2 Kings 12 — Coptic (Sahidic)

1 ⲁⲩⲱ ϩⲛⲧⲙⲉϩⲥⲁϣϥⲉ ⲛⲣⲟⲙⲡⲉ ⲛⲉⲓⲟⲩ ⲡⲣⲣⲟ ⲙⲡⲓⲥⲣⲁⲏⲗ ⲓⲱⲁⲥ ⲁϥⲣⲣⲣⲟ ⲁⲩⲱ ϩⲙⲉ ⲛⲣⲟⲙⲡⲉⲉ ⲁϥⲁⲁⲩ ⲉϥⲟ ⲛⲣⲣⲟ ϩⲛⲧϩⲓⲉⲣⲟⲩⲥⲁⲗⲏⲙ ⲡⲣⲁⲛ ⲇⲉ ⲛⲧⲉϥⲙⲁⲁⲩ ⲧⲉ ⲁⲅⲓⲁⲃ ⲉⲃⲟⲗ ϩⲙⲡⲕⲁϩ ⲛⲃⲏⲣⲥⲁⲃⲉⲉ

2 ⲁⲩⲱ ⲓⲱⲁⲥ ⲁϥⲉⲓⲣⲉ ⲙⲡⲉⲧⲥⲟⲩⲧⲱⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲛⲉϩⲟⲟⲩ ⲧⲏⲣⲟⲩ ⲛⲧⲁϥⲁⲁⲩ ⲛϭⲓⲓⲱⲇⲁⲉ ⲡⲟⲩⲏⲏⲃ ⲉϥϯⲥⲃⲱ ⲛⲁϥ ⲛϩⲏⲧⲟⲩ

3 ϣⲁⲧⲛ ⲙⲙⲁ ⲇⲉ ⲉⲧϫⲟⲥⲉ ⲉⲧⲉⲙⲡⲉϥϥⲓⲧⲟⲩ ⲙⲙⲁⲩ ⲁⲗⲗⲁ ⲉⲧⲓ ⲛⲉⲣⲉⲡⲗⲁⲟⲥ ⲟⲛ ⲑⲩⲥⲓⲁⲍⲉ ϩⲓϫⲱⲟⲩ ⲁⲩⲱ ⲛⲉⲩϯϩⲏⲛⲉ ⲉϩⲣⲁⲓ ϩⲓϫⲛⲙⲙⲁ ⲉⲧϫⲟⲥⲉ

4 ⲓⲱⲁⲥ ⲇⲉ ⲡⲣⲣⲟ ⲡⲉϥⲁϫ ⲉϩⲟⲩⲛ ϩⲛⲛⲟⲩⲏⲏⲃ ϫⲉⲡϩⲁⲧ ⲧⲏⲣϥ ⲛⲛⲉⲧⲟⲩⲁⲁⲃ ⲛⲛⲉⲣⲏⲧ ⲡⲉⲧⲟⲩⲛⲁⲉⲓⲛⲉ ⲙⲙⲟϥ ⲉϩⲟⲩⲛ ⲉⲡⲏⲓ ⲙⲡϫⲟⲉⲓⲥ ⲡϩⲁⲧ ⲙⲡⲥⲱⲧⲉ ⲙⲡⲣⲱⲙⲉ ϩⲁⲧⲏⲡⲉ ⲛⲛⲉⲩⲯⲩⲭⲏ ⲉⲧⲉⲡϩⲁⲧ ⲡⲉ ⲙⲡⲥⲱⲧⲉ ⲙⲡⲣⲱⲙⲉ ⲡϩⲁⲧ ⲧⲏⲣϥ ⲉⲧⲉⲣⲉⲡⲣⲱⲙⲉ ⲛⲁⲧⲱϣ ⲉⲣⲟϥ ϩⲙⲡⲉϥϩⲏⲧ ⲉⲧⲣⲉϥⲉⲓⲛⲉ ⲙⲙⲟϥ ⲉϩⲟⲩⲛ ⲉⲡⲏⲓ ⲙⲡϫⲟⲉⲓⲥ

5 ⲙⲁⲣⲟⲩϫⲓⲧϥ ⲛⲁⲩ ⲛϭⲓⲛⲟⲩⲏⲏⲃ ⲡϩⲁⲧ ⲙⲡⲥⲱⲧⲉ ⲙⲡⲣⲱⲙⲉ ⲉⲧϥⲛⲁⲉⲓⲛⲉ ⲙⲙⲟϥ ⲁⲩⲱ ⲛⲧⲟⲟⲩ ⲙⲁⲣⲟⲩⲧⲁϫⲣⲉⲡⲃⲉⲍⲉⲕ ⲉⲧⲉⲡⲧⲱϣ ⲡⲉ ⲙⲡⲏⲓ ⲡⲥⲟⲃⲧⲉ ⲧⲏⲣϥ ⲉⲧⲟⲩⲛⲁϩⲉ ⲉⲣⲟϥ ⲉⲁⲁϥ ϩⲙⲡϩⲁⲧ ⲉⲧⲟⲩⲛⲁⲉⲓⲛⲉ ⲙⲙⲟϥ ⲉϩⲟⲩⲛ

6 ⲁⲥϣⲱⲡⲉ ⲇⲉ ϩⲛⲧⲙⲉϩϫⲟⲩⲧϣⲟⲙⲧⲉ ⲛⲣⲟⲙⲡⲉ ⲙⲡⲣⲣⲟ ⲓⲱⲁⲥ ⲙⲡⲉⲛⲟⲩⲏⲏⲃ ⲧⲁϫⲣⲉⲡⲃⲉⲍⲉⲕ ⲉⲧⲉⲡⲧⲱϣ ⲡⲉ ⲙⲡⲏⲓ

7 ⲁⲩⲱ ⲡⲣⲣⲟ ⲓⲱⲁⲥ ⲁϥⲙⲟⲩⲧⲉ ⲉⲓⲱⲇⲁⲉ ⲡⲛⲟϭ ⲛⲟⲩⲏⲏⲃ ⲙⲛⲛⲕⲉⲟⲩⲏⲏⲃ ⲡⲉϫⲁϥ ⲛⲁⲩ ϫⲉⲉⲧⲃⲉⲟⲩ ⲛⲧⲉⲧⲛⲧⲁϫⲣⲟ ⲁⲛ ⲙⲡⲃⲉⲍⲉⲕ ⲉⲧⲉⲡⲧⲱϣ ⲡⲉ ⲙⲡⲏⲓ ⲧⲉⲛⲟⲩ ϭⲉ ⲙⲡⲣϫⲓϩⲁⲧ ⲛⲧⲟⲟⲧⲟⲩ ⲛⲛⲣⲱⲙⲉ ⲉⲃⲟⲗ ϩⲛⲛⲉⲩⲥⲱⲧⲉ ⲉⲡⲉⲧⲛⲧⲱϣ ⲛⲧⲱⲧⲛ ⲁⲗⲗⲁ ⲉⲧⲉⲧⲛⲛⲁⲧⲁⲁϥ ⲙⲡⲃⲉⲍⲉⲕ ⲉⲧⲉⲡⲧⲱϣ ⲡⲉ ⲙⲡⲏⲓ

8 ⲁⲩⲱ ⲛⲟⲩⲏⲏⲃ ⲁⲩⲥⲩⲙⲫⲱⲛⲉⲓ ϩⲓⲟⲩⲥⲟⲡ ⲉⲧⲙϫⲓ ϩⲁⲧ ⲛⲧⲟⲟⲧϥ ⲙⲡⲗⲁⲟⲥ ⲁⲩⲱ ⲉⲧⲙⲧⲁϩⲟ ⲉⲣⲁⲧϥ ⲙⲡⲃⲉⲍⲉⲕ ⲙⲡⲏⲓ

9 ⲓⲱⲇⲁⲉ ⲇⲉ ⲡⲟⲩⲏⲏⲃ ⲁϥϫⲓ ⲛⲟⲩⲕⲓⲃⲱⲧⲟⲥ ⲏ ⲟⲩϫⲟⲟⲛⲉ ⲁⲩⲱ ⲁϥϭⲟⲧϩⲥ ⲉⲡⲉⲥⲥⲱⲙⲁ ⲁⲩⲱ ⲁϥⲕⲁⲁⲥ ⲙⲡⲉⲙⲧⲟ ⲉⲃⲟⲗ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲛⲥⲁⲟⲩⲛⲁⲙ ⲙⲙⲟϥ ⲉⲧⲣⲉⲡⲟⲩⲁ ⲡⲟⲩⲁ ⲙⲙⲟⲟⲩ ⲣⲁⲗⲱⲧ ϩⲙⲡⲏⲓ ⲙⲡϫⲟⲉⲓⲥ ⲁⲩⲱ ⲛⲟⲩⲏⲏⲃ ⲉⲧⲣⲟⲉⲓⲥ ⲉⲡⲧⲱϣ ⲙⲡⲣⲡⲣ ⲁⲩϯ ⲙⲡϩⲁⲧ ⲧⲏⲣϥ ⲉⲧⲟⲩⲉⲓⲛⲉ ⲙⲙⲟϥ ⲉϩⲟⲩⲛ ⲉⲡⲏⲓ ⲙⲡϫⲟⲉⲓⲥ

10 ⲁⲥϣⲱⲡⲉ ⲇⲉ ⲛⲧⲉⲣⲟⲩⲛⲁⲩ ϫⲉⲁⲡϩⲁⲧ ⲣϩⲟⲩⲟ ⲉⲧϩⲛⲧⲕⲓⲃⲱⲧⲟⲥ ⲏ ⲧϫⲟⲟⲛⲉ ⲁϥⲉⲓ ⲉϩⲣⲁⲓ ⲛϭⲓⲡⲉⲅⲣⲁⲙⲙⲁⲧⲉⲩⲥ ⲙⲡⲣⲣⲟ ⲁⲩⲱ ⲡⲛⲟϭ ⲛⲟⲩⲏⲏⲃ ⲁϥⲟⲩⲱⲛ ⲉⲣⲟⲥ ⲁⲩϩⲙⲟⲟⲥ ⲁⲩϫⲓⲏⲏⲡⲉ ⲙⲡϩⲁⲧ ⲧⲏⲣϥ ⲛⲧⲁⲩϩⲉ ⲉⲣⲟϥ ϩⲙⲡⲏⲓ ⲙⲡϫⲟⲉⲓⲥ

11 ⲁⲩⲱ ⲁⲩϯ ⲙⲡϩⲁⲧ ⲛⲧⲁϥⲥⲟⲃⲧⲉ ⲉϩⲣⲁⲓ ⲉⲧⲟⲟⲧⲟⲩ ⲛⲛⲉⲧⲉⲓⲣⲉ ⲛⲛⲉϩⲃⲏⲩⲉ ⲛⲉⲧⲉⲓⲣⲉ ⲙⲡⲧⲱϣ ⲙⲡⲏⲓ ⲙⲡϫⲟⲉⲓⲥ ⲁⲩⲱ ⲁⲩϯ ⲙⲙⲟϥ ⲛⲛⲣⲉϥⲣⲉⲓⲟⲡⲉ ⲛϣⲉ ⲁⲩⲱ ⲛⲉⲕⲟⲧⲉ ⲛⲉⲧⲣϩⲱⲃ ⲉⲡⲏⲓ ⲙⲡϫⲟⲉⲓⲥ ⲁⲩⲱ ⲛⲛⲉⲧⲧⲱϣ ⲛⲛⲉϩⲃⲏⲩⲉ ⲙⲛⲛⲗⲁⲧⲟⲙⲟⲥ ⲛⲛⲱⲛⲉ

12 ⲉⲧⲣⲉⲩϣⲱⲡ ⲛϩⲉⲛϣⲉ ⲙⲛϩⲉⲛⲱⲛⲉ ⲉⲩⲕⲉϩⲕⲱϩ ⲉⲧⲣⲉⲩⲧⲁϩⲟ ⲉⲣⲁⲧϥ ⲙⲡⲃⲉⲍⲉⲕ ⲙⲡⲏⲓ ⲙⲡϫⲟⲉⲓⲥ ⲉϩⲱⲃ ⲛⲓⲙ ⲛⲧⲁⲩϯϩⲁⲧ ⲉⲣⲟϥ ⲉϫⲙⲡⲏⲓ ⲉⲧⲁϫⲣⲟϥ

13 ⲡⲗⲏⲛ ⲛⲥⲉⲛⲁⲙⲟⲩⲛⲅ ⲁⲛ ⲙⲡⲏⲓ ⲛⲟⲩⲣⲟ ⲛϩⲁⲧ ⲏ ϩⲉⲛⲉⲓⲃⲧ ⲏ ϩⲉⲛⲫⲓⲁⲗⲏ ⲏ ϩⲉⲛⲥⲁⲗⲡⲓⲅⲝ ⲥⲕⲉⲩⲟⲥ ⲛⲓⲙ ⲛⲛⲟⲩⲃ ⲁⲩⲱ ⲥⲕⲉⲩⲟⲥ ⲛⲓⲙ ⲛϩⲁⲧ ⲛⲛⲉⲩⲙⲟⲛⲕⲟⲩ ⲉⲃⲟⲗ ϩⲙⲡϩⲁⲧ ⲛⲧⲁⲩⲛⲧϥ ⲉϩⲟⲩⲛ ⲉⲡⲏⲓ ⲙⲡϫⲟⲉⲓⲥ

14 ϫⲉⲛⲉⲧⲉⲓⲣⲉ ⲛⲛⲉⲓϩⲃⲏⲩⲉ ⲉⲩⲛⲁϯ ⲛⲁⲩ ⲙⲡϩⲁⲧ ⲁⲩⲱ ⲁⲩⲧⲁϫⲣⲟ ϩⲣⲁⲓ ⲛϩⲏⲧϥ ⲙⲡⲓⲕⲟⲥ ⲙⲡϫⲟⲉⲓⲥ

15 ⲁⲩⲱ ⲛⲉⲩⲗⲟⲅⲓⲍⲉ ⲁⲛ ⲛⲛⲣⲱⲙⲉ ⲛⲁⲓ ⲉⲧⲟⲩϯ ⲛⲁⲩ ⲙⲡϩⲁⲧ ⲉϩⲣⲁⲓ ⲉⲧⲟⲟⲧⲟⲩ ⲉⲧⲣⲉⲩϯ ⲙⲙⲟϥ ⲛⲛⲉⲧⲉⲓⲣⲉ ⲛⲛⲉϩⲃⲏⲩⲉ ⲉⲃⲟⲗ ϫⲉⲛⲉⲩⲣϩⲱⲃ ϩⲙⲡⲉⲩⲛⲁϩⲧⲉ

16 ⲟⲩϩⲁⲧ ⲉⲧⲃⲉⲛⲟⲃⲉ ⲁⲩⲱ ⲟⲩϩⲁⲧ ⲉⲧⲃⲉⲙⲛⲧⲣϩⲁⲗ ⲛⲛⲉⲩϫⲓⲧϥ ⲉϩⲟⲩⲛ ⲉⲡⲏⲓ ⲙⲡϫⲟⲉⲓⲥ ⲁⲗⲗⲁ ⲉⲛⲉϣⲁϥⲱⲡ ⲉⲛⲟⲩⲏⲏⲃ

17 ⲧⲟⲧⲉ ⲁⲍⲁⲏⲗ ⲡⲣⲣⲟ ⲛⲧⲥⲩⲣⲓⲁ ⲁϥⲃⲱⲕ ⲉϩⲣⲁⲓ ⲁϥⲡⲟⲗⲉⲙⲉⲓ ⲙⲛⲅⲉⲑ ⲁϥϭⲙϭⲟⲙ ⲉϫⲓⲧⲥ ⲁⲩⲱ ⲁⲍⲁⲏⲗ ⲁϥϯϩⲣⲁϥ ⲁϥⲃⲱⲕ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ

18 ⲁⲩⲱ ⲓⲱⲁⲥ ⲡⲣⲣⲟ ⲛⲓⲟⲩⲇⲁⲥ ⲁϥϫⲓ ⲛⲛⲉϩⲛⲁⲁⲩ ⲧⲏⲣⲟⲩ ⲛⲁⲓ ⲛⲧⲁⲩⲧⲃⲃⲟⲟⲩ ⲛϭⲓⲓⲱⲥⲁϥⲁⲧ ⲙⲛⲓⲱⲣⲁⲙ ⲁⲩⲱ ⲟⲭⲟⲍⲓⲁⲥ ⲛⲉϥⲉⲓⲟⲧⲉ ⲉⲧⲉⲛⲉⲣⲣⲱⲟⲩ ⲛⲓⲟⲩⲇⲁⲥ ⲁⲩⲱ ⲛⲟⲩϥ ϩⲱⲱϥ ⲛⲧⲁϥⲧⲃⲃⲟⲟⲩ ⲛⲛⲉⲛⲧⲁϥⲉⲣⲏⲧ ⲙⲙⲟⲟⲩ ⲁⲩⲱ ⲡⲛⲟⲩⲃ ⲧⲏⲣϥ ⲛⲧⲁⲩϩⲉ ⲉⲣⲟϥ ϩⲛⲛⲁϩⲱⲱⲣ ⲙⲡⲏⲓ ⲙⲡϫⲟⲉⲓⲥ ⲁⲩⲱ ϩⲙⲡⲏⲓ ⲙⲡⲣⲣⲟ ⲁϥϫⲟⲟⲩⲥⲟⲩ ⲛⲁⲍⲁⲏⲗ ⲡⲣⲣⲟ ⲛⲧⲥⲩⲣⲓⲁ ⲁϥⲧⲱⲟⲩⲛ ⲁϥⲗⲟ ⲙⲙⲁⲩ ϩⲓⲣⲛ ⲧϩⲓⲉⲣⲟⲩⲥⲁⲗⲏⲙ

19 ⲡⲕⲉⲥⲉⲉⲡⲉ ⲇⲉ ⲛⲛϣⲁϫⲉ ⲛⲓⲱⲁⲥ ⲙⲛⲛⲕⲉϩⲃⲏⲩⲉ ⲧⲏⲣⲟⲩ ⲛⲧⲁϥⲁⲁⲩ ⲙⲏ ⲛⲁⲓ ⲛⲥⲉⲥϩⲏⲩⲧ ⲁⲛ ⲉⲡϫⲱⲱⲙⲉ ⲛⲛϣⲁϫⲉ ⲛⲛⲉϩⲟⲟⲩ ⲛⲛⲉⲣⲣⲱⲟⲩ ⲛⲓⲟⲩⲇⲁⲥ

20 ⲁⲩⲧⲱⲟⲩⲛ ⲇⲉ ⲛϭⲓⲛⲉϥϩⲙϩⲁⲗ ⲁⲩⲉⲓⲣⲉ ⲛⲟⲩⲛⲟϭ ⲙⲙⲣⲣⲉ ⲛϣⲟϫⲛⲉ ⲙⲛⲛⲉⲩⲉⲣⲏⲩ ⲁⲩⲡⲁⲧⲁⲥⲥⲉⲓ ⲛⲓⲱⲁⲥ ϩⲙⲡⲏⲓ ⲙⲙⲁ ⲁⲗⲗⲱ ⲛⲡⲉⲧⲛⲏⲩ ⲉϩⲣⲁⲓ ⲉⲥⲉⲗⲗⲱ

21 ⲁⲩⲱ ⲓⲥⲥⲁⲭⲁⲣ ⲡϣⲏⲣⲉ ⲛⲓⲉⲙⲟⲩⲑⲓ ⲁⲩⲱ ⲓⲱⲍⲁⲃⲁⲑ ⲡϣⲏⲣⲉ ⲛⲍⲱⲙⲏⲣ ⲛⲉϥϩⲙϩⲁⲗ ⲛⲧⲟⲟⲩ ⲁⲩⲧⲱⲟⲩⲛ ⲁⲩⲡⲁⲧⲁⲥⲥⲉⲓ ⲙⲙⲟϥ ⲁϥⲙⲟⲩ ⲁⲩⲧⲟⲙⲥϥ ⲙⲛⲛⲉϥⲉⲓⲟⲧⲉ ϩⲛⲧⲡⲟⲗⲓⲥ ⲛⲇⲁⲩⲉⲓⲇ ⲁⲙⲉⲥⲥⲓⲁⲥ ⲇⲉ ⲡⲉϥϣⲏⲣⲉ ⲁϥⲣⲣⲣⲟ ⲉⲡⲉϥⲙⲁ