲩⲡⲓⲧⲉ ⲙⲛϩⲉⲛⲥⲟⲧⲉ

16 ⲁⲩⲱ ⲡⲉϫⲉⲉⲗⲓⲥⲁⲓⲟⲥ ⲙⲡⲣⲣⲟ ϫⲉⲟⲩⲉϩⲧⲟⲟⲧⲕ ⲉϫⲛⲧⲉⲓⲡⲓⲧⲉ ⲓⲱⲁⲥ ⲇⲉ ⲁϥⲟⲩⲉϩⲧⲟⲟⲧϥ ⲉϫⲛⲧⲡⲓⲧⲉ ⲉⲗⲓⲥⲁⲓⲟⲥ ⲇⲉ ϩⲱⲱϥ ⲁϥⲟⲩⲉϩⲧⲟⲟⲧϥ ⲉϫⲛⲧϭⲓϫ ⲙⲡⲣⲣⲟ ⲁⲩⲱ ⲡⲉϫⲉⲉⲗⲓⲥⲁⲓⲟⲥ ⲛⲁϥ

17 ϫⲉⲟⲩⲱⲛ ⲙⲡϣⲟⲩϣⲧ ⲉⲧϩⲓⲡⲥⲁ ⲛⲉⲓⲃⲧ ⲁϥⲟⲩⲱⲛ ⲙⲙⲟϥ ⲡⲉϫⲉⲉⲗⲓⲥⲁⲓⲟⲥ ϫⲉⲛⲉϫⲥⲟⲧⲉ ⲉⲃⲟⲗ ⲁⲩⲱ ⲡⲣⲣⲟ ⲁϥⲛⲉϫⲥⲟⲧⲉ ⲡⲉϫⲉⲉⲗⲓⲥⲁⲓⲟⲥ ⲛⲁϥ ϫⲉⲡⲥⲟⲧⲉ ⲙⲡⲟⲩϫⲁⲓ ⲡⲁⲡϫⲟⲉⲓⲥ ⲁⲩⲱ ⲡⲥⲟⲧⲉ ⲙⲡⲟⲩϫⲁⲓ ϥⲛⲁⲉⲓ ⲉϫⲛⲧⲥⲩⲣⲓⲁ ⲕⲛⲁⲡⲁⲧⲁⲥⲥⲉⲓ ϭⲉ ⲛⲧⲥⲩⲣⲓⲁ ϩⲛⲁⲫⲉⲕ ϣⲁⲃⲟⲗ

18 ⲡⲉϫⲉⲉⲗⲓⲥⲁⲓⲟⲥ ⲟⲛ ⲛⲁϥ ϫⲉϫⲓ ⲛϩⲉⲛⲥⲟⲧⲉ ⲁϥϫⲓⲧⲟⲩ ⲁⲩⲱ ⲡⲉϫⲁϥ ⲙⲡⲣⲣⲟ ⲙⲡⲓⲥⲣⲁⲏⲗ ϫⲉϫⲱⲗⲕ ⲛⲅⲛⲟⲩϫⲉ ⲙⲙⲟⲟⲩ ⲉϩⲣⲁⲓ ⲉⲡⲕⲁϩ ⲁⲩⲱ ⲡⲣⲣⲟ ⲁϥϫⲱⲗⲕ ⲁϥⲛⲉϫⲥⲟⲧⲉ ⲉⲡⲕⲁϩ ⲛϣⲟⲙⲛⲧ ⲛⲥⲟⲡ ⲁϥϩⲱ ⲉⲣⲟϥ

19 ⲡⲣⲱⲙⲉ ⲇⲉ ⲙⲡⲛⲟⲩⲧⲉ ⲁϥⲙⲕⲁϩ ⲛϩⲏⲧ ⲉϩⲣⲁⲓ ⲉϫⲱϥ ⲡⲉϫⲁϥ ⲛⲁϥ ϫⲉⲉⲛⲉⲛⲧⲁⲕⲛⲉϫⲥⲟⲧⲉ ⲛⲁϯⲟⲩ ⲛⲥⲟⲡ ⲏ ⲥⲟⲟⲩ ⲛⲥⲟⲛ ⲛⲉⲕⲛⲁⲡⲁⲧⲁⲥⲥⲉⲓ ⲛⲧⲥⲩⲣⲓⲁ ϣⲁⲛⲧⲥⲱϫⲛ ⲧⲉⲛⲟⲩ ϭⲉ ⲕⲛⲁⲡⲁⲧⲁⲥⲥⲉⲓ ⲛⲧⲥⲩⲣⲓⲁ ⲛϣⲟⲙⲛⲧ ⲛⲥⲟⲡ

20 ⲉⲗⲓⲥⲁⲓⲟⲥ ⲇⲉ ⲁϥⲙⲟⲩ ⲁⲩⲧⲟⲙⲥϥ ϩⲉⲛⲙⲟⲛⲟⲍⲱⲛⲟⲥ ⲇⲉ ⲛⲧⲉⲙⲱⲁⲃ ⲁⲩⲉⲓ ⲉϩⲣⲁⲓ ⲉⲡⲕⲁϩ ⲛⲧⲉⲣⲉⲣⲟⲙⲡⲉ ϫⲱⲕ

21 ⲁⲥϣⲱⲡⲉ ⲇⲉ ⲛⲧⲟⲟⲩ ⲉⲩⲧⲱⲙⲥ ⲛⲟⲩⲣⲱⲙⲉ ⲁⲩⲱ ⲉⲓⲥ ϩⲏⲏⲧⲉ ⲁⲩϯϩⲧⲏⲩ ⲉⲡⲙⲟⲛⲟⲍⲱⲛⲟⲥ ⲁⲩⲱ ⲁⲩⲛⲟⲩϫⲉ ⲙⲡⲣⲱⲙⲉ ⲉϩⲟⲩⲛ ⲉⲡⲧⲁⲫⲟⲥ ⲛⲉⲗⲓⲥⲁⲓⲟⲥ ⲁⲩⲙⲟⲟϣⲉ ⲡⲣⲱⲙⲉ ⲇⲉ ⲁϥϫⲱϩ ⲉⲛⲕⲉⲉⲥ ⲛⲉⲗⲓⲥⲁⲓⲟⲥ ⲁϥⲱⲛϩ ⲁϥⲧⲱⲟⲩⲛ ⲁϥⲁϩⲉⲣⲁⲧϥ

22 ⲁⲍⲁⲏⲗ ⲇⲉ ⲁϥⲑⲗⲓⲃⲉ ⲙⲡⲓⲥⲣⲁⲏⲗ ⲛⲛⲉϩⲟⲟⲩ ⲧⲏⲣⲟⲩ ⲛⲓⲱⲁⲭⲁⲍ

23 ⲡϫⲟⲉⲓⲥ ⲇⲉ ⲁϥⲛⲁ ⲛⲁⲩ ⲁⲩⲱ ⲁϥϣⲉⲛⲉϩⲧⲏϥ ϩⲁⲣⲟⲟⲩ ⲁⲩⲱ ⲁϥϭⲱϣⲧ ⲉϩⲣⲁⲓ ⲉϫⲱⲟⲩ ⲉⲧⲃⲉⲧⲉϥⲇⲓⲁⲑⲏⲕⲏ ⲛⲧⲁϥⲥⲙⲛⲧⲥ ⲙⲛⲁⲃⲣⲁϩⲁⲙ ⲁⲩⲱ ⲙⲛⲓⲥⲁⲁⲕ ⲙⲛⲓⲁⲕⲱⲃ ⲙⲡⲉⲡϫⲟⲉⲓⲥ ⲣϩⲛⲁⲩ ⲉⲧⲁⲕⲟⲟⲩ ⲁⲩⲱ ⲙⲡⲉϥⲣϩⲛⲁϥ ⲉⲛⲟϫⲟⲩ ⲉⲃⲟⲗ ϩⲁⲡⲉϥϩⲟ

24 ⲁⲍⲁⲏⲗ ⲇⲉ ⲡⲣⲣⲟ ⲛⲧⲥⲩⲣⲓⲁ ⲁϥⲙⲟⲩ ⲁⲩⲱ ⲃⲉⲛⲁⲇⲁⲃ ⲡⲉϥϣⲏⲣⲉ ⲁϥⲣⲣⲣⲟ ⲉⲡⲉϥⲙⲁ

25 ⲁϥⲕⲧⲟϥ ⲇⲉ ⲛϭⲓⲓⲱⲁⲥ ⲡϣⲏⲣⲉ ⲛⲓⲱⲁⲭⲁⲍ ⲁϥϫⲓ ⲛⲙⲡⲟⲗⲓⲥ ⲛⲧⲟⲟⲧϥ ⲛⲃⲉⲛⲁⲇⲁⲃ ⲡϣⲏⲣⲉ ⲛⲁⲍⲁⲏⲗ ⲛⲁⲓ ⲛⲧⲁϥϫⲓⲧⲟⲩ ⲛⲧⲟⲟⲧϥ ⲛⲓⲱⲁⲭⲁⲍ ⲡⲉϥⲉⲓⲱⲧ ϩⲙⲡⲡⲟⲗⲉⲙⲟⲥ ⲁⲩⲱ ⲓⲱⲁⲥ ⲁϥⲡⲁⲧⲁⲥⲥⲉⲓ ⲙⲙⲟϥ ⲛϣⲟⲙⲛⲧ ⲛⲥⲟⲡ ⲁⲩⲱ ⲁϥⲕⲧⲟ ⲉⲣⲟϥ ⲛⲙⲡⲟⲗⲓⲥ ⲙⲡⲓⲥⲣⲁⲏⲗ