1 ܘܢܗܘܐ ܡܢ ܒܬܪ ܕܥܒ̇ܪ ܗ̇ܘ ܝܘܡܐ ܕܩܝ̇ܡ ܗ̇ܝܕܝܢ ܡܢ ܒܬܪ ܟܢ ܡܬܚܠܦܐ ܕܡܘܬܗܘܢ ܕܐܝܠܝܢ ܕܡܬܚܝܒܝܢ ܐܦ ܬܫܒܘܚܬܗܘܢ ܕܐܝܠܝܢ ܕܡܙܕܕܩܝܢ
2 ܡܬܥܒܕܐ ܓܝܪ ܕܡܘܬܗܘܢ ܕܐܝܠܝܢ ܕܗܫܐ ܡܪܫܥܝܢ ܒܝܫ ܡܢ ܡܐ ܕܐܝܬܝܗ̇ ܐܝܟ ܕܢܣܝܒܪܘܢ ܬܫܢܝܩܐ
3 ܐܦ ܬܫܒܘܚܬܗܘܢ ܕܐܝܠܝܢ ܕܗܫܐ ܐܙܕܕܩܘ ܒܢܡܘܣܝ ܗܠܝܢ ܕܐܝܬ ܗܘܐ ܠܗܘܢ ܣܘܟܠܐ ܒܚܝ̈ܝܗܘܢ ܘܗܠܝܢ ܕܢܨܒܘ ܒܠܒܗܘܢ ܥܩ̇ܪܗ̇ ܕܚܟܡܬܐ ܗܝ̇ܕܝܢ ܢܫܬܒܚ ܙܝܘܗܘܢ ܒܫܘܚ̈ܠܦܐ ܘܬܬܗܦܟ ܕܡܘܬܐ ܕܐܦܝ̈ܗܘܢ ܠܢܘܗܪܐ ܕܝܐܝܘܬܗܘܢ ܕܢܫܟܚܘܢ ܕܢܣܒܘܢ ܘܢܩܒܠܘܢ ܥܠܡܐ ܕܠܐ ܡܐ̇ܬ ܕܗܝܕܝܢ ܡܠܝܟ ܠܗܘܢ
4 ܒܗܕܐ ܓܝܪ ܝܬܝܪܐܝܬ ܢܬܬܢܚܘܢ ܐܝܠܝܢ ܕܐܬ̇ܝܢ ܗܝ̇ܕܝܢ ܥܠ ܕܐܣܠܝܘ ܢܡܘܣܝ̇ ܘܣܟܪܘ ܐܕܢܝ̈ܗܘܢ ܕܠܐ ܢܫܡܥܘܢ ܚܟܡܬܐ ܘܠܐ ܢܩܒܠܘܢ ܣܘܟܠܐ
5 ܟܕ ܗܟܝܠ ܢܚܙܘܢ ܠܐܝܠܝܢ ܕܗܫܐ ܐܬܬܪܝܡܘ ܥܠܝܗܘܢ ܕܗܝ̇ܕܝܢ ܡܬܬܪܝܡܝܢ ܘܡܫܬܒܚܝܢ ܝܬܝܪ ܡܢܗܘܢ ܘܡܬܚܠܦܝܢ ܗܠܝܢ ܘܗܠܝܢ ܗܠܝܢ ܠܙܝܘܐ ܕܡܠܐ̈ܟܐ ܘܗ̇ܢܘܢ ܠܬܡܗܐ ܕܚܙ̈ܘܢܐ ܘܠܚܙܬܐ ܕܕܡ̈ܘܬܐ ܝܬܝܪܐܝܬ ܢܫܘܚܘܢ
6 ܠܘܩܕܡ ܓܝܪ ܚܙ̇ܝܢ ܘܒܬܪܟܢ ܐ̇ܙܠܝܢ ܕܢܫܬܢܩܘܢ
7 ܐܝܠܝܢ ܕܝܢ ܕܐܬܦܨܝܘ ܒܥ̇ܒ̈ܕܝܗܘܢ ܘܐܝܠܝܢ ܕܗ̣ܘܐ ܠܗܘܢ ܗܫܐ ܢܡܘܣܐ ܣܒܪܐ ܘܣܟܘܠܬܢܘܬܐ ܣܘܟܝܐ ܘܚܟܡܬܐ ܗܝܡܢܘܬܐ ܢܬܚ̈ܙܝܢ ܠܗܘܢ ܬܡܝ̈ܗܬܐ ܒܙܒܢܗܝܢ
8 ܚܙ̇ܝܢ ܓܝܪ ܗ̇ܘ ܥܠܡܐ ܕܠܐ ܡܬܚܙܐ ܠܗܘܢ ܗܫܐ ܘܢܚܙܘܢ ܠܙܒܢܐ ܕܗܫܐ ܟܣ̣ܐ ܡܢܗܘܢ
9 ܘܬܘܒ̣ ܠܐ ܢܥܬܩ ܐܢܘܢ ܙܒܢܐ
10 ܒܡܪ̈ܘܡܘܗܝ ܓܝܪ ܕܗ̇ܘ ܥܠܡܐ ܢܥܡܪܘܢ ܘܡܬܕܡܝܢ ܠܡܠܐ̈ܟܐ ܘܡܬܦܚܡܝܢ ܠܟܘܟ̈ܒܐ ܘܗ̇ܘܝܢ ܡܬܚܠܦܝܢ ܒܟܘܠ ܕܡܘ ܕܨ̇ܒܝܢ ܡܢ ܫܘܦܪܐ ܠܝܐܝܘܬܐ ܘܡܢ ܢܘܗܪܐ ܠܙܝܘܐ ܕܬܫܒܘܚܬܐ
11 ܢܬܦܫܛܘܢ ܓܝܪ ܩܕܡܝܗܘܢ ܦܬܝ̈ܘܗܝ ܕܦܪܕܝܣܐ ܘܢܬܚܘܐ ܠܗܘܢ ܫܘܦܪܐ ܕܪܒܘܬܐ ܕܚ̈ܝܬܐ ܕܬܚܝܬ ܬܪܘܢܘܣ ܘܟܘܠܗܘܢ ܚܝܠܘ̈ܬܐ ܕܡܠܐ̈ܟܐ ܕܐܚܝܕܝܢ ܗܫܐ ܒܡܠܬܝ ܐܝܟ ܕܠܐ ܢܬܚܙܘܢ ܘܐܚܝܕܝܢ ܒܦܘܩܕܢܐ ܐܝܟ ܕܢܩܘܡܘܢ ܒܐܬܪ̈ܘܬܗܘܢ ܥܕܡܐ ܕܬܐܬܐ ܡܐܬܝܬܗܘܢ
12 ܘܡܝܬܪܘܬܐ ܕܝܢ ܬܗܘܐ ܗܝ̇ܕܝܢ ܒܙܕܝ̈ܩܐ ܝܬܝܪ ܡܢ ܕܒܡܠܐ̈ܟܐ
13 ܢܩܒܠܘܢ ܓܝܪ ܩܕܡ̈ܝܐ ܠܐܚܪ̈ܝܐ ܠܗ̇ܢܘܢ ܕܡܣܟܝܢ ܗܘܘ ܠܗܘܢ ܘܐܚܪ̈ܝܐ ܠܐܝܠܝܢ ܕܫ̇ܡܥܝܢ ܗܘܘ ܕܥܒ̣ܪܘ
14 ܐܬܦܨܝܘ ܓܝܪ ܡܢ ܗܢܐ ܥܠܡܐ ܕܐܘܠܨܢܐ ܘܐܢܝܚܘ ܡܢܗܘܢ ܛܥܢܐ ܕܥ̇ܩ̈ܬܐ
15 ܒܡܢܐ ܗܟܝܠ ܐܘܒܕܘ ܒܢܝ̈ܢܫܐ ܚܝܝ̈ܗܘܢ ܘܒܡܢܐ ܚ̇ܠܦܘ ܢܦܫܗܘܢ ܐܝܠܝܢ ܕܒܐܪܥܐ ܗܘܘ
16 ܗܝ̇ܕܝܢ ܓܒܘ ܠܗܘܢ ܓܝܪ ܙܒܢܐ ܗܢܐ ܕܠܒ̣ܪ ܡܢ ܥܩ̈ܬܐ ܕܢܥܒܪ ܠܐ ܡܫܟܚ ܘܓܒܘ ܠܗܘܢ ܙܒܢܐ ܗ̇ܘ ܕܡ̈ܦܩܢܘܗܝ ܬܐܢܚ̈ܬܐ ܘܒܝܫ̣̈ܬܐ ܡܠ̣ܝܢ ܘܟܦܪܘ ܒܥܠܡܐ ܕܠܐ ܡܥܬܩ ܠܐܝܠܝܢ ܕܐܬ̇ܝܢ ܠܗ ܘܐܣܠܝܘ ܙܒܢܐ ܘܬܫܒܘܚܬܐ ܕܠܐ ܢܐܬܘܢ ܠܐܝܩܪܐ ܕܩ̇ܕܡܬ ܐܡ̇ܪܬ ܠܟ ܀