1 ܘܥ̣ܢܐ ܘܐܡ̣ܪ ܠܝ ܕܟܘܠܗ̇ ܗܘ ܐܪܥܐ ܡܕܡ ܕܓܕ̇ܫ ܗܝ̇ܕܝܢ ܡܛܠ ܗܢܐ ܟܠܗܘܢ ܐܝܠܝܢ ܕܚܝ̈ܝܢ ܢܪܓܫܘܢ
2 ܒܗ̇ܘ ܕܝܢ ܙܒܢܐ ܡܓܢ ܐܢܐ ܒܠܚܘܕ ܥܠ ܐܝܠܝܢ ܕܡܫܬܟܚܝܢ ܒܗܘܢ ܒܗ̇ܢܘܢ ܝܘܡ̈ܬܐ ܒܗܕܐ ܐܪܥܐ
3 ܘܢܗܘܐ ܡܢ ܒܬܪ ܕܫ̇ܠܡ ܡܕܡ ܕܥܬܝܕ ܕܢܗܘܐ ܒܗܠܝܢ ܡܢܘ̈ܬܐ̣ ܗܝ̇ܕܝܢ ܢ̇ܫܪܐ ܕܢܬܓܠܐ ܡܫܝܚܐ
4 ܘܢܬܓܠܐ ܒܗܡܘܬ ܡܢ ܐܬܪܗ ܘܠܘܝܬܢ ܢܣ̇ܩ ܡܢ ܝܡܐ̣ ܬܪ̈ܝܗܘܢ ܬܢ̈ܝܢܐ ܪ̈ܘܪܒܐ ܗܠܝܢ ܕܒ̇ܪܝܬ ܒܝܘܡܐ ܚܡܝܫܝܐ ܕܒ̣ܪܝܬܐ ܘܢܛܪܬ ܐܢܘܢ ܥܕܡܐ ܠܗ̇ܘ ܙܒܢܐ ܘܗ̇ܝܕܝܢ ܢܗܘܘܢ ܠܡܐܟܘܠܬܐ ܠܟܘܠܗܘܢ ܐܝܠܝܢ ܕܡܫܬܚܪܝܢ
5 ܐܦ ܐܪܥܐ ܬܬܠ ܦܐܪ̈ܝܗ̇ ܚܕ ܒܪ̈ܒܘ ܘܚܕܐ ܓܦܬܐ ܢܗ̈ܘܝܢ ܒܗ̇ ܐܠܦ ܫܒܫ̈ܬܝܢ ܘܚܕܐ ܫܒܫܬܐ ܬܥܒܕ ܐܠܦ ܣܓܘ̈ܠܝܢ ܘܚܕ ܣܓܘܠܐ ܢܥܒܕ ܐܠܦ ܥܢܒ̈ܝܢ ܘܚܕܐ ܥܢܒܬܐ ܬܥܒܕ ܟܘܪܐ ܕܚܡ̣ܪܐ
6 ܘܐܝܠܝܢ ܕܟܦ̣ܢܘ ܢܬܒܣܡܘܢ ܘܬܘܒ ܕܝܢ ܢܚܙܘܢ ܬܕܡܪ̈ܬܐ ܒܟܘܠ ܝܘܡ
7 ܪ̈ܘܚܐ ܓܝܪ ܢܦ̈ܩܢ ܡܢ ܩܕܡܝ ܠܡܝܬܝܘ ܒܟܠ ܨܦܪ ܘܨܦܪ ܪܝܚܐ ܕܦܐܪ̈ܐ ܕܒܣܡ̈ܢܐ ܘܒܫܘܠܡܗ ܕܝܘܡܐ ܥ̇ܢ̈ܢܐ ܕܪ̈ܣܢ ܛܠܐ ܕܐܣܝܘܬܐ
8 ܘܢܗܘܐ ܒܗ ܒܗ̇ܘ ܙܒܢܐ ܢܚܘܬ ܬܘܒ ܡܢ ܠܥܠ ܐܘܨ̇ܪܐ ܕܡܢܢܐ ܘܢܐܟܠܘܢ ܡܢܗ ܒܗܠܝܢ ܫܢ̈ܝܐ ܡܛܠ ܕܗ̣ܢܘܢ ܐܢܘܢ ܕܡܛܝܘ ܠܫܘܠܡܗ ܕܙܒܢܐ ܀