1 ܘܚ̇ܙܝܬ ܚܙܘܐ ܘܗܐ ܥܢܢܐ ܚܕܐ ܣ̇ܠܩܐ ܗܘܬ ܡܢ ܝܡܐ ܪܒܐ ܣ̇ܓܝ ܘܚܐ̇ܪ ܗ̇ܘܝܬ ܒܗ̇ ܘܗܐ ܡܠܝܐ ܗܘܬ ܡ̈ܝܐ ܚ̇ܘ̣ܪ̈ܐ ܘܐܘܟܡ̈ܐ ܘܓܘ̈ܢܐ ܣܓ̈ܝܐܐ ܐܝܬ ܗܘܐ ܒܗܘܢ ܒܡ̈ܝܐ ܗܠܝܢ ܘܐܝܟ ܕܡܘܬܐ ܕܒܪܩܐ ܪܒܐ̣ ܡܬܚܙܐ ܗܘܐ ܒܪܝܫܗ̇
2 ܘܚܙܝܬܗ̇ ܠܥܢܢܐ ܗ̇ܝ ܕܥ̇ܒܪܐ ܚܪܝܦܐܝܬ ܒܪ̈ܗܛܐ ܩܠܝ̈ܠܐ ܘܟܣܝܬܗ̇ ܠܟܠܗ̇ ܐܪܥܐ
3 ܘܗ̣ܘܐ ܡܢ ܒܬܪ ܗܠܝܢ ܫ̣ܪܝܬ ܗܘܬ ܥܢܢܐ ܗ̇ܝ ܡܡܛܪܐ ܥܠ ܐܪܥܐ̇ ܡ̈ܝܐ ܕܐܝܬ ܗܘܐ̇ ܒܗ̇
4 ܘܚ̇ܙܝܬ ܕܠܐ ܗܘܐ ܚܕܐ ܗܘܬ ܕܡܘܬܗܘܢ ܕܡ̈ܝܐ ܗ̇ܢܘܢ ܕܢܚܬ̇ܝܢ ܗܘܘ ܡܢܗ̇
5 ܫܘܪܝܐ ܓܝܪ ܩܕܡܝܐ ܐܘܟܡܝܢ ܗܘܘ ܣ̇ܓܝ ܥܕܡܐ ܠܥܕܢܐ ܘܡܢ ܒܬܪܟܢ ܚܙ̇ܝܬ ܕܢܗ̇ܪܝܢ ܗܘܘ ܡ̈ܝܐ ܐܠܐ ܠܐ ܣܓܝܐܝܢ ܗܘܘ ܘܡܢ ܒܬܪ ܗܠܝܢ ܬܘܒ̣ ܚ̇ܙܝܬ ܐܘܟܡ̈ܐ ܘܡܢ ܒܬܪ ܗܠܝܢ ܬܘܒ ܢܗܝܪ̈ܐ ܘܬܘܒ ܐܘܟܡ̈ܐ ܘܬܘܒ ܢܗܝܪ̈ܐ
6 ܗܕܐ ܕܝܢ ܗܘܬ ܥܕܡܐ ܠܬܪ̈ܬܥܣܪ̈ܐ ܙܒܢ̈ܝܢ ܐܠܐ ܐܘܟ̈ܡܐ ܣܓܝܐ̈ܝܢ ܗܘܘ ܒܟܠܙܒܢ ܡܢ ܢܗܝܪ̈ܐ
7 ܘܗ̣ܘܐ ܒܫܘܠܡܗ̇ ܕܥܢܢܐ ܘܗܐ ܐܡ̣ܛܪܬ ܡ̈ܝܐ ܐܘܟܡ̈ܐ ܘܚܫܘܟܝܢ ܗܘܘ ܝܬܝܪ ܡܢ ܟܠܗܘܢ ܡ̈ܝܐ ܗ̇ܢܘܢ ܩܕ̈ܡܝܐ ܕܗܘܘ ܘܢܘܪܐ ܡܚܠܛܐ ܗܘܬ ܒܗܘܢ ܘܐܝ̇ܟܐ ܕܢܚ̇ܬܝܢ ܗܘܘ ܡ̈ܝܐ ܗܢ̇ܘܢ ܥܒ̇ܕܝܢ ܗܘܘ ܚܒ̇ܠܐ ܘܐܒܕܢܐ
8 ܘܚܙ̇ܝܬ ܡܢ ܒܬܪ ܗܠܝ̣ܢ ܠܗ̇ܘ ܒܪܩܐ ܕܚܙ̇ܝܬ ܗܘ̇ܝܬ ܒܪܝܫܗ̇ ܕܥܢܢܐ ܕܐܚܕܗ̇ ܘܐܚܬܗ̇ ܥܕܡܐ ܠܐܪܥܐ
9 ܘܝܬܝܪܝܬ ܕܝܢ ܢܗ̣ܪ ܗܘܐ ܒܪܩܐ ܗ̇ܘ ܐܝܟ ܕܢܢܗܪ ܠܟܠܗ̇ ܐܪܥܐ ܘܐܣܝ ܠܗ̇ܢܘܢ ܐܬܪ̈ܘܬܐ ܐܝ̇ܟܐ ܕܢܚܬܘ ܡ̈ܝܐ ܐܚܪ̈ܝܐ ܘܚ̇ܒܠܘ
10 ܘܐܚܝܕ ܗܘܐ ܠܟܠܗ̇ ܐܪܥܐ ܘܐܫܬܠܛ ܥܠܝܗ̇
11 ܘܚ̇ܙܝܬ ܡܢ ܒܬܪ ܗܠܝܢ̣ ܘܗܐ ܬܪܥܣܪ̈ ܢܗܪ̈ܘܢ ܣ̇ܠܩܝܢ ܗܘܘ ܡܢ ܝܡܐ ܘܚܕܝܪܝܢ ܗܘܘ ܠܗ ܠܗ̇ܘ ܒܪܩܐ ܘܡܫܬܥܒܕ̇ܝܢ ܗܘܘ ܠܗ
12 ܘܐܢܐ ܡܢ ܕܚܠܬܝ ܐܬܬ̇ܥܝܪܬ ܰ