1 ܘܒܥ̇ܝܬ ܡܢ ܚܝܠܬܢܐ ܘܐܡ̇ܪܬ ܐܢܬ ܡܪܝܐ ܒܠܚܘܕܝܟ ܡܩܕܡ ܐܢܬ ܝܕ̇ܥ ܐܢܬ ܪ̈ܘܡܘܗܝ ܕܥܠܡܐ ܘܡܕܡ ܕܒܙܒ̈ܢܐ ܓܕ̇ܫ ܡܝܬܐ ܐܢܬ ܒܡܠܬܟ ܘܠܘܩܒܠ ܥ̇ܒ̈ܕܝܗܘܢ ܕܥܡܘܪ̈ܝܗ̇ ܕܐܪܥܐ ܡܣܪܗܒܬ ܪ̈ܫܝܗܘܢ ܕܙܒ̈ܢܐ ܘܣܘܦܗܘܢ ܕܥ̈ܕܢܐ ܐܢܬ ܒܠܚܘܕܝܟ ܝܕ̇ܥ ܐܢܬ
2 ܗ̇ܘ ܕܡܕܡ ܠܐ ܥܛ̣ܠ ܠܗ ܐܠܐ ܟܘܠ ܡܕܡ ܦܫܝܩܐܝܬ ܒܪܡܙܐ ܥ̇ܒܕ ܐܢܬ
3 ܗ̇ܘ ܕܥܘܡ̈ܩܐ ܐܝܟ ܪ̈ܘܡܐ ܐܬ̇ܝܢ ܠܘܬܟ ܘܪ̈ܝܫܝ ܥܠܡ̈ܐ ܠܡܠܬܟ ܡܫܡܫܝܢ
4 ܗ̇ܘ ܕܓ̇ܠܐ ܠܐܝܠܝܢ ܕܕܚ̇ܠܝܢ ܠܡܕܡ ܕܥܬܝܕ ܠܗܘܢ ܕܡܢ ܗܪܟܐ ܢܒܝܐܐ ܐܢܘܢ̣
5 ܡܘܕܥ ܓܢܒܪ̈ܘܬܐ ܠܐܝܠܝܢ ܕܠܐ ܝܕܥ̇ܝܢ ܬܪܥ ܣܝܓܐ ܠܐܝܠܝܢ ܕܠܐ ܡܦܣܝܢ ܘܡܢܗܪ ܚܫܘܟ̈ܬܐ ܘܓ̇ܠܐ ܟܣܝ̈ܬܐ ܠܐܝܠܝܢ ܕܕܠܐ ܡܘܡ ܐܢܘܢ ܐܝܠܝܢ ܕܒܗܝܡܢܘܬܐ ܐܫܬܥܒܕܘ ܠܟ ܘܠܢܡܘܣܟ
6 ܐܢܬ ܚܘ̣ܝܬ ܠܥ̣ܒܕܟ ܚܙܘܢܐ ܗܢܐ ܓ̇ܠܐ ܠܝ ܐܦ ܦܘܫܩܗ
7 ܝܕ̇ܥ ܐܢܐ ܓܝܪ ܕܥܠ ܐ̇ܝܠܝܢ ܕܒ̇ܥ̇ܝܬ ܡܢܟ ܢܣ̇ܒܬ ܦܬܓܡܐ ܘܥܠ ܡܕܡ ܕܒ̇ܥܝܬ ܓܠ̣ܝܬ ܠܝ ܘܐܘܕܥܬܢܝ ܒܐܝ̇ܢܐ ܩܠܐ ܐܫ̇ܒܚܟ ܐܘ ܡܢ ܐܝܠܝܢ ܗܕ̈ܡܐ ܐܣܩ ܠܟ ܬܫܒܘܚܬܐ ܘܗܘܠܠܐ
8 ܐܢ ܓܝܪ ܢܗܘܘܢ ܗܕܡ̈ܝ ܦܘ̈ܡܐ ܘܡܢ̈ܐ ܕܪ̈ܝܫܝ ܩ̈ܠܐ̣ ܐܦ ܠܐ ܗܟܢܐ ܡܫܟܚ ܐܢܐ ܕܐ̇ܦܪܥܟ ܬܫܒܘܚܬܐ ܐܘ ܕܐ̇ܫܒܚܟ ܐܝܟ ܕܙܕܩ̇ ܘܠܐ ܬܫܒܘܚܬܟ ܡ̇ܫܟܚ ܐܢܐ ܕܐ̇ܬܢܐ̇ ܐܘ ܕܐܡ̇ܪ ܗܕܪܐ ܕܝܐܝܘܬܟ
9 ܡܢܐ ܓܝܪ ܐܢܐ ܒܒܢܝܢ̈ܫܐ ܐܘ ܡܢܐ ܚܫܝܒ ܐܢܐ ܒܐܝܠܝܢ ܕܡܝܬܪܝܢ ܡܢܝ ܕܫܡ̇ܥܬ ܗܠܝܢ ܟܘܠܗܝܢ ܬܡܝ̈ܗܬܐ ܡܢ ܡܪܝܡܐ ܘܣܒܪ̈ܬܐ ܕܠܐ ܡܣܬ̈ܝܟܢ ܡܢ ܗ̇ܘ ܕܒܪܢܝ
10 ܛܘܒ̈ܝܗ̇ ܠܐܡܝ ܒܝܠܕ̈ܬܐ ܘܬܫܬܒܚ ܒܢ̈ܫܐ ܝܠܕܬܝ
11 ܐܢܐ ܕܝܢ ܠܐ ܐܫ̇ܬܘܩ ܕܐܫ̇ܒܚ ܠܚܝܠܬܢܐ ܐܠܐ ܒܩܠܐ ܕܫܘܒܚܐ ܐܬ̇ܢܐ ܬܕܡܪ̈ܬܗ
12 ܘܡ̣ܢܘ ܓܝܪ ܡܬܕܡܐ ܒܬܕܡܪ̈ܬܟ ܐܠܗܐ ܐܘ ܡܢ̣ܘ ܡܕܪܟ ܡܚܫܒܬܟ ܥܡܝܩܬܐ ܕܚܝ̈ܐ
13 ܐܢܬ ܓܝܪ ܒܬܪܥܝܬܟ ܡܕܒܪܬ ܟܠ ܒܪ̈ܝܬܐ ܕܒܪܬ ܝܡܝܢܟ ܘܐܢܬ ܟܘܠ ܡܒܘܥܐ ܕܢܘܗܪܐ ܠܘܬܟ ܬܩܢ̣ܬ ܘܐܘܨܪ̈ܐ ܕܚܟܡܬܐ ܬܚܝܬ ܬܪܘܢܘܣ ܕܝܠܟ ܥܬ̣ܕܬ
14 ܘܟܐܢܐܝܬ ܐܒ̇ܕܝܢ ܐܝܠܝܢ ܕܠܐ ܐܚܒܘ ܠܢܡܘܣܟ ܘܬܫܢܝܩܐ ܕܕܝ̣ܢܐ ܡܩܒܠ ܠܐܝܠܝܢ ܕܠܐ ܐܫܬܥܒܕܘ ܠܐܘܚܕܢܟ
15 ܐܢ ܐܕܡ ܓܝܪ ܩܕܡܝ ܚܛ̣ܐ ܘܐܝܬܝ ܡܘܬܐ ܥܠ ܟܠ ܕܠܐ ܒܙܒܢܗ ܐܠܐ ܐܦ ܐܝܠܝܢ ܕܐܬܝܠܕܘ ܡܢܗ ܟܘܠ ܐܢܫ ܐܢܫ ܡܢܗܘܢ ܛܝܒ ܠܢܦܫܗ ܬܫܢܝܩܐ ܕܥܬܝܕ ܘܬܘܒ ܐܢܫ ܐܢܫ ܡܢܗܘܢ ܓܒ̣ܐ ܠܗ ܬܫܒ̈ܚܬܐ ܕܥܬܝ̈ܕܢ
16 ܫܪܝܪܐܝܬ ܓܝܪ ܗ̇ܘ ܕܡܗ̇ܝܡܢ ܢܣܒ ܐܓܪܐ
17 ܗܫܐ ܕܝܢ ܗܦܘܟܘ ܠܚ̣ܒܠܐ ܥ̈ܘ̇ܠܐ ܕܗܫܐ ܡܛܠ ܕܚܪܝܦܐܝܬ ܡܬܦܩܕܝܢ ܐܢܬܘܢ ܕܒܙܒܢ ܐܣܠܝܬܘܢ ܐܢܬܘܢ ܣܟܘܠܬܢܘܬܗ ܕܡܪܝܡܐ
18 ܠܐ ܓܝܪ ܐܠܦܟܘܢ ܥ̈ܒ̇ܕܘܗܝ ܐܦ ܠܐ ܐܦܝܣܬܟܘܢ ܐܘܡܢܘܬܐ ܕܒ̣ܪܝܬܗ ܕܒܟܠܙܒܢ
19 ܠܐ ܐܝܬܘܗܝ ܗܟܝܠ ܐܕܡ ܥܠ̣ܬܐ ܐܠܐ ܠܢܦܫܗ ܒܠܚܘܕ ܟܠܢ ܕܝܢ ܐܢܫ ܐܢܫ ܗ̣ܘܐ ܠܢܦܫܗ ܐܕܡ
20 ܐܢܬ ܕܝܢ ܡܪܝܐ ܥܠ ܐܝܠܝܢ ܕܓܠ̣ܝܬ ܠܝ ܦܫ̇ܩ ܠܝ ܘܥܠ ܡܕܡ ܕܒ̇ܥܝܬ ܡܢܟ ܐ̇ܘܕܥܝܢܝ
21 ܒܫܘܠܡܗ ܓܝܪ ܕܥܠܡܐ ܬܒܥܬܐ ܗܘ̇ܝܐ ܡܢ ܐܝܠܝܢ ܕܐܥܘܠܘ ܐܝܟ ܥܘ̣ܠܗܘܢ ܘܡܫܒܚ ܐܢܬ ܠܡܗܝܡ̈ܢܐ ܐܝܟ ܗܝܡܢܘܬܗܘܢ
22 ܠܐܝܠܝܢ ܓܝܪ ܕܒܕܝܠܟ ܐܢܘܢ ܐܢܬ ܡܕܒܪܬ ܘܠܐܝܠܝܢ ܕܚ̇ܛܝܢ ܥ̇ܛܐ ܐܢܬ ܡܢ ܕܝܠܟ ܀