Read 2 Esdras 12 side by side with translations · The Final Bible
1 ܘܗ̣ܘܐ ܕܟܕ ܡܠܠ ܗܘܐ ܐܪܝܐ ܡ̈ܠܐ ܗܠܝܢ ܠܘܬ ܢܫܪܐ̣ ܚܙܝ̇ܬ
2 ܘܗܐ ܪܝܫܐ ܗ̇ܘ ܕܐܫܬܚܪ ܐܬܚܒܠ ܡܢ ܫܠܝܐ ܘܗ̇ܝܕܝܢ ܗ̇ܢܘܢ ܬܪܝܢ ܓܦ̈ܐ ܕܐܙ̣ܠܘ ܠܘܬܗ̣ ܩܡ̇ܘ ܐܝܟ ܕܢܫܬܠܛܘܢ ܘܠܪ̈ܝܫܢܘܬܗܘܢ ܢܗܘܐ ܫܘܠܡܐ ܘܫܓܘܫܝܐ ܬܗܘܐ ܡܠܝ̣ܐ
3 ܘܚ̇ܙܝܬ ܕܐܦ ܗ̣ܢܘܢ ܐܬܚܒܠܘ ܘܟܠܗ ܦܓܪܗ ܕܢܫܪܐ ܝܩ̇ܕ ܗܘܐ ܐܪܥܐ ܕܝܢ ܬܡܝܗܐ ܗܘܬ ܣ̇ܓܝ ܐܢܐ ܕܝܢ ܡܢ ܣܘܓܐܐ ܕܙܘܥܬܐ ܘܡܢ ܕܚܠܬܐ ܪܒܬܐ ܐܬ̇ܬܥܝܪܬ ܘܐܡ̇ܪܬ ܠܪܘܚܝ
4 ܕܐܢܬܝ ܥܒ̣ܕܬܝ ܠܝ ܗܠܝܢ ܟܠܗܝܢ̇ ܡܛܠ ܕܡܥܩܒܐ ܐܢܬ ܥܠ ܐܘܪ̈ܚܬܗ ܕܡܪܝܡܐ
5 ܘܗܐ ܡܫܪܝ ܐܢܐ ܒܢܦܫܝ ܘܪܘܚܝ ܒܨܪܬ ܣ̇ܓܝ ܘܠܐ ܐܫܬܚܪ ܒܝ ܚܝܠܐ ܐܦܠܐ ܩܠܝܠ ܡܢ ܕܚܠܬܐ ܣܓܝܐܬܐ ܕܕܚ̇ܠܬ ܒܗܢܐ ܠܠܝܐ ܀
6 ܘܗܫܐ ܐܒ̇ܥܐ ܡܢ ܡܪܝܡܐ ܘܢܚܝܠܢܝ ܥܕܡܐ ܠܚܪܬܐ
7 ܘܐܡ̇ܪܬ ܐܘ ܡܪܝܐ ܡܪܝ ܐܢ ܐܫܟ̇ܚܬ ܪ̈ܚ̣ܡܐ ܒܥ̈ܝܢܝܟ ܘܐܢ ܫܪܝܪܐܝܬ ܐܝܬ ܠܝ ܛܘܒܐ ܠܘܬܟ ܝܬܝܪ ܡܢ ܣܓ̈ܝܐܐ ܘܐܢ ܒܩܘܫܬܐ ܣܠ̣ܩܬ ܒܥܘܬܝ ܩܕܡ ܪܒܘܬܐ ܕܦܪܨܘܦܟ̣
8 ܚܝܠܝܢܝ ܘܐܘܕܥܝܢܝ ܠܝ ܠܥ̣ܒܕܟ ܦܘܫܩܗ ܘܦܘܪܫܢܗ ܕܚܙܘܐ ܗܢܐ ܕܚ̇ܙܝܬ ܡܛܠ ܕܡܠܝܐܝܬ ܬܒܝܐܗ̇ ܠܢܦܫܝ
9 ܠܘ ܓܝܪ ܕܫ̇ܘܐ ܐܢܐ̇ ܚܫܒܬܢܝ ܕܬܓܠܐ ܠܝ ܫܘܠܡܗܘܢ ܕܙܒ̈ܢܐ ܘܚܪܬܗܘܢ ܕܥܕ̈ܢܐ ܀ ܘܥܢ̣ܐ ܘܐܡ̣ܪ ܠܝ
10 ܗܢܘ ܦܘܫܩܗ ܕܚܙܘܐ ܕܚ̣ܙܝܬ
11 ܢܫܪܐ ܕܚܙ̣ܝܬ ܕܣܠ̣ܩ ܡܢ ܝܡܐ̣ ܗܕܐ ܗܝ ܡ̇ܠܟܘܬܐ ܪܒܝܥܝܬܐ ܗ̇ܝ ܕܐܬ̣ܚܙܝܬ ܒܚܙܘܐ ܠܐܚܘܟ ܕܢܝܐܝܠ
12 ܐܠܐ ܠܐ ܐܬܦܫ̣ܩܬ ܠܗ ܐܝܟ ܕܡܦܫܩ ܐܢܐ ܠܟ ܗܫܐ ܐܘ̣ ܐܝܟ ܕܦܫ̇ܩܬ ܠܟ ܀
13 ܗܐ ܝܘܡ̈ܬܐ ܐܬ̇ܝܢ ܘܬܩܘܡ ܡܠܟܘܬܐ ܥܠ ܐܪܥܐ ܘܬܗܘܐ ܕܚܝܠܐ ܡܢ ܟܠܗܝܢ ܡܠܟܘ̈ܬܐ ܕܗ̈ܘܝ ܡܢ ܩܕܡܝܗ̇
14 ܘܢܡܠܟܘܢ ܒܗ̇ ܬܪܥܣܪ ܡ̈ܠܟ̇ܝܢ ܚܕ ܒܬܪ ܚܕ
15 ܬܢܝܢܐ ܕܝܢ ܟܕ ܢܡܠܟ̣ ܗ̣ܘ ܢܐܚܘܕ ܙܒܢܐ ܝܬܝܪ ܡܢ ܗ̇ܢܘܢ ܬܪܥܣܪ
16 ܗܢܘ ܦܘܫܩܐ ܕܬܪܥܣܪ ܓ̈ܦܐ ܕܚ̣ܙܝܬ
17 ܘܡܛܠ ܕܚ̣ܙܝܬ ܩܠܐ ܕܡܡܠܠ ܗܘܐ ܘܠܐ ܢܦ̇ܩ ܗܘܐ ܡܢ ܪܝܫܗ ܕܢܫܪܐ ܐܠܐ ܡܢ ܡܨܥܬܗ ܕܦܓܪܗ̣
18 ܗܕܐ ܗܝ ܡܠܬܐ ܡܛܠ ܕܒܝܢܬ ܙܒܢܗ̇ ܕܡܠܟܘܬܐ ܗ̇ܝ̣ ܗ̈ܘܝܢ ܦܠܓܘ̈ܬܐ ܣܓܝܐ̈ܬܐ ܘܩܝܢܕܘܢܘܣ ܬܥܒܕ ܕܬܦ̣ܠ ܘܠܐ ܬܦ̣ܠ ܗܝ̇ܕܝܢ ܐܠܐ ܕܬܘܒ ܬܬܩܢ ܠܪܝܫܢܘܬܗ̇ ܩܕܡܝܬܐ
19 ܘܡܛܠ ܕܚ̣ܙܝܬ ܓ̈ܦܐ ܙܥܘܪ̈ܐ ܬܡܢܝܐ ܕܝܥܘ ܬܚܝܬ ܓܦܘ̈ܗܝ̣
20 ܗܕܐ ܗܝ ܡܠܬܐ ܢܩܘܡܘܢ ܒܗ̇ ܓܝܪ ܬܡܢܝܐ ܡ̈ܠܟ̇ܝܢ̇ ܗܠܝܢ ܕܗ̇ܘܝܢ ܙܒܢܝ̈ܗܘܢ ܩܠܝܠܝܢ ܘܥܕܢ̈ܝܗܘܢ ܡܣܪܗܒܝܢ ܘܬܪܝܢ ܡܢܗܘܢ ܢܐܒܕܘܢ
21 ܟܕ ܢܡܛܐ ܙܒܢܐ ܕܢܦܠܓ ܘܐܪܒܥܐ ܢܬܢܛܪܘܢ ܠܙܒܢܐ ܕܟܕ ܢܡܛܐ ܙܒܢܗ ܕܢܫܠܡ ܬܪܝܢ ܕܝܢ ܢܬܢܛܪܘܢ ܠܫܘܠܡܐ
22 ܘܡܛܠ ܕܚ̣ܙܝܬ ܒܗ ܬܠܬܐ ܪ̈ܝܫܝܢ ܕܫ̣ܠܝܢ̣
23 ܗܕܐ ܗܝ ܡܠܬܐ ܒܚܪܬܗܘܢ ܕܙܒ̈ܢܐ ܢܩܝܡ ܡܪܝܡܐ ܬܠܬܐ ܡ̈ܠܟ̇ܝܢ ܘܢܚܕܬܘܢ ܒܗ̇ ܣܓܝܐ̈ܬܐ ܘܢܫܚܩܘܢܝܗ̇ ܠܐܪܥܐ
24 ܘܠܥܡܘܪ̈ܝܗ̇ ܒܥܡܠܐ ܣܓܝܐܐ ܝܬܝܪ ܡܢ ܟܠܗܘܢ ܐܝܠܝܢ ܕܗܘܘ ܡܢ ܩܕܡܝܗܘܢ ܡܛܠ ܗܢܐ ܗ̣ܢܘܢ ܐܬܩܪܝܘ ܪ̈ܝܫܘܗܝ ܕܢܫܪܐ
25 ܗ̣ܢܘܢ ܐܢܘܢ ܓܝܪ ܕܡܚܕܬܝܢ ܪܘܫܥܗ ܘܗ̣ܢܘܢ ܡܫܠܡܝܢ ܠܗ ܠܚܪܬܗ
26 ܘܡܛܠ ܕܚ̣ܙܝܬ ܠܗ̇ܘ ܚܕ ܪܫܐ ܪܒܐ ܕܐܬܚܒܠ̣ ܡܛܠ ܕܚܕ ܡܢܗܘܢ ܢܡܘܬ ܒܠܚܘܕ ܥܠ ܥܪܣܗ ܐܦ ܗ̣ܘ ܕܝܢ ܟܕ ܡܫܬܢܩ
27 ܗ̇ܢܘܢ ܕܝܢ ܬܪܝܢ ܕܐܫܬܚܪܘ̣ ܚܪܒܐ ܬܐܟܘܠ ܐܢܘܢ
28 ܡܛܠ ܕܚܪܒܗ ܕܚܕ ܬܐܟܘܠ ܠܚܒܪܗ ܐܠܐ ܕܝܢ ܐܦ ܗ̣ܘ ܒܚܪܬܐ ܒܚܪܒܐ ܢ̇ܦܠ
29 ܘܡܛܠ ܕܚܙ̣ܝܬ ܓ̈ܦܐ ܬܪܝܢ ܕܐܙܠܘ ܠܘܬ ܪܝܫܐ ܕܒܓܒܐ ܕܝܡܝܢܐ
30 ܗܕܐ ܗܝ ܡܠܬܐ ܗܠܝܢ ܐܢܘܢ ܕܦ̣ܪܫ ܡܪܝܡܐ ܠܫܘܠܡܗ ܘܠܡܠܟܘܬܗܘܢ ܢܗܘܐ ܫܘܠܡܐ ܘܫܓܘܫܝܐ ܬܗܘܐ ܡܠ̣ܝܐ
31 ܐܝܟ ܕܚ̣ܙܝܬ ܀ ܘܕܚܙܝܬ ܐܪܝܐ ܕܐܬܬܥܝܪ ܡܢ ܥܒܐ ܕ̇ܓܥܐ ܘܢܗ̇ܡ ܘܡܡܠܠ ܠܘܬ ܢܫܪܐ ܘܡܟܣ ܗܘܐ ܠܗ ܥܠ ܥ̣ܘܠܗ ܘܟܠܗܝܢ ܡ̈ܠܐ ܐܝܟ ܕܫܡ̣ܥܬ
32 ܗ̣ܘܝܘ ܡܫܝܚܐ̇ ܗ̇ܘ ܕܢܛ̇ܪ ܡܪܝܡܐ ܠܫܘܠܡܗܘܢ ܕܝܘܡ̈ܬܐ ܗ̇ܘ ܕܕܢ̇ܚ ܡܢ ܙܪܥܗ ܕܕܘܝܕ ܘܢܐܬܐ ܘܢܡܠܠ ܥܡܗܘܢ ܘܢܟܣ ܐܢܘܢ ܥܠ ܪܘܫܥܗܘܢ ܘܥܠ ܡܒܐܫܢܘܬܗܘܢ ܢܟܘܢ ܐܢܘܢ ܘܢܣܕܘܪ ܩܕܡܝܗܘܢ ܥ̣ܘܠܗܘܢ
33 ܢܩܝܡ ܐܢܘܢ ܓܝܪ ܩܕܡܝ ܒܕܝ̣ܢܗܘܢ ܟܕ ܚ̈ܝܝܢ ܘܢܗܘܐ ܟܕ ܢܟܣ ܐܢܘܢ ܗ̇ܝܕܝܢ ܢܚ̇ܒܠ ܐܢܘܢ
34 ܠܥܡܝ ܕܝܢ ܕܐܫܬܚܪ ܢܦܪܘܩ ܒ̣ܪ̈ܚܡܐ ܠܐܝܠܝܢ ܕܩ̣ܘܝܘ ܒܬܚ̈ܘܡܝ ܘܢܒܣܡ ܐܢܘܢ ܥܕܡܐ ܕܢܐܬܐ ܫܘܠܡܐ ܕܝܘܡܗ ܕܕܝ̣ܢܐ ܥܠ ܗ̇ܘ ܕܡ̇ܠܠܬ ܥܡܟ ܡܢ ܩܕܝܡ̣
35 ܗܢܘ ܚܙܘܐ ܕܚܙ̣ܝܬ ܘܗܢܘ ܦܘܫܩܗ
36 ܘܐܢܬ ܗܘ ܒܠܚܘܕܝܟ ܐܫܬܘ̣ܝܬ ܕܬܕܥ ܪܐܙܗ ܕܡܪܝܡܐ
37 ܟܬܘܒ ܗܟܝܠ ܒܣܦܪܐ ܗܠܝܢ ܟܠܗܝܢ ܕܚܙ̣ܝܬ ܘܣ̣ܝܡ ܐ̈ܢܝܢ ܒܕܘܟܬܐ ܕܟܣܝܐ
38 ܘܐܠܦ ܐ̈ܢܝܢ ܠܚܟܝ̈ܡܘܗܝ ܕܥܡܟ ܐܝܠܝܢ ܕܝ̣ܕܥܬ ܕܡܫܟܚܝܢ ܠܒܘ̈ܬܗܘܢ ܐܚ̇ܕܝܢ ܠܡܛܪ ܪ̈ܐܙܐ ܗܠܝܢ
39 ܐܢܬ ܕܝܢ ܣܝܒܪ ܗܪܟܐ ܬܘܒ ܫܒܥܐ ܝܘܡ̈ܝܢ ܐܚܪ̈ܢܝܢ ܡܛܠ ܕܢܬܓܠܐ ܠܟ ܡܕܡ ܕܨ̇ܒܐ ܡܪܝܡܐ ܕܢܓܠܐ ܠܟ
40 ܘܐ̣ܙܠ ܠܗ ܡܢ ܠܘܬܝ ܀ ܘܗ̣ܘܐ ܕܟܕ ܚܙܘ ܥܡܐ ܕܥ̣ܒܪܘ ܫܒܥܐ ܝܘܡ̈ܝܢ ܘܠܐ ܐ̇ܬܝܬ ܠܡܕܝܢܬܐ̣ ܐܬܟܢܫܘ ܟܠܗ ܥܡܐ ܡܢ ܙܥܘܪܐ̣ ܥܕܡܐ ܠܪܒܐ ܘܩ̇ܡܘ ܘܐܬܘ ܠܘܬܝ ܘܥܢܘ ܘܐܡ̇ܪܝܢ ܠܝ
41 ܡܢܐ ܚ̇ܛܝܢܢ ܠܟ ܐܘ ܡܢܐ ܐܒܫܢܢ ܠܟ̇ ܕܫܒܩܬܢ ܘܝܬ̣ܒܬ ܠܟ ܒܐܬܪܐ ܗܢܐ
42 ܐܢܬ ܗܘ ܓܝܪ ܐܫܬܚ̣ܪܬ ܠܢ ܡܢ ܟܘܠܗܘܢ ܢܒ̈ܝܐ̣ ܐܝܟ ܣܓܘܠܐ ܡܢ ܩܛܦܐ ܘܐܝܟ ܫܪܓܐ ܒܐܬܪܐ ܚܫܘܟܐ ܘܐܝܟ ܠܡܐܢܐ ܕܚ̈ܝܐ ܠܐܠܦܐ ܡܐ ܕܩܝ̇ܡܐ ܒܡܚܫܘܠܐ
43 ܐܘ ܠܐ ܣ̇ܦܩܢ ܠܢ ܒܝ̈ܫ̣ܬܐ ܕܓܕ̈ܫܢ ܐܠܐ ܕܐܦ ܐܢܬ ܬܫܒܩܢ
44 ܘܐܢ ܕܝܢ ܫܒ̇ܩ ܐܢܬ ܠܢ̣ ܦܩܚ ܗܘܐ ܠܢ ܕܐܠܘ ܝܩ̈ܕܢ ܐܦ ܚܢܢ ܒܝܩܕܢܗ̇ ܕܨܗܝܘܢ
45 ܠܐ ܗܘܐ ܓܝܪ ܡܝܬ̇ܪܝܢܢ ܡܢ ܗ̇ܢܘܢ ܕܡܝܬܘ ܬܡܢ ܘܒ̇ܟܝܬ ܒܩܠܐ ܪܡ̇ܐ ܘܥ̇ܢܝܬ ܘܐܡ̇ܪܬ ܠܗܘܢ
46 ܐܬܠܒܒ ܐܝܣܪܝܠ ܘܠܐ ܬܟܪܐ ܠܟ ܒܝܬܗ ܕܝܥܩܘܒ
47 ܐܝܬܘܗܝ ܓܝܪ ܕܘܟܪܢܟܘܢ ܩܕܡ ܡܪܝܡܐ ܘܚܝܠܬܢܐ ܠܐ ܛܥ̇ܐ ܠܟܘܢ ܠܥܠܡ
48 ܐܢܐ ܕܝܢ ܠܐ ܫܒܩܬܟܘܢ ܘܠܐ ܫ̇ܒܩ ܐܢܐ ܠܟܘܢ ܐܠܐ ܐ̇ܬܝܬ ܠܐܬܪܐ ܗܢܐ ܕܐܒ̇ܥܐ ܥܠ ܚܘܪܒܗ̇ ܕܨܗܝܘܢ ܘܕܐܫܐܠ ܪ̈ܚ̣ܡܐ ܥܠ ܡܘܟܟܗ ܕܒܝܬ ܡܩܕܫܢ
49 ܘܗܫܐ̣ ܙܠ̣ܘ ܟܘܠ ܐܢܫ ܠܒܝܬܗ ܘܐܢܐ ܐ̇ܬܐ ܐܢܐ ܠܘܬܟܘܢ ܡܢ ܒܬܪ ܗܠܝܢ ܝܘܡ̈ܬܐ
50 ܘܐܙܠܘ ܥܡܐ ܠܡܕܝܢܬܐ ܐܝܟ ܕܐܡ̇ܪܬ ܠܗܘܢ
51 ܐܢܐ ܕܝܢ ܝܬ̇ܒܬ ܒܦܩܥܬܐ̣ ܫܒܥܐ ܝ̈ܘܡܝܢ ܐܝܟ ܕܦܩܕܢܝ ܘܐ̇ܟܠ ܗ̇ܘܝܬ ܡܢ ܗܒ̈ܒܐ ܕܕܒܪܐ ܒܠܚܘܕ ܘܡܢ ܥ̇ܩܪ̈ܐ ܗ̣ܘܐ ܡܙܘܢܝ ܒܗ̇ܢܘܢ ܝܘܡ̈ܬܐ ܀